Sihevbudzo nya gu tsakise nyi si manidego khu gu thumeya Jehovha

Vavelegi vangu va di fuluga khu Estonia va hongola Alemanha khu kotani nya nyimbi nya mafu yatshavbo. Hwane nya gu ba nyi velegidwe avo va di hongola Canada. Ndranga yathu nya gu pheye yi diri yidugwana ngudzu, gi di romo gifi nya dzikhugo hi diri sisiwana, ganiolu hi di gu seya tsaya khu mandra tshigu ni tshigu.

Litshigu limwedo, Dzifakazi dza Jehovha dzi di lereya libhuku la Gutuledwa 21:3, 4 mamayi wangu. Esi a nga sipwa si di mu tsakisa ngudzu nyo bwe a liya. Mamayi wangu nyi papayi wangu va di simama gu hevbula Bhibhiliya nyo bwe khu hwane nya tepo va bhabhatiswa.

Ambari olu vavelegi vangu va nga ba va si kodzi gu ganeya gwadi gingiza, avo va thumede Jehovha khu sighingi. Papayi wangu a di gu thuma Dzisabhadho dzatshavbo wutshigu umo nya fabrika nyo khaguri, eni nyi di gu tshala gaya nyi nandra wangu Sylvia gasi hi hongola thumoni nya gu tshumayele, nigu dzisemana dzatshavbo hi di gu hevbula Mukhedziseyi khu ndranga. Vavelegi vangu va di nyi hevbudza gu haladza Nungungulu. Khu kharato, nyi di hunga gu hendzeledza womi wangu ga Jehovha khu 1956 tepo nyi nga ba nyiri ni 10 myaga. Giyeyedzo gyawe gi ngu nyi phasa gu simama gu thumeya Jehovha.

Hwane nya gu ba nyi vbedzide gu hevbula xikola kha nya nga ba nyi gira nya singi thumoni ga Jehovha nyi di gu pimisa kheni nya gu khala piyoneru kha nyi na nga si kodza gu mana dzitsapawu nya gu beye aviyawu nyi gimbiya nyi wona mambe mayigo. Eni nyi di pheya gu thuma radhiyu kha nga dhidje a gu thumo nyi nga ba nyi wu gola ngudzu, ganiolu eni nyi di gu thuma kala wutshigu. Khu kotani nya isoso, nyi di gu luza mitshangano nigu nyi diri ni dzipari dzi nga ba dzi si haladze Jehovha. Khu gu hegisa, livhalo langu li hevbudzidwego khu Bhibhiliya li di nyi kutsa gu vbindrugedza.

Nyi di fuluga nyi hongola Oshawa, lidhoropa li gu romo Ontairio. Eyi nyi diya tivana nyi ndriyathu moyo nya gupwani khu Ray Norman, ndriyaye Lesli ni vambe vapionero. Avo va di nyi hoyozeya gwadi, gu wona litsako lavo si nyi phaside gu vbindrugedza esi nyi nga ba nyi vbweta gu gira womini wangu. Va nyi kutside gu thuma kha nga piyoneru nigu nyi giride isoso khu Setembro nya 1966. Nyi di tsakide nigu womi wangu wu di gu gimbiya gwadi, ambari ulolo si di girega silo si nga vbindrugedza womi wangu.

TEPO JEHOVHA A GU LOMBAGO GU GIRA GILO NYO KHAGURI, ZAMA GU GIRA

Tepo nyi nga ba nyi hevbula, nyi di prenxeri petisawu gasi guya thuma Bheteli ya Toronto, Canada. Khu gu landreya, tepo nyi nga ba nyi thuma kha nga piyoneru nyi di ranwa gasi guya thuma Betheli khu 4 myaga. Ganiolu, eni nyi di gu mu gola ngudzu Lesli nyi di pimisa kh nga baeni nya gu dzumeya kovhine kha nyi na nga mu wona gambe. Hwane nya gu ba nyi giride milombelo nya yingi, nyi di hunga gu thuma Bheteli, ganiolu si nyi vbiside ngudzu gu tshadzisa Lesli.

Bheteli nyi di gu thuma lavandaria, khu hwane nyi thuma kha nga secretario. Ganiolu, Lesli a di khala piyoneru nya gu hatege Gatineau, Quebec. Dzitepo nya dzingi nyi di gu dzi wudzisa kheni: “ginani a girago olu, esi nyi hungidego gu gira, ina makungo nya yadi?” Khu gu landreya gu di girega gilo nya gu samadzise womini wangu. Ndriye wa Lesli, Ray, a di ranwa gasi ata Bheteli nigu hi di gu khala kwartuno yayimweyo isoso, si giride nyi wusedza wupari wangu ni Lesli. Hi di tshadha khu litshigu nya gu hegise nya dezignasawu yangu nya 4 myaga Bheteli, khu 27 nya Fevereiro nya 1971.

Eni nyi Lesli hi di rumedwa gasi guya thuma ga libandla nya gifransa, Quebec. Hwane nya myaga nyo khaguri nyi di samadziswa tepo nyi nga ranwa gasi gu thuma kha nga mowoneleyi nya sikwitu na nyiri nyi 28 myaga. Nyi di dzi wona na nyiri muphya ngudzu nigu na nyi si dinganedwi, ganiolu malito ma gu romo ga Jeremiya 1:7, 8 ma nyi tiyiside. Ambari ulolo, Lesli a di tshanganide ni dzimhango nyo khaguri nya movha, khu kharato si di gu mu gardzeya gu lala. Hi pimisa khethu si na hi garadzeya gu thuma kha nga vawoneleyi nya sirkwitu, uye a nyi wudzisa khuye: “Ina Jehovha a gu hi lomba gu gira gilo nyo khaguri kha hi yeli gu gira?” Hi di dzumeya gu thuma kha nga vawoneleyi nya sirkwitu khu 17 myaga.

Tepo nyi nga banyi thuma kha nga muwoneleyi nya sirkwitu, nyi di gu khala nya nyi pharegide nyo bwe nyi hamuga nyi tepo nya gu khale ni Lesli. Khu muvhulo yi di womba kampayinya, tepo nyi nga tula lidimba nyi di mana rava wu nga wuri ni panu nya meza, mihandro, keijo, dzipawu, liboteri nya vhinyu, dzikopo ni lidangalia li nga bali lovidwe pwani “dzega mwangadzi wago u ya gira pikiniki.” Lidiri litshigu nya gu tsakise, ganiolu nyi di embeya Lesli kheni nyi ni dziganelo nyi vbwetago gu dongiseya, kha nyi na si kodza gu hongola. Uye a nyi pwisiside, ganiolu a di zangaride nyana. Tepo nya nga banyi khade, livhalo lango li di pheya gu nyi garadza. Eni nyi di dundrugeya khu Vaefeso 5:25, 28. Malito matago khiyo ga Jehovha ma nyi kutside gu pwisisa edzi mwangadzi wangu a nga ba a dzipwa khidzo. Hwane nya gu ba nyi gombede nyi di embeya Lesli kheni: “hongole,” isoso si mu tsakiside. Hi diya khala vbafuvbi nya gitsongwana, lidiri litshigu nya gu tsakise ngudzu nigu gambe nyi dongisede dziganelo dzangu.

Hi tsakide khu gu thuma kha nga vawoneleyi nya sirkwitu gukhugeya Colombia Britanica kala Terra Nova. Gudogoreya gwangu nya guti mayigo gu di gu tadzisega. Nyi di pimiside gu di lovedzisa Xikola ya Gileyadhi , ganiolu nyi di si vbweti gu hongola limbe litigo. Nyi di gu wona vamisiyonariyu nga vathu nya gu hathege khu kharato, nyi di dzipwa na nyi si hatege gu gira thumo wowo. Nigu gambe, nyi di gu thava gu rumedwa ga litigo nyo khaguri Afrika li gu na ni dzinyimbi ni madwali, kholu nyi di gu tsakiswa khu gu vbanya Canada.

NYI DI HAKA KOVHINTI GASI GU HONGOLA ESTONIA NYI MAMBE MAYIGO

Khu 1992 Dzifakazi dza Jehovha dzi di tshulegide gambe gu tshumayela mayigo nyo khaguri ya Uniao Sovietica, khu kharato hi di lombwa gasi guya thuma kha nga vamisiyonaryiu Estonia. Hi di samadziswa khu mahungo yoyo, ganiolu hi di gombeya khiso. Hi di bwe hi dzi wudzisa gambe khethu: ‘Jehovha a gu hi lomba gu gira gilo nyo khaguri, ina kha hi yeli gu gi gira?’ Hi di dzumeya kovhinti, nigu nyi di tsakide khu gu dziti gu kheni kha nyi hongoli Afrika.

Hi di dzegeya gu hevbula Giestoniano. Hwane nya migima nyo khaguri, hi lombidwe gu thuma kha nga vawoneleyi nya sirkwitu. Hi di yede gu wuseya 46 mabandla nyi 3 dzigrupo Latvia, Lituania ni Kaliningrad, Russia. Iso si thulago khiso, hi di yede gu hevbula Gileviatani, Giletuwani ni Girusso; Isoso si garadzide, ganiolu vandriyathu va di gu tsaka khu gu hi wona na hi gu dzigaradza gasi gu hevbuleya malimi yaya, khu kharato khu 1999 yi di manega Betheli Estonia. Nyi di ranwa gasi gu ya thuma eyi nigu kha nga gimwegyo nya givbango nya komite ni vandriyathu Toomas Edur , Lembit Reile ni Tommi Kauko.

Hi tivanide ni Dzifakazi nya dzingi Jehovha dzi nga ba dzi dusidwe khu Siberia. Ambari olu, dzi nga dzi romo hwindzo ni valongo vadzo ni olu dzi nga ba dzi tshaniswa pasoni; Idzo gima kha dza vega giviti, dzi di simama na dzi tsakide ni gu dzi garadza thumoni nya gu tshumayele. Isoso si hi phaside gu wona gu khethu hi nga si kodza gu timiseya ambari na hi gu tshangana ni sigaradzo.

Hi di thuma khu myaga nya yingi nyo bwe hi si si kodze gu hefemula khu tepo nya gu eneye, khu kotani nya isoso Lesli a di dzipwa na gu garade; Kha ha dzegeya gu si tugula gu khethu a diri ni madwali ma nga ba mu gira a garala. Khu kharato, hi hunga gu bweleya Canada. Tepo hi nga kovhidharwi gasi gu hongola ha ya kursari Xikola Patterson, Nova Iorque tigoni ga Etados Unidos da America hi di pimisa khethu kha hi na nga si kodza, ambari ulolo hi di dzegeya gu gombeya hi bwe hi dzumeya kovhinti. Jehovha a kategiside makungo yathu, kholu tepo hi nga hongola ga xikola yeyi, Lesli a di ya thumwa madwali yaye gasi hi si kodza gu ya thuma nya mba garadzega.

YIMBE KOVHINTI GASI GU HONGOLA AFRIKA

Tepo hi nga ba hi bweleya Estonia khu 2008 ni wutshigu, hi di ligaredwa khu tsindza gwathu nya nya mafu yatshavbo va hi wudzisa gu khavo hi ngu dzumeya gu hongola Congo gani. Nyi di garadzega ngudzu kholu nyi di yede gu hlamula ga litshigu li nga hadzi gu landreya. Kha nya dzegeya gu embeya Lesli khu mahungo yaya, kholu a di hadzi gu garadzega nuye nyo bwe a si lali, wulangani nya isoso kheni nyi nga mba lala; Kholu nyi di gu gombeya khesi nyi nga ba nyi thava gu tshangana naso Afrika.

Litshigu li nga landreya nyi di bhula ni Lesli khu mahungo yaya, ndrani nya mabhulo yathu hi di ganeya khethu: “Jehovha a gu hi rana gasi hi hongola Afrika, gasi gu dziti gu khethu hi na si kodza guya timiseya esi hi na tshanganago naso, ina kha hi yeli gu dzumeya?” Khu kharato, hwane nya gu ba hi khade 16 myaga Estonia hi di hongola Kinshasa, Congo. Bheteli ya yoyo yi diri ni jardim nya gu mbure ngudzu nigu gu diri wulanga nya gurule. Gilo nya gu pheye Lesli a nga namegedza kwartuno gwathu gu diri kartawu a nga ba a yi dzegige tepo a nga fuluga khu Canada; Iyo yi diri ni malito yaya: “Tsaka avbo u gu romo.” Hwane nya gu ba hi tivanide ni vandriyatu hi bwe hi gimbidzisa sihevbulo nya Bhibhiliya hi di tsaka khu gu thuma kha nga vamisiyonariyu. Khu gu gimbiya nya tepo hi di mana lithomo nya gu wuseye 3 Dzibheteli Afrika, khu kotani nya isoso hi si kodzide guti vandriyanthu nya vangi va gu na ni makhalelo ni mitumbunuko nya gu hambane-hambane. Kha nya nga ba nyi garadzega khu gu vbanya Afrika nigu nyi di bonga Jehovha khu gu na nyi rumede tigoni mule.

Congo hi di wona guhodza nya sirengwanana hi nga ba hi pimisa khethu kha si hodzwi. Ganiolu, tepo hi nga ba hi wona vandriyathu na va gu hodza anethu hi di hodza.

Tepo hi nga endra hi hongola khuga dambo (Este) ga Afrika, hi di tsaka khu gu tiyisa vandriyathu ni gu va ninga esi va nga ba va si vbweta. Kholu iyoyo, dzialdheya nyo khaguri dzi di gu dhumedwa ni gu tshaniswa sanana ni vanyamayi khu masotshwa nyo khaguri. Ambari ulolo, gutumba va nga ba vari nago avbo nya gu guwuswe ga avo va fudego, lihaladzo lavo khu Jehovha ni edzi va nga ba va tumbegide ga hengeledzano yathu si hi kuhide ngudzu. Giyeyedzo gyawe gi hi kutside gu tiyisa gukhodwa gwathu ga Jehovha ni gu hi dundrugisa gu khethu khu ginani hi mu thumeyago. Vandriyathu nyo khaguri va di luzide dzindranga dzawe ni guhodza nya gungi va nga ba va limide. Isoso si nyi dundrugiside gu khiso hi nga luza dzithomba dzathu khavba ni avba nigu wupari wathu ni Jehovha wu na ni lisima ngudzu. Ambari olu va nga ba va tshangana ni sigaradzo nya singi, vandriyathu va di si khaleyi gu sola-sola. Magirelo yawe nya silo ma hi kutside gu emisana ni sigaradzo sathu khu gutiya-hwambo.

HI DI NINGWA THUMO NYA WUPHYA ASIA

Khavbovbo hi di ningwa thumo hi nga ba ha sa wu vireya. Va di lomba gasi guya thuma Betheli ya Hong Kong, ethu kha ha nga si vireya guya thuma Asia. Ganiolu, hwane nya gu ba hi wonide edzi Jehovha a hi phasidego khidzo ga mithumo hi giridego, hi di dzumeya konvhinti. Khu 2013 si hi garadzede gu tshadzisa vandriyathu va Afrika na hi si siti esi si nga hadzi girega khu landreya.

Si di hadzi gu hi garadzeya gu vbanya Hong Kong kholu gu diri lidhoropa li nga ba li tade khu vathu nya mayigo yatshavbo, khu kharato si di gu garadza gu hevbhula Gixina. Ambari ulolo, vandriyathu va di hi haka gwadi nigu hi di gutsakeya guhodza ga tigoni mule. Thumo wu di gu gimbiya gwadi, ganiolu gu di gu vbwetega dzitsapawu nya dzingi gasi gu sayisa dzindranga dzodzo, khu kharato Huwo nya Guthangeye yi di hunga gu rengisa dzinyumba nya dzingi. Na wu si vbohi mwaga nya 2015 hi di rumedwa gu ya thumeya Coreia do Sul, hi di yede gu hevbuleya limbe lidime nya gu garadze. Ambari olu hi nga ba hi si kodzi gu ganeya gwadi, vandriyathu va hi tiyiside khu gu dzi garadza gu ganeya Gikoreyano.

ESI HI SI HEVBUDEGO THUMONI GWATHU GA JEHOVHA

Gu gira dzipari kha si vbevbugi, ganiolu hi ngati vathu ha gu va rana magaya gwathu hi bwe hi va endreya. Hi wonide gu khethu vandriyathu va ngu fana nigu Jehovha a hi giride ni makodzelo nya gu tule myonyo yathu gasi hi si kodza gu khala dzipari. — 2 Kor. 6:11.

Hi yede gu dzumeya vathu nga Jehovha a va dzumeyago khidzo ni gu vbwetedzeya silo si yeyedzago gu khiso Jehovha a ngu hi haladza nigu hi gimbidzisa. Ha gu dzipwa na hi vbede tshivba mwendro gu pimisa gu khethu kha hi tsakedwi khu vambe hi di gu leri malangaliya nya ngu tiyise hi nga lovedwa khu dzipari dzathu. Khu lisine, hi wonide gu khethu Jehovha a hlamude milombelo yathu khu gu hi tiyisa ni gu hi ninga tshivba.

Khu gu gimbiya nya myaga eni nyi Lesli, hi hevbude gu khethu si na ni lisima gu dzi ninga tepo nya gu khale ni vambe ambari na hi gu pharegide. Ethu gambe hi pwisiside khethu si na ni lisima gu dzi hega tepo hi girago gihoso nyo khaguri, ngudzu-ngudzu tepo hi hevbuleyago lidimi nya liphya. Nigu matshigu yatshavbo ni wutshigu ha gu zama gu dundrugeya khu gilo nyo khaguri gi nga tsakisa gasi gu bonga Jehovha.

Khu lisine, eni nyi di gupimisa kheni gima kha nyi na nga khala misiyonariyu mwendro gu vbanya ga mambe mayigo. Nyi tsakide khu gu dziti gu kheni satshavbo si ngu kodzega khu gu phaswa khu Jehovha. Nya gu dundruga malito ya muprofeti Jeremiya ma gu khayo: “Uwe Jehovha u nyi pembide.” (Jer. 20:7) NM Khu lisine, uye a hi girede silo nya singi hi nga ba ha sa si vireya a bwe a hi kategisa ngudzu ambari gu dogoreya nya gu endre khu aviyawu gu giregide. Eni nyi hongode malanga nya mangi khu aviyawu guvbindra edzi nyi nga ba nyi pimisa khidzo na nyi ngari gyanana, nigu hi wusede Dzibheteli nya dzingi ga 5 dzikontinenti nigu nyi ngu bonga ngudzu Lesli khu gu ba nyi seketede ga mithumo yatshavbo nyi ningidwego.

Tepo yatshavbo hi ngu pimisa gu khethu satshavbo hi girago, kholu hi haladzago Jehovha. Silo nya sadi hi si vbanyago muhuno, sa gu yeyedza edzi hi na tsakago khidzo guvbanya kala gupindruga tepo Jehovha a na thawuludzago “mandza [yaye] nya wuhindzi [a] khurisa sivangwa satshavbo nya guvbanye.” — Ndzi. 145:16.