Cibalo 44

Ikusala Baapostolo Bakwe

KWAINDA mwaka omwe acisela kuzwa ciindi Johane Mubbapatizi naakaamba Jesu kuti Mwanaambelele wa Leza alimwi Jesu naakatalika mulimo wakwe wakubuleya. Aciindi awo, Andreya, Simoni Petro, Johane ambweni a Jakobo (mwanookwabo Johane), antoomwe a Filipo a Natanayeli (wiitwa kuti Batalomayo) nobakaba basikwiiya bakwe bataanzi. Muciindi banji-banji bamwi bakabasangana ikutobela Kristo.

Lino Jesu walibambila kusala baapostolo bakwe. Aaba balaba balongwe bakwe beni-beni ibatitambule lwiiyo lwaalubazu. Pele katana basala, Jesu waunka acilundu akukkala busiku boonse kapaila ambweni kalomba busongo akulongezyegwaa Leza. Bucica, waita basikwiiya bakwe mpoonya wasala ibali 12 akati kabo. Nokuba boobo, mbwaanga bazumanana kuba basicikolo ba Jesu, baciitwa kuti basikwiiya abalo.

Ibali cisambomwi mbaasala Jesu ibabandwa atalaawa, mbaabo bakaba basikwiiya bakwe bataanzi. Matayo, Jesu ngwaakaita kuzwa kucitelelo awalo wasalwa. Ibambi bosanwe basalwa mbaa Judase (wiitwa kuti Tadayo), Judase Iskariote, Simoni muna Kanana, Tomaso alimwi a Jakobo mwanaa Alifayo. Oyo Jakobo nguuitwa akuti Jakobo Muniini, ambweni nkaambo kakuceya ciimo naa kuceya kukuzyalwa kumwaapostolo Jakobo umbi.

Lino aba ibali 12 bali a Jesu kwaciindi cili mbocibede alimwi wabaziba kabotu-kabotu. Alimwi bali mbobabede mbasazinyina buya. Jakobo amwanookwabo Johane mbanyina Jesu. Alimwi kulalangilwa kuti Alifeyo wakali mwanookwabo Josefa, bausyi Jesu bakujana. Aboobo mwanaa Alifeyo, mwaapostolo Jakobo awalo ulakonzya kuba munyina Jesu.

Aino Jesu tacimukatazyi kuyeeya mazina aabapostolo bakwe. Pele sena mulakonzya kubayeeya nywebo? Nkuyeeya buyo kuti kuli bobile balaa zina lya Simoni, bobile balaa zina lya Jakobo, alimwi bobile balaa zina lya Judase alimwi akuti Simoni ulaa mwanookwabo Andreya alimwi akuti Jakobo ulaa mwanookwabo Johane. Eyi nenzila yakuyeeya baapostolo bali lusele. Ibambi bone babikkilizya simutelo (Matayo), umwi wakazyoodooneka (Tomaso), iwakaitwa naakali munsi acisamu (Natanayeli) alimwi amweenzinyina Filipo.

Ibaaposotolo bali 11 bazwa ku Galilaya, kucooko nkwazwa Jesu. Natanayeli uzwa ku Kana. Filipo, Petro alimwi a Andreya bazwa ku Betsaide, mpoonya Petro a Andreya bakazyoounka ku Kapernauma kwalo kuboneka kuti Matayo nkwaakali kukkala. Jakobo a Johane bakali mumulimo wabu zubi bwanswi, alimwi kulalangilwa kuti bakali kukkala mwini mu Kapernauma naa munsi-munsi. Kuboneka kuti Judase Iskariote walo wakazyooaba Jesu nguwakali kuzwa ku Judaya alikke. Marko 3:13-19; Luka 6:12-16.

▪ Mbaaposotolo nzi bakonzya kuti bakali basazinyinaa Jesu?

▪ Mbaani baaposotolo ba Jesu alimwi inga mwaayeeya buti mazina aabo?

▪ Nkuumasena nzi nkubazwa baapostolo?