LEVITIKO

1 Lino Jehova wakaita Musa akwaambaula anguwe mutente lyakuswaanganina+ kati: 2 “Waambaule abana Israyeli akubaambila kuti, ‘Ikuti umwi akati kanu kayanda kuleta cituuzyo kuli Jehova akati kabanyama bavwubwa, weelede kuleta ŋombe, mbelele naa mpongo.+

3 “‘Ikuti cituuzyo cakwe cuumpwa niŋombe, yeelede kuba mupoho uutajisi kampenda.+ Weelede kumutuula cakuliyandila+ kubusyu bwa Jehova kumulyango watente lyakuswaanganina. 4 Weelede kubikka janza lyakwe amutwe wamunyama wacituuzyo cuumpwa, eelyo ciyootambulwa kutegwa cimanye milandu yakwe.

5 “‘Mpoonya mupoho uucili mwana ooyo weelede kujaigwa kubusyu bwa Jehova, eelyo bana ba Aroni, ibapaizi,+ bayoobweza bulowa akubusansaila mumabazu oonse aacipaililo,+ icili kumulyango watente lyakuswaanganina. 6 Cituuzyo cuumpwa ceelede kufwundwa akutendaulwa muzibeela-beela.+ 7 Bana ba Aroni, ibapaizi, beelede kubikka mulilo acipaililo+ akubamba nkuni atala aamulilo. 8 Bana ba Aroni, ibapaizi, bayoozibikka kabotu-kabotu zibeela eezyo zyacituuzyo,+ nkokuti mutwe amafwuta* amulilo uuli acipaililo. 9 Bula amyeendo yancico zyeelede kusanzyigwa amaanzi, eelyo bapaizi beelede kuzyuumpa zyoonse acipaililo kazili cituuzyo cuumpwa amulilo icili aabweema bununkilila kuli Jehova.+

10 “‘Ikuti cituuzyo cakwe cuumpwa kacili mugutu naa mujembwe uucili mwana,+ weelede kuti katajisi kampenda.+ 11 Weelede kujaigwa kulubazu lwakunyika lwacipaililo kubusyu bwa Jehova, alimwi bana ba Aroni, ibapaizi, bayoosansaila bulowa mumabazu oonse aacipaililo.+ 12 Uyoomutendaula muzibeela-beela antoomwe amutwe amafwuta,* mpoonya mupaizi uyoomubikka atala aamulilo uuli acipaililo. 13 Mpoonya bula amyeendo ziyoosanzyigwa amaanzi, eelyo mupaizi uyoozyuumpa zyoonse acipaililo. Ncituuzyo cuumpwa amulilo icili aabweema bununkilila kuli Jehova.

14 “‘Nokuba boobo, ikuti naa waleta bayuni kuba cituuzyo cuumpwa kuli Jehova, nkokuti beelede kuba nziba naa bana bankwilimba.+ 15 Mpoonya mupaizi weelede kuleta cituuzyo eeco acipaililo akucikosola mutwe akucuumpa acipaililo, pele bulowa bwaco bweelede kutilwa kumbali aacipaililo. 16 Weelede kugwisya ciyangilo amapepe akuzisowa kumbali aacipaililo kulubazu lwakujwe, kubusena busowelwa mulota.*+ 17 Lino weelede kucaandula mpaaswaanganina mababa, pele tayelede kucitenda muzibeela zyobilo. Mpoonya mupaizi weelede kucuumpa aamulilo wankuni uuyaka aacipaililo. Ncituuzyo cuumpwa amulilo icili aabweema bununkilila kuli Jehova.

2 “‘Lino ikuti naa muntu umwi watola cituuzyo camaila+ kuli Jehova, cituuzyo cakwe ceelede kuba fulaulu mubotu kapati, alimwi weelede kutila mafwuta akubikka tununkilizyo alinguwo.+ 2 Mpoonya weelede kucileta kubana ba Aroni, ibapaizi, kumane mupaizi weelede kubweza fulaulu mubotu kapati uuzula janza, mafwuta atununkilizyo twayo toonse, alimwi weelede kuwuumpa acipaililo kuti ube cituuzyo caciibalusyo,+ ube cituuzyo cuumpwa amulilo icili aabweema bununkilila kuli Jehova. 3 Kufwumbwa casyaala kucituuzyo camaila ncica Aroni abana bakwe,+ ncintu cisetekene kapati+ icizwa kuzituuzyo zya Jehova zyuumpwa amulilo.

4 “‘Ikuti naa waleta cituuzyo camaila capangilwa mucitofwu, ceelede kuba cafulaulu, zinkwa zibunge zitajisi bumena izijisi kapulo akati alimwi zikandidwe amafwuta naa tunkwa tupapalete tutakwe bumena tunanikidwe mafwuta.+

5 “‘Ikuti cituuzyo cako kacili cituuzyo camaila aakangidwe mucikangilo,+ ceelede kuba cafulaulu uutajisi bumena uukandidwe amafwuta. 6 Ceelede kukomaunwa muzibeela-beela, alimwi weelede kutila mafwuta alincico.+ Ncituuzyo camaila.

7 “‘Ikuti cituuzyo cako kacili cituuzyo camaila capangilwa mumpani, ceelede kupangwa afulaulu amafwuta. 8 Weelede kuleta cituuzyo camaila cakapangilwa Jehova kuzwa kuzintu eezyi, ceelede kuletwa kumupaizi walo uuyoocileta munsi-munsi acipaililo. 9 Mupaizi uyoobweza cituuzyo cimwi camaila kacili cituuzyo caciibalusyo+ akucuumpa acipaililo kacili cituuzyo cuumpwa amulilo cili abweema bununkilila kuli Jehova.+ 10 Icasyaala kucituuzyo camaila ncica Aroni abana bakwe, ncintu cisetekene kapati cizwa kuzituuzyo zya Jehova zyuumpwa amulilo.+

11 “‘Taakwe cituuzyo camaila ncomuyoopa kuli Jehova icijisi bumena,+ nkaambo tamweelede kuumpa fulaulu uujisi bumena naa buci kacili cituuzyo cuumpwa kuli Jehova.

12 “‘Mulakonzya kuzipa eezyo kuli Jehova mbuli cituuzyo camicelo mitaanzi,+ pele tazyeelede kuletwa kucipaililo kuti zibe bweema bununkilila.

13 “‘Cituuzyo canu camaila cili coonse mweelede kucilunga munyo; alimwi cituuzyo canu camaila taceelede kubula munyo wacizuminano canu a Leza. Muzituuzyo zyanu zyoonse mweelede kubikkilizya amunyo.+

14 “‘Ikuti mwapa cituuzyo camaila camicelo mitaanzi kuli Jehova, mweelede kupa maila matete aayokedwe mumulilo, aatwidwe, kaali cituuzyo camaila camicelo yanu mitaanzi.+ 15 Mweelede kucibikka mafwuta atununkilizyo. Ncituuzyo camaila. 16 Mupaizi uyakuumpa ciibalusyo caco,+ nkokuti, maila amwi aatwidwe alimwi amafwuta kubikkilizya atununkilizyo twaco toonse, kacili cituuzyo cuumpwa amulilo kuli Jehova.

3 “‘Ikuti naa cituuzyo cakwe kacili cipaizyo calumvwano*+ alimwi ikuti kaili ŋombe, mupoho naa mpwizi, weelede kutuula yeeyo iitajisi kampenda kuli Jehova. 2 Weelede kubikka janza lyakwe amutwe wayo, alimwi yeelede kujaigwa kumulyango watente lyakuswaanganina; eelyo bana ba Aroni, bapaizi, beelede kusansaila bulowa mumabazu oonse aacipaililo. 3 Uyootuula cibeela cimwi cacipaizyo calumvwano kacili cituuzyo cuumpwa kuli Jehova:+ imafwuta+ oonse aavwumbilide bula, aazingulukide bula, 4 ansa zyobilo amafwuta aali kulinzizyo. Alimwi uyakwaagwisya mafwuta aakumuni antoomwe ansa.+ 5 Bana ba Aroni bayakwaaumpa kutegwa asuke busi acipaililo atala aacituuzyo cuumpwa icili amulilo;+ ncituuzyo cuumpwa icili aabweema bununkilila kuli Jehova.+

6 “‘Ikuti cipaizyo cakwe calumvwano ncatuula kuli Jehova kaili mbelele naa mpongo, weelede kutuula mujembwe naa mpwizi iitajisi kampenda.+ 7 Ikuti naa watuula mugutu uucili mwana, weelede kumutuula kubusyu bwa Jehova. 8 Uyoobikka janza lyakwe amutwe wambelele eeyo, alimwi iyoojaigwa kumbele lyatente lyakuswaanganina. Bana ba Aroni bayoosansaila bulowa mumabazu oonse aacipaililo. 9 Uyootuula mafwuta aacipaizyo calumvwano kaali cituuzyo cuumpwa kuli Jehova.+ Uyoogwisya mucila woonse uuli amafwuta, uyakuukosweda munsi aamoongolola, alimwi uyoogwisya amafwuta aavwumbilide bula, oonse aazingulukide bula, 10 ansa zyobilo amafwuta aali kulinzizyo. Alimwi uyakwaagwisya mafwuta aakumuni antoomwe ansa.+ 11 Eelyo mupaizi uyakwaaumpa kutegwa asuke busi acipaililo kacili cakulya,* nkokuti icituuzyo cuumpwa kuli Jehova.+

12 “‘Ikuti cituuzyo cakwe kaili mpongo, weelede kwiituula kubusyu bwa Jehova. 13 Uyoobikka janza lyakwe amutwe wampongo eeyo, alimwi iyoojaigwa kumbele lyatente lyakuswaanganina, eelyo bana ba Aroni beelede kusansaila bulowa mumabazu oonse aacipaililo. 14 Cibeela ncayootuula mbuli cituuzyo cuumpwa kuli Jehova, mafwuta aavwumbilide bula,+ 15 ansa zyobilo amafwuta aali kulinzizyo. Alimwi uyakwaagwisya mafwuta aakumuni antoomwe ansa. 16 Mupaizi uyakwaaumpa kutegwa asuke busi acipaililo kacili cakulya,* icituuzyo cuumpwa icili aabweema bununkilila. Mafwuta oonse nga Jehova.+

17 “‘Ooyu mulawo walyoonse mumazyalani aanu, mumasena oonse momunookkala: Tamweelede abuniini kulya mafwuta naa bulowa+ buli boonse pe.’”

4 Mpoonya Jehova wakaambila Musa kuti: 2 “Ubaambile bana Israyeli kuti, ‘Ikuti naa umwi muntu wabisya cakutazyiba+ kwiinda mukucita cimwi cazintu eezyo Jehova nzyaakamulailila kuti tazyeelede kucitwa, mboobu mbomweelede kucita:

3 “‘Ikuti mupaizi uunanikidwe+ wabisya+ akuletela bantu cibi, nkokuti weelede kuleta mupoho uucili mwana uutajisi kampenda kuti abe cituuzyo cazibi kuli Jehova akaambo kacibi cakwe.+ 4 Weelede kuleta mupoho kumulyango watente lyakuswaanganina+ kubusyu bwa Jehova akubikka janza lyakwe amutwe wamupoho ooyo, eelyo weelede kumujaya kubusyu bwa Jehova.+ 5 Mpoonya mupaizi uunanikidwe+ uyoobweza bulowa bwamupoho bumwi akubunjizya mutente lyakuswaanganina; 6 eelyo mupaizi uyootompa munwe wakwe mubulowa+ akubusansaila ziindi zili ciloba+ kubusyu bwa Jehova kumbele lyacisitilizyo cabusena busalala. 7 Mupaizi uyoolamba bulowa bumwi kumeja aacipaililo catununkilizyo+ kubusyu bwa Jehova, icili mutente lyakuswaanganina; eelyo bulowa bwamupoho boonse ibwasyaala uyoobutila ansi aacipaililo cazituuzyo zyuumpwa,+ icili kumulyango watente lyakuswaanganina.

8 “‘Mpoonya uyoogwisya mafwuta oonse aamupoho wacituuzyo cazibi kubikkilizya amafwuta aavwumbilide bula, 9 ansa zyobilo amafwuta aali kulinzizyo. Alimwi uyakwaagwisya mafwuta aakumuni antoomwe ansa.+ 10 Uyoozigwisya mbubonya mbwagwisya zili kumupoho wacipaizyo calumvwano.+ Alimwi mupaizi uyoozyuumpa kuti zisuke busi acipaililo cazituuzyo zyuumpwa.

11 “‘Pele cikutu camupoho, nyama yoonse, mutwe, myeendo, bula alimwi abufwusi+– 12 azibeela zimbi zyoonse zyamupoho–uyoozitola anze aankambi kubusena busalala ooko kusowelwa mulota,* alimwi uyoozyuumpa amulilo wankuni.+ Zyeelede kuumpilwa kooko kusowelwa mulota.

13 “‘Lino ikuti mbungano yoonse yabana Israyeli yabisya cakutazyiba,+ pele tiiyakazyi kuti yakacita cintu Jehova ncaakalailila kuti tabeelede kucita,+ 14 eelyo cibi eeco cazyibwa, mbungano yeelede kupa mupoho uucili mwana wacituuzyo cazibi akumuleta kutente lyakuswaanganina. 15 Baalu bambungano bayoobikka maanza aabo amutwe wamupoho kubusyu bwa Jehova, eelyo mupoho ooyo uyoojaigwa kubusyu bwa Jehova.

16 “‘Mpoonya mupaizi munanike uyoobweza bulowa bwamupoho bumwi akubunjizya mutente lyakuswaanganina. 17 Eelyo mupaizi uyootompa munwe wakwe mubulowa akubusansaila ziindi zili ciloba kubusyu bwa Jehova kumbele lyacisitilizyo.+ 18 Uyoolamba bulowa bumwi kumeja aacipaililo+ icili kubusyu bwa Jehova, icili mutente lyakuswaanganina; eelyo bulowa boonse bwasyaala uyoobutila ansi aacipaililo cazituuzyo zyuumpwa, icili kumulyango watente lyakuswaanganina.+ 19 Uyakwaagwisya mafwuta oonse akwaaumpa kuti asuke busi acipaililo.+ 20 Uyoozigwisya mbubonya mbwaakagwisya zili kumupoho wacituuzyo cazibi. Oobu mbwayoocita akumupoho ooyu, alimwi mupaizi uyoomanya milandu yabo,+ eelyo bayoolekelelwa. 21 Uyootola mupoho anze aankambi akumuumpa, mbubonya mbwaakacita kumupoho wakusaanguna.+ Ncituuzyo cazibi cambungano.+

22 “‘Ikuti silutwe+ wabisya cakutazyiba kwiinda mukucita cintu Jehova Leza wakwe ncaalailila kuti taceelede kucitwa, 23 naa wazyiba cibi ncaacita kwiinda mukutyola mulawo, nkokuti weelede kuleta kajembwe katajisi kampenda kakali cituuzyo. 24 Uyoobikka janza lyakwe amutwe wakajembwe aako akukajaila kubusena ooko munyama wacituuzyo cuumpwa nkwajailwa lyoonse kubusyu bwa Jehova.+ Ncituuzyo cazibi. 25 Mupaizi uyootompa bulowa bwacituuzyo cazibi amunwe wakwe akubulamba kumeja+ aacipaililo cazituuzyo zyuumpwa, eelyo bulowa boonse bwasyaala uyoobutila ansi aacipaililo cazituuzyo zyuumpwa.+ 26 Uyakuumpa mafwuta oonse aakajembwe kuti asuke busi acipaililo mbubonya mbuli mafwuta aacipaizyo calumvwano;+ alimwi mupaizi uyoomanya milandu yakwe, eelyo uyoolekelelwa.

27 “‘Ikuti muntu uuli woonse wabisya cakutazyiba akuba amulandu kwiinda mukucita cintu Jehova ncaalailila kuti taceelede kucitwa,+ 28 naa wazyiba cibi ncaacita, weelede kuleta cituuzyo cakwe, nkokuti kapongo kapwizi katajisi kampenda akaambo kacibi ncaacita. 29 Uyoobikka janza lyakwe amutwe wakapongo aako kacituuzyo cazibi akukajaila kubusena nkukonya ooko munyama wacituuzyo cuumpwa+ nkwajailwa lyoonse. 30 Mupaizi uyootompa bulowa amunwe wakwe akubulamba kumeja aacipaililo cazituuzyo zyuumpwa, eelyo bulowa boonse bwasyaala uyoobutila ansi aacipaililo+ cazituuzyo zyuumpwa. 31 Uyakwaagwisya mafwuta oonse+ mbubonya mbokucitwa kucipaizyo calumvwano,+ alimwi mupaizi uyakwaaumpa kuti asuke busi acipaililo kutegwa bube bweema bununkilila kuli Jehova; alimwi mupaizi uyoomanya milandu yakwe, eelyo uyoolekelelwa.

32 “‘Pele naa cituuzyo cakwe cazibi ncaaleta mwanaambelele, weelede kuleta mpwizi iitajisi kampenda. 33 Uyoobikka janza lyakwe amutwe wamunyama ooyo wacituuzyo cazibi akumujaila kubusena ooko munyama wacituuzyo cuumpwa nkwajailwa lyoonse.+ 34 Mupaizi uyookombola bulowa bwacituuzyo cazibi amunwe wakwe akubulamba kumeja aacipaililo cazituuzyo zyuumpwa,+ eelyo bulowa boonse bwasyaala uyoobutila ansi aacipaililo cazituuzyo zyuumpwa. 35 Uyakwaagwisya mafwuta oonse mbubonya mafwuta aamugutu uucili mwana wacipaizyo calumvwano mbwaagwisyigwa lyoonse, alimwi mupaizi uyakwaaumpa kuti asuke busi acipaililo kuyungizya azituuzyo zyuumpwa zya Jehova;+ kumane mupaizi uyoomanya milandu yakwe, eelyo uyoolekelelwa.+

5 “‘Ikuti muntu wabisya mukuti tanaamba cibi ncaakacita muntu umwi, ciindi naamvwa kwaambilizya kubuleya kwakuti muntu umwi acitile bumboni*+ kukaambo aaka, kakuli mubwini walo ngukamboni naa wakalibonena ameso naa kuli ncazyi kujatikizya cibi eeco, nkokuti uyoosubulwa akaambo kamulandu wakwe.

2 “‘Naa muntu waguma cintu cisofweede, kufwumbwa naa munyama uufwide wamusyokwe, munyama uuvwubwa naa cimwi cazilenge zyeenda mubunji,+ ulasofwaala alimwi ulaamulandu, nokuba kuti waciguma katazyi. 3 Naa ikuti cakutazyiba muntu waguma cintu cili coonse cisofweede cizwa kumuntu+–kufwumbwa cintu cisofweede cikonzya kumusofwaazya–alimwi wazyiba kuti wakaguma cintu cisofweede, nkokuti ulaba amulandu.

4 “‘Naa kuti muntu wakonka cakubinda kuti ulacita cintu cimwi–cibotu naa cibi, kufwumbwa naa ncinzi–alimwi tanaakazyi, pele lino wazyiba kuti wakakonka cakubinda, ulaba amulandu.*+

5 “‘Ikuti waba amulandu kujatikizya cimwi cazintu eezyi, weelede kulyaambilila+ mbwaakabisya. 6 Alimwi uyooleta cituuzyo camilandu kuli Jehova kucibi ncaakacita,+ nkokuti kabelele naa kapongo kapwizi, kuti cibe cituuzyo cazibi. Mpoonya mupaizi uyoomanya mulandu wacibi cakwe.

7 “‘Ikuti katacikonzyi kuleta mbelele, nkokuti weelede kuletela Jehova nziba zyobilo naa bana bankwilimba bobilo+ cibe cituuzyo camilandu kucibi ncaakacita, yomwe njacituuzyo cazibi, eelyo iimbi njacituuzyo cuumpwa.+ 8 Weelede kuzileta kumupaizi, walo uyoosaanguna kutuula yeeyo yacituuzyo cazibi alimwi akwiitenda amoyo, pele mutwe kataukoswedi limwi. 9 Uyoosansaila bulowa bumwi bwacituuzyo cazibi mumabali aacipaililo, pele bulowa bwasyaala bweelede kutilwa ansi aacipaililo.+ Ncituuzyo cazibi. 10 Pele yabili uyakwiituula mbuli cituuzyo cuumpwa kweelana acilengwa;+ alimwi mupaizi uyoomanya milandu yakwe kucibi ncaakacita, eelyo uyoolekelelwa.+

11 “‘Lino kuti katakonzyi kujana nziba zyobilo naa bana bankwilimba bobilo, nkokuti weelede kuleta cipaanzi cakkumi caefa*+ cafulaulu mubotu kacili cituuzyo cazibi kucibi ncaakacita. Tayelede kubikka mafwuta naa tununkilizyo kulincico, nkaambo ncituuzyo cazibi. 12 Uyoocileta kumupaizi, alimwi mupaizi weelede kubweza fulaulu uukkwana mujanza kuti ube ciibalusyo akuwuumpa kuti usuke busi acipaililo atala aazituuzyo zya Jehova zyuumpwa. Ncituuzyo cazibi. 13 Mupaizi uyoomanya cibi muntu ooyo ncaakacita, icibi cili coonse akati kazibi eezyi, aboobo uyoolekelelwa.+ Cituuzyo casyaala ciyooba camupaizi+ mbubonya mbuli cituuzyo camaila.’”+

14 Jehova wakazumanana kwaambila Musa kuti: 15 “Kuti naa muntu wabisya cakutazyiba kuzintu zisalala zya Jehova,+ weelede kuleta mugutu uutajisi kampenda kacili cituuzyo camilandu+ kuli Jehova; muulo waco wamasyekeli* aansiliva ulabikkwa kweelana acipimyo casyekeli lyamubusena busalala.+ 16 Aboobo uyoobbadela akaambo kacibi ncaakacita kuzintu zisalala alimwi uyooyungizya cipaanzi casanu alincico.+ Uyoocipa kumupaizi kutegwa mupaizi amanye mulandu+ wakwe kubelesya mugutu wacituuzyo camilandu, eelyo uyoolekelelwa.+

17 “Ikuti muntu wabisya mukuti wacita cimwi akati kazintu eezyo Jehova nzyaalailila kuti tazyeelede kucitwa, nokuba kuti wacita oobo cakutazyiba, ulaba amulandu alimwi uleelede kusubulwa akaambo kamulandu wakwe.+ 18 Weelede kuleta mugutu wacituuzyo camilandu+ uutajisi kampenda kumupaizi kweelana amuulo uubikkidwe. Mpoonya mupaizi uyoomanya mulandu wakwe ngwaakacita cakutazyiba, eelyo uyoolekelelwa. 19 Ncituuzyo camilandu. Ncobeni wabisya kuli Jehova.”

6 Mpoonya Jehova wakati kuli Musa: 2 “Ikuti naa muntu wabisya akutasyomeka kuli Jehova+ kwiinda mukweena mweenzinyina kujatikizya cintu ncaapegwa+ kuti acilanganye naa cintu ncaapegwa kuti aciyobole naa wabbida mweenzinyina naa kumuunina, 3 naa kuti wajana cintu cisweekede akukazya kuti tacibwene, alimwi wakonka cakubeja kujatikizya cibi cili coonse icili boobu ncaacita,+ mboobu mbwayelede kucita: 4 Ikuti naa wabisya akupegwa mulandu, weelede kupilusya cintu eeco ncaakabba naa ncaakanyanga muntu naa ncaakapedwe kuti ayobwede mweenzinyina naa icakasweekede ncaakajana, 5 naa cintu cili coonse ncaakakonka cakubeja kuti tacibwene, weelede kucibbadelela kweelana amuulo waco uukkwene+ alimwi akuyungizya cipaanzi casanu camuulo waco. Weelede kupa yooyo ngwaakabbida mubuzuba oobo mbwaapegwa mulandu. 6 Weelede kuleta mugutu uutajisi kampenda kuti abe cituuzyo camilandu kuli Jehova kuzwa akati kambelele zyakwe kweelana amuulo wamugutu ooyo, ape mupaizi kuti cibe cituuzyo camilandu.+ 7 Mupaizi uyoomanya milandu yamuntu ooyo kubusyu bwa Jehova. Aboobo uyoolekelelwa zibi zyakwe zyoonse izyakamupa kuba aamulandu.”+

8 Jehova wakazumanana kwaambila Musa kuti: 9 “Komulailila Aroni abana bakwe kuti, ‘Ngooyu mulawo wacituuzyo cuumpwa:+ Cituuzyo cuumpwa ceelede kuba aacipaililo masiku oonse mane kusikila mafwumofwumo, alimwi mulilo unoososelwa kutegwa uzumanane kuyaka acipaililo. 10 Mupaizi uyoosama cisani cakwe cabupaizi camulembo mubotu+ acibbudula* camulembo mubotu.+ Mpoonya uyoogwisya mulota*+ wacituuzyo cuumpwa eeco icaumpwa acipaililo akuubikka ambali aacipaililo. 11 Kuzwa waawo uyoosamununa zisani zyakwe+ akusama zimbi, mpoonya uyootola mulota ooyo anze aankambi kubusena busalala.+ 12 Mulilo uyoozumanana kuyaka acipaililo. Taweelede kuzima pe. Mupaizi weelede kubikka nkuni+ lyoonse mafwumofwumo akucibikka bweelede cituuzyo cuumpwa amulilo, alimwi uyakuumpa mafwuta aazipaizyo zyalumvwano kutegwa asuke busi amulilo.+ 13 Mulilo uyoozumanana kuyaka acipaililo. Taweelede kuzima pe.

14 “‘Lino ngooyu mulawo wacituuzyo camaila:+ Nywebo nobana ba Aroni mweelede kucileta kubusyu bwa Jehova kumbele lyacipaililo. 15 Umwi wabo uyoobweza fulaulu wacituuzyo camaila uuzula janza amafwuta alimwi atununkilizyo toonse ituli acituuzyo camaila, eelyo uyoocuumpa kuti cisuke busi acipaililo, cibe ciibalusyo cabweema bununkilila kuli Jehova.+ 16 Lino eeco casyaala Aroni abana bakwe bayoocilya.+ Bayoocilya kacili cinkwa citajisi bumena mubusena busalala. Bayoocilida mulubuwa lwatente lyakuswaanganina.+ 17 Taceelede kupangwa abumena+ buli boonse. Ndacipa kuti cibe caabilo cabo kuzipaizyo zyuumpwa.+ Ncintu cisalalisya,+ mbubonya mbuli cituuzyo cazibi acituuzyo camilandu. 18 Mwana musankwa wa Aroni uuli woonse uyoocilya.+ Ncaabilo cabo calyoonse alyoonse mumazyalani aanu oonse kuzwa kuzituuzyo zya Jehova zyuumpwa.+ Kufwumbwa cintu icaguma zituuzyo ciyoosalala.’”

19 Jehova alimwi wakaambila Musa kuti: 20 “Nceeci cituuzyo ca Aroni abana bakwe ncobanootuulila Jehova lyoonse mubuzuba walo naa mwanaakwe naananikwa:+ cipaanzi cakkumi caefa*+ yafulaulu kacili cituuzyo camaila calyoonse,+ cisela cakusaanguna cinootuulwa mafwumofwumo eelyo cisela cimbi kumangolezya. 21 Ceelede kukandwa amafwuta akupangwa tunkwa aciyokelo.+ Mukacilete kacikandidwe kabotu. Muyootuula tunkwa twacituuzyo camaila itukomawidwe kuti tube bweema bununkilila kuli Jehova. 22 Mupaizi, imwana wa Aroni+ uuyoonanikwa akuba mubusena bwakwe, uyoocituula. Ooyu mulawo walyoonse alyoonse: Cituuzyo eeci ceelede kuumpwa coonse kuli Jehova. 23 Kufwumbwa cituuzyo camaila camupaizi ceelede kuumpwa coonse. Taceelede kuligwa pe.”

24 Jehova alimwi wakaambila Musa kuti: 25 “Koambila Aroni abana bakwe kuti, ‘Ngooyu mulawo wacituuzyo cazibi:+ Cituuzyo cazibi ciyoojaigwa+ kubusyu bwa Jehova kubusena ooko kujailwa zituuzyo zyuumpwa lyoonse. Ncintu cisalalisya. 26 Imupaizi uutuula cituuzyo cazibi eeco nguuyoocilya.+ Ciyoolidwa mubusena busalala, mulubuwa lwatente lyakuswaanganina.+

27 “‘Kufwumbwa cintu ciguma nyama yaco cilasalala, alimwi kuti umwi wasansa bulowa bwaco bumwi acisani, cisani eeco casansilwa bulowa weelede kuciwasyila mubusena busalala. 28 Cibiya oomo mocajikilwa ceelede kupwaigwa. Pele ikuti naa cajikilwa mucibiya camukuba, cibiya eeco ceelede kucumbwa akusanzyigwa amaanzi.

29 “‘Kufwumbwa mwaalumi mupaizi uyoocilya.+ Ncintu cisalalisya.+ 30 Nokuba boobo, tamweelede kulya nyama yacituuzyo cazibi kuti naa bulowa bwancico bumwi bwaletwa mutente lyakuswaanganina kuti bumanye milandu mubusena busalala.+ Ceelede kuumpwa amulilo.

7 “‘Ngooyu mulawo wacituuzyo camilandu:+ Ncintu cisalalisya. 2 Cituuzyo camilandu bayoocijaila kubusena ooko kujailwa zituuzyo zyuumpwa lyoonse, alimwi bulowa bwaco+ buyoosansailwa mumabazu oonse aacipaililo.+ 3 Mafwuta aaco oonse+ uyakwaatuula antoomwe amucila uuli amafwuta alimwi amafwuta aavwumbilide bula, 4 ansa zyobilo amafwuta aali kulinzizyo. Alimwi amafwuta aakumuni uyakwaagwisya antoomwe ansa.+ 5 Mupaizi uyakwaaumpa kutegwa asuke busi acipaililo kacili cituuzyo cuumpwa kuli Jehova.+ Ncituuzyo camilandu. 6 Kufwumbwa mwaalumi mupaizi uyoocilya,+ alimwi ceelede kulidwa mubusena busalala. Ncintu cisalalisya.+ 7 Mulawo wacituuzyo cazibi ulabeleka akucituuzyo camilandu; ncamupaizi wacituula kumanya milandu.+

8 “‘Mupaizi atuulila muntu cituuzyo cuumpwa, cikutu+ camunyama wacituuzyo cuumpwa eeco ciyooba camupaizi ooyo.

9 “‘Cituuzyocamaila cili coonse icapangilwa mucitofwu naa mumpani naa aciyokelo,+ ncamupaizi wacituula. Ciyooba cakwe.+ 10 Pele cituuzyo camaila icili coonse cikandidwe amafwuta+ naa citajisi mafwuta+ ciyakwaabanwa akati kabana ba Aroni boonse; umwi aumwi uyoobweza cibeela ceelene.

11 “‘Ngooyu mulawo wacipaizyo calumvwano+ muntu uuli woonse ncakonzya kupa kuli Jehova: 12 Ikuti naa wacipa kutegwa atondezye kulumba,+ uyoocipa antoomwe acituuzyo cakulumba cazinkwa zibunge zitajisi bumena, izijisi kapulo akati alimwi zikandidwe amafwuta, alimwi atunkwa tupapalete tunanikidwe mafwuta, azinkwa zibunge izijisi kapulo akati zyafulaulu uukandidwe kabotu amafwuta. 13 Uyoopa cituuzyo cakwe antoomwe azibunge zijisi bumena azipaizyo zyakwe zyalumvwano izyacipaizyo cakulumba. 14 Kuzwa kulinzizyo weelede kupa musyobo aumwi wacinkwa cazituuzyo kacili cituuzyo cisetekene kuli Jehova; ciyooba camupaizi wasansaila bulowa bwazipaizyo zyalumvwano acipaililo.+ 15 Nyama yacipaizyo cakulumba yazipaizyo zyakwe zyalumvwano yeelede kuligwa mubuzuba bwakutuula. Tayelede kwiiyobola kusikila mafwumofwumo.+

16 “‘Ikuti naa cipaizyo ncaapa ncikonke+ naa ncituuzyo cakuliyandila,+ ceelede kuligwa mubuzuba mbwatuula cipaizyo cakwe, alimwi icasyaala cilakonzya kuligwa buzuba butobela. 17 Pele kufwumbwa nyama yacipaizyo yasyaala kusikila mubuzuba bwatatu yeelede kuumpwa mumulilo.+ 18 Nokuba boobo, ikuti naa nyama imwi yacipaizyo cakwe calumvwano yaligwa mubuzuba bwatatu, ooyo waituula takooyookkomaninwa a Leza pe. Takagwasyigwi acituuzyo eeco; ciyooba cisesemyo, alimwi kufwumbwa walya nyama yaco uyooba amulandu.+ 19 Nyama iiguma cintu cili coonse cisofweede tayeelede kuligwa. Yeelede kuumpwa mumulilo. Kufwumbwa muntu uutasofweede ulakonzya kulya nyama iisalala.

20 “‘Pele kufwumbwa muntu uusofweede uulya nyama yacipaizyo calumvwano ca Jehova weelede kujaigwa.+ 21 Ikuti naa muntu umwi waguma cintu cisofweede, kufwumbwa naa mbusofwaazi bwamuntu+ naa bwamunyama uusofweede+ naa cintu cili coonse cisesemya,+ akuti naa walya nyama yacipaizyo calumvwano ca Jehova, muntu ooyo weelede kujaigwa.’”

22 Jehova wakazumanana kwaambila Musa kuti: 23 “Ubaambile bana Israyeli kuti, ‘Tamweelede kulya mafwuta aali woonse+ aamupoho, mugutu naa mpongo. 24 Mafwuta aamunyama iwakalifwida alimwi amafwuta aamunyama iwakajaigwa amunyamanyina alakonzya kubelesyegwa mulimo uuli woonse, pele tamweelede kwaalya pe.+ 25 Kufwumbwa muntu uulya mafwuta aamunyama ngwaatuula kuli Jehova kacili cituuzyo cuumpwa, muntu ooyo weelede kujaigwa.

26 “‘Tamweelede kulya bulowa+ pe mumasena aanu oonse momunookkala, kufwumbwa naa mbwamuyuni naa mbwamunyama. 27 Kufwumbwa muntu uulya bulowa buli boonse, muntu ooyo weelede kujaigwa.’”+

28 Jehova wakazumanana kwaambila Musa kuti: 29 “Ubaambile bana Israyeli kuti, ‘Kufwumbwa uutuula cipaizyo calumvwano kuli Jehova weelede kutuula cibeela cimwi cacipaizyo cakwe calumvwano kuli Jehova.+ 30 Uyooleta mafwuta+ aakaango mujanza lyakwe antoomwe akaango kuti zibe cituuzyo ca Jehova cuumpwa, uyakwaayumba ooku akooku kacili cituuzyo cakuyumba+ kuli Jehova. 31 Mupaizi uyakuumpa mafwuta kutegwa asuke busi acipaililo,+ pele kaango kayooba ka Aroni abana bakwe.+

32 “‘Mweelede kupa mupaizi mweendo wamunsi wakululyo kacili caabilo cisetekene kuzwa kuzipaizyo zyanu zyalumvwano.+ 33 Imweendo wamunsi wakululyo uyooba caabilo+ camwana wa Aroni ooyo uutuula bulowa bwazipaizyo zyalumvwano alimwi amafwuta. 34 Nkaambo ndabweza kaango kacituuzyo cakuyumba amweendo wamunsi wakululyo iwacaabilo cisetekene kuzwa kuzipaizyo zyalumvwano zyabana Israyeli, alimwi ndazipa kuli Aroni mupaizi abana bakwe, ube mulawo walyoonse alyoonse kubana Israyeli.+

35 “‘Eeci ncecakali caabilo kuzwa kuzituuzyo zya Jehova zyuumpwa izyakali kupegwa kubapaizi, Aroni abana bakwe, mubuzuba mbobakabikkwa kubeleka mulimo wabupaizi kuli Jehova.+ 36 Jehova wakalailila kuti caabilo eeci icizwa kubana Israyeli cipegwe kulimbabo mubuzuba mbwaakabananika.+ Ooyu mulawo walyoonse alyoonse mumazyalani aabo.’”

37 Ooyu ngomulawo wacituuzyo cuumpwa,+ cituuzyo camaila,+ cituuzyo cazibi,+ cituuzyo camilandu,+ cipaizyo cakubikkwa abupaizi+ acipaizyo calumvwano,+ 38 mbubonya Jehova mbwaakalailila Musa a Cilundu ca Sinai,+ mubuzuba mbwaakalailila bana Israyeli kutuula zituuzyo zyabo kuli Jehova munkanda ya Sinai.+

8 Jehova wakazumanana kwaambila Musa kuti: 2 “Bweza Aroni antoomwe abana bakwe,+ zisani,+ mafwuta aakunanika,+ mupoho wacituuzyo cazibi, bagutu bobilo amutaanga* wazinkwa zitajisi bumena,+ 3 mpoonya ubunganye mbungano yoonse amulyango watente lyakuswaanganina.”

4 Mpoonya Musa wakacita mbubonya Jehova mbwaakamulailila, eelyo mbungano yakabungana amulyango watente lyakuswaanganina. 5 Lino Musa wakaambila mbungano kuti: “Mboobu Jehova mbwaatulailila kuti tucite.” 6 Aboobo Musa wakaleta Aroni abana bakwe akubasanzya amaanzi.+ 7 Mpoonya wakasamika Aroni cisani camilembo mibotu myuuba-uba,+ wamwaanga lutambo+ mucibuno, wamusamika jansi,+ kabaki kabupaizi+ alimwi akumwaanga lutambo* lulukidwe+ lwakukabaki kuti kakkale kabotu. 8 Eelyo wakamubikka kasani kabupaizi kaacamba+ akubikka mulinkako Urimu a Tumimu.+ 9 Kumane wakamusamika citambala+ kumutwe akubikka mpande yangolida iiŋaima kucitambala nkocili kumbele, citondezyo cisetekene cakulyaaba,*+ mbubonya Jehova mbwaakalailila Musa.

10 Mpoonya Musa wakabweza mafwuta aakunanika, eelyo wakananika tente lyakukombela azintu zyoonse zyakali mumo,+ wakazisalazya. 11 Kuzwa waawo wakasansaila mafwuta amwi ziindi zili ciloba acipaililo, wananika cipaililo azibelesyo zyaco zyoonse acakusambila acikkazikilo caco kutegwa zisalazyigwe. 12 Kumane wakatila mafwuta aamwi aakunanika amutwe wa Aroni akumunanika kutegwa asalazyigwe.+

13 Mpoonya Musa wakaleta bana ba Aroni afwaafwi akubasamika zisani, wabaanga ntambo zyamucibuno azyakumutwe,+ mbubonya Jehova mbwaakalailila Musa.

14 Kumane wakaleta mupoho wacituuzyo cazibi, eelyo Aroni abana bakwe bakabikka maanza aabo amutwe wamupoho ooyo wacituuzyo cazibi.+ 15 Mpoonya Musa wakajaya mupoho akutompa munwe wakwe mubulowa+ akubulamba kumeja aacipaililo mumabazu oonse, kutegwa asalazye cipaililo kucibi, eelyo bulowa ibwakasyaala wakabutila ansi aacipaililo. Munzila eeyi wakacisalazya. 16 Kumane wakabweza mafwuta oonse aavwumbilide bula, mafwuta aakumuni alimwi ansa zyobilo amafwuta aali kulinzizyo, akuzyuumpa kutegwa zisuke busi acipaililo.+ 17 Mpoonya zibeela zyamupoho izyakasyaala, icikutu, nyama alimwi abufwusi, zyakaumpwa anze aankambi+ mbubonya Jehova mbwaakalailila Musa.

18 Lino wakaleta mugutu wacituuzyo cuumpwa, eelyo Aroni abana bakwe bakabikka maanza aabo amutwe wamugutu+ ooyo. 19 Mpoonya Musa wakamujaya akusansaila bulowa mumabazu oonse aacipaililo. 20 Wakatendaula mugutu muzibeela-beela, kumane Musa wakaumpa mutwe, zibeela-beela zyanyama amafwuta* kutegwa zisuke busi acipaililo. 21 Bula amyeendo wakazisanzya amaanzi, mpoonya wakaumpa mugutu woonse kutegwa asuke busi acipaililo. Cakali cituuzyo cuumpwa kuli Jehova, ibweema bununkilila. Cakali cituuzyo cuumpwa amulilo kuli Jehova, mbubonya Jehova mbwaakalailila Musa.

22 Mpoonya wakaleta mugutu wabili, imugutu wakubikkwa+ aabupaizi, eelyo Aroni abana bakwe bakabikka maanza aabo amutwe wamugutu+ ooyo. 23 Kumane Musa wakamujaya akutompa munwe wakwe mubulowa akubulamba kukutwi kwa Aroni kwakululyo mpokulaansi, kucaala cakwe cakujanza lyalulyo akucaala cakukuulu kwakululyo. 24 Mpoonya Musa wakaleta bana ba Aroni afwaafwi akulamba bulowa bumwi kumatwi aabo aakululyo nkwaalaansi, kuzyaala zyabo zyakumaanza aakululyo akuzyaala zyabo zyakumaulu aakululyo; pele bulowa ibwakasyaala wakabusansaila mumabazu oonse aacipaililo.+

25 Mpoonya wakabweza mafwuta, mucila uuli amafwuta, mafwuta oonse aavwumbilide bula, mafwuta aakumuni, insa zyobilo amafwuta aali kulinzizyo amweendo wamunsi wakululyo.+ 26 Wakabweza cinkwa cibunge citajisi bumena icijisi kapulo,+ cinkwa cibunge cijisi kapulo akati icikandidwe amafwuta+ alimwi akankwa kapapalete kuzwa mumutaanga wazinkwa zitajisi bumena iwakali kubusyu bwa Jehova. Mpoonya wakazibikka azibeela-beela zyamafwuta alimwi aamweendo wamunsi wakululyo. 27 Kuzwa waawo wakazibikka zyoonse mumaanza aa Aroni amumaanza aabana bakwe akutalika kuziyumba ooku akooku kazili cituuzyo cakuyumba kubusyu bwa Jehova. 28 Mpoonya Musa wakazibweza mumaanza aabo akuzyuumpa acipaililo atala aacituuzyo cuumpwa. Zyakali cituuzyo cakubikkwa aabupaizi cabweema bununkilila. Cakali cituuzyo cuumpwa kuli Jehova.

29 Mpoonya Musa wakabweza kaango akukayumba ooku akooku kakali cituuzyo cakuyumba kubusyu bwa Jehova.+ Cakaba caabilo ca Musa kuzwa kumugutu wakubikkwa abupaizi, mbubonya Jehova mbwaakalailila Musa.+

30 Kumane Musa wakabweza mafwuta aamwi aakunanika+ alimwi abulowa bumwi ibwakali acipaililo akusansa Aroni azisani zyakwe alimwi abana bakwe azisani zyabo. Munzila eeyi wakasalazya Aroni azisani zyakwe alimwi abana bakwe+ azisani zyabo.+

31 Mpoonya Musa wakaambila Aroni abana bakwe kuti: “Amujike+ nyama amulyango watente lyakuswaanganina, alimwi ooko nkomweelede kwiilida antoomwe azinkwa zili mumutaanga uubelesyegwa ciindi cakubikkwa abupaizi, mbubonya mbondakalaililwa kuti, ‘Aroni abana bakwe bayakwiilya.’+ 32 Nyama alimwi azinkwa zyasyaala mweelede kuzyuumpa mumulilo.+ 33 Tamweelede kuzwa kumulyango watente lyakuswaanganina mazuba aali ciloba kusikila akakkwane mazuba aanu aakubikkwa kuba bapaizi, nkaambo ciyootola mazuba aali ciloba kutegwa mubikkwe abupaizi.+ 34 Jehova wakalailila kuti kucitwe mbuli mbotwacita sunu kutegwa milandu yanu imane.+ 35 Mweelede kukkala kumulyango watente lyakuswaanganina syikati amasiku mazuba aali ciloba,+ alimwi mweelede kuzuzikizya mikuli yanu kuli Jehova+ kutegwa mutafwi; nkaambo mbondakalaililwa oobo.”

36 Eelyo Aroni abana bakwe bakacita zyoonse Jehova nzyaakalailila kwiinda muli Musa.

9 Mubuzuba bwalusele,+ Musa wakaita Aroni abana bakwe alimwi abaalu babana Israyeli. 2 Wakaambila Aroni kuti: “Bweza moombe wacituuzyo cazibi+ amugutu wacituuzyo cuumpwa akuzituula kubusyu bwa Jehova, zyeelede kuti kazitajisi kampenda. 3 Pele bana Israyeli ubaambile kuti, ‘Amubweze mujembwe wacituuzyo cazibi, mubweze amoombe wamwaka omwe amugutu wamwaka omwe, izitajisi kampenda, izyacituuzyo cuumpwa, 4 mupoho amugutu izyazipaizyo zyalumvwano+ kuti zituulwe kubusyu bwa Jehova, alimwi acituuzyo camaila+ cikandidwe amafwuta, nkaambo sunu Jehova ulalibonya kulindinywe.’”+

5 Aboobo bakatola nzyaakalailila Musa kutente lyakuswaanganina. Mpoonya mbungano yoonse yakaboola afwaafwi akwiima kubusyu bwa Jehova. 6 Eelyo Musa wakati: “Mboobu Jehova mbwaalailila kuti mucite kutegwa bulemu bwa Jehova bulibonye kulindinywe.”+ 7 Mpoonya Musa wakati kuli Aroni: “Koya kucipaililo ukatuule cituuzyo cako cazibi+ acituuzyo cako cuumpwa, umanye milandu yako+ ayabamuŋanda yako; mpoonya alimwi utuulile bantu+ cituuzyo cakumanya milandu yabo,+ mbubonya Jehova mbwaalailila.”

8 Mpoonya aawo Aroni wakaunka kucipaililo akujaya moombe wacituuzyo cazibi zyakwe.+ 9 Mpoonya bana bakwe bakamupa bulowa+ bwamoombe eelyo wakatompa munwe wakwe mubulowa akubulamba kumeja aacipaililo, kumane bulowa ibwakasyaala wakabutila ansi aacipaililo.+ 10 Wakaumpa mafwuta, insa amafwuta aakumuni aakazwa kucituuzyo cazibi kutegwa zisuke busi acipaililo, mbubonya Jehova mbwaakalailila Musa.+ 11 Nyama acikutu wakazyuumpa mumulilo anze aankambi.+

12 Mpoonya Aroni wakajaya cituuzyo cuumpwa alimwi bana bakwe bakamupa bulowa bwaco, eelyo wakabusansaila mumabazu oonse aacipaililo.+ 13 Alimwi bakamupa zibeela-beela zyacituuzyo cuumpwa antoomwe amutwe waco, mpoonya wakazyuumpa kuti zisuke busi acipaililo. 14 Kumane wakasanzya bula amyeendo akuzyuumpa kuti zisuke busi acipaililo atala aacituuzyo cuumpwa.

15 Mpoonya wakatuulila bantu cituuzyo akubweza mpongo yacituuzyo cazibi zyabantu akwiijaya, eelyo wakaituula kaili cituuzyo cazibi mbubonya mbuli yakusaanguna. 16 Alimwi wakatuula cituuzyo cuumpwa kweelana acilengwa.+

17 Kuzwa waawo wakaleta cituuzyo camaila,+ eelyo wakabweza cimwi caco cizula janza lyakwe akucuumpa kutegwa cisuke busi acipaililo, kuyungizya acituuzyo cuumpwa mafwumofwumo.+

18 Naakamana Aroni wakajaya mupoho amugutu, izyacipaizyo calumvwano cabantu. Mpoonya bana bakwe bakamupa bulowa bwabanyama aabo, kumane wakabusansaila mumabazu oonse aacipaililo.+ 19 Kumane bakabweza mafwuta aamupoho,+ mucila wamugutu uuli amafwuta, amafwuta aavwumbilide bula, insa alimwi amafwuta aakumuni,+ 20 akubikka zibeela-beela eezyo zyamafwuta zyoonse atwaango twabanyama aaba, mpoonya wakaumpa mafwuta kuti asuke busi acipaililo.+ 21 Pele twaango amweendo wamunsi wakululyo, Aroni wakaziyumba ooku akooku kazili cituuzyo cakuyumba kubusyu bwa Jehova, mbubonya mbuli Musa mbwaakalailila.+

22 Mpoonya Aroni wakatambika maanza aakwe kubantu akubalongezya,+ kumane wakaseluka kuzwa kukutuula cituuzyo cazibi, cituuzyo cuumpwa azipaizyo zyalumvwano. 23 Kumane Musa a Aroni bakanjila mutente lyakuswaanganina, mpoonya bakazwa akulongezya bantu.+

Lino bulemu bwa Jehova bwakalibonya kubantu boonse,+ 24 alimwi kwakazwa mulilo kuli Jehova+ akuumpa cituuzyo cuumpwa amafwuta izyakali acipaililo. Eelyo bantu boonse nobakabona zintu eezyi, bakasekelela akuvwuntama ansi.+

10 Lino bana ba Aroni, ba Nadabu a Abihu+ bakabweza akuleta umwi aumwi kakunyamwida mulilo kakwe akubikka tununkilizyo+ alintuto. Mpoonya bakatalika kuumpa tununkilizyo tutazumizyidwe+ kubusyu bwa Jehova, eeco ncaatakabalailila kucita. 2 Mpoonya kwakaboola mulilo kuzwa kuli Jehova akubaumpa,+ aboobo bakafwa kubusyu bwa Jehova.+ 3 Kumane Musa wakati kuli Aroni: “Mboobu mbwaamba Jehova, ‘Ndiyoosalazyigwa kuli baabo bali afwaafwi andime,+ alimwi ndiyoolemekwa kumeso aabantu boonse.’” Mpoonya Aroni wakaumuna wi.

4 Aboobo Musa wakaita Misayeli a Elizafana, ibana ba Uzieli,+ usyi Aroni musyoonto, akubaambila kuti: “Amuboole afwaafwi mubweze banabokwanu kuzwa mulubuwa lwatente lisalala, mubatole anze aankambi.” 5 Aboobo bakaboola akubabweza baalumi aabo kabacisamide zisani zyabo zyabupaizi akubatola anze aankambi, mbubonya Musa mbwaakabaambila.

6 Kumane Musa wakaambila Aroni abana bakwe bamwi, Eleazara a Itamara kuti: “Mutaleki kukamuna masusu aanu, alimwi mutazapuli zisani zyanu+ kutegwa mutafwi akuti Leza atakalalili mbungano yoonse. Banabokwanu bana Israyeli boonse bayoobalila aabo Jehova mbaanyonyoona amulilo. 7 Tamweelede kuzwa kumulyango watente lyakuswaanganina kutegwa mutafwi, nkaambo mafwuta aakunanika aa Jehova ali alindinywe.”+ Aboobo bakacita mbubonya mbuli Musa mbwaakaambide.

8 Mpoonya Jehova wakati kuli Aroni: 9 “Toyelede kunywa waini naa zyakunywa zimwi zikola, yebo abana bako nomunjila mutente lyakuswaanganina+ kutegwa mutafwi. Ooyu mulawo walyoonse alyoonse mumazyalani aanu. 10 Oobu mbomweelede kwaandaanya cintu cisetekene acintu cisesemya, cintu cisalala acintu cisofweede,+ 11 akuti muyiisye bana Israyeli milawo yoonse Jehova njaakabaambila kwiinda muli Musa.”+

12 Mpoonya Musa wakaambila Aroni abana bakwe bakasyaala, Eleazara a Itamara kuti: “Amubweze cituuzyo camaila icakasyaala kuzituuzyo zya Jehova zyuumpwa, mucilye kacili cinkwa citajisi bumena afwaafwi acipaililo,+ nkaambo ncintu cisalalisya.+ 13 Mweelede kucilida mubusena busalala,+ nkaambo ncaabilo cako abana bako kuzwa kuzituuzyo zya Jehova zyuumpwa, nkaambo oobu mbondakalaililwa. 14 Muyoolya kaango kacituuzyo cakuyumba amweendo wacaabilo cisetekene+ mubusena busalala, yebo alimwi abana bako basankwa abasimbi mboli limwi,+ nkaambo zintu eezyi zyapegwa kulinduwe akubana bako basankwa kazili zyaabilo zyanu kuzwa kuzipaizyo zyalumvwano zyabana Israyeli. 15 Bayooleta mweendo wacaabilo cisetekene akaango kacituuzyo cakuyumba antoomwe azituuzyo zyamafwuta zyuumpwa, aboobo bayootuula cituuzyo cakuyumba kubusyu bwa Jehova; alimwi ciyooba caabilo cako abana bako+ lyoonse alyoonse mbubonya Jehova mbwaalailila.”

16 Musa wakaiyandaula mpongo yacituuzyo cazibi,+ pele wakajana kuti yaumpwa. Aboobo wakakalalila Eleazara a Itamara, bana ba Aroni ibakasyaala akubaambila kuti: 17 “Ino nkaambo nzi ncomwatalida cituuzyo cazibi mubusena busalala,+ mbwaanga ncintu cisalalisya alimwi wamupa mukuli wakuti munyamune zibi zyambungano kutegwa mumanye milandu yabo kuli Jehova? 18 Amubone! Bulowa bwaco tiibwaletwa mubusena busalala.+ Mubwini, mwaleelede kucilya mubusena busalala, mbubonya mbondakalaililwa.” 19 Amvwe boobo Aroni wakaingula Musa kuti: “Bona! Sunu batuula cituuzyo cabo cazibi acituuzyo cabo cuumpwa kubusyu bwa Jehova,+ nokuba boobo zintu eezyi zyacitika kulindime. Ikuti nindalya cituuzyo cazibi sunu kanduuside, sena nicamubotela Jehova?” 20 Musa naakamvwa boobo, wakakazuminizya kaambo aaka.

11 Lino Jehova wakaambila Musa a Aroni kuti: 2 “Amwaambile bana Israyeli kuti, ‘Mbaaba banyama baanyika mbomukonzya kulya:+ 3 Kufwumbwa munyama uujisi nsumba zyaanzeene alimwi uuselula, ulakonzya kuligwa.

4 “‘Pele tamweelede kulya banyama aaba baselula naa bajisi nsumba zyaanzeene: nkamela, ilaselula pele tiijisi nsumba zyaanzeene. Aboobo ilisofweede kulindinywe.+ 5 Awalo cibila+ ulaselula pele tajisi nsumba zyaanzeene. Aboobo ulisofweede kulindinywe. 6 Awalo sulwe ulaselula pele tajisi nsumba zyaanzeene. Aboobo ulisofweede kulindinywe. 7 Ayalo ngulube+ ilijisi nsumba zyaanzeene pele tiiseluli pe. Aboobo ilisofweede kulindinywe. 8 Tamweelede kulya nyama yabanyama aaba naa kuguma mitunta yabo pe. Nkaambo balisofweede kulindinywe.+

9 “‘Nzyeezyi nzyomukonzya kulya izikkala mumaanzi: Kufwumbwa cintu camumaanzi cijisi tuyambyo amakwa, cibe camulwizi naa mumilonga, mulakonzya kulya.+ 10 Pele kufwumbwa izikkala mulwizi amumilonga izitajisi tuyambyo amakwa, akati kazyuuka naa zintu zili zyoonse zipona mumaanzi, zilasesemya. 11 Inzya, zyeelede kumusesemya alimwi tamweelede kuzilya,+ mweelede kusesemwa amitunta yazyo. 12 Kufwumbwa cintu camumaanzi citajisi tuyambyo amakwa ncintu cisesemya kulindinywe.

13 “‘Nzyeezyi zintu zyuuluka nzyomweelede kusesemwa; tazyeelede kuligwa pe nkaambo zilasesemya: sikwaze,+ cuungwe, sikube uusiya,+ 14 bimbe, balubanze bamisyobo yoonse, 15 bacikwangala bamisyobo yoonse, 16 impowani, tumba, cidada, baluunga bamisyobo yoonse, 17 katumba kaniini, sikabaandwa, tumba wamatwi malamfwu, 18 kakukubwi, sifundwe, sikube, 19 tongola abacibengelele bamisyobo yoonse, ŋangayabayuni asimudima. 20 Kufwumbwa zilenge zyuuluka alimwi zikonzya* kweenda amaulu one ncisesemyo kulindinywe.

21 “‘Akati kazilenge zyuuluka zijisi maulu one, mweelede buyo kulya zyeezyo zijisi maulu malamfwu aakusotosya. 22 Nzyeezyi nzyomukonzya kulya: cikwikwi camisyobo-misyobo, nsozi zimwi ziligwa+ zyamisyobo-misyobo, bamunkwanza bamisyobo-misyobo answabaanda zyamisyobo-misyobo. 23 Zilenge zimbi zyoonse zyuuluka zijisi maulu one nzintu zisesemya kulindinywe. 24 Zintu eezyi zilakonzya kumusofwaazya. Kufwumbwa uuguma mitunta yazyo ulasofwaala kusikila kumangolezya.+ 25 Kufwumbwa uunyamuna cintu cifwide akati kazintu eezyi weelede kuwasya zisani zyakwe;+ ulasofwaala kusikila kumangolezya.

26 “‘Munyama uuli woonse uujisi nsumba zyaanzeene pele kazitaanzeene kapati alimwi kataseluli, ulisofweede kulindinywe. Kufwumbwa muntu uuguma munyama uuli boobu ulasofwaala.+ 27 Banyama boonse beenda ansumba zijisi mala akati kabanyama bamaulu one, balisofweede kulindinywe. Kufwumbwa muntu uuguma mitunta yabo ulasofwaala kusikila kumangolezya. 28 Kufwumbwa uunyamuna mitunta yabo weelede kuwasya zisani zyakwe,+ alimwi ulasofwaala kusikila kumangolezya.+ Banyama aaba balisofweede kulindinywe.

29 “‘Aaba mbabanyama basofweede kulindinywe akati kabanyama bayavwula anyika: silumfukwe, mbeba,+ bantombela bamisyobo yoonse, 30 syaazibumbu, mbulumusanza, palamabwe, kkulumusi alimwi analuntaambwe. 31 Zilenge eezyi ziyavwula anyika zilisofweede kulindinywe.+ Kufwumbwa uuguma mitunta yazyo ulasofwaala kusikila kumangolezya.+

32 “‘Kufwumbwa cintu mpozikonzya kuwida kazifwide cilasofwaala, kufwumbwa naa ncibelesyo cacisamu, cisani, cikutu naa cisaka. Kufwumbwa cintu cibelesyegwa ceelede kusanzyigwa mumaanzi, alimwi cilasofwaala kusikila kumangolezya; mpoonya kuzwa waawo ciyoosalala. 33 Ikuti naa zyawida mucibiya, mweelede kucipwaya alimwi kufwumbwa cintu cali mukati cilasofwaala.+ 34 Kufwumbwa cakulya icalokelwa maanzi kuzwa mulincico cilasofwaala, alimwi kufwumbwa cakunywa icili mucibiya eeco cilasofwaala. 35 Cintu cili coonse zintu eezyo zifwide mpozikonzya kuwida cilasofwaala. Kufwumbwa naa ncitofwu naa ncikkazikilo cacibiya, ceelede kupwaigwa. Zintu eezyi mweelede kuzibona kuti zilisofweede kulindinywe. 36 Kalikke buyo kasensa kamaanzi acikala nzeziyoozumanana kusalala, pele kufwumbwa uuguma zintu eezyo zifwide ulasofwaala. 37 Ikuti cimwi cazintu eezyi zifwide cawida ambuto iiyanda kusyangwa, mbuto eeyo ilasalala. 38 Pele kuti naa maanzi atilwa ambuto eeyo alimwi cintu cimwi kuzwa kuzintu eezyo zifwide cawida alinjiyo, ilasofwaala.

39 “‘Lino ikuti munyama uuligwa wafwa, kufwumbwa muntu uuguma mutunta wamunyama ooyo ulasofwaala kusikila kumangolezya.+ 40 Kufwumbwa muntu uulya nyama yamunyama ooyo weelede kuwasya zisani zyakwe pele ulasofwaala kusikila kumangolezya.+ Kufwumbwa uunyamuna mutunta wamunyama ooyo weelede kuwasya zisani zyakwe alimwi uyoosofwaala kusikila kumangolezya. 41 Kufwumbwa zilenge zikalaba anyika zilasesemya.+ Tazyeelede kuligwa pe. 42 Tamweelede kulya cilenge cili coonse ceenzya bula ansi aceeco ceenda amaulu one naa cijisi maulu manji akati kazilenge zyoonse zyaanyika, nkaambo zilasesemya.+ 43 Mutalisofwaazyi akaambo kazilenge zikalaba ansi alimwi tamweelede kulisofwaazya anzizyo pe.+ 44 Ndime Jehova Leza wanu,+ amulisalazye kutegwa musalale,+ nkaambo mebo ndilasalala.+ Aboobo tamweelede kulisofwaazya azilenge zikalaba anyika. 45 Nkaambo ndime Jehova iwakamusololela kuzwa mucisi ca Egepita kuti ndibe Leza wanu,+ mweelede kusalala+ nkaambo mebo ndilasalala.+

46 “‘Ooyu ngomulawo uujatikizya banyama, zilenge zyuuluka, zilenge zyoonse zipona mumaanzi azilenge zyoonse zipona anyika, 47 kutegwa mukonzye kwaandaanya cintu cisofweede acintu cisalala alimwi akwaandaanya zilenge zipona iziligwa aziteelede kuligwa.’”+

12 Lino Jehova wakaambila Musa kuti: 2 “Ambila bana Israyeli kuti, ‘Ikuti naa mukaintu wamita akutumbuka mwana musankwa, ulasofwaala mazuba aali ciloba, ulasofwaala mbubonya mbuli mazuba ngali kumwezi.+ 3 Mubuzuba bwalusele, mwana weelede kupalulwa.+ 4 Uyoozumanana kulisalazya kubulowa kwamazuba aambi aali 33. Tayelede kuguma cintu cili coonse cisalala alimwi tayelede kunjila mubusena busalala kusikila mazuba aakwe aakulisalazya akakkwane.

5 “‘Ikuti naa watumbuka mwana musimbi, nkokuti ulasofwaala mazuba aali 14, mbubonya mbuli ciindi nali kumwezi. Uyoozumanana kulisalazya kubulowa kwamazuba aambi aali 66. 6 Lino akkwana mazuba aakwe aakulisalazya akaambo kamwana musankwa naa musimbi, weelede kuleta mugutu wamwaka omwe wacituuzyo cuumpwa,+ amwana wankwilimba naa wanziba wacituuzyo cazibi, weelede kuzileta kumupaizi kumulyango watente lyakuswaanganina. 7 Mupaizi uyoozituula kubusyu bwa Jehova akumanya milandu yakwe, alimwi uyoosalazyigwa kubulowa bwakwe. Ooyu ngomulawo uujatikizya mukaintu watumbuka mwana musankwa naa musimbi. 8 Pele ikuti katacikonzyi kuleta mbelele, nkokuti weelede kuleta nziba zyobilo naa bana bankwilimba bobilo,+ kamwi kabe kacituuzyo cuumpwa eelyo kamwi kabe kacituuzyo cazibi, eelyo mupaizi uyoomanya milandu yakwe, mpoonya uyoosalazyigwa.’”

13 Jehova wakazumanana kwaambila Musa a Aroni kuti: 2 “Ikuti naa muntu wazimba, waba atukoto-koto naa kabala alukanda lwakwe alimwi kayeeyelwa kuti ulaabulwazi bwacinsenda,*+ nkokuti weelede kuletwa kuli Aroni mupaizi naa umwi wabana bakwe bapaizi.+ 3 Mupaizi uyoobulanga-langa bulwazi ibuli alukanda. Ikuti naa boya buli waawo aali bulwazi bwacinca akutuba akuti lukanda lwalibonya kubbookela kwiinda lukanda lumbi lwamubili wakwe, nkokuti ncinsenda. Mupaizi uyoocilanga-langa akumwaamba kuti ulisofweede. 4 Pele kuti naa kabala kakatuba aalukanda lwakwe akulibonya kuti takabbookede kwiinda lukanda lumbi lwamubili akuti boya tiibwatuba, mupaizi weelede kumuzandula muntu ooyo mazuba aali ciloba.+ 5 Mupaizi uyoomulanga-langa alimwi mubuzuba bwaciloba, eelyo ikuti naa kwalibonya mbuli kuti bulwazi bwamana, akuti tiibwayandilila mulukanda, weelede kumuzandula mazuba aambi aali ciloba.

6 “Mupaizi weelede kumulanga-langa lwabili mubuzuba bwaciloba, eelyo ikuti naa bulwazi tabucilibonyi kapati akuti tiibwayandilila mulukanda, mupaizi uyoomwaamba kuti ulasalala;+ twali tukoto-koto buyo. Aboobo muntu ooyo weelede kuwasya zisani zyakwe akusalala. 7 Pele kuti naa tukoto-koto tulibonya kuti twayandilila* mulukanda, musyule aakulibonya kumupaizi kuti abone naa wasalala, nkokuti weelede kuyoolibonya alimwi* kumupaizi. 8 Mupaizi uyoomulanga-langa, eelyo ikuti naa tukoto-koto twayandilila mulukanda, mupaizi uyoomwaamba kuti ulisofweede. Ncinsenda+ eeco.

9 “Ikuti muntu waba abulwazi bwacinsenda, weelede kuletwa kumupaizi, 10 eelyo mupaizi uyoomulanga-langa.+ Ikuti naa alukanda kwazwa zituba akupa kuti boya butube alimwi cilonda eeco camonkoka,+ 11 mbulwazi bwacinsenda citaponi alukanda lwamubili wakwe, eelyo mupaizi weelede kumwaamba kuti ulisofweede. Taciyandiki kumuzandula pe,+ nkaambo ulisofweede. 12 Lino ikuti naa cinsenda calibonya mulukanda loonse, alimwi cayandilila mubili woonse kuzwa kumutwe kusikila kumaulu cakuti calibonya kumupaizi, 13 eelyo awalo wacilanga-langa akubona kuti cinsenda calibonya amubili woonse, weelede kwaambila muntu ooyo uujisi cinsenda kuti ulasalala.* Coonse cacinca akutuba, nkokuti ulasalala. 14 Pele kwaakulibonya cilonda cimonkokede, uyoosofwaala. 15 Mupaizi abona cilonda cimonkokede, uyoomwaamba kuti ulisofweede.+ Cilonda cimonkokede cilisofweede. Mbulwazi bwacinsenda.+ 16 Pele ikuti naa cilonda eeco catuba alimwi, uyakuunka alimwi kumupaizi. 17 Mupaizi uyoomulanga-langa,+ ikuti naa bulwazi bwacinca akutuba, mupaizi uyoomwaambila muntu ooyo kuti ulasalala.

18 “Ikuti muntu waba acuute amubili wakwe kumane capona, 19 pele aawo mpocabede cuute lukanda lwatuba naa kwaba kabala katuba akusalala, weelede kuunka kuyoolitondezya kumupaizi. 20 Mupaizi uyoomulanga-langa,+ eelyo ikuti lukanda lwalibonya kubbookela kwiinda lukanda lumbi lwamubili wakwe akuti boya bwacinca akutuba, weelede kumwaamba kuti ulisofweede. Mbulwazi bwacinsenda ibwatalikila mucuute. 21 Pele kuti mupaizi naalanga-langa wajana kuti kunyina boya butuba, alimwi lukanda talubbookede kwiinda lukanda lumbi lwamubili wakwe alimwi kacitalibonyi kapati, weelede kumuzandula mazuba aali ciloba.+ 22 Alimwi ikuti calibonya antangalala kuti cayandilila mulukanda, mupaizi uyoomwaamba kuti ulisofweede. Oobu mbulwazi. 23 Nokuba boobo, ikuti aawo aali cuute kwaba kabala akuti tiikayandilila, ncilonda buyo cacuute, aboobo mupaizi weelede kumwaamba kuti ulasalala.+

24 “Ikuti naa muntu wapya mulilo, eelyo cilonda catuba akusalala naa kutuba buyo, 25 mupaizi weelede kucilanga-langa. Ikuti naa boya acilonda bwatuba alimwi calibonya kubbookela kwiinda lukanda lumbi lwamubili, mbulwazi bwacinsenda ibwatalikila mucilonda, aboobo mupaizi weelede kumwaamba kuti ulisofweede. Mbulwazi bwacinsenda. 26 Pele kuti mupaizi naalanga-langa wajana kuti kunyina boya butuba acilonda alimwi tacibbookede kwiinda lukanda lumbi lwamubili wakwe alimwi cazibaana, weelede kumuzandula mazuba aali ciloba.+ 27 Mupaizi uyoomulanga-langa alimwi mubuzuba bwaciloba, ikuti calibonya antangalala kuti cayandilila mulukanda, mupaizi uyoomwaamba kuti ulisofweede. Oobu mbulwazi bwacinsenda. 28 Pele kuti cilonda tiicayandilila mulukanda alimwi cazibaana, nkuzimba buyo kwakutumpa, aboobo mupaizi weelede kumwaamba kuti ulasalala.

29 “Ikuti mwaalumi naa mukaintu waba abulwazi amutwe naa kucilezu, 30 mupaizi uyoobulanga-langa bulwazi oobo.+ Ikuti naa lukanda lulibonya kubbookela kwiinda lukanda lumbi, aboya bwaba bwamubala wamungunga waji akuubauba, mupaizi uyakwaamba muntu ooyo kuti ulisofweede; mbulwazi bwakumutwe naa kucilezu. Ncinsenda cakumutwe naa kucilezu. 31 Pele ikuti naa mupaizi wabona kuti lukanda aawo aali bulwazi talubbookede kwiinda lukanda lumbi alimwi kunyina boya busiya alindulo, mupaizi weelede kuzandula muntu ooyo uuli abulwazi mazuba aali ciloba.+ 32 Mupaizi uyoobulanga-langa bulwazi mubuzuba bwaciloba, ikuti naa bulwazi tiibwayandilila alimwi tiikwaba boya bwamubala wamungunga waji muli mbubo akuti lukanda aawo mpobubede bulwazi tiilwabbookela kwiinda lukanda lumbi, 33 weelede kugelwa, pele tayelede kugelwa aawo mpobubede bulwazi. Mpoonya mupaizi uyoomuzandula muntu ooyo uuli abulwazi mazuba aali ciloba.

34 “Mupaizi weelede kubulanga-langa alimwi bulwazi mubuzuba bwaciloba, ikuti naa bulwazi bwakumutwe akucilezu tiibwayandilila mulukanda alimwi talubbookede kwiinda lukanda lumbi, mupaizi weelede kumwaamba kuti ulasalala, aboobo muntu ooyo weelede kuwasya zisani zyakwe eelyo ulasalala. 35 Pele ikuti bulwazi bwalibonya caantangalala kuti bwayandilila mulukanda, musyule lyakusalazyigwa, 36 mupaizi uyoomulanga-langa, ikuti bulwazi bwayandilila mulukanda, mupaizi tayandiki kuti mane alange-lange naa masusu aba amubala wamungunga waji; muntu ooyo ulisofweede. 37 Nokuba boobo, ikuti kwajanika kuti bulwazi tiibwayandilila akuti kwamena masusu aasiya, nkokuti bulwazi oobo bwapona. Muntu ooyo ulasalala, eelyo mupaizi uyoomwaamba kuti ulasalala.+

38 “Ikuti mwaalumi naa mukaintu waba atubala-bala tutuba amubili, 39 mupaizi uyoobalanga-langa.+ Ikuti tubala-bala ooto katutubuluka, ncintambwe buyo catalika mulukanda lwakwe. Muntu ooyo ulasalala.

40 “Ikuti naa masusu aamwaalumi akuluka, mpoonya waba alubala, muntu ooyo ulasalala. 41 Ikuti wakuluka masusu ankumo yakwe, muntu ooyo ulasalala. 42 Pele kuti akatwikkilo naa ankumo yakwe aawo mpaakakuluka masusu kwalibonya kutuba-tuba akusalala-salala, nkokuti mbulwazi bwacinsenda bwatalikila akatwikkilo naa ankumo. 43 Mupaizi uyoomulanga-langa, eelyo kuti naa kuzimba ooko kwatuba-tuba akusalala-salala akatwikkilo naa ankumo aawo mpaakakuluka masusu, alimwi kwalibonya mbuli kuti ncinsenda mulukanda lwakwe, 44 nkokuti muntu ooyo ngusicinsenda. Ulisofweede, alimwi mupaizi weelede kumwaamba kuti ulisofweede akaambo kabulwazi ibuli amutwe wakwe. 45 Zisani zyasicinsenda zyeelede kuzapaulwa, masusu aakwe taayelede kukamunwa alimwi weelede kulivwumba kumulomo akoompolola kuti, ‘Ndilisofweede, ndilisofweede!’ 46 Ciindi coonse ncali abulwazi unoosofweede. Mbwaanga muntu ooyo ulisofweede, weelede kukkala alikke anze aankambi.+

47 “Ikuti naa cisani caba acinsenda, cibe cisani caboya naa camulembo muuba-uba, 48 naa mocili muntali yamubulamfwu naa yamubwamba bwacisani cakusuma naa cilukidwe, naa mucikutu naa mucintu cili coonse cacikutu, 49 akuti kwalibonya bulwazi bwamubala wanyanzabili uuvwelene awamungunga waji naa uusalala-salala mucisani naa mucikutu, muntali yamubulamfwu naa yamubwamba bwacisani naa mucintu cili coonse cacikutu, oobo mbulwazi bwacinsenda, alimwi ceelede kutondezyegwa kumupaizi. 50 Imupaizi uyoobulanga-langa bulwazi, alimwi weelede kuzandula cintu eeco cijisi bulwazi mazuba aali ciloba.+ 51 Aakubulanga-langa bulwazi mubuzuba bwaciloba akubona kuti bulwazi bwayandilila kucisani naa muntali yamubulamfwu naa yamubwamba bwacisani naa mucintu cili coonse cacikutu (kufwumbwa naa cikutu cibelesyegwa mulimo nzi), bulwazi oobo ncinsenda ciyambukila alimwi cintu eeco cilisofweede.+ 52 Weelede kucuumpa cisani eeco, cibe caboya naa camulembo muuba-uba, naa cintu cili coonse cacikutu caba abulwazi, nkaambo mbulwazi bwacinsenda ciyambukila. Ceelede kuumpwa mumulilo.

53 “Pele kuti mupaizi naabulanga-langa bulwazi wajana kuti tiibwayandilila kucisani naa muntali yamubulamfwu naa yamubwamba bwacisani naa mucintu cili coonse cacikutu, 54 mupaizi uyoolailila kuti bacisanzye cintu eeco cijisi cinsenda, eelyo uyoocizandula alimwi mazuba aali ciloba. 55 Mpoonya mupaizi uyoocilanga-langa cintu cijisi bulwazi camana kusanzyigwa cakulomya. Ikuti naa bulwazi tiibwacinca nokuba kuti bulwazi tiibwayandilila, cilisofweede. Weelede kucuumpa mumulilo, mbwaanga caligwa bulwazi, mukati naa aanze.

56 “Pele ikuti mupaizi naabulanga-langa bulwazi wajana kuti tabucilibonyi kapati nicamana kusanzyigwa cakulomya, uyoocizapula cibeela cacisani naa cacikutu icijisi bulwazi. 57 Nokuba boobo, ikuti kacicilibonya kucisani naa muntali yamubulamfwu naa yamubwamba bwacisani naa mucintu cili coonse cacikutu, nkokuti bulwazi oobo buyabuyandilila, alimwi weelede kuumpa cintu cili coonse cijisi bulwazi mumulilo.+ 58 Pele ikuti naa bulwazi tabucilibonyi kucisani naa kucintu cili coonse cacikutu ncomwasanzya, ceelede kusanzyigwa alimwi, eelyo ciyoosalala.

59 “Ooyu ngomulawo wabulwazi bwacinsenda buli kucisani caboya naa camulembo muuba-uba, naa mocili muntali yamubulamfwu naa yamubwamba bwacisani, naa mucintu cili coonse cacikutu, kutegwa kuzyibwe naa cilasalala naa cilisofweede.”

14 Jehova wakazumanana kwaambila Musa kuti: 2 “Ooyu ngomulawo sicinsenda ngwayelede kutobela mubuzuba bwakusalazyigwa kwakwe, ciindi nayelede kuletwa kumupaizi.+ 3 Mupaizi uyakuunka anze aankambi kutegwa akamulange-lange. Ikuti sicinsenda wapona kubulwazi bwacinsenda, 4 mupaizi weelede kumulailila kuti alete bayuni basalala bobilo, kasamu kakkedari, katambo kasalala pyu alimwi ahisopo kutegwa asalazyigwe.+ 5 Mupaizi weelede kulailila kuti muyuni omwe ajaigwe atala aanongo iijisi maanzi aamumulonga. 6 Pele weelede kubweza muyuni iwasyaala, kasamu kakkedari, katambo kasalala pyu alimwi ahisopo, akuzinyika antoomwe mubulowa bwamuyuni iwajaigwa atala aamaanzi aamumulonga. 7 Mpoonya uyoosansaila bulowa ziindi zili ciloba amuntu ooyo uulisalazya kucinsenda alimwi weelede kumwaamba kuti ulasalala, eelyo weelede kulekezya muyuni uupona kuti aulukile musyokwe.+

8 “Muntu ooyo uulisalazya weelede kuwasya zisani zyakwe, kugela masusu aakwe oonse akusamba, mpoonya ulasalala. Amana ulakonzya kuboola munkambi, pele weelede kukkala anze aatente lyakwe mazuba aali ciloba. 9 Mubuzuba bwaciloba weelede kugela masusu oonse aakumutwe wakwe akugela cilezu azikoye. Amana kugela masusu aakwe oonse, uyoowasya zisani zyakwe akusamba amubili, eelyo uyoosalala.

10 “Mubuzuba bwalusele weelede kuleta bagutu bobilo bamwaka omwe alimwi ambelele mpwizi+ yamwaka omwe, zipaanzi zyakkumi zyotatwe zyaefa* yafulaulu kuti ube cituuzyo camaila+ cikandidwe amafwuta alimwi amafwuta aakkwana lufwulu* lomwe;+ 11 alimwi mupaizi amwaamba kuti ulasalala weelede kumuleta muntu ooyo uulisalazya, antoomwe azituuzyo kubusyu bwa Jehova kumulyango watente lyakuswaanganina. 12 Mupaizi weelede kubweza mugutu omwe akumutuula kali cituuzyo camilandu+ antoomwe amafwuta aayo aakkwana lufwulu alimwi weelede kuziyumba ooku akooku kacili cituuzyo cakuyumba kubusyu bwa Jehova.+ 13 Mpoonya uyoojaya mugutu kubusena ooko kujailwa cituuzyo cazibi acituuzyo cuumpwa,+ mubusena busalala, nkaambo cituuzyo camilandu ncamupaizi+ mbubonya mbuli cituuzyo cazibi. Ncintu cisalalisya.+

14 “Mpoonya mupaizi uyoobweza bulowa bwacituuzyo camilandu akubulamba kukutwi kwakululyo mpokulaansi kwayooyo uulisalazya akucaala cakwe cakujanza lyalulyo acakukuulu kwakululyo. 15 Eelyo kuzwa kumafwuta+ aayo aakkwana lufwulu mupaizi weelede kutila amwi mujanza lyakwe lyalumwensyi. 16 Mpoonya mupaizi weelede kutompa munwe wakwe wakululyo mumafwuta aali mujanza lyakwe lyalumwensyi akwaasansaila amunwe wakwe ziindi zili ciloba kumbele lya Jehova. 17 Mpoonya mafwuta amwi uyakwaalamba kukutwi kwakululyo mpokulaansi kwayooyo uulisalazya akucaala cakwe cakujanza lyalulyo acakukuulu kwakululyo atala aabulowa bwacituuzyo camilandu. 18 Imafwuta aasyaala mujanza lyakwe mupaizi uyoomunanika amutwe muntu ooyo uulisalazya, eelyo mupaizi uyoomanya milandu yakwe kubusyu bwa Jehova.+

19 “Mupaizi uyootuula cituuzyo cazibi+ akumanya milandu yayooyo uulisalazya kubusofwaazi bwakwe, mpoonya uyoojaya cituuzyo cuumpwa. 20 Alimwi mupaizi uyootuula cituuzyo cuumpwa acituuzyo camaila+ aacipaililo, aboobo uyoomanya milandu+ yamuntu ooyo, eelyo uyoosalala.+

21 “Nokuba boobo, kuti kali mucete cakuti takonzyi kuzijana zintu eezyi, nkokuti weelede kuleta mugutu omwe kali cituuzyo camilandu akuciyumba ooku akooku kutegwa amanye milandu yakwe, cipaanzi cakkumi caefa* yafulaulu uukandidwe amafwuta kacili cituuzyo camaila, amafwuta aakkwana lufwulu, 22 nziba zyobilo naa twana twankwilimba tobilo, kweelana anzyakonzya kujana. Komwe kayooba kacituuzyo cazibi, eelyo kamwi kayooba kacituuzyo cuumpwa.+ 23 Mubuzuba bwalusele,+ uyoozileta kumupaizi kutegwa asalazyigwe kumulyango watente lyakuswaanganina kubusyu bwa Jehova.+

24 “Mupaizi uyoobweza mugutu uucili mwana wacituuzyo camilandu+ alimwi amafwuta aakkwana lufwulu, eelyo uyooziyumba ooku akooku kazili cituuzyo cakuyumba kubusyu bwa Jehova.+ 25 Mpoonya uyoojaya mugutu ooyo uucili mwana wacituuzyo camilandu, eelyo mupaizi uyoobweza bulowa bwacituuzyo camilandu akubulamba kukutwi kwakululyo mpokulaansi kwayooyo uulisalazya akucaala cakwe cakujanza lyalulyo acakukuulu kwakululyo.+ 26 Mupaizi weelede kutila mafwuta amwi mujanza lyakwe lyalumwensyi,+ 27 kumane uyoosansaila mafwuta aamwi aali mujanza lyakwe lyalumwensyi amunwe wakwe wakululyo ziindi zili ciloba kubusyu bwa Jehova. 28 Mpoonya mupaizi uyoobikka mafwuta aamwi aali mujanza lyakwe kukutwi kwakululyo mpokulaansi kwayooyo uulisalazya akucaala cakwe cakujanza lyalulyo acakukuulu kwakululyo abusena mpoonya mpaakalamba bulowa bwacituuzyo camilandu. 29 Kumane mupaizi uyoobikka mafwuta aasyaala mujanza lyakwe amutwe wamuntu ooyo uulisalazya kutegwa amanye milandu yakwe kubusyu bwa Jehova.

30 “Uyootuula nziba naa kana kankwilimba, kweelana ancajisi+ ooyo uulisalazya, 31 kamwi kabe kacituuzyo cazibi eelyo kamwi kabe kacituuzyo cuumpwa.+ Uyootuula zituuzyo eezyi antoomwe acituuzyo camaila; mpoonya mupaizi uyoomanya milandu yayooyo uulisalazya kubusyu bwa Jehova.+

32 “Ooyu ngomulawo wamuntu iwakali sicinsenda, pele uutajisi zintu ziyandika kutegwa asalazyigwe.”

33 Mpoonya Jehova wakati kuli Musa a Aroni: 34 “Mwaakusika munyika ya Kanana,+ eeyo njenditiimupe kuba lukono lwanu,+ ikuti naa ndazumizya bulwazi bwacinsenda+ kuti bube muŋanda yamunyika yalukono lwanu, 35 ooyo uuli aŋanda eeyo weelede kuboola akwaambila mupaizi kuti, ‘Kuli cilibonya mbuli kuti mbulwazi muŋanda yangu.’ 36 Mupaizi weelede kubalailila kuti bagwisye zintu zyoonse izili muŋanda katanaboola kuti alange-lange ceeco cilibonya mbuli bulwazi, kutegwa ataambi zintu zyoonse izili muŋanda kuti zilisofweede; kuzwa waawo mupaizi uyoonjila muŋanda eeyo akwiilanga-langa. 37 Uyakwiilanga-langa ŋanda aawo aali bulwazi, eelyo kuti bwaanda kabulibonya amubala wanyanzabili uuvwelene amungunga waji alimwi kabulibonya kuti bulinjide kapati mubwaanda, 38 mupaizi uyoozwa muŋanda eeyo, kumulyango waŋanda akwiijala kutegwa kutabi uunjila kwamazuba aali ciloba.+

39 “Mpoonya mubuzuba bwaciloba, mupaizi uyoopiluka akuyakwiilanga-langa ŋanda eeyo. Ikuti naa wajana kuti bulwazi bwayandilila mubwaanda, 40 nkokuti mupaizi uyoopa malailile, eelyo mabwe aajisi bulwazi ayelede kukolomonwa akusowelwa kunze aamunzi ooko kusowelwa zintu zisofweede. 41 Mpoonya uyoolailila kuti bwaanda bwamukati boonse bupalwe, alimwi bulongo ibwapalwa bweelede kusowelwa kunze aamunzi ooko kusowelwa zintu zisofweede. 42 Eelyo aawo mpobakagwisya mabwe bayoobikka aambi, alimwi uyoolailila kuti balete bulongo bumbi akwiizilulula alimwi ŋanda.

43 “Ikuti naa bulwazi bwatalika alimwi muŋanda musyule lyakugusya mabwe aali abulwazi, kwiipala akwiisyingulula alimwi, 44 nkokuti mupaizi weelede kunjila akwiilanga-langa alimwi. Ikuti bulwazi bwayandilila muŋanda, ncinsenda ciyambukila.+ Ŋanda eeyo ilisofweede. 45 Eelyo uyoolailila kuti ŋanda eeyo imwaigwe–mabwe aanjiyo, zisamu, abulongo bwayo boonse–akutolwa kunze aamunzi ooko kusowelwa zintu zisofweede.+ 46 Pele kufwumbwa muntu uunjila muŋanda mumazuba ngoijalidwe+ uyoosofwaala kusikila kumangolezya;+ 47 alimwi kufwumbwa muntu woona muŋanda eeyo naa kulida mumo weelede kuwasya zisani zyakwe.

48 “Nokuba boobo, ikuti naa mupaizi naaboola kwiilanga-langa wajana kuti bulwazi tiibwalibonya muŋanda musyule lyakwiisyingulula alimwi, mupaizi uyakwaamba ŋanda eeyo kuti ilasalala, nkaambo bulwazi bwamana. 49 Ikutegwa aisalazye ŋanda kubusofwaazi,* weelede kubweza bayuni bobilo, kasamu kakkedari, katambo kasalala pyu alimwi ahisopo.+ 50 Weelede kujaya muyuni omwe atala aanongo iijisi maanzi aamumulonga. 51 Eelyo uyoobweza kasamu kakkedari, hisopo, katambo kasalala pyu amuyuni iwasyaala akuzinyika mubulowa bwamuyuni iwajaigwa atala aamaanzi aamumulonga, mpoonya uyoosansaila ŋanda eeyo ziindi zili ciloba.+ 52 Lino uyakwiisalazya ŋanda kubusofwaazi* kubelesya bulowa bwamuyuni, maanzi aamumulonga, muyuni iwasyaala, kasamu kakkedari, hisopo alimwi akatambo kasalala pyu. 53 Kumane uyoolekezya muyuni wasyaala kuti aulukile musyokwe kunze aamunzi aboobo uyoomanya milandu yaŋanda eeyo, eelyo iyoosalala.

54 “Ooyu ngomulawo wabulwazi bwacinsenda buli boonse, bulwazi bwakumutwe naa kucilezu,+ 55 cinsenda cakucisani+ naa kuŋanda,+ 56 kuzimba, kuba atukoto-koto alimwi akuba atubala-bala,+ 57 kutegwa muzyibe naa cintu cilisofweede naa cilasalala.+ Ooyu ngomulawo uujatikizya cinsenda.”+

15 Lino Jehova wakaambila Musa a Aroni kuti: 2 “Mwaambaule abana Israyeli akubaambila kuti, ‘Ikuti mwaalumi waciswa bulwazi bwakusensa kubwaalumi, zintu eezyo zilamusofwaazya.+ 3 Ulasofwaala akaambo kazintu eezyo, kufwumbwa naa kazizumanana kuzwa kubwaalumi naa kuti zyamusinka kubwaalumi bwakwe, ncimwi buyo ulisofweede.

4 “‘Kufwumbwa bulo aawo mpaaona ooyo uusensa kubwaalumi bulasofwaala, alimwi acintu cili coonse ncaakkala cilasofwaala. 5 Muntu uuguma bulo bwamuntu ooyo weelede kuwasya zisani zyakwe akusamba, alimwi ulasofwaala kusikila kumangolezya.+ 6 Kufwumbwa muntu wakkala acintu ncaakkede muntu ooyo uusensa kubwaalumi weelede kuwasya zisani zyakwe akusamba, alimwi ulasofwaala kusikila kumangolezya. 7 Kufwumbwa uuguma muntu uusensa kubwaalumi weelede kuwasya zisani zyakwe akusamba, alimwi ulasofwaala kusikila kumangolezya. 8 Ikuti naa muntu uusensa kubwaalumi waswida muntu mate, ooyo iwaswidwa mate weelede kuwasya zisani zyakwe akusamba, alimwi ulasofwaala kusikila kumangolezya. 9 Kufwumbwa cikkalilo ncaakkala muntu ooyo uuciswa bulwazi bwakusensa kubwaalumi cilasofwaala. 10 Kufwumbwa muntu uuguma cintu cili coonse ncaakkede muntu ooyo ulasofwaala kusikila kumangolezya, amuntu uuli woonse uunyamuna zintu eezyo weelede kuwasya zisani zyakwe akusamba, alimwi ulasofwaala kusikila kumangolezya. 11 Ikuti naa muntu uusensa kubwaalumi+ waguma muntu katasambide kumaanza, ooyo wagumwa weelede kuwasya zisani zyakwe akusamba, alimwi ulasofwaala kusikila kumangolezya. 12 Cibiya ncaaguma muntu uusensa kubwaalumi ceelede kupwaigwa, alimwi cibikkilo cili coonse cacisamu ncaaguma ceelede kusanzyigwa.+

13 “‘Lino naa zintu izyali kusensa zyaleka eelyo muntu ooyo wapona, uyoobala mazuba aali ciloba aakusalazyigwa kwakwe alimwi weelede kuwasya zisani zyakwe akusamba mumaanzi aayenda eelyo uyoosalala.+ 14 Mubuzuba bwalusele, weelede kubweza nziba zyobilo naa twana twankwilimba tobilo,+ akuboola kubusyu bwa Jehova kumulyango watente lyakuswaanganina akumupa mupaizi. 15 Mupaizi uyootuula tuyuni ootu, kamwi kayooba kacituuzyo cazibi mpoonya kamwi kayooba kacituuzyo cuumpwa, eelyo uuyoomanya milandu yamuntu ooyo kubusyu bwa Jehova kujatikizya bulwazi bwakwe bwakusensa kubwaalumi.

16 “‘Lino ikuti naa mwaalumi wasuba bwaalumi, weelede kusamba mubili woonse alimwi ulasofwaala kusikila kumangolezya.+ 17 Kufwumbwa cisani naa cintu cili coonse cacikutu aawo bwaalumi mpobwalokela weelede kuciwasya alimwi cilasofwaala kusikila kumangolezya.

18 “‘Ikuti naa mwaalumi woona amukaintu eelyo wasuba bwaalumi, beelede kusamba alimwi balasofwaala kusikila kumangolezya.+

19 “‘Ikuti naa mukaintu kazwa bulowa, ulazumanana kasofweede mazuba aali ciloba ngali kumwezi.+ Kufwumbwa muntu wamuguma ulasofwaala kusikila kumangolezya.+ 20 Kufwumbwa cintu mpaaona ciindi nasofweede akaambo kakuba kumwezi cilasofwaala, alimwi cintu cili coonse ncaakkala cilasofwaala.+ 21 Kufwumbwa uuguma bulo bwakwe weelede kuwasya zisani zyakwe akusamba alimwi ulasofwaala kusikila kumangolezya. 22 Muntu uuli woonse uuguma cintu ncaakkede weelede kuwasya zisani zyakwe akusamba alimwi ulasofwaala kusikila kumangolezya. 23 Ikuti muntu waguma bulo naa cintu cimbi ncaakkede, ulasofwaala kusikila kumangolezya.+ 24 Ikuti mwaalumi woona anguwe eelyo wasofwaala akaambo kabulowa bwakwe,+ nkokuti uyoosofwaala mazuba aali ciloba, alimwi bulo buli boonse mpaaona buyoosofwaala.

25 “‘Ikuti mukaintu kazwa bulowa mazuba manji+ ciindi natali kumwezi,+ akuti bulowa bwazumanana kuzwa kwiindilila aciindi cakwe cakuba kumwezi, nkokuti unoosofweede mazuba oonse aayo mbuli ciindi nali kumwezi. 26 Bulo buli boonse mpaaona mumazuba ngazwa bulowa buyooba mbuli bulo mpaona ciindi nali kumwezi,+ alimwi kufwumbwa cintu ncaakkala ciyoosofwaala mbuli cintu ncaakkala ciindi nali kumwezi. 27 Kufwumbwa iwaziguma ulasofwaala, eelyo weelede kuwasya zisani zyakwe akusamba alimwi ulasofwaala kusikila kumangolezya.+

28 “‘Nokuba boobo, ikuti naa bulowa ibwali kuzwa bwaleka, weelede kubala mazuba aali ciloba kuzwa nobwaleka, kuzwa waawo ulasalala.+ 29 Mubuzuba bwalusele, weelede kubweza nziba zyobilo naa twana twankwilimba tobilo,+ akutuleta kumupaizi kumulyango watente lyakuswaanganina.+ 30 Mupaizi uyootuula tuyuni ootu, kamwi kayooba kacituuzyo cazibi mpoonya kamwi kayooba kacituuzyo cuumpwa, eelyo uyoomanya milandu yamukaintu ooyo kubusyu bwa Jehova kujatikizya kuzwa bulowa.+

31 “‘Aboobo mweelede kubagwasya bana Israyeli kuti basalale, kutegwa batafwi mubusofwaazi bwabo akaambo kakusofwaazya tente lyangu lyakukombela, ilili akati kabo.+

32 “‘Ooyu ngomulawo uujatikizya mwaalumi uusensa kubwaalumi amwaalumi wasofwaala akaambo kakusuba bwaalumi,+ 33 mukaintu uuli kumwezi,+ amuntu uusensa kubwaalumi naa kubukaintu,+ alimwi amwaalumi iwoonana amukaintu uusofweede.’”

16 Jehova wakaambaula a Musa nobakafwa bana ba Aroni bobilo aabo ibakafwa nibakamusikila Jehova+ munzila iiteelede. 2 Jehova wakati kuli Musa: “Komwaambila Aroni munyoko kuti atanoonjili kufwumbwa ciindi mubusena busalala+ kunze aacisitilizyo,+ kumbele lyacivwunisyo icili atala lya Bbokesi kutegwa atafwi,+ nkaambo mukkumbi+ ndiyoolibonya atala lyacivwunisyo.+

3 “Nzyeezyi zintu nzyayelede kuletelezya Aroni nanjila mubusena busalala: mupoho uucili mwana wacituuzyo cazibi+ amugutu wacituuzyo cuumpwa.+ 4 Weelede kusama cisani camilembo mibotu myuuba-uba,+ zibbudula*+ zibotu alimwi weelede kulyaanga lutambo lwamulembo+ mubotu akulyaanga citambala+ camulembo mubotu kumutwe. Nzisani zisetekene.+ Weelede kusamba+ akuzisama.

5 “Weelede kubweza mumbungano yabana Israyeli+ tujembwe tobilo twacituuzyo cazibi amugutu omwe wacituuzyo cuumpwa.

6 “Mpoonya Aroni weelede kuleta mupoho wacituuzyo cazibi zyakwe, eelyo uyoomanya milandu yakwe+ ayabasiŋanda bakwe.

7 “Lino uyoobweza tujembwe tobilo akutwiimika kubusyu bwa Jehova kumulyango watente lyakuswaanganina. 8 Mpoonya Aroni weelede kuuma cisolo kujatikizya tujembwe tobilo, kutegwa kamwi kabe ka Jehova eelyo kamwi kabe ka Azazeli.* 9 Aroni weelede kutuula kajembwe ikawidwa cisolo+ citondezya kuti nkika Jehova, alimwi weelede kukatuula kabe cituuzyo cazibi. 10 Pele kajembwe ikawidwa cisolo icitondezya kuti nka Azazeli keelede kwiimikwa kakali kaumi kubusyu bwa Jehova kuti kamanye milandu, kutegwa kalekwe kaunke munkanda+ kakali ka Azazeli.

11 “Mpoonya Aroni weelede kuleta mupoho wacituuzyo cazibi zyakwe kuti amanye milandu yakwe ayabasiŋanda bakwe; kuzwa waawo weelede kujaya mupoho ooyo wacituuzyo cazibi zyakwe.+

12 “Weelede kubweza twakunyamwida mulilo+ tuzwide makala aamulilo aazwa acipaililo+ kubusyu bwa Jehova, alimwi maanza aakwe oonse obilo kaazwide tununkilizyo tubotu,+ eelyo weelede kuzileta kunze aacisitilizyo.+ 13 Weelede kubikka tununkilizyo amulilo kubusyu bwa Jehova,+ alimwi busi bwatununkilizyo bweelede kuvwumba civwunisyo ca Bbokesi,+ eeco cili atala lya Bumboni,+ kutegwa atafwi.

14 “Weelede kubweza bulowa bwamupoho+ akubusansaila amunwe wakwe kumbele lyacivwunisyo kulubazu lwakujwe, alimwi akusansaila bulowa bumwi amunwe wakwe ziindi zili ciloba kumbele lyacivwunisyo.+

15 “Mpoonya uyookajaya kajembwe kacituuzyo cazibi zyabantu,+ alimwi weelede kuleta bulowa+ kunze aacisitilizyo+ akubusansaila kumbele lyacivwunisyo mbubonya mbwaakacita bulowa bwamupoho.

16 “Weelede kumanya milandu yabusena busalala akaambo kabusofwaazi bwabana Israyeli alimwi akaambo kamilandu azibi zyabo+ zyoonse, oobu mbwayelede kucita akutente lyakuswaanganina ilili akati kabo mumilimo yabo iisofweede.

17 “Kunyina muntu uumbi iweelede kuba mutente lyakuswaanganina ciindi nanjila kumanya milandu mubusena busalala mane kusikila azwe. Weelede kumanya milandu yakwe, yabasiŋanda bakwe+ alimwi ayambungano yabana Israyeli yoonse.+

18 “Mpoonya uyoozwa akuunka kucipaililo+ icili kubusyu bwa Jehova akumanya milandu yaco, alimwi uyoobweza bulowa bumwi bwamupoho abwampongo akubulamba kumeja aacipaililo kumabazu oonse. 19 Alimwi weelede kucisansaila bulowa bumwi amunwe wakwe ziindi zili ciloba akucisalazya kubusofwaazi bwamilimo yabana Israyeli.

20 “Amana kumanya milandu+ yabusena busalala, tente lyakuswaanganina alimwi acipaililo,+ weelede kuleta mpongo iipona.+ 21 Aroni uyoobikka maanza aakwe oonse obilo amutwe wampongo eeyo iipona akwaamba milandu yabana Israyeli yoonse, ndubizyo zyabo zyoonse azibi zyabo zyoonse, akuzibikka amutwe wampongo+ akwiipa yooyo uusalidwe kwiitola kuti akaileke yuunke munkanda. 22 Mpongo eeyo yeelede kutola milandu yabo+ yoonse, alimwi weelede kwiileka kuti yuunke munkanda.+

23 “Lino Aroni weelede kunjila mutente lyakuswaanganina akusamununa zisani zyamilembo myuuba-uba nzyaasamide naali kunjila mubusena busalala, weelede kuzibikka mpoonya aawo. 24 Weelede kusamba amubili+ mubusena busalala akusama zisani zyakwe;+ mpoonya uyoozwa anze akutuula zituuzyo zyuumpwa,+ icakwe acabantu,+ akumanya milandu yakwe ayabantu.+ 25 Uyakuumpa mafwuta aacituuzyo cazibi kuti asuke busi acipaililo.

26 “Muntu ooyo walekezya mpongo ya Azazeli+ munkanda weelede kuwasya zisani zyakwe akusamba amubili, eelyo amana aboole munkambi.

27 “Mupoho wacituuzyo cazibi ampongo yacituuzyo cazibi, izyagusyigwa bulowa ibwaletwa kumanya milandu mubusena busalala, zyeelede kutolwa anze aankambi, zikutu, nyama abufwusi bwazyo zyeelede kuumpwa mumulilo.+ 28 Muntu ooyo wazyuumpa weelede kuwasya zisani zyakwe akusamba amubili, eelyo amana aboole munkambi.

29 “Ooyu uyoomubeda mulawo walyoonse: Mubuzuba bwa 10 bwamwezi waciloba, mweelede kuusa akaambo kazibi zyanu, alimwi tamweelede kubeleka mulimo uuli woonse,+ naba sicisi naba mweenzu ukkala akati kanu. 30 Mubuzuba oobu kuyooba kumanya milandu+ yanu akumwaamba kuti mulasalala. Muyoosalazyigwa kuzibi zyanu zyoonse kubusyu bwa Jehova.+ 31 Mbuzuba bwasabata bwakuti mulyookezye, alimwi mweelede kuusa akaambo kazibi zyanu.+ Ooyu mulawo walyoonse.

32 “Mupaizi ooyo uuyakunanikwa+ akupegwa nguzu zyakuba mupaizi+ mbuli simulyazina mubusena bwabausyi+ weelede kumanya milandu alimwi weelede kusama zisani zyamilembo myuuba-uba,+ izisani zisalala.+ 33 Weelede kumanya milandu yabusena busalala,+ tente lyakuswaanganina+ alimwi acipaililo;+ uyoomanya amilandu yabapaizi ayabana Israyeli boonse.+ 34 Ooyu uyoomubeda mulawo walyoonse,+ kutegwa kamumanya milandu yabana Israyeli kujatikizya zibi zyabo zyoonse ciindi comwe amwaka.”+

Aboobo wakacita mbubonya Jehova mbwaakalailila Musa.

17 Mpoonya Jehova wakati kuli Musa: 2 “Komwaambila Aroni, bana bakwe abana Israyeli boonse kuti, ‘Mboobu Jehova mbwaalailila:

3 “‘“Ikuti naa muntu waluzubo lwa Israyeli wajaya mupoho, mugutu uucili mwana naa mpongo munkambi naa kunze aankambi, 4 muciindi cakuleta munyama ooyo kumulyango watente lyakuswaanganina kuti amutuule kacili cituuzyo kuli Jehova kumbele lyatente lyakukombela lya Jehova, muntu ooyo uyooba amulandu wabulowa. Watila bulowa, aboobo muntu ooyo weelede kujaigwa kutegwa azwe akati kabantu bakwe. 5 Ceelede kuba oobo kutegwa bana Israyeli kabaleta zipaizyo zyabo eezyo nzyobatuulila musyokwe kuli Jehova, kumulyango watente lyakuswaanganina kumupaizi. Beelede kutuula zintu eezyi kazili zipaizyo zyalumvwano kuli Jehova.+ 6 Kumane mupaizi uyoosansaila bulowa acipaililo ca Jehova kumulyango watente lyakuswaanganina akuumpa mafwuta kutegwa asuke busi abe bweema bununkilila kuli Jehova.+ 7 Aboobo tabeelede kutuula limbi zipaizyo zyabo kumadaimona aalibonya mbuli mpongo,*+ aayo ngobavwuula limwi.+ Ooyu uyooba mulawo wanu walyoonse mumazyalani aanu oonse.”’

8 “Weelede kubaambila kuti, ‘Kufwumbwa muntu waluzubo lwabana Israyeli naa mweenzu uukkala akati kanu uutuula cituuzyo cuumpwa naa cipaizyo, 9 pele tacileti kumulyango watente lyakuswaanganina kutegwa ape Jehova, muntu ooyo weelede kujaigwa.+

10 “‘Kufwumbwa muntu waluzubo lwabana Israyeli naa mweenzu uukkala akati kanu uulya bulowa buli boonse,+ ndiyoomukaka muntu ooyo uulya bulowa, eelyo ndiyoomujaya. 11 Nkaambo buumi bwacintu cipona buli mubulowa,+ alimwi mebo ndamuzumizya kuti kamububelesya acipaililo+ kumanya milandu yanu, akaambo kakuti bulowa mbobumanya milandu+ nkaambo momuli buumi. 12 Nkakaambo kaako ndaambila bana Israyeli kuti: “Kunyina muntu weelede kulya bulowa alimwi kunyina mweenzu uukkala akati kanu+ iweelede kulya bulowa.”+

13 “‘Ikuti naa muna Israyeli umwi naa mweenzu uukkala akati kanu wavwima akujaya munyama wamusyokwe naa muyuni uuligwa, weelede kutila bulowa+ ansi akubuvwumba abulongo. 14 Nkaambo buumi bwacintu cili coonse cipona buli mubulowa nkaambo momuli buumi. Aboobo ncondaambila bana Israyeli kuti: “Tamweelede kulya bulowa bwacintu cili coonse cipona, nkaambo buumi bwacintu cili coonse buli mubulowa. Kufwumbwa uubulya uyoojaigwa.”+ 15 Kufwumbwa muntu uulya nyama yamunyama iwakalifwida naa iwakalumwa amunyama wamusyokwe,+ kufwumbwa naa ngusicisi naa mweenzu, ulasofwaala kusikila kumangolezya+ aboobo weelede kuwasya zisani zyakwe akusamba, eelyo uyoosalala. 16 Pele ikuti naa tawasyi zisani zyakwe alimwi naa tasambi amubili, uyoolyaambilila zibi zyakwe.’”+

18 Jehova wakazumanana kwaambila Musa kuti: 2 “Kobaambila bana Israyeli kuti, ‘Ndime Jehova Leza wanu.+ 3 Tamweelede kucita mbobakali kucita bana Egepita mucisi oomo momwakali kukkala, alimwi tamweelede kucita mbobacita bana Kanana, munyika mondimutola.+ Tamweelede kutobela ziyanza zyabo pe. 4 Mweelede kutobela mbeta zyangu, amilawo yangu mweelede kwiitobela akweenda mulinjiyo.+ Ndime Jehova Leza wanu. 5 Mweelede kubamba milawo yangu ambeta zyangu; kufwumbwa muntu uucita boobo uyooba abuumi akaambo kakutobela zintu eezyi.+ Ndime Jehova.

6 “‘Kutabi muntu akati kanu uuswena afwaafwi amusazinyina kuti aonane anguwe.*+ Ndime Jehova. 7 Utaonani abauso alimwi utaonani abanyoko. Toyelede koonana ambabo nkaambo mbaanyoko.

8 “‘Utaonani abamukauso.+ Kucita boobo nkuusya bauso nsoni.*

9 “‘Toyelede koonana amucizyi wako, abe mwana wabauso naa mwana wabanyoko, ngomuzyalwa limwi kuli bauso abanyoko naa muzyaanyina.+

10 “‘Toyelede koonana amuzyukulu wako musimbi, abe mwana wamwanaako musankwa naa wamwanaako musimbi, nkaambo ncinswe cako.

11 “‘Toyelede koonana amwana musimbi wabamukauso, imwana wabauso, nkaambo mucizyi wako.

12 “‘Toyelede koonana amucizyi wabauso, nkaambo bazyalwa limwi abauso.+

13 “‘Toyelede koonana amukaintu imwanookwabo abanyoko, nkaambo bazyalwa limwi abanyoko.

14 “‘Toyelede kuvwumbula cinswe camwanookwabo abauso kwiinda mukoonana amukaintu wabo, nkaambo mbaanyoko.+

15 “‘Toyelede koonana amukamwanaako.+ Mukaintu wamwanaako, aboobo toyelede koonana anguwe.

16 “‘Toyelede koonana amukaintu wamunyoko,+ nkaambo nkuusya munyoko nsoni.*

17 “‘Toyelede koonana amukaintu alimwi amwanaakwe musimbi.+ Toyelede koonana amuzyukulu wakwe musimbi, abe mwana wamwanaakwe musankwa naba wamwanaakwe musimbi. Aaba nduzubo lwakwe; oobu mbukkale busesemya.*

18 “‘Utakwati mwanookwabo amukaintu wako kuti abe mukwatwanyina amukaintu wako+ akoonana anguwe ciindi mukaintu wako nacipona.

19 “‘Utasweni afwaafwi amukaintu kuti woonane anguwe ciindi cakusofwaala kwakwe nali kumwezi.+

20 “‘Toyelede koonana amukaintu wamweenzinyoko akulisofwaazya.+

21 “‘Toyelede kuzumizya mwanaako uuli woonse kutuulwa kuli Moleki.+ Utasofwaazyi zina lya Leza wako munzila eeyo pe.+ Ndime Jehova.

22 “‘Utaonani amusankwa mbubonya mboonana amukaintu.+ Eeco ncintu cisesemya.

23 “‘Mwaalumi teelede koonana amunyama akulisofwaazya anguwe; awalo mukaintu teelede kuunka kumunyama kutegwa aonane anguwe.+ Cilatondwa.

24 “‘Mutalisofwaazyi azintu zili zyoonse eezyi, nkaambo zintu eezyi zyoonse nzyobalisofwaazya bamasi aabo mbonditanda kubusyu bwanu.+ 25 Aboobo nyika yabo ilisofweede, alimwi ndiyoobasubula bantu bakkala mulinjiyo nkaambo kazibi zyabo, alimwi bayootandwa kuti bazwe munyika.+ 26 Pele nywebo mweelede kubamba milawo yangu ambeta zyangu,+ tamweelede kucita cintu cili coonse akati kazintu zyoonse eezyi zisesemya, kufwumbwa naa ngusicisi naa mweenzu uukkala akati kanu.+ 27 Nkaambo zintu zyoonse eezyi zisesemya nzyezintu bantu ibakamusaangunina kukkala munyika eeyo nzyobakali kucita,+ aboobo nyika ilisofweede. 28 Eelyo tamukatandwi munyika akaambo kakwiisofwaazya mbubonya mboiyootandwa misyobo eeyo yakamusaangunina. 29 Ikuti naa umwi wacita cintu cimwi akati kazintu eezyi zisesemya, boonse aabo bazicita beelede kujaigwa kutegwa bazwe akati kabantu babo. 30 Mweelede kutobela milawo yangu akutacita kufwumbwa zilengwa zisesemya izyakali kucitwa kubusyu bwanu+ kutegwa mutalisofwaazyi azintu eezyo. Ndime Jehova Leza wanu.’”

19 Jehova wakaambila Musa kuti: 2 “Kwaambaula ambungano yabana Israyeli yoonse akubaambila kuti, ‘Mweelede kusalala nkaambo mebo nde Jehova Leza wanu ndilasalala.+

3 “‘Umwi aumwi wanu weelede kulemeka* bausyi abanyina,+ alimwi mweelede kubamba masabata aangu.+ Ndime Jehova Leza wanu. 4 Mutataliki kukomba baleza babuyo+ naa kulipangila baleza bakufwula.+ Ndime Jehova Leza wanu.

5 “‘Ikuti naa mwatuula cipaizyo calumvwano kuli Jehova,+ mweelede kucituula munzila njakonzya kumukkomanina.+ 6 Mubuzuba mbocatuulwa cipaizyo alimwi abuzuba butobela ceelede kuligwa, pele icasyaala kusikila buzuba bwatatu ceelede kuumpwa mumulilo.+ 7 Ikuti naa cimwi caligwa mubuzuba bwatatu, ncisesemyo alimwi tacitambuliki pe. 8 Ooyo wacilya uyoolyaambilila cibi cakwe nkaambo wasofwaazya cintu cisalala ca Jehova, alimwi muntu ooyo weelede kujaigwa.

9 “‘Ciindi nomutebula, tamweelede kumaninizya muzyooko zyoonse zyamyuunda yanu, alimwi tamweelede kubwezelela zyasyaala.+ 10 Alimwi tamweelede kucela misaansa yasyaala mumyuunda yanu nokuba kubwezelela yeeyo yalokela ansi. Mweelede kwiisiila bacete*+ abeenzu. Ndime Jehova Leza wanu.

11 “‘Tamweelede kubba,+ kubeja,+ akucitilana calweeno umwi amweenzinyina. 12 Tamweelede kukonka cakubeja muzina lyangu+ akusofwaazya zina lya Leza wanu. Ndime Jehova. 13 Toyelede kuunina mweenzinyoko,+ alimwi toyelede kubba.+ Toyelede kuyobola zyakuvwola zyamubelesi wako busiku boonse kusikila mafwumofwumo.+

14 “‘Utasinganyi musinkematwi naa kubikka cilebyo kumbele lyamoofwu,+ weelede kuyoowa Leza wako.+ Ndime Jehova.

15 “‘Mutaciti cakutalulama mukubeteka kwanu. Utasalululi mucete akuyanda buyo muvwubi.+ Weelede kubeteka mweenzinyoko cakululama.

16 “‘Toyelede kuzinguluka akati kabantu bako+ koyaabubejekezya bamwi. Utakanzi kunyonyoona buumi* bwamweenzinyoko.*+ Ndime Jehova.

17 “‘Utasulaiki munyoko mumoyo wako.+ Weelede kumusinsa mweenzinyoko+ kutegwa utamusangani mucibi cakwe.

18 “‘Utapilusizyi muntu cibi+ nokuba kuba amfwundiilili kubantu bako, alimwi weelede kuyanda mweenzinyoko mbubonya mbuli mboliyanda omwini.+ Ndime Jehova.

19 “‘Mweelede kubamba milawo yangu: Utasanduli zivwubwa zyako amusyobo umbi wazivwubwa. Utasyangi misyobo yobilo yambuto mumuunda wako,+ alimwi toyelede kusama cisani cisumidwe amilembo yamisyobo yobilo.+

20 “‘Ikuti mwaalumi woonana amukaintu kakuli mukaintu ooyo mubelesi uusyomezyedwe kukwatwa kumwaalumi uumbi, pele tananununwa alimwi tanapegwa lwaanguluko, nkokuti beelede kusubulwa. Nokuba boobo, tabeelede kujaigwa pe, nkaambo mukaintu ooyo tanapegwa lwaanguluko. 21 Mwaalumi ooyo weelede kuleta mugutu wacituuzyo camilandu+ yakwe kuli Jehova kumulyango watente lyakuswaanganina. 22 Mupaizi uyoomanya milandu yamwaalumi ooyo akaambo kacibi ncaakacita, kwiinda mukutuula mugutu wacituuzyo camilandu kubusyu bwa Jehova, eelyo uyoolekelelwa cibi ncaakacita.

23 “‘Mwaakusika munyika eeyo njondamupa, akusyanga zisamu zyamicelo iiligwa, micelo yazisamu eezyo mweelede kwiibona kuti ilisofweede alimwi ilikasyidwe.* Kwamyaka yotatwe mulikasyidwe kwiilya.* Tayeelede kuligwa pe. 24 Pele mumwaka wane, micelo yazyo yoonse iyoosalala, mweelede kwiipa kuli Jehova apobwe lyakusekelela.+ 25 Mpoonya mumwaka wasanu, mulakonzya kulya micelo yazyo kutegwa butebuzi bwanu buyungizyigwe. Ndime Jehova Leza wanu.

26 “‘Tamweelede kulya cintu cili coonse cijisi bulowa.+

“‘Tamweelede kusonda naa kucita masalamuzi.+

27 “‘Tamweelede kugela masusu aali mumabali aamitwe yanu naa kugela cilezu mocili mumabali.+

28 “‘Tamweelede kulinengaula amibili yanu akaambo kamufwu+ naa kusimbwa pe. Ndime Jehova.

29 “‘Utasofwaazyi mwanaako musimbi kwiinda mukumucita kuba muvwuule,+ kutegwa nyika itaciti bwaamu akuzula kutalilemeka.+

30 “‘Mweelede kubamba masabata aangu+ alimwi mweelede kulemeka* tente lyangu lisalala. Ndime Jehova.

31 “‘Mutaunki kubasondi+ nokuba kubuzya makani kubaŋanga+ kutegwa mutasofwaazyigwi ambabo. Ndime Jehova Leza wanu.

32 “‘Nyamuka kumbele lyabaabo bajisi mvwi+ akulemeka bapati,+ alimwi weelede kuyoowa Leza wako.+ Ndime Jehova.

33 “‘Kuti mweenzu kakkala akati kanu mucisi canu, tamweelede kumupenzya pe.+ 34 Mweenzu uukkala akati kanu mweelede kumubona mbuli sicisinyoko;+ alimwi mweelede kumuyanda mbubonya mbomuliyanda nobeni, nkaambo anywebo mwakali beenzu mucisi ca Egepita.+ Ndime Jehova Leza wanu.

35 “‘Tamweelede kubelesya zipimyo zyabumpelenge mukupima amukweeleka zintu zili zyoonse.+ 36 Mweelede kubelesya zipimyo zili kabotu, mabwe aakupimya aali kabotu, zyeelekelo zyaefa zili kabotu* ansazi zili kabotu.*+ Ndime Jehova Leza wanu iwakamugwisya mucisi ca Egepita. 37 Aboobo mweelede kubamba milawo yangu yoonse ambeta zyangu zyoonse, alimwi mweelede kuzicita.+ Ndime Jehova.’”

20 Lino Jehova wakati kuli Musa: 2 “Kobaambila bana Israyeli kuti, ‘Kufwumbwa muna Israyeli amweenzu uukkede mu Israyeli uupa mwanaakwe uuli woonse kuli Moleki, weelede kujaigwa.+ Bantu bamucisi beelede kumujaya kwiinda mukumupwaya mabwe. 3 Mebo ndiyoomukaka muntu ooyo, alimwi ndiyoomujaya kutegwa azwe akati kabantu bakwe nkaambo wapa bana bakwe bamwi kuli Moleki alimwi wasofwaazya tente lyangu lisalala+ azina lyangu lisalala. 4 Ikuti naa bantu bamucisi bamulanga buyo muntu ooyo kakunyina kumujaya+ ciindi napa mwanaakwe uuli woonse kuli Moleki, 5 mebo ndiyoomukaka muntu ooyo amukwasyi wakwe.+ Ndiyoomujaya antoomwe abaabo boonse bamusangana mukuvwuula a Moleki.

6 “‘Muntu uuli woonse uunka kubasondi+ akubaŋanga+ kukuvwuula ambabo kumuuya, ndiyoomukaka alimwi ndiyoomujaya kutegwa azwe akati kabantu bakwe.+

7 “‘Mweelede kulisalazya kutegwa musalale,+ nkaambo ndime Jehova Leza wanu. 8 Alimwi mweelede kubamba milawo yangu akwiicita.+ Ndime Jehova uumusalazya.+

9 “‘Ikuti naa muntu wasinganya bausyi abanyina, weelede kujaigwa.+ Mbwaanga wasinganya bausyi abanyina, mulandu wabulowa bwakwe uli alinguwe.

10 “‘Lino kujatikizya mwaalumi wacita bumambe amukamuntu: Ooyo wacita bumambe amukamuntu weelede kujaigwa, mwaalumi ooyu alimwi amukaintu ooyo.+ 11 Mwaalumi woonana amukaintu wabausyi wausya bausyi nsoni.*+ Mwaalumi amukaintu ooyo beelede kujaigwa. Mulandu wabulowa bwabo uli aalimbabo. 12 Kuti naa mwaalumi woonana amukamwanaakwe, boonse bobilo beelede kujaigwa. Bacita cintu citondwa. Mulandu wabulowa bwabo uli aalimbabo.+

13 “‘Ikuti naa mwaalumi woonana amwaaluminyina mbubonya mbwaonana amukaintu, boonse bobilo bacita cintu cisesemya.+ Beelede kujaigwa. Mulandu wabulowa bwabo uli aalimbabo.

14 “‘Ikuti mwaalumi wakwata mukaintu alimwi abanyinazyala, oobu mbukkale busesemya.*+ Mwaalumi ooyo weelede kuumpwa mumulilo+ antoomwe amukaintu ooyo abanyina kutegwa bukkale busesemya oobu butazumanani akati kanu.

15 “‘Ikuti naa mwaalumi woona amunyama, weelede kujaigwa, awalo munyama weelede kujaigwa.+ 16 Alimwi kuti mukaintu waunka kumunyama kuti aonane anguwe,+ mweelede kumujaya antoomwe amunyama ooyo. Mulandu wabulowa bwabo uli aalimbabo.

17 “‘Ikuti naa mwaalumi woonana amucizyi wakwe, imwana wabausyi naa wabanyina akubona cinswe cakwe, awalo mucizyi wakwe wabona cinswe cakwe, aayo masampu.+ Beelede kujaigwa kutegwa bazwe akati kabantu babo. Wausya mucizyi wakwe nsoni.* Weelede kulyaambilila mulandu wakwe.

18 “‘Ikuti naa mwaalumi woonana amukaintu uuli kumwezi, nkokuti boonse bobilo bavwumbula kasensa kabulowa bwakwe.+ Boonse bobilo beelede kujaigwa kutegwa bazwe akati kabantu babo.

19 “‘Toyelede koonana amukaintu imwanookwabo abanyoko naa mucizyi wabauso, nkaambo kucita boobo nkuusya musazinyoko nsoni.+ Beelede kulyaambilila mulandu wabo. 20 Imwaalumi woonana amukaintu wabausyi basyoonto naa bapati, wausya bausyi basyoonto naa bapati nsoni.*+ Beelede kulyaambilila cibi cabo. Beelede kujaigwa kutegwa batazyali mwana. 21 Kuti mwaalumi wakwata mukaintu wamunyina, eeco ncintu cisesemya.+ Wausya munyina nsoni.* Tabeelede kuzyala mwana pe.

22 “‘Mweelede kubamba milawo yangu yoonse ambeta+ zyangu zyoonse akuzicita,+ kutegwa mutakatandwi munyika eeyo nkondimutola kuti mukakkale.+ 23 Tamweelede kutobela milawo yabamasi aabo mbonditanda kubusyu bwanu;+ nkaambo balazicita zintu zyoonse eezyi aboobo balandisesemya.+ 24 Nkakaambo kaako ndakamwaambila kuti: “Muyoovwuba nyika yabo alimwi mebo ndiyakwiipa kulindinywe kuti ikabe yanu, inyika iikunka buci amukupa.+ Ndime Jehova Leza wanu, iwamwaandaanya kuli bamasi.”+ 25 Mweelede kwaandaanya munyama uusalala amunyama uusofweede, muyuni uusofweede amuyuni uusalala;+ mutalisofwaazyi amunyama, muyuni alimwi acintu cili coonse cikalaba ansi, eezyo nzindapambula akwaamba kuti zilisofweede.+ 26 Mweelede kusalala kulindime, nkaambo mebo nde Jehova ndilasalala,+ alimwi ndilamwaandaanya kuzwa kuli bamasi kutegwa mube bangu.+

27 “‘Kufwumbwa mwaalumi naa mukaintu uusonda naa muŋanga weelede kujaigwa.+ Bantu beelede kubapwaya mabwe kusikila bafwa. Mulandu wabulowa bwabo uli aalimbabo.’”

21 Jehova wakaambila Musa kuti: “Kobaambila bapaizi, ibana ba Aroni kuti, ‘Kutabi mupaizi naba omwe akati kabo uulisofwaazya kwiinda mukuguma mutunta wamuntu akati kabantu bakwe.+ 2 Pele ulakonzya kucita oobo ikuti mufwu kali wamukwasyi, kuti naa kabali banyina, bausyi, mwanaakwe musankwa naa musimbi, mwanookwabo musankwa, 3 alimwi ulakonzya kulisofwaazya naa mucizyi wakwe ngobazyalwa limwi, ikuti kali nakalindu alimwi katanakwatwa. 4 Tayelede kulisofwaazya akaambo kamukaintu uukwetwe akati kabantu bakwe. 5 Tabeelede kugela munkulu+ naa kugela malezu aamumabali naa kulinengaula amibili yabo.+ 6 Beelede kusalala kuli Leza wabo,+ alimwi tabeelede kusofwaazya zina lya Leza wabo+ nkaambo mbambabo batuula zituuzyo zya Jehova zyuumpwa, cinkwa* ca Leza wabo, aboobo beelede kusalala.+ 7 Tabeelede kukwata mukaintu muvwuule,+ iwakasofwaazyigwa, naa iwakalekwa,+ nkaambo mupaizi ulasalala kuli Leza wakwe. 8 Muleelede kumusalazya,+ nkaambo ngonguwe uutuula cinkwa ca Leza wako. Abe muntu uusalala kulinduwe nkaambo mebo nde Jehova, nendimusalazya, ndilasalala.+

9 “‘Lino ikuti naa mwana musimbi wamupaizi walisofwaazya kwiinda mukuvwuula, wasofwaazya bausyi. Weelede kuumpwa mumulilo.+

10 “‘Mupaizi mupati akati kababunyina, ooyo wakatilwa mafwuta aakunanikwa amutwe+ alimwi iwakapegwa nguzu zyakusama zisani zyabupaizi,+ teelede kuleka kulikamuna masusu, alimwi teelede kuzapaula zisani zyakwe.+ 11 Walo teelede kuboola afwaafwi amutunta+ wamuntu uuli woonse; kufwumbwa naa ngwabausyi naa ngwabanyina, teelede kulisofwaazya. 12 Teelede kuzwa kutente lyakukombela alimwi teelede kusofwaazya tente lyakukombela lya Leza+ wakwe nkaambo citondezyo cakulyaaba cili alinguwe, nkokuti mafwuta aakunanikwa aa Leza wakwe.+ Ndime Jehova.

13 “‘Weelede kukwata nakalindu.+ 14 Teelede kukwata mukamufwu, mukaintu wakalekwa, mukaintu wakasofwaazyigwa naa muvwuule; pele weelede kukwata nakalindu kuzwa akati kabantu bakwe. 15 Teelede kusofwaazya lunyungu lwakwe akati kabantu bakwe,+ nkaambo ndime Jehova, ooyo uumusalazya.’”

16 Mpoonya Jehova wakaambila Musa kuti: 17 “Komwaambila Aroni kuti, ‘Taakwe mwaalumi walunyungu lwako mumazyalani aabo oonse uujisi kampenda iweelede kuboola afwaafwi kuzootuula cinkwa ca Leza wakwe. 18 Ikuti naa kuli mwaalumi uujisi kampenda, teelede kuboola afwaafwi kuzootuula cinkwa: moofwu naa mulema naa uujisi mpemo iizapukide naa uujisi cizo cimwi cilamfwu kwiinda ceenzinyina, 19 naba mwaalumi uufwuyukide kuulu naa janza, 20 naa uulaantunda naa kaduuli, naa uuciswa meso, naa uulaabwele naa siciguyula naa uupwaikide macende.+ 21 Kutabi mwaalumi walunyungu lwa Aroni mupaizi uujisi kampenda iweelede kuswena afwaafwi kuti atuule zituuzyo zya Jehova zyuumpwa. Akaambo kakuti ulaakampenda, teelede kuswena afwaafwi kuti atuule cinkwa ca Leza wakwe. 22 Ulakonzya kulya cinkwa ca Leza wakwe kuzwa kuzintu zisalalisya+ azyeezyo zisalala.+ 23 Nokuba boobo, teelede kuboola afwaafwi acisitilizyo,+ alimwi teelede kuswena afwaafwi acipaililo+ nkaambo ulaakampenda; teelede kusofwaazya tente+ lyangu, nkaambo ndime Jehova, ooyo uubasalazya.’”+

24 Aboobo Musa wakabaambila, Aroni abana bakwe alimwi abana Israyeli boonse.

22 Mpoonya Jehova wakaambila Musa kuti: 2 “Koambila Aroni abana bakwe kuti beelede kubikkila maano mbobabelesya zintu zisalala zyabana Israyeli akuti batasofwaazyi zina lyangu+ muzintu nzyobaleta kulindime.+ Ndime Jehova. 3 Kobaambila kuti, ‘Mumazyalani aanu oonse, kufwumbwa walunyungu lwanu uuswena afwaafwi azintu zisalala ciindi nasofweede, zintu eezyo bana Israyeli nzyobapa kuli Jehova, weelede kujaigwa kutegwa azwe kubusyu bwangu.+ Ndime Jehova. 4 Taakwe mwaalumi walunyungu lwa Aroni uujisi cinsenda+ naa uusensa kubwaalumi+ iweelede kulya zintu zisalala kusikila wapona,+ naba mwaalumi uuma muntu iwakasofwaala akaambo kakuguma mutunta+ naa ooyo iwasuba bwaalumi,+ 5 naa mwaalumi uuguma cimwi cazilenge zyeenda mubunji+ cisofweede, naa uuguma muntu uusofweede akaambo kabusofwaazi buli boonse, uukonzya kumusofwaazya.+ 6 Muntu uuguma cintu cili coonse cili boobu ulasofwaala kusikila kumangolezya alimwi teelede kulya cintu cili coonse cisalala, ccita kuti wasamba amubili.+ 7 Lyabbila zuba ulasalala, eelyo lino ulakonzya kulya zintu zisalala, nkaambo ncakulya cakwe.+ 8 Alimwi tayelede kulya munyama uuli woonse wakalifwida naa wakalumwa amunyamanyina, akusofwaazyigwa anguwe.+ Ndime Jehova.

9 “‘Beelede kutobela malailile aangu, kutegwa bataciti cibi akaambo kakutatobela malailile akufwa akaambo kakusofwaazya zintu zisalala. Ndime Jehova, ooyo uubasalazya.

10 “‘Kunyina muntu naba omwe uutazumizyidwe* iweelede kulya cintu cili coonse cisalala.+ Kunyina muzwakule uukkala amupaizi naa mubelesi wakwe weelede kulya cintu cili coonse cisalala. 11 Pele ikuti naa mupaizi waula muntu amali aakwe, muntu ooyo ulakonzya kulya cintu cisalala. Bazike ibakazyalilwa muŋanda yakwe abalo balakonzya kulya cakulya cakwe.+ 12 Ikuti naa mwana musimbi wamupaizi wakwatwa kumuntu uutali mupaizi,* musimbi ooyo takonzyi kulya zyakusanga zisalala. 13 Pele ikuti naa mwana musimbi wamupaizi wafwidwa mulumi naa kulekwa katajisi mwana, akujokela kuŋanda yabausyi nkwaakali kukkala naakacili mwana, ulakonzya kulya cakulya cabausyi;+ kunyina muntu uutazumizyidwe* weelede kulya cakulya eeco.

14 “‘Lino ikuti naa muntu umwi walya cintu cisalala cakutazyiba, weelede kuyungizya cipaanzi casanu alimwi akupa mupaizi cituuzyo cisalala.+ 15 Aboobo bapaizi tabeelede kusofwaazya zintu zisalala zyabana Israyeli, eezyo nzyobasanga kuli Jehova,+ 16 akuliletela cisubulo akaambo kamulandu wakulya zintu zisalala; nkaambo ndime Jehova, ooyo uubasalazya.’”

17 Jehova wakazumanana kwaambila Musa kuti: 18 “Koambila Aroni abana bakwe alimwi abana Israyeli boonse kuti, ‘Ikuti muna Israyeli naa mweenzu uukkala akati kabo waleta cituuzyo cuumpwa+ kuli Jehova kutegwa azuzikizye zikonke zyakwe naa kupa cituuzyo cakuliyandila,+ 19 weelede kutuula mupoho uutakwe kampenda,+ bagutu bacili bana naa mpongo kutegwa atambulike. 20 Tamweelede kuleta cintu cili coonse cijisi kampenda,+ nkaambo tacikonzyi kumupa kuti mutambulike.

21 “‘Ikuti naa muntu wapa cipaizyo calumvwano+ kuli Jehova kutegwa azuzikizye cikonke naa kupa cituuzyo cakuliyandila, ceelede kuba ŋombe, mpongo naa mbelele iitakwe kampenda, kutegwa citambulike. Taceelede kuba akampenda kali koonse pe. 22 Munyama wacituuzyo teelede kuba moofwu, uufwuyukide, uulaacilonda, uulaacinkwankwa* naa uulaaciguyula; tamweelede kuleta munyama uuli boobu kuli Jehova naa kumutuula acipaililo ca Jehova. 23 Mulakonzya kuleta mupoho naa mbelele iijisi cizo cilamfwu naa cifwaafwi kwiinda cimwi kacili cituuzyo cakuliyandila, pele tiikonzyi kutambulika ikuti naa yatuulwa kacili cituuzyo cacikonke. 24 Tamweelede kuleta kuli Jehova munyama uujisi macende aapwaikide naa uuzibidwe alimwi tamweelede kutuula banyama bali boobu munyika yanu. 25 Alimwi tamweelede kuleta munyama uuli woonse uuli boobu kuzwa kumuzwakule kuti abe cakulya ca Leza wanu, nkaambo banyama bali boobu balisofweede alimwi bajisi tumpenda. Tabakonzyi kutambulika pe.”’

26 Alimwi Jehova wakati kuli Musa: 27 “Ikuti kapoho naa kagutu naa kajembwe kazyalwa, keelede kuba abanyina mazuba aali ciloba,+ pele kuzwa mubuzuba bwalusele kuya kumbele kalakonzya kutambulika kakali cituuzyo cuumpwa kuli Jehova. 28 Tamweelede kujaya ŋombe naa mbelele antoomwe amwanaayo mubuzuba bomwe.+

29 “Ikuti naa mwatuula cipaizyo cakulumba kuli Jehova,+ mweelede kucituula kabotu kutegwa mutambulike. 30 Ceelede kuligwa buzuba mbubonya oobo. Tamweelede kusiya cimwi kusikila mafwumofwumo+ buzuba butobela. Ndime Jehova.

31 “Mweelede kubamba milawo yangu akwiicita.+ Ndime Jehova. 32 Tamweelede kusofwaazya zina lyangu lisalala,+ alimwi ndeelede kulemekwa akati kabana Israyeli.+ Ndime Jehova ooyo uumusalazya,+ 33 ooyo iwakamugwisya mucisi ca Egepita kuti ndibe Leza wanu.+ Ndime Jehova.”

23 Lino Jehova wakazumanana kwaambila Musa kuti: 2 “Koambaula abana Israyeli ubaambile kuti, ‘Mapobwe+ aa Jehova ngomweelede kwaambilizya+ miswaangano iisalala. Aaya ngamapobwe aangu:

3 “‘Milimo ilakonzya kubelekwa mumazuba aali cisambomwe, pele buzuba bwaciloba mbuzuba bwasabata bwakulyookezya,+ muswaangano uusalala. Tamweelede kubeleka mulimo uuli woonse. Bweelede kuba sabata ya Jehova mumasena oonse momukkala.+

4 “‘Aaya ngamapobwe aa Jehova, miswaangano iisalala, ngomweelede kwaambilizya aciindi cangawo cibikkidwe: 5 Ibuzuba bwa 14 bwamwezi wakusaanguna+ kumangolezya, mbuzuba bwa Pobwe Lyakwiindilila+ lya Jehova.

6 “‘Ibuzuba bwa 15 bwamwezi ooyo mbuzuba bwa Pobwe lya Zinkwa Zitajisi Bumena kuli Jehova.+ Kwamazuba aali ciloba mweelede kulya zinkwa zitajisi bumena.+ 7 Mubuzuba bwakusaanguna, mweelede kuba amuswaangano uusalala.+ Tamweelede kubeleka mulimo uuli woonse muyumu. 8 Pele mweelede kutuula cituuzyo cuumpwa kuli Jehova mazuba aali ciloba. Kuyooba muswaangano uusalala mubuzuba bwaciloba. Tamweelede kubeleka mulimo uuli woonse muyumu.’”

9 Jehova wakazumanana kwaambila Musa kuti: 10 “Kobaambila bana Israyeli kuti, ‘Mwaakusika munyika eeyo njendiyoomupa alimwi mwaakutebula butebuzi bwayo, mweelede kuleta cikama cabutebuzi bwanu butaanzi+ kumupaizi.+ 11 Eelyo uyoociyumba cikama eeco kumbele amusyule kubusyu bwa Jehova kutegwa mutambulike. Buzuba butobela Sabata, imupaizi weelede kuciyumba kumbele amusyule. 12 Mubuzuba cikama nociyumbwa kumbele amusyule, mweelede kutuula mugutu wamwaka omwe uutajisi kampenda, wacituuzyo cuumpwa kuli Jehova. 13 Cituuzyo caco camaila ciyooba zipaanzi zyobilo zyakkumi zyaefa* yafulaulu uukandidwe amafwuta, kacili cituuzyo cuumpwa kuli Jehova icijisi bweema bununkilila. Cituuzyo caco cinyugwa ciyooba cipaanzi cane cansazi* yawaini. 14 Tamweelede kulya cinkwa cili coonse, maila aakangidwe naa maila matete kusikila mubuzuba oobu, kusikila mwaakuleta cituuzyo kuli Leza wanu. Ooyu mulawo ngomweelede kutobela lyoonse mumazyalani aanu oonse mumasena oonse momukkala.

15 “‘Mweelede kubala masabata aali ciloba kuzwa mubuzuba butobela Sabata, kuzwa mubuzuba mbomwaleta cikama cacituuzyo cakuyumba.+ Zyeelede kuba nsondo zikkwene. 16 Muyoobala mazuba aali 50 + kusikila kubuzuba butobela Sabata yaciloba, mpoonya muyootuula cituuzyo camaila cabili kuli Jehova.+ 17 Mweelede kuleta zinkwa zyobilo kuzwa kumaanda aanu kuti zibe zyacituuzyo cakuyumba. Zyeelede kupangwa azipaanzi zyobilo zyakkumi zyaefa* yafulaulu. Zyeelede kupangwa abumena+ kazili butebuzi butaanzi kuli Jehova.+ 18 Mweelede kuleta zinkwa zili ciloba antoomwe abagutu bamwaka omwe bali ciloba ibatajisi kampenda, mupoho omwe abagutu bobilo.+ Ziyooba cituuzyo cuumpwa kuli Jehova antoomwe acituuzyo camaila azituuzyo zinyugwa, cabweema bununkilila kuli Jehova. 19 Mweelede kutuula kana kampongo kuti kabe cituuzyo cazibi+ alimwi abagutu bobilo bamwaka omwe kuti babe cipaizyo calumvwano.+ 20 Mupaizi uyooziyumba kumbele amusyule antoomwe azinkwa zyabutebuzi butaanzi, zibe cituuzyo cakuyumba kubusyu bwa Jehova, antoomwe abagutu bobilo bamwaka omwe. Zyeelede kuba cintu cisalala kuli Jehova akupegwa kubapaizi.+ 21 Mubuzuba mbubonya oobu muyakwaambilizya+ muswaangano uusalala. Tamweelede kubeleka mulimo uuli woonse muyumu. Ooyu mulawo ngomweelede kutobela lyoonse mumazyalani aanu oonse mumasena oonse momukkala.

22 “‘Ciindi nomutebula, tamweelede kumaninizya kutebula muzyooko zyoonse zyamyuunda yanu, alimwi tamweelede kubwezelela zyasyaala.+ Mweelede kuzisiila bacete*+ abeenzu.+ Ndime Jehova Leza wanu.’”

23 Mpoonya Jehova wakati kuli Musa: 24 “Kobaambila bana Israyeli kuti, ‘Mubuzuba bwakusaanguna bwamwezi waciloba mweelede kulyookezya, mbuzuba bwakulizya myeembo yakwiibalusya,+ muswaangano uusalala. 25 Tamweelede kubeleka mulimo uuli woonse muyumu, alimwi mweelede kutuula cituuzyo cuumpwa kuli Jehova.’”

26 Jehova wakati kuli Musa: 27 “Nokuba boobo, buzuba bwa 10 bwamwezi waciloba, Mbuzuba Bwakumanya Milandu.+ Mweelede kuba amuswaangano uusalala alimwi mweelede kuliimya kulya+ alimwi akupa cituuzyo cuumpwa kuli Jehova. 28 Tamweelede kubeleka mulimo uuli woonse mubuzuba oobu, nkaambo mbuzuba bwakumanya milandu+ yanu kubusyu bwa Jehova Leza wanu. 29 Kufwumbwa muntu uutaliimyi kulya mubuzuba oobu uyoojaigwa.+ 30 Alimwi kufwumbwa muntu uubeleka mulimo uuli woonse mubuzuba oobu, ndiyoomunyonyoona kutegwa azwe akati kabantu bakwe. 31 Tamweelede kubeleka mulimo uuli woonse. Ooyu mulawo ngomweelede kutobela lyoonse mumazyalani aanu oonse mumasena oonse momukkala. 32 Mbuzuba bwasabata bwakuti mulyookezye, alimwi muyootondezya kuusa+ akaambo kazibi zyanu mubuzuba bwafwuka bwamwezi kumangolezya. Mweelede kubamba sabata kuzwa kumangolezya kusikila kumangolezya aabuzuba butobela.”

33 Jehova wakazumanana kwaambila Musa kuti: 34 “Kobaambila bana Israyeli kuti, ‘Buzuba bwa 15 bwamwezi ooyu waciloba mbuzuba bwa Pobwe lya Zivwuka mazuba aali ciloba kuli Jehova.+ 35 Kuyooba muswaangano uusalala mubuzuba bwakusaanguna, alimwi tamweelede kubeleka mulimo uuli woonse muyumu. 36 Kwamazuba aali ciloba mweelede kutuula cituuzyo cuumpwa kuli Jehova. Mubuzuba bwalusele, mweelede kuba amuswaangano uusalala,+ alimwi mweelede kutuula cituuzyo cuumpwa kuli Jehova. Muswaangano uusetekene. Tamweelede kubeleka mulimo uuli woonse muyumu.

37 “‘Aaya ngamapobwe+ aa Jehova ngomweelede kwaambilizya kuti miswaangano iisalala,+ yakutuula cituuzyo cuumpwa kuli Jehova: cituuzyo cuumpwa+ acituuzyo camaila+ alimwi acituuzyo cinyugwa+ kweelana abubambe bwabuzuba abuzuba. 38 Eezyi ziyungizya buyo aali zyeezyo zituulwa mumasabata aa Jehova,+ zipego zyanu,+ zituuzyo zyanu zyacikonke+ azituuzyo zyanu zyakuliyandila,+ nzyomweelede kupa kuli Jehova. 39 Pele mubuzuba bwa 15 bwamwezi waciloba, mwamana kuyobolola butebuzi bwanyika yanu, mweelede kusekelela pobwe lya Jehova mazuba aali ciloba.+ Buzuba bwakusaanguna alimwi abuzuba bwalusele mazuba aakulyookezya.+ 40 Mubuzuba bwakusaanguna, muyoobweza micelo yazisamu zibotu kapati, malala,+ mitabi yazisamu izili amatewo manji amizimbwa yakukkuti,* eelyo muyoosekelela+ kubusyu bwa Jehova Leza wanu mazuba aali ciloba.+ 41 Muyoosekelela pobwe lya Jehova mazuba aali ciloba mumwaka.+ Mweelede kusekelela pobwe eeli mumwezi waciloba. Ooyu mulawo walyoonse mumazyalani aanu oonse. 42 Mweelede kukkala muzivwuka mazuba aali ciloba.+ Bana Israyeli boonse beelede kukkala muzivwuka, 43 kutegwa bana bamazyalani aanu aaboola bakazyibe+ kuti ndakakkazika bana Israyeli muzivwuka nindakabagwisya mucisi ca Egepita.+ Ndime Jehova Leza wanu.’”

44 Aboobo Musa wakabaambila bana Israyeli mapobwe aa Jehova.

24 Jehova wakazumanana kwaambila Musa kuti: 2 “Kobalailila bana Israyeli kuti bakuletele mafwuta mabotu aamaolifa aatwidwe, aakubelesya mumalambe kutegwa kaayaka lyoonse.+ 3 Aroni weelede kubikka malambe anze aacisitilizyo ca Bumboni mutente lyakuswaanganina, kutegwa kaayaka lyoonse kumbele lya Jehova kuzwa kumangolezya kusikila mafwumofwumo. Ooyu mulawo walyoonse mumazyalani aanu oonse. 4 Weelede kubamba malambe acibikkilo+ camalambe cangolida iisalalisya kutegwa kaayaka lyoonse kubusyu bwa Jehova.

5 “Weelede kubweza fulaulu akupanga zinkwa zibunge zijisi tupulo akati izili 12. Cinkwa cimwi acimwi ceelede kupangwa afulaulu uukkwana zipanzi zyobilo zyakkumi zyaefa.* 6 Uyoozibikka mutulwi tobilo atebulu lyangolida iisalalisya kubusyu bwa Jehova,+ kalwi kamwi akamwi kakajisi zinkwa zili cisambomwe.+ 7 Weelede kubikka tununkilizyo atala aakalwi kamwi akamwi, tuyooba ciibalusyo cacinkwa, cituuzyo cuumpwa+ kuli Jehova. 8 Mubuzuba bwa Sabata bumwi abumwi weelede kuzibikka kubusyu bwa Jehova lyoonse.+ Ncizuminano calyoonse akati kandime abana Israyeli. 9 Ciyooba ca Aroni abana bakwe,+ alimwi bayoocilida mubusena busalala+ nkaambo ncintu cisalalisya kulinguwe icizwa kuzituuzyo zyuumpwa zya Jehova, mbuli mulawo walyoonse.”

10 Lino akati kabana Israyeli kwakali musankwa umwi imwana wamukaintu muna Israyeli, pele usyi wakali muna Egepita.+ Eelyo kwakabuka nkondo akati kamusankwa ooyo amwaalumi muna Israyeli munkambi. 11 Mwana wamukaintu muna Israyeli ooyu wakatalika kusampaula Zina* lya Leza akulisinganya.+ Aboobo bakamuleta kuli Musa.+ Lino banyina bakali ba Selomiti, mwana musimbi wa Dibiri wamusyobo wa Dani. 12 Bakamubikka mucitolokesi kulindila kuti Jehova abaambile ncobakeelede kumucita.+

13 Mpoonya Jehova wakaambila Musa kuti: 14 “Amumutole anze aankambi muntu ooyo iwandisinganya, eelyo aabo boonse ibamumvwa beelede kubikka maanza aabo amutwe wakwe, mpoonya mbungano yoonse imupwaye mabwe.+ 15 Alimwi weelede kubaambila bana Israyeli kuti, ‘Ikuti naa muntu wasinganya Leza wakwe uyoolyaambilila cibi cakwe. 16 Aboobo muntu wasampaula zina lya Jehova weelede kujaigwa.+ Mbungano yoonse yeelede kumupwaya mabwe. Kufwumbwa naa mweenzu naa ngusicisi, weelede kujaigwa akaambo kakusampaula Zina eelyo.

17 “‘Ikuti naa muntu wajaya muntunyina, awalo weelede kujaigwa.+ 18 Muntu uujaya munyama wamweenzinyina weelede kubbadela munyama uumbi, buumi kubuumi. 19 Ikuti naa umwi wacisa mweenzinyina, nkokuti awalo weelede kucitwa mbubonya mbwaacita mweenzinyina.+ 20 Kufwumbwa mbwaamucisa mweenzinyina awalo uleelede kucitwa mbubonya oobo, naa wamutyola awalo weelede kutyolwa, liso kuliso, lino kulino.+ 21 Muntu uujaya munyama wamweenzinyina weelede kubbadela munyama uumbi,+ pele uujaya muntu weelede kujaigwa.+

22 “‘Mulawo omwe buyo nguuyoobeleka kulindinywe, kube kumweenzu naa kuli sicisi,+ nkaambo ndime Jehova Leza wanu.’”

23 Kumane Musa wakabaambila bana Israyeli, eelyo bakamutola anze aankambi ooyo wakasinganya zina lya Leza, mpoonya bakamupwaya mabwe.+ Aboobo bana Israyeli bakacita mbubonya Jehova mbwaakalailila Musa.

25 Jehova alimwi wakaambila Musa mu Cilundu ca Sinai kuti: 2 “Kobaambila bana Israyeli kuti, ‘Mwaakusika munyika eeyo njendiyoomupa,+ nyika eeyo iyooba a sabata ya Jehova.+ 3 Mumyaka iili cisambomwe mweelede kusyanga mbuto mumyuunda yanu akukwezyaula tutabi twamisaansa yanu, alimwi muyootebula myuunda yanu.+ 4 Pele mumwaka waciloba, nyika yeelede kuba asabata kuti ilyookezye, sabata ya Jehova. Tamweelede kusyanga mbuto mumyuunda yanu nokuba kukwezyaula tutabi twamisaansa yanu. 5 Tamweelede kutebula maila aamakoko amisaansa yanu iitakwezyawidwe tutabi. Nyika yeelede kulyookezya mumwaka ooyo. 6 Nokuba boobo, mulakonzya kulya zyakulya zimena munyika yanu mumwaka wasabata yayo; yebo, bazike bako basankwa abasimbi, mubelesi wako, beenzu bakkala anduwe balakonzya kulya, 7 abanyama bavwubwa abanyama bamusyokwe bali munyika yako. Izyamakoko zyoonse mulakonzya kulya.

8 “‘Mweelede kubala masabata aamyaka aali ciloba, nkokuti myaka iili ciloba iindulwidwe ziindi zili ciloba, aboobo mazuba aamasabata aamyaka aali ciloba ayelede kukkwana myaka iili 49. 9 Mpoonya muyoolizya mweembo canguzu mubuzuba bwakkumi bwamwezi waciloba; mu Buzuba Bwakumanya Milandu,+ mweelede kulizya mweembo kuti ukamvwigwe mucisi canu coonse. 10 Mweelede kuusalazya mwaka wa 50 akwaambilizya lwaanguluko kubantu boonse bamucisi.+ Uyoomubeda Mwaka Walwaanguluko, umwi aumwi weelede kupiluka kulukono lwakwe akupiluka umwi aumwi kumukwasyi wakwe.+ 11 Mwaka wa 50 uyoomubeda Mwaka Walwaanguluko. Tamweelede kusyanga mbuto naa kutebula zyakalimenena naa misaansa iitakwezyawidwe tutabi.+ 12 Nkaambo ooyu Mwaka Walwaanguluko. Weelede kuba mwaka uusalala kulindinywe. Muyoolya buyo zyakalimenena.+

13 “‘Mu Mwaka Walwaanguluko ooyu, umwi aumwi wanu weelede kupiluka kulukono lwakwe.+ 14 Ikuti naa mwasambala cintu kumweenzinyoko naa kuula cintu kulinguwe, mutabbidani.+ 15 Ikuti waula muunda kumweenzinyoko, weelede kubala myaka yainda kuzwa mu Mwaka Walwaanguluko, alimwi weelede kukusambala kweelana amyaka yasyaala yakutebula munyika eeyo.+ 16 Ikuti naa kakucili myaka minji, ulakonzya kuyungizya muulo, alimwi ikuti naa kwasyaala buyo myaka misyoonto, weelede kucesya muulo, nkaambo ukusambala kweelana abutebuzi mboyoojana. 17 Kunyina weelede kubbida mweenzinyina pe,+ mweelede kuyoowa Leza wanu+ nkaambo ndime Jehova Leza wanu.+ 18 Ikuti mwabamba milawo yangu ambeta zyangu, muyookkala cakuliiba munyika.+ 19 Nyika iiyoozyala micelo yayo,+ alimwi muyoolya cakukkuta akukkala cakuliiba mulinjiyo.+

20 “‘Pele ndiza muyakwaamba kuti: “Ino tuyoolya nzi mumwaka waciloba ikuti naa tatusyangi mbuto nokuba kutebula zisyango zyesu?”+ 21 Ndiyoomulongezya mumwaka wacisambomwe, eelyo nyika iyoopa butebuzi bwamyaka yotatwe.+ 22 Mpoonya muyoosyanga mbuto mumwaka walusele alimwi munoolya zyakulya zyabutezi bwainda kusikila mumwaka wafwuka. Munoolya zyakulya zyabutebuzi bwainda kusikila mukatebule.

23 “‘Nyika tayeelede kusambalilwa limwi pe,+ nkaambo njiyangu.+ Nywebo muli beenzu buyo kulindime, alimwi mukkede-kkede buyo.+ 24 Munyika yalukono lwanu yoonse, muntu weelede kuba anguzu zyakukonzya kunununa nyika yakwe njaakasambalide.

25 “‘Ikuti naa munyoko wacetaala mpoonya wasambala lukono lwakwe lumwi, siluzubonyina weelede kuboola akuula lukono oolo alimwi munyina ndwaakasambala.+ 26 Pele ikuti naa muntu katajisi sikumununwida lukono lwakwe, alimwi wakonzya kujana lubono lukonzya kunununa lukono lwakwe, 27 weelede kubalila myaka kuzwa ciindi naakasambala lukono oolo akupilusya mali aasyaala kumuntu ooyo ngwaakasambala. Mpoonya ulakonzya kupiluka kulukono lwakwe.+

28 “‘Nokuba boobo, ikuti naa tanaakonzya kujana lubono lwakunununa lukono lwakwe, nkokuti lulazumanana kuba lwayooyo ngwaakasambala kusikila mu Mwaka Walwaanguluko;+ mpoonya mumwaka ooyo luyooba lwakwe alimwi, eelyo uyoopiluka kulukono lwakwe.+

29 “‘Ikuti naa muntu waulisya ŋanda njakkala mumunzi uuyakilidwe bwaanda, ulijisi nguzu zyakukonzya kwiinununa kusikila mwaka ukkwane kuzwa ciindi naakaisambala;+ mwaka woonse ulijisi nguzu zyakwiinununa. 30 Pele ikuti naa tiiyanununwa kusikila mwaka wamana, iŋanda eeyo iili mumunzi uuyakilidwe bwaanda iyoozumanana kuba yayooyo iwakayuula mumazyalani aakwe oonse. Tayeelede kupiluka mu Mwaka Walwaanguluko. 31 Nokuba boobo, maanda aakukkala aali muminzi iitayakilidwe bwaanda ayelede kubonwa mbuli cibeela camyuunda yamuminzi eeyo. Nguzu zyakukonzya kwaanununa zilazumanana, alimwi mu Mwaka Walwaanguluko ayelede kupiluka kuli mukamwini.

32 “‘Lino kujatikizya maanda aaba Levi aali muminzi yabo,+ ba Levi banoojisi nguzu zyakwaanununa lyoonse. 33 Ikuti naa lukono lwaba Levi tiilwanununwa, iŋanda iyakasambalwa mumunzi walukono lwabo yeelede kupiluka kulimbabo mu Mwaka Walwaanguluko,+ nkaambo maanda aali muminzi yaba Levi ndukono lwabo akati kabana Israyeli.+ 34 Kuyungizya waawo, nyika yamacelelo+ yeengelede minzi yabo tayeelede kusambalwa pe, nkaambo ndukono lwabo lwalyoonse.

35 “‘Ikuti naa munyoko uuli munsi lyako wacetaala alimwi katacikonzyi kuligwasya, weelede kumugwasya+ mbubonya mbuli mbokonzya kugwasya mweenzu naa sikukkala-kkala buyo,+ kutegwa azumanane kupona akati kanu. 36 Toyelede kutambula cinyonamucila naa kujana mpindu kulinguwe.+ Weelede kuyoowa Leza wako,+ alimwi munyoko weelede kupona akati kanu. 37 Toyelede kumukweletesya mali kutegwa ujane cinyonamucila+ naa kujana mpindu kuzyakulya nzyomupa. 38 Ndime Jehova Leza wanu iwakamugwisya mucisi ca Egepita+ kuti ndimupe nyika ya Kanana kutegwa ndibe Leza wanu.+

39 “‘Ikuti munyoko uuli munsi lyako wacetaala akulisambala kulinduwe,+ toyelede kumusinikizya kubeleka milimo yabuzike pe.+ 40 Weelede kuba mbuli mubelesi uuvwozyegwa,+ mbuli muntu uukkede-kkede buyo. Weelede kukubelekela kusikila mu Mwaka Walwaanguluko. 41 Mpoonya uyoozwa kulinduwe antoomwe abana bakwe, akupiluka kumukwasyi wakwe. Weelede kupiluka kulukono lwabamausyi.+ 42 Nkaambo mbazike bangu mbondakagwisya mucisi ca Egepita.+ Tabeelede kulisambala mbuli muzike mbwasambalwa. 43 Toyelede kumupenzya pe,+ weelede kuyoowa Leza wako.+ 44 Bazike banu basankwa naa basimbi beelede kuzyila kumisyobo iimuzingulukide, kuzwa kumisyobo eeyi mulakonzya kuula muzike musankwa naa musimbi. 45 Alimwi mulakonzya kuula muzike akati kabana babantu bakkala andinywe+ mbuli beenzu akumikwasyi yabo iili akati kanu njobakazyala mucisi canu, balakonzya kuba bazike banu. 46 Mweelede kubasiila bana banu kuti babe lukono lwabo lyoonse. Mulakonzya kubabelesya mbuli babelesi, pele banabokwanu bana Israyeli, tamweelede kubapenzya pe.+

47 “‘Ikuti naa mweenzu naa sikukkala-kkala akati kanu wavwuba, pele munyoko wacetaala munsi lyakwe akulisambala kumweenzu naa sikukkala-kkala akati kanu, naa kuli umwi wamukwasyi wamweenzu, 48 uyoozumanana kuba anguzu zyakukonzya kunununwa. Umwi akati kabanabokwabo ulakonzya kumunununa,+ 49 naa siminzyaakwe naa mwana wasiminzyaakwe naa kufwumbwa wamukwasyi ngobazyalwa limwi, ulakonzya kumunununa.

“‘Naa kuti lwakwe mwini wavwuba, ulakonzya kulinununa.+ 50 Walo antoomwe asikumuula beelede kubala kuzwa mwaka naakalisambala kusikila mu Mwaka Walwaanguluko,+ alimwi mali ngaakaulwa ayelede kweendelana amweelwe wamyaka.+ Mazuba ngabeleka ciindi nakkede asikumuula ayoobalilwa kweelana aamubelesi uuvwozyegwa.+ 51 Ikuti kakucisyeede myaka minji, weelede kubbadela mali aakulinununa kweelana amyaka yasyaala. 52 Pele kuti naa kwasyaala buyo myaka misyoonto kusikila mu Mwaka Walwaanguluko, weelede kubalila akubbadela mali aakulinununa kweelana amyaka eeyo yasyaala. 53 Uyoozumanana kumubelekela mwaka amwaka mbuli mubelesi uuvwozyegwa; alimwi tayelede kumupenzya+ kubusyu bwanu pe. 54 Pele kuti naa katakonzyi kulinununa mububambe oobu, nkokuti uyakwaanguluka mu Mwaka Walwaanguluko,+ walo antoomwe abana bakwe.

55 “‘Nkaambo bana Israyeli mbazike bangu mbondakagwisya mucisi ca Egepita.+ Ndime Jehova Leza wanu.

26 “‘Tamweelede kulipangila baleza babuyo+ akulibikkila cikozyanyo cibezedwe+ naa musemu wamabwe wakukomba, alimwi tamweelede kulibikkila bbwe lili azifwanikiso+ munyika yanu kutegwa mulikotamine;+ nkaambo ndime Jehova Leza wanu. 2 Mweelede kubamba masabata aangu akulilemeka* tente lyangu lisalala. Ndime Jehova.

3 “‘Ikuti mwazumanana kubamba mbeta zyangu akutobela milawo yangu,+ 4 ndiyoomuwisizya mvwula aciindi ceelede,+ alimwi nyika iyoopa butebuzi bwayo+ azisamu ziyoozyala micelo yazyo. 5 Muyoozumanana kuuma maila kusikila kuciindi cakucela misaansa, akucela misaansa kuyoosika kuciindi cakusyanga mbuto; muyoolya cakulya canu akukkuta alimwi muyookkala muluumuno munyika yanu.+ 6 Ndiyoomupa luumuno munyika+ alimwi muyoolala kakunyina uumuyoosya;+ ndiyoobamanizya munyika banyama bamusyokwe bakali, alimwi panga lyankondo talikaindi munyika yanu pe. 7 Basinkondonyoko muyoobatanda alimwi muyoobajaya apanga. 8 Bantu banu bosanwe bayootanda bali 100, ibali 100 bayootanda bali 10,000, alimwi basinkondonyoko muyoobajaya apanga.+

9 “‘Ndiyooba andinywe alimwi ndiyoomupa kuti muzyalane akuvwula,+ ndiyoozuzikizya cizuminano cangu andinywe.+ 10 Kamucilya zyakulya zyamwaka wainda muyootebula zipya, eelyo muyoocita kuzigwisya buya zyakaindi kutegwa mubikke zipya. 11 Ndiyoobikka tente lyangu lyakukombela akati kanu,+ alimwi tandikamukaki pe. 12 Ndiyakweenda andinywe alimwi ndiyooba Leza wanu,+ eelyo anywebo muyooba bantu bangu.+ 13 Ndime Jehova Leza wanu, iwakamugwisya mucisi ca Egepita kuti mutabi limbi bazike babo, ndakatyola joko lyabuzike bwanu kuti mukonzye kweenda cakwaanguluka.

14 “‘Nokuba boobo, ikuti naa mutandiswiilili akutatobela milawo eeyi yoonse,+ 15 akuti naa mukake kubamba milawo yangu,+ alimwi akuti myoyo yanu isesemwe mbeta zyangu kutegwa mutatobeli milawo yangu yoonse akutyola cizuminano cangu,+ 16 mboobu mbondiyoomucita: Ndiyoomusubula kwiinda mukumuletela mapenzi, kakweekwe antuntumaanzi, iziyoomoofwaazya akumumana nguzu. Muyoosyanga mbuto cabuyo, nkaambo basinkondonyoko mbebayoozilya.+ 17 Ndiyoomukaka alimwi muyoozundwa kuli basinkondonyoko;+ abaabo bamusulide bayoomudyaaminina.+ Muyootija nokuba kuti kunyina uumutandaanya.+

18 “‘Pele kuti mutakandiswiilili musyule aazintu eezyi, ndiyooyungizya cisubulo canu ziindi zili ciloba akaambo kazibi zyanu. 19 Ndiyookumanizya kulisumpula kwanu akupa kuti julu lyanu libe mbuli butale+ anyika yanu kuti ibe mbuli mukuba. 20 Muyoonyonyoona nguzu zyanu cabuyo, nkaambo nyika yanu tiikapi butebuzi bwayo,+ alimwi zisamu zyamunyika yanu tazikooyoozyala micelo.

21 “‘Pele kuti naa mwazumanana kundizangila akutayanda kundiswiilila, ndiyoomuletela zipenzyo ziinda ziindi zili ciloba aali zyakusaanguna kweelana azibi zyanu. 22 Ndiyootuma banyama bamusyokwe akati kanu,+ eelyo bayoomujaila bana banu+ abanyama banu bavwubwa akupa kuti muceye, alimwi amigwagwa yanu iyoobunda.+

23 “‘Ikuti naa musyule aazintu eezyi kamucinooyookaka kululamikwa+ andime akuzumanana kundifwutatila, 24 andime ndiyoomufwutatila, alimwi ndiyoomusubula ziindi zili ciloba akaambo kazibi zyanu. 25 Ndiyoomuletela panga akaambo kakutyola cizuminano.+ Ikuti mukalibunge-bunge muminzi yanu, ndiyoomutumina cilwazi akati kanu+ alimwi muyakwaabwa mumaanza aabasinkondonyoko.+ 26 Ndaakunyonyoona ziyobwedo zyanu nzyomuyobweda zyakulya,+ bamakaintu bali kkumi bayoopanga cinkwa canu mucitofwu comwe buyo akumupimina buya cinkwa canu;+ eelyo muyoolya nokuba boobo tamukakkuti pe.+

27 “‘Lino kuti naa mutakandiswiilili akuzumanana kundifwutatila nokuba kuti zyamucitikila zintu eezyi, 28 andime ndiyakwiindila kumufwutatila,+ alimwi ndiyoomusubula ziindi zili ciloba akaambo kazibi zyanu. 29 Aboobo muyoolya bana banu basankwa abasimbi.+ 30 Ndiyoonyonyoona masena aanu aakukombela+ akugonkaula zibikkilo zyanu zyatununkilizyo akulundaika mitunta yanu atala aamitunta yamituni yanu iisesemya,*+ alimwi ndiyoomusesemwa.+ 31 Ndiyoopa kuti minzi yanu inyonyoonwe apanga+ alimwi zikombelo zyanu ziyooba matongo, alimwi bweema bwazipaizyo zyanu buyoondisesemya. 32 Ndiyoopa kuti nyika yanu ibe tongo,+ eelyo basinkondonyoko ibakkede mulinjiyo bayoolangilila cakugambwa.+ 33 Alimwi nywebo ndiyoomumwaisya akati kabamasi+ akumusomweda panga;+ nyika yanu aminzi yanu iyooba tongo.+

34 “‘Kuciindi eeco nyika iyoobamba masabata aayo mumazuba oonse nyika noinooyooli tongo, ciindi nywebo nomunooyooli munyika yabasinkondonyoko. Kuciindi eeco nyika iyoolyookezya,* mbwaanga yeelede kubamba masabata+ aayo ngoyatakali kubamba. 35 Mazuba oonse noinooli tongo iyoolyookezya, nkaambo tiiyakalyookezya mumasabata aanu ciindi nomwakali kukkala mulinjiyo.

36 “‘Aabo bayoosyaala akati kanu,+ ndiyoobapa kuba abuyoofwu mumyoyo yabo munyika yabasinkondonyina; alimwi kukwayama kwatewo lipepuluka amuwo kuyoobapa kutija, alimwi bayoozuza mbuli bantu batija panga akuyaabuliwida kakunyina uubatandaanya.+ 37 Bayoolebana mbuli baabo batija panga nokuba kuti kunyina uubatandaanya. Tamukacikonzyi kulwana basinkondonyoko.+ 38 Muyoofwa akati kabamasi,+ alimwi nyika yabasinkondonyoko iiyoomumena. 39 Aabo ibayoosyaala bayookotela munyika yabasinkondonyoko+ akaambo kamilandu yabo. Inzya, bayookotela akaambo kamilandu yabamausyi.+ 40 Mpoonya bayoolyaambilila milandu yabo+ alimwi amilandu yabamausyi akutasyomeka kwabo, eelyo bayoozumina kuti tiibakasyomeka kwiinda mukundifwutatila.+ 41 Mpoonya andime ndakabafwutatila,+ kwiinda mukubaleta munyika yabasinkondonyina.+

“‘Ambweni aciindi eeco myoyo yabo iitapalwidwe* iyoobomba,+ eelyo bayoobbadelela milandu yabo. 42 Aboobo ndiyooyeeya cizuminano cangu a Jakobo,+ acizuminano cangu a Izaka,+ alimwi ndiyooyeeya cizuminano cangu a Abrahamu,+ alimwi anyika ndiyakwiiyeeya. 43 Kwaciindi eeco coonse nyika nobakaisiide, yakali kubbadela masabata+ aayo alimwi yakali matongo balo kabatako mulinjiyo, eelyo nobakali kusubulwa akaambo kamilandu yabo, nkaambo bakazikaka mbeta zyangu alimwi bakasesemwa milawo yangu.+ 44 Pele muzintu zyoonse eezyi, nobacinooli munyika yabasinkondonyina, tandikabakaki cakumaninina+ naa kubasesemwa cakusika antaamu yakubanyonyoona pe, calo cikonzya kutyola cizuminano cangu+ ambabo, nkaambo ndime Jehova Leza wabo. 45 Akaambo kambabo ndiyooyeeya cizuminano ncindakapangana abamausyi,+ aabo mbondakagwisya mucisi ca Egepita bamasi kabalangilila,+ kutegwa ndibe Leza wabo. Ndime Jehova.’”

46 Aaya ngamalailile ambeta alimwi amilawo Jehova njaakabikka akati kanguwe abana Israyeli kwiinda muli Musa a Cilundu ca Sinai.+

27 Lino Jehova wakaambila Musa kuti: 2 “Kwaambaula abana Israyeli akubaambila kuti, ‘Ikuti naa muntu wakonkezya cikonke caalubazu+ cakwaaba muntu kuti abelekele Jehova, pele muciindi cakwaaba muntu wayanda kubbadela mali, nkokuti muulo wamuntu iwakabikkilwa limwi ngooyu, 3 muulo wamusankwa uujisi myaka iili 20 kusikila ku 60, weelede kuba masyekeli* aansiliva aali 50 kweelana acipimyo casyekeli lyamubusena busalala. 4 Pele kuti kali mukaintu, muulo wakwe weelede kuba masyekeli aali 30. 5 Ikuti kali musankwa uuli amyaka yosanwe kusikila kumyaka iili 20, muulo wakwe weelede kuba masyekeli aali 20, eelyo ikuti naa musimbi weelede kuba masyekeli aali 10. 6 Ikuti muntu ooyo kali amwezi omwe kusikila kumyaka yosanwe, naa musankwa muulo wakwe weelede kuba masyekeli aansiliva osanwe, pele naa kali musimbi muulo wakwe weelede kuba masyekeli aansiliva otatwe.

7 “‘Ikuti kali mwaalumi uuli amyaka iili 60 naa kwiinda aawo, muulo wakwe weelede kuba masyekeli aali 15, eelyo ikuti naa mukaintu weelede kuba masyekeli aali 10. 8 Pele ikuti kali mucete cakuti takonzyi kupa mweelwe wamali weelede,+ uyakwiima kumbele lyamupaizi, eelyo mupaizi uyoomubikkila muulo. Uyoobikka muulo ngwakonzya kupa sikukonka.+

9 “‘Ikuti naa cikonke kacili camunyama weelela kutuulwa kuli Jehova, kufwumbwa munyama ngwakonzya kupa kuli Jehova uyoosalala. 10 Teelede kuleta uumbi muciindi camunyama ooyo, alimwi teelede kumucinca kuti alete mubotu mubusena bwamubi naa mubi mubusena bwamubotu. Pele ikuti naa wamucincanya amunyama umbi, nkokuti boonse bobilo bayoosalala. 11 Ikuti kali munyama uusofweede+ uutakonzyi kutuulwa kuli Jehova, weelede kuleta munyama ooyo kumupaizi. 12 Mupaizi uyoobikka muulo alinguwe, naa mubotu naa mubi. Muulo ngwayoobikka mupaizi uyooba ngomuulo. 13 Pele ikuti naa muntu ooyo kayanda kumuula alimwi munyama ooyo, weelede kuleta cipaanzi casanu atala aamuulo uubikkidwe.+

14 “‘Ikuti naa muntu wapa ŋanda yakwe kuti ibe cintu cisalala kuli Jehova, mupaizi weelede kwiibikkila muulo, kufwumbwa naa nimbotu naa nimbi. Muulo ngwaabikka mupaizi ngomuulo wayo.+ 15 Pele kuti muntu iwapa ŋanda kayanda kuyuula alimwi, weelede kuleta cipaanzi casanu atala aamuulo uubikkidwe, eelyo ilaba yakwe.

16 “‘Ikuti muntu waaba cibeela camuunda wakwe kuli Jehova, muulo weelede kubikkwa kweelana ambuto iiyandika kusyangwa mumo: imbuto yabbaale iikkwana cipimyo cahomeri,* iyooba masyekeli aansiliva aali 50. 17 Ikuti naa waaba muunda wakwe mu Mwaka Walwaanguluko,+ muulo weelede kuba nguwenya ooyo uubikkidwe. 18 Ikuti naa waaba muunda kawiindide Mwaka Walwaanguluko, mupaizi uyoobalila kutegwa acesye muulo uubikkidwe+ kweelana amyaka iisyeede kusikila ku Mwaka Walwaanguluko uutobela. 19 Ikuti sikwaaba muunda wayanda kuwuula alimwi, weelede kuleta cipaanzi casanu atala aamuulo uubikkidwe, eelyo uyooba wakwe. 20 Pele ikuti naa taakwe naawuula alimwi muunda eelyo wasambalwa kumuntu uumbi, muunda ooyo tuukonzyi kuulwa alimwi pe. 21 Ikuti muunda waanguluka mu Mwaka Walwaanguluko, uyooba cintu cisetekene kuli Jehova, mbuli muunda wakaabwa kulinguwe. Uyooba wabapaizi.+

22 “‘Ikuti naa muntu waaba muunda kuli Jehova ngwaakaula uutali cibeela camuunda walukono lwakwe,+ 23 mupaizi uyoobalila akumubikkila muulo weelede kusikila ku Mwaka Walwaanguluko, eelyo uyoobbadela muulo uubikkidwe mubuzuba oobo.+ Ncintu cisalala kuli Jehova. 24 Mu Mwaka Walwaanguluko, muunda ooyo uyoopiluka kuli yooyo wakausambalide, kuli mukamwini lukono.+

25 “‘Muulo uuli woonse weelede kubikkwa kweelana acipimyo casyekeli lyamubusena busalala. Syekeli lyeelede kweelana amagera* aali 20.

26 “‘Pele taakwe muntu weelede kwaaba munyama mutaanzi, nkaambo mutaanzi nguwa Jehova kale.+ Kufwumbwa naa niŋombe naa nimbelele, njiya Jehova.+ 27 Ikuti naa kali umwi wabanyama basofweede alimwi uyanda kumuula kweelana amuulo uubikkidwe, nkokuti weelede kupa cipaanzi casanu atala aamuulo ooyo.+ Pele kuti naa tanaaulwa, weelede kusambalwa kweelana amuulo uubikkidwe.

28 “‘Pele taakwe cintu imuntu ncaapeda limwi kuli Jehova kuzwa kuzintu nzyajisi, abe muntu naa munyama naa muunda walukono lwakwe, icikonzya kusambalwa naa kuulwa alimwi. Kufwumbwa cintu caabwa ciba cintu cisalalisya kuli Jehova.+ 29 Kuyungizya waawo kunyina muntu iwaabwa kuti ajaigwe uukonzya kunununwa.+ Weelede kujaigwa.+

30 “‘Cipaanzi cakkumi+ cili coonse canyika ncica Jehova, bube butebuzi bwamumyuunda naa micelo yazisamu. Ncintu cisalala kuli Jehova. 31 Ikuti muntu kayanda kucuula alimwi cipaanzi cakwe cakkumi, weelede kupa cipaanzi casanu atala aamuulo uubikkidwe. 32 Caboola kuŋombe ambelele ampongo, kufwumbwa yakkumi yiinda kunsi aamusako wamweembezi yeelede kuba cintu cisalala kuli Jehova. 33 Teelede kwiilanga-langa kuti abone naa nimbotu naa nimbi nokuba kwiicincanya. Pele kuti naa waicincanya aimwi, nkokuti zyoonse zyobilo ziyoosalala.+ Tacikonzyeki kuyuula alimwi.’”

34 Eeyi njemilawo Jehova njaakapa bana Israyeli a Cilundu ca Sinai kwiinda muli Musa.+