Hi hevbude silo nya singi ni Muhevbudzi wathu nya Khongolo womini wathu watshavbo

GIYEYEDZO GYA VAVELEGI VANGU

Gu hegisani nya mwaga nya 1950, vavelegi vangu va di fuluga khu Itália va hongola Kindersley, eyi Saskatchewan, Canadá. Nya mba hweya, va di hevbula lisine nigu ilo li di khala nya lisima womini gwathu. Nyi ngu dundruga gu kheni tepo nyi nga ba nyiri gyanana, nyi di gu vbedza tepo nya yingi thumoni nyo tshumayele ni ndranga yangu, khu kharato nyo gola gu hesa vathu khu gu va embeya gu kheni nyi phede gu thuma kha nga “piyonero nyo phasedzeye” na nyiri ni 8 myaga.

Vavelegi vangu va diri sisiwana, ambari ulolo avo va hi ningide giyeyedzo nya gyadi nya gu dzi hiyi silo gasi gu thumeya Jehovha. Khu giyeyedzo, khu 1963 avo va di rengisa silo nya singi gasi gu mana dzitsapawu nya gu hongole khidzo kongresu nya mayigo nya mangi eyi Pasadena, Califórnia, Estados Unidos da América. Khu 1972 hi di gira liendro nya 1000 dzikilometru (a gu 620 milhas), hi hongola eyi Trail, Colúmbia Britânica, Canadá, gasi guya tshumayela gipandre nyo khaguri gya Itália. Papayi wangu a di gu thuma kha nga ghwardha. Uye a di bomba mathomo nya mangi gasi gu vega gupima avba nya gu thumeye Jehovha.

Nyi ngu bonga ngudzu khu gu ba vavelegi vangu va nyi ningide giyeyedzo nya gyadi gumogo ni vandriyangu nya vararu. Giyeyedzo gyawe gi khade trenamentu yangu nyo pheye thumoni ga Jehovha. Avo va nyi hevbudzide gilo nya gu gima kha nya gi divala womini gwangu gwatshavbo, a gu: Nya gu thangisa Mufumo womini gwangu, Jehovha a na nyi khathaleya. — Mat. 6:33.

NYI DI BELEYA THUMO NYA TEPO YATSHAVBO

Khu 1980, nyi di tshadha ni Debbie, a gu ndriyathu a mburidego a vegago gupima avba nya gu thumeye Jehovha. Ethu hi di gu vbweta gu beleya thumo nya tepo yatshavbo, khu kharato Debbie a di pheya gu thuma kha nga piyonera hwane nya 3 migima na hi tshadhide. Hwane nya mwaga mowo na hi tshadhide, hi di hongola ga libandla nya lidugwana li nga ba li vbweta giphaso, nigu aneni nyi di pheya gu thuma kha nga piyonero.

Khu gu gimbiya nya tepo, hi di vbeya tshivba hi bwe hi hunga gu duga kheyi. Ganiolu, hi di pheya khu gu bhula ni muwoneleyi nya sirkwitu. Khu lihaladzo uye a di hi embeya gu khuye: “Uwe khuwe u girago gu giemo gi garadza. Uwe wa gu vega gupima ga sigaradzo u tshanganago naso. Wulangani nya isoso, wa gu vbwetedzeya silo nya sadi u na si mana.” Khiso kamo hi nga ba hi vbweta gu sipwa. (Ndzi. 141:5) Hi di dzegeya gu thumisa wusingalagadzi waye, nigu khu lisine hi tugude gu khethu si di romo silo nya singi nya sadi. Nya vangi libandlani va di gu vbweta gu gireya nya singi Jehovha, gupata vaphya ni vale va nga ba vari ni dzipari nya wugadzi dzi gu mba thumeya Jehovha. Egi gi diri gihevbudzo nya lisima gwathu. Hi hevbude gu vega gupima ga silo nya sadi hi bwe hi vireya Jehovha a lulamisa giemo hi gi wonago nga gigaradzo. (Mik. 7:7) Hi di wusedza litsako lathu, nigu giemo gyathu gi di tshukhwata.

Vahevbudzi nya xikola yathu nyo pheye nya wupiyoneru va di gu thumide ga mayigo ya vbavbandze. Avo va hi yeyedzide dzifotu nigu va ganede khu sigaradzo ni makategwa va nga ma mana tepo va nga ba va thuma ga mambe mayigo, nigu isoso si hi giride hi vbweta gu thuma kha nga vamisiyonaryu. Khu kharato, hi di hunga gu vboheya misuwo yathu nya gu thume kha nga vamisiyonaryu.

Gasi gu vboheya misuwo yoyo, khu 1984 hi di gira liendro nya 4000 dzikilometru (a gu 2485 milhas) na hi gu duga khu Colúmbia Britânica hi hongola Quebec, gu ganedwago lidimi nya Gifrança. Iso si thulago gu khiso hi di yede gu hevbula limbe lidimi ni mavbanyelo nya maphya. Gimbe gigaradzo hi nga tshangana nagyo khu gu dzimbe dzitepo hi diri mwalo dzitsapawu nyo eneye gasi gu dzi vbanyisa khidzo. Khu tepo nyo khaguri esi hi nga ba hiri naso gasi gu hodza gu diri mazambani hi nga ba hi roleya thembweni ga mulimi nyo khaguri. Mwangadzi wangu a di gu phula mazambani khu dzindziya nyo hambane-hambane, nigu khu ndziya nyo tshambe. Ambari hi nga tshangana ni sigaradzo, hi di gira satshavbo hi nga si kodza gasi gu timiseya na hi tsakide. Nigu hi di gu tiyisega gu khethu Jehovha a di gu hi khathaleya. — Ndzi. 64:10.

Litshigu limwedo, nya mba si vireya hi di ligaredwa. Hi di ranwa gasi guya thuma Bheteli ya Canadá. Ethu hi di gu dzi lovedziside gasi gu kursari xikola ya Gileyadhi, khu kharato ambari olu hi nga ba hi tsakide khu gu kovhidharwi hi di gu garadzega gambe. Ganiolu hi di dzumeya gu hongola. Tepo hi nga vboha, hi di wudzisa ndriyathu Kenneth Little, a gu givbango nya Kometi ya Bheteli gu khethu: “Ginani hi yedego gu gira ha gu ranwa gasi gu hongola Gileyadhi?” Uye a di hlamula gu khuye: “Hi na si wona esi hi na girago mwa gu ranwa.”

Hwane nya semana mweyo, eni ni mwangadzi wangu Debbie hi di ranwa gasi gu hongola Gileyadhi. Khu kharato, hi di yede gu hunga gilogyo. Ndriyathu Little a di hi embeya gu khuye: “Kha si khatadzisegi esi u na hathago, kholu ga litshigu nyo khaguri u na dogoreya gu dzi kabanisa khu vbakari gasi gu gira mithumo yatshavbo. Yatshavbo mithumo khyadi; Jehovha a nga kategisa ni wevbini.” Hi di dzumeya gu hongola Gileyadhi nigu hwane nya myaga nyo khaguri hi di wona gu khethu esi Ndriyathu Little a nga ganeya si diri lisine. Dzitepo nya dzingi hi di gu thumisa malito yaye gasi gu embeya muthu nyo khaguri a nga ba yede gu hunga gu khuye khu wevbini thumo a na wu hathago.

THUMO NYA WUMISIYONARYU

Hi di tsaka ngudzu khu gu gira gipandre nya 24 sihevbuli nya turma 83 ya Gileyadhi, isoso si giregide khu Abril nya 1897 eyi Brooklyn, Nova York. Ndriyathu Ulysses Glass ni Jack Redford va diri avo vahevbudzi vathu. 5 migima hi nga vbedza eyi, yi di vbindra khu gu vbiredza ngudzu nigu khu 6 nya Setembro nya 1987 hi di gira formatura. Ethu ni ndriyathu John ni Marie Goode hi di rumedwa gasi hiya thuma Haiti.

Gukhugeya khu 1962 vamisiyonaryu va nga ba va formarwi Gileyadhi kha va nga ba va rumedwa Haiti kholu va nga tutumiswa khu tigoni mule. Hwane nya dzisemana dziraru, hi diya thuma Haiti omu nya libandla li nga ba li romo sigomoni nigu li diri ni 35 vahuweleyi. Hi diri vaphya nigu hi di si siti silo nya singi, nigu hi di gu vbanya honga avba nya ndraga nya vamisiyonaryu. Vathu nya vangi va gipandreni mule va diri sisiwana ni gu va di si kodzi gu leri. Ndrani nya thumo wathu nya wumisiyonariyu hi tshanganide ni sitereka, gu wandrwa nya mufumo, gu vbiswa silo ruwani ni singulu.

Ethu hi hevbude nya singi ni vandriyathu va Haiti va timiseyago ni gu tsaka. Nya vangi va di gu tshangana ni sigaradzo nya singi, ganiolu va di gu haladza Jehovha ni thumo nyo tshumayele. Ndriyathu nyo khaguri nya nyamayi a dandridego khu tanga kha nga ba a kodza gu leri, ganiolu a di gu vegide hungoni tanga nya 150 milowo. Sigaradzo sa gipandreni mule, si hi giride hi engedzeya gu tshumayela khu Mufumo wa Nungungulu kha nga owu wu na vbedzago sigaradzo satshavbo. Si ngu tsakisa ngudzu gu wona sihevbuli sathu nyo pheye na si gu khala vapiyonero nya tepo yatshavbo, nyo hathege ni gu khala madhota.

Tepo nyi nga ba nyi romo Haiti, nyi tivanide ni muphya nyo khaguri a nga ba ari misiyonariyu nya tshetshe ya mórmon, nigu hi bhude khu Bhibhiliya ga siemo nyo khaguri. Hwane nya myaga nyo khaguri, nya mba si vireya nyi di hakha lidangaliya laye. Uye a di lova gu khuye: “Nyi na bhabhatiswa ga asembleya yi landreyago! Nyo vbweta gu bweleya Haiti nyi ya thuma kha nga piyonero nyo hathege ga gipandre nyi nga thuma kha nga misiyonariyu nya tshetshe ya mórmon.” Uye a di gira kamo isoso khu myaga nya yingi gumogo ni mwangadzi waye.

EUROPA — KHU GU LANDREYA ÁFRICA

Hi di rumedwa gasi guya thuma ga gipandre nyo khaguri Europa omu thumo wathu wu nga pheya gu vbevbuga gu tshumayela. Khu 1992 hi di vboha Ljubljana, eyi Eslovênia, avbo vavelegi vangu va nga dandreya avbo na va si fulugi va hongola Itália. Ga tepo yoyo, yi di gu romo nyimbi ga sipandre nyo khaguri sa ex-Iugoslávia. Bheteli ya Viena, eyi Áustria, gumogo ni dzixikritoriyu dza Zagreb, eyi Croácia ni Belgrado, eyi Sérvia, dzi di gu woneleya thumo nyo tshumayele gipandreni mule. Olu litigo ni litigo li di hadzi gu manega ni Bheteli yalo.

Khu kharato, hi di yede gu hevbuleya limbe lidimi ni mavbanyelo ya mule. Vavbanyi va mule va di gu ganeya gu khavo: “Jezik je težek,” si thulago gu khiso “Lidimi leli li ngu garadza.” Nigu isoso si diri lisine kamo. Hi di samadziswa khu gu tumbega ga vandriyathu khu gu dzumeya ni gwevbini guvbindrugedza gu nga ba gu girwa khu hengeledzano, nigu ethu hi di gu wona edzi Jehovha a nga ba a va kategisa khidzo. Hi di wona gambe edzi Jehovha a lulamisago khidzo silo khu lihaladzo nigu khu tepo yakone. Ethu hi hevbude silo nya singi tepo hi nga ba hi romo Eslovênia, nigu hi hevbudzidwe silo nya siphya.

Ganiolu, womi wathu wu di hadzi gu simama gu vbindrugedza. Khu 2000 hi di rumedwa gasi guya thuma Costa do Marfim, eyi África Ocidental. Ganiolu, khu kotani nya nyimbi, khu Novembro nya 2000 hi di fuluga hi hongola Serra Leoa. Nyimbi yi nga dzega 11 myaga yi di ngari gu vbeya. Si hi garadzede gu diga Costa do Marfim khavba ni avba. Ganiolu, esi hi nga hevbula si hi phaside gu simama gu tsaka.

Hi di vega gupima ga vathu nya vangi va nga ba va vbweta gu hevbula lisine gipandreni mule ni vandriyathu nyo golege, va nga timiseya nyimbi khu myaga nya yingi. Avo va diri sisiwana nigu va di gu vbweta gu kabana esi va nga ba vari naso ni vambe. Ndriyathu moyo nya nyamayi a di ninga sombo nyo khaguri mwangadzi wangu Debbie. Tepo Debbie a nga bomba gu hakha sombo soso, ndriyathu nya nyamayi a di ganeya gu khuye: “Ndrani nya nyimbi, vandriyathu nya mambe mayigo va hi phaside. Olu ha gu vbweta gu mi phasa.” Hi di hunga gu pimedzeya giyeyedzo gyawe.

Khu mahegiso hi di bweleya Costa do Marfim, ganiolu sigaradzo nya politika si di pheledza gambe. Khu kharato, khu Novembro nya 2004, hi di tutuma khomu nya Elekopiteru moyo ni moyo wathu nari ni pasta mweyo basi. Vbawutshigutunu hi di lala vbavbatshi, avba ma nga ba ma thuma masotshwa ya França, nigu tepo gu ngagya hi di yiswa Suíça. Tepo hi nga vboha Betheli vbakari nya wutshigu, vandriyathu va thumago avba nya Kometi ya Betheli ni vahevbudzi nya Xikola nya Trenamentu Ministerial gupata ni vagadzi vawe, va di hi hakha khu mandza mavili nigu va di gu dongisede guhodza nyo vbisi ni simbe silo. Isoso si hi giride hi dzipwa na hi gu haladzwa ngudzu.

Hi di rumedwa khu gitepwana guya thuma Gana, khavbovbo hi di bweleya Costa do Marfim hwane nya gu ba sigaradzo nya politika si vbede. Lihaladzo la vandriyathu va mafuni gwatshavbo li hi phaside ndrani nya sigaradzo sesi ni ga mithumo yeyi hi nga yi gira khu gitepwana. Eni ni mwangadzi wangu hi di khethu ambari olu si nga olovelega gu wona lihaladzo leli ga vathu va Jehovha, hi yede gu simama gu haguleya lihaladzo nyo fane. Khu lisine, khu gu gimbiya nya tepo hi tugude gu khethu sigaradzo sile hi nga tshangana naso si hi lodzide gwadi.

GU THUMA ORIENTE MÉDIO

Khu 2006, hi di hakha lidangaliya li nga ba li ganeya gu khilo hi di yede gu ya thuma Oriente Médio. Si thulago gu khiso hi di yede gu hevbuleya gambe limbe lidimi ni mambe mavbanyelo. Hi di yede gu hevbula nya singi ga gipandre gyogyo gi nga ba giri ni sigaradzo nya singi nya Politika ni wukhongeyi. Hi tsakisidwe ngudzu khu gu wona mabandla nya malimi nyo hambane-hambane ni gu wona wumowo wu nga ba wu manega khu gu landrisa sileletelo esi Jehovha a ningago hengeledzano yaye. Hi tiyisidwe ngudzu khu giyeyedzo gya vandriyathu kholu avo va di gu timiseya khu gu tiya-hwambo gu wugedwa ndrangani, khu sihevbuli khwathu, sithumi khwathu ni vavhizinyu.

Hi pategide avba nya kongresu nya guhathege nya 2012 eyi Tel Aviv, Israel. Gukhugeya khu Pentekosta nya mwaga nya 33 matshigoni yathu, eyi yi diri tepo nyo pheye vathu va Jehovha na va gu tshangana khu tengo nya wukhongolo ngudzu gipandreni mule. Hi ngu gi dundruga tepo yatshavbo gigiro gegi!

Ndrani nya myaga yeyi, yi di rumwa gasi guya wuseya litigo thumo wathu wu nga ba wu himbedzedwa. Hi di dzega mabhuku yathu nyo khaguri, hi patega thumoni nyo tshumayele ni gu wona dziasembleya nya dzidugwana. Masotshwa ma nga ba ma pharide siphisa ma di romo ga malanga yatshavbo, ganiolu hi di gu dzipwa na hi vhikelegide tepo hi nga ba hi gimbiya khu gisihaledza ni vahuweleyi nyo khaguri.

HI BWELEYA ÁFRICA

Khu 2013, hi di hakha wumbe thumo nyo hambane ngudzu ni owu hi nga ba hi wu gira, hi di yede guya thuma ga gipandre gya Kinshasa eyi Congo, a gu litigo li nga mbura ngudzu, ganiolu li wonegago na li gu tshanganide ni dzinyimbi ni ndzala nya yikhongolo. Gupheyani hi di khethu: “Hi ngu guti África khu kharato hi dongide gwadi.” Ganiolu, hi di yede gu hevbula silo nya singi ngudzu-ngudzu tepo hi nga ba hi yede gu endra khu dziruwa dzi nga mba khadzisega gwadi. Ganiolu, hi manide silo nya singi nya sadi hi nga si vegeya gupima, nya nga gu timiseya ni litsako eli vandriyathu va nga ba vari nalo ambari olu va nga ba va tshangana ni gigaradzo nyo hamuge dzitsapawu, gu thuma khu sighingi thumoni nyo tshumayele ni gu dzigaradza va gu girago gasi gu wona mitshangano ni dziasembleya. Hi wonide gu khethu thumo nya hengeledzano ya Jehovha wu di gu dandra ngudzu kholu Jehovha a di gu wu seketeya ni gu wu kategisa. Myaga hi nga vbedza na hi gu thuma Congo yi hi hevbudzide silo nya singi nya lisima ngudzu nigu hi manide dzipari nya dzadi dzi nga khala valongo vathu.

Gu hegisani nya 2017, hi di rumedwa gasi gu ya thuma Dzoni. Egi gipandre nya gikhongolo ngudzu ga dzatshavbo hi nga thumeya umo nigu hi di lombwa gu gira thumo Bheteli nya gu gima hi di nga si wu giri. Ga tepo yeyi gambe, hi di yede gu hevbula silo nya singi, ganiolu silo hi si hevbudego gale si hi phaside ngudzu. Hi ngu haladza ngudzu vandriyathu va simamago gu timiseya khu myaga nya yingi. Nigu si ngu hlamadzisa ngudzu gu wona ndranga ya Bheteli na yi gu thuma khu wumowo ambari olu yi tadego khu vathu nya mafumbo ni siolovedzo nya gu hambane-hambane. Hi ngu si kodza gu wona gu khethu Jehovha a ngu kategisa vathu vaye khu gu va ninga gurula, kholu vathu vaye va ngu dzigaradzeya gu ambala muthu muphya ni gu thumisa matshina nya milayo nya Bhibhiliya.

Ga myaga yeyi yatshavbo, eni ni mwangadzi wangu hi ningidwe mithumo nyo hlamadzisi, hi dzi pwananiside ni mavbanyelo nyo hambane-hambane ni gu hevbuleya malimi nya maphya. Khandri tepo yatshavbo si nga hi vbevbugeya, ganiolu tepo yatshavbo hi pwide lihaladzo nyo tumbege la Jehovha khu gu thumisa hengeledzano yaye. (Ndzi. 144:2) Hi ngu tumba gu khethu trenamentu hi yi manidego ndrani nya thumo nya tepo yatshavbo, yi hi phaside gu khala sithumi nya sadi sa Jehovha.

Nyi ngu bonga ngudzu vavelegi vangu khu satshavbo va nga nyi hevbudza, edzi mwangadzi wangu Debbie a nyi seketeyago khidzo ni siyeyedzo nya sadi sa vandriyathu va mafuni gwatshavbo. Na hi ngo vireya wumindru nyo tsakise, hi dzi emisede gu simama gu hevbula silo nya singi hi ningwago khu Muhevbudzi wathu nya Khongolo.