Vathu Vaphya—Ginani mu na Girago Khu Womi Wanu?
“E NI nya gu vbweta gu londrola gwadi womi.” Aya malito nya gyagadzyana gi gomogo tangani nya wumbiri. Khu lisine anuwe wa gu vbweta isoso. Ganiolu u nga londrola kharini “gwadi” womi? Dziradhiyu, dzitelevhizawu, dzijornali, dzipari mwendro vahevbudzi vago, va nga ganeya gu khavo u nga londrola gwadi womi khu gu mana thumo nya ndruma ni gu hakha dzitsapawu nya dzingi—u khala muthu a dugeleyago!
Ganiolu, Bhibliya ya gu gengedza vaphya gu khiyo gu vbweta gu dugeleya khu gu landriseya dzithomba sa gu fana ni ‘gu tutumisa liphuvbo.’ (Mutshumayeli 4:4) Gighelo gimwegyo nya isoso khu gu vadugwana vaphya khu lisine va dzi manago dzithomba ni ndruma. Ava va si manago isoso sikhati nya singi va gu dziwona na va dzi garadzide ngudzu khu silo si gu mwalo giphaso. Muphya moyo wa Inglatera a nga hevbula universidhadhi a di khuye: “Isoso sa gu fana ni kaxa nya liphanga. Wa gu holeya ndrani gwayo khu woni gilo.” Lisine gu thumo nya gu dzi vbanyise khuwo wu ngu ninga dzithomba ni ndruma. Ganiolu kha wu tadzisisi esi si ‘vbwetegago sa muliphuvboni.’ (Matewu 5:3, Tradução do Novo Mundo) Vbavbandze nya isoso, 1 Johane 2:17 a ngu gengedza gu khuye “mafu ma ngu vbindra.” Ambari wa gu dugeleya mafuni momu, gudugeleya gogo kha gu na pindruga.
Mutshumayeli 12:1 a ngu khongoteya vaphya: “Dundruga Muvangi wago matshigoni nya wuphya wago.” Khu kharato, ndziya nya tshukwana nya gu londrole womi wago khu gu thumeya Jehovha Nungungulu. Ganiolu gupheya u fanede gu mana malungelo nya gu thumeye Nungungulu. Khu ndziya muni? Ginani gi pategago guthumeyani Nungungulu?
Esi si Vbwetegago Gasi gu Khala Mboni ya Jehovha
Gupheya u fanede gu haguleya misuvo nya gu thumeye Nungungulu—nigu misuvo yoyo kha yiti yabune, ambari vavelegi vago va gu ba na va ri Makristo. U fanede gu haguleya wupari wago ni Jehovha. Gyagadzyana gi gomogo tangani nya wumbiri gi ganede khigyo “gu gombeya gu nga gu phasa gu gira wupari ni Jehovha.”—Ndzimo 62:9; Jakobe 4:8.
Lidangaliya la Varoma 12:2 nilo li ngu khanyisa limbe lizambo hi fanedego gu li dzega. Lari khilo: ‘Vbindrugedzani gasi mu kodze gupima gugola ga Nungungulu, ni esi nya sadi, nya gu tsakise, si vbeledego mahoni ga Nungungulu.’ U di nga tsanga u kanakaneya silo nyo kari u hevbudzidwego? Landreya wusingalagadzi nya Bhibliya, u ‘pima’ u wona gu khuwe silo sesi lisine! Gevisisa khu wabune mahungu nya Bhibliya. Leri Bhibliya gumogo ni mabhuku ma seketedwago gwayo. Guhevbula mayelano khu Nungungulu khandri gu thumisa wugengeli basi. Dzi ninge gikhati nya gu pimisise khesi u si hevbulago gasi si kodza gutshinga monyoni wago nya gufananise. Wa gu gira isoso lihaladzo lago khu Nungungulu li na dandra.—Ndzimo 1:2, 3.
Khavbovbo, zama gu ningeya wumboni nya githugedza ga vambe mayelano khesi u si hevbulago, gudzina saye sihevbuli sikwanu xikwatunu. Lizambo li na landreyago khu gu tshumayela khu ndranga ni ndranga. Tepo u tshumayelago gudzina saye u nga manana ni pari yago ya xikwatunu nigu isoso si nga tsanga si gu garadza ngudzu. Ganiolu Bhibliya ya gu hi kutsa gu hi si “khali dzitshoni khu Ivhangeli.” (Varoma 1:16) Uwe wa gu tshumayela mahungu ma ningago womi ni gutumba! Khu ginani upwa dzitshoni khisoso?
A ba a ri gu vavelegi vago Makristo, gudzina saye u ngu hongola navo thumoni nya lithembwe. U ngu kodza gu gira simbe na siri gu ya ema vbamwanyatunu nya ndranga u khedziseya basi oyu a tshumayelago mwendro gu ningeya dzirevhista ni sidangaliyana basi? U ngu kodza gu ganeya ni mune ndranga khu gu thumisa Bhibliya gasi gu mu hevbudza? Wa gu ba na u si si kodzi, lomba giphaso ga vavelegi vago mwendro ga mumbe ndruye a vidzidwego libandlani. Dzi emiseye makungu nya gu dandre u khala muhuweleyi nya mahungu nya yadi a si gu bhapatiswigo!
Khu gu gimbiya nya tepo si na gu kutsa gu dzi hendzeledza—khu gu tumbisa Nungungulu gu khuwe u na mu thumeya gukhugeya olu kala gupindruga. (Varoma 12:1) Ganiolu, gudzihendzeledza khandri gilo gi girwago gihundlani basi, si vbeya avbovbo. Nungungulu a gu vbweta gu khuye vatshavbo va ‘fakaza khu magana yawe’ guagani gasi va vbanyiswa. (Varoma 10:10) Gikhati u vbwetago gu bhapatiswa, wo pheya khu gu tivisa gukhodwa gwago vbakari nya vathu. Hwane nya isoso khavbo u bhapatiswago matini. (Matewu 28:19, 20) Khu lisine, gubhapatiswa gilo nya gikhongolo. Ganiolu u nga digi gu dzi hendzeledza khu gu khuwe u nga tsanga u thega. Wa gu tumba Nungungulu gasi u mana tshivba, uye a na gu ninga ‘tshivba nya yikhongolo’ gasi gu gu phasa gu ema u tiya.—2 Vakorinto 4:7; 1 Pedro 5:10.
Gikhati u bhapatiswago wa gu khala Mboni ya Jehovha. (Isaya 43:10) Esi si fanede gu khumba edzi u na thumisago khidzo womi wago. Gudzihendzeledza ga gu pata ‘gu dzi nyenya’ mwendro gu dzi bomba. (Matewu 16:24) U fanede gu diga misuvo ni gu dogoreya nya gu kari gasi u ‘dwaneya [“vbweta,” NM] mufumu wa Nungungulu gupheya.’ (Matewu 6:33) Gudzihendzeledza ni gubhapatiswa ga gu gu tuleya malungelo nya mangi nya gu gire isoso. Hongoleni hi wone mambe yakone.
Malungelo nya gu Thumeye Nungungulu khu Gikhati Gyatshavbo
● Wupiyonero limwedo nya malungelo. Piyonero muhuweleyi nya Mukristo a bhapatisidwego, a gu giyeyedzo nya gyadi, a dzi gireyago malulamiselo nya gu thume 70 dziora mwendro ni guvbindra thumoni nya gu tshumayele mahungu nya yadi ngima ni ngima. Gu vbedza gikhati nya gulaphe thumoni nya lithembwe si ngu phasa gu tshukwadzisa mano yago nya gu tshumayele ni gu hevbudza. Vapiyonero nya vangi va ngu mana litsako nya likhongolo khu gu phasa sihevbuli nya Bhibliya gu khala Dzimboni dzi bhapatisidwego. Khu wevbini thumo nya gu dzi vbanyise khuwo wu ningago litsako nya likhongolo nya nga ilolo?
Gasi gu mana silo nya gu dzi vbanyise khiso, vapiyonero nya vangi va ngu gira mithumo nya gukari. Nyavangi va gu gira malulamiselo nya gu hevbule wumeseri xikwatunu mwendro ni vavelegi vawe. Uwe ni vavelegi vago mwa gu wona gu khenu tshukwana gu u dusa kursu nya gu kari hwane nya gu ba na u paside xikola sekundariya, tiyisegani gu khenu gighelo gyakona khandri gu mana dzitsapawu nya dzingi, ganiolu u na yi duseya gu gasi yi gu phasa thumoni nya gutshumayele, gudzina saye kha nga muhuweleyi nya gikhati gyatshavbo.
Ambari ulolo, gupima ga piyonero gomo ngudzungudzu thumoni nya gu phase vambe gu mana womi, na si ri thumoni nya gu dzi vbanyise khuwo! Khu ginani u si dzi vegeyigo makungu nya gu khale piyonero? Wupiyonero wu ngu tula mambe malungelo. Khu giyeyedzo, vambe vapiyonero va ngu hongola omu gu vbwetegago ngudzu vahuweleyi nya Mufumu. Vambe va ngu hevbula mambe malimi gasi gu phasa libandla la gipandreni gwawe li khathaleyago vale va ganeyago malimi yoyo mwendro saye gu khuga omu va khalago umo va ya tshumayela mambe mayigo. Khu lisine, thumo nya wupiyonero mavbanyelo nya gutsakise!
● Xikola nya Vatshumayeli nya Mufumu mambe nya malungelo. Xikola yeyi nya migima mivili yo giredwa gu hevbudza vapiyonero vale va wu olovedego thumo, va dzumeyago gu khuga omu va khalago umo va ya tshumayela ni hayini va vbwetegago. Khu lisine, avo vari khavo: ‘Kheni oyu! Nyi rume.’ Khu kharato avo va gu dzegeleya Mutshumayeli nya khongolo guvbindra vatshavbo a thumidego mafuni, Jesu Kristo. (Isaya 6:8; Johane 7:29) Gu khuga va ya khala hwindzo ni gaya gwawe si nga lomba gu khiso va vbevbugisa mavbanyelo yawe. Yimbe tepo mavbanyelo, dzinango ni guhodza ga omu va ya thumeyago umo si nga hambana ngudzu nesi va si olovedego. Gudzina saye gambe si nga lomba gu va hevbula lidimi nya liphya. Xikola yeyi ya gu phasa vandriyathu nya vama nya sikwendra, vandriyathu nya vanyamayi va si gu dzegwigo ni mipatwa va gu na ni 23 kala 65 myaga gu haguleya makhalelo nya liphuvbo va na ma vbwetago thumoni wawe ni mano ma na va girago va thumiswa khu guvbeleya khu Jehovha ni hengeledzano yaye.
● Thumo wa Bheteli wa gu pata gu thuma khu gu dzi ningedzeya ga limwedo nya matamo ya Dzimboni dza Jehovha. Simbe sivbango nya ndranga ya Bheteli sa gu thuma omu nya gu gire mabhuku ma seketedwago omu nya Bhibliya. Simbe sa gu ningwa mithumo nya guphasedzeye nya nga gu lulamisa ni gu sayisa ndranga ya Bheteli ni mitshini gumogo ni gu khathaleya sivbango sa Bheteli. Satshavbo sipandre soso malungelo nya thumo nya guage wu giredwago Jehovha. Khu gu engedzeya, vale va thumago Bheteli va na ni litsako khu guti gu khavo esi va si girago si ngu phasa vandriyathu nya vangi mafuni gwatshavbo.
Simbe sikhati vandriyathu va tigo wumeseri va ngu ranwa gasi va ya thuma Bheteli. Ganiolu nyavangi va gu hevbula wumeseri hwane nya gu ba na va vbohide. Ava va thumago Bheteli kha va thumeyi gu mana bhindzu ganiolu va ngu tsaka khu malulamiselo ma girwago nya gu mane guhodza, wulanga nya gu lale ni sikinyetana va ningwago gasi gu khathaleya wurumba wawe. Muthu muphya moyo a gu givbango nya ndranga ya Bheteli a gu tshamuseya thumo waye khu ndziya yeyi: “Wu ngu tsakisa ngudzu! Mathumelo kha ma vbevbugi, ganiolu nyi ngu mana makategwa nya mangi ngudzu khu gu thuma avba.”
● Thumo nya guvbahe wa gu ninga malungelo nya gu hengeye guvbahani nya dzixikiritori nya matamo ni Dzisalawu nya Mufumu. Vandriyathu va ranwago pwani sithumi nya guvbahe khavo va phasedzeyago thumo wowo. Owu nuwo i thumo nya guage, gu fana ni thumo wule wu nga girwa khava va nga vbaha nyumba nya wukhozeli ya Solomoni. (1 Dzipfhumu 8:13-18) Malulamiselo ma girwago nya gu sayise sithumi nya guvbahe ma ngu fana ni aya nya ndranga ya Bheteli. Khu lisine, vandriyathu nya vama ni vanyamayi va na ni malungelo nya makhongolo ngudzu nya gu dhumise Jehovha khu kotani nya thumo wawe nya gu tsakise!
Thumeya Jehovha khu Monyo Wago Watshavbo
Gu thumeya Jehovha khiyo ndziya nya tshukwana womini wago. Khu ginani u si dzi emiseyigo gu thumeya Nungungulu khu gikhati gyatshavbo? Bhula khiso ni vavelegi vago, madhota nya libandla lago ni muwoneleyi nya gipandre. Wa gu dogoreya gu ya thuma Bheteli mwendro gu hevbula Xikola nya Vatshumayeli nya Mufumu, manega tshanganotunu wa ava va ma dogoreyago malungelo yoyo wu girwago tshanganotunu nya mughanga.
Khu lisine, khandri vatshavbo va si kodzago mwendro va gu na ni malungelo nya gu beye thumoni nya gikhati gyatshavbo. Simbe sikhati vambe va gu tandregiswa khu sigaradzo nya madwali, gu hamuga dzitsapawu nya gu dzi vbanyise khidzo ni gudzihlamuleya va gu nago nya gu khathaleye ndranga. Ambari ulolo, Makristo yatshavbo ma dzi hendzeledzidego ma fanede gu landra nayo wowu nya Bhibliya: “Haladza Pfhumu Nungungulu wago khu monyo wago watshavbo, khu hefemulo wago watshavbo ni mapimo yago yatshavbo.” (Matewu 22:37) Jehovha a gu vbweta gu khuye u mu thumeya khavba u si kodzago khavbo. Khu kharato, na gu si khathadzisegi makhalelo yago, thangisa thumo wa Jehovha womini wago. Dzi vegeye makungu u na kodzago gu ma vboheya thumoni wa Nungungulu. Ina, “Dundruga Muvangi wago matshigoni nya wuphya wago.” Wa gu gira isoso, u na kategiswa kala gupindruga!