December

Mwaapostolo Petro wakalemba majwi aaya kutegwa akulwaizye Banakristo kuliyumya mumasunko manji aazwa kuli Saatani. Zintu izyakabacitikila ‘aabo ibakaliyumya’ zituyiisya mbotukonzya kuzumanana kusyomeka, zilatukulwaizya kuti tulakonzya kuzwidilila, alimwi zituyeezya kuti kusyomeka kwesu kuyoolumbulwa. (Jak. 5:11) Ambweni mulakazyigwa kapati naa kupenzyegwa, naa muli mwaalu mumbungano naa mulangizi wabbazu uulimvwa kuti milimo njomubeleka yavwulisya? Ikuti kacili boobo, cikozyanyo ca Paulo cilakonzya kumugwasya. Paulo wakapenzyegwa kapati, alimwi lyoonse wakali kulibilika akaambo kabakwesu mumbungano. (2Kor. 11:23-29) Pele Paulo taakwe naakaleka, alimwi cikozyanyo cakwe cakabayumya-yumya bamwi. (2Kor. 1:6) Kusyomeka kwanu akwalo kulakonzya kubakulwaizya bamwi kuti baliyumye. w16.04 2:11, 14

Jesu wakasinsima kuti kumazuba aakumamanino, makani mabotu aa Bwami ayookambaukwa kubantu boonse. (Mt. 24:14) Mbotuli Bakamboni ba Jehova, tulizyibidwe nyika yoonse akaambo kamulimo wesu wakukambauka. Bantu bamwi balauyanda mulumbe ngotukambauka, kakuli bambi tabauyandi pe. Pele nobaba bamwi akati kabaabo ibatauyandi mulumbe wesu balatulemeka akaambo kamulimo wesu. Bantu muzikombelo zinji balitaminina kuti bakambauka mulumbe wa Jesu. Pele kukambauka kwabo kugolela buyo amilumbe njobakambauka mucikombelo, a TV, aa Intaneti, naa ambweni kwaambila buyo bantu mbobakaiya kujatikizya Jesu. Ibamwi balimvwa kuti kugwasya bantu bapengede naa kucita milimo yakugwasya bantu njobacita ciindi nobabeleka kabali bamadokotela, bamanesi, naa bamayi nenzila yabo yakukambauka. Pele sena milimo eeyi ngomulimo wakukambauka Jesu ngwaakaamba? w16.05 2:1, 2

Mfwulumende alimwi zyaba basinkondo ba Bwami bwa Leza, ibwakatalika kulela mu 1914. Lino-lino Bwami oobu buyoozigwisya mfwulumende zyabantu zyoonse. (Int. 2:2, 7-9) Leza wazizumizya mfwulumende zyabantu kuti zyeendelezye nkaambo zilakonzya kupa kuti kube luumuno luli mbolubede. Eeci cilatugwasya kukambauka makani mabotu aa Bwami bwa Leza. (Rom. 13:3, 4) Leza ulatwaambila kupailila baleli kutegwa tukonzye kumukomba muluumuno. (1Tim. 2:1, 2) Ciindi notwateendelezyegwa kabotu, tulakonzya kulomba beendelezi bamfwulumende kuti batugwasye. Eeci ncaakacita Paulo. Nokuba kuti Bbaibbele lyaamba kuti Saatani nguweendelezya mfwulumende zyabantu, talyaambi kuti nguweendelezya muntu umwi aumwi uujisi nguzu mumfwulumende. (Lk. 4:5, 6) Aboobo tatweelede kwaamba munzila iipa muzeezo wakuti mwiiminizi wamfwulumende umwi weendelezyegwa a Diabolosi. Ibbaibbele lipandulula kuti tatweelede kusampaula bantu.—Tit. 3:1, 2. w16.04 4:5, 6

Pele ino inga twazizyiba buti zintu zimukkomanisya Jehova? Ikuti kakunyina mulawo uugaminide wamu Bbaibbele, tweelede kubona, naa kumvwisya zintu nzyayanda Jehova kuti tucite mubukkale motubede. Ino inga twacita buti oobo? Tweelede kupaila kuli nguwe akuzumizya muuya wakwe uusalala kuti utusololele. Jesu lyoonse wakali kuzyiba nzyaakali kuyanda Jehova kuti acite. Mucikozyanyo, ziindi zyobilo ciindi bantu nobakafwide nzala, Jesu wakapaila akubasanina kwiinda mumaleele. (Mt. 14:17-20; 15:34-37) Pele ciindi naakafwa nzala munkanda alimwi a Diabolosi naakali kuyanda kuti asandule mabwe kuba cinkwa, Jesu wakakaka. (Mt. 4:2-4) Wakalibazyi kabotu Bausyi, aboobo wakalizyi kuti Jehova takonzyi kuyanda kuti muuya uusalala aubelesye munzila yakuligwasya mwini. Wakalizyi kuti Bausyi bakali kukonzya kumusololela akumupa cakulya ikuti naa kwayandika. w16.05 3:7, 8

Masimpe kuti zibeela zimwi zyamu Bbaibbele zyakalembelwa bantu bamwi naa nkamu yabantu bamwi. Aaka nkakaambo ikeelede kutupa kuti katutanabala Bbaibbele, twamulomba Jehova kuti atupe mizeezo iili kabotu alimwi abusongo kutegwa tuzimvwisye ziiyo nzyayanda kuti twiiye. (Ezr. 7:10; Jak. 1:5) Ciindi notubala Bbaibbele, tweelede kwiima akulibuzya mibuzyo iitobela: ‘Ino eeci cindiyiisya nzi kujatikizya Jehova? Ino makani aaya inga ndaabelesya buti mubuumi bwangu? Ino inga ndaabelesya buti kugwasya bamwi?’ Ikuti twazinzibala kuyeeya mibuzyo eeyi, tuyoogwasyigwa kapati notubala Bbaibbele. Atulange-lange cikozyanyo comwe. Ibbaibbele lilapandulula zyeelelo zimwi baalu Banakristo nzyobeelede kuzuzikizya. (1Tim. 3:2-7) Pele bunji bwesu tatuli baalu, aboobo tulakonzya kuyeeya kuti twaambo ootu tatukonzyi kutugwasya munzila iili yoonse. Nokuba boobo, mulongo ooyu wazyeelelo ulakonzya kutugwasya munzila zinji. w16.05 5:7, 8

Ciindi ba Juda nobakatolwa ku Babuloni, bakanjila mumunzi iwakazwide mituni alimwi abantu ibakali kukomba mizimo. Nokuba boobo, ba Juda basyomeka mbuli Daniele abeenzinyina botatwe, bakakaka kuyungwa abantu bamu Babuloni. (Dan. 1:6, 8, 12; 3:16-18) Daniele abeenzinyina bakamuzumina Jehova kuba Mubumbi wabo alimwi bakazumanana kukomba nguwe alikke. Nokuba kuti Daniele wakali kukkala mubusena bubyaabi kwaciindi cilamfwu cabuumi bwakwe, mungelo wa Leza wakamwaamba kuti wakali “muntu uuyandwa kapati.” (Dan. 10:11, 19) Lyansiku, mubumbi wakali kubikka bulongo mucikombole kutegwa apange cintu cimwi. Mazuba aano, bakombi bakasimpe balizyi kuti Jehova ngo Mweendelezi wabubumbo boonse alimwi ulijisi nguzu zyakweendelezya masi. (Jer. 18:6) Leza ulijisi nguzu zyakumubumba umwi aumwi wesu. Nokuba boobo, Jehova tasinikizyi muntu uuli woonse kucinca. Muciindi caboobo, uyanda kuti katulisungwide kubumbwa anguwe. w16.06 2:1, 2

Saatani ubelesya bweende bwamakwebo bwamunyika eeyi kutoongelezya akutupa kusyoma kuti ikuba azintu zyakumubili ziindilila alizyeezyo nzyotuyandika, nzezikonzya kutupa kukkomana mubuumi. Ulicizyi kapati koongelezya “zisusi zyameso.” (1Joh. 2:15-17; Matl. 3:6; Tus. 27:20) Munyika muli zintu zyakumubili ziindene-indene, zibotu azibi, alimwi zimwi akati kanzizyo zilakwelelezya kapati. Sena kuli nomwakaula kale cintu cimwi mucintoolo, ikutali kuti cilayandika, pele akaambo kakuti cakamubotela mbocakaambilizyigwa abasimakwebo? Sena kumbele mwakaliyeeya akubona kuti nokuba kuti kamutacijisi cintu eeco inga mwazumanana kupona? Zintu zitayandiki izili boobo zituyumizyila buyo buumi alimwi buya maliminya. Zilakonzya kutunjizya mukakole akunyonganya bubambe mbotujisi bwakwiiya Bbaibbele, kulibambila akujanika kumiswaangano, alimwi akutola lubazu lyoonse mumulimo wakukambauka. Mutalubi kuti mwaapostolo Johane wakacenjezya kuti: “Nyika ilamana antoomwe azisusi zyanjiyo.” w16.07 1:3, 4

Mumbungano ya Bunakristo yamumwaanda wamyaka wakusaanguna, kwakali ba Juda, ba Giriki, bana Roma, alimwi abantu ibakali kuzwa mumasi aambi. Bakakomezyedwe munzila ziindene-indene, bakajisi zilengwa ziindene-indene, alimwi nzyobakali kukkomanina azyalo zyakaliindene. Akaambo kaceeco, cakali ciyumu kuli bamwi ikutobela nzila mpya yakukomba naa kuleka zilengwa nzyobakazyibide. Aboobo Paulo wakeelede kubayeekezya kuti Banakristo bajisi buyo Leza omwe buyo, Jehova. Ino mbuti kujatikizya mbungano ya Bunakristo mazuba aano? Musinsimi Isaya wakaamba kuti “kumamanino aamazuba aayo,” bantu kuzwa kumisyobo yoonse bayooboola antoomwe kuti bakombe Jehova. Bayakwaamba kuti: “Uyootuyiisya nzila zyakwe, eelyo tuyakweenda munzila zyakwe.” (Is. 2:2, 3) Tulikkomene kubona kuti businsimi oobu buli mukuzuzikizyigwa mazuba aano! Bakwesu abacizyi bazwa mumasena aayindene-indene, baambaula myaambo iindene-indene, alimwi bajisi zilengwa ziindene-indene. Nokuba boobo tulikamantene mubukombi bwesu notukomba Jehova. w16.06 3:15, 16

Nciyumu ikweezyeezya zintu zibotu Jehova nzyababambilide Banakristo bananike ciindi baakukkala azyuuno zyabwami kuti balele antoomwe a Kristo kujulu. (Lk. 22:28-30; Flp. 3:20, 21; 1Joh. 3:2) Mbambabo ibayooba “Jerusalemu Mupya,” nabwiinga wa Kristo. (Ciy. 3:12; 17:14; 21:2, 9, 10) Bayoobelekela antoomwe a Jesu “kuponya masi,” akusololela bantu bamvwida kububambe ibuyoobapa kuti baangununwe kubuzike bwacibi, lufwu alimwi akubagwasya kuti balondoke. (Ciy. 22:1, 2, 17) Cimwi cacitondezyo cipati caluzyalo lwa Jehova ilutaliboteli iciyoocitika anyika, mbubuke bwabantu kuzwa ‘muzyuumbwe.’ (Job. 14:13-15; Joh. 5:28, 29) Baalumi abamakaintu basyomeka bansiku ibakafwa kacitanapegwa cipaizyo calufwu lwa Kristo, kubikkilizya abaabo boonse “bambelele zimbi” ibafwa cakusyomeka muziindi eezyi zyamamanino, bayoobusyigwa kutegwa bakazumanane kumubelekela Jehova.—Joh. 10:16. w16.07 4:13-15

Kuzumanana ‘kupakamana’ kumuuya tacaambi buyo kuba amakanze mabotu. Mazuba masyoonto buyo kacitanacitika eeco icakacitika mumuunda wa Getesemane, Jesu wakaambila basikwiiya mbomunya aaba kuti kabapaila mipailo yakukombelezya kuli Jehova. (Lk. 21:36) Aboobo kutegwa andiswe tutooni kumuuya, tweelede kuzumanana kupakamana mumipailo. (1Pet. 4:7) Mbwaanga Jesu wakaamba kuti mamanino ayoosika ‘aciindi ncotutayeeyeli,’ eeci tacili ciindi cakuumfwula kumuuya, cakuyandaula zintu zyabuyo eezyo Saatani anyika yakwe nzyoipa alimwi anzyoulombozya mubili wesu. (Mt. 24:44) Kwiinda mu Bbaibbele, Leza alimwi a Kristo balatwaambila nzyobatubambilide lino-lino kumbele alimwi ambotukonzya kuzumanana kulangila. Tweelede kubikkila maano kubube bwesu bwakumuuya, kucilongwe cesu a Jehova, alimwi azintu ziyandika izijatikizya Bwami. Tweelede kubikkila maano kuciindi alimwi azintu zicitika kutegwa tube bantu balibambilide kujatikizya zintu ziboola kumbele. (Ciy. 22:20) Buumi bwesu buli muntenda! w16.07 2:15-17

Cikwati ciyumu cibambwa abantu bobilo ibalekelelana mbwaanga boonse tabalondokede. ‘Balazumanana kweengelelana akulekelelana camoyo woonse.’ Inzya, boonse bobilo balalubizya. Nokuba boobo, ciindi umwi naalubizya, kulaba zyoolwe zyakwiiya kuzintu izyalubila, kwiiya kulekelela, alimwi akulekela luyando kuti lubeleke cakumaninina mbwaanga “ncecaanzyo calukamantano cilondokede.” (Kol. 3:14) Kuyungizya waawo, “luyando lulakkazika moyo . . . Talubikkilili.” (1Kor. 13:4, 5) Twaambo tupa kutamvwana tweelede kubambwa cakufwambaana. Aboobo Banakristo banabukwetene beelede kutubamba twaambo tuli toonse ntobajisi kalitanabbila zuba. (Ef. 4:26, 27) Kutegwa muntu aambe kuzwa ansi aamoyo kuti, “Ndalubizya, ndalomba mundijatile” kuyandika kulicesya ncobeni alimwi abusicamba, pele kulagwasya kapati kubamba twaambo alimwi kulabakamantanya banabukwetene. w16.08 2:6

Kukambauka makani mabotu aa Bwami ngomulimo mupati Jesu ngwaakali kucita. Nokuba boobo, wakajana ciindi cakuyiisya bamwi kuba beembezi alimwi abamayi. (Mt. 10:5-7) Nokuba kuti Filipo wakajisi bubi mumulimo wabukambausi, cakutadooneka wakagwasya bana bakwe basimbi botatwe kuba bantu bacibwene mukukambaukila bamwi kasimpe kamu Magwalo. (Mil. 21:8, 9) Ino nkaambo nzi kuyiisya kuli boobo ncokuyandika kapati mazuba aano? Mweelwe wabantu ibatambula makani mabotu nyika yoonse mboizulwa, uyaabuyaambele. Bapya ibatanabbapatizyigwa beelede kumvwisya kaambo ncociyandika kapati kuba aciiyo cabo beni ca Bbaibbele. Alimwi beelede kuyiisyigwa kukambaukila bamwi makani mabotu akubayiisya kasimpe bantu aabo. Mumbungano zyesu, bakwesu beelede kukulwaizyigwa kubeleka canguzu kutegwa beelele kubeleka kabali bakutausi alimwi abaalu. Kwiinda mukupa “malailile mabotu,” Banakristo basimide balakonzya kugwasya bapya kutegwa bayaambele kumuuya. w16.08 4:1, 2

Kubelekela antoomwe abakwesu alimwi abacizyi kupa kuti kube lukamantano. Alimwi kupa kuti tube abalongwe beni-beni alimwi akuti toonse katuba alusyomo muzilongezyo zyakumbele nzyotuyootambula kwiinda mu Bwami bwa Leza. Notuyumya-yumya maanza aabamwi, tubagwasya kulwana bukkale butyompya akuzumanana kulanga zintu munzila yeelede akuba abulangizi bwakumbele. (Is. 35:4) Kuyungizya waawo, kuyumya-yumya bamwi kutugwasya kupakamana kumuuya alimwi kutupa kuba masimpe kuti zintu Leza nzyatubambilide kumbele ziyoocitika ncobeni. Inzya, maanza eesu andiswe alayumizyigwa. Kubona Jehova mbwaakabagwasya akubakwabilila babelesi bakwe basyomeka musyule, kweelede kuyumya lusyomo lwesu mulinguwe mazuba aano. Aboobo, ciindi nomuyaanya mapenzi, ‘mutalekeli maanza aanu kulebuka’! (Zef. 3:16) Muciindi caboobo, amupaile kuli Jehova, akulekela janza lyakwe lyanguzu kuti limuyumye-yumye akuti limusololele kuzilongezyo zya Bwami.—Int. 73:23, 24. w16.09 1:16-18

Ciindi nobasala kujatikizya nzyobeelede kusama, babelesi ba Leza balaabikkila maano majwi aali atala aawa. Bwini mbwakuti mbokwaca kulakonzya kupa kuti tusame munzila imwi. Alimwi eeci cilakonzya kubikkilizya akwiindana kwabukkale alimwi amasena. Nokuba boobo, zyeelelo zya Jehova tazicinci-cinci kweelana ambokwaca pe. (Malk. 3:6) Mumasena aapya kapati, cilakonzya kukatazya kapati kusama munzila yabulemu alimwi iitondezya kuti tuzilanga kabotu zintu. Aboobo, bakwesu abacizyi tabakonzyi kutyompwa ikuti tweeleba kusama zisani zijata kapati naa zibalangala izitondezya zizo zyamubili. (Job. 31:1) Kuyungizya waawo, ciindi notudwaya mucizyiba cakudwaila, zisani nzyotusama aciindi eeci zyeelede kuti kazipa bulemu. (Tus. 11:2, 20) Nokuba kuti bantu banji munyika balasama zisani zibalangala, swebo notubelekela Jehova tulabikkila maano ikukkomanisya Leza uusalala ooyo ngotuyanda kapati. w16.09 3:11, 12

Jesu tanaakali kuyoowa kubabuzya nzyobakali kusyoma basikumutobela. Amwiiye cikozyanyo cakwe. Inga cainda kugwasya ikuti mwabaambila bana banu kuti baambe nzyobayeeya ciindi nobalikwaide. Ikuti naa mwana uladooneka kujatikizya njiisyo imwi, mutakalali pe, alimwi mutamwiinguli mbuli kuti mumunyemena buya. Cakukkazika moyo amumugwasye kukamvwisya kaambo. Inga cagwasya kubona mibuzyo njabuzya mwanaanu kuba citondezyo cakuti ulabikkila maano alimwi uyanda kuzyiba. Noliba leelyo naakajisi buyo myaka iili 12, Jesu wakabuzya mibuzyo iiyandika kapati. (Lk. 2:46) Amubazyibe kabotu bana banu, nkokuti kuzyiba mbobayeeya, mbobalimvwa, alimwi azibapa kulibilika. Mutayeeyi kuti balaalusyomo akaambo buyo kakuti balajanika kumiswaangano ya Bunakristo alimwi akuti balaunka mumulimo wakukambauka antoomwe andinywe. Amubikkilizye amibandi yazintu zyakumuuya ciindi nomubeleka milimo yalyoonse. Amupaile antoomwe abana banu alimwi amubapailile. Amuzizyibe zintu zisunka lusyomo lwabo, alimwi amubagwasye kuzyiba mbobakonzya kuzilwana. w16.09 5:3-5

Bakamboni ba Jehova banji mazuba aano bali mukubeleka cabusungu mukuzuzikizya cilengaano icitondezya kwaambilizyigwa kwamakani mabotu “kumisyobo yoonse akumyaambo yoonse akumikowa yoonse.” (Ciy. 14:6) Sena muli akati kabaabo ibaiya mwaambo umbi? Sena mulabeleka kamuli bamisyinali naa mubelekela kubusena kubulide kucisi cimbi, naa sena mwakatalika kuswaangana ambungano iibelesya mwaambo wakucisi cimbi mucisi canu? Mbotuli babelesi ba Leza, toonse tweelede kuzibikka mubusena bwakusaanguna zintu nzyotuyandika kumuuya swebo alimwi anzyobayandika kumuuya bamukwasyi wesu. Nokuba boobo, zimwi ziindi cilakonzya kutuyumina kuba aciiyo cesu tobeni icisitikide akaambo kakuba azintu zinji zyakucita. Pele aabo ibabelekela kuzisi zimbi balajana buyumuyumu abumbi. Kunze lyakwiiya mwaambo mupya, aabo ibabelekela kuzisi zimbi beelede kubona kuti lyoonse balalya cakulya ciyumu cakumuuya.—1Kor. 2:10. w16.10 2:1-3

Bakamboni ba Jehova balazumanana kukkomana mubulangizi bwabo nokuba kuti bazumanana kupenzyegwa. Mucikozyanyo, bakwesu abacizyi banji balaangidwe ku Eritrea, Singapore, alimwi aku South Korea, kanji-kanji akaambo kakutobela majwi aa Jesu aakutabweza panga. Bantu banji ba Jehova tabanapenzyegwa kapati. Masunko aalwana lusyomo lwabo aliindene. Banji balapenga akaambo kanzala naa akaambo kankondo, alimwi aciindi nokwacitika ntenda zilicitikila. Bamwi bali mbuli Musa alimwi abantu bakaindi mukuti basiya buumi bwamunyika bwakuba ampuwo. Balasoleka canguzu kutegwa batasunkwi kutalika kupona buumi bwakuyandisya zintu zyakumubili, nkokuti buumi bwakuliyanda. Ino ncinzi cibagwasya kucita boobo? Luyando ndobajisi kuli Jehova alusyomo lwabo luyumu mucisyomezyo cakuti Leza uyoomanizya kutalulama koonse alimwi akulumbula babelesi bakwe basyomeka abuumi butamani munyika mpya yabululami.—Int. 37:5, 7, 9, 29. w16.10 3:15, 16

Ciindi Jeremiya naakayoowede alimwi akutyompwa, Jehova wakayumya lusyomo lwamusinsimi ooyu. (Jer. 1:6-10) Alimwi amuyeeye buyo mbwaakakulwaizyigwa musinsimi uucembeede Daniele ciindi Leza naakatuma mungelo kuti amuyumye-yumye. Mungelo ooyo wakaamba Daniele kuti, “omuntu uuyandwa kapati” naa “uulemekwa kapati.” (Dan. 10:8, 11, 18, 19; bupanduluzi buyungizyidwe) Sena andinywe inga mwabakulwaizya basikumwaya, bapainiya, bakwesu alimwi abacizyi bacembeede ibayaabumana nguzu? Leza taakwe naakayeeya kuti akaambo kakuti walo amwanaakwe ngwayandisya Jesu bakabeleka antoomwe kwamyaka minji kapati, nkokuti lino tiicakali kuyandika kuti amulumbaizye alimwi akumukulwaizya ciindi naakali aanyika. Muciindi caboobo, ziindi zyobilo Jesu wakamvwa Bausyi kabaambaula kuzwa kujulu ategwa: “Ooyu Mwanaangu ngweyandisya, ngwekkomanina.” (Mt. 3:17; 17:5) Aboobo Leza wakamulumbaizya Jesu akumwaambila kuti wakali kucita kabotu. Jehova alimwi wakatuma mungelo kuti amuyumye Jesu ciindi naakapengede kapati mumoyo busiku katanafwa.—Lk. 22:43. w16.11 1:7, 8

Tacili cuuba-uba kulijata ikuti twanyemezyegwa naa kucitilwa cakutalulama. Cilatyompya ikuti bamwi kabatatweendelezyi kabotu akaambo kamusyobo wesu, mubala, naa kwiimpana kumwi kujatikizya mbotulibonya. Eelo kaka cilacisa kapati ikuti iwatulubizyila Munakristoma! Eelo kaka ncamaano kutobela lulayo lwamu Bbaibbele lwakujata moyo alimwi akutafwambaana kunyema pe! (Tus. 16:32) Cakutadooneka toonse tweelede kubeleka canguzu kuti tutanoonyemi-nyemi pele tweelede kuba bantu balekelela. Jehova alimwi a Jesu babona kulekelela kuba cintu ciyandika kapati. (Mt. 6:14, 15) Sena muyandika kuba bantu balekelela naa kwiiya kulijata? Bantu ibaalilwa kulijata kanji-kanji inga mbakali. Akaambo kaceeco, bamwi inga balabatantamuka bantu ibali boobo. Muntu mukali inga wayunga bantu mumbungano.—Lev. 19:17, 18. w16.11 3:4-6

Kabajisi nyota yakwiiya kasimpe, ba Charles Taze Russell abeenzinyina bakatalika kwiiya Bbaibbele cakusitikila kumamanino aamyaka yakuma 1800. Kumatalikilo, makanze aa Mukwesu Russell akali aakuzyiba cikombelo icakali kuyiisya kasimpe akati kazikombelo izyakaliko. Wakeezyanisya cakubikkila maano ncolyaamba Bbaibbele alimwi anjiisyo zyabukombi bwiindene-indene, kubikkilizya aboobo ibutali bwa Bunakristo. Kalitanalampa, wakajana kuti kunyina cikombelo nociba comwe akati kazikombelo eezyo icakali kutobela cakumaninina ncoliyiisya Jwi lya Leza. Aciindi cimwi, wakaswaangana abasololi bazikombelo banji bakubusena nkwaakali kukkala kajisi makanze aakuti baalumi aaba balakazumina kasimpe aako walo alimwi abeenzinyina nkobakajana mu Bbaibbele akukayiisya kubantu bamuzikombelo zyabo. Pele basololi bazikombelo aabo bakakaka. Basikwiiya Bbaibbele aabo bakeelede kuzyiba kaambo kakuti: Tiibakeelede kuyanzana abaabo ibakakanzide kukakatila kubukombi bwakubeja. w16.11 4:14

Kulumba kwesu kuluzyalo lwa Leza kubikkilizya zintu zinji ikutali buyo kutantamuka bwaamu, bukolwi, naa zibi zimwi eezyo bamwi mu Korinto nzyobakali kucita. (1Kor. 6:9-11) Kulumba luzyalo lwa Leza tacaambi buyo kutantamuka micito yakutalilemeka pele alimwi kubikkilizya kusolekesya kulwana cilengwa cili coonse cakukkomanina zyakulikondelezya izijatikizya makani aakutalilemeka. Kwaaba mibili yesu kuti tube bazike kubululami takukatupi buyo kutantamuka bukolwi pe, pele alimwi kuyootupa kuleka kuciindizya kunywa bukoko cakuti inga kwasyaala buyo asyoonto kuti tukolwe. Inga kwayandika kubeleka canguzu kutegwa tuzilwane zilengwa zili boobu izitali kabotu; nokuba boobo, eeyi ninkondo njotukonzya kuzunda. Mbaakani yesu yeelede kuba yakutantamuka zibi zipati kubikkilizya akulubizya kumwi kutalibonyi kapati. Bwini mbwakuti, tatukonzyi kucita oobo cakulondoka. Nokuba boobo, tweelede kusolekesya kucita oobo mbubwenya mbuli Paulo mbwaakacita. Wakakulwaizya Banakristonyina kuti: “Mutalekeli cibi kuzumanana kweendelezya mbuli mwami mumibili yanu iifwa ikutegwa kamutobela zisusi zyanjiyo.”—Rom. 6:12; 7:18-20. w16.12 1:16, 19-21

Jesu wakasyomezya kuti Taateesu uuli kujulu kunyina nakonzya kukakilwa kubapa muuya uusalala aabo ibamulomba. (Lk. 11:10-13) Mucelo wamuuya, ibube bubotu oobu ibuboola akaambo kanguzu zya Leza zibeleka, butondezya bwini mbwabede Leza singuzuzyoonse. (Kol. 3:10) Mbomuyaabutondezya zibeela zyamucelo wamuuya eezyo, muyoozumanana kuba azilongwe zibotu. Aboobo, muyoojana kuti zintu izyali kukonzya kumupa kulibilika tazicitiki. Cakutadooneka, mweelede kulicesya kutegwa mweendelezyegwe ‘ajanza lya Leza lyanguzu’ alimwi ‘akuwaala makatazyo aanu oonse kulinguwe.’ (1Pet. 5:6, 7) Pele ciindi nomweenda cakulicesya, muyoopona buumi mbwakkomanina Leza alimwi uyoomugwasya. (Mik. 6:8) Kwiinda mukuzyiba nguzu zyanu mpozigolela alimwi akuzilanga munzila yeelede zintu, tamukasiki aciimo cakugolelwa maano akaambo kakulibilika nkaambo munoosyoma Leza. w16.12 3:7, 12

Mbwaakali “mukambausi wabululami,” Nowa cakusyomeka wakaambilizya mulumbe wakucenjezya ngwaakaambilwa kuti aambilizye. Cakutadooneka, kucita boobo kwakamugwasya Nowa kuzumanana kuba alusyomo luyumu. Kunze aamulimo wakukambauka, Nowa wakabelesya nguzu zyakwe alimwi amaano aakwe kutegwa azuzikizye mulimo ngwaakapegwa a Leza iwakuyaka bwato. (Heb. 11:7) Mbubwenya mbuli Nowa, tulasolekesya kuba “azintu zinji zyakucita mumulimo wa Mwami.” (1Kor. 15:58) Milimo eeyo ilakonzya kubikkilizya kuyaka alimwi akubamba masena aakukombela, kulyaaba kugwasilizya kubeleka kumiswaangano mipati, naa kubelekela kuofesi yamutabi naa kuofesi yabasanduluzi. Kwiinda zyoonse, tulalitakata mumulimo wakukambauka, katuzyi kuti mulimo ooyu uyumya bulangizi bwesu bwakumbele. Masimpe, kutola lubazu mumulimo wakukambauka kuyumya bulangizi bwesu bwakutaleka kutola lubazu mumuzundano wakubalika wabuumi.—1Kor. 9:24. w17.01 1:8, 9

Cimwi cazyeelelo zyalwaanguluko lwesu ncakuti tweelede kulemeka lwaanguluko ndobajisi bamwi lwakulisalila zyakucita mubuumi bwabo. Nkaambo nzi? Mbwaanga toonse tulijisi cipego calwaanguluko lwakulisalila, kunyina Banakristo bobilo bakonzya kunoosala zintu zikozyenye lyoonse. Eeci ncamasimpe nomuba mutwaambo tujatikizya mbotulilemeka alimwi abukombi bwesu. Ciindi notuzyiba kuti Munakristo uuli woonse weelede “kunyamuna mukuli wakwe,” tuyoolulemeka lwaanguluko ndobajisi bamwi lwakubelesya cipego cabo calwaanguluko lwakulisalila, kubikkilizya akulisalila caboola mumakani aatayandiki kapati. (1Kor. 10:32, 33) Jehova wakatupa cipego calwaanguluko lwakulisalila calo icileta lwaanguluko lwini-lwini. (2Kor. 3:17) Tulacikkomanina kapati cipego eeci akaambo kakuti citupa coolwe cakusala munzila iiyubununa mbotumuyanda kapati Jehova. Atuzumanane kulumba akaambo kacipego ciyandika kapati eeci kwiinda mukucibelesya munzila iilemeka Leza alimwi akwiinda mukulemeka nzila bamwi njobasala kucibelesya cipego cabo. w17.01 2:15, 17, 18

Kutegwa bantu batuyande, tatweelede kulisumpula naa kuyanda kubikkilwa maano munzila iiteelede, pele tweelede kutondezya “moyo uukkede alimwi mubombe.” (1Pet. 3:3, 4; Jer. 9:23, 24) Mizeezo iitali kabotu mumoyo wesu mukuya kwaciindi iyoolibonya muzintu nzyotucita. Mucikozyanyo, tulakonzya kupa zitondezyo izitondezya kuti tulakukkomanina kuba amikuli yaalubazu, naa kuti kuli makani aamwi aamaseseke ngotuzyi, akuti tulijisi cilongwe cimwi cilibedelede abakwesu beendelezya. Naa tulakonzya kupandulula zintu munzila yakuti bamwi batalika kulumbaizya ndiswe akaambo kamizeezo naa milimo yakacitwa kakuli bamwi abalo bakatola lubazu mumilimo eeyo. Jesu alimwi wakatusiila cikozyanyo cibotu. Bunji bwazintu nzyaakali kwaamba naa nzyaakali kuzubulula zyakali kuzwa mu Magwalo aa Chihebrayo. Cakulibombya wakaamba munzila eeyo kutegwa bantu ibakali kumuswiilila bazyibe kuti nzyaakali kwaamba zyakali kuzwa kuli Jehova ikutali kuzwa kumaano aakwe naa busongo bwakwe. w17.01 4:12

Tiicakali ciyumu kuli ba Adamu a Eva kuumvwisya mulawo ooyu, naa kuutobela. Alimwi buya, bakajisi zyakulya zinji kapati kwiinda aali zyeezyo nzyobakali kukonzya kulya. Kwiinda mukubelesya nzoka, Saatani Diabolosi wakacenga Eva akumupa kuzangila Usyi, Jehova. (Matl. 3:1-5; Ciy. 12:9) Saatani wakakapanga kuba kaambo kapati kaambo kakuti bana ba Leza bantunsi tiibakali kuzumizyigwa kulya “kuzisamu zyoonse zyamumuunda.” Cakali mbuli kuti waamba kuti: ‘Sena mwaamba kuti tamukonzyi kucita kufwumbwa ncomuyanda?’ Kuzwa waawo, wakabeja ulaamba: “Tamukonzyi kufwa pe.” Mpoonya wakayunga Eva kuti tanaakeelede kumvwida Leza pe, akwaamba kuti: “Leza ulizyi kuti buzuba mbomuyoolya kulincico, meso aanu ayoojaluka.” Munzila imwi Saatani wakali kwaamba kuti Jehova tanaakali kuyanda kuti balye mucelo nkaambo kucita boobo kwakali kuyoobapa kuti bajaluke meso. Kuyungizya waawo, Saatani wakapa cisyomezyo eeci cakubeja naakaamba kuti: “Muyooba mbuli Leza, muyoozyiba bubotu abubi.” w17.02 1:8, 9

Isaya wakasinsima kuti ooyu uyakuba “musololi alimwi mweendelezi.” (Is. 55:4) Alimwi Daniele wakasololelwa amuuya uusalala kulemba kuboola kwa “Mesiya Musololi.” (Dan. 9:25) Kumane, Jesu Kristo wakaliyubununa kuti “Musololi” wabantu ba Leza. (Mt. 23:10) Basikwiiya ba Jesu bakamutobela cakuliyandila, alimwi bakalisinizyide kuti wakasalwa a Jehova. (Joh. 6:68, 69) Ino ncinzi cakabapa kuti basyome? Jesu naakabbapatizyigwa, Johane Mubbapatizi wakabona “julu kalijaluka, amuuya uulibonya mbuli nziba kauseluka alinguwe.” (Mk. 1:10-12) Mumulimo wa Jesu woonse waanyika, muuya uusalala wa Leza wakamugwasya Jesu kutegwa acite maleele alimwi akwaambaula kwiinda munguzu zya Leza. (Mil. 10:38) Kuyungizya waawo, muuya uusalala wakapa kuti Jesu azyale micelo iilondokede, mbuli luyando, lukkomano, alimwi alusyomo luyumu. (Joh. 15:9; Heb. 12:2) Kunyina musololi uumbi wakatondezya bumboni buli boobu. Jesu ngonguwe ngwaakasala Jehova. w17.02 3:15, 16

Lya Pentekoste 33 C.E., baapostolo bakatalika kusololela mumbungano ya Banakristo. Buzuba mbubwenya oobo, “Petro wakaima antoomwe abali Kkumi Aumwi” akwaambila nkamu mpati yaba Juda alimwi abasandule kasimpe kapa buumi. (Mil. 2:14, 15) Bunji bwabo bakaba basyomi. Kumane, aaba Banakristo bapya “bakazumanana kubikkila maano kukuyiisya kwabaapostolo.” (Mil. 2:42) Baapostolo bakali kulanganya mali aamumbungano. (Mil. 4:34, 35) Bakali kulanganya zintu zyakumuuya nzyobakali kuyandika bantu ba Leza, kabaamba kuti: “Swebo tulazumanana kubikkila maano kumipailo akumulimo wakuyiisya jwi lya Leza.” (Mil. 6:4) Alimwi bakatuma Banakristo basimide kuti batole aambele mulimo wakukambauka muzilawo zipya. (Mil. 8:14, 15) Mukuya kwaciindi, baalu bamwi bananikidwe bakabasangana baapostolo mukulanganya twaambo tujatikizya mbungano. Mbuli kabunga keendelezya, bakali kupa busolozi kumbungano zyoonse.—Mil. 15:2. w17.02 4:4

Bunji bwabantu batalondokede balayungwa kapati amuuya wanyika ya Saatani. Nkakaambo kaako bantu ncobatalikila kukomba bantu bamwi muciindi cakubapa buyo bulemu bweelede. Balabasumpula akubalemeka cakuzwa munzila basololi bazikombelo, basimapolitikisi, basizisobano, basimafilimu naa baimbi bajisi mpuwo kapati, alimwi abantu bambi buyo balaampuwo, balo kanji-kanji mbobabona mbuli kuti mbangelo. Aboobo, bana alimwi abapati bababona kuti nzikozyanyo nzyobeelede kutobela, ambweni akubaiya mbobacita zintu, mbobasama naa kutobela bukkale bwabo. Banakristo bakasimpe balalikasya kulemeka bantu munzila eeyi iitali kabotu. Kristo ngomuntu alikke uulondokede ngotweelede kubona kuti ncikozyanyo ncotweelede kutobela. (1Pet. 2:21) Leza takonzyi kukkomana kuti katulemeka bantu cakuzwa munzila. Tweelede kuzyiba kaambo aaka kamasimpe kakuti: “Boonse balibisyide alimwi balalezya kubulemu bwa Leza.” (Rom. 3:23) Mubwini, taakwe muntu weelela kukombwa. w17.03 1:6-8

Umwi aumwi wesu weelede kuulingula moyo wakwe akubona naa ulilyaabide cakumaninina kuli Leza. Amulibuzye kuti, ‘Sena ndilikanzide kukkomanisya Jehova, kwiiminina bukombi bwakasimpe alimwi akukwabilila bantu bakwe kuzwa kukuyunga kubyaabi?’ Mucikozyanyo, ino mbuti kuti umwi mweenzinyoko wagwisyigwa mumbungano? Sena mulakonzya kucileka kuyanzana amuntu ooyo? Ino moyo wanu inga wamukulwaizya kucita nzi? Mbubwenya mbuli Asa, mulakonzya kutondezya kuti moyo wanu ulimaninide kuli Leza kwiinda mukumusyoma cakumaninina ciindi nomwasikilwa mapenzi naaba yaayo aalibonya kuti mapati kapati. Mulakonzya kufwubaazyigwa kucikolo akaambo kakuti muli Bakamboni ba Jehova. Mbomubeleka limwi kumulimo balakonzya kumusampaula akaambo kakubweza mazuba aakulyookezya kutegwa mucite zintu zyakumuuya naa akaambo kakutabeleka maovataimu kutegwa mujane mali manji. Mubukkale buli boobo, amupaile kuli Leza, mbubwenya Asa mbwaakacita. (2Mak. 14:11) Amukakatile kuli ceeco ncomuzyi kuti cili kabotu alimwi akuti ncabusongo. Amuyeeye kuti Leza wakamuyumya-yumya alimwi akumugwasya Asa, andinywe uyoomuyumya-yumya. w17.03 3:6-8

Ijwi lya Leza litulaya kutaingana ciindi notuyanda kusala cintu ciyandika kapati. Ikuti twatola ciindi kulanga-langa zintu zyoonse izijatikizyidwe kucakusala cimwi, tulangilwa kuyoozwidilila. (1Tes. 5:21) Katanasala cakucita, silutwe wamukwasyi weelede kuvwuntauzya ncaamba Magwalo alimwi amabbuku aa Bunakristo, mpoonya akuswiilila mizeezo yabamwi mumukwasyi wakwe. Amuyeeye kuti Leza wakaambila Abrahamu kumvwida ncaakaamba mukaintu wakwe. (Matl. 21:9-12) Baalu abalo beelede kutola ciindi kuvwuntauzya. Alimwi ikuti kabali bantu banyoneka, balibombya, tabakayoowi kusweekelwa bulemu ikuti kwaboola makani mapya, ayanda kuti bacince ceeco ncobakasalide kale. Beelede kulibambila kucinca mizeezo yabo alimwi anzyobakasala ikuti kakuyandika kucita boobo, alimwi toonse tweelede kutobela cikozyanyo cabo cibotu. Eeci cilakonzya kupa kuti kube luumuno alimwi akuti zintu kazicitwa bweelede mumbungano.—Mil. 6:1-4. w17.03 2:16