‘Nyi na gimbiya lisineni’ lago

1-3. a) Hi yede gu li wona kharini lisine nya Bhibhiliya? Ninga giyeyedzo. (Wona foto vbatshani.) b) Ginani hi na ganeyago khigyo omu nya ndrima yeyi?

MUHUNO, si olovelegide ngudzu gu muthu a renga gilo gitolo a vbedza a gi bweledza. Nigu vathu va gu renga gilo khomu nya interneti, gutala nya dzitepo va na gi bweledza. Adzina khu gu ba na va sa tsakiswa khigyo nga edzi va nga ba va pimiside khidzo mwendro khu gu ba na gya sa khalega gwadi khu ndziya nyo khaguri. Khu kharato va gu tala gu bweleya va ya vbindrugedza va dzega gimbe mwendro kamo guya lomba gu bweledzedwa dzitsapawu dzawe.

² Gima kha hi yeli gu gira isoso khu lisine nya Bhibhiliya. Gu “renga” hi li rengago lisine, gima kha hi yeli gu li “rengisa,” mwendro tepo hi li hevbulago gima hi nga li digi. (Leri Mavingu 23:23; 1 Thimoti 2:4) Kha nga hi ganedego omu nya ndrima yi vbindridego, hi ngu vbedza tepo nya yingi gasi gu hevbula lisine. Nigu, adzina hi digide thumo wu nga ba wu hi ninga dzitsapawu nya dzingi. Si nga gira gambe na hi pide wupari ni vathu nyo khaguri, hi vbindrugedza mapimiselo ni magirelo yathu nya silo, hi bwe hi diga gu patega omu nya sihena ni sigiro si gu mba tsakisa Jehovha. Ganiolu kha hi kanakani gu khethu gu mwalo gilo hi gi digidego gi gu na ni lisima guvbindra guti lisine.

³ Jesu ningide gipimaniso khu mwama nya murengisi a nga ba a vbwetedzeya dziperola nya dzadi. Tepo a nga mana mweyo yi nga ba yiri ni lisima guvbindra dzatshavbo, a di dzegeya gu rengisa satshavbo a nga ba ari naso gasi gu renga perola yile. Perola yoyo ya gu fananiswa ni Mufumu wa Nungungulu. Khu ndziya yoyo, Jesu a di gu yeyedza edzi lisine li nga hadzi manega khidzo ni lisima ga ava va li vbwetedzeyago. (Matewu 13:45, 46) Tepo hi nga pheya gu hevbula lisine nya Mufumu wa Nungungulu ni limbe lisine nya lisima la omu nya Bhibhiliya, anethu hi di dzi emiseya gu dzi hiya ni gevbini gasi gu li mana. Ha gu simama gu li ninga lisima lisine, gima kha hi na nga li diga. Ganiolu, ya walo khiyo nya gu vambe vathu va Nungungulu va ngu diga gu ninga lisima lisine va bwe va li diga. Ethu gima kha hi yeli gu gira isoso! Gu vbwetega gu hi landreya wusingaladzi nya Bhibhiliya gasi gu hi simama gu “vbanya khu gu landra Iisine.” (Leri 3 Johane 2-4.) Isoso so thula gu thangisa lisine hi bwe hi si yeyedza khu mavbanyelo yathu. Ganiolu khu ginani muthu a ‘rengisago’ mwendro gu diga lisine nigu khu ndziya muni? Hi nga gira ginani gasi gu gima hi si giri isoso? Nigu hi nga gira ginani gasi gu hi simama na hi dzi emisede gu “vbanya khu gu landra Iisine”?

KHU GINANI VAMBE VA ‘RENGISAGO’ LISINE NIGU KHU NDZIYA MUNI?

4. Khu ginani vambe va nga tsukuwa lisine teponi ya Jesu?

⁴ Dziteponi dza Jesu vambe va dzumede lisine gupheyani ganiolu va vbedza va li tsukuwa. Khu giyeyedzo, hwane nyo ba Jesu a giride gilewugiso nya gu hodzise gidzemo nya gikhongolo, gidzemo gyogyo gi mu landrede kala yimbe bambe nya Yiphwa ya Galileya. Ganiolu khu gu landreya Jesu ganede silo si nga va gorosa, khuye: “Mwa gumba hodzani givili gya Mwamana wa Muthu ni gumba sela novba waye, kha mu na mana guvbanya.” Vbavbandze nyo wudzise tshamuselo nya isoso ga Jesu, va di khavo: “Ma ngu lemela magana yaya! Khu mani a na gu ma yingisago?” Kha nga handro wakona, “vapizane nya vangi va di bwelela hwane va mu diga, va si gimbili gambe naye.” — Johane 6:53-66.

5, 6. a) Khu ginani vambe va ndreyago lisineni muhuno? b) Muthu a nga ndreya kharini lisineni?

⁵ Ya walo khiyo nya gu vambe muhuno navo va ngu diga lisine. Khu ginani? Vambe va khunguvanyisidwe khu mapwisiselo nya maphya nya livhesi nyo khaguri nya Bhibhiliya mwendro khu gilo gi ganedwego mwendro gu girwa khu ndriyathu a tidwago ngudzu. Vambe kha va tsakiswa khu gu ningwa wusingalagadzi nyo khaguri nya Bhibhiliya mwendro gu ba va gandranide sinyalana ni muthu nyo khaguri libandhani. Nigu, vambe va landrede sihevbudzo nya malipha ni esi nya vathu va ganeyago malipha khethu. Isoso sighelo singaniyana si girago vambe va diga Jehovha ni libandla. (Vahebheru 3:12-14) Tshukwana nari khatshi va di tumbide Jesu, nga edzi a nga girago khidzo Pedro! Tepo vambe va nga ba va garadzega khu kotani nya malito ya Jesu, Jesu a di wudzisa vapizane vaye khuye anavo va di gu vbweta gu hongola mwendro ne. Pedro a di hakha khuye: “Hi naya ga mani, Pfhumu? Olu a gu uwe u gu ni magana nya guvbanye nya gupindruge!” — Johane 6:67-69.

⁶ Vambe va gu diga lisine vbadugwana vbadugwana, adzina nya mba si tugula gu khavo ginani gi dugeleyago. Muthu a digago lisine vbadugwana vbadugwana a ngu fana ni ngalava yi ndreyago vbadugwana vbadugwana khu funguni. Bhibhiliya ya gu hi gengedza gasi gu gima hi si “ndreyi ga ilo.” (Vahebheru 2:1) Gutala nya dzitepo muthu a ndreyago lisineni kha si tuguli gu khuye a ngu gira isoso. Ganiolu a gu diga wupari waye ni Jehovha wu vbunguga, khu gu gimbiya nya tepo wu hegisa khu gu vbeya kamo. Hi nga gira ginani gasi gu gima hi si dugeledwi khu isoso?

GINANI HI YEDEGO GU GIRA GASI GU GIMA HI SI RENGISI LISINE?

7. Ginani gi na hi phasago gasi gu gima hi si rengisi lisine?

⁷ Gasi gu simama gu gimbiya lisineni, gu vbwetega gu dzumeya ni gu engisa satshavbo si ganedwago khu Jehovha. Gu vbwetega gu lisine li khala gilo nya lisima ga satshavbo guvbanyani gwathu hi bwe hi landreya wusingalagadzi nya Bhibhiliya ga satshavbo hi girago. Pfhumu Dhavhidhe tumbiside Jehovha gu khuye: “Nyi [na] gimbila lisineni.” (Ndzimo 86:11) Dhavhidhe a di dzi emisede gu simama gu gimbiya lisineni, nigu anethu hi yede gu gira isoso. Ha gu mba gira isoso, hi na pheya gu dundrugeya khu silo hi nga si diga hwane khu kotani nya lisine hi bwe hi vbweta gu si bweleleya. Ganiolu kha hi yeli gu hatha gu khethu hi na landra lisine nyo khaguri limbe hi li diga. Gu vbwetega gu hi gimbiya “Iisineni nya guvbelele.” (Johane 16:13) Omu nya ndrima yi vbindridego, hi ganede khu livbandre silo hi si digidego hwane gasi gu hevbula ni gu vbanya khu lisine. Olu hi na wona gu khethu hi nga gira kharini gasi gu gima hi si bweleleyi silo soso hi si digidego hwane. — Matewu 6:19.

8. Ndziya eyi muthu a thumisago khiyo tepo yaye yi nga mu ndreyisa kharini lisineni? Ninga gieyeyedzo.

⁸ Tepo. Gasi gu gima hi si ndreyi lisineni gu vbwetega gu hi thumisa tepo yathu khu wugengeyi. Ha gu mba dzi woneya, hi na vbedza tepo nya yingi omu nya sivbungadzo, mihagano, omu nya interneti mwendro na hi gu sixitiri televhizawu. Ambari olu silo soso si nga ne gu vivba, adzina si nga hi beya tepo eyi hi nga ba hi yi thumiseya gu hevbula ni gutshumayela. Silo nya nga isoso si dugelede Emma.a (Wona tshamuselo wa vbavbatshi.) Gu khugeya na ngari gyanana, a di gu gola dzikavhalo ni gu dzi khileya ni yevbini tepo si nga ba si kodzega. Ganiolu a di pheya gu dzipwa nandru khu kotani nya tepo a nga ba a vbedza khu hagano wowo, khavbovbo a wona nari tshukwana gu vbindrugedza esi a si thangisago. Emma hevbude gambe khu giyeyedzo gya Cory Wells, ndriyathu nya nyamayi a nga ba a gola gu khileya dzikavhalo omu nya hagano nyo pwani rodeio.b (Wona tshamuselo wa vbavbatshi.) Olu Emma a gu vbedza tepo nya yingi na gu thumeya Jehovha, nigu a ngu mana tepo nya yingi gasi gu khala ni vandrangani gwaye ni dzipari va thumeyago navo Jehovha. A gu dzipwa vbafuvbi ni Nungungulu nigu a ngu tsaka khu guti gu khuye a ngu thumisa tepo yaye khu wugengeyi.

9. Hi nga pheya kharini gu thangisa dzithomba?

⁹ Dzithomba. Gasi gu simama gu gimbiya lisineni, kha hi yeli gu thangisa dzithomba. Tepo hi nga hevbula lisine, hi tugude gu khethu gu thumeya Jehovha gu na ni lisima ngudzu guvbindra dzithomba, nigu hi tsakide khu gu diga simbe silo nya nga isoso khu kotani nya lisine. Ganiolu, khu gu gimbiya nya tepo, hi nga wona vambe na va gu renga mitshini yi ngarigo gu duga mwendro simbe silo si rengwago khu dzitsapawu. Adzina hi nga pheya gu pimisa gu khethu hi ngu tshala hwane. Hi nga pheya gu mba eneledwa khesi hi gu naso hi bwe hi pheya gu vega gupima avba nyo mane dzithomba nya dzingi guvbindra gu thumeya Jehovha. Isoso so hi dundrugisa esi si dugeledego Dhemasi. Uye a di gu gola ngudzu “silo nya mafu” nyo bwe a diga thumo a nga ba a ningidwe khu mupostoli Pawulo. (2 Thimothi 4:10) Adzina Dhemasi a di gu gola ngudzu dzithomba guvbindra gu thumeya Nungungulu. Mwendro adzina kha nga ba a dzina gambe gu dzi hiya silo gasi gu simama gu thuma ni Pawulo. Ginani hi gi hevbulago? Adzina gale hi di gu gola ngudzu dzithomba. Ha gu mba dzi woneya, lihaladzo lolo khu dzithomba li na pheledza gu dandra nyo bwe hi si goli gambe lisine.

10. Mikutsedzelo muni hi yedego gu yi potsa?

¹⁰ Gupwanana gwathu ni vambe. Gasi gu simama gu gimbiya lisineni, kha hi yeli gu dzumeleya gu kutsedzedwa khava va si khozeyigo Jehovha. Tepo hi nga hevbula lisine, gupwanana gwathu ni valongo gumogo ni dzipari va sirigo Dzifakazi gu vbindrugedzide. Si nga gira gu vambe na va dzumede esi hi si khodwago, ganiolu vambe va hi wugede. (1 Pedro 4:4) Lisine gu hi ngu gira satshavbo hi si kodzago gasi gu pwanana ni valongo vathu ni gu va gireya wuwadi. Ganiolu kha hi yeli gu ndraga milayo ya Jehovha gasi gu va tsakisa. Nigu kha nga olu hi lerigo omu ga 1 Vakorinto 15:33, dzipari dzathu nya dzikhongolo gu vbwetega gu nari vathu va thumeyago Jehovha.

11. Hi nga potsa kharini mapimo ni mavbanyelo nyo vivbe?

¹¹ Mapimo ni mavbanyelo nyo vivbe. Gasi gu gimbiya lisineni, gu vbwetega gu hi simama na hi handzegide, mwendro na hi agide mahoni ga Jehovha. (Isaya 35:8; leri 1 Pedro 1:14-16.) Tepo hi nga hevbula lisine, hi vbindrugedzide silo nyo khaguri guvbanyani gwathu gasi gu landreya milayo nya Bhibhiliya. Vambe va vbindrugedzide silo nya sikhongolo ngudzu. Ganiolu gu ngo vbwetega gu hi dzi woneya gasi gu hi si vbindrugedzi mavbanyelo yathu ma agidego khu mavbanelo nyo vivbe. Ginani gi na hi phasago gu pala kutsedzelo nyo gire gilo nyo vivbe? Dundrugeya khesi Jehovha a hi ningidego gasi gu hi manega na hi agide. Ningede womi nyo hathege wa Gyanana gyaye nya gigodwa, Jesu Kristo! (1 Pedro 1:18, 19) Gasi gu hi phasa gu simama na hi agide mahoni ga Jehovha, gu vbwetega gu tepo yatshavbo hi dundruga lisima nya ningelo wa Jesu.

12, 13. a) Khu ginani hi yedego gu wona dziferiyadhu nga edzi Jehovha a dzi wonago khidzo? b) Ginani hi na ganeyago khigyo?

¹² Sihena ni sigiro si gu mba tsakisa Nungungulu. Si nga gira gu valongo vathu, sithumi-khwathu, sihevbuli-khwathu va hi kutsedzeya gu patega omu nya mibuzo yawe. Ginani gi na hi phasago gu bomba mikutsedzelo nyo patege omu nya sihena ni dziferiyadhu dzi gu mba tsakisa Jehovha? Gu vbwetega gu hi siti gwadi sighelo si girago Jehovha a si dzumeleyi dziferiyadhu dzodzo. Hi nga gira wugevisisi omu nya mabhuku yathu gasi gu hi dundruga edzi dzi phedego khidzo dziferiyadhu nyo khaguri. Ha gu dundrugeya khu sighelo nya milowo nyo mba patega omu nya dziferiyadhu dzodzo, hi na tiyisega gu khethu hi ngu gimbiya khu ndziya yi “tsakisago Pfhumu.” (Vaefeso 5:10) Ha gu tumba Jehovha ni Lito laye, kha hi na nga thava esi vambe vathu va si pimisago. — Mavingu 29:25.

¹³ Hongoleni hi gimbiya lisineni kala gupindruga. Ginani gi na hi phasago gu engedzeya gudziemiseya gwathu nyo simame gu gimbiya lisineni? Silo siraru.

ENGEDZEYA GUDZIEMISEYA GWAGO NYO GIMBIYE LISINENI

14. a) Ha gu simama gu hevbula Bhibhiliya si na hi phasa kharini gu simama na hi dzi emisede gu mba diga lisine? b) Khu ginani hi vbwetago guti, sihevbudzo ni gupwisisa?

¹⁴ Nyo pheye, simama gu hevbula Bhibhiliya u bwe u dundrugeya gwadi khesi u si hevbulago. Tepo yatshavbo dzi tshiyele tepo nyo gire isoso. Tepo u yago u hevbula u naya u li gola ngudzu lisine nigu u na dzi emiseya gu mba li diga. Mavingu 23:23 a gu hi ruma gu “renga lisine” ni gu “renga guti, sihevbulo ni mapimo.” Kha si eneyi guti lisine nya Bhibhliya basi. Gu vbwetega gu hi vbanya khilo. Tepo hi li pwisisago gwadi, ha gu pata esi hi si hevbulago ni esi hi si tigo khu gale. Guti ga gu hi kutsa gu vbanya khesi hi si tigo. Dzimbe dzitepo lisine la gu hi hevbudza khu gu hi yeyedza esi hi yedego gu vbindrugedza. Gu vbwetega gu hi vbiredzeya gu hakha sihevbudzo soso, esi Bhibhiliya yi gu khiyo si na ni lisima ngudzu guvbindra ndralama. — Mavingu 8:10.

15. Lisine la gu hi vhikeya kharini nga libhandri?

¹⁵ Nya wuvili, dzi emiseye gu vbanya khu lisine tshigu ni tshigu guvbanyani gwago. Bhibhiliya ya gu fananisa lisine ni libhandri nya musotshwa. (Vaefeso 6:14) Dziteponi nya gulowe nya Bhibhiliya, libhandri li di gu phasa ni gu vhikeya musotshwa nyimbitunu la gu ba li fasidwe gwadi. La gu nyega, kha la nga ba li mu phasa. Lisine la gu hi vhikeya kharini nga libhandri? Ha gu vbanya khu lisine tepo yatshavbo, li na hi vhikeya ga mapimo nyo vivbe li bwe li hi phasa gu hunga silo khu wugengeyi. Ha gu ba hi emisana ni gigaradzo nya gikhongolo ngudzu mwendro gu lingwa gu gira gilo nyo vivbe, lisine nya Bhibhiliya li na hi gira hi dzi emiseya gu gira silo nya sadi. Kha nga olu musotshwa gima a si hongoligo nyimbitunu nya mba ambala libhandri, anethu gima kha hi yeli gu diga lisine. Hi ngu dzi garadzeya gu vbanya khu lisine nya Bhibhiliya ga sipandre satshavbo guvbanyani gwathu. Musotshwa a di gu bwe a tshomega litshari avba nya libhandri laye. Hongoleni hi wone gu khethu hi nga gira nethu isoso khu ndziya muni.

16. Gu hevbudza lisine ga gu hi phasa kharini gu simama gu gimbiya lisineni?

¹⁶ Nya wuraru, hevbudza lisine nya Bhibhiliya vambe khavba u si kodzago khavbo. Bhibhiliya ya gu fananiswa ni litshari. Kha nga olu musotshwa nyo gengeye a pharago litshari laye li tiya, gu vbwetega gu anethu hi thumisa gwadi Lito la Nungungulu. (Vaefeso 6:17) Hatshavbo hi na ni makodzelo nya gu tshukwadzise mahevbudzelo yathu, hi “ganela mahungu nya lisine, nya gululame.” (2 Thimoti 2:15) Tepo hi thumisago Bhibhiliya gasi gu hevbudza vambe, ha guya hi liti gwadi lisine ni gu li gola. Hi bwe hi engedzeya gu dzi emiseya gu gimbiya lisineni.

17. Khu ginani lisine li gu na ni lisima gwago?

¹⁷ Lisine giningwa nya lisima ngudzu gya Jehovha. La gu hi tuleya ndziya nyo manege ni wupari ni Papayi wathu wa ndzadzini. Igyogyo khigyo gilo nya lisima ngudzu ga satshavbo hi gu naso. Jehovha a hi hevbudzide ngudzu, ganiolu gu ngari maphelo basi! A ngu tumbisa gu khuye a na simama gu hi hevbudza kala gupindruga. Khu kharato, ninga lisima lisine nga edzi u nga hadzi ninga khidzo lisima dziperola nya tengo nya wukhongolo. Simama gu “renga lisine, u nga li rengisi.” Khu kharato, u na fana ni Dhavhidhe, u na simama gu tumbisa Jehovha gu khuwe: ‘Nyi na gimbiya lisineni.’ — Ndzimo 86:11.