Baami Wachibili
24 Mumazuba aaJehoyakkimu, Mwaami Nebbukkadineza waBbabbiloni wakasika kuti azoomulwane, mpawo Jehoyakkimu wakaba mubelesi wakwe kwaminyaka iitatu. Nikuba oobo, wakamubukila. 2 Mpawo Jehova wakasaanguna kumutumina zigwebenga zinyanga bantu zintu zyamaKkaludiya, zyamaSiriya, zyamaMowabbu, azyama-Amoni kuti zimulwane. Wakaliswini kuzituma kuti zilwane Juda akwiinyonyoona kweendelana ajwi lyaJehova ndyaakali waamba kwiinda mubabelesi bakwe bapolofita. 3 Kwaamba choonzyo, Jehova nguwe wakalayilila kuti zintu eezi zichitikile Juda, kuchitila kuti abatande kunembo lyakwe akaambo kazibi zyoonse Manase nzyaakali wachita, 4 aganzi lyabantu batakwe mulandu ndyaakatila, nkaambo wakali wazuzya Jerusalema aganzi lyabantu batakwe mulandu, alubo Jehova taakali kuyanda pe kulekelela.
5 Makani aachiindi woonse aali atala aJehoyakkimu, azintu zyoonse nzyaakachita, taalembedwe na mubbuku lyamakani aachiindi aaziindi zyabaami baJuda? 6 Mpawo Jehoyakkimu wakalazikwaamwi amasianyinakulu. Mwanaakwe Jehoyakkini wakaba mwaami mundawu yakwe.
7 Mwaami wa-Ijipita taakwe naakazoozwa lubo pe munyika yakwe, nkaambo mwaami waBbabbiloni wakali wabweza zintu zyoonse zyakali zyamwaami wa-Ijipita, kuzwa kuKalonga* ka-Ijipita kuyoosika kuMulonga waYufurati.
8 Jehoyakkini wakali aaminyaka iili 18 naakaba mwaami, alubo wakeendelezya kwamyeezi iitatu muJerusalema. Banyina bakali kutegwa Nehushita mwana wa-Elinatani wamuJerusalema. 9 Wakaliswini kuchita zibi mumeso aaJehova kweendelana azintu zyoonse wisi nzyaakachita. 10 Aachiindi eecho, babelesi baMwaami Nebbukkadineza waBbabbiloni bakasika kuti bazoolwane Jerusalema, mpawo muunzi ooyu wakasinkilwa. 11 Mwaami Nebbukkadineza waBbabbiloni wakasika kumuunzi ooyu chiindi babelesi bakwe nibakawusinkilide.
12 Mwaami Jehoyakkini waJuda wakayinka kumwaami waBbabbiloni kalaamwi abanyina, babelesi bakwe, basilutwe bakwe, abalupati-pati mung’anda yakwe. Mwaami waBbabbiloni wakamutola mubuzike mumunyaka wamusanu ayitatu wabweendelezi bwakwe. 13 Mpawo wakagwisya zintu zyoonse ziyandikana zyamung’anda yaJehova azintu zyoonse ziyandikana zyamung’anda yamwaami.* Wakapwaya zibelesyo zyangolida zyoonse, eezyo Solomoni mwaami wa-Israyeli nzyaakali wapanga mutempele lyaJehova. Eezi zyakachitika kweendelana ambaakali waamba Jehova. 14 Wakabatola mubuzike basilutwe boonse, basilumamba bali aamanguzu boonse, abasikupanga zintu bali aaluzibo boonse abasikufula* boonse bamuJerusalema—wakabweza bantu bali 10 000 wabatola mubuzike. Taakwe wakasyaala pe kunze kwabantu bafwabisisya bamunyika eeyo. 15 Wakabweza Jehoyakkini wamutola mubuzike kuBbabbiloni. Alubo wakabweza banyina bamwaami, banakazi bamwaami, balupati-pati mung’anda yamwaami, abaalumi balemekwa bamunyika eeyo, wabatola mubuzike kuzwa kuJerusalema kabaya kuBbabbiloni. 16 Mwaami waBbabbiloni wakabweza basilumamba boonse bali 7 000 wabatola mubuzike kuBbabbiloni, kuswaanizya abantu bali aaluzibo lwakupanga zintu abasikufula* bali 1 000, boonse bakali baalumi bali aamanguzu bayiisidwe kulwana nkondo. 17 Mwaami waBbabbiloni wakabikka Mataniya wisi muniini waJehoyakkini kuti abe mwaami mundawu yakwe, alubo wakamuchincha zina wamuuzika lyakuti Zedekkiya.
18 Zedekkiya wakali aaminyaka iili 21 naakaba mwaami alubo wakeendelezya kwaminyaka iili 11 muJerusalema. Banyina bakali kutegwa Hamutali mwana waJeremiya wakuLibbina. 19 Wakaliswini kuchita zibi mumeso aaJehova, kweendelana azintu zyoonse Jehoyakkimu nzyaakachita. 20 Zintu eezi zyakachitika muJerusalema amuJuda, nkaambo Jehova wakali wanyema zyakuti wakasika mpabatanda kunembo lyakwe. Mpawo Zedekkiya wakabukila mwaami waBbabbiloni.