Uye Tsakiside Jehovha ni Babe Waye

U ngu gi wona gyadzyana gegi vbagithombetunu vbavba?— Gyanana gya mwama moyo a ranwago pwani khu Jafeti. Bhibliya kha yi hi embeyi lina lagyo, ganiolu hi ngu dziti gu khethu gi tsakiside Jehovha ni babe wagyo. Hongoleni hi giti hibwe hiti babe wagyo, Jafeti.

Jafeti a diri muthu nya wadi a nga dzi ninga tepo nya yingi gasi gu hevbudza gyanana gyaye khu Jehovha. Uye gambe a diri mwama nya tshivba ni muthangeyi nya wadi. Khu kharato, Vaisraeli va di mu lomba gu a va thangeya gasi gu ya dwana ni valala vawe.

Jafeti a di gombeya ga Nungungulu gasi a mu phasa gu pala valala. Jafeti a di tumbisa gu khuye a gu pala a na ningeya ga Jehovha muthu nya gupheye a na dugago khu ndrangani gwaye a mu khinga gikhati a wuyago khu gudwanatunu. Muthu yoyo a na ya khala nyumbani ga Nungungulu a thumeya Jehovha womi waye watshavbo. Nyumba ya Nungungulu gu diri wulanga owu gale yoyo vathu va nga ba va ya khozeya Jehovha. Jafeti pade valala vaye! U ngu dziti gu khuwe khu mani a nga pheya khuye a duga khu ndrangani gwaye a mu khinga gikhati a nga wuya khu gudwanatunu?—

Khidzo kamwe, khu gyanana gyaye! Jafeti a diri ni gyanana gimwegyo basi, egi a na gi rumeyago nyumbani ga Nungungulu. Isoso si mu vbisiside ngudzu monyo. Ganiolu dundruga gu khuwe uye tumbiside Nungungulu. Nya mba hweya, gyanana gyaye gi di khigyo: ‘Papai, u tumbiside Jehovha, gira esi u tumbisidego.’

Gyanana gya Jafeti nigyo gi di gu vbisega monyo. Nyumbani ga Nungungulu igyo na gya sa dzegwa ambari gu velega sanana. Ganiolu igyo gi di gu vbweta gu gira esi babe wagyo a nga tumbisa ni gu tsakisa Jehovha. Isoso si diri silo nya lisima ngudzu gwagyo guvbindra gu dzegwa ni gu velega sanana. Khu kharato, igyo gi di khuga gaya gi ya khala nyumbani ga Nungungulu womi wagyo watshavbo.

Esi gi nga gira si tsakiside Jehovha ni babe wagyo?— Ina, si va tsakiside! Anuwe wa gu engisa ni gu gola Jehovha, u na khala kha nga gyanana gya Jafeti. U na tsakisa ngudzu Jehovha ni vavelegi vago.