“Vbanya khu gu landra lisine”

1. Ha gu phasega kharini khu gu ganeya edzi hi nga liti khidzo “lisine”?

“U TIDE kharini lisine?” Nya mba kanakana uwe u hlamude giwudziso gegi dzitepo nya dzingi. Egi gimwegyo nya siwudziso hi girago vandriyathu tepo hi vbwetago gu vati gwadi. Ethu hi ngu gola gupwa edzi vandriyathu va nga liti khidzo lisine ni gu haladza Jehovha, nigu ethu hi ngu tsaka khu gu va embeya gu khethu khu ginani hi tsakago khu gu khala mweyo nya Dzifakazi dza Jehovha. (Rom. 1:11) Mabhulo yaya, ma nga hi phasa gu simama gu dundrugeya khedzi hi tsakago khidzo khu gu khala mweyo nya Dzifakazi dza Jehovha. Ethu gambe ha gu dzi emiseya gu “vbanya khu gu landra Iisine”, a gu gu simama gu vbanya khu ndziya yi na hi reseyago makategwa ya Jehovha ni gu tsakedwa khuye. — 3 Joh. 4.

2. Ginani hi na bhulago khigyo avba nya ndrima yeyi?

² Avba nya ndrima yeyi, ethu hi na wusedza sighelo nyo khaguri si hi girago hi gola lisine. Khavbovbo, hi na bhula khedzi hi na simamago khidzo gu yeyedza lihaladzo lathu khu giningwa gegi nya lisima. Nya mba kanakana gu wusedza gogu gu na hi phasa gu engedzeya gubonga gwathu khu gu ba Jehovha a hi ranide lisineni. (Joh. 6:44) Isoso gambe si na engedzeya gu dogoreya gwathu nya gu hevbudze lisine nya Bhibhiliya vambe.

KHU GINANI HI GOLAGO “LISINE”?

3. Khu gevbini gighelo nya lisima ngudzu gi hi girago hi gola lisine?

³ Hi na ni sighelo nya singi nyo gole lisine. Gighelo nya lisima ngudzu khu gu ethu hi ngu haladza ngudzu Jehovha Nungungulu, a gu gifefe nya lisine. Khu gu thumisa Lito laye Bhibhiliya, ethu kha hi muti basi kha nga Muvangi nya tshivba, nya ndzadzi ni mafu, ganiolu kha nga Papayi wathu nya lihaladzo a hi khathaleyago. (1 Ped. 5:7) Ethu hi ngu dziti gu khethu Nungungulu wathu a na ni “wuhindzi ni pwela wusiwana; A hwelago gu goroga, A tadego khu wuwadi ni gutumbega.” (Ekiso. 34:6) Jehovha a ngu gola gululama. (Isa. 61:8) Si ngu mu vbisa tepo a hi wonago na hi gu tshaniseka, nigu uye a virede khu maho nyo fuviye gu ta vbedza sigaradzo satshavbo khu tepo yakone. (Jer. 29:11) Anethu hi virede khu maho nyo fuviye gasi gu wona tepo yeyi nyo tsakise! Egi gimwegyo nya gighelo gi hi girago hi haladza ngudzu Jehovha.

4-5. Khu ginani mupostoli Pawulo a nga fananisa gutumba gwathu ni girikiso?

⁴ Khu gevbine gimbe gighelo gi hi girago hi gola lisine? Lisine li ngu hi phasa khu dzindziya nya dzingi. Wona giyeyedzo gegi. Lisine nya Bhibhiliya la gu pata gutumba hi gu nago khu wumindru. Gasi gu fananisa lisima nya gu tumbe, mupostoli Pawulo lovide gu khuye: “Gutumba gogu hi nago kha nga giwindri nya gutiye ni gulemela [girikiso].” (Hebh. 6:19) Kha nga girikiso gi phasago ngalava gu ema gwadi, gutumba hi gu nago gu seketedwago umo nya Bhibhiliya gu nga hi phasa gurula tepo hi tshangano ni sigaradzo.

⁵ Avba nya mongo wowu, Pawulo a di gu ganeya khu gutumba nya gu vbanye ndzadzini ogu Makristo nyo todzwe ma gu nago. Ganiolu, malito yaye ma ngu thuma gambe ga Makristo ma vireyago khu maho nyo fuviye gu vbanya kala gupindruga paradhesini mafuni. (Joh. 3:16) Khu lisine, gu hevbula maningano khu gutumba nya gu vbanye kala gupindruga si ngu hi phasa gu pwisisa gu khethu ho vbanyeya ginani.

6-7. Yvonne phasegide kharini khu gu hevbula lisine maningano khu wumindru?

⁶ Wona giyeyedzo gya ndriyathu moyo nya nyamayi nyo pwani khu Yvonne. Uye kha dandra lisineni, nigu tepo a nga ba ari gyanana a di gu thava gufa. Uye a gu dundruga mahungu a nga leri a gu mba ma divala, ma gu khayo: “Litshigu limwedo kha li na ngagya.” Uye wari khuye: “Malito yaya ma nyi giride nyi si lali wutshigu watshavbo, na nyi gu pimisa khu wumindru. ‘Khu lisine nyi di gu pimisa gu kheni hi di yede gu vbanya myaga nya yingi.’ Nyi di gu pimisa gambe gu kheni: ‘Khu ginani nyi gu romo avba?’ Eni kha nyi vbweti gufa!”

⁷ Khu gu gimbiya nya tepo, Yvonne tepo a nga ba ari muphya a di bhula ni Dzifakazi dza Jehovha. Uye wari khuye: “Eni nyi di pheya gu khodwa gu kheni nyi nga manega ni gutumba nya gu vbanye kala gupindruga paradhesini mafuni.” Ndriyathu a phasegide kharini khu gu hevbula lisine? Uye a gu engedza gu khuye: “Kha nyi ngo khala gambe wutshigu watshavbo nya mba lala na nyi garadzega khu wumindru mwendro gufa.” Kha si kanakani gu khiso Yvonne a ngu gola lisine nya Bhibhiliya nigu uye a ngu tsaka ngudzu khu gu bhuleya vambe khu gu tumba a gu nago khu wumindru.— 1 Thim. 4:16.

8-9. a) Omu nya gimwegyo nya sipimaniso sa Jesu, ginani egi mwama moyo a nga gira tepo a nga mana thomba? b) Wa gu li wona kharini lisine?

⁸ Lisine nya Bhibhiliya la gu pata mahungu nya yadi maningano ni Mufumu wa Nungungulu. Jesu fananiside lisine maningano ni Mufumu nga thomba yi sihadego. Umo ga Matewu 13:44, Jesu a di khuye: “Mufumo wa ndzadzini wa gu fana ni thomba yi sihidwego thembweni eyi muthu a nga yi mana a yi siha gambe. Khu gu ba na tsakide ngudzu, a diya rengisa satshavbo a nga ba ari naso gasi a renga lithembwe lolo.” Wona gu khuwe mwama yoyu kha nga ba a vbwetedzeya thomba. Ganiolu, tepo a nga yi mana a di gira satshavbo a nga si kodza gasi gu yi sayisa. Khu lisine, uye a di rengisa satshavbo a nga ba ari naso. Khu ginani? Kholu uye a di gu dziti gu khuye thomba yoyo yi diri ni lisima. Iyo yi diri ni lisima ngudzu guvbindra esi a nga ba a yede gu si diga.

⁹ Ina wa gu wona lisine khu ndziya yayimweyo? Nya mba kanakana ina! Ethu hi ngu dziti gu khethu esi litigo leli li hi ningago simwalo lisima ha gu si fananisa ni litsako hi gu nalo khu gu thumeya Jehovha olu, ni gu tumba nya womi nya mba vbeya mindru watshigu na hi gu fumedwa khu Mufumu wa Nungungulu. Lithomo hi gu nalo nya gu manege ni wupari wa vbafuvbi ni Jehovha li na ni lisima ngudzu guvbindra ni gevbine gilo hi nga girago. Egi hi gi vbwetago ngudzu khu “gu mu tsakisa mithumoni yatshavbo.” — Kol. 1:10.

10-11. Gighelo muni gi giridego Michael a vbindrugedza silo nya sikhongolo womini gwaye?

¹⁰ Nya vangi gwathu va dzi hiyide silo nya sikhongolo gasi gu tsakedwa khu Jehovha. Vathu nyo khaguri va digide mithumo nya gu khugege ni ndruma ya mafuni momu. Vambe va emide gu vbwetedzeya dzithomba. Nigu vambe va vbindrugedzide khu gu vbeleya edzi va nga ba va vbanya khidzo tepo va nga hevbula khu Jehovha. Esi khiso si giridwego khu Michael. Uye kha dandra lisineni. Tepo a nga ba ari muphya, uye a di hevbudzwa gu dwana. Uye wari khuye: “Eni nyi di gu dzi khusedza kholu nyi nga ba nyiri ni givili nya gyadi. Dzimbe dzitepo, eni nyi di gu dzipwa na nyi si padwi khu muthu.” Ganiolu, tepo a nga pheya gu hevbula Bhibhiliya Michael a di hevbula edzi Jehovha a nga ba a dzipwa khidzo khu wughevenga. (Ndzi. 11:5) Khu gu ganeya khu patwa nya Dzifakazi wu nga mu hevbuleya, Michael wari khuye: “Avo gima kha va nyi embeya gasi nyi ema gu dwana, avo basi va di simama gu nyi hevbudza lisine nya Bhibhiliya.”

¹¹ Tepo Michael a nga ba a engedzeya gu hevbula khu Jehovha, lihaladzo laye Khuye li di gu engedzeya gu dandra. Egi gi mu kuhidego ngudzu wuhindzi wa Jehohva khu vakhozeyi vaye. Khu gimbiya nya tepo, Michael a di tugula gu khuye a di yede gu hunga makungo ma nga hadzi vbindrugedza womi waye. Uye wari khuye: “Eni nyi di gu dziti gu kheni gu ema gu dwana gi diri gilo gi nga hadzi nyi garadzeya ngudzu gu gira, ganiolu nyi di gu dziti gambe gu kheni isoso si di hadzi tsakisa Jehovha nigu nyi di gu tiyisega gu kheni gu mu thumeya gi diri gilo nya lisima guvbindra ni gevbini gilo.” Michael a di gu dziti gu khuye lisine a nga ba a li manide li diri gilo nya lisima ngudzu nigu isoso khiso si mu giridego a dzi emiseya gu vbindrugedza silo nya sikhongolo womini waye. — Jak. 1:25.

12-13. Lisine nya Bhibhiliya li phaside kharini Mayli?

¹² Gasi gu yeyedza lisima nya lisine, Bhibhiliya ya gu fananisa lisine ni kandriya yi wenengedzago gidemani. (Ndzi. 119:105; Efes. 5:8) Mayli wa Azerbaijão a ngu bonga ngudzu khu giphaso a gi manidego omu nya Lito la Nungungulu. Vavelegi vaye va di hambanide khu wukhongeyi. Papayi waye a diri Musulumano nigu mamayi waye a diri Mujudha. Uye wari khuye: “Ambari olu nyi nga ba nyi si kanakani gu kheni Nungungulu womo, eni nyi diri ni siwudziso nya singi. Nyi di gu dzi wudzisa gu kheni: ‘Khu ginani Nungungulu a vangidego vathu? Nigu khu ginani vathu va yedego gu tshaniseka na va ngo vbanya ni hwane nya gu ba va fude? Vathu nya vangi vo ganeya gu khavo satshavbo si dugeleyago gugola ga Nungungulu, khu kharato nyi di gu dzi wudzisa gu kheni, ina Nungungulu a ngu tsaka khu gu wona vathu na va gu tshaniseka?’”

¹³ Mayli simamide gu vbwetedzeya mihlamulo nya siwudziso saye. Khu gu gimbiya nya tepo uye dzumede gihevbulo nya Bhibhiliya nigu khade moyo nya Dzifakazi dza Jehovha. Uye wari khuye: “Esi nyi nga si hevbula omu nya Bhibhiliya si nyi phaside gu khala muthu nyo tsake, nigu mitshamuselo nyo vbevbuge nyi yi manidego omu nya Lito la Nungungulu yi nyi resede gurula.” Gu fana ni Mayli, hatshavbo ha gu dhumisa Jehovha, oyu a hi ‘ranidego hi duga gidemani hita wenengedzoni gwaye nya gu samadzise.’ — 1 Ped. 2:9.

14. Hi nga engedzeya kharini gu gola lisine? (Wona gambe kwadru yi gu khiyo: “Simbe silo hi nga si fananisago ni lisine nya Bhibhiliya.”)

¹⁴ Esi siyeyedzo nyo khaguri si yeyedzago lisima nya lisine. Nya mba kanakana u nga dundrugeya khu simbe siyeyedzo. Khu ginani u gu mba gira gihevbulo nya muthu enga gasi u mana simbe sighelo si na hi girago hi gola lisine? Tepo hi engedzeyago gu gola lisine, hi na mana dzindziya nya dzingi gasi gu yeyedza gu khethu hi ngu li gola.

HI NGA YEYEDZA KHARINI GU KHETHU HI NGU GOLA LISINE

15. Khu yevbini mweyo nya ndzidziya hi nga yeyedzago khiyo gu khethu hi ngu gola lisine?

¹⁵ Ethu hi nga yeyedza gu khethu hi ngu gola lisine khu gu hevbula Bhibhiliya tshigu ni tshigu ni mabhuku ma seketedwago omu nya Bhibhiliya. Gani hi na ni myaga nya yingi lisineni, ethu hi yede gu simama gu hevbula. Avba nya Mukhedziseyi nyo pheye wu nga duswa wu tshamusede gu khuwo: ‘Litigo leli li tade khu silo nya singi nyo vivbe iso si hi girago si hi garadzeya gu tugula lisine. Gasi gu li mana u yede gu vega gupima. . . . Wa gu li mana u yede gu li sayisa. Kha hi yeli gu eneledwa khu lisine hi litigo, ethu hi yede gu simama gu engedzeya gu hevbula lisine nya Bhibhiliya.’ Gu hevbula si ngu garadza, ganiolu hi yede gu dzi garadza.

16. Khu yevbini ndziya nya gihevbulo yi gu phasago? (Mavingu 2:4-6)

¹⁶ Khandri hatshavbo hi si golago gu leri ni gu hevbula. Ganiolu, Jehovha a gu hi kutsa gu simama gu lomba ni gu simama “gu vbweta” gasi hi pwisisa gwadi lisine. (Leri Mavingu 2:4-6.) Ha gu gira esi, tepo yatshavbo ha gu phasega. Na gu ganeya khu gu leri Bhibhiliya, Corey wari khuye: “A gu vega gupima avba nya livhesi limwedo khu limwedo.” Uye a gu tshamuseya gu khuye: “Nya gu leri yatshavbo mitshamuselo ya vbavbatshi, nyi khedza dzireferesiya ni gu gira wugevesisi nyo engedzeye. Ndziya yeyi, yi ngu nyi phasa gu hevbula nya singi.” Gani ha gu thumisa ni yevbini ndziya, ethu ha gu yeyedza gubonga khu lisine tepo hi dzi garadzago ni gu dzi ninga tepo nya gu li hevbule. — Ndzi. 1:1-3.

17. So thula ginani gu vbanya khu lisine? (Jakobe 1:25)

¹⁷ Khu lisine, ethu hi ngu dziti gu khethu kha si eneyi basi gu hevbula lisine. Gasi hi phasega gwadi, ethu hi yede gu vbanya khu lisine, iso si thulago gu khiso hi yede gu thumisa esi hi si hevbulago womini gwathu. Hi na mana basi gutsaka ha gu gira esi. (Leri Jakobe 1:25.) Hi nga tiyisega kharini gu khethu ha gu vbanya khu lisine? Ndriyathu moyo a gu ganeya gu khuye khyadi ngudzu gu dzi gevisisa khu habune gasi hi wona gu khethu hi ngu thumisa esi hi si hevbulago ni omu hi yedego gu tshukwadzisa. Mupostoli Pawulo ganede gu khuye: “Ni ga mevbini magirelo, hongoleni hi simame gulandra khu ndzila yeyi hi tago na hi gu yi landra khu gale.” — Filp. 3:16.

18. Khu ginani hi girago satshavbo hi si kodzago gasi gu “vbanya khu gu landra lisine”?

¹⁸ Dundrugeya khedzi isoso si hi phasago khidzo tepo hi girago satshavbo hi si kodzago gasi gu “vbanya khu gu landra lisine”! Ethu kha hi tshukwadzisi basi edzi hi vbanyago khidzo, ganiolu ethu ha gu tsakisa Jehovha ni vandriyathu. (Mav. 27:11; 3 Joh. 4) Khu lisine, hi na ni sighelo nya singi gasi gu gola lisine ni gu vbanya khilo!