‘Engisani sihevbudzo sangu, mu na khala vathu nya guti’

1. Hi nga gu mana kharini guti, nigu gu na hi phasa kharini?

GUTI ga guta khiyo ga Jehovha, nigu khu wuhindzi, uye a ngu ninga vambe vathu. Omu ga Jakobe 1:5 ha gu leri esi: “A gu bani a romo moyo wanu a keneledwago khu guti, a na lombe ga Nungungulu a ningago khu wuhindzi ga vatshavbo nyamba sola.” Mweyo nya dzindziya nyo mane khiyo guti khu gu engisa sihevbudzo sa Nungungulu. Gu gira isoso gu na hi vhikeya gu gira silo nyo vivbe gu bwe gu hi phasa gu simama ni wupari ni Jehovha. (Mavingu 2:10-12) Nigu hi na manega ni gutumba nyo tsakise ngudzu nyo vbanye kala gupindruga. — Judha 21.

2. Hi nga hevbula kharini gu bonga sihevbudzo sa Nungungulu?

² Khu kotani nya olu hi nga mba vbeleya mwendro edzi hi nga dandriswa khidzo, dzimbe dzitepo si nga hi garadzeya gu dzumeya gu kawukwa mwendro gu gu wona na guri gilo nya gyadi. Ganiolu tepo hi wonago mihandro nya sihevbudzo sa Nungungulu womini wathu, ha gu pwisisa edzi Jehovha a hi haladzago khidzo. Mavingu 3:11, 12 o hi embeya esi: “Mwanangu u nga bombi gu kawukwa khu PFHUMU Nungungulu.” A bwe khuye: “Kholu Pfhumu a gu kawuka uye a mu golago.” Hi nga tiyisega gu khethu Jehovha o hi suveya silo nya sadi. (Leri Vahebheru 12:5-11.) Khu kotani nya olu Nungungulu a hi tigo gwadi, gukawuka gwaye khwadi nigu tepo yatshavbo go vboha khu tepo hi gu vbwetago. Avba nya ndrima yeyi, hi na ganeya khu sipandre sina nya gukawuka: 1) gu dzi hevbudza, 2) sihevbudzo esi vavelegi va yedego gu ninga sanana sawe, 3) sihevbudzo hi si manago libandlani, ni 4) gilo gi vbisago ngudzu guvbindra ni gwevbini gu kawukwa.

KHU GINANI WU GU WUGENGEYI GU DZI HEVBUDZA?

3. Gyanana gi nga haguleya kharini gu dzi hevbudza? Ninga giyeyedzo.

³ Gu dzi hevbudza gu nga hi phasa gu woneleya mavbanyelo ni mapimo yathu. Kha ha velegwa ni makodzelo nyo dzi hevbudze, ganiolu hi yede gu ma hevbuleya. Khu giyeyedzo, tepo gyanana gi hevbuleyago gu gimbidzisa bhisikaleta, gu tala nya dzitepo moyo nya vavelegi vagyo a gu pharedzeya bhisikaleta gasi yi si thegi. Ganiolu, tepo gyanana gi hevbuleyago gu pharedzeya gyabune, muvelegi a nga gi digeledza gi gimbidzisa gyonga pfhuka nya khavba ni vbale. Tepo muvelegi a tiyisegago gu khuye gyanana gi na tiya gyabune vbabhisikaletatunu, a nga gi diga gi gimbidzisa gyabune khu guvbeleya. Khu ndziya ya mweyo, tepo vavelegi va hevbudzago sanana sawe khu “ndruda ni githawo kha nga guruma ga Pfhumu,” va gu si phasa gu haguleya liphuvbo nyo dzi hevbudze ni guti. — Vaefeso 6:4.

4, 5. a) Khu ginani gu dzi hevbudza gu gu gipandre nya lisima nya “muthu muphya”? b) Khu ginani hi gu mba yela gu vbeya tshivba ambari ho tshuka hi hosisa?

⁴ Khidzo saye ni vathu va hevbulago lisine na vari vakhongolo khu tanga. Ambari olu adzina va kodzago gu dzi hevbudza, avo va si gu khali maKristo nyo vidzwe. Ganiolu tepo va pheyago gu ambala “muthu muphya” va bwe va zama gu pimedzeya Kristo, avo vo khala vathu nyo vidzwe khu liphuvboni. (Vaefeso 4:23, 24) Gu dzi hevbudza go hi phasa gu “diga mavbanyelo nya mba khodwa, ni gu navela silo nya mafu yaya, gasi hi vbanye tigoni momu khu gu dzi phara, ni gu lulama, ni gu tumbega ga Nungungulu.” — Tito 2:12.  

⁵ Ambari ulolo, hatshavbo hi sighohi. (Muhevbudzi 7:20) Ho tshuka hi hosisa ke, ina isoso so thula gu khiso kha hi kodzi gu dzi hevbudza gwadi? Khandriso. Omu ga Mavingu 24:16 ho hevbula esi: “Muthu nya gululame, ambari a thega livbandre na dzimbili dzinyondro, uye a na wuga.” Ginani gi na hi phasago gu “wuga”? Liphuvbo nya guage la Nungungulu, nasiri tshivba yathu. (Leri Vafilipi 4:13.) Handro nya liphuvbo lolo wo pata gudziphara, a gu idzo saye ni gu dzi hevbudza.

6. Hi nga khala kharini sihevbuli nya sadi nya Lito la Nungungulu? (Wona foto gupheyani nya ndrima.)

⁶ Nombelo, gu hevbula Bhibhiliya, ni gu dundrugeya khesi hi si hebvulago si na hi phasa niso gu andrisa liphuvbo nyo dzi hevbudze. Ganiolu ahati so ba si gu garadzeya gu hevbula Bhibhiliya mwendro wo ba u si goli gu hevbula? U nga vbeyi tshivba. Wo mu dzumeleya, Jehovha a na gu phasa gu “vbweta mwendro gu gola” Lito laye. (1 Pedro 2:2) Lomba Jehovha gu a gu phasa gu dzi hevbudza gasi gu u kodza gu dzi vegeya tepo nyo hevbule Bhibhiliya. Adzina u nga pheya khu gu hevbula khu dzimeneti nya dzidugwana basi khu litshigu. Vbadugwana vbadugwana, si na pheya gu gu vbevbugeya ni gu gu tsakisa ngudzu gu hevbula. U na tsakiswa ngudzu khu dzitepo nyo rule u na khalago u dundrugeya khu mapimo nya yadi ya Nungungulu. — 1 Thimoti 4:15.

7. Gu dzi hevbudza gu nga hi phasa kharini gu vboheya misuwo hi gu nayo thumoni wa Jehovha?

⁷ Gu dzi hevbudza go hi phasa gu vboheya misuwo hi gu nayo thumoni wa Jehovha. Khu giyeyedzo, papayi nyo khaguri a di tugula gu khuye a di gu vbeledwa khu sighingi saye thumoni wa Jehovha, khu kharato a di dzi vegeya misuwo nyo khale piyonero nya tepo yatshavbo. Gu dzi hevbudza gu mu phaside kharini? Uye a di leri dzindrima dzi ganeyago khu thumo nya wupiyonero omu nya dzirevhista dzathu a bwe a gombeya khiso. Isoso si tiyiside wupari waye ni Jehovha. Uye a di thuma gambe kha nga piyonero nyo phasedzeye tepo si nga ba si kodzega. Kha dzumeleya gilo gi mu digisa; wulangani nya isoso, uye a di simama gu vega gupima gwaye avba nya misuwo yaye. Hwane nya tepo nyo khaguri, a di pheya gu thuma kha nga piyonero nya tepo yatshavbo.

DANDRISA SANANA SAGO KHU SIHEVBUDZO SA JEHOVHA

8-10. Ginani gi nga phasago vavelegi gu dandrisa sanana sawe gasi gu si thumeya Jehovha? Ninga giyeyedzo.

⁸ Jehovha ningide vavelegi thumo nyo dandrise sanana sawe “khu gu si hevbudza mavbanyelo nya ndruda ni githawo, kha nga gu ruma ga [Jehovha, NM].” (Vaefeso 6:4) Uwowo i thumo nyo garadze ngudzu gu wu gira matshiguni yaya. (2 Thimoti 3:1-5) Tepo sanana si velegwago, kha si kodzi gu hambanisa esi nya sadi ni esi nyo vivbe, nigu livhalo laso li si gu hevbudzwi. Khu kharato gu vbwetega gu si hevbudzwa gasi si hevbudza livhalo laso. (Varoma 2:14, 15) Mutshamuseyi nyo khaguri nya mahungu nya Bhibhiliya tsamusede gu khuye lito nya giGreki li vbindrugedzedwego pwani “gu hevbudza” li nga tshamuseya gu “vidzwa nya gyanana,” mwendro gu dandrisa gyanana ni makungo nya gu gi khala muthu khongolo a vidzidwego.

⁹ Tepo vavelegi va hevbudzago sanana sawe khu lihaladzo, iso so dzipwa na si vhikedwe. So hevbula guti gu khiso gutshulega gu ngu hegedwa nigu satshavbo si si girago womini si na ni mihandro yaso. Khu kharato si na ni lisima ngudzu gu vavelegi va gu maKristo va tumba guti ga Jehovha gasi gu va phasa gu dandrisa sanana sawe. Madandriselo nya sanana ma hambanide guya khomu muthu a vbanyago umo, nigu madandriselo yoyo ma ngu vbindrugedza-vbindrugedza. Ambari ulolo, vavelegi va engisago Nungungulu kha va giri ni gevbini va gi manago mwendro gu tumba guti va gu nago khu gale mwendro mawonelo nya vathu.

¹⁰ Hi nga hevbula gilogyo avba nya giyeyedzo gya Nowa. Tepo Jehovha a nga mu ruma gu vbaha litaro, Nowa a di si dziti gu khuye a na li pheya khu hayi. A di yede gu tumba Jehovha, nigu hi ngu hevbula gu pwani uye a di gira “kha nga idzo” Jehovha a nga mu embeya khidzo. (Genesi 6:22) Khu wevbini handro wakona? Litaro lile li vbulugiside womi wa Nowa ni ndranga yaye! Nowa gambe dugelede kha nga muvelegi. Khu ginani? Kholu a di gu tumba guti ga Nungungulu. Nowa hevbudzide gwadi sanana saye nigu a diri giyeyedzo nya gyadi gwaso, si gu silo si nga ba si garadza ngudzu teponi yile nyo vivbe ngudzu, na yi si gu vbohi Ndrambi.— Genesi 6:5.

11. Khu ginani vavelegi va yedego gu gira satshavbo va si kodzago gasi gu hevbudza sanana sawe?

¹¹ Wo ba uri muvelegi, u nga gira kharini “kha nga idzo” Jehovha a ganeyago khidzo? Engisa Jehovha. Mu dzumeleye gu gu phasa gu dandrisa sanana sago. Thumisa wusingalagadzi nya Lito la Nungungulu ni hengeledzano yaye. Khu gu gimbiya nya tepo, adzina sanana sago si na gu bonga khu gu ba u giride isoso! Moyo nya ndriyathu nya mwama lovide esi: “Nyi ngu bonga ngudzu khu ndziya eyi vavelegi vangu va nga nyi dandrisa khiyo. Va giride satshavbo va nga si kodza gasi gu khuha monyo wangu.” Wari khuye vavelegi vaye khavo va nga mu phasa gu manega ni wupari ni Jehovha. Khu lisine, ambari vavelegi vo gira satshavbo va si kodzago gasi gu hevbudza gyanana gyawe, igyo gi nga tshuka gi mu diga Jehovha. Ganiolu, muvelegi wule a giridego satshavbo a nga si kodza gasi gu hevbudza gyanana gyaye a nga manega ni livhalo li agidego ni gu tumba gu khuye litshigu limwedo gyanana gyaye gi na wuya ga Jehovha.   

12, 13. a) Gyanana gyo tshuka gi duswa libandlani, vavelegi va nga yeyedza kharini gu khavo va ngu engisa Nungungulu? b) Ndranga nyo khaguri yi wuyedwe kharini khu gu ba vavelegi va engiside Jehovha?

¹² Ga vavelegi nyo khaguri, gimwegyo nya silo nyo garadze gi lingago guengisa gwawe, khu tepo gyanana gyawe gi duswago libandlani. Moyo nya ndriyathu nya nyamayi oyu gyanana gyaye nya gyagadzyana gi nga ba gi dusidwe libandlani gi bwe gi khuga khu ndrangani a gu ganeya esi: “Nyi di gu vbwetedzeya sihogo omu nya mabhuku yathu nya gu nyi kodza gu wuseyana ni gyanana gyangu ni gitugulwana gyangu.” Ganiolu mwama waye, khu gwadi a di mu phasa gu wona gu khuye avo va diri mwalo gambe gudzihlamuleya khu gyanana gyawe nigu va di yede gu tumbega ga Jehovha.

¹³ Hwane nyo ba gu vbindride myaga nyo khaguri, gyanana gyawe gi di wuyisedwa libandlani. Mamayi wakona wari khuye: “Olu gi ngu nyi ligareya ni gu nyi loveya tshigu ni tshigu! Nigu gi ngu hi ninga ngudzu githawo eni ni mwama wangu kholu gi wonidego gu khigyo hi engiside Nungungulu. Olu hi na ni gupwanana nyo tsakise ngudzu.” Gyo tshuka gyanana gyago nya gyagadzyana mwendro nya gikhwathana gi duswa libandlani, ina u na “tumba [Jehovha, NM] khu monyo wago watshavbo”? Ina u na Mu yeyedza gu khuwe kha wu “tumbi . . . wugengeli wago”? (Mavingu 3:5, 6) Dundruga gu khuwe gukawuka ga Jehovha go hi yeyedza guti gwaye ni lihaladzo a gu nalo khethu. Gima u nga divali gu khuwe uye ningede Gyanana gyaye khu vathu vatshavbo, nigu gyanana gyago nigyo gi ngu patega avba nya vathu vovo. Nungungulu o vbweta gu khuye vatshavbo va mana womi nya mba vbeya. (Leri 2 Pedro 3:9.) Khu kharato, vavelegi simamani gu tumba gu khenu gukawuka ga Jehovha ni sileletelo saye khyadi, ambari so ba si vbisa gu si landrisa. Engisa sileletelo sa Nungungulu, nigu u nga dwanisani naso.

NDRANI NYA LIBANDLA

14. Hi nga phasega kharini khu sihevbudzo esi Jehovha a hi ningago khu gu thumisa ‘githumi nya gutumbege’?

¹⁴ Jehovha tumbiside gu sayisa, gu vhikeya ni gu hevbudza libandla nya wuKristo. Uye o gira isoso khu dzindziya nyo hambanehambane. Khu giyeyedzo, uye emiside Gyanana gyaye gasi gu gi khathaleya libandla, Jesu a emisa ‘githumi nya gutumbege’ gasi gu dongiseya guhodza nya liphuvbo gu hi phasago gu simama na hi tumbegide. (Luka 12:42) “Githumi” gyogyo gyo hi ninga sihevbudzo nya lisima. Adzina u ngu dundruga ganelo mwendro ndrima nyo khaguri u leridego omu nya dzirevhista dzathu yi nga gu phasa gu vbindrugedza mapimiselo mwendro magirelo yago nya silo. Tsaka khu gu ba u vbindrugedzide silo soso, kholu so thula gu khiso u ngu dzumeleya gu khuwe Jehovha a gu hevbudza. — Mavingu 2:1-5.

15, 16. a) Hi nga phasega kharini khu thumo nya madhota? b) Hi nga gira ginani gasi gu madhota ma tsaka khu thumo wawo?

¹⁵ Kristo emiside gambe madhota gasi gu ma khathaleya libandla khu lihaladzo. Bhibhiliya yo rana vandriyathu vovo khiyo “siningwa nya vathu, NM.” (Vaefeso 4:8, 11-13) Hi nga phasega kharini khu thumo nya madhota? Hi nga pimedzeya gukhodwa ni giyeyedzo gyawe nya gyadi, nigu hi nga landreya wusingalagadzi va hi ningago khu gu thumisa Bhibhiliya. (Leri Vahebheru 13:7, 17.) Madhota ma ngu hi gola nigu mo vbweta gu khayo hi khala dzipari dza Nungungulu. Mo wona gu khayo hi ngu hamugega mitshanganoni mwendro gu vbeledwa khu sighingi sathu, ayo ma na zama gu hi phasa khu guvbiredza. Ayo ma na hi engiseya gwadi ma bwe ma hi tiyisa khu ndziya nya lihaladzo ni gu hi ninga wusingalagadzi wa omu nya Bhibhiliya. Ina u ngu wona giphaso gyawo kha nga giyeyedzo nya lihaladzo a gu nalo Jehovha khuwe?

¹⁶ Dundruga gu khuwe adzina kha si ma vbevbugeyi madhota gu hi ninga wusingalagadzi. Wo dundrugeya gu khuwe muprofeti Natane dzi pwide kharini tepo a nga ya ganeya ni Pfhumu Dhavhidhe hwane nyo ba pfhumu yi zamide gu siha gighoho gyayo nya gikhongolo? (2 Samuweli 12:1-14) Mupostoli Pawulo dzi pwide kharini tepo a nga ninga wusingalagadzi Pedro, moyo nya 12 vapostoli, khu gu ba a pharide gwadi maKristo nya maJudha guvbindra aya ma nga ba ma siri maJudha? Si vbwetide gu khiso Pawulo a tiya hwambo gasi gu gira isoso. (Vagalatiya 2:11-14) Khu kharato u nga vbevbugiseya kharini madhota gu gu ninga wusingalagadzi? Dzi nogise, u bonga, u bwe u dzi vbevbugisa avba nya mabhulo. Wona giphaso gyawo kha nga giyeyedzo nya lihaladzo la Jehovha. U na wuyedwa, nigu madhota ma na tsaka khu thumo wawo.

17. Madhota ma phaside kharini moyo nya ndriyathu nya nyamayi?

¹⁷ Moyo nya ndriyathu nya nyamayi, a gu ganeya khu silo si mu dugeledego gale si nga gira gu si mu garadzeya gu haladza Jehovha a bwe a vbeledwa khu gutsaka. Wari khuye: “Nyi di gu dziti gu kheni nyi di yede gu ya ganeya ni madhota. Ayo kha ma nyi vbenyeleya mwendro gu nyi solasola, ganiolu ma di nyi tiyisa. Hwane nya tshangano ni tshangano nya libandla, ambari mo ba ma pharegide kharini, moyo wawe a di guta vbweta guti mawugelo yangu. Khu kotani nya esi si nyi degeledego, si di gu nyi garadzeya gu dzipwa na nyi ninganedwa khu lihaladzo la Nungungulu. Ambari ulolo, tepo ni tepo, Jehovha a ngu thumisa libandla ni madhota gasi gu nyi yeyedza lihaladzo a gu nalo kheni. Nyo gombeleya gu kheni nyi si tshuki nyi mu diga.”

GINANI GI VBISAGO NGUDZU GUVBINDRA GU KAWUKWA?

18, 19. Ginani gi vbisago ngudzu guvbindra gu kawukwa? Ninga giyeyedzo.

¹⁸ Gu kawukwa gu nga vbisa, ganiolu mihandro yi manwago khu gu bomba gu kawukwa khu Nungungulu yi ngu vbisa ngudzu. (Vahebheru 12:11) Hi nga hevbula gilogyo ga siyeyedzo nyo vivbe sa Kayimi ni Pfhumu Zedhekiya. Tepo Jehovha a nga wona gu khuye Kayimi a di gu venga ndriyaye a bwe a vbweta gu mu songa, a di gengedza Kayimi khuye: “Khu ginani u goroga kharato, u sivbala khovbeni? Wa gu gira nya sadi, khu lisine u na zundzega, aholu wa gu gira guvivba, u na modwa khu gighoho kholu gyomo nyangwani gwago gi vbweta gu gu thesa. Aholu uwe gu vbweta u gi pala.” (Genesi 4:6, 7) Kayimi a di bomba gu kawukwa khu Jehovha, a songa ndriyaye, a vbwera mihandro nyo vivbe womini waye watshavbo. (Genesi 4:11, 12) Nari khatshi Kayimi a di engiside Nungungulu, na sa tshaniseka khu ndziya yile.

¹⁹ Zedhekiya a diri pfhumu nyo vivbe yi nga ba yiri mwalo tshivba. Gufumani gwaye, vathu va Jerusalema va diri ga giyemo nyo vivbe. Muprofeti Jeremiya a di gengedza Zedhekiya gambe ni gambe gu khuye a di yede gu vbindrugedza. Ganiolu pfhumu yi di bomba gu kawukwa khu Jehovha, mihandro yakona kha ya tsakisa. (Jeremiya 52:8-11) Jehovha kha vbweti gu khuye hi tshaniseka nya mba na gighelo! — Leri Isaya 48:17, 18.

20. Ginani gi na dugeleyago ava va dzumeyago sihevbudzo sa Nungungulu ni ava va si bombago?

²⁰ Muhuno, vathu nya vangi va ngu tshepeta ni gu mba khathala khu sihevbudzo sa Nungungulu. Ganiolu, nugunugu ni wevbini a bombago sihevbudzo sa Nungungulu a na vbwera mihandro nya mba tsakisa. (Mavingu 1:24-31) Khu kharato hongoleni hi “yingisani sihevbudzo . . . , [hi] na khala vathu nya guti.” Mavingu 4:13 wari khuye: “vegedza gwadi sihevbudzo, u nga si digi si sayise, kholu khiso womi wago.”