Baami Wachibili
25 Mumunyaka wamusanu ayine wabweendelezi bwaZedekkiya, mumweezi wakkumi, mubuzuba bwakkumi mumweezi ooyo, Mwaami Nebbukkadineza waBbabbiloni wakasika ankamu yakwe yoonse yamasooja kuti azoolwane muunzi waJerusalema. Wakakkempa kuti azoowulwane alubo wakayaka muduli wakuusinkila wakali kuuzyunguluka, 2 alubo muunzi wakalisinkilidwe kusikila mumunyaka wachi 11 wabweendelezi bwaMwaami Zedekkiya. 3 Mubuzuba bwamusanu aane mumweezi wachine, nzala yakali mpati loko mumuunzi alubo bantu bamunyika eeyo teebakalikwe chakulya pe. 4 Muduli wamuunzi wakakolomonwa, mpawo masooja boonse bakachija mansiku kabazwida aageedi lyakali aakati kamiduli iibili aafwiifwi amuunda wamwaami, chiindi maKkaludiya nibakazyungulukide muunzi. Mpawo mwaami wakachija kabelesya nzila yaku-Arabba. 5 Pesi masooja aamaKkaludiya bakaandilila mwaami baakumweenzya munkanda yaJerikko, mpawo makamu aakwe woonse aamasooja akamwayika amusiya. 6 Bakajata Zedekkiya bamutola kumwaami waBbabbiloni kuRibbila mpawo bakamubeteka. 7 Bakajaya bana baZedekkiya kalangide. Mpawo Nebbukkadineza wakoofwaazya Zedekkiya alubo wakamusunga aancheni zyakkopa* wamutola kuBbabbiloni.
8 Mumweezi wamusanu mubuzuba bwamusanu aabili mumweezi ooyo, nkukwaamba mumunyaka wachi 19 wabweendelezi bwaMwaami Nebbukkadineza mwaami waBbabbiloni, Nebbuzaradani silutwe wabalindi, ooyo wakali mubelesi wamwaami waBbabbiloni wakasika kuJerusalema. 9 Wakatenta ng’anda yaJehova, ng’anda yamwaami,* amaanda woonse aamuJerusalema. Alubo wakatenta maanda aabantu boonse balemekwa. 10 Miduli yakazyungulukide Jerusalema yakakolomonwa aankamu yoonse yamasooja aamaKkaludiya yakalaamwi asilutwe wabalindi. 11 Nebbuzaradani silutwe wabalindi wakabweza bantu boonse bakali basyaala mumuunzi wabatola mubuzike, kuswaanizya abantu bakali balitola kumwaami waBbabbiloni, abamwi bantu boonse. 12 Pesi silutwe wabalindi wakasiya bamwi bantu bakali kufwabisisya bamunyika eeyo, kuti babe basikulima myuunda yamisaansa abasikubeleka milimu iimizya. 13 Alubo maKkaludiya bakadyunkuula mapila aakkopa* aang’anda yaJehova atungolo aLwizi lwakkopa zyakali aang’anda yaJehova, mpawo bakabweza kkopa yazintu eezi bayitola kuBbabbiloni. 14 Alubo bakabweza tugomo, mafosholo, zyakuzimya mulilo, nkomeki, azibelesyo zyoonse zyakkopa zyakali kubelesegwa mumulimu watempele. 15 Silutwe wabalindi wakabweza zyakubikkila makala andido zyakapangidwe aangolida kupela ansiliva kupela. 16 Kkopa yakabelesegwa kupanga mapila aabili, Lwizi atungolo, eezyo Solomoni nzyaakapangila ng’anda yaJehova teeyakali kupimika pe. 17 Pila limwi alimwi lyakali kulampa makkiyubbiti* aali 18 kuya mujulu, mutwe walyo wakali wakkopa. Alubo wakali kulampa makkiyubbiti aatatu kuya mujulu, nsefa amapomegraneti zyakali kuzyunguluka mutwe zyakali zyakkopa. Pila lyachibili ansefa yalyo, lyakalikozyenie alyakusaanguna.
18 Silutwe wabalindi wakabweza Seraya mupati wabapayizi, aZefaniya mugwasilizi wamupati wabapayizi, abalindi bamilyango batatu. 19 Alubo mumuunzi wakabweza walupati-pati mung’anda yamwaami uumwi, ooyo wakali kulanga masooja, abeenzinyina bamwaami bali musanu bakajanika mumuunzi, kuswaanizya amulembi wasilutwe wamasooja, ooyo wakali kusala bantu bamunyika eeyo kuti babe masooja, abaalumi bali 60 kuzwa mubantu biyo bamunyika eeyo bakajanika mumuunzi. 20 Nebbuzaradani silutwe wabalindi wakababweza wabatola kumwaami waBbabbiloni kuRibbila. 21 Mwaami waBbabbiloni wakabayasa wabajaya kuRibbila munyika yaHamati. Oobu mbumbubo maJuda mbubakatolwa mubuzike kuzwa munyika yabo.
22 Mwaami Nebbukkadineza waBbabbiloni wakasala Gedaliya mwana wa-Ahikkamu mwana waShafani, kuti azulwide bantu aabo mbaakali wasiya munyika yaJuda. 23 Basilutwe bankamu zyamasooja boonse abaalumi mbibakalaabo nibakamvwa kuti mwaami waBbabbiloni wasala Gedaliya, mpawaawo bakayinka kuli Gedaliya kuMizipa. Kwakali Ishumayeli mwana waNetaniya, Johanani mwana waKkariya, Seraya mwana waTanumeti wakuNetofa, aJaazaniya mwana waMaakkati, kuswaanizya abaalumi mbibakalaabo. 24 Gedaliya wakakonka chikonke kulimbabo abaalumi mbibakalaabo, wakati kulimbabo: “Mutayoowi pe kuba babelesi bamaKkaludiya. Amukkale munyika mpawo mubelekele mwaami waBbabbiloni, zintu zinoomweendela kabotu.”
25 Mumweezi wamusanu ayibili, Ishumayeli mwana waNetaniya mwana wa-Elishama wamumpuli yabwaami, wakasika kali aabamwi baalumi bali kkumi mpawo bakayasa Gedaliya wafwa, kuswaanizya amaJuda amaKkaludiya mbaakalaabo kuMizipa. 26 Kuzwa waawo, bantu boonse kuzwa kumuniini kusika kumupati, kuswaanizya abasilutwe bankamu zyamasooja, bakanyampuka baya ku-Ijipita, nkaambo bakali kuyoowa maKkaludiya.
27 Mumunyaka wachi 37 Mwaami Jehoyakkini waJuda kali mubuzike, mumweezi wachi 12, mubuzuba bwachi 27 mumweezi ooyo, Mwaami Evili-merodakki waBbabbiloni, mumunyaka naakaba mwaami, wakaangununa Mwaami Jehoyakkini waJuda mujele. 28 Wakali kwaambuula kabotu anguwe alubo wakasumpula chuuno chakwe chabwaami kwiinda zyuuno zyabamwi baami mbaakalaabo muBbabbiloni. 29 Nkinkaako, Jehoyakkini wakazwaatununa zigogo zyakwe zyamujele, alubo chiindi choonse wakali kulida aatebbulu lyamwaami kwamazuba woonse aabuumi bwakwe. 30 Mwaami wakali kumupa chakulya buzuba abuzuba, kwamazuba woonse aabuumi bwakwe.