April

Tujisi mukuli wakuzyibya bantu kuti balakonzya kuba acilongwe a Mulengi wabo. Ciindi bantu nobatanatalika kusyoma mucituuzyo ca Jesu, Leza ubabona kuti mbaasinkondonyina. Mwaapostolo Johane wakalemba kuti: “Ooyo uumusyoma Mwana ulaabuumi butamani; ooyo uutamuswiilili Mwana takabuboni buumi pe, pele bukali bwa Leza bulakkalilila aalinguwe.” (Joh. 3:36) Cikkomanisya ncakuti, cituuzyo ca Kristo cipa kuti bantu bacikonzye kuyanzana a Leza. (2Kor. 5:18-20) Tujisi cibeela mukuyiisya bantu kasimpe kakumuuya, alimwi akubagwasya kuba acilongwe a Jehova. Eeci ncibeela ciyandika kapati camulimo wesu wakukambauka. w16.07 4:8-10

Cintu ncaakasaanguna kwaamba Jesu mumupailo wakwe wacikozyanyo, kwakali kusalazyigwa kwazina lya Leza. Mbwaanga Jehova ulasalala, njiisyo zyoonse alimwi amilawo yakwe ilasalala. Nokuba boobo, mumuunda wa Edeni, Saatani wakadooneka nguzu zya Leza zyakubikkila bantu milawo. Kwiinda mukwaamba zyakubeja kujatikizya Jehova, Saatani wakabejekezya zina lya Leza lisalala. (Matl. 3:1-5) Kulubazu lumbi, Jesu wakali kuliyanda ncobeni zina lya Jehova. (Joh. 17:25, 26) Jesu wakagwasilizya mukusalazya zina lya Leza. (Int. 40:8-10) Kweelana ambwaakapona buumi bulondokede anyika, Jesu wakatondezya kuti cileelela alimwi cililuleme kuli Jehova kubikkila zilenge zyakwe zicenjede milawo. Kwiinda mukuzumanana kusyomeka kuli Bausyi bakujulu kusikila kulufwu, Jesu wakatondezya kuti muntu uulondokede ulakonzya kuzumanana kumvwida milawo ya Leza iiluleme cakumaninina. w17.02 2:2-4

Mwanaambelele ngu Jesu Kristo, “Mwanaambelele wa Leza ooyo uugusya cibi canyika.” (Joh. 1:29) Bbaibbele litwaambila kuti uliindene kapati abantu boonse ibalela kabali bami alimwi abaabo ibakali bami. Lipandulula kuti: “Walo ngo Mwami wabaabo beendelezya kabali bami a Simalelo wabaabo beendelezya kabali basimalelo, ooyo alikke uutafwi, uukkala mumumuni uutaswenwi afwaafwi, ooyo uutanabonwa alimwi uutakonzyi kubonwa amuntu uuli woonse.” (1Tim. 6:14-16) Masimpe, sena kuli mwami umwi wakalyaaba kufwa kutegwa anunune zibi zyesu? Sena eeci tacimupi kuyanda kusangana azilenge zyakujulu zinji mukwaambilizya kuti: “Mwanaambelele ooyo iwakajaidwe uleelela kutambula bweendelezi, lubono, busongo, nguzu, lulemeko, bulemu alimwi azilongezyo.” (Ciy. 5:12) Kulemeka Jehova a Kristo tacili cintu ncotweelede kusala buya pe. Buumi bwesu butamani buyeeme aakucita boobo.—Int. 2:11, 12; Joh. 5:23. w17.03 1:3, 4

Jefita wakalaazyi makani aakacitikila bana Israyeli kaindi alimwi wakaluuzyi kabotu Mulawo wa Musa. Inzila Jehova mbwaakabeendelezya bantu bakwe cakamuyiisya zyeelelo zya Leza izijatikizya ciluzi acitaluzi. (Bab. 11:12-27) Jefita wakalubelesya luzyibo oolo mubuumi bwakwe ciindi naakali kusala zyakucita. Wakalizyi kabotu-kabotu Jehova mbwalimvwa kujatikizya bukali akupilusya cibi alimwi akuti Leza uyanda bantu bakwe kuti kabayandana. Kuyungizya waawo, Mulawo wakamuyiisya mbwayelede kubeendelezya bamwi, nobaba baabo ibakamusulide. (Kul. 23:5; Lev. 19:17, 18) Kweelede kuti cikozyanyo ca Josefa ncecakamugwasya Jefita. Weelede kuti wakaiya Josefa mbwaakabafwida luse banabokwabo nokuba kuti bakalimusulide. (Matl. 37:4; 45:4, 5) Kuyeeya cikozyanyo eeci kweelede kuti kwakamugwasya Jefita kucita zintu munzila iyakamukkomanisya Jehova. Ncobakacita banabokwabo cakamucisa ncobeni Jefita. Pele kunyina naakaleka kubelekela Jehova alimwi abantu bakwe.—Bab. 11:1-3. w16.04 1:8, 9

Bantu ba Jehova lyoonse bali kukukkomanina kuswaangana antoomwe abakombinyina. Mucikozyanyo, Banakristo bakusaanguna bakali kuyandisisya kuswaangana antoomwe kutegwa bakombe Jehova alimwi akwiiya kujatikizya nguwe. Mubwini, cakutadooneka andinywe mulayandisisya kuunka kumiswaangano. Pele mbubwenya mbuli bakombinyoko boonse, cilakonzya kumuyumina kujanika kumiswaangano lyoonse. Ambweni muyandika kubeleka mawoola manji naa mujisi zinji zyakucita naa lyoonse mulimvwa kukatala. Pele kulumba akaambo kambomugwasyigwa amiswaangano kuyootugwasya kucita zyoonse nzyotukonzya kutegwa katujanika kumiswaangano. Masimpe kuti, bakwesu abacizyi bamwi tabakonzyi kujanika kumiswaangano lyoonse akaambo kabukkale bumwi bukatazya mbobatakonzyi kucinca. Mucikozyanyo, ambweni balaciswa kapati. Baalu balakonzya kubagwasya aaba ibali mubukkale oobu kutegwa kabaswiilila kumiswaangano, ambweni kwiinda mukubagwasya kuswiilila kubelesya luwaile naa kubalekkoodela miswaangano. w16.04 3:3

Zikozyanyo zyababelesi ba Jehova basyomeka zilakonzya kutugwasya kusala cabusongo alimwi akuzumanana kuliyumya. Amuyeeye kujatikizya ba Sadirake, Mesaki alimwi a Abedinego, ibakakaka kukomba cibumbwa icakali kwiiminina mfwulumende ya Babuloni. (Dan. 3:16-18) Cibalo eeci camu Bbaibbele cilabagwasya Bakamboni banji mazuba aano kuba basicamba akukaka kukomba ndembela yacisi mobakkala. Jesu taakwe naakatola lubazu mutwaambo twacisi naa mutwaambo tumwi itwakali kwaandaanya bantu. Wakalizyi kuti cikozyanyo cakwe cibotu cakali kuyoobagwasya basikwiiya bakwe. Wakati: “Amube basicamba!” Bakwesu abacizyi mumbungano yanu balakonzya kumugwasya kuzumanana kutatola lubazu mutwaambo twacisi. Alimwi ikuti bakwesu abacizyi mumbungano babuzyiba bukkale mbomujisi balakonzya kumukulwaizya. Amubalombe kuti bamupailile. Pele andiswe tweelede kubagwasya bakwesu akubapailila.—Mt. 7:12. w16.04 4:16, 18

Sena Bakamboni ba Jehova balabwezelela mulumbo ku Maanda aabo aa Bwami naa kumiswaangano yacooko? Peepe! Mulimo wabo ulagwasyilizyigwa kwiinda muzyakusanga zyakuliyandila. (2Kor. 9:7) Nokuba boobo, Bakamboni ba Jehova bakabeleka mawoola aatandila kumabbiliyoni obilo kabakambauka makani mabotu alimwi akusololela ziiyo zya Bbaibbele ziinda ku 9 miliyoni mwezi amwezi. Tabavwoli akaambo kamulimo wabo wakukambauka pele balalisungula kubelesya mali aabo kucita mulimo ooyu. Sikuvwuntauzya umwi wakaamba boobu kujatikizya mulimo wa Bakamboni ba Jehova: “Makanze aabo mapati ngakukambauka alimwi akuyiisya.” Alimwi wakaamba kuti Bakamboni ba Jehova tabajisi kakamu kabasololi kavwozyegwa. Aboobo ikuti naa tatukambaukili kujana mali, ncinzi citupa kukambauka? Tulaucita cakulyaaba mulimo ooyu akaambo kakuti tulamuyanda Jehova alimwi tulabayanda bantu. Eeci cizuzikizya businsimi bulembedwe mulugwalo lwabuzuba bwasunu. w16.05 2:9

Aboobo Bbaibbele lituyiisya kuti tweelede kutantamuka kulikondelezya kuli koonse ikukonzya kutupa kutalika kweezyeezya naa kulombozya zintu zitasalali alimwi zibyaabi. Alimwi ikuti naa twazimvwisya kabotu zintu Jehova nzyayanda alimwi anzyasulide, ciyakutuubaubila kuzyiba mabbuku, mafilimu, naa zisobano nzyotweelede kusala. Tatukayandiki kubuzya bamwi kuti batwaambile ncotweelede kucita. Ciindi notuyanda kusala cintu cimwi, kanji-kanji kulaba zintu zinji nzyotukonzya kusala izikonzya kumukkomanisya Jehova. Pele ciindi notuyanda kusala cintu cipati, cilakonzya kugwasya kubuzya mwaalu naa mukwesu umwi naa mucizyi uusimide kutegwa atupe mizeezo iikonzya kutugwasya kusala kabotu. (Tit. 2:3-5; Jak. 5:13-15) Pele tatweelede kulomba muntu ooyo kuti atusalile cakucita. Muciindi caboobo, tweelede kuyeeyesya kujatikizya nzyotwakaiya mu Bbaibbele mpoonya akulisalila tobeni. (Heb. 5:14) Mwaapostolo Paulo wakati: “Umwi aumwi weelede kunyamuna mukuli wakwe uumugeme.”—Gal. 6:5. w16.05 3:15, 16

Jehova taboni bantu mbuli mbotubabona swebo. Muciindi caboobo, ulalingula moyo akubona bwini mbwabede umwi aumwi wesu. (1Sam. 16:7b) Jehova wakacitondezya eeci ciindi naakatalisya mbungano ya Bunakristo. Wakakwela bantu banji kulinguwe aku Mwanaakwe balo bantu bamwi mbobakonzya kubona kuti tabakwe mulimo. (Joh. 6:44) Mucikozyanyo, muntu umwi uuli boobo wakali mu Farisi wazina lya Saulo. Pele Jehova wakaulingula moyo wa Saulo alimwi tanaakamubona kuti wakali mbuli bulongo butakwe mulimo. (Tus. 17:3) Muciindi caboobo, Jehova wakabona kuti Saulo wakali kuyoobumbwa akuba ‘cibelesyo’ akuti wakali kuyookambauka “kuli bamasi akubami alimwi akubana ba Israyeli.” (Mil. 9:15) Jehova alimwi wakasala bantu abambi ibakali kuyoobumbwa akuba “cibelesyo cilemekwa,” balo ibakali kubikkilizya abantu ibakali bakolwi, ibatakali kulilemeka, alimwi ababbi. (Rom. 9:21; 1Kor. 6:9-11) Nobakali kwiiya Magwalo, bakayumya lusyomo lwabo muli Jehova alimwi bakamuzumizya kuti ababumbe. w16.06 1:4

Kutegwa tuzumanane kuba mbuli bulongo butete, Leza watupa Jwi lyakwe, mbungano ya Bunakristo alimwi amulimo wakukambauka. Ciindi notuzumanana kubala Bbaibbele akuzinzibala kuyeeya nzyotubala abuzuba, tulagwasyigwa kuba mbuli bulongo butete ibuli mumaanza aa Jehova alimwi eeci cipa kuti atubumbe. Jehova wakalailila bami bana Israyeli kuti kabalemba bbuku lya Mulawo wa Leza akulibala abuzuba. (Dt. 17:18, 19) Baapostolo bakalizyi kuti kubala Magwalo alimwi akuzinzibala kuyeeya nzyobakali kubala cakali kuyandika kapati kutegwa bazwidilile mumulimo wabo wakukambauka. Bakali kuzubulula zibeela zimwi zya Magwalo aa Chihebrayo ziindi zinji mumabbuku ngobakalemba, alimwi ciindi nobakali kubakambaukila bantu, bakali kubakulwaizya abalo kubelesya Magwalo. (Mil. 17:11) Ncimwi buyo amazuba aano, andiswe twabona kuti cilayandika kapati kubala Jwi lya Leza buzuba abuzuba akuzinzibala kuyeeya nzyotubala. (1Tim. 4:15) Eeci citugwasya kuzumanana kuba bantu balicesya, alimwi ciyoopa kuti Jehova atubumbe. w16.06 2:10

Mazuba aano, babelesi ba Jehova balalutondezya luyando oolu kuli umwi amweenzinyina noliba leelyo bantu bamasi nobalwana. Mucikozyanyo, munkondo yanyika yabili, bantu batandila ku 55 miliyoni bakajaigwa. Pele bantu ba Jehova tiibakajaya muntu naba omwe munkondo eeyo. (Mik. 4:1, 3) Eeci cakabagwasya kutaba ‘amulandu wabulowa bwabantu boonse.’ (Mil. 20:26) Bantu ba Leza bazumanana kuvwula nokuba kuti kuli sinkondo uulaanguzu kapati uubalwana, nkokuti Saatani. Walo ngo “leza wabweende bwazintu obuno.” (2Kor. 4:4) Saatani nguuzyeendelezya mbunga zyamapolitikisi izili munyika iino, kubikkilizya abasimubweza twaambo, alimwi ubelesya nzila eezyi kulesya mulimo wakukambauka makani mabotu. Pele takonzyi kuulesya mulimo ooyu. Nokuba boobo, Saatani ulizyi kuti ujisi buyo kaindi kaniini, aboobo wazumanana kusola kutulesya kukomba Jehova.—Ciy. 12:12. w16.06 4:3, 4

Jesu ugamika mizeezo yesu kumilimo ya Jehova. Tulakonzya kwiiya zinji kujatikizya mbwaaboneka “maluba-luba aamusyokwe.” Ambweni mumizeezo Jesu wakali kuyeeya maluba-luba aaindene-indene mabotu alimwi aayebeka. Maluba-luba aaya taasumi zisani kutegwa kaasama. Nokuba boobo, ciindi naafwulula alibonya kabotu kapati! Amubone kuti, “naba Solomoni mubulemu bwakwe boonse kunyina naakasamide mbuli limwi lyayaaya”! Kaambo nkaakali kwaamba aawa Jesu nkakuti: “Ikuti naa Leza mbwazisamika oobu zimena musyokwe . . . , sena takaindi kumusamika nywebo, nywebo nobasilusyomo luniini?” (Mt. 6:29, 30) Cakutadooneka uyoocita oobo! Nokuba boobo, kuboneka kuti basikwiiya ba Jesu bakajisi lusyomo luniini. (Mt. 8:26; 14:31; 16:8; 17:20) Bakali kuyandika lusyomo luyumu alimwi akusyoma Jehova. Ino mbuti kujatikizya ndiswe? Nduyumu buti lusyomo ndotujisi muli Jehova ilwakuti ulakonzya kutupa zintu nzyotuyandika? w16.07 1:15, 16

Tacikwe makani naa masunko ngotuyaanya aboola muciimo cili buti, Jehova ulakonzya kutugwasya kuliyumya. (1Pet. 1:6) Kufwumbwa naa twasikilwa sunko lili buti, lyoonse kunooli nzila yaluzyalo lwa Leza iiyooyendelana asunko lili lyoonse. Nzila ziindene-indene Jehova mwatondezya luzyalo lwakwe zipa kuti tulongezyegwe kapati. Nzila imwi nkulekelelwa zibi zyesu. Akaambo kaluzyalo lwa Jehova, zibi zyesu zilalekelelwa, lelikke buyo kuti tweempwa akuzumanana kulwana nkondo iyakulombozya kucita zibi. (1Joh. 1:8, 9) Luse lwa Leza lweelede kutupa kumulumba alimwi akumulemeka. Paulo wakati: “[Jehova] wakatuvwuna kunguzu zyamudima akutulonzyela mubwami bwa Mwanaakwe ngwayandisya, ooyo wakapa kuti twaangununwe kwiinda mucinunuzyo, nkokuti kulekelelwa zibi zyesu.” (Kol. 1:13, 14) Kulekelelwa zibi zyesu kuletela zilongezyo azimbi zibotu zinji. w16.07 3:7-9

Nokuba kuti Saatani wakacita boobo mumuunda wa Edeni, Jehova wakabapa bulangizi bantu bujanika mubusinsimi bwakusaanguna mu Bbaibbele. Leza wakali kuyootuma yooyo iwakali ‘kuyoopwayaula’ Diabolosi alimwi akupa nzila iyakali kuyoopa kuti bantu bamvwida bakabe abulangizi mbobakasweekelwa banabukwetene bakusaanguna—kupona kukabe kutamani anyika kweelana amakanze aa Jehova aakumatalikilo. (Joh. 3:16) Buzangi bwaba Adamu a Eva bwakacijatikizya kapati cikwati cabo alimwi azikwati zyoonse izyakatobela. Mucikozyanyo, Eva alunyungu lwakatobela lwabamakaintunyina bakali kuyooba amacise kapati ciindi nobamitide alimwi aciindi cakutumbuka. Bamakaintu bakali kuyoobayandisisya bamalumi babo, pele bamaalumi bakali kuyoobeendelezya bamakaintu babo, zimwi ziindi munzila yalunya buya, mbubwenya mbocibede muzikwati zinji mazuba aano. (Matl. 3:16) Bbaibbele lyaamba kuti bamalumi beelede kubucita munzila yaluyando busilutwe bwabo. Mpoonya bamakaintu abalo beelede kulibombya kubusilutwe bwabamalumi babo. (Ef. 5:33) Akaambo kakuti banabukwetene ibayoowa Leza balamvwana, zintu izileta mazwanga zilakonzya kucesyegwa naa kuzimanizyila limwi buya. w16.08 1:6, 7

Zimwi ziindi, Munakristo ulakonzya kuti ukwete naa ukwetwe kumuntu uutaningaba mubelesi wa Jehova. Mubukkale oobo, Bbaibbele lilapa twaambo tulimvwisya ncobeelede kuzumanana kukkala antoomwe. (1Kor. 7:12-14) Kufwumbwa naa muntu ooyo uutasyomi ulizyi naa pe, “ulasalazyigwa” akaambo kakukwata naa kukwatwa kumusyomi. Bana mbobazyala abalo babonwa kuti “balasalala” alimwi balikwabilidwe a Leza. Mumbungano zinji zya Bakamboni ba Jehova kuli zikwati, oomo imuli Munakristo iwakagwasya ‘kufwutula’ ngwakwetene limwi. Mwaapostolo Petro wakalaya Banakristo bamakaintu kuti kabalibombya kubamalumi babo, “kutegwa naa kuli bataliswiilili ijwi, bakonzye kukwelelezyegwa kakunyina kubelesya jwi pele kwiinda mubukkale bwabakaintu babo, akaambo kakulibonena bukkale bwanu busalala antoomwe akuba abulemu kapati.”—1Pet. 3:1-4. w16.08 2:14, 15

Zibalo zyamu Bbaibbele zitondezya coolwe ncotujisi icakutondezya “luyando lwabunyina” alimwi akugwasyanya. (Lk. 22:24-27) Mwana wa Leza wakapa zintu zyoonse, kubikkilizya abuumi bwakwe ikugwasya bamwi. (Mt. 20:28) Dorika “wakali kucitila bamwi milimo mibotu minji alimwi akupa zipego zyaluse.” (Mil. 9:36, 39) Mariya, imucizyi waku Roma, ‘wakabeleka canguzu’ kugwasya baabo ibakali mumbungano. (Rom. 16:6) Ino mbuti mbotukonzya kugwasya bapya kubona mbociyandika kugwasya basyominyina? Bakamboni basimide balakonzya kubatamba bapya kuti baunke limwi kuyoobona baciswa alimwi abaabo ibacembeede. Ikuti kaceelela, bazyali balakonzya kuunka abana babo ciindi nobaunka kuyooswaya bantu ibali boobo. Baalu balakonzya kubelekela antoomwe abamwi kubona kuti bacembeede balijisi zyakulya zyeelede akuti maanda aabo ali kabotu. Kwiinda mukucita boobo, bana basyoonto alimwi abapya mukasimpe balakonzya kwiiya kutondezya luzyalo kubantu bamwi alimwi akuzyiba kuti boonse ibali mumbungano beelede kulimvwa kuti balabikkilwa maano.—Rom. 12:10. w16.08 4:13, 14

Mucizyi uucili mwana ku France wakaamba kuti: “Bamayi kucikolo nkondiiya balagambwa kubona kuti kuli basicikolo bacisyoma mu Bbaibbele.” Mbomuli mubelesi wa Jehova uucili mwana naa uuciiya kujatikizya nguwe, sena andinywe mulimvwa kuti mweelede kusyoma zintu nzyobasyoma bantu banji, zintu mbuli njiisyo yakusanduka, ikutali kusyoma kuti kuli Mulengi? Ikuti kacili boobo, kuli ntaamu nzyomukonzya kubweza kutegwa muyumye lusyomo lwanu. Ntaamu yakusaanguna njomukonzya kubweza njakubelesya maano Leza ngaakamupa, alo aakonzya ‘kumulinda.’ Ayoomukwabilila kunjiisyo zyabasyaabusongo zyalo izikonzya kunyonganya lusyomo lwanu. (Tus. 2:10-12) Lusyomo lwini-lwini luyeeme aluzyibo lwini-lwini kujatikizya Leza. (1Tim. 2:4) Aboobo, ciindi nomwiiya Jwi lya Leza alimwi amabbuku eesu aa Bunakristo, mutabali buyo cakwiinzya mulawo. Amubelesye maano aanu kutegwa ‘mumvwisye’ ncomubala. w16.09 4:1-3

Nokuba kuti twakapenga kubwana naa bukkale bwesu lino mbwamapenzi, tweelede kuzumanana kulwana nkondo alimwi akukakatila cakuliyumya. Tweelede kusyoma kuti, ikuti naa twacita boobo, Jehova uyootugwasya. (Matl. 39:21-23) Amuyeeye buyo bukkale mbomujisi alimwi ibukonzya kumubeda sunko. Ambweni bujatikizya cintu ncomucitilwa munzila iitaluleme, kusalululwa naa kusekwa. Ambweni sunko ndyomujisi inga kalijatikizya muntu uumubejekezya, andiza akaambo kakuti umumvwida munyono. Muciindi cakulekela maanza aanu kulebuka, amuyeeye cakagwasya Jakobo, Rakele alimwi a Josefa kuti bazumanane kubelekela Jehova calukkomano. Leza wakabayumya-yumya akubalongezya akaambo kakuti bakazumanana kulumba zintu zyakumuuya. Bakazumanana kulwana nkondo akucita kweelana anzyobakali kupailila. Tupona kumamanino eeni aabweende bwazintu oobu bubyaabi; aboobo tulijisi kaambo kalimvwisya ncotweelede kukakatila kubulangizi mbotubikkilidwe kumbele lyesu! Sena mulayanda kubeleka canguzu kutegwa mukkomaninwe a Jehova? w16.09 2:8, 9

Nobazyali, cikozyanyo canu cibotu calusyomo, ncintu ciyandika kapati. Bana banu banoobona zintu nzyomucita, alimwi eeci ciyoobagwasya kapati. Aboobo mbomuli bazyali, amuzumanane kuyumya lusyomo lwanu. Bana banu beelede kulibonena kuti mulamuyanda ncobeni Jehova. Ciindi banabukwetene bamwi ku Bermuda nobaba amapenzi, balapaila antoomwe abana babo kuti Jehova abasololele, alimwi balabakulwaizya bana babo kupaila balikke. Alimwi bakati: “Inga tulamwaambila mwaneesu musimbi mupati kuti, ‘Komusyoma Jehova cakumaninina, kolitakata mumulimo wa Bwami, alimwi utanoolibiliki kapati.’ Ciindi abona bubotu buboola akaambo kakucita boobo, ulazyiba kuti Jehova ulatugwasya. Eeci cayumya lusyomo lwakwe muli Leza alimwi amu Bbaibbele.” Nokuba boobo, mukuya kwaciindi bana beelede kuyumya lusyomo lwabo beni. Mbomuli bazyali, mulakonzya kusyanga akutilila. Leza alikke nguukonzya kukomezya. (1Kor. 3:6) Aboobo amulombe muuya wakwe, alimwi amubeleke canguzu kuyiisya bana banu bayandisi. Ikuti mwacita oobo, Jehova uyookulongezya kusoleka kwanu.—Ef. 6:4. w16.09 5:16-18

Nobakabeleka kucisi cimbi kwamyaka iinda kuli yotatwe, ba Serge abakaintu babo ba Muriel, bakabona kuti mwanaabo musankwa iwakajisi myaka iili 17 tanaakacijisi lukkomano mumilimo yakumuuya. Ba Serge bakati: “Notwakabona kuti bukkale oobu bwakapa kuti mwaneesu ataunki ambele kumuuya, twakasala kujokela kumbungano yesu nkotwakabede kaindi.” Ino ntwaambo nzi tukonzya kupa kuti bazyali bapiluke? Cakusaanguna, beelede kubona ikuti naa balijisi ciindi alimwi azintu zikonzya kubagwasya kuyiisya bana babo kuyanda Jehova kumwi kababayiisya mwaambo wakucisi cimbi. Cabili, balakonzya kuzyiba kuti bana babo bacileka kwiikkomanina milimo yakumuuya naa kucileka kuukkomanina mwaambo wakucisi nkobabelekela. Mubukkale buli boobu, bazyali Banakristo inga basala kupiluka kumbungano ibelesya mwaambo ngobamvwa bana babo kusikila mane bakaliimine mukasimpe.—Dt. 6:5-7. w16.10 2:14, 15

Cakutadooneka, basimukobonyina Nowa beelede kuti bakali kubuzya ikaambo ncaakali kuyakila cintu cipati kapati boobo. Sena Nowa wakali kuumuna buyo naa kubaambila kuti tiibakeelede kwaanjililila makani aatabajatikizyi? Tanaakacita boobo pe! Lusyomo lwakwe lwakamupa kukambauka cabusicamba alimwi akubacenjezya bantu mbaakali kupona limwi kujatikizya lubeta lwa Leza ilwakali kuboola. Kweelede kuti, Nowa wakali kwaayinduluka majwi ngamunya Jehova ngaakamwaambila aakuti: “Ndikanzide kubanyonyoona bantu boonse, nkaambo nyika yazula bubi akaambo kabantu aaba . . . Ndiyooleta zambangulwe anyika kutegwa linyonyoone zintu zyoonse izijisi muya wabuumi izili anyika. Zyoonse izili anyika ziyoofwa.” Kuyungizya waawo, Nowa cakutadooneka wakabapandulwida bantu nzila ilikke mbobakali kukonzya kufwutuka, kwiinda mukwiinduluka mulawo ngwaakamwaambila Leza wakuti: “Weelede kunjila mubwato.” Aboobo nzila imwi Nowa mbwaakatondezya lusyomo nkwiinda mukuba “imukambausi wabululami.”—Matl. 6:13, 17, 18; 2Pet. 2:5. w16.10 4:7

Bazyali Banakristo balatondezya kuti balasyomeka kuli Jehova kwiinda mukuyiisya bana babo kweelana a Jwi lyakwe. Bazyali Banakristo tabakomezyi bana babo kweelana azilengwa zyabantu bakubusena nkobakkala. Muuya wanyika taweelede kulekelwa kunjila muŋanda ya Munakristo. (Ef. 2:2) Usyi Munakristo ubbapatizyidwe takonzyi kuyeeya kuti, ‘Mucisi cesu bamakaintu mbobayiisya bana.’ Bbaibbele lilakasalazya kaambo aaka ciindi nolyaamba kuti: “Nomausyi, . . . amuzumanane kubalela [bana banu] mululayo alwiiyo [malailile; busolozi] lwa Jehova.” (Ef. 6:4; bupanduluzi buyungizyidwe) Bazyali ibayoowa Leza bayanda kuti bana babo babe mbuli Samuele, nkaambo Jehova wakali anguwe naakali kuyaabukomena. (1Sam. 3:19) Sena inga caba camaano kupanga cakusala ciyandika kapati kujatikizya mukwasyi wesu alimwi abuumi bwesu kakunyina kusaanguna kuvwuntauzya ncolyaamba Bbaibbele? Peepe! Tuyandika lugwasyo kuzwa kuli Taateesu wakujulu nkaambo tatukonzyi kusololela ntaamu zyesu. w16.11 3:14, 15

Zilenge zitondezya kuti Leza nguucibwene kubamba kabotu zintu. Bbaibbele lyaamba kuti: “Jehova wakabikka ntalisyo yanyika. Wakakkazikizya majulu cabupampu.” (Tus. 3:19) Tuzyi buyo ‘mayaayila aanzila zya Leza,’ alimwi “nzyetwamvwa nkuvwiya-vwiya buyo kwamakani aajatikizya nguwe.” (Job. 26:14) Nokuba boobo, iluzyibo lusyoonto ndotujisi kujatikizya mapulaneti, nyenyeezi, alimwi amilalabungu zitupa kuzumina kuti zintu zyamujulu eezyi zibambidwe kabotu ncobeni. Milalabungu ijisi mamiliyoni aanyenyeezi, zyalo izyeenda kabotu mujulu kakunyina kupwayana. Mapulaneti aali mububumbo aleenda mutuzila kuzinguluka zuba mbuli kuti atobela milawo yamumugwagwa! Ikulanga zintu izili mububumbo izigambya kapati zilatugwasya kubona kuti Jehova, ooyo ‘iwakalenga majulu cabusongo’ alimwi anyika, tweelede kumutembaula, kumusyoma alimwi akumukomba.—Int. 136:1, 5-9. w16.11 2:3

Lugwalo lwa Malaki 3:1-3 lwaamba zyaciindi—kuzwa mu 1914 kusikila kumatalikilo aa 1919—ciindi “bana ba Levi” ibananikidwe nobakeelede kusalazyigwa. Aciindi eeco, Jehova Leza, “Mwami mwini-mwini,” kwiinda mukusindikilwa a Jesu, “mutumwa wacizuminano,” wakaboola kutempele lyakwe lyakumuuya kuzoolingula baabo ibabelekela nkuko. Nobakamana kululamikwa, bantu ba Jehova ibasalazyidwe bakalilibambilide kupegwa milimo aimbi. Mu 1919, “muzike uusyomeka alimwi uucenjede” wakasalwa kuti kaabila cakulya cakumuuya kuli baabo ibali muciinga calusyomo. (Mt. 24:45) Aciindi eeci, bantu ba Leza bakalaangulukide kubuzike bwa Babuloni Mupati. Kuzwa ciindi eeco, kwiinda muluzyalo lwa Jehova, bantu bakwe baluujisi kuyungizya luzyibo lwabo kujatikizya makanze aa Leza alimwi luyando lwabo kuli wisi wabo wakujulu lwakomena. Eelo kaka balamulumba akaambo kazilongezyo zyakwe! w16.11 5:14

Tulamuyanda Jehova “nkaambo walo nguwakasaanguna kutuyanda.” (1Joh. 4:19) Nzila yomwe Jehova mbwaatondezya luyando lwakwe nkwiinda mukulongezya babelesi bakwe basyomeka. Mboluyaabukomena luyando lwesu kuli Leza, alwalo lusyomo lwesu lulayuma, ikutali buyo lwakuti nkwali, pele akuti taalilwi kubapa bulumbu aabo mbayanda. (Heb. 11:6) Taciluzi pe kuyeeya kuti Jehova takonzyi kubapa bulumbu babelesi bakwe basyomeka. Lusyomo lwesu taluzulide ccita buyo kuti katusinizyide kuti Leza uyoobapa bulumbu aabo bamuyandaula cabusungu, nkaambo “lusyomo mbulangizi businizyidwe bwaceeco cilangilwa.” (Heb. 11:1) Inzya, lusyomo lubikkilizya kuba abulangizi bwazilongezyo nzyasyomezya Leza. Kweelana ambokwatondezyegwa mulugwalo lwabuzuba bwasunu, Jehova ulatutamba kuti tubeleke canguzu kutegwa tujane zilongezyo zyakwe. Ciindi notuzumina cipego eeci cabuuya ca Jehova, tutondezya kuti tulalumba kapati. w16.12 4:1-3

Nokuba kuti kwainda myaka minji yakubelekela Leza, Munakristo ulakonzya kutalika kubikkila maano kuzintu zyamubili. Eeci tacaambi Munakristo ooyo zimwi ziindi uunga wayeeya kujatikizya cakulya, mulimo, kulikondelezya, naa kuba aluyando oolo ilukonzya kuba akati kamusankwa amukaintu. Eezyi nimbazu zyabuumi zijatikizya mubelesi wa Leza umwi aumwi. Jesu wakali kucikkomanina cakulya, alimwi wakasanina bamwi. Wakali kujana ciindi cakulikondelezya. Alimwi Paulo wakalemba kuti luyando akati kamusankwa amukaintu lulakonzya kutondezyegwa munzila yeelede, pele buyo mucikwati. Ibbala lya Chigiriki ndyaakabelesya Paulo lyaamba “kubikka mizeezo naa moyo acintu cimwi. Ibbala eeli likankaizya kuyeeyesya kapati kujatikizya makanze eeni muntu ngajisi.” Aabo ibapona kweelana azintu zyamubili bazumizya buumi bwabo kweendelezyegwa abuntu bwabo butalondokede. Syaazibwene umwi wakaamba boobu kujatikizya majwi aali ku Baroma 8:5 naakati: “Bayeeya buyo zintu zyamubili, nkokuti babikkila buyo maano kapati kuzintu zyamubili, kanji-kanji baamba buyo kujatikizya zintu zyamubili, alimwi bakkomanina buyo kucita zintu zyamubili.” w16.12 2:5, 9, 10

Muntu uuli woonse ulakonzya kucita zintu cakutalibombya ikuti naa wazumizya zisusi zyanyama kuti zimweendelezye. Mizeezo yakuliyanda, munyono, alimwi akunyema kapati zyapa bantu banji kutalika kucita zintu cakulisumpula. Bantu baambidwe mu Bbaibbele mbuli Abisalomu, Uziya, alimwi a Nebukadinezara bakazundwa kumilimo yanyama iili boobu alimwi Jehova wakabasubula akaambo kakulisumpula kwabo. (2Sam. 15:1-6; 18:9-17; 2Mak. 26:16-21; Dan. 5:18-21) Kuli twaambo atumbi tukonzya kupa kuti umwi atalike kucita zintu cakutalibombya. Mucikozyanyo, atulange-lange zibalo zyamu Bbaibbele eezyi: Matalikilo 20:2-7 alimwi a Matayo 26:31-35. Sena zintu nzyobakacita ba Abimeleki alimwi a Petro izyakali kulibonya mbuli kuti nkulisumpula, zyakacitwa akaambo kazisusi zibi? Naa sena bantu aaba tiibakaazyi masimpe naa bakacita zintu cakutayeeya? Mbwaanga tatukonzyi kuzyiba zili mumoyo wamuntu, ncabusongo alimwi ncaluyando kutafwambaana kuyeeyela zintu bantu nzyobayeeya. w17.01 3:9, 10

Mbubwenya mbuli mukamufwu mucete, bunji bwabasyomima mazuba aano basyoma kuti, ikuti naa twasaanguna kuyandaula Bwami, Jehova uyoobona masimpe kuti tulijisi zintu nzyotuyandika. (Mt. 6:33) Atulange-lange mukwesu wazina lyakuti Malcolm. Kwamyaka minji walo alimwi abakaintu bakwe njobakabelekela Jehova, zimwi ziindi bakali kujana buyumuyumu. Mukwesu ooyu wakaamba kuti: “Mazuba ngunamasandu, alimwi zintu mubuumi zilakatazya. Pele Jehova ulabalongezya aabo bamusyoma.” Ino ncinzi mukwesu Malcolm ncaakakulwaizya? Wakati: “Kamupaila kulomba kuti mube basungu mumulimo wa Jehova kusikila mpomugolela. Amubikkile maano kuzintu nzyomukonzya kucita ikutali nzyomutakonzyi kucita.” Bweende bwazintu obuno ‘mbobuyaabubijila limwi,’ tulakonzya kulangila mapenzi aakatazya kapati. (2Tim. 3:1, 13) Aboobo cilayandika kapati kutazumizya mapenzi aayo kuti atutyompye. Muciindi caboobo, tweelede kuba alusyomo luyumu muli Jehova akubweza ntaamu ziyandika zili zyoonse nzyotukonzya. w17.01 1:17-19

Wakatyompwa kapati kuti kwakanyina “ŋanda,” naa tempele yaabidwe kuli Jehova, aboobo Davida wakali kuyanda kuyakila Leza ŋanda. Nokuba boobo, Jehova ncaakalailila cakaindana kweelana ambolwaamba lugwalo lwabuzuba bwasunu. Nokuba kuti Jehova caluyando wakasyomezya Davida kuti wakali kuyoozumanana kumulongezya, Leza wakalailila kuti mwana wa Davida Solomoni ngonguwe uyooyaka tempele. Ino Davida wakalimvwa buti? (1Mak. 17:1-4, 8, 11, 12; 29:1) Davida wakazumanana kumugwasya, tanaakalibilika kuti tali nguwe wakali kuyoolumbaizyigwa akaambo kakuyakwa kwatempele. Mubwini, tempele lyakayakwa, lyakaitwa kuti tempele lya Solomoni, ikutali lya Davida. Nokuba kuti ambweni Davida wakatyompwa akaambo kakutazuzikizya eeco ncowakali kuyanda moyo wakwe, mulimo wakuyaka tempele wakaugwasyilizya cakumaninina. Caluyandisisyo wakapanga tubunga twabantu babeleka alimwi wakabunganya butale, mukuba, nsiliva, alimwi angolida kubikkilizya azisamu zyakkedari. Kuyungizya waawo, wakakulwaizya Solomoni kuti: “Lino mwanaangu, Jehova abe anduwe alimwi uzwidilile akuyaka ŋanda ya Jehova.”—1Mak. 22:11, 14-16. w17.01 5:6, 7

Noliba leelyo notupenzyegwa, tulacita kufwumbwa ncotukonzya kupona kweelana anjiisyo zya Leza ziluleme alimwi amilawo. Kwiinda mukucita milimo iiluleme, tumunika mumuni wesu, aboobo tuleta bulemu kuzina lya Jehova. (Mt. 5:14-16) Mbotuli bantu basalala, tulatondezya kwiinda muzintu nzyotucita mubuumi bwesu kuti milawo ya Jehova mibotu alimwi akuti nzyaakaamba Saatani nzyakubeja. Ikuti twalubizya akaambo kakuti toonse tatulondokede, tuleempwa kuzwa ansi aamoyo alimwi akuleka micito iipa kuti Jehova atalemekwi. Akaambo kacituuzyo ca Kristo, Jehova ulalekelela zibi zyabaabo ibatondezya lusyomo. Ulabatambula kabali bakombi bakwe aabo ibalyaaba kulinguwe. Jehova waamba Banakristo bananike kuti baliluleme kabali bana bakwe mpoonya ‘bambelele zimbi’ kuti baliluleme kabali balongwe bakwe. (Joh. 10:16; Rom. 5:1, 2; Jak. 2:21-25) Aboobo noliba lino, cinunuzyo cilatuzumizya kuba acilongwe cibotu a Taateesu alimwi akutola lubazu mukusalazya zina lyakwe. w17.02 2:5, 6