February

Mbuti kuliyumya mbokukonzya kumanizya “mulimo” wankuko mulindiswe? (Jak. 1:4) Ciindi notulwana sunko, inga twayandika kukkazika moyo kapati, kutondezya kulumba aluyando. Ciindi notuliyumya musunko, tuyakwiiya kubutondezya kapati bube oobu, aboobo munzila eeyi bube bwesu bwa Bunakristo buyoobota kwiinda. Akaambo kakuti kuliyumya inga kwapa kuti tube Banakristo bali kabotu, inga tiitwayanda kusotoka mulawo wa Jehova akaambo buyo kakuti tuyanda kumana sunko. Mucikozyanyo, ikuti kamukatazyigwa akuyeeya zintu zibi, mutalekeli sunko pe kumuzunda! Amumulombe Jehova kuti amugwasye kukaka mizeezo mibi. Sena mulakazyigwa abanamukwasyi? Mutalengaani pe. Amukanze kuzumanana kubelekela Jehova. Amuyeeye kuti: Kutegwa tukkomaninwe a Leza, tweelede kuliyumya.—Rom. 5:3-5; Jak. 1:12. w16.04 2:15, 16

Jehova tayeeyi kuti muntu umwi naa kabunga kamwi kabantu kalayandika kapati kwiinda kamwi. Kuli Leza, toonse tuleelene. Masimpe kuti toonse Jehova wakatupanga munzila iindene kuli umwi amweenzinyina, alimwi kwiindana ooku kulatukkomanisya. Leza tayandi kuti tusiye zilengwa zyesu. Pele alimwi tayandi kuti katuyeeya kuti tuli kabotu kwiinda bantu bambi. (Rom. 10:12) Tatweelede kulidunda akaambo kacisi cesu naa musyobo cakuti twatalika kuyeeya kuti tulabainda bambi boonse. Kuti naa twalimvwa boobo, inga catukatazya kapati kuzumanana kutatola lubazu mutwaambo twacisi. Eeci cakacitika mumwaanda wamyaka wakusaanguna. Bakwesu bamwi ba Hebrayo bakali kubasalulula bamukabafwu ba Giriki. (Mil. 6:1) Ino inga twazyiba buti kuti twatalika kulisumpula munzila eeyi? Kuti mukwesu naa mucizyi uuzwa kubusena bumbi wamupa muzeezo, sena cakufwambaana muyeeya kuti, ‘Nzila njotubelesya okuno ili kabotu,’ mpoonya akuukaka muzeezo ooyo? Kuti kacili boobo, amuyeeye lulayo oolu iluli mulugwalo lwabuzuba bwasunu. w16.04 4:12, 13

Jesu wakakambauka “makani mabotu aa Bwami,” alimwi uyanda kuti basikwiiya bakwe kabacita mbubwenya oobo. Ino ninkamu iili yabantu ibakambauka mulumbe ooyo kubantu boonse? (Mt. 28:19) Balikke Bakamboni ba Jehova! Amubone mupaizi umwi wacikombelo mumisyinali iwakakkala muzisi zinji ziindene-indene ncaakaambila Kamboni wa Jehova umwi. Mucisi cimwi acimwi, mupaizi ooyu wakabuzya Bakamboni ba Jehova mulumbe ngobakali kukambauka. Mupaizi ooyu wakati: “Boonse mbafwubafwuba nkaambo bakapa bwiinguzi bukozyenye bwakuti: ‘Makani mabotu aa Bwami.’” Ncaakaamba mupaizi ooyu cisinizya buyo kuti tatuli bafwubafwuba pe, pele tulikamantene mbuli Banakristo bakasimpe. (1Kor. 1:10) Alimwi Bwami bwa Leza ngomulumbe mupati wa Ngazi Yamulindizi Yaambilizya Bwami bwa Jehova. Magazini eeyi ilajanika mumyaambo iili 254 alimwi kulasimbwa makkopi aatandila ku 59,000,000 mwezi amwezi, calo cipa kuti ibe magazini iinda kumwaigwa nyika yoonse! w16.05 2:6

Ambweni muyanda kucita bupainiya. Mwabambulula bukkale bwanu kutegwa mube aciindi cinji mubukambausi. Pele muladooneka naa muyookkomana ncobeni kamujisi mali masyoonto buyo azintu zisyoonto. Bwini mbwakuti, Ibbaibbele talyaambi kuti tweelede kuba bapainiya buya kutegwa tumubelekele Jehova. Tulakonzya kuzumanana kumubelekela cakusyomeka katuli basikumwaya. Nokuba boobo, Jesu wakaamba kuti Jehova ulabalongezya aabo ibalyaaba akaambo ka Bwami. (Lk. 18:29, 30) Bbaibbele alimwi lyaamba kuti Jehova ulakkomana ciindi notulyaaba cakumaninina kutegwa tumutembaule, alimwi uyanda kuti katukkomene notumukomba. (Int. 119:108) Kwiinda mukupaila kujatikizya zintu eezyi, alimwi akuzinzibala kuziyeeya, tulakonzya kusala kabotu kweelana abukkale bwesu alimwi Jehova uyookulongezya kusala kwesu. w16.05 3:13

Banakristo bapati tabeelede kulisumpula akubona mbuli kuti tabakonzyi kubala makani aabakubusi. Bunji bwamapenzi aabandikwa mumabbuku eesu aabambilwa bakubusi alabajatikizya Banakristo boonse. Mucikozyanyo, toonse tuyandika kwiiminina nzyotusyoma, kulijata kujatikizya mbotulimvwa, kukaka kuyungwa abeenzuma, akutantamuka balongwe ibatali kabotu alimwi azyakulikondelezya zitali kabotu. Aboobo nokuba kuti mabbuku aaya akalembelwa bakubusi, makani aali mumo azwa mu Bbaibbele, alimwi alakonzya kubagwasya Banakristo boonse. Kunze lyaboobo, mabbuku aalembelwa bakubusi alabagwasya kuyumya cilongwe cabo a Jehova. Abalo bapati balakonzya kugwasyigwa.—Muk. 12:13. w16.05 5:15, 16

“Jehova Leza wesu ngu Jehova omwe buyo.” Majwi aaya mapati kapati! Ciyeekezyo eeci cakabagwasya bana Israyeli kuti baliyumye ciindi nobakanjila mu Nyika Yakasyomezyedwe. Majwi aaya andiswe alakonzya kutuyumya kutegwa tukafwutuke lyamapenzi mapati alimwi akutola lubazu mukubamba nyika kuti ibe Paradaiso. Atuzumanane kumukomba Jehova alikke buyo. Tweelede kumuyanda akumubelekela amoyo wesu woonse, amizeezo yesu yoonse, alimwi anguzu zyesu zyoonse, alimwi tweelede kubeleka canguzu kutegwa tuzumanane kuba muluumuno alimwi akukamantana abakwesu. Ikuti twazumanana kucita boobu, Jesu uyootwaamba kuti tuli mbelele alimwi tuyookubona kuzuzikizyigwa kwamajwi aakwe aakuti: “Amuboole, nywebo nomulelekedwe a Taata, amukone Bwami mbomwakabambilwa kuzwa kumatalikilo aanyika.”—Mt. 25:34. w16.06 3:2, 20

Kulisumpula inga kwatupa kuubya-ubya kulubizya kwesu. Ikuti eeci cacitika, inga twaleka kuba mbuli bulongo butete. Sena kuli nomwakalubizyilwa kale amukwesu naa mucizyi? Sena kuli nomwakauside kale akaambo kakusweekelwa mukuli umwi? Ino mwakacita buti? Sena mwakatalika kulisumpula, naa sena mwakazyiba kuti kuba muluumuno amunyoko alimwi akuzumanana kusyomeka kuli Jehova nzeziyandika kapati? (Int. 119:165; Kol. 3:13) Ikuti naa muntu wazumanana kubisya, mane buya akusisa ncacita, cilakonzya kumuyumina kutambula lulayo luzwa kuli Leza. Eeci inga capa kuti cuube-ube kunoobisya. (Muk. 8:11) Mukwesu umwi, kwaciindi cili mbocibede wakajisi cilengwa cakweebelela zintu ziletela muzeezo wakoonana kumbele wakaamba kuti, “Ndakatalika kubajanina twaambo tutako baalu.” Cilengwa eeci cakapa kuti cilongwe ncaakajisi a Jehova mukwesu ooyu cinyongane. Ciindi bamwi nobakazyiba ncaakali kucita, wakalomba lugwasyo kubaalu. Nincobeni kuti toonse tatulondokede. Pele ikuti twatalika kubayandawida twaambo aabo ibatupa lulayo naa kupa twaambo twakulitamizya ciindi notwalubizya muciindi cakulomba Leza kuti atulekelele akutugwasya, moyo wesu inga watalika kuyuma. w16.06 2:5, 6

Baswiilizi ba Jesu bakali kulibilika zintu eezyo mubwini nzyobatakeelede kulibilika. Jesu wakabaambila kuti bacileke kucita boobo—alimwi kwakali twaambo tubotu ncaakaambila boobo. Kulibilika cakuzwa munzila, nokuba kujatikizya zintu zili buyo kabotu, kulakonzya kunyonganya mizeezo yamuntu akupa kuti acileke kubikkila maano kuzintu ziyandika kapati mubuumi, nkokuti zintu zyakumuuya. Jesu wakalibabikkilide maano kapati basikwiiya bakwe cakuti wakabacenjezya kujatikizya cilengwa eeci cibyaabi ziindi azimbi zyone mu Mulumbe wakwe Waacilundu. (Mt. 6:27, 28, 31, 34) Jesu wakalizyi kabotu-kabotu zintu nzyobayandika bantu buzuba abuzuba. Kuyungizya waawo, wakalibuzyi bukkale bukatazya mobakali kuyoopona basikwiiya bakwe kumbele, aabo ibakali kuyoopona “kumazuba aamamanino,” nkokuti ‘kuziindi zikatazya ncobeni.’ (2Tim. 3:1) Bukkale oobo bubikkilizya kubula milimo, kubula nguzu kwamali, nzala alimwi abucete butaambiki. Nokuba boobo, Jesu alimwi wakalizyi kuti ‘buumi bulayandika kwiinda cakulya alimwi amubili kwiinda zyakusama.’ w16.07 1:8, 9

Ikuti notwali kuzizuzikizya cakulondoka zyeelelo zya Jehova zyoonse, nkokuti notwaleelede buya kutambula luzyalo lwakwe. Pele kweelana ambocibede, tulaalilwa kucita oobo. Aboobo, Mwami musongo Solomoni wakalemba kuti: “Kunyina muntu mululami munyika uucita buyo zibotu lyoonse kakunyina kubisya.” (Muk. 7:20) Awalo mwaapostolo Paulo wakalemba kuti: “Boonse balibisyide alimwi balalezya kubulemu bwa Leza,” alimwi akuti “cakuvwola cacibi ndufwu.” (Rom. 3:23; 6:23a) Eeco ncecitweelede. Nokuba boobo, Jehova, wakatondezya luyando lwakwe kubantu batalondokede munzila iilibedelede yaluzyalo. Wakatuma cipego cakwe ciinda kukomena, nkokuti, “Mwanaakwe simuzyalwaalikke” aanyika kuti azyootufwide. (Joh. 3:16) Aboobo Paulo wakalemba kujatikizya Jesu kuti “lino usamide musini wabulemu abwami akaambo kakupenga kusikila kulufwu, kutegwa kwiinda muluzyalo lwa Leza afwide muntu uuli woonse.” (Heb. 2:9) Inzya, “cipego ncapa Leza mbuumi butamani kwiinda muli Kristo Jesu Mwami wesu.”—Rom. 6:23b. w16.07 3:3, 4

Cikwati ncibeela cipati kapati mubuumi bwabantu. Ikulanga-langa mbocakatalika alimwi amakanze aancico kulakonzya kutugwasya kubulanga munzila yeelede bubambe oobu akukkomana cakumaninina azileleko zijanika mumo. Ciindi Leza naakamana kulenga muntu wakusaanguna Adamu, wakamuletela banyama kutegwa abaulike mazina. Pele “muntu wakanyina sikumugwasyilizya, imweenzinyina uumweelede.” Aboobo Leza wakooneka Adamu ŋonzi zyalufwu, mpoonya wakagwisya kabambo komwe akukabelesya kupanga mukaintu, eelyo wakamuleta kumwaalumi. (Matl. 2:20-24) Aboobo, Leza ngonguwe iwakatalisya cikwati. Jesu wakazuminizya kuti Jehova ngonguwe iwakaamba kuti: “Mwaalumi uyoosiya bausyi abanyina akukakatila kumukaintu wakwe, eelyo aaba bobilo bayooba mubili omwe.” (Mt. 19:4, 5) Ikubelesya kabambo Leza nkaakagwisya kuli Adamu ciindi naakalenga mukaintu, kweelede kuti kwakagwasya banabukwetene bakusaanguna aaba kubona bubambe oobu mbobwakali kubakamantanya kapati. Kwakanyina bubambe bwakulekana naa bwakukwata naa kukwatwa mumaali. w16.08 1:1, 2

Kanji-kanji Jesu wakali kubandika abantu kujatikizya Bwami. Mucikozyanyo, wakajisi mubandi mubotu ciindi naakaambaula amukaintu amugoti wa Jakobo iwakali afwaafwi amunzi wa Sukari. (Joh. 4:5-30) Alimwi wakabandika a Matayo Levi, simutelo. Matayo wakakuzumina kutamba kwa Jesu kwakuti abe sikumutobela. Matayo alimwi abamwi bakamuswiilila Jesu kwaciindi cilamfwu naakali kwaambaula ciindi capobwe ilyakacitilwa muŋanda ya Matayo. (Mt. 9:9; Lk. 5:27-39) Aciindi cimwi, Jesu wakabandika a Natanayeli munzila mbotu, nokuba kuti tanaakali kubabona munzila yeelede bantu ibakali kuzwa ku Nazareta. Nokuba boobo, Natanayeli wakagwasyigwa kucinca mbwaakali kuyeeya. Wakasala kwiiya zinji kujatikizya makani ngaakali kuyiisya Jesu, imwaalumi iwakali kuzwa ku Nazareta. (Joh. 1:46-51) Aboobo tulijisi twaambo tubotu ncotweelede kuyiisya basikumwaya bapya kubandika abantu munzila iili kabotu alimwi cakulikwaya. Aabo mbotugwasya munzila eeyi banookkomana kubona bantu ibabombe myoyo mbobatambula makani mabotu akaambo kakubabikkila maano alimwi akubelesya majwi mabotu. w16.08 4:7-9

Ikuti mapenzi azumanana kukomena mucikwati, alakonzya kupa kuti umwi naa banabukwetene boonse bobilo batalike kuyeeya kwaandaana naa kulekana. Banabukwetene tabeelede kwaawubya-ubya makani aakwaandaana amuntu ngobakwetene limwi pe. Nokuba kuti kwaandaana zimwi ziindi kulakonzya kuboneka mbuli kuti nenzila yakumana mapenzi mapati kapati, bunji bwaziindi kuyungizya buyo mapenzi atala aayaayo aaliko kale. Naakamana kwiinduluka majwi ngaakaamba Leza kujatikizya mwaalumi kusiya bausyi abanyina akukakatila kumukaintu wakwe, Jesu wakati: “Aabo Leza mbaaswaanganya kutabi muntu uubaandaanya.” (Mt. 19:3-6; Matl. 2:24) Eeci caamba kuti kunyina akati kamulumi amukaintu iweelede ‘kwaandaanya ceeco ncaakaswaanganya Leza.’ Cikwati Jehova ucibona kuti ceelede kuzumanana kusikila kulufwu. (1Kor. 7:39) Ikuzyiba kuti toonse tuyoolyaambilila kuli Leza, kweelede kukulwaizya banabukwetene kubeleka canguzu kumana twaambo cakufwambaana kutegwa tutakomeni. w16.08 2:10, 11

Basinkondoma balakonzya kutulwana ciindi notutalangili alimwi aciindi notutyompedwe kapati, aboobo tweelede kupakamana lyoonse. Majwi aakulwaizya aakuti tutalilekeli “kuzundwa abubi” atondezya kuti tulakonzya kubuzunda bubi. Tulakonzya kuzunda kuti twazumanana kubulwana bubi. Ikuti tiitwacenjela, tulakonzya kuzundwa a Saatani, nyika yakwe mbyaabi alimwi akutalondoka kwesu kuti twaleka kupakamana akuleka kulwana nkondo. Mutalekeli Saatani kumukonga akulekela maanza aanu kulebuka akuzundwa! (1Pet. 5:9) Kutegwa bazwidilile, aabo ibalwana nkondo tabeelede kuluba kaambo ncobalwanina. Kutegwa bakkomaninwe akulongezyegwa a Leza, beelede kuzumanana kukabikkila maano kaambo nkotubala kulugwalo lwa Bahebrayo 11:6 kakuti: “Kufwumbwa ooyo uuswena afwaafwi kulinguwe weelede kusyoma kuti nkwali ncobeni akuti uba sikupa bulumbu kuli baabo bamuyandaula cabusungu.” Bbala lya Chigiriki ilyakasandululwa kuti “bamuyandaula cabusungu” lyaamba kubeleka canguzu akusolekesya.—Mil. 15:17. w16.09 2:4, 5

Jwi lya Leza lilijisi busolozi bubotu ibukonzya kutugwasya kusala zintu zilemeka Leza. Pesi bwini mbwakuti, nzyotusama zitondezya buyo zintu nzyotukkomanina. Nzyotuyandisya umwi aumwi wesu zilakonzya kwiindana kweelana ankomo yesu mboibede. Pesi zisani zyesu zyeelede kuti kazisumbula lyoonse, kazili zyabulemu, kazisamwa aciindi ceelede, alimwi kazitondezya bulemu kweelana akubusena oobo. Ikwaamba masimpe, tacili cuuba-uba lyoonse kusala munzila iitondezya kuti tuzilanga kabotu zintu alimwi akuti tulabikkila maano kutwaambo toonse itujatikizyidwe. Muzintoolo zinji kujanika misyobo yazisani zidumide mazuba aano, aboobo cilakonzya kutola ciindi alimwi akubeleka canguzu kutegwa mujane masikeeti, madileesi, mabbulauzi naa nsuuti alimwi amalukwe aatajati kapati. Cakutadooneka, basyomima bayoobona alimwi akulumbaizya akaambo kakubeleka canguzu kuti tujane zisani zibotu alimwi izyeelela. Alimwi lukkomano ndotujana akaambo kakupa kuti Taateesu wakujulu siluyando alemekwe ndunji kapati kwiinda buyumuyumu mbotukonzya kujana ibwakusala zisani zipa bulemu kuli Leza. w16.09 3:15, 16

Nobazyali, amusoleke kuzibelesya kapati zikozyanyo ciindi nomuyiisya bana banu. Zikozyanyo zyeelela zilakonzya kupa kuti lusyomo lwamwana luyume lwakuti Bbaibbele lililuzi. Mucikozyanyo, amulange-lange majwi aali mulugwalo lwabuzuba bwasunu. Ino mbuti mbomukonzya kutondezya kuti lugwalo oolu lwakasololelwa amuuya uusalala? Ikuti kamuyanda, inga mwaile kwaamba buyo twaambo tuluzi. Muciindi caboobo, amumugwasye mwanaanu kweezyeezya. Amumwaambile kuti Jobu wakapona aciindi nokwakanyina ndeke alimwi amincini njobabelesya bantu kubona zintu zili mujulu. Mulimo wamwanaanu inga waba wakutondezya mbocikonzya kubayumina bantu bamwi kusyoma kuti cintu cipati kapati mbuli nyika, caanzikidwe aatakwe cintu. Mwana ambweni inga wabelesya bbola naa bbwe ikutondezya kuti zintu zilema zyeelede kukkala acintu cimwi. Ciiyo cili boobu cilakonzya kupa kuti mwanaanu asyome kuti Jehova wakalemba twaambo tuluzi mu Bbaibbele kaindi bantu kabatanatuzyiba twaambo ooto.—Neh. 9:6. w16.09 5:9, 12

Lusyomo lubikkilizya zintu zinji ikutali buyo kumvwisya makanze aa Leza. Mbube bumwi ibuli anguzu zyakupa kuti muntu acite zintu kweelana akuyanda kwa Leza. Kuba alusyomo mububambe bwa Leza bwakufwutula bantu kukulwaizya bakombi kwaambila bamwi makani mabotu. Bulangizi bwesu bwakupona buumi butamani munyika mpya ya Leza kuyeeme aakuba alusyomo alimwi akuzumanana kuluyumya. Ikuzumanana kuyumya lusyomo lwesu inga kwakozyanisyigwa ambociyandika kutilila cisyango. Mukwiimpana amaluba aakupanga, cisyango cipona ceelede kuzumanana kukomena. Cisyango cipona cilakonzya kuyuma akaambo kakutatililwa naa kuzumanana kukomena akaambo kakutililwa lyoonse. Ikuti naa kacitatililwi, cisyango icakali kukomena kabotu mukuya kwaciindi inga cafwa. Oobo mbolubede alusyomo lwesu. Ikuti katutalubikkili maano, inga lwafwa. (Lk. 22:32; Heb. 3:12) Pele ikuti katulubikkila maano, lusyomo lwesu inga lwazumanana kupona, ‘kukomena’ alimwi inga twaba “bayumu mulusyomo.”—2Tes. 1:3; Tit. 2:2. w16.10 4:4, 5

Ciindi Daniele alimwi abeenzinyina nobakali mubuzike, bana Babuloni bakasola kuboongelezya kutola lubazu muzilengwa zyabo kwiinda mukubayiisya “mulaka waba Kasidi.” Kuyungizya waawo, mupati wababelesi bamwami iwakali kulanganya zyalwiiyo lwabo wakabapa mazina abana Babuloni. (Dan. 1:3-7) Izina ndyaakapegwa Daniele lyakali kwaamba Beli, leza mupati wabana Babuloni. Kulangilwa kuti mwami Nebukadinezara wakali kuyanda kutondezya Daniele kuti Leza wakwe Jehova, wakazundwa aleza wabana Babuloni. (Dan. 4:8) Nokuba kuti Daniele wakapegwa zyakulya kuzwa kubudodoodo bwamwami, “wakakanza mumoyo wakwe” kuti tanaakali ‘kuyoolisofwaazya.’ (Dan. 1:8) Akaambo kakuti wakazumanana kwiiya “mabbuku aasalala” mumwaambo wakwe, wakazumanana kuba musungu kumuuya ciindi naakakkede kucisi cimbi. (Dan. 9:2, bupanduluzi buyungizyidwe) Aboobo, nokwakainda myaka iili 70 kuzwa ciindi naakasika ku Babuloni, wakacilizyibidwe azina lyakwe lya Chihebrayo.—Dan. 5:13. w16.10 2:7, 8

Jesu wakasala “muzike uusyomeka” kuba nzila ilikke iibelesyegwa kwaabila cakulya cakumuuya. (Mt. 24:45-47) Kuzwa mu 1919, Jesu Kristo mubulemu bwakwe wali kubelesya muzike ooyu kugwasya basikumutobela kumvwisya Bbuku lya Leza, alimwi akutobela lulayo lwandilyo. Kwiinda mukumvwida malailile aajanika mu Bbaibbele, tusumpula busalali, luumuno, alimwi alukamantano mumbungano. Umwi aumwi wesu weelede kulibuzya kuti, ‘Sena ndilasyomeka kuli baabo Jesu mbabelesya mazuba aano?’ Jwi lya Jehova lilatugwasya kuzyiba cibeela cambunga yakwe cakujulu. Mucikozyanyo, musinsimi Ezekieli wakatambula cilengaano mwalo cibeela cambunga ya Leza cakujulu mociimininwa ankalaki yakujulu. (Ezk. 1:4-28) Mbwaanga Kristo alimwi abangelo basyomeka balaafwaafwi kunyonyoona nyika eeyi mbyaabi, nkalaki ya Jehova ikanzide kusumpula bulelo bwakwe alimwi akusalazyigwa kwazina lyakwe lisalala! w16.11 3:9, 10

Mbubwenya mbuli basikutobela Jesu bakaindi, tulaswaangana antoomwe kutegwa twiiye alimwi akukulwaizyigwa. (1Kor. 14:31) Nobaba babelesi ba Leza basimide kumuuya bayandika kukulwaizyigwa. Amuyeeye kujatikizya Joshua. Wakamubelekela Leza cakusyomeka kwamyaka minji. Nokuba boobo, Jehova wakaambila Musa kuti amukulwaizye, ategwa: “Kobikka Joshua kuba musololi alimwi umukulwaizye akumuyumya-yumya, nkaambo nguuyoosololela bantu aaba alimwi ngonguwe uuyoobapa kuti bakone nyika njotiibone.” (Dt. 3:27, 28) Aciindi eeci, Joshua wakali kulibambila kutambula mukuli mupati kapati iwakusololela bana Israyeli kuti bakone Nyika Yakasyomezyegwa. Wakali kuyoojana buyumu-yumu alimwi akuzundwa munkondo ciindi comwe. (Jos. 7:1-9) Nkakaambo kaako Joshua wakali kuyandika kukulwaizyigwa alimwi akuyumizyigwa. Aboobo katubakulwaizya baalu, kubikkilizya abalangizi bamabazu ibabeleka canguzu kulanganya butanga bwa Leza.—1Tes. 5:12, 13. w16.11 1:12, 13

Basikwiiya Bbaibbele bakalizyi kuti tiikwakazulide ikuzyibya buyo banamukwasyi, balongwe, alimwi abasicikombelo bamwi kujatikizya ntaamu njobakabweza yakuzwa mubukombi bwakubeja. Bantu munyika yoonse bakeelede kulibonena ameso kuti Babuloni Mupati wakali muvwuule mumakani aabukombi. Aboobo, akati kati kamwaka wa December 1917 alimwi akumatalikilo aamwaka wa 1918, Basikwiiya Bbaibbele ibali zyuulu zili mbozibede bakamwaya cabusungu matulakiti aali 10,000,000 aakajisi mutwe wakuti “Kuwa kwa Babuloni,” calo icakayubununa Bunakristo Bwanyika Bwakubeja. Mbuli mbomukonzya kuyeeyela, basololi bazikombelo bakanyema kapati; pele Basikwiiya Bbaibbele tiibakayoowa pe, muciindi caboobo bakazumanana amulimo ooyu uuyandika kapati. Bakalikanzide kumvwida “Leza mbwali mweendelezi kutali bantu.” (Mil. 5:29) Ino eeci citondezya nzi? Citondezya kuti, muciindi cakuba bazike kuli Babuloni Mupati ciindi cankondo, baalumi abamakaintu Banakristo aaba bakali kwaanguluka buya mubuzike bwakwe akuti bakali kugwasya bambi kucita boobo. w16.11 5:2, 4

Ibamwi balakonzya kuyeeya kuti ooku nkwiindana kuliko akati kabaabo ibatali mukasimpe abaabo bali mukasimpe, alimwi aakati kabaabo ibatali Banakristo alimwi a Banakristo. Nokuba boobo, Paulo wakali kulembela baabo ibakali “mu Roma aabo Leza mbayandisya, ibakaitwa kuba basalali.” (Rom. 1:7) Aboobo Paulo wakali kwiindanya akati ka Banakristo ibakali kweenda kweelana azisusi zyamubili alimwi a Banakristo ibakali kweenda kweelana amuuya. Wakaswaanganya “kutobela zisusi zyanyama” ‘azisusi’ aciindi eeco izyakali ‘kubeleka mumibili yabo.’ (Rom. 7:5) Aboobo ciindi naakali kwaamba aabo “bayeeya buyo zintu zyamubili,” Paulo wakali kwaamba bantu ibeendelezyegwa naa ibabikkila kapati maano kuzintu nzyobayanda alimwi anzyobalombozya kabali bantu batalondokede. Kanji-kanji, aaba mbantu ibatobela zintu nzyobayanda, ibatobela kufwumbwa ncobayeeya mumoyo wabo, alimwi ibatobela zisusi zyabo, kufwumbwa naa zintu eezyo zijatikizya makani aakoonana naa zintu zimbi buyo. w16.12 2:5, 7

Kulibilika kumwi inga kwaboola akaambo kakulezya naa micito muntu njaakali kucita kaindi. Zimwi ziindi, Mwami Davida wakali kulimvwa kuti ‘milandu yakwe yakamuvwulila atala aamutwe wakwe.’ Wakalyaambilila kuti: “Moyo wangu uupengede kapati wandipa kutongela.” (Int. 38:3, 4, 8, 18) Mubukkale oobo, ino ncintu nzi ciyandika ncaakeelede kucita Davida? Ino ncinzi ncaakacita? Wakasyoma muluse alimwi amukulekelela kwa Jehova. (Int. 32:2, 3, 5) Zimwi ziindi mulakonzya kulibilika kujatikizya zintu zicitika mubuumi bwanu. Mucikozyanyo, ciindi Davida naakalemba Intembauzyo 55, wakaliyoowede akaambo kakuti buumi bwakwe bwakali muntenda. (Int. 55:2-5) Nokuba boobo, tanaakalekela kulibilika kuti kumupe kuleka kusyoma Jehova. Davida wakapaila cakutaleka kujatikizya mapenzi ngaakajisi, pele alimwi wakabona mbocakali kuyandika kubweza ntaamu zigwasya kutegwa alwane zintu izyakali kumupa kulibilika. (2Sam. 15:30-34) Amwiiye ciiyo kuli Davida. Muciindi cakulekela kulibilika kuti kumupe kugolelwa maano, amubweze ntaamu zyeelede kutegwa mulwane penzi limwi, mpoonya mwamana kucita boobo, calusyomo amwaasiye mumaanza aa Jehova makani aayo. w16.12 3:14, 15

Davida wakazumina lulayo kuzwa kumwiiminizi wa Jehova, musinsimi Natani. Alimwi Davida wakapaila kuli Jehova, kulyaambilila zibi zyakwe alimwi akutondezya kuti wakali kuyandisisya kubukulusya cilongwe cakwe a Jehova. (Int. 51:1-17) Muciindi cakuti atyompwe akaambo kakulipa mulandu, Davida wakaiya kuzibi zyakwe. Masimpe, tanaakainduluka kucita zibi zipati eezyo. Mukuya kwaciindi, wakafwa kasyomeka, kusyomeka kwakwe kwakazumanana kuyeeyegwa a Jehova. (Heb. 11:32-34) Ncinzi ncotukonzya kwiiya kuzwa kucikozyanyo ca Davida? Ikuti naa twacita cibi cipati, tweelede kweempwa kuzwa ansi aamoyo akulomba Jehova kuti atulekelele. Tweelede kulyaambilila zibi zyesu kulinguwe. (1Joh. 1:9) Alimwi tweelede kubona baalu, balo bakonzya kutugwasya kumuuya. (Jak. 5:14-16) Kwiinda mukutobela bubambe bwa Jehova, tutondezya kuti tulasyoma mucisyomezyo cakwe cakutuponya alimwi akutulekelela. Kuyungizya waawo, tweelede kwiiya kuzwa kuzibi zyesu, tweelede kuzumanana mumulimo wa Jehova, alimwi akulangila izili kumbele katujisi lusyomo.—Heb. 12:12, 13. w17.01 1:13, 14

Ino “micito yakulisumpula” ninzi? Caamba kutakkazyika moyo naa kufwambaana kucita zintu muntu nzyatazumizyidwe. Akaambo kacibi ncotwakakona, toonse tulalisumpula zimwi ziindi. Pele mbubonya mbotwabona mucikozyanyo ca Mwami Saulo, ikuti naa twaba acilengwa cakucita zintu nzyotwataambilwa, mukuya kwaciindi tuyoolijana mumapenzi mapati kuli Leza. Lugwalo lwa Intembauzyo 119:21 lwaamba boobu kujatikizya Jehova: “Yebo ulabakalalila basikulisumpula.” Nkaambo nzi ncocili boobo? Cakusaanguna, ikuti twacita zintu cakutalibombya, nkokuti tatulemeki Jehova kuti Mweendelezi wesu weelela. Cabili, ikuti twacita zintu nzyotutazumizyidwe, tulangilwa kuzwangana abantu bamwi. (Tus. 13:10) Catatu, ikuti bantu bazyiba kuti twacita zintu cakulisumpula, inga twafwa nsoni naa kusampuka. (Lk. 14:8, 9) Zintu ziboola akaambo kamicito yakulisumpula inga nzibi. Kweelana a Magwalo mbwaatondezya, kulibombya lyoonse nenzila mbotu. w17.01 3:4, 5

Akaambo kakuti tanaakacili muntu uulondokede, Adamu tanaakacili kukonzya kutondezya bube bwa Leza cakulondoka. Tanaakasweekelwa buyo buumi bwakumbele bubotu, pele wakatambukizya bana bakwe kutalondoka, cibi alimwi alufwu. (Rom. 5:12) Wakaimya lunyungu lwakwe bulangizi bwakupona kukabe kutamani. Kuyungizya waawo, ba Adamu a Eva tiibakali kukonzya kuba abana balondokede; nobaba bana babo tiibakali kukonzya kuba abana balondokede. Naakamana kubazandula ba Adamu a Eva kuli Leza, Saatani Diabolosi wakazumanana kweena bantu kusikila asunu. (Joh. 8:44) Nokuba boobo, luyando lwa Leza kubantu lulazumanana kukabe kutamani. Nokuba kuti ba Adamu a Eva bakazanga, Jehova uyanda kuti bantu babe acilongwe cibotu anguwe. Tayandi kuti muntu uuli woonse akafwe. (2Pet. 3:9) Aboobo kuzwa buyo nobwakacitika buzangi, Leza wakabikka bubambe bwakuti bantu bacikonzye kubukulusya cilongwe anguwe kumwi kakunyina kusotoka zyeelelo zyakwe ziluleme.—Joh. 3:16. w17.02 1:12-14

Kulumba mukuli ngotujisi mumulimo wa Jehova kuyookomena ciindi notwiiya Leza mbwabona bubotu muli bamwi. Muciindi cakuyanda kuti tubonwe naa kuyanda kubweza mikuli iimwi, lyoonse tunoolomba lulayo kuzwa kuli bamwi cakulibombya alimwi akutobela mizeezo yabo. Tuyookkomana ambabo ciindi baakutambula mikuli iimwi. Alimwi tuyootembaula Jehova twaakubona mbwacilongezya “ciinga coonse cabakwesu munyika.” (1Pet. 5:9) Alimwi tunoosala kabotu kwiinda mukwiiya cakulibombya kubona zintu munzila Jehova mbwazibona. Kwiinda mukwiiya Bbaibbele lyoonse, kupaila, alimwi akuzicita zintu nzyotwiiya, asyoonto-syoonto inga twaayumya manjezyeezya eesu. (1Tim. 1:5) Twiiya kubikka ziyandika zyabamwi mubusena bwakusaanguna. Ikuti twacita lubazu lwesu, Jehova usyomezya kuti ‘uyoolumanizya lwiiyo lwesu,’ akutugwasya kuba abube oobu bwakulibombya alimwi abube bumbi bwabunaleza.—1Pet. 5:10. w17.01 4:17, 18

Ibaciinga cesu calusyomo abalo baleelede kulemekwa. Eeci cilayandika kapati kwaambisya kubaalu aabo ibasololela. Tulabalemeka bakwesu aaba tacikwe makani akucisi nkobazwa, lwiiyo ndobajisi, mpuwo njobajisi, naa amali ngobajisi. Bbaibbele lyaamba baalumi aaba kuti “zipego mubantu,” alimwi balayandika kapati mububambe bwa Leza bwakulanganya ziyandika zyabantu bakwe. (Ef. 4:8) Amuyeeye buyo baalu bamumbungano, balangizi bamabazu, bamu Kkomiti ya Mutabi, alimwi abamu Kabunga Keendelezya. Bakwesu abacizyi bamumwaanda wamyaka wakusaanguna bakali kubalemeka kapati aabo bakasalidwe kuti kabasololela, andiswe mbotulimvwa oobo mazuba aano. Tatweelede kucita mbuli kuti tubakomba buya baiminizi bamumbungano ya Bunakristo ibajisi mpuwo naa ikucita zintu mbuli kuti kuli bangelo baliko munsi-munsi ciindi notuli ambabo. Nokuba boobo, tweelede kubalemeka bakwesu bali boobo akaambo kakuti balabeleka canguzu alimwi balalicesya.—2Kor. 1:24; Ciy. 19:10. w17.03 1:13

Eelo kaka Jesu wakaliindene a Heroda Agripa I, iwakazyikuba mwami naa musololi waku Judaya! Mubuzuba bumwi bwaalubazu, Heroda wakasama “cisani cakwe cabwami.” Mpoonya bantu ibakabungene bakatalika koompolola kuti: “Ndijwi lyaleza, talili lyamuntu pe!” Akaambo kakuti Heroda wakali kukuyanda kulemekwa, “ndilyonya eelyo mungelo wa Jehova wakamuuma nkaambo tanaakapa bulemu kuli Leza, mpoonya wakaligwa mvwunyu eelyo wakafwa.” (Mil. 12:21-23) Masimpe, kunyina muntu uuyeeya uukonzya kwaamba kuti Heroda wakasalwa a Jehova kuti abe musololi. Kulubazu lumwi, Jesu wakapa bumboni butupa kusyoma kuti wakasalwa a Leza, alimwi lyoonse wakali kumulemeka Jehova mbwali Musololi Mupati wabantu bakwe. Bweendelezi bwa Jesu tiibwakali buyo bwamyaka misyoonto. Naakabusyigwa wakaamba kuti: “Ndapegwa nguzu zyoonse kujulu alimwi aanyika.  . . . Alimwi amubone! Ndilaandinywe mazuba oonse mane kusikila kumamanino aabweende bwazintu.”—Mt. 28:18-20. w17.02 3:20, 21