Gu kawukwa — Giyeyedzo nya lihaladzo la Nungungulu

1. Bhibhiliya yo oloveya gu gu khumbuga kharini gu kawukwa?

GINANI gi tago mapimoni gwago wa gupwa lito “gu kawukwa”? Vathu nya vangi vo wona gu tsayiswa, ganiolu singi si pategago avba nyo kawukwe. Bhibhiliya yari khiyo gu kawukwa gu ngu hi phasa nigu dzimbe dzitepo yo gu khumbuga gumogo ni guti, wugengeyi, lihaladzo, ni womi. (Mavingu 1:2-7; 4:11-13) Khu gighelo gyogyo, gukawuka ga Nungungulu, go yeyedza gu khugo a ngu hi haladza nigu o vbweta gu khuye hi vbanya kala gupindruga. (Vahebheru 12:6) Ambari olu yimbe tepo gukawuka ga Nungungulu gu patago gutsayisa, uye gima kha kawuki khu ndziya nya litsoro. Khu lisine, tshamuselo nya lisima ngudzu nya lito “gukawuka” wo pata gu hevbudza, nya nga sihevbudzo esi muvelegi a ningago gyanana gyaye nyo gi gole.

2, 3. Gukawuka gu nga pata gu hevbudza ni gutsayisa khu ndziya muni? (Wona foto gupheyani nya ndrima.)

² Nga dundrugeya khu giyeyedzo gegi. Gikhwathana nyo khaguri nya pwani khu Johnny gi di gu veteya bhola nyumbani. Mamayi wagyo khuye: “Johnny, u ngu dziti gwadi gu khuwe nyumbani kha gu vetedwi bhola! Kholu u na tshuka u pandra silo.” Ganiolu gikhwathana gi di kanyisa mamayi wagyo, gi simama gu veteya bhola. Bhola yi veta vhazu yi pandrega! Ginani a giridego mamayi wa Johnny gasi gu mu kawuka? A di mu hevbudza khu gu mu tshamuseya gu khuye khu ginani esi a giridego si nga ba si vivbide. A di gu vbweta gu khuye a li wona lisima nyo engise vavelegi vaye ni gu wona gu khuye milayo yawe yi na ni lisima nigu kha yi lemeyi. Gasi gu phasa Johnny gu hevbula gilogyo, mamayi waye a di wona nari tshukwana gu mu tsayisa khu mu dzegeya bhola khu tepo nyo khaguri. Isoso kha sa tsakisa ga Johnny, ganiolu si mu phaside gu dundruga gu khuye a gu mba engisa vavelegi, kha si na nga mu gimbileya gwadi.

³ Kha nga olu hi gu maKristo, ho gira gipandre nya ndranga ya Nungungulu. (1 Thimoti 3:15) Babe wathu, Jehovha, a ngu ninganedwa khu gu hi vegeya milayo nya esi nya sadi ni esi nyo vivbe ni gu hi kawuka ho mba mu engisa. Nigu, sigiro sathu so ba siri mwalo mihandro nyo tsakise, gukawuka nya lihaladzo ga Jehovha gu nga hi phasa gu drundruga lisima nyo mu engise. (Vagalatiya 6:7) Nungungulu a ngu hi haladza ngudzu nigu kha vbweti gu khuye hi tshaniseka. — 1 Pedro 5:6, 7.

4. a) Jehovha o vbweta gu khuye hi hevbudza kharini vambe vathu? b) Ginani hi na ganeyago khigyo avba nya ndrima yeyi?

⁴ Ho kawuka khu ndziya yi seketedwago omu nya Bhibhiliya hi nga phasa gyanana mwendro gihevbulo nya Bhibhiliya gu khala mulandreyi wa Kristo. Ho thumisa Bhibhiliya gasi gu hevbudza silo nya sadi sihevbulo sathu nya Bhibhiliya ni gu si phasa gu pwisisa ni gu ‘landrisa satshavbo iso Jesu a nga hi hevbudza.’ (Matewu 28:19, 20; 2 Thimoti 3:16) Eyi khiyo ndziya eyi Jehovha a vbwetago gu khuye si hevbudzwa khiyo gasi gu aniso si kodza gu phasa vambe gu landreya Kristo. (Leri Tito 2:11-14.) Olu hongoleni hi ganeya khu siwudziso siraru nya lisima: 1) Gukawuka ga Nungungulu go yeyedza kharini lihaladzo a gu nalo khethu? 2) Hi nga hevbula ginani avba nya siyeyedzo nya vathu va kawukidwego khu Nungungulu? 3) Hi nga pimedzeya kharini Jehovha ni Gyanana gyaye tepo hi kawukago muthu?

NUNGUNGULU A GU KAWUKA KHU LIHALADZO

5. Gukawuka ga Jehovha go yeyedza kharini lihaladzo laye khethu?

⁵ Jehovha o hi kawuka ni gu hi hevbudza kholu a hi haladzago. Uye o vbweta gu khuye hi khala dzipari dzaye kala gupindruga. (1 Johane 4:16) Uye gima kha hi valeteyi mwendro gu hi gira hi dzipwa na hi si phasi gilo. (Mavingu 12:18) Wulangani nya isoso, Jehovha o khedza makhalelo yathu nya yadi a bwe a hi dzumeleya gu dzi hatheya esi hi si vbwetago. Gukawuka hi gu manago omu nya Bhibhiliya, omu nya mabhuku yathu, ga vavelegi vathu mwendro madhota, ina u ngu gu wona nga giyeyedzo nya lihaladzo la Jehovha khethu? Khu lisine, tepo madhota ma zamago gu hi kawuka khu ndziya nyo rule ni lihaladzo ambari na hi si gu gi tuguli gihoso gyathu, mo pimedzeya lihaladzo a gu nalo Jehovha khethu. — Vagalatiya 6:1.

6. Gukawuka go yeyedza kharini lihaladzo la Nungungulu ambari so hunga gu khiso muthu a luza malungelo yaye?

⁶ Dzimbe dzitepo gukawuka go pata silo nya singi nyo vbindre gu ninga wusingalagadzi basi. Muthu o gira gighoho nya gikhongolo, kha ninganedwi gambe khu gu gira mithumo nyo khaguri libandlani. Ambari so girega isoso, gukawuka gogo go yeyedza lihaladzo eli Nungungulu a gu nalo khuye. Khu giyeyedzo, si na mu phasa gu wona lisima nyo hevbule Bhibhiliya, gu dundrugeya khesi a si hevbulago, ni gu gombeya. Isoso si nga tiyisa wupari waye ni Jehovha. (Ndzimo 19:7) Khu gu gimbiya nya tepo, a nga bweledzedwa malungelo yaye. Ambari muthu nyo khaguri o duswa libandlani, so yeyedza lihaladzo eli Jehovha a gu nalo kholu si na vhikeya libandla ga mikutsedzelo nyo vivbe. (1 Vakorinto 5:6, 7, 11) Nigu kha nga olu gukawuka ga Jehovha gu lulamidego tepo yatshavbo, gu nga phasa oyu a dusidwego libandlani gu wona gu khuye ghohide khu lisine. Isoso si nga mu gira a dzi laya. — Mithumo 3:19.

GUKAWUKA GA JEHOVHA GU NGU HI PHASA

7. Khu mani Sebina, nigu makhalelo muni nyo vivbe a manegidego nawo?

⁷ Gasi gu pwisisa lisima nyo kawukwe, hi na ganeya khu siyeyedzo nya vathu vavili va kawukidwego khu Jehovha. Moyo wakone khu Sebina, muIsrayeli a vbanyidego teponi ya Pfhumu Ezekhiya, mumbe khu Graham, a gu ndriyathu nya mwama wa matshiguni yathu. Sebina a diri “musayisi . . . nya dzithomba,” adzina nya nyumba ya Pfhumu Ezekhiya, nigu khuye a nga ba a ruma. (Isaya 22:15) Ganiolu Sebina a di pheya gu dzi khusedza a bwe a gira gu vambe va mu wona na ari wa lisima. A di bwe a dzi gireya lithowo nyo dhure ngudzu a bwe a gimbiya khu “dzikareta . . . nya wuzundzo.” — Isaya 22:16-18.

8. Jehovha kawukide kharini Sebina, nigu mihandro muni yi wonegidego khisoso?

⁸ Khu kotani nya olu Sebina a zamidego gu dzi vbweteya wuzundzo, Nungungulu a di ningeya thumo waye ga Eliyakimi. (Isaya 22:19-21) Isoso si giregide tepo Pfhumu Senakeribhe wa Asiriya a nga ba a gira makungo nyo wugeye Jerusalema. Khu hwane nya tepo, Senakeribhe a di rumeya tsawa nya vathangeyi nya masotshwa ni gikwata nya gikhongolo nya masotshwa gasi gu ya thurugiseya vaJudha ni gu kutsedzeya Ezekhiya gu khuye va dzi ningeya. (2 Dzipfhumu 18:17-25) Ezekhiya a di rumeya Eliyakimi ni vama vavili gasi gu ya wonana ni vathangeyi vale nya masotshwa. Moyo nya vama vovo gu diri Sebina, oyu olu a nga ba ari mabhalane. Gukhugeya avbovbo hi ngu kodza gu wona gu khethu si ngu kodzega gu ba Sebina a hevbude gudzinogisa nigu kha solasola mwendro gu dzipwa na poyidwe. A di dzi emisede gu dzumeya mithumo ya vbavbatshi. Hi nga hevbula silo siraru ga esi si nga dugeleya Sebina.

9-11. a) Sihevbudzo muni nya lisima hi si manago ga Sebina? b) Wo dzipwa kharini khedzi Jehovha a pharidego khidzo Sebina?

⁹ Nyo pheye, gu ba na Sebina a luzide gikhalo gyaye so hi dundrugisa gu khiso “matshandza ma gu rana libango.” (Mavingu 16:18) Si nga gira na hiri ni malungelo nyo hathege libandlani, nigu vambe va nga pimisa gu khavo hi vathu nyo hathege. Abari kharato, ina hi na simama gu dzi nogisa? Ina hi na dundruga gu khethu ni yavbini makodzelo hi gu nawo ni satshavbo nya sadi hi si kodzago gu gira ho si kodza khu gu phaswa khu Jehovha? (1 Vakorinto 4:7) Mupostoli Pawulo hi gengedzide khu gu khuye: “Nyi ngu laya moyo ni moyo wanu gukheni mu nga dzi sayeli guvbindra fanelo, aholu dzi sodziseni, muthu ni muthu a dzi vega vbawulangatunu gwaye.” — Varoma 12:3.

¹⁰ Nya wuvili, wusingalagadzi nya tshivba owu Jehovha a ningidego Sebina wu nga yeyedza gu khuwo Jehovha a di gu tumba gu khuye Sebina a na vbindrugedza. (Mavingu 3:11, 12) Egi gihevbudzo ga ava va luzidego malungelo libandlani. Vbavbandze nyo goroge ni gu dzipwa na va poyidwe, avo va nga simama gu gira esi va si kodzago ga Jehovha. Va nga hatha gu wona gu kawukwa nga giyeyedzo nya lihaladzo la Jehovha. Dundruga gu khuwe Babe wathu a na tshatshazeya ava va simamago gudzinogisa. (Leri 1 Pedro 5:6, 7.) Gukawuka nya lihaladzo ga Jehovha gu nga hi phasa ho dzi nogisa hi fana ni libumba nyo vbevbuge.

¹¹ Nya wuraru, hi ngu hevbula sihevbudzo nya lisima khu edzi Jehovha a pharidego khidzo Sebina. Ambari olu ndziya eyi Jehovha a kawukago khiyo yi yeyedzago gu khiyo a ngu venga gighoho, iyo yo yeyedza gambe gu khiyo uye a ngu haladza oyu a ghohidego. Jehovha o khedza esi nya sadi ga vathu. Wo ba uri muvelegi mwendro lidhota, ina u na pimedzeya edzi Jehovha a kawukago khidzo? — Judha 22, 23.

12-14. a) Ginani va girago vambe va gu kawukwa khu Jehovha? b) Lito la Nungunguli li phaside kharini moyo nya ndriyathu nya mwama gu vbindrugedza mapimo yaye, nigu mihandro muni yi wonegidego?

¹² Egi gi si tsakisigo, khu gu vambe vathu vo kawukwa vo goroga ngudzu nyo bwe va pfhurareya Nungungulu ni libandla. (Vahebheru 3:12, 13) Ina isoso so thula gu khiso mwalo a nga kodzago gu va phasa? Ahihi! Wona giyeyedzo gya Graham, oyu a nga ba a dusidwe libandlani a vbedza a wuyiswa khu gu gimbiya nya tepo. Ambari ulolo, hwane nyo ba na wuyisedwe, a di ema gu tshumayela ni gu hongola mitshanganoni. Lidhota nyo khaguri li di dzi garadzeya gu khala pari yaye, nigu khu gu gimbiya nya tepo Graham a di lomba lidhota lile gu khuye li mu gimbidziseya gihevbulo nya Bhibhiliya.

¹³ Lidhota lolo lo dundruga esi: “Gigaradzo gya Graham gu diri gudzikhusedza. A di gu solasola madhota ma pategidego gulamudwani gwaye. Khu kharato ga dzindrima nyo khaguri nya gihevbulo dzi nga landreya, hi di ganeya khu milowo yi ganeyago khu gudzikhusedza ni mihandro yakona. Graham a di pheya gu dzi wona gwadi avba nya libona, li gu Lito la Nungungulu, nigu kha tsakiswa khesi a nga si wona! Mihandro yakona yi samadziside ngudzu! Hwane nyo wone gu khuye gigaradzo gyaye gu diri gudzikhusedza ni gu solasola, a di pheya gu vbindrugedza khu guvbiredza. A di pheya gu manega mitshanganoni tepo yatshavbo, a hevbula Lito la Nungungulu tepo yatshavbo, ni gu gombeya tshigu ni tshigu. Uye a di bwe a khathaleya gwadi ndranga yaye khu liphuvboni kha nga hungo nya ndranga, avbo nya gu bwe mwangadzi waye ni sanana saye va tsaka.” — Luka 6:41, 42; Jakobe 1:23-25.

¹⁴ Lidhota lolo li di bwe khilo: “Litshigu limwedo, Graham a di nyi embeya silo si nga khuha monyo wangu. A di khuye: ‘Gale na nyi gu liti lisine, nigu nyi thumide nga piyonero. Ganiolu, gasi gu ganeya lisine, olu khavbo nyi mu haladzago Jehovha.’” Nya mba hweya, Graham a di ningwa thumo nyo vegedzeye dzimikrofone mitshanganoni, nigu a di gu wu tsakeya thumo wowo. Lidhota lolo lari khilo: “Giyeyedzo gyaye gi nyi hevbudzide gu khigyo muthu a gu dzi nogisa ga Nungungulu khu gu dzumeya gu kawukwa, makategwa ma na gira khu vbalageya!”

PIMEDZEYA NUNGUNGULU NI JESU TEPO U KAWUKAGO MUTHU

15. Ginani hi yedego gu gira gasi gu wusingalagadzi wathu wu ninga mihandro?

¹⁵ Ho ba hi vbweta gu khala vahevbudzi nya vadi, gu vbwetega hi pheya khu gu khala sihevbuli nya sadi. (1 Thimoti 4:15, 16) Khu ndziya nyo fane, abari gu u moyo nya ava Jehovha a va thumisago gasi gu kawuka vambe, gu vbwetega gu u simama gu dzi nogisa u bwe u diga Jehovha a thangeya womi wago. Tepo vambe va na wonago gu khavo u ngu dzi nogisa, va na gu ninga githawo nigu si na va vbevbugeya gu dzumeya wusingalagadzi wago. Hi nga hevbula gilogyo khu giyeyedzo gya Jesu.

16. Hi nga hevbula ginani ga Jesu maningano ni gu kawuka ni gu hevbudza khu ndziya yi phasago?

¹⁶ Jesu a di gu engisa Babe waye tepo yatshavbo, ambari tepo si nga ba si garadza gu gira isoso. (Matewu 26:39) Dundrugiside vaengiseyi vaye gu khuye sihevbudzo saye ni guti gwaye sa guta khu ga Babe waye. (Johane 5:19, 30) Jesu a di gu dzi nogisa nigu a di gu engisa, isoso si mu phaside gu khala muhevbudzi nyo pweye wusiwana. Vathu nya myonyo nya yadi va di gu tsaka khu gu manega naye. (Leri Luka 4:22.) Malito nya yadi ya Jesu ma di gu tiyisa ava va nga ba va vbede tshivba ni gu rereka. (Matewu 12:20) Uye kawukide vapostoli vaye khu ndziya nya lihaladzo ambari olu adzina a nga ba ari ni gighelo nyo goroge kholu va nga ba va wudzisana gu khavo khu mani a gu khongolo vbakari gwawe. — Marko 9:33-37; Luka 22:24-27.

17. Makhalelo muni ma na phasago madhota gu khathaleya gwadi libandla?

¹⁷ Tepo yatshavbo madhota ma ningago wusingalagadzi wu seketedwago omu nya matshina nya milayo nya Bhibhiliya, gu vbwetega gu ma pimedzeya Kristo. Khu magirelo yoyo ma na yeyedza gu khayo ma ngu dzina gu thangedwa khu Nungungulu ni Gyanana gyaye. Mupostoli Pedro lovide gu khuye: “Havisani gwadi tshambi wa Nungungulu wu gu romo vbakari gwanu; wu sayiseni na mu tshulegide myonyo kha nga idzo a dzinago khidzo Nungungulu; nasiri khu gugurumedzwa. Mu nga thumeli gu hakha dzitshapawu. Aholu thumani khu gudzina gwanu. Mu nga dzi girini vamune, mu khozisa vathu mu ningidwego, aholu khalani giwonelo nya tshambi.” (1 Pedro 5:2-4) Madhota ma engisago Nungungulu ni Jesu khu monyo watshavbo ma na phasega, nigu ava va khathaledwago khayo va na phasega navo. — Isaya 32:1, 2, 17, 18.

18. a) Ginani egi Jehovha a vireyago gu khuye vavelegi va gira? b) Jehovha a gu va phasa kharini vavelegi?

¹⁸ Vavelegi, mu nga hevbudza ni gu kawuka kharini ndrangani? Jehovha o embeya mihungo nya dzindranga gu khuye: “Mu nga goroseli sanana, aholu si dandriseni khu gu si hevbudza mavbanyelo nya ndruda ni githawo, kha nga gu ruma ga Pfhumu.” (Vaefeso 6:4) Ina gu hevbudza ni gukawuka si ngu vbwetega kamo? Omu ga Mavingu 19:18 ha gu leri esi: “Tsayisa mwanago gikhati gi nga gu dzumela, aholu u nga mu tsayiseli gu mu songa.” Jehovha ningide vavelegi thumo nyo hevbudze sanana sawe. Vo mba si hevbudza, va na dzi hlamuleya ga Jehovha! (1 Samuweli 3:12-14) Ganiolu Jehovha a ngu ninga vavelegi guti ni tshivba yi vbwetegago tepo va mu lombago khu nombelo va bwe va tumba Lito laye ni liphuvbo laye nya guage gasi gu va thangeya. — Leri Jakobe 1:5.

NDZIYA NYO VBANYE KHU GURULA KALA GUPINDRUGA

19, 20. a) Makategwa muni hi na ma manago ho dzumeya gu kawukwa khu Nungungulu? b) Ginani hi na ganeyago khigyo avba nya ndrima yi landreyago?

¹⁹ Ho dzumeya gu kawukwa khu Nungungulu hi bwe hi pimedzeya edzi Jehovha ni Jesu va kawukago khidzo, hi na mana makategwa nya mangi ngudzu! Dzindrangani gwathu ni mabandlani gwathu gu na ba guri ni gurula, nigu vatshavbo va na dzipwa na va gu godwa, ni gu ningwa lisima, va bwe va dzipwa na va vhikedwe. Egi giyeyedzo nya gidugwana basi nya gurula ni gutsaka hi na gu manago mindru wa tshigu. (Ndzimo 72:7) Gukawuka ga Jehovha go hi dongiseya gu ta vbanya kha nga ndranga nyo rule ni gupwanana, ni Jehovha kha nga Babe wathu. (Leri Isaya 11:9.) Ho dundruga isoso, hi na wona gu kawukwa kha nga edzi gu gu idzo khu lisine: kha nga ndziya nya yadi nya gu Nungungulu a yeyedza gu khuye a ngu hi haladza.

²⁰ Avba nya ndrima yi landreyago, hi na wona simbe si ganeyago khu gukawuka ndrangani ni libandlani. Hi na ganeya khedzi hi nga dzi hevbudzago khidzo habune. Hi bwe hi hevbula edzi hi nga potsago khidzo gilo gi vbisago ngudzu guvbindra ni gwevbini gu kawukwa.