March

Akaambo kakuti banabokwabo Jefita bakamunyonokela alimwi akumusula, bakamutanda munyika yakwe. (Bab. 11:1-3) Ino tuzyi buti oobo? Tulizyi akaambo kakuti ciindi baalu bamucisi nobakamukombelezya kuti abagwasye, wakabagwasya mpoonya-mpoonya. (Bab. 11:4-11) Kulwanina zina lya Jehova alimwi abantu bakwe cakali kuyandika kapati kuli Jefita kwiinda mbwaakali kulimvwa. Wakalikanzide kusyomeka kuli Jehova. Kucita boobu kwakapa kuti Jehova amulongezye alimwi akulongezya bana Israyeli. (Heb. 11:32, 33) Sena tulatobela cikozyanyo ca Jefita? Ambweni kuli zintu izyakatupa kutyompwa naa tiitwakeendelezyegwa kabotu abakwesu bamwi Banakristo. Ikuti kacili boobo, tatweelede kuleka kujanika kumiswaangano ya Bunakristo naa kuleka kubelekela Jehova alimwi akubelekela antoomwe ambungano cakumaninina. Kwiinda mukwiiya Jefita, andiswe tulakonzya kubelesya zyeelelo zyamu Bbaibbele kuzunda bukkale bukatazya alimwi akuzumanana kucita ciluzi.—Rom. 12:20, 21; Kol. 3:13. w16.04 1:7, 9, 10

Tweelede kuliyumya kutali buyo kwaciindi cili mbocibede, pele kusikila kumamanino. Amweezyeezye bwato bupati ibwatalika kunyikila. Kutegwa bafwutuke, bantu ibali mubwato beelede kudwaya kusikila bakasike kunkomwe. Muntu uulengaana kudwaya mbwaatalikila buyo ulanywida akufwa. Mbubwenya buyo, muntu uulengaana kudwaya nokwacaala buyo asyoonto kuti asike kunkomwe awalo ulanywida akufwa. Kuti katuyanda kuyoopona munyika mpya, tweelede kuzumanana kuliyumya. Atube mbuli mwaapostolo Paulo iwakaamba kuti: “Tatulengaani pe.” (2Kor. 4:16) Mbubwenya mbuli Paulo, tulisinizyide kuti Jehova uyootugwasya kuliyumya kusikila kumamanino. Paulo wakalemba kuti: “Tulazunda cakumaninina kwiinda muli yooyo wakatuyanda. Nkaambo ndilisinizyide kuti lube lufwu, naa buumi, naa bangelo, naa mfwulumende, naa zintu ziliko lino, naa zilangilwa kumbele, naa nguzu, naa zintu zili mujulu, naa zili ansi, naa cilenge cimbi cili coonse tazikonzyi pe kutwaandaanya kuluyando lwa Leza luli muli Kristo Jesu Mwami wesu.”—Rom. 8:37-39. w16.04 2:17, 18

Amumulombe Jehova kuti amupe busongo kutegwa mubumvwisye bukkale oobo ibukonzya kupa kuti cimukatazye kutatola lubazu mutwaambo twacisi. Alimwi amumulombe kuti amugwasye kucita ciluleme mubukkale oobo. Mulakonzya kwaangwa muntolongo naa kusubulwa munzila imwi akaambo kakusyomeka kuli Jehova. Ikuti caba boobo, amupailile kuti mube basicamba kutegwa mukonzye kupandulwida bamwi munzila iilimvwisya ikaambo ncomutatoleli lubazu mutwaambo twacisi. Mulakonzya kuba masimpe kuti Jehova uyoomugwasya kuliyumya. (Mil. 4:27-31) Jehova wakatupa Bbaibbele kuti kalituyumya. Amuzinzibale kuyeeya tupango twamu Magwalo itukonzya kumugwasya kuzumanana kutatola lubazu mutwaambo twacisi. Amusole kwiiya tupango ootu akutuyeeya, nkaambo tuyoomugwasya ciindi nomutanoojisi Bbaibbele. Bbaibbele alimwi lilakonzya kupa kuti mube abulangizi buyumu muzisyomezyo zyakumbele Leza nzyaamba. Tuyandika bulangizi oobu kutegwa tukonzye kuliyumya notupenzyegwa. (Rom. 8:25) Amusale tupango itupandulula zintu ziyoomukkomanisya munyika mpya, alimwi amweezyeezye kuti nkomuli aciindi eeco. w16.04 4:14, 15

Basololi bazikombelo zya Bunakristo Bwanyika tabakambauki kujatikizya Bwami bwa Leza. Ikuti naa baba acoolwe cakwaamba zya Bwami, bunji bwabo baamba kuti nkulimvwa muntu nkwaba aankuko mumoyo wakwe. (Lk. 17:21) Kunyina nobayiisya bantu kuti Bwami nimfwulumende yakujulu iyeendelezyegwa a Jesu. Muciindi caboobo, kanji-kanji nciindi buyo ca Kkilisimasi naa Isita nobaamba kujatikizya Jesu. Kunyina nobapandulula kuti Bwami buyakwaamanizya mapenzi aabantu oonse alimwi akuti lino-lino buyo buyakugwisya bubi boonse munyika. (Ciy. 19:11-21) Cilisalede kuti, basololi bazikombelo zya Bunakristo Bwanyika tabazyi ncayakucita Jesu kali Mwami wa Bwami bwa Leza. Kunze lyaboobo, tabazyi ikaambo ncobeelede kukambauka. Tabeelede kukambauka kutegwa bapange mali naa kuyaka mayake aayebeka kapati. Aboobo mulimo wakukambauka taweelede kuba makwebo pe. (2Kor. 2:17, bupanduluzi buyungizyidwe) Basikwiiya ba Jesu tabeelede kulangila kubbadelwa akaambo kamulimo wabo wakukambauka.—Mil. 20:33-35. w16.05 2:7, 8

Atwaambe kuli cakusama ncomuyanda kapati pele mulizyi kuti bamwi mumbungano balakonzya kutyompwa ikuti naa mwacisama cisani eeco. Bbaibbele talyaambi cacigaminina kujatikizya mbocisumidwe cisani eeco. Aboobo ino inga mwazyiba buti Jehova mbwayeeya? Ibbaibbele litwaambila kuti: “Bamakaintu beelede kulisakatizya kwiinda mukusama kabotu, cabulemu alimwi acakulibatamika, ikutali kwiinda mukoosa masusu munzila zigambya amukusama ngolida, naa ngale naa zisani zidula kapati, pele munzila yeelede bamakaintu balyaamba kuti balilyaabide kuli Leza.” (1Tim. 2:9, 10) Inzya, boonse babelesi ba Jehova, kubikkilizya abamaalumi balakonzya kwiiya kumajwi aaya. Ikuti katuli babombe, tunoobikkila maano mbobalimvwa bamwi kujatikizya zisani nzyotusala kusama. Alimwi akaambo kakuti tulabayanda bakwesu, tatuyandi kubanyemya naa kubatyompya.—1Kor. 10:23, 24; Flp. 3:17. w16.05 3:14

Ciindi Adamu naakazangila Mulengi wakwe, tanaakacili mwana wa Leza pe. Pele bunji bwabana ba Adamu basala Jehova kuti abe Mweendelezi wabo. (Heb. 12:1) Kwiinda mukumvwida Mulengi wabo cakumaninina, batondezya kuti bayanda nguwe kuti abe Usyi alimwi a Mubumbi wabo ikutali Saatani. (Joh. 8:44) Kusyomeka kwabo kuli Leza kutuyeezya majwi aali mulugwalo lwabuzuba bwasunu. Mazuba aano, abalo bakombi ba Jehova bakasimpe balasolekesya kapati kuba bantu balibombya alimwi ibamvwida. Bacibona kuti ncoolwe cipati kwiita Jehova kuti ngu Usyi, alimwi bayanda kuti abe Mubumbi wabo. Sena tulilibambilide kuba mbuli bulongo butete oobo Leza mbwakonzya kubumba kuti bube cintu ciyandisi? Sena bakwesu abacizyi boonse tubabona kuti bacibumbwa a Leza? w16.06 1:2, 3

Tuli afwaafwi kapati kunjila munyika mpya, alimwi lusyomo lwesu lulasunkwa. Aboobo tweelede kululingula mboluli luyumu lusyomo lwesu. Ino mbuti mbotukonzya kusinizya kuti nduyumu? Tulakonzya kulanga-langa majwi aa Jesu aali kulugwalo lwa Matayo 6:33. Amulibuzye kuti: ‘Sena mbaakani zyangu alimwi azyakusala zyangu ncobeni zilatondezya kuti ndilaasyoma majwi aa Jesu? Sena inga ndalovwa kumiswaangano naa mumulimo wamumuunda kutegwa ndipange mali manji? Ino inga ndacita buti ikuti naa mulimo wangu uyanda kuti kandibeleka canguzu kapati alimwi kwamawoola manji? Sena ndiyakwiilekela nyika eeyi kuti kaindeendelezya alimwi ambweni buya akundipa kuti ndicileke kubelekela Jehova?’ Ikuti katutatobeli Bbaibbele ncolyaamba kujatikizya balongwe babyaabi, kuyanzana abantu bagwisyidwe mumbungano, naa zyakulikondelezya, myoyo yesu inga yayuma. Ino ncinzi ncomweelede kucita ikuti naa eezyi zyatalika kumucitikila? Cakutasowa ciindi mweelede kululanga-langa lusyomo lwanu! Amulilingule akubona bwini mbomucita mumakani aaya, mpoonya amubelesye Jwi lya Leza lyoonse ikululamika mizeezo yanu. w16.06 2:8, 9

Nyika yoonse mbwiizulwa, kuli mbunga yabantu ibamuyanda Jehova alimwi akumubelekela. Bantu aabo baitwa kuti Bakamboni ba Jehova. Nokuba kuti abalo balalezya akulubizya, Jehova ulabasololela bantu bakwe amuuya wakwe uusalala. Mu 1914, bantu ibakali kukomba Jehova bakali basyoonto kapati. Nokuba boobo Jehova waulongezya mulimo wakukambauka. Akaambo kamulimo ooyu, bantu banji baiya kasimpe kamu Bbaibbele alimwi baba Bakamboni bakwe. Jehova wakapandulula kuvwula ooku naakaamba majwi aali mulugwalo lwabuzuba bwasunu akuyungizya kuti: “Mebo lwangu, nde Jehova, ndiyoopa kuti eeci cifwambaane kucitika muciindi cancico ceelede.” Mazuba aano tulakonzya kubona caantangalala kuti businsimi oobu bwazuzikizyigwa. Bantu ba Jehova bali mbuli cisi cipati. Mubwini, kuli zisi zinji kapati munyika izijisi bantu basyoonto twazyeelanisya amweelwe wabantu ba Jehova. w16.06 4:1, 2

Kweelana a Jesu, tiicakali camaano kuti Usyi wakujulu kakonzya kusanina bayuni pele kaalilwa kusanina bantu. (1Pet. 5:6, 7) Leza takabikki cakulya mukanwa lyesu pe, pele uyookulongezya kusoleka kwesu kutegwa tulime cakulya ncotuyandika naa kujana mali aayandika kutegwa tuule nzyotuyandika. Ikuti naa twabula munzila imwi, ulakonzya kukulwaizya bamwi kutwaabila nzyobajisi. Nokuba kuti Jesu kunyina naakaamba kujatikizya kupangila bayuni bamujulu ziteente, Jehova wakabapa busongo alimwi azintu ziyandika kutegwa kabalipangila ziteente. Mbubwenya buyo, Jehova ulakonzya kutugwasya kujanina mikwasyi yesu ŋanda mwakukkala. Ciindi naakali kwaamba majwi aali mulugwalo lwabuzuba bwasunu, cakutadooneka, Jesu wakalizyi kuti kalitanalampa wakali kuyoopa buumi bwakwe kuti anunune bantu. (Amweezyanisye a Luka 12:6, 7.) Jesu kunyina naakafwida bayuni bauluka mujulu pe, pele wakafwida ndiswe kutegwa tukakkomane abuumi butamani.—Mt. 20:28. w16.07 1:11-13

Ino mbuti bantu mbobakakona cibi alimwi alufwu eezyo izitupenzya toonse? Ibbaibbele lipandulula kuti: “Kucibi camuntu omwe [Adamu] lufwu lwakeendelezya mbuli mwami” akati kalunyungu lwa Adamu. (Rom. 5:12, 14, 17) Nokuba boobo, cintu cikkomanisya ncakuti, tulakonzya kulisalila kuteendelezyegwa, naa kudyaamininwa acibi. Kwiinda mukutondezya lusyomo mucipaizyo ca Kristo cacinunuzyo, tulibikka mubweendelezi bwa Jehova ibwaluzyalo. (Rom. 5:20, 21) Nokuba kuti tucili basizibi, tatweelede kutyompwa akulekela cibi kutudyaaminina mubuumi bwesu. Ikuti cibi catuzunda mpoonya twabisya, tweelede kumulomba Jehova kuti atulekelele. Aboobo luzyalo lwa Leza lutalika kutweendelezya. Ino ncinzi cicitika akaambo kakweendelezyegwa aluzyalo lwa Leza? Paulo wakapandulula kuti: “Luzyalo lwa Leza . . . lutuyiisya kukaka bukkale bwakutayoowa Leza azisusi zyanyika akuti tweelede kupona cakulibatamika, cabululami alimwi acakubelekela Leza cakulyaaba mubweende bwazintu obuno.”—Tit. 2:11, 12. w16.07 3:5, 6

Cikwati cakusaanguna cakaba mumapenzi mapati akaambo kakuti ba Adamu a Eva bakasala kutazibelesya kabotu nguzu zyabo zyakulisalila kwiinda mukutamvwida Jehova. “Imuzoka ooyo wakaindi,” nkokuti Saatani Diabolosi, wakeena Eva kwiinda mukumoongelezya akumupa kusyoma kuti ikulya mucelo ‘kucisamu cakuzyiba bubotu abubi’ kwakali kuyoomupa kuba aluzyibo lulibedelede ilwakali kuyoomugwasya kusala cibotu acibi. Eva kunyina naakabulemeka busilutwe bwamulumaakwe nkaambo tanaakasaanguna kumubuzya kujatikizya makani aaya. Alimwi muciindi cakumvwida Leza, Adamu wakaile buyo kutambula mucelo Eva ngwaakamupa. (Ciy. 12:9; Matl. 2:9, 16, 17; 3:1-6) Ciindi Leza naakamubuzya kujatikizya makani aaya, Adamu wakapa mukaintu wakwe mulandu. Eva awalo wakapa nzoka mulandu akaambo kakuti yakamucenga. (Matl. 3:12, 13) Zilitamizyo zyoonse eezyi tiizyakali kugwasya pe! Akaambo kakuti banabukwetene bakusaanguna tiibakamumvwida Jehova, wakababona kuti mbazangi mumeso aakwe. Eelo kaka eeyi nincenjezyo mpati kapati kulindiswe! Kutegwa cikwati cizwidilile, banabukwetene boonse bobilo beelede kuzumina kulubizya kwabo alimwi akumvwida Jehova. w16.08 1:1, 4, 5

Zintu izyatakali kulangilwa naa kuyeeyelwa zilakonzya kuba ndepenzi lipati mucikwati. Ikuti zintu izyakali kulangilwa mucikwati tiizyacitika, muntu ulakonzya kutakkutila, kulimvwa kweenwa, nokuba kunyema buya. Ikwiindana kujatikizya mbobayeeya alimwi ambobakakomezyegwa kulakonzya kuleta mazwanga akati kabanabukwetene, ambweni buya akutamvwana mumakani aajatikizya mali, bamakwe, alimwi ambobeelede kulelwa bana. Nokuba kuti zintu zili boobo, cilakkomanisya kuzyiba kuti banabukwetene banji Banakristo balajana nzila zyeelede zyakwaamana mapenzi oonse aali boobu akaambo kakuti beendelezyegwa a Bbaibbele. Banakristo bakwetene ibajisi mapenzi mapati mucikwati beelede kulomba lugwasyo kubaalu. Bakwesu aaba ibajisi luzyibo balakonzya kubagwasya banabukwetene ikutobela lulayo lujanika mu Jwi lya Leza. Ciindi notusoleka kumana mapenzi aamucikwati, tweelede kulomba muuya wa Jehova alimwi akulomba kuti atugwasye kutobela njiisyo zyamu Bbaibbele akutondezya mucelo wamuuya wakwe.—Gal. 5:22. w16.08 2:11-13

Jesu wakajisi buyo ciindi cisyoonto cakubeleka mulimo wakwe. Nokuba boobo, wakajana ciindi cakubandika abantu ibakali kutondezya luyandisisyo mumakani mabotu. Mucikozyanyo, Jesu wakayiisya nkamu yabantu ciindi naakali mubwato. Aciindi eeco, camaleele wakapa kuti Petro ajate nswi zinji mpoonya akwaamba majwi aali mulugwalo lwabuzuba bwasunu. Ino majwi aa Jesu alimwi amilimo yakwe zyakabajatikizya buti bamwi? Petro abaabo mbaakali limwi, ‘bakasiya zyoonse akumutobela [Jesu].’ (Lk. 5:1-11) Nikodemo, iwakali cibeela ca Nkuta Mpati Yaba Juda, wakakkomana azintu nzyaakali kuyiisya Jesu. Wakali kuyanda kwiiya zinji pele wakali kuyoowa bantu ncobakali kukonzya kwaamba ikuti bamubona kabandika a Jesu aabuleya. Jesu wakali muntu uunyoneka alimwi wakalilyaabide kubelesya ciindi cakwe kugwasya bamwi; wakaswaangana a Nikodemo masiku—bantu kabatababwene. (Joh. 3:1, 2) Mwana wa Leza wakali kujana ciindi cakuyumya lusyomo lwabamwi. Sena andiswe tatweelede kuba basungu kucita nyendo zyakupilukila alimwi akusololela ziiyo zya Bbaibbele kubantu ibajisi luyandisisyo? w16.08 4:10, 11

Kulibombya kwesu kubikkilizya kulilingula lwesu tobeni ciindi notulanga mbwasalala Jehova, nkaambo tusyoma nguwe cakumaninina kutegwa atusololele munzila mbotu kapati. Kuyungizya waawo, kulibombya kubikkilizya kubalemeka bamwi kujatikizya mbobalimvwa alimwi ambobayeeya mumakani aamwi. Aboobo ‘tuleenda cakulibombya a Leza wesu’ kwiinda mukweendelanya buumi bwesu azyeelelo zyakwe zisumpukide kapati alimwi akulemeka mbobalimvwa bamwi. Insamino yesu tayeelede kupa kuti bantu batalike kudooneka kuti tuli bakombi ba Jehova. Bakwesu abacizyi alimwi abantu bambi buyo beelede kubona kuti tuleelela kwiiminina Leza wesu mululami. Ulijisi zyeelelo zisumpukide, alimwi cakukondwa tulabeleka canguzu ikwiiya zyeelelo eezyo. Tweelede kubalumbaizya bakwesu alimwi abacizyi ibasama kabotu alimwi ibalilemeka kabotu akupa kuti bantu babombe myoyo bautambule mulumbe wamu Bbaibbele uufwutula bantu akupa kuti Jehova akkomane alimwi akulemekwa. w16.09 3:18-20

Jakobo wakali kanzide kulwana nkondo, alimwi wakalilibambilide kulangana apenzi lili lyoonse ilyakali kukonzya kumusikila! (Matl. 32:24-26) Masimpe, wakalongezyegwa kapati akaambo kakukakatila kwakwe. Wakatambula zina ilyakali kumweelela ilyakuti Israyeli, (ilipandulula kuti “Uuzundana [Uukakatila] a Leza”). Jakobo wakatambula cileleko cibotu kapati ncotulombozya andiswe—nkokuti kukkomaninwa a Jehova akulongezyegwa anguwe. Mukaintu wa Jakobo ngwaakali kuyandisya, Rakele, wakali kuyandisisya kubona Jehova mbwaakali kuyoozuzikizya cisyomezyo ncaakasyomezya mulumaakwe. Pele wakanyina bana. Mumazuba aayo, kutaba amwana lyakali penzi lipati. Ino Rakele wakazijana kuli nguzu izyakamuyumya-yumya mumizeezo akumubili kutegwa azumanane kulwana abukkale ibwakali kumutyompya alimwi mbwaatakali kukonzya kucinca? Taakwe naakacileka kulangila pe. Muciindi caboobo, wakazumanana kubulwana bukkale oobo kwiinda mukupaila cabusungu. Jehova wakamvwa kukombelezya kwa Rakele ikwakali kuzwa ansi amoyo, eelyo mukuya kwaciindi wakalongezyegwa kwiinda mukuba abana.—Matl. 30:8, 20-24. w16.09 2:6, 7

Cilayandika kapati kuti mubatondezye bana banu mbozigwasya njiisyo zyamu Bbaibbele. (Int. 1:1-3) Inga mwacita oobo munzila zinji ziindene-indene. Mucikozyanyo, mulakonzya kubaambila bana banu ikweezyeezya kuti baunka kuyookkala ansumbu iili kule kapati akuti bayooyandika kusala mweelwe wabantu ibeelede kukkala ambabo ansumbu eeyo. Mpoonya inga mwababuzya kuti, “Ino mbube nzi umwi aumwi wabo mbwayelede kuba ambubo kutegwa boonse ibali mukabunga aako bakkale muluumuno alimwi kabamvwana?” Alimwi inga mwabandika ambabo kujatikizya malailile aabusongo aajanika kulugwalo lwa Bagalatiya 5:19-23. Cakucita eeco citondezya ziiyo zyobilo ziyandika kapati. Cakusaanguna, zyeelelo zya Leza zikulwaizya muuya waluumuno alimwi alumvwano. Cabili, kwiinda mukutuyiisya lino, Jehova utugwasya kulibambila kupona buumi munyika mpya. (Is. 54:13; Joh. 17:3) Mulakonzya kutusalazya twaambo ootu kwiinda mukusala cakuluula cimwi mumabbuku eesu. Cakuluula eeco cilakonzya kuzwa mucibeela cimwaigwa mu Ngazi Yamulindizi cakuti “Ibbaibbele Lilakonzya Kubacinca Bantu.” w16.09 5:13, 14

Nokuba kuti tulakonzya katujisi bubi kapati, toonse tuyandika kujana ciindi cakucita ciiyo cesu tobeni alimwi akukomba kwamukwasyi. (Ef. 5:15) Nokuba boobo, makanze eesu taayelede kuba buyo aakulanga-langa mapeeji aali mbwaabede naa kulibambila buyo kutegwa tukaingule kumiswaangano. Tweelede kubona kuti Jwi lya Leza lilatusika amoyo alimwi akuyumya lusyomo lwesu. Tatweelede kulemenena kulubazu buyo lomwe pe, pele tweelede kuzibikkila maano bamwi nzyobayandika ciindi notwiiya alimwi akubikkila maano kuzintu swebo lwesu tobeni nzyotuyandika kumuuya. (Flp. 1:9, 10) Tweelede kuzyiba kuti ciindi notulibambila mulimo wamumuunda, miswaangano, naa makani, ambweni inga tiitwabikkila maano kubona makani aayo ngotubala mbwaatujatikizya swebo. Mucikozyanyo: Nokuba kuti sikujika cakulya weelede kucilabila cakulya katanapa bamwi, takonzyi kuzumanana kuba abuumi kwiinda mukulabila buyo cakulya ncajika. Ikuti kayanda kuzumanana kuba abuumi bubotu, weelede kulijikila cakulya icijisi busani bubotu. Mbubwenya buyo, tweelede kusolekesya kusanina moyo wesu acakulya cakumuuya eeco icizuzikizya nzyotuyandika. w16.10 2:10, 11

Bupanduluzi bwalusyomo kweelana a Bbaibbele mbolyaamba, bulajanika kulugwalo lwa Bahebrayo 11:1. Lusyomo luyeeme kapati azintu zyobilo nzyotutakonzyi kubona ameso eesu: (1) Zintu ‘eezyo zilangilwa’—eezyi zibikkilizya zintu iziyoocitika kumbele izyakasyomezyegwa kuti ziyoocitika pele izitanacitika, mbuli kumana kwabubi boonse alimwi akuboola kwanyika mpya. (2) “Zintu zini-zini zitanabonwa.” Mucibalo eeci, bbala lya Chigiriki lisanduludwe kuti “bumboni busalede” lyaamba bumboni butadoonekwi bwacintu cimwi iciliko pele citalibonyi, mbuli kubako kwa Jehova Leza, Jesu Kristo, bangelo, alimwi amilimo iibelekwa a Bwami bwakujulu. Ino mbuti mbotukonzya kutondezya kuti bulangizi bwesu nkobuli ncobeni alimwi akuti tusyoma muzintu zitalibonyi izyaambwa mu Jwi lya Leza? Tulakonzya kucita oobo kwiinda mumajwi eesu alimwi amilimo yesu. Ikuti zintu eezyi kazitako, lusyomo lwesu talukonzyi kuzulila pe. w16.10 4:6

Jehova alimwi a Jesu balatulumba kapati akaambo kazintu nzyotucita kugwasyilizya milimo ya Bwami, nokuba kuti nzyotucita alimwi anzyotusanga nzisyoonto akaambo kabukkale bwesu. (Lk. 21:1-4; 2Kor. 8:12) Mucikozyanyo, bamwi ibacembeede akati kesu balasolekesya kujanika kumiswaangano akutola lubazu alimwi akuunka mumulimo wamumuunda lyoonse. Sena tatweelede kubalumbaizya alimwi akubakulwaizya? Masimpe, tweelede kujana ciindi cakukulwaizya bamwi. Ikuti naa muntu wacita cintu cimwi cibotu iciyandika kumulumbaizya, sena tatweelede kumulumbaizya? Amulange-lange cakacitika ciindi Paulo a Barnaba nobakali ku Antiokeya mu Pisidiya. Bapati bacikombelo ookuya bakabaambila kuti: “Nobaalumi, bakwesu, ikuti kakuli majwi aali oonse aakuyumya bantu ngomujisi, amwaambe.” Paulo wakaingula kwiinda mukupa makani aasika amoyo. (Mil. 13:13-16, 42-44) Ikuti naa tulakonzya kwaamba majwi aakukulwaizya bamwi, tweelede kwaamba. Ikuti twaba acilengwa cakukulwaizya bamwi, tuyoojana kuti bantu banootukulwaizya andiswe.—Lk. 6:38. w16.11 1:3, 15, 16

Eelo kaka ncoolwe cilibedelede kuba cibeela cambunga ya Jehova! Akaambo kakuti tujisi luzyibo lwazyeelelo zya Leza, eeci citupa mukuli wakucita ziluzi alimwi akusumpula bweendelezi bwakwe. Mbwaanga nyika eeyi iyaabwiindila kubija mukutalilemeka, tweelede ‘kusulaika bubi,’ mbubwenya mbwacita Jehova. (Int. 97:10) Tatweelede kuba mbuli bantu basampaula Leza ibaamba kuti: “Bubotu mbubi abubi kuti mbubotu.” (Is. 5:20) Akaambo kakuti tuyanda kukkomanisya Leza, tweelede kusolekesya kuzumanana kusalala kumubili, mukulilemeka, alimwi akumuuya. (1Kor. 6:9-11) Tulamuyanda Jehova alimwi tulamusyoma; tusala kutondezya kusyomeka kulinguwe kwiinda mukupona kweelana azyeelelo zilembedwe mu Bbuku lyakwe liyandika kapati. Alimwi tulasola kusikila mpotugolela kutobela zyeelelo eezyo kuŋanda, mumbungano, kumilimo, kucikolo naa kufwumbwa kubusena nkotubede. w16.11 3:13

Basikwiiya Bbaibbele bakali kusoleka kutobela bululami. Pele akati kamwaka wa 1914 alimwi a 1919 tiibakalizyi kabotu cini ncocaamba kulibombya kumfwulumende zyabantu. Aboobo, kabali nkamu, ziindi zimwi bakali kutola lubazu munkondo. Mucikozyanyo, ciindi muleli wacisi ca United States naakaamba kuti buzuba bwa May 30, 1918 mbuzuba bwaalubazu bwakupailila luumuno, Ngazi Yamulindizi yakakulwaizya Basikwiiya Bbaibbele kuti abalo babasangane bantu bacisi mukupailila luumuno. Bakwesu bamwi bakapa mali aakugwasyilizya munkondo, alimwi bamwi akati kabo bakaunka kunkondo kabajisi ntobolo alimwi azipeni. Nokuba boobo, inga kwaba kulubizya kuti twaamba kuti Basikwiiya Bbaibbele bakatolwa mubuzike kuli Babuloni Mupati kutegwa bakalulamikwe. Muciindi caboobo, bakalizyi kuti bakeelede kulyaandaanya kubukombi bwakubeja, alimwi mu Nkondo Yakusaanguna Yanyika Yoonse ikulyaandanya kubukombi bwanyika bwakubeja bwakalaafwaafwi kumana.—Lk. 12:47, 48. w16.11 5:9

Ambweni mulakonzya kulibuzya ikaambo ikakapa kuti Paulo akankaizye ku Banakristo bananike ntenda iikonzya kuba akaambo kakupona “kweelana azisusi zyamubili.” Alimwi sena ntenda iili mbuli yeeyi ilakonzya kubacitikila Banakristo mazuba aano, aabo Leza mbaakasala kuba balongwe bakwe alimwi mbabona kuti mbalulami? Cuusisya ncakuti, kufwumbwa Munakristo ulakonzya kutalika kweenda kweelana azisusi zyamubili. Mucikozyanyo, Paulo wakalemba kuti bamwi akati kabakwesu baku Roma bakali bazike “bazisusi zyabo beni.” Kwiinda mumajwi aaya ambweni wakali kupandulula kuti makani aakoonana, cakulya alimwi azintu zimbi zyakulikondelezya zezintu nzyobakali kubikkila kapati maano mubuumi bwabo. Bamwi babo bakali ‘koongelezya myoyo yabantu batacenjede.’ (Rom. 16:17, 18; Flp. 3:18, 19; Jud. 4, 8, 12) Alimwi amuyeeye kuti kwaciindi cili mbocibede, mukwesu umwi waku Korinto wakali ‘kukkala amukaintu wabausyi.’ (1Kor. 5:1) Aboobo kalalimvwisya ikaambo Leza ncaakasololela Paulo kuti acenjezye Banakristo kujatikizya “kubikkila maano kuzintu zyamubili.” (Rom. 8:5, 6) Kucenjezya ooko kulabeleka amazuba aano. w16.12 2:5, 8, 9

Kubandika, nkokuti kwaambila muntu ngomusyoma zili kumoyo, kulakonzya kumugwasya kucesya kulibilika. Muntu ngomukwetene limwi, mulongwe ngomumvwana kapati, naa mwaalu mumbungano inga wamugwasya kuzilanga munzila yeelede zintu zimupa kulibilika. Kubandika cakutainda mumbali alimwi akwaamba masimpe kulakonzya kumugwasya kuzyiba mbomukonzya kwaalwana mapenzi aanu. Bbaibbele litwaambila kuti: “Makanze alanyongana ikuti kakunyina kubandika, pele ikuti kakuli basikulaya banji kulaba kuzwidilila.” (Tus. 15:22) Kuyungizya waawo, Jehova ulabagwasya Banakristo kulwana zintu zibapa kulibilika kwiinda mumiswaangano iicitwa nsondo ansondo. Ookuya mulakonzya kuyanzana abakombinyoko ibamubikkila maano alimwi ibayanda kukulwaizyanya umwi amweenzinyina. (Heb. 10:24, 25) “Kuyumizyanya” kuli boobo kuyoomugwasya kuyuma kumuuya alimwi kuyoopa kuti cimuubaubile kulwana kulibilika kuli koonse.—Rom. 1:12. w16.12 3:17, 18

Ikuti naa katujisi penzi lyakuciswa-ciswa naa buyumuyumu bumwi buyo mbotutakonzyi kumana, tweelede kuwaala makatazyo eesu oonse kuli Jehova, katusyomede kuti ulatubikkila maano. (1Pet. 5:6, 7) Alimwi tweelede kucita zintu nzyotukonzya kutegwa katugwasyigwa amiswaangano ya Bunakristo alimwi azyakulya zimwi zyakumuuya. (Heb. 10:24, 25) Ino mbuti kujatikizya bazyali basyomeka ibajisi bana bakazanga? Mudaala Samuele tanaakali kukonzya kubasinikizya bana bakwe basankwa bapati kuti bazumanane kusyomeka kuzyeelelo ziluleme nzyaakabayiisya. (1Sam. 8:1-3) Makani wakeelede kwaasiya mumaanza aa Jehova. Nokuba boobo, Samuele wakali kukonzya kuzumanana kusyomeka alimwi akukkomanisya Jehova, Usyi wakwe wakujulu. (Tus. 27:11) Mazuba aano, bazyali banji Banakristo balijana mubukkale bukonzyenye aboobu. Basyoma kuti Jehova lyoonse ulabikkila maano kubatambula basizibi ibeempwa. (Lk. 15:20) Aciindi ncomunya eeci, bazyali bali boobo balabeleka canguzu kuzumanana kusyomeka kuli Jehova, kabalombozya kuti cikozyanyo cabo cibotu inga capa kuti bana babo bapiluke kubutanga. w17.01 1:15, 16

Muntu uulicesya kanji-kanji ulalibombya, nkokuti ulakonzya kubona kabotu-kabotu zintu nzyakonzya kucita alimwi akuzuzikizya, ulakuzumina kulubizya kwakwe, ulaitambula mizeezo alimwi anzila zipya zintu mbozyeelede kucitwa. Kulicesya kulamukkomanisya kapati Jehova. Mu Bbaibbele, kulibombya caamba kulizyiba kabotu mbotubede alimwi akuzyiba mpotugolela. Kweelana amwaambo wakusaanguna iwakabelesyegwa, kaambo kakankaizyidwe aawa kajatikizya luzyibo oolo mbolweelede kujatikizya mbotulilemeka kubantu bamwi. Ino ndilili notukonzya kutalika kuyeeya naa kucita zintu cakutalibombya? Atulange-lange zitondezyo zitucenjezya zisyoonto buyo. Inga twatalika kuciindizya mbotulibona alimwi ambotubona mikuli yesu. (Rom. 12:16) Tulakonzya kutalika kulibikkila kapati maano munzila iitali kabotu. (1Tim. 2:9, 10) Inga twatalika kulumbaizya buyo mizeezo naa zintu zijatikizya mukuli wesu, naa mbotuyeeya inga tiitwazyiba kuti twacinca kuzwa kukulibombya kuya kukulisumpula.—1Kor. 4:6. w17.01 3:6-8

Mazuba aano mulimo wabantu ba Jehova wakomena kapati. Mbotuyaabucita milimo mipya, inga kulaba nzila zipya zyakucita zintu—kanji-kanji nzila eezyi zijatikizya kubelesya makkompyuta alo aasumpuka ciindi aciindi. Bapati bamwi inga cilabayumina kweendela antoomwe akucinca ooku. (Lk. 5:39) Nokuba kuti aaka inga tiikaba kaambo keni, bana-bana inga balijisi nguzu kwiinda bapati. Aboobo, ncaluyando alimwi cilagwasya kubapati kuyiisya bana-bana kuba amikuli mipati. (Int. 71:18) Aabo ibali mubweendelezi ambweni inga cabayumina ikupa bana-bana mikuli. Bamwi bayoowa kusweekelwa mukuli ngobayanda kapati naa kabayeeya kuti bana-bana tabakonzyi kuzyeendelezya kabotu zintu. Alimwi bamwi inga bayeeya kuti tabajisi ciindi cakuyiisya muntu umwi. Kulubazu lumbi, aabo ibacili bana-bana beelede kukkazyika moyo ikuti naa tiibapegwa milimo minji. w17.01 5:3, 4

Jesu wakaba muntu uulondokede, mbubwenya mbuli Adamu mbwaakabede. (Joh. 1:14) Pele kwiindana a Adamu, Jesu wakapona kweelana azyeelelo Jehova nzyaakali kulangila kumuntu uulondokede. Noliba leelyo naakasunkwa kapati, Jesu tanaakacita cibi naa kutyola umwi wamilawo ya Leza. Kali muntu uulondokede, Jesu wakali kukonzya kubanununa bantu kuzwa kucibi alufwu kwiinda mukubafwida. Wakacita zintu zyoonse Adamu nzyaakeelede kucita—muntu uulondokede, iwakali kusyomeka cakumaninina alimwi akumvwida Leza. (1Tim. 2:6) Jesu wakaba cituuzyo cacinunuzyo cakajalula nzila kuya kubuumi butamani “cabantu banji” nkokuti baalumi, bamakaintu, alimwi abana. (Mt. 20:28) Masimpe, cinunuzyo nenzila iijalula mulyango kukuzuzikizyigwa kwamakanze aa Leza aakusaanguna. (2Kor. 1:19, 20) Cinunuzyo cipa bantu boonse basyomeka bulangizi bwabuumi butamani. w17.02 1:15, 16

Amweezyeezye kuti muli mulweendo lulamfwu alimwi kufwumbwa nkomwalanga, kulasiya mbi. Mulakonzya kulibilika naa mulaubona alimwi mumuni wazuba. Buumi mbotupona buli mbuli lweendo oolo. Ambweni inga mwayandika kwiinda mumapenzi aakatazya kapati, alimwi inga mwalimvwa kuti inga tiimwacikonzya kuliyumya mumapenzi. Jesu awalo ulakonzya wakalimvwa boobo. Ciindi naakali kujaigwa acisamu cakupenzyezya, wakasampaulwa alimwi wakamvwa kucisa kapati. Kweelede kuti eeci cakali ciindi cikatazya kapati mubuumi bwakwe! (Heb. 12:3) Ncinzi cakamugwasya kuliyumya? Jesu wakabikkila maano kulanga kubulumbu mbwaakali kuyoojana akaambo kakuliyumya kwakwe, kwaambisya bulumbu bwakuti wakali kuyootola lubazu mukusalazyigwa kwazina lya Leza akusumpula kweelela kwa Leza kwakweendelezya. Wakalizyi kuti sunko lyakali lyakaindi kaniini buyo akuti bulumbu bwakujulu mbwaakali kuyootambula tabukamani. Mazuba aano, masunko ngomujana mubuumi alakonzya kuvwula alimwi akucisa, pele amuyeeye kuti ngakaindi kaniini buyo. w16.04 2:10

Munyika eeyi bantu mobacita kufwumbwa ncobayanda, cibi tabaciboni kuba cintu ceelede kutantamukwa, cakuti bamwi tabazyi kuti tweelede kunununwa. Bunji bwabantu tabamvwisyi kuti naa cibi ninzi, mbocitujatikizya, alimwi ancotweelede kucita kutegwa tunununwe kubuzike bwacibi. Babombe myoyo balakatalusyigwa kuzyiba kuti Jehova, akaambo kaluyando lwakwe lupati alimwi aluzyalo lwakwe, wakatuma Mwanaakwe anyika kuti azyootununune kuzwa kucibi alimwi alufwu. (1Joh. 4:9, 10) Cituuzyo cacinunuzyo ca Kristo ncitondezyo cipati kapati caluyando Leza ndwajisi kulindiswe alimwi citondezya mboluli lupati luzyalo lwakwe. Eelo kaka cilaumbulizya kuzyiba kuti, ikuti twaba alusyomo mubulowa bwa Jesu, zibi zyesu zilakonzya kulekelelwa alimwi inga twaba amanjezyeezya aasalala! (Heb. 9:14) Aaya makani mabotu kapati ngotweelede kwaambila bamwi! w16.07 4:6, 7

Kutegwa tulekelelwe cakumaninina tweelede kutondezya lusyomo mucinunuzyo. Jwi lya Leza litusyomezya kuti zibi zyesu zilakonzya ‘kumwaigwa.’ (Mil. 3:19-21) Akaambo kacinunuzyo, Jehova wapa kuti babelesi bakwe bananikidwe amuuya babe bana bakwe. (Rom. 8:15-17) Caboola kulindiswe ‘tobambelele zimbi,’ cili mbuli kuti Jehova wabweza pepa ilijisi zina lyesu alindilyo ilitondezya kuti twaba bana bakwe. Twaakulondoka alimwi akuzwidilila mumusunko wamamanino, Jehova uyookkomana kulisaina pepa eelyo lyacikozyanyo, akupa kuti tube bana bakwe bayandwa baanyika. (Rom. 8:20, 21; Ciy. 20:7-9) Luyando lwa Jehova kubana bakwe bayandwa talumani. Zilongezyo zyacinunuzyo tazimani. Cipego eeci tacikajujuki pe. Kunyina muntu uukonzya kutunyanga. w17.02 2:15, 16

Kamuyeeya lyoonse cilongwe canu a Jehova mbocakatalika. Leza wakalizyi kuti mulalezya alimwi mulijisi tumpenda akuti mwakali kuyoozumanana kulubizya. Nokuba boobo, Jehova wakacili kuyanda kuti mube balongwe bakwe. Jehova wakatuyanda kapati cakuti wakatupa cipego ciyandisi. Wakatuma Mwanaakwe Jesu anyika kutegwa ape buumi bwakwe kacili cinunuzyo cazibi zyesu. (Joh. 3:16) Ikuti twalubizya, tulakonzya kumulomba Jehova kuti atulekelele. Alimwi akaambo kacinunuzyo, tulakonzya kuba masimpe kuti uyootulekelela akuti tuyoozumanana kuba balongwe bakwe nokuba kuti tatulondokede!—1Tim. 1:15. w16.05 4:6, 7