Vinthu Vakofya vo Vichitika pa Nyengu ya Nkhondu
Nkhondu kweniso vinthu vachiwawa vichitiska kuti ŵanthu akumanengi ndi masuzgu ngakulu ukongwa. Asilikali kweniso ŵanthu bweka wo muchigaŵa chawu mukuchitikapu nkhondu, ndiwu akumana ukongwa ndi masuzgu ngenanga.
VO ASILIKALI ANGUKAMBA
“Kanandi ujaliya ŵaka kuwona ŵanthu achibayika kweniso kupwetekeka ukongwa. Mwakuti pasi pa mtima nawi uziŵa cha cho chikuchitikiyengi.”—Gary, wa ku Britain.
“Ndingulasika ndi futi kumsana kweniso kumasu ndipu ndinguwona ŵanthu anandi achibayika kusazgapu ŵana kweniso akukota. Nkhondu yitikuchitiska kuti uje munthu wakumira mtima nge chinyama.”—Wilmar, wa ku Colombia.
“Asani munthu munyaki wabayika yiwi uchiwona, uluwa cha vo wawona. Ujaliya waka kukumbuka mo munthu yo wanguliliya kweniso kukutiya. Utimuluwapu cha munthu yo chinanga nkhamanavi.”—Zafirah, wa ku United States.
VO ŴANTHU BWEKA ANGUKAMBA
“Ndawonanga kuti ndazamukondwapu so cha pa umoyu wangu. Chinanga kuti utopa kuti ubayikengi, kweni ufipiya ukongwa mtima ŵanthu a mubanja laku kweniso anyaku.”—Oleksandra, wa ku Ukraine.
“Tamanga pa mzeri kutuliya 2:00 mlenji mpaka 11:00 usiku kuti tilonde chakurya. Kweni tachitanga mantha kuti nyengu yeyosi tingalasika ndi futi chifukwa cha nkhondu yo yachitikanga pafupi.”—Daler, wa ku Tajikistan.
“Apapi ŵangu akubayika pa nkhondu. Venivi vinguchitiska kuti ndije mulanda, mwakuti pengavi munthu wakuti wandipembuzgengi kweniso kundiphwere.”—Marie, wa ku Rwanda.
Chinanga kuti ŵanthu yaŵa angukumana ndi masuzgu chifukwa cha nkhondu, kweni akusaniya chimangu. Ndipuso aziŵa kuti nkhondu kweniso vinthu vachiwawa vimalengi pambula kuswera yapa. Magazini iyi ya Chigongwi cha Mlinda yigwiriskiyengi ntchitu fundu za mu Bayibolu kuti yikonkhoski mo venivi vazamufiskikiya.