Nzila Zyakukambawuka Makani Mabotu

JESU wakali mukambawusi musungu alubo wakasiila batobeli bakwe chikozyano chili kabotu. Wakali kubayinkila bantu, kabayiisya mumaanda aabo amumasena mujanika bantu biingi. (Mt. 9:35; 13:36; Lk. 8:1) Jesu wakali kuyiisya muntu kali alikke, makamu aabantu abasikwiiya bakwe kabali abalikke. (Mk. 4:10-13; 6:35-44; Joh. 3:2-21) Wakali kwaambuula majwi aasungwaazya apa bulangilizi kufumbwa mpakali kujana mweenya. (Lk. 4:16-19) Nikuba chiindi nakakatede, taakali kuleka pe kukambawuka. (Mk. 6:30-34; Joh. 4:4-34) Takutusungwaazyi na kubala makani alaatala akukambawuka nkwakachita Jesu? Kulatusungwaazya mbuli mbubakalimvwa baapostolo.—Mt. 4:19, 20; Lk. 5:27, 28; Joh. 1:43-45.

² Atulange-lange nzila zisiyene-siyene zikonzya kubelesegwa amaKristu mazubaano mukuchita mulimu wakatalisigwa aJesu Kristu muminyaka iili 2 000 yakiinda.

KUKAMBAWUKA KUNG’ANDA ANG’ANDA

³ Mbotuli Bakamboni baJehova, tulizi kuti kukambawuka makani mabotu aaBwaami kung’anda ang’anda munzila iibambikene, kulayandikana. Bantu biingi balituzi akaambo kakubelesya nzila eeyi. Kubelesya nzila eeyi kwapa kuti tuzwidilile kuyiisya bantu biingi muchiindi chiniini. (Mt. 11:19; 24:14) Kukambawuka kung’anda ang’anda kutondeezya kuti tulamuyanda Jehova abasimayakilane.—Mt. 22:34-40.

⁴ Kukambawuka kung’anda ang’anda nkubachita Bakamboni baJehova kwakasaanguna chiindi. Mwaapostolo Pawulu wakali kuyiisya bantu kumaanda abo. Kalikupandulwida balangizi bakuEfesu atala amulimu ngwakachita wakati: “Kuzwa mubuzuba bwakusaanguna mbondakasika mucooko ca Asiya, . . . tiindakamusisa, ndakamwaambila zintu zyoonse izigwasya akumuyiisya . . . akuŋanda aŋanda.” (Mil. 20:18, 20, 21) Kuchiindi eecho, maRoma bakali kusungwaazya kukomba mituni alubo bantu biingi bakali ‘kukomba mizimu.’ Bantu bakeelede kuyanduula “Leza iwakalenga nyika azintu zyoonse zili mumo,” Ooyo wakali ‘kulayilila bantu boonse kumasena oonse kuti basanduke.’—Mil. 17:22-31.

⁵ Bantu beelede kumvwa makani mabotu chakufwambaana nkaambo nyika eeyi mbi yaba afwiifwi kunyonyoonwa. Eezi zipa kuti tuyande kubeleka changuzu. Kukambawuka kung’anda ang’anda ninzila iinda zyoonse itugwasya kuyanduula bantu bayanda kasimpe. Nzila eeyi yapa kuti tuzwidilile mbuli mbakazwidilila Jesu abaapostolo chiindi.—Mk. 13:10.

⁶ Ulikwiibelesya na nzila eeyi yakukambawuka kung’anda ang’anda? Ikuti kakuli boobo, baachoonzyo chakuti Jehova ulabotelwa. (Ezk. 9:11; Mil. 20:35) Chimwi chiindi kukambawuka kung’anda ang’anda kulakonzya kukuyumina. Amwi ulachiswa naakuti busena mbukambawukila bantu tabakuswiilili pe. Chimwi chiindi mfulumende ilakonzya kukasya mulimu wakukambawuka. Amwi ulaabweeme bupa kuti kazikuyumina kukambawukila bantu mbutazi. Eezi zipa kuti utabotelwi pe chiindi nuli kukambawuka kung’anda ang’anda. Pesi utaleki pe. (Kul. 4:10-12) Nzila njulimvwaayo ileendelana ambubalimvwa bakwesu bali muli zimwi nyika.

⁷ Jesu wakasyomezya basikwiiya bakwe kuti: “Amubone! Ndilaandinywe mazuba oonse mane kusikila kumamanino aabweende bwazintu.” (Mt. 28:20) Chisyomezyo eechi chilatusungwaazya chiindi nituchita mulimu wakukambawuka. Tulimvwa mbuli mwaapostolo Pawulu wakati: “Muzintu zyoonse ndilijisi nguzu kwiinda muli yooyo uundipa nguzu.” (Flp. 4:13) Belekaamwi ambungano mukukambawuka kung’anda ang’anda. Uyoosungwaazigwa akugwasigwa chiindi nubeleka abamwi. Komba kuli Leza kuti akupe manguzu akulwana mapenzi akuti ubeleke changuzu mukukambawuka makani mabotu.—1 Joh. 5:14.

⁸ Chiindi nitubuzya bamwi makani mabotu, tunooli katubapandulwida ‘kaambo kajatikizya bulangizi mbotujisi.’ (1 Pet. 3:15) Uyoobona kusiyana kuliwo akati kabantu batambula mulumbe waBwaami abatawutambuli pe. (Is. 65:13, 14) Uyookkutisikana akaambo kakuziba kuti uswiilila majwi aaJesu akuti “aumunike mumuni wanu.” Alubo uyooba achilongezyo chakubuzya bamwi atala aJehova akasimpe kapa buumi butamani.—Mt. 5:16; Joh. 17:3; 1 Tim. 4:16.

⁹ Kuli mabambe akukambawuka kung’anda ang’anda achitwa akati kamviki akumamanino aamviki. Mumasena bantu mubatajaniki sikati, zimwi mbungano zikambawuka goko. Chimwi chiindi, bantu balakonzya kutambula beenzu goko kwiinda kuseeni.

KUYANDUULA BANTU BEELELA

¹⁰ Jesu wakalayilila basikwiiya bakwe kuti ‘bayanduule’ bantu beelela. (Mt. 10:11) Taakali kuyanduula bantu beelela kung’anda ang’anda luzutu. Pesi Jesu wakakambawuka mumasena asiyene-siyene, kalibambilide anakatalibambilide. (Lk. 8:1; Joh. 4:7-15) Alubo, baapostolo bakakambawuka mumasena asiyene-siyene.—Mil. 17:17; 28:16, 23, 30, 31.

¹¹ Andiswe makanze eesu ngakubuzya muntu woonse mulumbe waBwaami. Nkinkaako, tweelede kukambawuka mumasena asiyene-siyene mbuli mbaakachita Jesu abaapostolo alubo tweelede kweendelana azyiimo zyabantu mbitukambawukila. (1 Kor. 7:31) Muchikozyano, basikupupulula balikuzwidilila kukambawukila mumasena achitilwa zyamabbizinesi. Kukambawuka mumigwagwa, mumapakki, mumasena aapakilwa moota naakuti kufumbwa kujanika bantu kwazwidilila munyika zyiingi. Zimwi mbungano zikambawuka kazibelesya matebuli naakuti tungolo. Kuyungizya waawo, wofesi yamutabi ichita mabambe aakuti mbungano zisiyene-siyene zichite bukambawusi bwantanganana buchitwa mumasena muli bantu biingi. Eezi zipa kuti bantu batajaniki kumaanda abo bamvwe makani mabotu kufumbwa nkubabede.

¹² Chiindi nituswaana bantu bali aachiyandisyo chakumvwa mulumbe wamuBbayibbele tulakonzya kubapa mabbuku eesu aapandulula Bbayibbele, kubapa adilesi yesu akubamba kuti tuzobweede, kubabuzya kuti banjile ajw.org naakuti kubapa adilesi yabusena kuchitilwa miswaangano yambungano bulafwiifwi ankubakkala. Kukambawukila mumasena muli bantu biingi kulakonzya kukugwasya kuti uyungizye mulimu wakukambawuka.

¹³ Nikuba boobo, mulimu uuchitwa amaKristu teekukambawuka luzutu. Pesi tweelede kubweeda lubo kubantu bakatambula kasimpe kuchitila kuti tubagwasye kuti bajatisisye kasimpe kapa buumi akuti babe maKristu basimide.

KUBWEEDA

¹⁴ Jesu wakabuzya batobeli bakwe kuti: “Muyooba bakamboni bangu . . . kusikila kumasena aakulamfwu kapati aanyika.” (Mil. 1:8) Alubo wakayungizya kuti: “Kamuya mukayiisye bantu bazisi zyoonse, . . . mukabayiisye kutobela zintu zyoonse nzyondakamulailila.” (Mt. 28:19, 20) Kubweedela bantu mbitwakabona kulakonzya kupa kuti tubotelwe mumulimu wakukambawuka. Bantu bakatondeezya chiyandisyo kumakani mabotu nwakasaanguna kubaswaya balabotelwa nibakubona lubo. Ulakonzya kubagwasya kuti babe achiyandisyo kukasimpe akuti basyome Leza kwiinda mukubayiisya amwi makani aazwa muBbayibbele. (Mt. 5:3) Kulibambila kabotu kuti ubweede chiindi nibaangunukide, kuyookugwasya kuti usaangune chiiyo chaBbayibbele. Ngimakanze aako chiindi nubweedela bantu mbwakabona. Tweelede kubyala mbuto yakasimpe akwiitilila.—1 Kor. 3:6.

¹⁵ Kubweedela bantu mbwakabwene kulakonzya kukuyumina. Amwi ukonzya kukambawukila bantu kwachiindi chiniini alubo ulabotelwa akuchita oobo. Pesi nga wamana manguzu chiindi nuyeeya kubweedela kuti ukayiye amuntu Bbayibbele. Kulibambila kabotu kuyookugwasya kuti ube aachibindi. Weelede kubelesya malayilile ngitujana kumiswaangano yaakati kamviki. Alubo ulakonzya kukumbila sikupupulula uli aaluzibo kuti kamuzwaamwi kukukambawuka.

KUCHITISYA CHIIYO CHABBAYIBBELE

¹⁶ Naakali kwaambuula amwaalumi wakasanduka akuba muJuda wakali kubala Jwi lyaLeza, mukambawusi Filipi wakamubuzya kuti: “Sena mubwini ulicizyi eeco ncobala?” Mwaalumi ooyo wakasandula kuti: “Mbuti mbondinga ndacizyiba ikuti kakunyina uundipandulwida?” Chaandaano 8 chaMilimo chitubuzya kuti Filipi “wakamukambaukila makani mabotu aajatikizya Jesu.” kuzwa muMagwalo mwaalumi ooyo ngaakali kubala. (Mil. 8:26-36) Tatuzi pe kuti Filipi wakaambuula anguwe kwachiindi chilamfu biyeni, pesi wakapandulwida mwaalumi ooyo mane wakasyoma mpawo wakumbila kubbabbatizigwa. Mwaalumi ooyu wakaba sikwiiya waJesu Kristu.

¹⁷ Bantu biingi mazubaano tabalimvwisisisyi pe Bbayibbele, nkinkaako kulayandikana kuti katubweedulula akubayiisya ziindi zyiingi, kwamviki zyiingi, myeezi naakuti kwamunyaka kuchitila kuti babe alusyomo akuti babbabbatizigwe. Pesi kukkazika moyo akugwasya babombede mumoyo, kuyoopa kuti ujane zilongezyo mbuli mbakaamba Jesu kuti: “Kupa kulakkomanisya kapati kwiinda kupegwa.”—Mil. 20:35.

¹⁸ Uyooyanda kwiiya amuntu Bbayibbele kubelesya mabbuku akabambilwa kuyiisya. Kubelesya malayilile ngitujana aakati kamviki uyookonzya kwiiya abantu Bbayibbele munzila iizwidilila akuti babe basikwiya baJesu Kristu.

¹⁹ Ikuti kuyanda kugwasigwa kuyiisya muntu Bbayibbele, kumbila umwi mwaalu naakuti umwi Kamboni uukwizi kabotu kuyiisya kuti akugwasye. Makani aazwa muKabbuku kaMuswaangano waBuumi Amulimu Wesu azitondeezyo zyakukambawuka zichitwa kumiswaangano zilakonzya kukugwasya. Syoma Jehova alubo ukombe kuti akugwasye. (1 Joh. 3:22) Nkinkaako, kanza kwiiya abamwi bantu Bbayibbele kutali bamumpuli yako luzutu. Uyoobotelwa loko mumulimu wakukambawuka kuti kwiiya abantu Bbayibbele.

KUGWASYA BANTU BAYANDA KASIMPE KUTI BAZE MUMBUNGA YAJEHOVA

²⁰ Chiindi nitugwasya bantu kuti bazibe Jehova Leza akuti babe basikwiiya baJesu Kristu, nga tuyanda kuti baze mumbungano. Bantu mbitwiiyaabo Bbayibbele balakonzya kusima mubukombi kuti bayiziba kabotu mbunga yaJehova akubelekaamwi anjiyo. Kubayiisya kuchita oobo, kuyandikana loko. Tulakonzya kuchita oobo kwiinda mukubelesya mavidiyo akabbuku kategwa Mbaani Baliikuchita Kuyanda kwaJehova Mazuba Aano? Alubo, tulakonzya kubelesya makani ajanika muChaandaano 4 chabbuku eeli.

²¹ Kuzwa chiindi nusaanguna kwiiya amuntu Bbayibbele, mugwasye abone kuti Jehova ulikubelesya mbunga yakwe kuti kuchitwe mulimu wakukambawuka munyika. Mutondeezye mbayandikana mabbuku ngitwiiya alubo umupandulwide kuti mabbuku aaya apangwa biyeni akuti atumizigwa biyeni munyika yoonse kakubelesegwa basikulipeda. Kumbila muntu ngwiiyaawe Bbayibbele kuti mwiinkaamwi kumiswaangano yambungano. Mupandulwide mbiichitwa miswaangano alubo mugwasye kuti azibane abamwi bali mumbungano. Alubo ulakonzya kumugwasya kuti azibane abamwi Bakamboni kumiswaangano yabbazu ayabbooma. Kumiswaangano eeyi, kumugwasya kuti alibonene bantu baJehova mbubatondeezya kuti maKristu bakasimpe kwiinda mukutondeezyania luyando. (Joh. 13:35) Ikuti muntu ulaachiyandisyo zyamubotezya zili mumbunga yaJehova, ziyoomugwasya kuti ayande kuswena afwiifwi aJehova.

BELESYA MABBUKU AAPANDULULA BBAYIBBELE

²² MaKristu bakusaanguna bakali bakambawusi basungu baJwi lyaLeza. Bakakkopa Magwalo kuchitila kuti kabaabelesya nibali abalikke achiindi nibali kwiiya mumbungano. Bakali kuyiisya bantu kasimpe kajanika muJwi lyaLeza. Mabbuku amagwalo ngibakakkopa akali mache pesi akali kuyandikana loko. (Kol. 4:16; 2 Tim. 2:15; 3:14-17; 4:13; 1 Pet. 1:1) Bakamboni baJehova balikupupulula maBbayibbele amabbuku aakuyiisya miingi loko kababelesya minchina yakupulinta yamazubaano. Mabbuku aaya akuyiisya aswaanizya tupepa, tubbuku, mabbuku amamagazini zijanika mumilaka myiingi loko.

²³ Weelede kubelesya mabbuku aapandulula Bbayibbele ngitupegwa ambunga yaJehova chiindi nukambawukila bamwi. Kuziba mbukwakakugwasya kubala mabbuku aaBakamboni baJehova, kuyookusungwaazya kuti ubape bamwi.—Heb. 13:15, 16.

²⁴ Bantu biingi babelesya Intaneti kuti bazibe makani asiyene-siyene. Nkinkaako, webbusayiti yesu iili mumulawu iitegwa jw.org, ilatugwasya kuti tumwaye makani mabotu. Munyika yoonse, bantu biingi balakonzya kubelesya makkompiyuta kuti babale akuswiilila zyakalekkodwa zili mbuli Bbayibbele amabbuku aapandulula Bbayibbele zijanika mumilaka isiyene-siyene. Nikuba bantu batayandi kwiiya andiswe naakuti bakkala kule aBakamboni baJehova, balakozya kuziba nzitusyoma kwiinda mukubelesya webbusayiti yesu yajw.org kabali kumaanda abo.

²⁵ Nkinkaako kufumbwa nkutubede tulababuzya bantu atala awebbusayiti yesu yajw.org. Chimwi chiindi kuti mwining’anda wabuzya mubuzyo ulatala anzitusyoma, tulakonzya kubelesya fooni naakuti kkompiyuta kuti tumusandule mpawo-mpawo. Alubo kuti twaswaana muntu waambuula umwi mulaka kuswaanizya amulaka wamasayini, tulakonzya kumubuzya kuti abale Bbayibbele amabbuku aapandulula Bbayibbele mumulaka wakwe kabelesya webbusayiti yesu. Basikupupulula biingi babelesya mavidiyo aajanika awebbusayiti kuti baambuuzyanie abantu makani aazwa muBbayibbele.

KUKAMBAWUKA KUTALIBAMBILIDE

²⁶ Jesu wakabuzya bantu bakali kuswiilila majwi aakwe kuti: “Muli mumuni wanyika. . . . Aumunike mumuni wanu kubantu kutegwa babone milimo yanu mibotu akupa bulemu kuli Uso uuli kujulu.” (Mt. 5:14-16) Basikwiiya aabo bakatondeezya kuti balamuswiilila Leza kwiinda mukutobelezya chikozyano chaJesu, wakalyaamba kuti: “Ndili mumuni wanyika.” Jesu wakabikkila maKristu chikozyano chakupa kuti “mumuni wabuumi” umwekesye kuchitila kuti bantu bawutambula bakafutuke.—Joh. 8:12.

²⁷ Alubo, mwaapostolo Pawulu wakatusiila chikozyano chili kabotu chakutobelezya. (1 Kor. 4:16; 11:1) Chiindi naakali kuAtene, mazuba oonse wakali kukambawukila bantu bakali kumisika. (Mil. 17:17) MaKristu bakuFilipi bakatobelezya chikozyano chakwe. Eezi nzizyo zyakapa kuti Pawulu abalembele kuti bakali kupona “akati kazyalani lyabantu bampelenge alubo bapilingene,” kakuli maKristu aaba bakali kumweka “mbuli mimuni munyika eeyi.” (Flp. 2:15) Andiswe mazubaano, tulakonzya kupa kuti mumuni wakasimpe umwekesye kwiinda mumajwi amumichito yesu, kufumbwa mputwajana mweenya wakubuzya bantu makani mabotu. Nisimpe kuti kuba chikozyano chilikabotu chakusyomeka akulijata munzila iilikabotu, kulakonzya kupa kuti bantu babone kuti tulisiyene abamwi bantu. Pesi kuti twababuzya makani mabotu, balakonzya kuziba kuti nkamboonzi nitusiyene abamwi.

²⁸ Bakamboni baJehova bakambawukila bantu mbibabelekaabo, basichikolonyina, nibali mulweendo naakuti kufumbwa chiindi. Chiindi nituli mulweendo, tulakonzya kuba amweenya wakwaambuula abantu mbitweendaabo. Chiindi nitulikwaambula abamwi, tweelede kubona mweenya mputweelede kukambawuka. Tweelede kukkala katulibambilide kukambawukila bantu kufumbwa mputubede.

²⁹ Kuyanda kulumbayizya Mulengi wesu akulemeka zina lyakwe kuyootusungwaazya kuti tukkale katulibambilide kukambawuka. Kuyungizya waawo, tuyoogwasya bantu babombede mumoyo kuti bazibe Jehova, bamukombe akuti babe alusyomo muli Jesu Kristu kuchitila kuti babe abulangilizi bwakuyoojana buumi butamani. Kuchita oobo, kulamubotezya Jehova alubo kutondeezya kuti tuyanda kumubelekela.—Heb. 12:28; Ciy. 7:9, 10.

BUSENA BWAKUKAMBAWUKILA

³⁰ Jehova uyanda kuti mulumbe waBwaami ukambawukwe munyika yoonse kuswaanizya mumyuunzi amumadolopo. Wofesi yamutabi ipa mbungano atubunga tuniini busena bwakukambawukila kuchitila kuti mulimu ooyu uchitwe. (1 Kor. 14:40) Mabambe aaya aleendelana amabambe Leza ngakapede maKristu bamumwaanda wamunyaka wakusaanguna. (2 Kor. 10:13; Gal. 2:9) Kuli zyiingi zikonzya kuchitwa kuti mbungano zyatobelezya malayilile akukambawuka mubusena bubelekela mbungano nkaambo mulimu wakukambawuka atala aBwaami ulikuvula mumazubaano aakumamanino.

³¹ Mulangizi wamulimu nguwe uuchita mabambe aaya. Mubelesi uubelekela ulakonzya kupegwa mulimu wakupa bantu busena bwakubelekela. Busena bwakukambawukila buli muzipanzi eezi zibili, busena bwakabunga abusena bwamuntu uumwi. Kumasena kuli busena buniini bwakukambawuka, mulangizi wakabunga ulasala busena bwakabunga, mubakonzya kukambawukila basikupupulula. Pesi kuli busena bupati, sikupupulula umwi awumwi ulakonzya kupegwa busena bwakubeleka.

³² Sikupupulula ulaabusena bwakubeleka, ulakonzya kuyookambawukila nkuko kuti teekwachitwa muswaangano wakukambawuka naakuti katakonzyi kuyooswaanana abamwi. Chimwi chiindi bamwi basikupupulula bapegwa busena buli afwiifwi ankubabeleka alubo bakambawuka chiindi chakulyookezya naakuti nibachayisya. Zimwi mpuli zipegwa busena bwakukambawukila buli afwiifwi ankubakkala alubo balakonzya kukambawuka goko. Ikuti sikupupulula wajana busena mbwakonzya kubeleka, zilakonzya kumugwasya kuti ajane chiindi chiingi chakukambawuka. Nikuba boobo, busena bwakukambawuka bwasikupupulula uumwi bulakonzya kubelekwa akabunga kabasikupupulula. Kuti kuyanda busena bwakukambawuka, ulakonzya kukumbila kuli sikupa bantu busena bwakukambawuka.

³³ Mulangizi wakabunga weelede kubona kuti busena bwakapegwa kabunga kabasikupupulula buli kubelekwa changuzu. Alubo, sikupupulula wakapegwa busena bwakubeleka weelede bantu boonse bakambawukilwa mubusena oobo kuti kazikonzeka. Mabambe aakubelekwa kwabusena bumwi abumwi ayelede kweendelana aamulawu. Mulangizi wakabunga naakuti basikupupulula bakapegwa busena beelede kububeleka mumyeezi iine. Ikuti busena bwakubelekela bwakambawukwa boonse, basikupupulula beelede kubuzya sikupa bantu busena kuchitila kuti makani aaya alembwe mumalekkodi. Ikuti kwaba oobo, mulangizi wakabunga naakuti sikupupulula uupedwe busena, ulakonzya kubuzya sikupa bantu busena kuti uchiyanda kukambawukila kubusena mbwapedwe naakuti pe.

³⁴ Ikuti boonse bali mumbungano babeleka kubusena mbubapedwe, busena bwakukambawukila bulakonzya kubelekwa chakumaninina. Alubo, takuyandiki pe kuti basikupupulula babili naakuti biindaawo kabakambawuka busena bumwi chiindi choonse nkaambo eezi zilakonzya kuchima bantu. Kuchita oobo kutondeezya kuti tulababikkila maanu bakwesu abantu mbitukambawukila.

KUKAMBAWUKILA BANTU BAAMBUULA MILAKA IISIYENE-SIYENE

³⁵ Bantu boonse beelede kwiiya atala aJehova Leza, Mwanaakwe aBwaami bwaLeza. (Ciy. 14:6, 7) Tuyanda kugwasya bantu baambuula milaka iisiyene-siyene kuti bayite zina lyaJehova kuchitila kuti bakafutuke akuti bazwaate buntu buyandikana kumaKristu. (Rom. 10:12, 13; Kol. 3:10, 11) Mbuubuli buyumu-yumu mbutukonzya kuswaana nitukambawuka makani mabotu mubusena mwaambuulwa milaka iisiyene-siyene? Kujana twabagwasya biyeni bantu baambuula milaka iisiyene-siyene kuti bamvwe makani mabotu aaBwaami mumilaka njibamvwisisisya?—Rom. 10:14.

³⁶ Mbungano ipegwa busena bwakubelekela kweendelana amulaka. Nkinkaako, mubusena mwaambuulwa milaka myiingi, basikupupulula balakonzya kukambawukila kubusena bumwi pesi kabazwa kumbungano zisiyene-siyene. Ikuti kakuli boobu, basikupupulula bambungano imwi ayimwi beelede kuyanduula bantu baambuula mulaka ngubabelesya. Eezi zilakonzya kuchitwa nikuba kuchiindi chakutamba bantu kuchitwa munyaka amunyaka. Pesi chiindi nibachita bukambawusi bwantanganana naakuti nibakambawuka kabatalibambilide, basikupupulula balakonzya kukambawukila bantu boonse akubapa mabbuku mumilaka njibayanda.

³⁷ Chimwi chiindi mbungano zibelesya umwi mulaka tazikonzyi kubeleka kubusena buli kule. Balangizi bamilimu bambungano zisiyene-siyene zikambawuka busena bumwi, beelede kwaambuuzyania akuzuminana mbubakonzya kubeleka busena oobo. Eezi zilakonzya kugwasya bantu boonse kuti bamvwe makani alaatala aBwaami akuti tutanoyinduluki kubaswaya.—Tus. 15:22.

³⁸ Tweelede kuchitaanzi kuti muntu ngutwajana ang’anda kaambuula mulaka ngututakonzyi? Tatweelede kulibuzya kuti umwi uuzi mulaka wakwe uzoomukambawukila. Bamwi basikupupulula bakayiya majwi mache akukambawuka mumulaka waambuulwa abantu bali mubusena mubakambawukila. Tulakonzya kutondeezya muntu mbakonzya kubala naakuti kudawuniloda mabbuku mumulaka ngwamvwisisisya awebbusayiti yesu iili mumulawu ya jw.org naakuti kumubuzya kuti tuyoomuyandwida amwi mabbuku mumulaka ngwamvwisisisya.

³⁹ Ikuti twajana muntu ulaachiyandisyo chakwiiya, tweelede kuyanduula muntu waambuula mulaka wakwe kuti azoomugwasye. Alubo, tulakonzya kumubuzya kuchitilwa miswaangano iichitwa mumulaka ngwaambuula ilaafwiifwi ankwakkala. Ikuti kayanda kugwasigwa awumwi muntu waambuula mulaka ngwaambuula, tulakonzya kumutondeezya mbakonzya kulemba makani alaatala anguwe ajw.org. Kuzwa waawo, wofesi yamutabi iyooyanduula sikupupulula ulaafwiifwi, kabunga naakuti mbungano kuchitila kuti agwasigwe.

⁴⁰ Tweelede kunoomuswaya muntu watondeezya chiyandisyo kuti baambuula mulaka ngwaambuula kabatanamubona pe. Chimwi chiindi, wofesi yamutabi ilakonzya kuzibya baalu kuti tebamujana pe muntu waambuula mulaka wamuntu wakatondeezya chiyandisyo. Ikuti kwaba boobo, tweelede kwiinkilila kunembo katuswaya muntu wakatondeezya chiyandisyo. Ikuti kachikonzeka, tulakonzya kwiiya anguwe Bbayibbele katubelesya bbuku lili mumulaka ngwaambuula. Ikuti twazibelesya kabotu zifanikisyo akukumbila muntu ooyo kuti abale magwalo zilakonzya kumugwasya kuti amvwisisisye makani aazwa muBbayibbele. Umwi wamumpuli yakwe uuzi mulaka waambuulwa amuntu wakatondeezya chiyandisyo awaambuulwa asikupupulula, ulakonzya kunomutolekela.

⁴¹ Tweelede kutamba muntu wakatondeezya chiyandisyo kumiswaangano nikuba katazimvwisisisyi zyoonse zyambuulwa kumiswaangano kuchitila kuti ayizibe mbungano yaLeza. Ikuti Bbayibbele lili mumulaka wakwe kaliliwo, tulakonzya kumugwasya kulijula chiindi nikubalwa magwalo. Kwaambuuzyania abamwi mumbungano kulakonzya kumusungwaazya akupa kuti ayinkilile kunembo muzintu zyabukombi.

⁴² Tubunga Tuchitalika-talika: Kabunga kapangwa abasikupupulula bakambawukila kubusena kwaambuulwa umwi mulaka pesi kutakwe mwaalu naakuti mubelesi uubelekela uukonzya kugwasilizya mukuchita miswaangano mviki amviki mumulaka ooyo. Bawofesi yamutabi nga bazi kuti mbungano ilaafwiifwi akabunga aako ilaazyeelelo zitobela:

1. (1) Kakuli bantu biingi baambuula mulaka uutabelesegwi aambungano ilaafwiifwi.

2. (2) Kuti kakuli basikupupulula bazi mulaka ooyo naakuti balipedelede kwiiya mulaka ooyo.

3. (3) Kuti kabunga kabaalu kabalipedelede kukambawuka mumulaka ooyo.

Kuti bamukabunga kabaalu basala kuti balanganie kamwi kabunga, baalu beelede kubuzya mulangizi wabbazu. Nga ulizizi mbungano ziyanda kukambawukila bantu bamulaka ooyo alubo ulabapa makani aazwide atala ambungano iikonzya kulangania kabunga kapya. Kuti mbungano eeyo yazibinkana, baalu batumizya lugwalo kuwofesi yamutabi kuti bazibe kuti mbungano eeyo yabulangania kabunga aako.

⁴³ Tubunga: Bawofesi yamutabi nga bazi kuti mbungano ilaafwiifwi akabunga aako ilaazyeelelo zitobela:

1. (1) Kuti kakuli bantu biingi balaachiyandisyo alubo kakulangililwa kuti bantu baambuula mulaka ooyu bayoovula.

2. (2) Kuti kakuli basikupupulula bawuzi mulaka ooyo naakuti bayiila mulaka ooyo.

3. (3) Kuti kakuli mwaalu naakuti mubelesi uubelekela uukonzya kugwasilizya kuti kuchitwe muswaangano uumwi amviki mbuli nkani yabantu boonse naakuti Chiiyo chaNgaziyakulinda mumulaka ooyo.

Ikuti zintu eezi kazikonzeka, bamukabunga kabaalu nga balembela wofesi yamutabi atala akabunga aaka akukumbila kuti mbungano yabo ilanganie kabunga aaka. Mwaalu naakuti mubelesi uubelekela uugwasilizya kabunga aaka unoobeleka kali “mulangizi wakabunga” naakuti kali “mubelesi wakabunga.”

⁴⁴ Kuti kabunga kajulwa, bamukabunga kabaalu ngabalanga-langa kuti babone kuti njiili miswaangano yeelede kuchitwa akabunga akuti yeelede kuchitwa tungane mumweezi. Alubo, kulakonzya kuchitwa mabambe akuti kabachita muswaangano wamulimu wakukambawuka. Bantu boonse bali mukabunga aako balanganisigwa akabunga kabaalu kalangania kabunga aako. Baalu banoopa malayilile akulangania kabunga. Ikuti mulangizi wabbazu wabelekaamwi akabunga chiindi naswayide mbungano ilangania kabunga aako, ulalembela wofesi yamutabi makani ali atala akuzwidilila kulikuchitwa akabunga naakuti ziyandikana zyakabunga. Mukuya kwachiindi, kulakonzya kuti kabunga aako kazoobe mbungano. Jehova ulabotelwa kuti boonse babelesya malayilile aazwa kuli nguwe.—1 Kor. 1:10; 3:5, 6.

KUKAMBAWUKA KAMULI TUBUNGA

⁴⁵ MuKristu umwi awumwi wakalipeda ulaamulimu wakubuzya bamwi makani mabotu. Nikuba kuti kuli nzila zyiingi zyakukambawuka, pesi kuli kabotu kuzwa abamwi mumulimu wakukambawuka. (Lk. 10:1) Eezi zyaamba kuti mbungano zyeelede kuchita miswaangano akati kamviki naakuti kumamanino aamviki. Alubo, mazuba akulyookezya apa kuti tujane chiindi chakukambawuka katuli mutubunga nkaambo basikupupulula biingi nga tabali kumulimu pe. BaKkomiti yaMulimu babamba muswaangano wamulimu wakukambawuka akubamba chiindi cheelede abusena buli kabotu bwakukambawuka kuseeni agoko.

⁴⁶ Kukambawuka kamuli kabunga kugwasya basikupupulula kuti babelekaamwi akuti ‘bayumizyanie kwiinda mulusyomo lwawumwi amweenzinyina.’ (Rom. 1:12) Basikupupulula bapya balakonzya kubelekaamwi abasikupupulula balaaluzibo kuchitila kuti bayiye zyiingi. Kuli amwi masena, basikupupulula beelede kweenda kabali babili naakuti kwiindaawo kuchitila kuti balikwabilile. Nikuba kuti uyanda kuzwa awulikke, pesi weelede kuswaanana akabunga kuchitila kuti musungwaazyanie. Kuziba kuti bamwi balikukambawuka mubusena muli kubelekela, kulakonzya kukusungwaazya. Ikuti miswaangano yamulimu wakukambawuka yakabambwa ambungano kayichitwa mazuba oonse, tachaambi kuti mapayona abamwi basikupupulula beelede kwiinjila mazuba oonse. Nikuba boobo, balakonzya kunjila imwi miswaangano yamulimu wakukambawuka iichitwa amwi mazuba.

⁴⁷ Toonse tweelede kutobelezya nzila zyakukambawuka nzyaakabelesya Jesu abaapostolo bakwe. Tulakonzya kujana zilongezyo zizwa kuli Jehova kuti twayinkilila kunembo katuchita mulimu uuyandikana wakukambawuka makani mabotu aaBwaami.—Lk. 9:57-62.