Josiya a di gu wu gola Nayo wa Nungungulu

Josiya phede gu fuma tigoni ga Judha nari ni 8 myaga. Matshiguni yoyo, vathu va di gu gira silo nya singi nya wudhemoni ni gu khozeya sifananiso. Tepo Josiya a nga tshanganisa 16 myaga, a di zama gu hevbula ndziya nya yadi nyo khozeye khiyo Jehovha. Tepo a nga tshanganisa 20 myaga, a di pheya gu tshungunuleya sifananiso ni dzialtari tigoni gwatshavbo. Tepo Josiya a nga tshanganisa 26 myaga, a di dongiseya gu vbahedza tempele ya Jehovha.

Mupristi nya Khongolo Hilikiya, a di mana libhuku nya Nayo wa Jehovha omu nya tempele. Libhuku lolo, adzina khilo li nga lowa khu Mosi. Safani, sekretaryu wa pfhumu, a dita ni libhuku lolo nya Nayo a ta leri khu lito nyo khugege mbeli ga Josiya. Tepo Josiya a nga ba a engiseya, a di tugula gu khuye gu di gu vbindra myaga nya yingi vathu na va digide gu engisa Jehovha. Pfhumu Josiya a di embeya Hilikiya, khuye: ‘Jehovha zangaride ngudzu khu kotani yathu. Gimbiya u ya ganeya naye. A na hi embeya esi hi yedego gu gira. Jehovha a di hlamula khu gu thumisa muprofeti nya nyamayi Hulidha, khuye: ‘Vathu va omu Judha va nyi digide. Va na tsayiswa. Ganiolu, kha nyi na nga va tsayisa olu a fuma Josiya, kholu dzi nogiside gwangu.’

Tepo Pfhumu Josiya a ngapwa mahungu yoyo, a di hongola tempeleni a ya rana Vajudha vatshavbo. Khavbovbo, a di leri Nayo wa Jehovha khu lito nyo khugege gasi gu vathu vatshavbo va sipwa. Josiya ni vathu vatshavbo va di tumbisa gu khavo va na engisa Jehovha khu myonyo yawe yatshavbo.

Gu di gu vbindra myaga nya yingi vathu na va si giri Phasika. Ganiolu, tepo Josiya a nga leri omu nya Nayo gu khuye Phasika yi di yede gu girwa mwaga ni mwaga, a di embeya vathu vatshavbo, khuye: ‘Hi nga gira Phasika ya Jehovha.’ Josiya a di pheya gu dongiseya silo nya singi gasi gu gira khiso miningelo, a bwe a dongiseya vathu gasi va embeleya dzindzimo omu nya tempele. Vathu va di hodza Phasika, va vbedza va gira Mubuzo nya Sibaba nya mba na Mela, owu wu vbedzidego 7 matshigu. Gukhugeya matshiguni ya Samuweli, gu di si gu girwi Phasika nyo fane ni iyoyo. Khu lisine, Josiya a di gu wu gola Nayo wa Nungungulu. Ina si ngu gu tsakisa gu hevbula khu Jehovha?