Josiya a Diri ni Dzipari nya Dzadi

Si ngu garadza gu gira silo nya sadi?— Vathu nya vangi va gu pimisa gu khavo si ngu garadza. Bhibliya yari khiyo si di gu garadzeya ngudzu gikhwathana gimwegyo nya gupwani khu Josiya gu gira silo nya sadi. Ganiolu igyo gi diri ni dzipari nya dzadi dzi nga gi phasa. Hongoleni hi hevbule khu Josiya ni dzipari dzaye.

Papai wa Josiya a diri Amoni, pfhumu ya Judha. Amoni a diri muthu nya guvivbe ngudzu monyo a nga ba a khozeya sifananiso. Tepo Amoni a ngafa, Josiya khade pfhumu ya Judha. Ganiolu uye a diri ni livbandre na miraru myaga basi! Ina anuye a di vivbide monyo kha nga papai waye?— Ahihi kamwe, uye a diri muthu nya wadi!

Ambari gikhati a nga ba na a ngari dugwana, Josiya vbwetide gu engisa Jehovha. Khu kharato, uye a di hatha gu gira wupari ni vathu va nga ba va gola Jehovha basi. Avo va mu phaside gu gira silo nya sadi. Khu vamani Josiya a nga va hatha gasi va khala dzipari dzaye?

Moyo wakona khu Sofoniya. Sofoniya a diri muprofeti a nga embeya vathu va Judha gu khuye va gu khozeya sifananiso va na tsayiswa. Josiya engiside Sofoniya a khozeya Jehovha, na gu siri sifananiso.

Yimbe pari ya Josiya gu diri Jeremiya. Uye a diri tinga mweyo ni Josiya nigu avo va diri vavhizinyu gikhati va nga ba na va gu dandra. Avo va diri dzipari nya dzikhongolo avba nya gu tepo Josiya a ngafa, Jeremiya lovide ndzimo nya guhathege a ganeya khedzi a nga ba a suva khidzo Josiya. Jeremiya ni Josiya va phasanide gu gira silo nya sadi ni gu engisa Jehovha.

Wa gu hevbula ginani khu giyeyedzo gya Josiya?— Ambari gikhati Josiya a nga ba na a ngari dugwana, vbwetide gu gira silo nya sadi. Uye a di gu dziti gu khuye fanede gu gira wupari ni vathu nya gu gole Jehovha. Anuwe u fanede gu hatha ava va golago Jehovha kha nga dzipari dzago dzi na gu phasago gu gira silo nya sadi!