Womi nyo tsakise thumoni ga Jehovha

NDRANGA YATHU

Eni nyi velegidwe khu 1934, nigu vavelegi vangu va khugide khu Suíça va hongola Timmins a gu lidhoropa li gomogo Ontário, Canadá. Khu 1939, mamayi wangu a di pheya gu leri Mukhedziseyi ni gu wona mitshangano nya Dzifakazi dza Jehovha. Nigu uye a di gu hongola ni eni gumogo ni vandriyangu nya 6. Nya mba hweya, uye a di khala mweyo nya Dzifakazi dza Jehovha.

Papayi kha tsaka khu makungo aya mamayi a hungidego, ganiolu mamayi a di gu haladza lisine nigu a di gu vbweta gu tumbega ga Jehovha. Uye giride isoso ndrani nya mwaga nya 1940, tepo khiyo thumo nya Dzifakazi dza Jehovha wu nga wugedwa Canadá. Nigu uye tepo yatshavbo a di gu phara papayi khu githawo ni wuwadi ambari olu a nga ba a gira silo nya mba sadi. Giyeyedzo gyaye nya gyadi gi phaside eni gumogo ni vandriyangu gu dzumeya lisine. Egi gi tsakisago khu gu papayi a di vbindrugedza mavbanyelo yaye a bwe a pheya gu hi phara khu ndziya nya yadi.

NYI DI BELEYA THUMO NYA TEPO YATSHAVBO

Ga nango nya guvbise ngudzu khu 1950, eni nyi di hongola ga Assembleia de Aumento da Teocracia, Nova Iorque. Eni nyi kutsegide gu gireya nya singi Jehovha, hwane nya gu ba nyi tivanide ni vandriyathu nya vangi va mafuni gwatshavbo ni gu engiseya matshango ya ava va nga ba va hevbude Xikola ya Gileyadhi. Nyi di engedzeya gu dzi emiseya gu beleya thumo nya tepo yatshavbo. Hwane nya gu ba nyi bwelede gaya, nyi di dzi lovedzisa gasi gu khala piyoneru nya tepo yatshavbo. Bheteli ya Canadá yi di nyi hlamula gu khiyo, nyi di yede gubhabhatiswa gu pheya. Nyi giride isoso khu 1 nya Outubro nya 1950. Hwane nya ngima moyo, nyi di khala piyoneru nya tepo yatshavbo nigu nyi di hakha thumo wangu nya gupheye eyi Kapuskasing. Lidhoropa lolo li diri hwindzo ngudzu ni avba nyi nga ba nyi khala avbo ga tepo yoyo.

Ga nango nya primavera khu 1951, Bheteli yi di rumeya Dzifakazi dzi nga ba dzi ganeya Gifransa, gasi gu hongola tigoni ga Quebeque omu gu nga ba gu ganedwa Gifransa. Gu di gu vbwetega vahuweleyi nya vangi eyi. Eni nyi dandride na nyi gu ganeya Gifransa ni Gingiza, khu kharato nyi di dzumeya konvhite nya guya thume Rouyn. Kha nya nga ba nyiti muthu a vbanyago eyi. Nyi di guti avba nyi nga ba nyi hongola avbo, ganiolu satshavbo si gimbide gwadi. Eni ni Marcel hi khade dzipari nya dzikhongolo ngudzu, nigu nyi tsakide khu gu thuma Quebeque khu 4 myaga yi nga landreya kha nga piyoneru nya gu hathege.

GILEYADHI NI GU THINDREGA NYA MAKUNGO YATHU

Tepo nyi nga ba nyi romo Quebeque, nyi tsakide ngudzu khu gu hakha konvhite gasi guya kursari xikola ya Gileyadhi turma numeru 26 eyi Lansing sul, Nova Iorque. Nyi di gradhuwari khu 12 nya Fevereiro nya 1956, nyi di nigwa konvhite gasi guya thumeya Gana,b África Ocidental. Ganiolu na nyi nga si hongoli, nyi di yede gu bweleya Canadá nyi ya khala “dzisemana nyo khaguri” kala malangaliya ma nga ba ma vbwetega gasi gu endra ma duga.

Nyi virede 7 migima eyi Toronto kala ma duga malangaliya yoyo. Ga tepo yoyo nyi di hakhwa khu ndranga ya na Cripps, nigu nyi tide gyanana gyawe nya gu pwani khu Sheila. Ethu hi di pheya gu haladzana. Tepo khiyo nyi nga ba nyi vbweta gu mu lomba gasi gu nyi tshadha naye, malangaliya yangu ma di duga. Eni ni Sheila hi di gombeya, nigu hi di hunga gu khethu nyi di yede gu hongola ga thumo nyi nga ningwa. Ganiolu, ethu hi di hunga gu loveyana malangaliya hi bwe hi vireya gasi gu wona gu khethu hi na tshadha mindru wa tshigu mwendro ne. Kha sa vbevbuga gu hunga makungo yoyo, ganiolu khu gu gimbiya nya tepo hi tugude gu khethu hi di gu hungide makungo nya yadi.

Hwane nya ngima moyo na nyi gu endra khu kombhoyo, navhiyu ni avhiyawu nyi di vboha Accra, Gana. Eyi nyi di pheya gu thuma kha nga muwoneleyi nya dhistrito. Ganiolu, isoso si di gu pata gu endra mule Gana ni mayigo ya vbafuvbyana mule, nya nga Costa do Marfim ni Togolândia (olu gu ranwago gupwani i Togo). Ga dzitepo nya dzingi, nyi di gu thumisa movha nyi nga ningwa khu Bheteli gasi gu endra khiyo. Nyi tsakide ngudzu khu gu wuseya vandriyathu.

Guvbeyani nya dzisemana eni nyi diri ni mithumo omu nya dziasembleya nya sirkwitu. Ethu hi diri mwalo Dzisalawu nya dziasembleya. Khu kharato, vandriyathu va di gu vbaha mutsa khu misenghele ni yimbe misimbo gasi hi sivbi khu lihani. Kha nga olu hi nga ba hiri mwalo jilera, vandriyathu va di gu hongola ni sirengo savo na si ngo gu vbanya, gasi va si songa tepo khiyo va vbwetago gu hodza.

Hi di gu mana matshango ya mangi ga dziasembleya dzodzo. Litshigu limwedo ndriyathu Herb Jennings,c a nga ba ari misiyonariyu, a di gu vega ganelo tepo khiyo mombe yi nga tshulega. Iyo yi di gu gimbiya-gimbiya vbakari nya vathu. Herb a di ema gu ganeya ni gu mombe yile yi di pheya gu penga. Ganiolu, 4 vandriyathu va gu na ni tshivba va di ya yi mola va bwe va yi vega avba yi nga ba yi romo, vandriyathu na va gu veta mandza.

Ga dzisemana nya dziasembleya, nyi yeyedzide vhidhyu yathu yi gu khiyo The New World Society in Action ga madhoropa ya vbafuvbyana mule. Gasi gu gira isoso, nyi di gu yeyedza vhidhyu avba nya kwadru nya guage nyi nga ba nyi yi hungeleya vbakari nya misimbo mivili. Vathu va zonani mule va yi gode ngudzu vhidhyu yeyi. Ga vathu nya vangi, eyi yi diri tepo nya gupheye na va gu sixitiri vhidhyu. Avo va di gu veta mandza khu tshivba tepo va nga ba va wona vathu na va gu bhabhatiswa ga vhidhyu yoyo. Vhidhyu yoyo yi phaside vathu gu wona gu khavo ethu hi hengeledzano yi pwananago mafuni gwatshavbo.

Hwane nya myaga mivili África, nyi tsakide khu gu wona kongresu internacional dhoropani ga Nova Iorque khu 1958. Egi gi nga nyi tsakisa ngudzu khu gu wona Sheila a nga ba ata khu Quebeque, avbo a ga ba a thuma kha nga piyonera nyo hathege. Ethu hi di gu bhula khu malangaliya, ganiolu ga tepo yile hi di gu mananide khu khovbe ni khovbe. Nyi di mu wudzisa gu kheni uye a ngu dzina gu tshadha ni eni gani, uye a di dzumeya. Nyi di loveya lidangaliya ndriyathu Knorrd nyi bwe nyi mu wudzisa gu kheni, ina Sheila a nga hongola nuye Gileyadhi a bwe a hongola ni eni África. Uye a di dzumeya. Sheila a di vboha Gana. Hi tshadhide Accra khu 3 nya Outubro nya 1959. Hi pwide makategwa ya Jehovha khu gu mu thangisa womini gwathu.

HI THUMIDE GUMOGO CAMARÕES

Khu 1961 hi di ya thumeya Camarões. Vandriyathu va di nyi lomba gasi guya phasedzeya Bheteli nya yiphya, khu kharato nyi di gu pharegide ngudzu. Kha nga olu nyi nga ba nyiri githumi nya giphya Bheteli, nyi di yede gu hevbula nya singi. Khu kharato, khu 1965 hi di tugula gu khethu Sheila a diri ni mimba. Si hi garadzede gu dzumeya gu khethu hi di hadzi gu khala vavelegi. Ganiolu, khu kotani nya olu hi nga ba hi garadzega khu thumo nya wuphya ni makungo nya gu bweleyi Canadá, gi di girega gilo nya mba tsakisa.

Sheila a di luza mimba. Dhokodheya a di hi embeya gu khuye gyanana gile hi nga gi luza gi diri gikhwathana. Isoso si giregide 50 myaga hwane, ganiolu gima kha hi si divali isoso. Ambari olu hi nga ba hi garadzega khesi si giregidego, ethu hi di simama ni thumo hi nga ba hi wu gola ngudzu.

Vandriyathu va Camarões va di pheya gu wugedwa kholu va nga ba va si dzi bedzedzeyi umo nya politika, nigu si di gu engedzeya gu garadza ngudzu tepo nya dzi eleições. Khu 13 nya Maio nya 1970, esi hi nga ba hi si vireya gu khethu kha si na nga girega si giregide, kholu thumo nya Dzifakazi dza Jehovha wu di himbedzedwa. Bheteli nya yiphya hi nga ba hi romo ga iyo khu tanga nya 5 migima, yi di dzegwa khu mufumo. Na yi nga si vbindri semana, vatshavbo vamisiyonariyu gupata eni ni Sheila hi di tutumiswa tigoni mule. Si nyi garadzede ngudzu gu diga vandriyathu, kholu hi di gu va haladza ngudzu nigu hi di gu garadzega khesi si nga hadzi gu va dugeleya ga matshigu ma nga hadzi gu landreya.

Hi vbedzide 6 migima Bheteli ya França. Na nyiri iyoyo nyi simamide gu gira satshavbo nyi nga nyi si kodza gasi gu khataleya vandriyathu va Camarões. Khu Dezembro nya mwaga wowo, ethu hi di hongola Bheteli ya Nigéria iyo hi nga pheya gu khataleya thumo eyi Camarões. Vandriyathu va Nigéria va hi hakhide gwadi nigu hi tsakide khu gu thuma myaga nya yingi eyi.

HI DI YEDE GU HUNGA MAKUNGO NYO GARADZE

Khu 1973 hi di yede gu hunga makungo nyo garadze ngudzu. Sheila a di gu tshaniswa khu madwali nya makhongolo ngudzu. Uye a di nyi embeya gu khuye “eni kha yi na nga si kodza gu simama, tepo nya yingi nyo dzipwa na nyi garade nigu na nyi gu dwala.” Uye a thumide gumogo ni eni khu 14 myaga África Ocidental. Eni nyi di tsakide khu thumo waye nyo tumbege, ganiolu hi di yede gu gira gu vbindrugedza nyo khaguri. Hwane nya gu ba hi bhude khu mahungu yoyo hi bwe hi gombeya, hi di hunga gu bweleya Canadá gasi guya khataleya gwadi madwali yaye. Gu ema gu thuma kha nga vamisiyonariyu ni thumo nya tepo yatshavbo ma diri makungo ma nga hi garadzeya gu hunga.

Hwane nya gu ba nyi bwelede Canadá, nyi ningidwe thumo khu pari yangu ya gale, nyo khathaleye dzimovha dhoropani ga Toronto. Hi lugaride wulanga nyo khale, hi renga sombo si nga ba si thumisidwe, nigu hi si kodzide gu pheya womi nya mba gira mangava. Ethu hi di gu vbweta gu simama gu vbevbugisa womi wathu na hiri ni gutumba nya gu khethu mindru wa tshigu hi nga beya gambe thumoni nya tepo satshavbo. Iso si nga hi hlamadzisa khu gu, gutumba gwathu gu tadzisegide nigu nya mba hweya isoso si di hadzi gu girega.

Nyi di pheya gu phasedzeya khu Dzisabhadho thumo nya gu vbahe Salawu nya yiphya nya dziasembleya Norval, Ontário. Khu gu gimbiya nya tepo, nyi di lombwa gasi gu thuma kha nga muwoneleyi nya Salawu nya dziasembleya. Sheila a di gu tshukwata nigu hi di wona gu khethu a di hadzi gu si kodza gu khataleya thumo nya wuphya. Khu kharato, hi di fuluga hi ya khala Salawu nya dziasembleya khu Junho nya 1974. Ethu hi tsakide ngudzu khu gu thuma gambe avba nya thumo nya tepo yatshavbo.

Egi gi tsakisago khu gu Sheila a simamide gu tshukhwata. Hwane nya myaga mivili si di gu kodzega gu hi bweleleya gasi gu thuma kha nga vawoneleyi nya sirkwitu. Gipandre gyogyo gi di romo Manitoba, a gu provhinsya ya Canadá yi tidwago khu gu dzidziya ngudzu. Khu kharato, hi tsakide ngudzu khu gu wona lihaladzo la vandriyathu. Hi hevbude gu khethu kha si khatadzisegi avbo hi thumago avbo, kholu egi gi gu na ni lisima gu simama gu thumeya Jehovha ni gwevbini wulanga hi gomogo avbo.

NYI HEVBUDE GILO NYA LISIMA

Hwane nya myaga nya yingi na hi gu thuma kha nga vawoneleyi nya sirkwitu, hi di kovhidharwi khu 1978 gasi guya thumeya Bheteli ya Canadá. Nya mba hweya, nyi hevbude khu ndziya nyo garadze gilo nya lisima ngudzu. Nyi di ningwa ganelo nya ora mweyo ni metadu gasi gu vega khu Gifransa ga tshangano nya gu hathege Montreal. Nya mba tsakisa, khu gu ganelo yangu yi di garadzeya vandriyathu gu yi pwisisa, nigu ndriyathu moyo wa Dhepartamentu nya Thumo a di ta nyi ninga wusingalagadzi. Khu lisine, nyi di tugula gu kheni nyi di siri muvegi nya wadi nya dziganelo guvbindra vambe. Nigu kha nya wu phara gwadi wusingalagadzi wowo. Mavbanyelo yathu ma di si pwanani. Eni nyi di gu pimisa gu kheni uye a di gu khaleya gu sola-sola nigu kha nga ba a nyi zundza. Nyi di hosisa khu gu lamula edzi nyi nga ningwa khidzo wusingalagadzi ni gu lamula gambe muthu wakone.

Hwane nya matshigu nyo khaguri, givbango nya Kometi ya Bheteli gi di ganeya ni eni khu mahungu yoyo. Nyi di dzumeya gu kheni kha nya nga ba nyi hakhide gwadi wusingalagadzi, nigu nyi di yeyedza gu kheni nyi di dzi layide. Khu gu landreya, nyi di ya ganeya ni ndriyathu wule a nga nyi ninga wusingalagadzi. Khu wuwadi uye a di nyi divaleya. Esi si nga nyi giregeya, si nyi hevbudzide gu khiso gu dzi nogisa gilo nya lisima ngudzu nigu gima kha nyi na nga si divala isoso. (Mav. 16:18) Dzitepo nya dzingi nyi ngu gombeya ga Jehovha khu mahungu yoyo, nigu nyi dzi emisede gu mba wona wusingalagadzi khu ndziya nya mba yadi.

Olu nyi na ni tanga nya 40 myaga na nyi thuma Bheteli ya Canadá, nigu gu khugeya khu 1985 nyi na ni lithomo nya gu thume kha nga givbango gya Kometi ya Bheteli. Khu Fevereiro nya 2021, mwangadzi wangu Sheila a di luza womi. Wulangani nya gu mu suve basi, eni nyi ngu tshangana ni sigaradzo nya madwali. Ganiolu, gu thumeya Jehovha si ngu nyi gira nyi khala na nyi pharegide ni gu tsaka, nigu ‘matshigu ma rode.’ (Muh. 5:20) Ambari olu nyi tshanganago ni sigaradzo nyo khaguri, nyi na ni matshango nya mangi ma nyi girago nyi tsaka. Gu thangisa Jehovha womini gwangu khu gu manega thumoni nya tepo yatshavbo khu 70 myaga, si ngu nyi reseya litsako nya likhongolo. Eni nyo gombeleya vaphya gasi anavo va simama gu thangisa Jehovha womini gwavo. Olu nyi ngu tiyisega gu kheni avo navo va na mana litsako nya likhongolo khu gu thumeya Jehovha basi.