Sena Kuli Muntu Ngotukonzya Kusyoma?
Umwi musilisi wakali kubonwa kuti ngu haazibwene mukusilika malwazi. Nokuba boobo, kwamyaka iinda kukkumi, kutalikila mumwaka wa 1996, musilisi ooyu wakalemba makani aakubeja kujatikizya malwazi ngaakali kuvwuntauzya.
BA DR. STEVEN L. Shafer, nibakali kwaamba mumuteende uutegwa Anesthesiology News bakaamba kuti: “Tandikonzyi kumvwisya kaambo kapa kuti muntu acite cintu cili boobu.”
Ino ncinzi cikonzya kupa muntu uulemekwa kweena bantunyina? Amubone zyintu zyone zikonzya kupa kuti acite oobu.
● Bulyato. Mulipooti yamumuteende uutegwa New York Times, ba Dr. Jerome Kassirer, ibakali balembi bamagazini iitegwa The New England Journal of Medicine, bakapandulula kuti: “Ciindi basikuvwuntauzya nobabelekela kkampani yabusilisi kutegwa bapegwe mali manji, bali aacilengwa cakukwabilila kkampani kubuvwuntauzi mbobajana.”
● Kuyanda kuzwidilila ziyume zitete. Basicikolo bakuyunivesiti kucisi ca Germany bakali kubapa cisinkamulomo bamayi kutegwa bapase musunko akupegwa zyina lyabulemu lyakuti Doktor, ilitondezya kuti muntu ucita kabotu mucisi eeco. Kuvwuntauzya kwakacitwa aba New York Times kutondezya kuti basicikolo banji bakali kutyola milawo bakaamba kuti “bayootalika kulilemeka” baakumanizya cikolo.
● Kunyina batondezya cikozyanyo cibotu. Umwi haazibwene, wakaamba boobu mu New York Times kujatikizya basicikolo: “Tulakonzya kwaamba kuti tabalilemeki . . . Ambweni inga kwaambwa kuti bamayi babo abantu bamwi buyo tiibakabayiisya mbobakeelede kulilemeka akutobela njiisyo ziluleme.”
● Micito iiteendelani abukkale bubotu. Muvwuntauzyi bwabasicikolo ibali 30,000, bali 98 pasenti bakaamba kuti kusyomeka kulayandika kutegwa bantu kabamvwana. Pele, basicikolo ibali 80 pasenti bakaamba kuti bakalibejede kubazyali babo, alimwi bali 64 pasenti bakaamba kuti bakabeja nibakali kulemba musunko mwaka wamana.
Njiisyo Zyakulilemeka Zisumpukide
Mbuli mbotwabona mukabbokesi kali apeeji eeyi, bantu balalibonya kuti bakalengwa kuti kabasyomana. Nokuba boobo, Ibbaibbele lilaamba kuti “miyeeyo yamoyo wamuntu mibi lyoonse kuzwa kubwanike bwakwe.” (Matalikilo 8:21) Mbuti mbomukonzya kweeleba muuya ooyu uuzwide munyika? Njiisyo zyamu Bbaibbele zitobela zilakozya kugwasya:
● “Utayeeyi kucitila mweenzinyoko bubi, uukala calusyomo kumbali lyako.”—Tusimpi 3:29.
Ikubayanda basimukoboma kutupa kubalanganya, ikutali kubeena akaambo kakuti balatusyoma. Njiisyo eeyi ilakonzya kumanya mapenzi oonse aboola akaambo kabulyato, mbuli kusambala misamu yakubeja mbuli mbokwaambwa kumatalikilo kwazibalo eezyi zitobelana.
● “Milomo iiamba lusinizyo ilakalilila lyoonse, pele lulimi lweena ndwakaindi kaniini buyo.”—Tusimpi 12:19.
Bantu banji basyoma kuti bantu basyomeka balalipenzya. Pele amulibuzye kuti, ‘Ino ncinzi ciyandika kapati—ikulongezyegwa lino-lino naa kuyoopegwa zilongezyo zitamani kumbele, kubikkilizya akuba abulemu?’ Sicikolo ulakonzya kweena beenzinyina kuti ulaamaanu kwiinda mukubbida nalemba misunko, pele ino uyoocita buti aakutalika kubeleka?
● “Muntu uululeme uuenda cakoololoka, bali acoolwe bana bakwe baboola musule lyakwe.”—Tusimpi 20:7.
Ikuti kamuli bazyali, mweelede kuba acitondezyo cibotu kubana banu kwiinda ‘mukweenda cakoololoka.’ Amubaambile bubotu mbomwajana kwiinda mukucita zyintu ziluleme. Ikuti bana babona bazyali babo beenda munzila iiluleme, abalo balakonzya kusyomeka.—Tusimpi 22:6.
Sena njiisyo eezyi zyaambwa zilabeleka ncobeni? Sena tulakonzya kujana bantu basyomeka mazuba aano?
[Majwi aakwelelezya sikubala aali apeeji 4]
Kweelana acakalembwa mumuteende wa Le Figaro, bantu banji kucisi ca France “bayeeya kuti bantu beendelezya munyika—mutwaambo twacisi, mumakwebo, amubukkale bwiindene-indene—tabalilemeki, aboobo abalo tabajisi twaambo ncobeelede kulilemeka.”
[Kabbokesi kali apeeji 5]
SENA NCILENGWA BUYA IKUYANDA KUSYOMA BANTU BAMWI?
Mubuvwuntauzyi mbobakacita ba Michael Kosfeld, bahaazibwene mumakani aamakwebo baku Frankfurt University kucisi ca Germany, bakajana kuti ikuyanda kusyoma bantu bamwi “ncilengwa buya.” Ba Kosfeld bakajana kuti ikuti bantu bobilo kababandika, bongo bwamuntu bulapanga homoni iitwa kuti oxytocin, yalo iipa kuti muntu ayande kusyoma muntu uumbi. Ba Kosfeld bakaamba kuti: “Mahomoni aaya ngaapa kuti muntu aindane azilenge zimbi. Ikuti katutasyomi bantu bambi, nkokuti munzila imwi tatuli bantu.”