Matayo
3 Kumazuba aayo Johane+ Mubbapatizi wakaboola akukambauka+ munkanda ya Judaya 2 kuti: “Amweempwe, nkaambo Bwami bwakujulu bwaswena afwaafwi.”+ 3 Ooyu mubwini ngonguwe wakaambwa kwiinda mumusinsimi Isaya+ mumajwi aaya aakuti: “Kulimvwisya jwi lyamuntu woompolola munkanda kuti: ‘Amubambe nzila ya Jehova!* Amululamike migwagwa yakwe.’”+ 4 Lino Johane wakali kusama cisani caboya bwankamela alutambo lwacipaya mucibuno.+ Cakulya cakwe cakali cikwikwi abuci.+ 5 Mpoonya bantu bamu Jerusalemu amu Judaya moonse amuminzi yoonse yeengelede Jordano bakali kuunka kulinguwe,+ 6 eelyo wakali kubabbapatizya* mu Mulonga wa Jordano,+ kabalyaambilila zibi zyabo antangalala.
7 Naakabona ba Farisi aba Saduki+ banji kababoola kubusena nkwaakali kubbapatizyila, wakabaambila kuti: “Nywebo nobana babacipile,+ nguni wamucenjezya kuti mutije bukali buboola?+ 8 Aboobo amuzyale micelo yeendelana akweempwa kwanu. 9 Mutalyeeni kwiinda mukwaamba kuti, ‘Abrahamu ngutaateesu.’+ Nkaambo ndimwaambila kuti Leza ulakonzya kumupa bana Abrahamu kuzwa kumabwe aaya. 10 Keembe kali kale kumiyanda yazisamu. Aboobo cisamu cili coonse citazyali micelo mibotu cilagonkwa akusowelwa mumulilo.+ 11 Mebo ndimubbapatizya amaanzi akaambo kakweempwa kwanu,+ pele ooyo uuboola munsi lyangu ulaanguzu kwiinda ndime, walo ngonditeeleli kusamununa mpato.+ Ooyo uyoomubbapatizya amuuya uusalala+ amulilo.+ 12 Cipupuluzyo cakwe cili mujanza lyakwe eelyo uyoolusalazya cakumaninina lubuwa lwakwe lwakuumina maila akuyobola wiiti wakwe mubutala, pele buungu uyoobuumpa mumulilo+ uutakonzyi kuzimwa.”
13 Lino Jesu wakazwa ku Galilaya akuunka ku Jordano kuli Johane kutegwa akabbapatizyigwe kulinguwe.+ 14 Pele Johane wakasola kumukasya kaamba kuti: “Nduwe weelede kundibbapatizya, nkaambo nzi ncoboola kulindime?” 15 Jesu wakamwiingula kuti: “Akube boobu lino, nkaambo tuleelede kucita oobo kutegwa tucite zintu zyoonse ziluleme.” Eelyo wakaleka kumukasya. 16 Lino naakamana kubbapatizyigwa, Jesu wakazwa mumaanzi; mpoonya julu lyakajaluka,+ eelyo wakabona muuya wa Leza ulaseluka mbuli nziba akuboola alinguwe.+ 17 Alimwi kwakamvwugwa jwi kujulu+ lyakaamba kuti: “Ooyu Mwanaangu+ ngweyandisya, ngwekkomanina.”+