Ziiyo Kutempele Lyamu Cilengaano Ca Ezekieli

Bukombi Busalala Bwasumpulwa Akukwabililwa

Tempele lyamucilengaano lyasumpulwa “acilundu cilamfwu kapati” (1). Sena bukombi busalala tulabusumpula akububikka mubusena bwakusaanguna mubuumi bwesu?

Bwaanda (2), bwalo ibwakazingulukide tempele ilyakali akati mubusena bupati (3), butuyeezya kuti tatweelede kulekela cintu cili coonse kusofwaazya bukombi bwesu kuli Jehova. Ikuti naa zintu noziba zyeezyo zivwula kucitwa zitasofweede zyeelede kuba kulamfwu abukombi busalala, sena mukombi wa Jehova uleelede kujatikizyigwa mubukkale busofweede naa kutalilemeka mazuba aano?—Ezk. 42:20.

Zilongezyo Zitamani

Kalonga kakunka kuzwa mutempele, ikayaabukomena kuba mulonga mupati akupa kuti zilenge zyuumi zicikonzye kupona akuti nyika ibe aambolezi (4). Zilongezyo eezyi ziyoobandikwa mu Cibalo 19 cabbuku eeli.

Zyeelelo Zyeelene Kubantu Boonse

Milyango yaanze milamfwu (5) alimwi amilyango yamukati (9) ituyeezya kuti Jehova ulijisi zyeelelo zisumpukide zyakulilemeka kuli baabo boonse ibayanda kutola lubazu mubukombi busalala. Mutalubi kuti milyango yaanze alimwi ayamukati ilikozyene mboibede mubulamfwu amubwamba. Eeci cileelela, nkaambo zyeelelo zya Jehova ziluleme zileelene kubabelesi bakwe boonse, tacikwe makani amikuli njobajisi naa mbouli mupati mulimo ngobabeleka.

Cakulya Atebulu lya Jehova

Maanda aakulida (8) atuyeezya kuti kaindi, bantu bakali kutola lubazu mukulya zipaizyo kuzwa kuli zimwi nzyobakali kuleta kutempele, munzila imwi cakali mbuli kuti, balya cakulya antoomwe a Jehova. Eeci ciliindene atempele lyakumuuya oomo mobakombela Banakristo mazuba aano, nkaambo ‘cipaizyo comwe’ cakatuulwa kale. (Heb. 10:12) Nokuba kuti cili boobo, tulatuula zipaizyo zyesu zyantembauzyo.—Heb. 13:15.

Cisinizyo Kuzwa Kuli Leza

Bumpiyo-mpiyo boonse bwakupima ibuli mucilengaano bulakonzya kumutyompya. Pele bulayiisya kaambo kayandika kapati: Businizya kuti makanze a Jehova aakubukulusya bukombi busalala ngamasimpe alimwi alisinizyide, mbubwenya mbuli kupima ooko mbokuluzi alimwi ambokutakonzyi kucincwa. Nokuba kuti Ezekieli tanaakaamba kuti wakabona bantu bali boonse mucilengaano cakwe, wakalemba kujatikizya lulayo lwa Jehova lwanguzu kubapaizi, kubasilutwe, alimwi akubantu. Babelesi ba Leza boonse beelede kuzisumpula zyeelelo zyakwe ziluleme.