CHIIYO 15
LWIIMBO 30 Ngu Taata, ngu Leza Wangu, Mweenzuma
“Kuswena Kuli Leza” Kulatugwasya!
“Pele mebo, cilandibotela kuswena kuli Leza.”—INT. 73:28.
NZITUTAYIYE
Muchiiyo eechi, tulabona mbutukonzya kuswena aafwifwi aJehova alubo tulabona bubotu mbutukonzya kujana kuti twachita oobo.
1-2. (a) Niinzi zinga zyachitika zipa kuti muntu asike mpamvwanana loko awumwi muntu? (b) Tulalanga-langaanzi muchiiyo eechi?
YEEYA atala amweenzinyokwe waamoyo. Mwakasaanguna biyeni kumvwanana? Kulakonzeka kuti mwakali kujana chiindi chakubaamwi. Wakaziba buyumu-yumu mbwaakaswaana. Alubo wakaziba zintu nzyayanda anzyatayandi. Wakaziba buntu bubotu mbwalaabo mbuyanda kutobelezya. Alubo wakasaanguna kumuyanda loko.
2 Kuti usike mpumvwanana loko awumwi muntu, tazilichitikili pe, ziyanda kubeleka changuzu. Nzizyo zichitika kuti kuyanda kumvwanana loko aJehova Leza. Muchiiyo eechi, tulabona mbutukonzya kuswena aafwiifwi aLeza abubotu mbutujana kuti twachita oobo. Tulasaanguna kulanga-langa kuti nkamboonzi nikuyandikana kuti tuswene aafwiifwi aJehova Mweenzuma wiinda beenzuma boonse.
3. Nkamboonzi nitweelede kuyeeyesesya atala abubotu buba akaambo kakuswena aafwiifwi aJehova? Amba chikozyano.
3 Tulizi kuti kuswena aafwiifwi aJehova kulagwasya. Pesi kuti twayeeyesesya atala akuti kugwasya biyeni, zilakonzya kupa kuti twiinkilile kunembo katuswena aafwiifwi anguwe. (Int. 63:6-8) Muchikozyano, tulizi kuti kulya chakulya chiyaka mubili, ku-ekisesayiza, kujana chiindi chakulyookezya akunywa maanzi miingi kulatugwasya. Nikuba oobo,bantu biingi tabakwe ndaba pe azintu eezi alubo tabazichiti pe. Pesi kuti twayeeyesesya atala ambukugwasya kuzichita zintu eezi, zipa kuti tuzichite. Munzila iikozyenie, kulakonzeka kuti tulizi kuti kuswena aafwiifwi aJehova kulagwasya, pesi kuti twayeeyesesya atala abubotu buba akaambo kakuswena aafwiifwi anguwe, zilakonzya kupa kuti twiinkilile kunembo katuswena aafwiifwi aMweenzuma Jehova.—Int. 119:27-30.
4. Muli Intembauzyo 73:28, sintembawuzyo wakatyeni?
4 Bala Intembauzyo 73:28. Mulembi wa Intembauzyo 73 wakali muLevi alubo wakasalidwe kuti abeleke kali mwiimbi mutempele lyaJehova. Kulakonzeka kuti wakakomba Jehova kasyomeka kwachiindi chilamfu. Nikuba oobo, wakachili kukubona kakuyandikana kuti we abamwi ‘baswene kuli Leza.’ Mbuubuli bubotu bwakuchita oobo?
“KUSWENA KULI LEZA” KUPA KUTI TUBOTELWE
5. (a) Nkamboonzi kuswena kuli Leza nikupa kuti tubotelwe? (b) Kweendelana alugwalo lwa Tusimpi 2:6-16, amba zikozyano zitondeezya busongo bwaJehova mbubukonzya kukugwasya ambubukonzya kukukwabilila.
5 Kuti twaswena aafwiifwi aJehova, tulabotelwa. (Int. 65:4) Kuli twaambo twiingi tupa kuti tubotelwe. Kamwi kaambo nkakuti, ikuti twabelesya busongo buzwa muJwi lyaLeza Bbayibbili, nga twagwasikana. Busongo oobo bulatukwabilila kuti tutapambanisigwi aabantu batali kabotu akuti tutachiti zibi zipati. (Bala Tusimpi 2:6-16.) Bbayibbili lyaamba kuti: “Ulikkomene muntu ooyo uujana busongo ayooyo uulijanina bupampu.”—Tus. 3:13.
6. Niinzi zyakapa kuti sintembawuzyo atachibotelwi?
6 Nikuba beenzinyina baJehova chimwi chiindi ambabo nga bakataazikana. Maboneno aatali kabotu akapa kuti mulembi wa Intembauzyo 73 atachibotelwi pe. Wakasaanguna kuyeeya kuti bantu bakatali kuchita zintu zilikabotu bakali kupona buumi bulikabotu, nikuba kuti teebakali kuswiilila milawu yaLeza pe. Eezi zyakapa kuti sintembawuzyo akataazikane loko zyakuti wakayeeya kuti achite nzibakali kuchita bantu aabo. Sintembawuzyo ooyo wakasika mpayeeya kuti bantu basinkondo alubo basikulisumpula, bakalinotede, bakalineneede akuti teebakali kuswaana mapenzi pe. (Int. 73:3-7, 12) Sintembawuzyo wakakataazikana loko zyakuti wakayeeya kuti, kukomba Jehova teekwakachili kugwasya pe. Naakakataazikene, wakaamba kuti: “Masimpe ndaile kulipenzya buyo kusalazya moyo wangu akusamba kumaanza kutondezya kuti ndinyina mulandu.”—Int. 73:13.
7. Chiindi nitukataazikene, niinzi nzitweelede kuchita? (Langa chifanikisyo chili aachivumbyo.)
7 Sintembawuzyo ooyu taakalekela kuti kukataazikana kumumane manguzu pe. Wakabweza ntaamu. ‘Wakanjila mucikombelo ca Leza cipati,’ alubo Jehova wakamululamika maboneno aakwe aatali kabotu. (Int. 73:17-19) Chiindi nitukataazikene, Jehova Mweenzuma wiinda beenzuma boonse, nga ulizibwene. Kuti twakomba katukumbila kuti atuzulwide, mpawo twazumina kuti atugwasye kabelesya Jwi lyakwe abakwesu abachizi bamumbungano, tulakonzya kujana manguzu aakuti tulisimye nitukataazikene. Nikuba chiindi zintu zilikupa kuti tukataazikane nizituzundide, Jehova ulatuumbulizya akutubatamika.—Int. 94:19.a
MuLevi wakalemba Intembauzyo 73, uliimvwi “mucikombelo ca Leza cipati” (Langa fuka 7)
“KUSWENA KULI LEZA” KUPA KUTI TUBE AAMAKANZE ABULANGILIZI
8. Kuswena aafwiifwi aLeza kutugwasya biyeni?
8 Kuswena aafwiifwi aLeza kulagwasya muzintu zibili ziyandikana. Chakusaanguna, kupa kuti tube aabuumi bulikabotu akuti tube aabweenzuma buli aafwiifwi aLeza lino. Alubo tulakonzya kuba aabulangilizi bwakuti zintu nzitwakasyomezegwa muchiindi chilikunembo zizoochitika chachoonzyo. (Jer. 29:11) Kwalino, atuzilange-lange zintu eezi.
9. Kuswena aafwiifwi aJehova kutugwasya biyeni kuti tuzibe nchituponena?
9 Kuswena aafwiifwi aJehova kupa kuti tuzibe nchituponena. Bantu biingi mazubaano batasyomi pe kuti Leza mpali, babonaanga taakwe nzituponena pe akuti bantu boonse bazoofwa muchiindi chili kunembo. Nikuba oobo, iswe twakayiya kasimpe kali muJwi lyaLeza alubo twakaba aachoonzyo chakuti Leza “mpali akuti ngusikubapa bulumbu aabo bamuyanduula aamoyo woonse.” (Heb. 11:6) Nikuba mazubaano, tulikubotelwa mubuumi akaambo kakuti tulikuchita zintu nzitwakalengelwa kuti tuchite, kukomba Taateesu wakujulu, Jehova.—Dt. 10:12, 13.
10. Jehova ubasyomezyaanzi aabo bamusyoma? (Intembauzyo 37:29)
10 Bantu biingi, tabakwe bulangilizi pe atala abuumi bulikunembo. Babikkila maanu kukubeleka, kukwata naakuti kukwatwa, kuba aabana akulibambila mbubatazoojane ziyandikana nibazoochembaala. Tabazizi zisyomezyo zyaLeza zili atala abuumi bulikunembo. Pesi bakombi baJehova, balizi kuti Jehova ulabalangania. (Int. 25:3-5; 1 Tim. 6:17) Tulamusyoma Leza wesu alubo Mweenzuma. Tulizi kuti uzoozichita nzyaakatusyomezya. Tulangilila zintu zyiingi zibotu, kapati kuzoomukomba kukabe kutamani muParadayizi.—Bala Intembauzyo 37:29.
11. Mbuubuli bubotu buba kuti twaswena aafwiifwi aLeza alubo eezi zipa kuti amvwe biyeni?
11 Kuswena aafwiifwi aLeza kulatugwasya munzila zyiingi. Muchikozyano, Jehova usyomezya kuti ulabalekelela basizibi basanduka baswena aafwiifwi anguwe. (Is. 1:18) Eezi nga zyapa kuti tutasyaali katulipa mulandu akaambo kazibi nzitwakachita chiindi. (Int. 32:1-5) Alubo nga twabotelwa akaambo kakuti ngatwapa kuti Jehova abotelwe. (Tus. 23:15) Tulakonzya kuyeeya atala azintu zyiingi zibotu nzitujana akaambo kakuba aabweenzuma buli aafwiifwi aLeza. Pesi niinzi nzitukonzya kuchita kuti tukkale katuli aafwiifwi aLeza?
MBUTUKONZYA KWIINKILILA KUNEMBO “KUSWENA KULI LEZA”
12. Wakachitaanzi kuti uswene aafwiifwi aLeza?
12 Kuti kuli muKkristu uubbabbatizidwe, wakachita zintu zyiingi kuti uswene aafwiifwi aJehova. Wakayiya kasimpe atala aJehova Leza aKkristu Jesu. Wakasanduka kuzibi zyako, wakatondeezya lusyomo lusimide muli Leza alubo wakasungwaala kukuchita kuyanda kwakwe. Kuti tuswene aafwiifwi aLeza, tweelede kwiinkilila kunembo katuchita zintu eezi.—Kol. 2:6.
13. Nziizili zintu zitatu zikonzya kutugwasya kuti twiinkilile kunembo katuswena aafwiifwi aJehova?
13 Niinzi ziyootugwasya kuti twiinkilile kunembo katuswena aafwiifwi aJehova? (1) Tweelede kwiinkilila kunembo katubala Bbayibbili akuyanduulisisya. Chiindi nituchita zintu eezi, tatweelede kugolela aakuziba kasimpe kupela atala aLeza, pesi tweelede kweezya kuti tumvwisisisye kuti Leza uyanda kuti tuchiteenzi alubo tuzulwidwe aamalayilile aali muJwi lyakwe. (Ef. 5:15-17) (2) Tweelede kusimya lusyomo lwesu kwiinda mukuyeeyesesya atala abukamboni butondeezya mbatuyanda Leza. (3) Tweelede kwiinkilila kunembo kuzonda zintu nzyatayandi Jehova alubo tutantamuke kumvwanana aabantu bachita zintu eezyo.—Int. 1:1; 101:3.
14. Kweendelana a 1 Bakkorinte 10:31, nziizili zimwi zintu nzitweelede kuchita buzuba abuzuba zibotezya Jehova? (Langa zifanikisyo.)
14 Bala 1 Bakkorinte 10:31. Kulayandikana kuti tubeleke changuzu kuti tuchite zintu zibotezya Jehova. Eezi zyaamba kuti tweelede kuchita zyiingi, kutali kugolela aakukambawuka akunjila miswaangano kupela. Michito iibotezya Jehova iswaanizya zintu nzituchita buzuba abuzuba. Muchikozyano, kuti twasyomeka muzintu zyoonse alubo twaabana aabamwi nzitulaazyo nga twabotezya Jehova. (2 Kor. 8:21; 9:7) Alubo Jehova uyanda kuti tutondeezye kuti tulachilemeka chipo chabuumi. Tuswena aafwiifwi aMulengi wesu kwiinda mukuziba aakugolela kunkani yakulya akunywa amukwiijata kabotu mibili yesu. Kufumbwa zintu nzituchita kuti tubotezye Jehova nikuba zibonekaanga nziniini, zilayandikana kulinguwe.—Lk. 16:10.
Kudilayiva kabotu, kulilangania kabotu kwiinda muku-ekisesayiza, kulya chakulya chiyaka mubili akwaabilana aabamwi, nziizimwi nzila zikonzya kupa kuti tubotezye Jehova (Langa fuka 14)
15. Jehova ulangilila kuti tubajate biyeni bamwi?
15 Jehova ubajata munzila yaluzyalo bantu baluleme abataluleme. (Mt. 5:45) Alubo ulangilila kuti andiswe tubajate munzila eeyi bamwi. Muchikozyano, tatweelede ‘kwaambuula zintu zibi kumuntu woonse, tutabusyi nkondo, . . . tutondeezye kuti tuli aamoyo uubombede kubantu boonse.’ (Tit. 3:2) Katuli aamuzeezo nguyooyu, tatweelede kubalangilaansi pe bamwi akaambo kakuti tabasyomi zintu nzitusyoma. (2 Tim. 2:23-25) Tuswena aafwiifwi aJehova kwiinda mukukkala katubajata munzila yaluzyalo bantu boonse.
TULAKONZYA “KUSWENA KULI LEZA” NIKUBA NITWALEBWA
16. Mulembi wa Intembauzyo 73 wakasaanguna kumvwa biyeni naakali waba aachiindi kabelekela Jehova?
16 Chimwi chiindi, ulakonzya kubonaanga Jehova tali aafwiifwi pe anduwe akaambo kakuti kuli zimwi zintu nzwaakapambanisya. Mbuli mbutwabona mumafuka aayinda, anguwe mulembi wa Intembauzyo 73 zyakamuchitikila eezi. Wakaamba kuti: “Lino mebo, maulu aangu akatiileye; maulu aangu akatiitezemuke.” (Int. 73:2) Wakazumina kuti ‘wakanyema’ akuti ‘taakacili kuyeeya kabotu’ “mbuli munyama uutayeeyi” kunembo lyaJehova. (Int. 73:21, 22) Kupambanisya nkwaakachita kwakapa kuti abonaanga Jehova tachimuyandi na naakuti takoomulekelela pe?
17. (a) Chiindi naakamanide manguzu sintembawuzyo, kuyeeyelwa kuti niinzi nzyaakachita? (b) Twiiyaanzi kuli zyakamuchitikila? (Langa zifanikisyo.)
17 Kuti sintembawuzyo wakali wayeeya kuti Jehova wamukaka, kulakonzeka kuti wakalimvwa oobo kwachiindi chifwiifwi. Alubo kuyeeyelwa kuti naakamanide manguzu loko, wakayeeya kuti wakeelede kuswena aafwiifwi aLeza mbuli mbaakaamba, naakaamba kuti: “Pele lino ndilaanduwe ciindi coonse; wandijatilila kujanza lyangu lyalulyo. Ulandisololela alulayo lwako, mpoonya kumbele uyoondisisya kubulemu.” (Int. 73:23, 24) Andiswe, tweelede kulangila kuli Jehova kuti atusimye chiindi nitumanide manguzu naakuti nitukataazikene. (Int. 73:26; 94:18) Nikuba kuti twaleya kwachiindi chifwiifwi, tulakonzya kubweeda kuli Jehova katuli aachoonzyo chakuti “ulilibambilide kulekelela zibi.” (Int. 86:5) Tweelede kuswena aafwiifwi aLeza kapati chiindi nitumanide manguzu.—Int. 103:13, 14.
Kuti twalimvwa katuyobutontola mubukombi, tweelede kuswena aafwiifwi aJehova kwiinda mukuba aazintu zyiingi zyakuchita mubukombi (Langa fuka 17)
KKALA “KUSWENA KULI LEZA” KUKABE KUTAMANI
18. Nkamboonzi kuswena aafwiifwi aJehova nikutagoli?
18 Kuswena aafwiifwi aJehova akumuziba kabotu takugoli pe. Bbayibbili lyaamba kuti nzila zyakwe, busongo bwakwe aluzyalo lwakwe “tazitobelezeki pe.”—Rom. 11:33.
19. Majwi aali muli Intembauzyo atusyomezyaanzi?
19 Intembauzyo 79:13 yaamba kuti: “Swebo, tobantu bako alimwi tobutanga bwamumacelelo aako, tunookulumba lyoonse mane kukabe kutamani; alimwi tunookutembaula kumazyalani oonse.” Anduwe ulakonzya kujana zilongezyo zitamani kuti wayinkilila kunembo kuswena aafwiifwi aLeza. Alubo ulakonzya kwaamba kuti: “Leza nindomba yamoyo wangu alimwi ncaabilo cangu lyoonse mane kukabe kutamani.”—Int. 73:26.
LWIIMBO 32 Amube Kulubazu lwa Jehova!
a Bantu balaapenzi lyakukataazikana zyiindilide, balakonzya kujana lugwasyo kuli dokotela. Kuti ujane makani miingi, langa Ngaziyakulinda, No. 1 2023.