Hi nga ninga kharini wusingalagadzi nya wadi?

1. Khu mani a yedego gu ninga wusingalagadzi nigu khu ginani?

WA GU dzipwa kharini tepo u ningago wusingalagadzi vambe? Vambe va ngu tsaka khu gu gira isoso. Ganiolu, vambe vathu va ngu thava mwendro kha va dzipwi gwadi khu gu ninga wusingalagadzi vambe. Ambari ulolo, dzimbe dzitepo hatshavbo hi yede gu ninga wusingalagadzi vambe. Khu ginani? Kholu Jesu ganede gu khuye vapizane vaye va na tidwa khu gu yeyedzana lihaladzo. (Joh. 13:35) Nigu mweyo nya dzindziya nya gu yeyedze lihaladzo lathu, khu gu ninga wusingalagadzi vandriyathu sa gu vbwetega. Vbavbandze nya isoso, Bhibhiliya yari khiyo tepo hi ningago wusingalagadzi nya lisine, hi ngu gira wupari wathu ni vambe wu tiya. — Mav. 27:9.

2. Madhota ma yede gu si kodza gu gira ginani, nigu khu ginani? (Wona gambe kwadru “Singalagadzi nya guphasedzeye nya tshangano wa vbakari nya semana.”)

² Madhota ma yede gu si kodza gu ninga wusingalagadzi nya wadi vambe. Jehovha ni Jesu va di hatha vama vava gasi gu khataleya libandla. (1 Ped. 5:2, 3) Mweyo nya dzindziya va girago khidzo isoso, khu gu va ninga wusingalagadzi wu seketedwago omu nya Bhibhiliya tepo va girago dziganelo libandlani. Ayo gambe ma ngu ninga wusingalagadzi nvuta nyo khaguri sa gu vbwetega. Nigu ma ngu phasa gambe ava va digidego Jehovha gu wuya libandlani. Madhota gu pata ni ethu hatshavbo, hi nga ninga kharini wusingalagadzi nya wadi?

3. a) Hi nga hevbuleya kharini gu ninga wusingalagadzi nya wadi vambe? (Isaya 9:6; wona kwadru “Pimedzeya Jesu tepo u ningago wusingalagadzi.”) b) Ginani hi na bhulago khigyo avba nya ndrima yeyi?

³ Hi nga hevbula edzi hi nga ningago khidzo wusingalagadzi nya wadi, khu hevbula khu siyeyedzo si gomogo omu nya Bhibhiliya nya vathu va nga ninga wusingalagadzi nya wadi, nya nga Jesu. Limwedo nya malina a nga ningwa khilo li gu khilo “Singalagadzi nya Guliwugise.” (Leri Isaya 9:6.) Ga ndrima yeyi, hi na wona esi hi yedego gu gira ha gu tshuka hi lombwa wusingalagadzi ni esi hi yedego gu gira ha gu wona gu khethu muthu a yedwe gu ningwa wusingalagadzi ambari na sa hi lomba. Hi na wona gambe lisima nya gu ninge wusingalagadzi khu ndziya nya yadi nigu khu tepo nya yadi.

TEPO HI LOMBWAGO WUSINGALAGADZI

4-5. Giwudziso muni hi yedego gu dzi gira a gu tshuka muthu nyo khaguri a hi lomba wusingalagadzi? Ninga giyeyedzo.

⁴ Ginani hi yedego gu dzegeya gu gira a gu tshuka muthu nyo khaguri a hi lomba wusingalagadzi? Hi nga tsaka ngudzu hi bwe hi vbweta gu dzegeya gu mu phasa. Ganiolu hi yede gu pheya khu gu dzi wudzisa gu khethu ‘Ina nyi na si kodza gu mu ninga wusingalagadzi nya wadi ga mahungu yaya?’ Dzimbe dzitepo, gilo nya gyadi hi nga girago gasi gu phasa muthu yoyo, khu gu hi vbwetedzeya muthu a na mu ningago wusingalagadzi wu na mu phasago.

⁵ Dundrugeya khu giyeyedzo gegi. Hongoleni khethu pari yago yi na ni madwali nya makhongolo. Iyo yo ganeya gu khiyo yi phede khu gu gira wugevisisi nya mathumelo nya madwali, khu gu landreya yi gu lomba gasi gu ninga mawonelo yago khu mathumelo u ma wonago nari tshukwana. Uwe u nga mu ninga mawonelo yago, ganiolu kha wuri dhogodheya nigu kha wa trenarwi gasi gu thuma madwali. Ndziya nya yadi gasi gu phasa pari yago, khu gu mu phasa gu vbwetedzeya muthu a gu na ni makodzelo nya gu mu phase.

6. Khu ginani si gu sadi gu vireya tepo nyo khaguri na hi si ningi wusingalagadzi?

⁶ Ambari ha gu dzipwa na hiri ni makodzelo nya gu ninge wusingalagadzi avba nya mahungu nyo khaguri, ethu hi nga hatha gu vireya tepo nyo khaguri na hi si hlamuli muthu nyo khaguri a nga hi lomba wusingalagadzi. Khu ginani? Mavingu 15:28 wari khuye, “muthu nya gululame a gu phela khu gu pimisa, khavbo a ningago phindrulo.” Ahati ha gu pimisa gu khethu hi ngu wuti hlamulo? Ethu adzina hi nga dzi ninga tepo gasi gu gevesisa, gu gombeya ni dundrugeya. Khu kharato, hi na tiyisega gu khethu hlamulo wathu wu ngu gimbileyana ni edzi Jehovha a dzipwago khidzo khu mahungu yoyo. Wona giyeyedzo gya muprofeti Nathani.

7. Ginani u gi hevbulago khu giyeyedzo gya muprofeti Nathani?

⁷ Tepo a nga ba a bhula ni muprofeti Nathani, Pfhumu Dhavhidhe a di mu embeya gu khuye a di gu vbweta gu vbaheya tempele Jehovha. Nathani a di dzegeya gu mu embeya gasi gu gira kamo isoso. Ganiolu, Nathani a di yede gu dzi ninga tepo nya gu wudzise Jehovha. Khu ginani? Kholu Jehovha kha nga ba a vbweta gu khuye Dhavhidhe a vbaha tempele. (1 Dzik. 17:1-4) Kha nga hi si wonago avba nya giyeyedzo gegi, tepo hi lombwago wusingalagadzi, kha hi yeli gu ‘tutumeya gu ganeya.’ — Jak. 1:19.

8. Khu gevbini gimbe gighelo gi hi girago hi dzi woneya na hi si ningi wusingalagadzi?

⁸ Wona gimbe gighelo gi hi girago hi dzi woneya tepo hi ningago wusingalagadzi muthu nyo khaguri: Ha gu ninga wusingalagadzi nya mba wadi muthu nyo khaguri, hi na dzipwa nandru gya gu tshuka gilo nyo khaguri gi si gimbiyi gwadi. Khu lisine, hi na ni gighelo nya gyadi nya gu pimisi gwadi na hi si ningi wusingalagadzi.

TEPO HI NINGAGO WUSINGALAGADZI MUTHU NYO KHAGURI NA SA HI LOMBA

9. Madhota ma yede gu tiyisega khu ginani na ma si ningi wusingalagadzi muthu nyo khaguri? (Vagalatiya 6:1)

⁹ Dzimbe dzitepo, madhota ma yede gu kutsega gu ninga wusingalagadzi ndriyathu nyo khaguri a nga “ndreya.” (Leri Vagalatiya 6:1.) Muthu nyo khaguri adzina o gira silo nya mba pheya khu gu pimisa nigu khu gu gimbiya nya tepo si na mu girago a ghoha. Madhota ma gu vbweta gu phasa muthu yoyo gu simama gu thumeya Jehovha ni gu vbanya kala gupindruga. (Jak. 5:19, 20) Gasi wusingalagadzi wawe wu phasa, ayo ma yede gu tiyisega gu khayo muthu yoyo a ndreyide ndziyani. Jehovha a ngu dzumeleya gu khuye hatshavbo hi hunga makungo ma seketedwago khu livhalo lathu. (Rom. 14:1-4) Ganiolu, madhota ma nga kutsega kharini gu ninga wusingalagadzi muthu nyo khaguri, ma gu tugula gu khayo a giride gilo gi vegago wupari waye ni Jehovha mhangoni?

10-12. Ginani madhota ma yedego gu gira tepo ma vbwetago gu ninga wusingalagadzi ndriyathu nyo khaguri a nga mba wu lomba? Ninga giyeyedzo. (Wona dzifotu.)

¹⁰ Kha si vbevbugeyi madhota gu ninga wusingalagadzi muthu nyo khaguri a nga mba wu lomba. Khu ginani? Mupostoli Pawulo a di ganeya gu khuye muthu a nga hunga gilo nya mba gyadi na si dziti. Khu ndziya yoyo, gupheya madhota ma yede gu dongiseya muthu yoyo gasi a hakha wusingalagadzi.

¹¹ Gu ninga wusingalagadzi muthu nyo khaguri a nga mba wu lomba, sa gu fana ni mulimi a zamago gu yala dzimbewu omu nya mafu ma bangidego ngudzu. Mulimi na si yali, a gu pheya khu gu lima. Gu gira isoso sa gu dongiseya mafu gasi gu hakha gwadi dzimbewu. Khu gu landreya, a yala dzimbewu. Khu gu hegisa, uye a gu regari gasi gu phasa dzimbewu gu dandra. Khu ndziya nyo fane, somo silo nyo khaguri lidhota li yedego gu gira gasi gu si vbevbugeya ndriyathu gu hakha gwadi wusingalagadzi a nga mba wu lomba. Khu giyeyedzo, lidhota la gu vireya tepo nya yadi gasi gu bhula naye nigu khu gu landreya li tiyisegisa ndriyathu yoyo gu khilo li ngu khathala khuye nigu gyomo gilo li vbwetago gu bhula naye. Abari gu oyu a ningago wusingalagadzi a gu tidwa nari ni lihaladzo ni wuwadi, si na vbevbugeya vambe gu dzumeya wusingalagadzi waye.

¹² Tepo li bhulago ni ndriyathu, lidhota li nga gira gu si vbevbugeya ndriyathu yoyo gu hakha wusingalagadzi khu gu mu dundrugisa gu khuye hatshavbo hi ngu hosisa nigu dzimbe dzitepo hi ngu vbweta wusingalagadzi. (Rom. 3:23) Khu lito nyo rule ni githawo nya gikhongolo, khu gu thumisa Milowo lidhota la gu mu yeyedza gu khilo a hungide gilo nya mba gyadi. Tepo ndriyathu a dzumeyago gu khuye a giride gihoso, lidhota la gu “yala mbewu” khu gu mu tshamuseya khu malito nyo vbevbuge esi ndriyathu yoyo a yedego gu gira gasi gu lulamisa giemo gyaye. Khu gu hegisa, lidhota la gu “regari” khu gu zundza ndriyathu ni gu gombeya naye. — Jak. 5:15.

13. Madhota ma nga tiyisega kharini gu khayo muthu nyo khaguri a pwisiside wusingalagadzi ma mu ningidego?

¹³ Dzimbe dzitepo, muthu kha pwisisi gwadi wusingalagadzi a ningidwego. Madhota ma nga gira ginani gasi gu isoso si si giregi? Ayo ma nga tshingisa dzipontu nya lisima ma bwe ma gira siwudziso khu ndziya nya yadi. (Muh. 12:11) Mihlamulo yaye, yi na phasa oyu a ningidego wusingalagadzi gu tiyisega gu khuye muthu yoyo a pwisiside wusingalagadzi a ningidwego.

NINGA WUSINGALAGADZI KHU TEPO NYA YADI NIGU KHU NDZIYA NYA YADI

14. Khu ginani hi yedego gu potsa gu ninga wusingalagadzi na hi zangaride?

¹⁴ Hatshavbo kha ha vbeleya, khu kharato dzimbe dzitepo hi ngu gira mwendro gu ganeya gilo gi khunguvanyisago vambe. (Kol. 3:13) Bhibhiliya yari khiyo dzimbe dzitepo muthu nyo khaguri a nga ganeya mwendro gu gira gilo gi hi zangarisago. (Efes. 4:26) Ganiolu, hi yede gu potsa gu ninga wusingalagadzi na hi zangaride. Khu ginani? Kholu “zanga nya muthu kha yi giri gululama ga Nungungulu.” (Jak. 1:20) Ha gu ninga wusingalagadzi na hi zangaride, hi na gira silo nyo vivbe gu diga esi nya sadi. Isoso kha si thuli gu khiso gima kha hi yeli gu ganeya esi hi sipwago ni esi hi pimisago ga muthu a nga hi zangarisa. Ganiolu, hi yede gu vireya kala hi rula na hi si ganeye gilo nyo khaguri ni muthu yoyo. Wona giyeyedzo nya gyadi hi vegedwego khu singalagadzi nyo tumbege wa Joba, Eliyu.

15. Ginani hi gi hevbulago khu giyeyedzo gya Eliyu? (Wona fotu.)

¹⁵ Khu matshigu nya mangi, Joba a di zama gu dzi emeya ga silo nya mba sadi vasingalagadzi vaye va nga ba va ganeya khuye, nigu Eliyu a pwide esi Joba a nga ganeya. Eliyu a di pweya wusiwana Joba. Ganiolu, tepo Joba a nga zama gu dzi emeya, uye a di ganeya silo maningano khu Jehovha si nga bari malipha. Isoso si zangariside ngudzu Eliyu. Ambari ulolo, uye a di vireya tepo nya yadi gasi gu ganeya, nigu giride isoso khu ndziya nya yadi ni githawo tepo a nga ninga wusingalagadzi Joba. (Joba 32:2; 33:1-7) Giyeyedzo gya Eliyu gya gu hi hevbudza gilo nya lisima ngudzu: I tshukwana gu ninga wusingalagadzi khu tepo nya yadi nigu khu ndziya nya yadi — khu lihaladzo ni githawo. — Muh. 3:1, 7.

SIMAMA GU NINGA NI GU DZUMEYA WUSINGALAGADZI

16. Ginani u gi hevbulago omu ga Ndzimo 32:8?

¹⁶ Lowo nya litshina nya ndrima yeyi wari khuwo: ‘Jehovha a gu hi khedziseya na hi ninga wusingalagadzi.’ (Leri Ndzimo 32:8.) Isoso so thula gu khiso uye a na simama gu hi hevbudza. Uye a gu tumbisa gu hi ninga wusingalagadzi ni gu hi phasa gu wu thumisa. Hi nga pimedzeya giyeyedzo gya Jehovha. Tepo hi manago lithomo nya gu ninge wusingalagadzi vambe, hi nga pimedzeya Jehovha khu gu simama gu va tiyisa ni gu va phasa gu hunga makungo khu wugengeyi.

17. Tepo madhota ma ningago wusingalagadzi nyo kongome wu seketedwago khu Bhibhiliya ma gu yeyedza ginani khavo? Tshamuseya. (Isaya 32:1, 2)

¹⁷ Olu guvbindra gale, hi yede gu ninga ni gu hakha wusingalagadzi. (2 Thim. 3:1) Madhota ma ningago wusingalagadzi nyo kongome wu seketedwago khu Bhibhiliya ma gu “fanana gambe ni mitsongo mafuni nya gihala.” (Leri Isaya 32:1, 2.) Hi ngu bonga ngudzu dzipari dzi gu mba diga gu hi ninga wusingalagadzi hi wu vbwetago. Malito yawe ma gu fana ni ‘maçã nya ndralama ma tshavedwego somboni nya parata.’ (Mav. 25:11) Hongoleni hi simama gu haguleya guti hi gu vbwetago gasi gu ninga ni gu hakha wusingalagadzi nya wadi.