April

Mbuti kujatikizya ndiswe? Sena tujisi mizeezo ya Leza naa yamunyika? Masimpe, kweelede kuti tulabeleka canguzu kupona kweelana akuyanda kwa Leza. Pele ino mbuti kujatikizya mizeezo yesu? Sena mizeezo yesu alimwi ambotuzibona zintu kuleendelana ambwacita Jehova? Kucita boobo kuyanda kubeleka canguzu. Pele mukwiimpana, mizeezo yamunyika taiyandiki kubeleka canguzu. Cili boobu akaambo kakuti tuzingulukidwe amuuya wanyika. (Ef. 2:2) Kuyungizya waawo, akaambo kakuti kanji-kanji ikulwaizya kuliyanda, mizeezo yamunyika ilakonzya kulibonya kuba kabotu. Masimpe, tacili cuubauba kuba amizeezo ya Jehova pele ncuubauba kuba amizeezo yamunyika. Nokuba boobo, ikuti naa twalekela nyika kweendelezya mizeezo yesu, kanji-kanji tunootondezya muuya wakuliyanda alimwi akutayanda kweendelezyegwa. (Mk. 7:21, 22) Aboobo cilayandika kapati kuba ‘amizeezo ya Leza’ ikutali “mizeezo yabantu.” w18.11 18 ¶1; 19 ¶3-4

Jesu wakakulwaizyigwa kapati ciindi Jehova naakamubikkila maano mubukkale botatwe kwiinda mukwaambaula cacigaminina kuzwa kujulu. Mbwaakamanina buyo kubbapatizyigwa mu Mulonga wa Jordano, Jehova wakaamba majwi aali mulugwalo lwabuzuba bwasunu. Cakutadooneka, kunze buyo lya Jesu, Johane Mubbapatizi ngonguwe alikke wakaamvwa majwi aayo. Mpoonya, kakuceede mwaka omwe kuti Jesu afwe, baapostolo bakwe botatwe bakamvwa Jehova kaamba kujatikizya Jesu kuti: “Ooyu Mwanaangu ngweyandisya, ooyo ngwekkomanina. Amumuswiilile.” (Mt. 17:5) Bukkale bwamamanino, kakuceede mazuba masyoonto kuti Jesu afwe, Jehova wakaambaula alimwi anguwe kuzwa kujulu. (Joh. 12:28) Nokuba kuti Jesu wakalizyi kuti wakali kuyoofwa munzila yamasampu, ikwaambwa kuti ngusikusampaula Leza, wakapaila kuti kuyanda kwa Jehova kucitwe kutali kwakwe. (Mt. 26:39, 42) “Wakaliyumya acisamu cakupenzyezya, wakaubaula kuusyigwa nsoni,” akaambo kakutayanda bulemu bwamunyika, pele bolikke buzwa kuli Bausyi.—Heb. 12:2. w18.07 10-11 ¶15-16

Naakamana buyo kutalisya Mulalilo wa Mwami, Jesu wakatondezya busicamba kapati. Munzila nzi? Jesu wakazumina kuti kuyanda kwa Bausyi kucitwe kulinguwe, nokuba kuti wakalizyi kuti kucita boobo kwakali kuyakwaamba kuti uyoojaigwa akaambo kakutamikizyigwa mulandu uusisya kapati wakusampaula Leza. (Mt. 26:65, 66) Jesu wakazumanana kusyomeka cakumaninina kutegwa alemeke zina lya Jehova, kusumpula bulelo bwa Leza alimwi akujalula nzila yabuumi butamani kubantu beempwa. Aciindi ncimunya eeco, Jesu wakabagwasya baapostolo bakwe kulibambila zintu zyakali kuyootobela. Jesu wakatondezya busicamba ciindi naakakubikka ambali kulibilika kuli koonse nkwaakajisi akubikkila buyo maano kuzintu nzyobakali kuyandika baapostolo bakwe basyomeka. Mulalilo wa Mwami ngwaakatalisya Jesu ciindi naakamana kutanda Judasi, wakali kuyooyeezya baabo ibakali kuyooba basikumutobela ibananike kujatikizya bulowa bwa Jesu ibwakatika mbobugwasya alimwi akuba mucizuminano cipya anguwe.—1Kor. 10:16, 17. w19.01 22 ¶7-8

Bausyi Jesu bakaambaula kuzwa kujulu kuti: “Ndakalipa kale kuti lilemekwe alimwi ndiyoopa kuti lilemekwe alimwi.” Jesu wakapenga mumoyo akaambo kamukuli mupati ngwaakajisi wakuzumanana kusyomeka kuli Jehova. Jesu wakalizyi kuti wakali kuyoopenga kwiinda mukukwibbaulwa alimwi akujaigwa calunya. (Mt. 26:38) Kwiinda zyoonse eezyi, Jesu wakali kuyanda kuti zina lya Bausyi lilemekwe. Jesu wakatamikizyigwa kuti wakasampaula Leza, alimwi wakalizyi kuti lufwu lwakwe lwakali kuyoopa kuti Leza asampaulwe. Mbubwenya mbuli Jesu, andiswe tulakonzya kulibilika akaambo kakusampaulwa kwazina lya Jehova. Ambweni mbubwenya mbuli Jesu, andiswe tatweendelezyegwi cabululami. Andiza tulakatazyigwa amakani aakubeja ngobaamba basikutukazya kujatikizya ndiswe. Tulakonzya kuyeeya makani aakubeja mbwaasampaula zina lya Jehova. Muziindi zili boobu, majwi aa Jehova alakonzya kutuumbulizya kapati. Jehova kunyina nayakwaalilwa kupa kuti zina lyakwe lilemekwe.—Int. 94:22, 23; Is. 65:17. w19.03 11-12 ¶14-16

Basikwiiya ba Jesu tiibakacisyoma ncobakamvwa. Jesu, walo ngobakali kulangila kuti nguuyoobukulusya bwami bwa Israyeli, wakabaambila kuti muciindi buyo cisyoonto, wakali kuyoopenga akufwa. Mwaapostolo Petro ngowakasaanguna kwiingula kwiinda mukwaamba kuti: “Kolyeengelela Mwami; eeci tacikakucitikili pe.” Mpoonya Jesu wakamwiingula kuti: “Koya kusyule lyangu, Saatani! Uli cilebyo kulindime, nkaambo ulaamizeezo yabantu ikutali ya Leza.” (Mt. 16:22, 23; Mil. 1:6) Kweelana amajwi aaya, Jesu wakatondezya kwiindana kuliko akati kamizeezo ya Leza alimwi amizeezo iili munyika eeyi yeendelezyegwa a Saatani. (1Joh. 5:19) Petro wakatondezya muuya wakuliyanda uuli munyika. Pele Jesu wakalizyi kuti mizeezo ya Bausyi yakaliindene. Mubwiinguzi bwakwe kuli Petro, Jesu wakaikaka caantangalala mizeezo yamunyika akuzumina mizeezo ya Jehova. w18.11 18 ¶1-2

Amuyeeyele buyo Jehova ncabona ciindi mamiliyoni aabantu munyika yoonse nobabungana antoomwe ku Mulalilo wa Mwami. Talangi buyo mweelwe wabantu mbouli mupati; pele ulalanga muntu umwi aumwi uujanika. Mucikozyanyo, ulababona aabo ibajanika cakusyomeka mwaka amwaka. Akati kabo inga kakuli bantu ibajanika nokuba kuti balapenzyegwa kapati. Bamwi tabasiki-siki kumiswaangano imwi, pesi babona kuti kujanika ku Ciibalusyo ncintu ciyandika kapati ncobeelede kucita. Jehova alimwi ulababona aabo ibajanika ku Ciibalusyo ciindi cakusaanguna, ambweni akaambo kakuti bayanda kuzyiba mbocicitwa. Masimpe, Jehova ulakkomana kubona kuti bantu banji balajanika ku Ciibalusyo. (Lk. 22:19) Nokuba boobo, ubikkila kapati maano kukaambo kabapa kuti bajanike; kaambo kapa kuti bajanike kalayandika kapati kulinguwe. Sena tulayandisisya kapati kulaililwa a Jehova alimwi ambunga yakwe njabelesya?—Is. 30:20; Joh. 6:45. w19.01 26 ¶1-3

Jesu wakalilisungwide kufwida basikwiiya bakwe alimwi buzuba abuzuba wakali kupona munzila iyakali kutondezya kuti wakali kubikka nzyobayandika bamwi mubusena bwakusaanguna. Mucikozyanyo, wakali kuba abasikumutobela bakwe nociba ciindi naakakatede kapati naa kunyongana mumizeezo. (Lk. 22:39-46) Alimwi wakabikkila maano kuzintu nzyaakali kukonzya kucitila bamwi, ikutali nzyobakali kukonzya kumucitila. (Mt. 20:28) Tuzulilwa akati kabunyina bwa Bunakristo bwakasimpe, alimwi tulakkomana kubelesya ciindi cinji kutamba bapya kutegwa batusangane. Nokuba boobo, tubikkila kapati maano kugwasya baabo “ibaciinga cesu calusyomo” pele ibatacisungweede. (Gal. 6:10) Tulatondezya luyando ndotujisi kulimbabo kwiinda mukubakulwaizya kujanika kumiswaangano yesu, kwaambisya ku Ciibalusyo. Mbubwenya mbuli Jehova alimwi a Jesu, tulakkomana kapati ciindi muntu uutacisungweede napiluka kuli Jehova, Taateesu siluyando alimwi Mweembezi.—Mt. 18:14. w19.01 28 ¶12; 29 ¶14, 15

Ikutalisya Ciibalusyo calufwu lwakwe, Jesu wakabelesya buyo cinkwa cakacaala lya Pobwe Lyakwiindilila alimwi awaini wakaliko kale. Jesu wakaambila baapostolo bakwe kuti zintu eezyi zyobilo zyakali kwiiminina bulowa alimwi amubili wakwe uulondokede, walo ngwaakali kuya kwaaba muciindi buyo cisyoonto akaambo kambabo. Kweelede kuti baapostolo tiibakagambwa kujatikizya mbowatakali kukatazya muswaangano ooyu mupya uuyandika kapati. Nkaambo nzi? Amuyeeye cakacitika kakucili myezi iili mbwiibede, ciindi naakaswaya kuŋanda yabalongwe bakwe mbaakali kuyandisya, nkokuti Lazaro, Marta alimwi a Mariya, Jesu wakatalika kuyiisya. Marta wakaliko, pesi wakajisi bubi kubamba cakulya cinji kumweenzu wakwe uulemekwa. Naakabona boobo, Jesu calubomba wakamulaya Marta, kumugwasya kubona kuti talili lyoonse cakulya cinji nocakali kuyandika. (Lk. 10:40-42) Mpoonya, kakusyeede buyo mawoola masyoonto kutegwa afwe lufwu lwacipaizyo, Jesu wakalutobela lulayo lwakwe mwini. Wakabona masimpe kuti cakulya ca Ciibalusyo cabambwa munzila nguba-uba. w19.01 20-21 ¶3-4

Jehova wakamulemeka Jesu munzila njaatakali kuyeeyela kwiinda mukumubusya “akumupa cuuno caatala” alimwi akumupa cintu cimwi catakapedwe kale amuntu uumbi, nkokuti buumi butafwi! (Flp. 2:9; 1Tim. 6:16) Eelo kaka wakalemekwa munzila iilibedelede Jesu akaambo kakusyomeka kwakwe! Ncinzi ciyootugwasya kutantamuka muuya wakuyanda kukkomaninwa anyika eeyi? Amucibikke mumizeezo kuti Jehova lyoonse ulabalemeka babelesi bakwe basyomeka alimwi akuti ziindi zinji ulabalongezya munzila nzyobatayeeyeli. Nguni uuzizyi zilongezyo nzyotutakonzyi kuyeeyela izitulindila kumbele? Pele kwalino, notuliyumya kubuyumu-yumu akumasunko aamunyika eeyi mbyaabi, atuyeeye lyoonse kuti nyika eeyi ilamana. (1Joh. 2:17) Taateesu siluyando, Jehova, ‘tali Leza uutaluleme pe uunga waluba milimo yesu alimwi aluyando ndotwakatondezya kuzina lyakwe.’—Heb. 6:10. w18.07 11 ¶17-18

Jesu wakalibikkilide maano kapati kumakani aalukamantano ciindi naakali kulya cilalilo camamanino abaapostolo bakwe. Ciindi naakapaila ambabo, wakaamba mbwaakayandide kapati kuti basikwiiya bakwe babe bamwi, mbubonya walo a Bausyi mbobakali bamwi. Lukamantano lwabo lwakali kuyoopa bumboni busalede alimwi akupa citondezyo cisinizya kuti Jehova wakatuma Jesu anyika kuti acite kuyanda kwakwe. Luyando lwakali kuyooba citondezyo cabasikwiiya ba Jesu beni-beni oolo ilwakali kuyoopa kuti babe alukamantano. (Joh. 13:34, 35) Kukankaizya kwa Jesu kujatikizya lukamantano kulalimvwisya. Wakakubona kwaandaana naa kuteendelana ikwakali akati kabaapostolo, mbuli cakacitika ciindi naakali kulya cakulya camamanino ambabo. Mbubwenya mbocakacitikide musyule, bakatalika kuzwangana “kapati akati kabo kujatikizya wakali kubonwa kuti ngomupati kwiinda boonse.” (Lk. 22:24-27; Mk. 9:33, 34) Aciindi cimwi, Jakobo alimwi a Johane bakalomba kuti Jesu abape masena alemenede kumbali lyakwe mu Bwami bwakwe.—Mk. 10:35-40. w18.06 8 ¶1-2

Jehova uyanda kuti banabukwetene kabayandana kapati cakuti luyando lwabo kaluzumanana. (Mt. 19:3-6) Bumambe ncimwi cazintu zibi kapati muntu ncakonzya kucitila yooyo ngobakwetene limwi. Nkakaambo kaako, mulawo waciloba mu Milawo Iili Kkumi ulakasya bumambe. (Dt. 5:18) ‘Nkubisizya Leza’ alimwi ncintu cibi kapati kuli ngomukwetene limwi kucita bumambe. (Matl. 39:7-9) Ooyo uuli aamukaintu naa mwaalumi wacita bumambe ambweni inga watola myaka minji kamvwide moyo kucisa. Jehova alimwi ulabikkila maano kapati kujatikizya bukkale bwabana. Wakalailila bazyali ikupa bana babo zintu nzyobakali kuyandika kumubili alimwi akumuuya. Bazyali bakeelede kubelesya kufwumbwa coolwe ncobakajisi kugwasya bana babo kumvwisya Mulawo wa Jehova alimwi akumuyanda. (Dt. 6:6-9; 7:13) Bazyali tiibakeelede kubona bana babo kuti ncintu ncobakonzya kutabikkila maano naa kutaceendelezya kabotu, pele bakeelede kubabona kuti ndukono, ncipego kuzwa kuli Jehova iceelede kukkomaninwa.—Int. 127:3. w19.02 21 ¶5, 7

Jobu wakazumanana kusyomeka kwiinda mukubikkila maano kubulangizi bwakuti Leza wakali kuyoomulongezya. Wakali kusyoma kuti Leza wakali kukubikkila maano kusyomeka kwakwe. Nokuba kuti wakasunkwa, Jobu wakajisi lusyomo lwakuti Jehova wakali kuyoomulumbula kumbele. Cakutadooneka, lusyomo oolu lwakamugwasya kukakatila kukusyomeka kwakwe. Jehova wakakkomana kapati akusyomeka kwa Jobu cakuti wakamulongezya kapati nokuba kuti wakacili muntu uutalondokede! (Job. 42:12-17; Jak. 5:11) Kumbele Jobu uyoolongezyegwa kapati kwiinda waawo. Leza wesu tacincide pe. (Malk. 3:6) Ikuti katuyeeya kuti ulakubikkila maano kusyomeka kwesu, tunoobuyeeya lyoonse bulangizi bwesu bubotu. (1Tes. 5:8, 9) Ziindi zimwi mulakonzya kulimvwa kulendelelwa ciindi nomucita boobo, pele kunyina nomuyooba nyolikke. Munooli akati kamamiliyoni aabantu basyomeka ibali munyika yoonse. Alimwi muyoosangana abamaalumi alimwi abamakaintu banji ibakazumanana kusyomeka kaindi nociba ciindi nobakali kukongwa kujaigwa.—Heb. 11:36-38; 12:1. w19.02 7 ¶15-16

Caakwiinda Ciibalusyo, inga twacita kabotu kulibuzya mibuzyo iitobela: ‘Ino mbuti mbondikonzya kumwiiya Jesu cakulomya mukutondezya luyando? Sena ndilabikkila maano kapati kuzintu nzyobayandika bakombima kwiinda nzyondiyandika mebo? Sena ndilangila zinji kuzwa kubakwesu abacizyi kwiinda nzyobakonzya kucita naa ndilikuzyi kulezya kwabo? Atumwiiye Jesu lyoonse alimwi ‘akweetelelana.’ Bubambe bwakucita Ciibalusyo calufwu lwa Kristo tabukazumanani kwaciindi cilamfwu. Jesu ‘aakuboola’ ciindi camapenzi mapati, uyoobunganya “basale” bakwe basyeede kuya kujulu, mpoonya Ciibalusyo ciyooleka kucitwa. (1Kor. 11:26; Mt. 24:31) Nociba ciindi twaakuleka kucita Ciibalusyo, tulakonzya kuba masimpe kuti bantu ba Jehova bacinoociyeeya kapati cakulya eeci citakatazyi kacili citondezyo cakulicesya kupati, busicamba alimwi aluyando lutanatondezyedwe amuntu uuli woonse. w19.01 25 ¶17-19

Amubone buumi bwesu bwakumubili mbobutondezya mbociyandika kapati kubikkila maano kujatikizya bwini mbotubede mukati. Cakusaanguna, kutegwa tuzumanane kwiibamba kabotu mibili yesu, tweelede kusala zyakulya izijisi busani bubotu alimwi akwiinyanyaasya lyoonse. Mbubwenya buyo, kutegwa tuzumanane kulibamba kabotu kumuuya, tweelede kusala zyakulya izijisi busani bubotu kumuuya alimwi akutondezya lyoonse kuti tulijisi lusyomo muli Jehova. Tulatondezya lusyomo lwesu muli Jehova kwiinda mukuzibelesya nzyotwiiya alimwi akwaambilizya lusyomo lwesu. (Rom. 10:8-10; Jak. 2:26) Cabili, kweelana ambotulibonya atala, tulakonzya kuyeeya kuti tuli kabotu nokuba kuti mubwini tuli balwazi mukati. Munzila iikozyenye, kweelana abubambe mbotujisi kumuuya, tulakonzya kuyeeya kuti lusyomo lwesu nduyumu, pele kakuli kulombozya kubyaabi kwakatalika kukomena mulindiswe. (1Kor. 10:12; Jak. 1:14, 15) Tutalubi kuti Saatani uyanda kutunyonganya amizeezo yakwe. w19.01 15 ¶4-5

Tulakonzya kulibuzya kuti: ‘Sena mebo ndilacita mbubwenya oobo? Sena ndilacita mbubwenya mbwaakacita mu Samariya siluse? (Lk. 10:30-35) ‘Sena inga ndayungizya kutondezya luse alimwi akucita milimo mibotu yalubomba kuli baabo bapengede? Mucikozyanyo, sena inga ndabagwasya Banakristoma bacembeede, bamukabafwu, alimwi abamucaala kumuuya? Sena inga ‘ndabaumbulizya aabo ibatyompedwe mumoyo’?’ (1Tes. 5:14; Jak. 1:27) Ciindi notubafwida luse bamwi, tulaba alukkomano iluboola akaambo kakupa. Kuyungizya waawo, tulizyi kuti tukkomanisya Jehova. (Mil. 20:35; Heb. 13:16) Kujatikizya muntu uubabikkila maano bantu bamwi, Mwami Davida wakati: “Jehova uyoomulinda akumubamba kuti kapona. Munyika uyakwaambwa kuti ulikkomene.” (Int. 41:1, 2) Ikuti katutondezya luse alimwi alubomba kuli bamwi, andiswe tuyoofwidwa luse alubomba kuli Jehova alimwi akuyookkomana kukabe kutamani.—Jak. 2:13. w18.09 19 ¶11-12

Mucizyi Munakristo uusyomeka wazina lya Yoshiko wakatambula makani aatakkomanisyi. Musilisi wakwe wakamwaambila kuti wakajisi buyo myezi misyoonto yakupona. Ino wakalimvwa buti? Ba Yoshiko bakayeeya kapango nkobakali kuyandisya kapati mu Bbaibbele, ikali mulugwalo lwabuzuba sunu. Kabaliibide bakaambila musilisi wabo kuti tiibakayoowede pe, nkaambo Jehova wakajatilide janza lyabo. Mulumbe uupa luumbulizyo uujanika mukapango aaka wakamugwasya mucizyi uuyandwa ooyu kusyoma Jehova cakumaninina. Kapango nkamunya aaka kalakonzya kutugwasya kukkalwa moyo ciindi notulwana masunko mapati. Kumatalikilo, Jehova wakaambila Isaya kulemba majwi aayo kutegwa abaumbulizye ba Juda aabo kumbele ibakali kuyootolwa mubuzike ku Babuloni. Nokuba boobo, Jehova wakauyobola mulumbe ooyo kutegwa utagwasyi buyo ba Juda ibakatolwa mubuzike pele alimwi abantu bakwe boonse kuzwa ciindi eeco. (Is. 40:8; Rom. 15:4) Mazuba aano, tupona ‘muziindi zikatazya ncobeni,’ alimwi kwiinda lyoonse, tuyandika kukulwaizyigwa ikujanika mubbuku lya Isaya.—2Tim. 3:1. w19.01 2 ¶1-2

Mubukkale oobu nokuba kuti banabukwetene baandaana, bacikwetene alimwi, boonse bobilo bacinoojana buyumuyumu. Mwaapostolo Paulo wakapa kaambo akambi ikeelede kupa banabukwetene kuzumanana kukkala antoomwe. Wakalemba kuti: “Mulumi uutasyomi ulasalazyigwa akaambo kamukaintu wakwe, awalo mukaintu uutasyomi ulasalazyigwa akaambo kamukwesu; nikwatali boobo bana banu nobasofweede, pele lino balasalala.” (1Kor. 7:14) Banakristo basyomeka banji bazumanana kukkala angobakwetene limwi uutasyomi nomuba mubukkale bukatazya. Balikkomene akaambo kakuti kwiinda mukucita boobo mukuya kwaciindi ngobakwetene limwi wakatalika kubelekela Jehova. (1Kor. 7:16; 1Pet. 3:1, 2) Munyika yoonse mazuba aano, kuli banabukwetene banji mumbungano ya Bunakristo ibazwidilila mulukwatano lwabo. Ambweni mulakonzya kubajana banji mumbungano momuzulilwa. Lukwatano lwabo lubambidwe abakwesu basyomeka balo ibabayanda bamakaintu babo ibalyaabide alimwi ibatondezya luyando mulukwatano, boonse balatondezya kuti lukwatano lweelede kulemekwa.—Heb. 13:4. w18.12 14 ¶18-19

Edeni waamba “Lukkomano,” alimwi muunda ooyo wakali mubotu ncobeni. Kwakali zyakulya zinji, busena bulibonya kabotu alimwi akukkala muluumuno abanyama banji. (Matl. 1:29-31) Pa·raʹdei·sos ndibbala lya Chigiliki ilyakasandululwa kubbala lya Chihebrayo lyakuti “muunda.” Bbuku lya Cyclopaedia ilyakalembwa a M’Clintock alimwi a Strong lyaamba kuti ciindi mu Giliki naamvwa bbala lyakuti Pa·raʹdei·sos, ulakonzya kweezyeezya paakki mpati iiyeebeka alimwi iikwabilidwe kucintu cili coonse icikonzya kucisa muntu, iijisi masamu mabotu aazyala micelo iindene-indene alimwi atulonga twamaanzi itujisi bwizu mumbali-mbali mwalo balweengu alimwi ambelele mozicelela. (Amweezyanisye a Matalikilo 2:15, 16) Leza wakabikka ba Adamu a Eva muparadaiso iili boobu, pele tiibakamumvwida Leza. Aboobo, balo alimwi abana babo bakasweekelwa Paradaiso. (Matl. 3:23, 24) Nokuba kuti kwakanyina muntu uli woonse, kulibonya kuti muunda ooyu wakaliko kusikila kuciindi ca Zambangulwe mumazuba a Nowa. w18.12 3-4 ¶3-5

Bazyali balayandisya kuyiisya bana babo milawo iili kabotu. Ikuti bana bazitobela nzyobabayiisya bazyali babo, balalangilwa kunoosala cabusongo. Aboobo, bayoocikonzya kweeleba mapenzi aakonzya kuboola akaambo kakutasala cabusongo. Mbubwenya mbuli muzyali mubotu, Jehova uyanda kuti bana bakwe kabajisi buumi bulaampindu. (Is. 48:18) Aboobo, ulapa njiisyo zijatikizya kulilemeka alimwi ambotweelede kubeendelezya bamwi. Ulatuyiisya kubona zintu mbuli mbwazibona walo alimwi akupona kweelana amalailile aakwe. Kucita boobo takuli kuciindizya, muciindi caboobo, kutugwasya kucita zintu munzila iiluzi. (Int. 92:5; Tus. 2:1-5; Is. 55:9) Eeci citugwasya kusala cabusongo calo icisololela kulukkomano alimwi akuzwidilila. (Int. 1:2, 3) Masimpe, kuyeeya mbwayeeya Jehova kulagwasya alimwi nkubotu! w18.11 19-20 ¶7-8

Kutegwa tuzumanane kweenda mukasimpe, tatweelede kuzumina kuyungwa abamwi. Notwakatalika kweenda mukasimpe, twakacileka kumvwana abalongwe alimwi abanamukwasyi batali Bakamboni. Bamwi bakazumina, pele bamwi bakatalika kutukazya. Banamukwasyi, babelesima alimwi abasicikoloma inga batulomba kuti tubasangane mukusekelela mapobwe. Ino inga twalizunda buti sunko lyakusekelela mapobwe aatamulemeki Jehova? Tulakonzya kucita oobo kwiinda mukuzyiba mbwayeeya Jehova kujatikizya micito iili boobu. Kwiinduluka kubala makani aatondezya mbwaakatalika mapobwe aadumide aalembedwe mumabbuku eesu cilakonzya kutugwasya. Ikuti twaliyeezya twaambo twamu Magwalo ncotutasekeleli mapobwe aali boobu, tulajana twaambo itutupa kusinizya kuti tweenda munzila ‘iitambulika ku Mwami.’ (Ef. 5:10) Kusyoma Jehova alimwi a Jwi lyakwe lyakasimpe kuyootukwabilila ‘kukuyoowa bantu.’—Tus. 29:25. w18.11 11 ¶10, 12

Ciindi zintu nozyacinca cakutayeeyelwa, cilakonzya kuuba-uba kulekela kulibilika kujatikizya zyakumbele kuti kututyompye mubuumi bwesu. Eeci nocakamucitikila Josefa ikuti naakalibilika kapati. Pele cilalibonya kuti wakasala kucita nzyaakali kukonzya mubukkale bwakwe, aboobo wakapa Jehova cintu cimwi ncaakali kukonzya kulongezya. Nokuba kuti wakali muntolongo, Josefa wakabeleka canguzu kubeleka kufwumbwa mulimo ngwaakapegwa amupati wantolongo, mbubonya mbwaakacita ciindi naakali kubelekela Potifara. (Matl. 39:21, 22) Mbubwenya mbuli Josefa, tulakonzya kulijana mubukkale motutajisi nguzu zili zyoonse zyakucinca zintu. Nokuba boobo, ikuti naa twazumanana kukkazika moyo alimwi akubeleka canguzu kweelana abukkale motubede, tuyoopa Jehova cintu cimwi ncakonzya kulongezya. (Int. 37:5) Masimpe, zimwi ziindi tulakonzya ‘kuzyingwa,’ pele kweelana ambwaakaamba mwaapostolo Paulo, kunyina notuya kulimvwa “kubula bulangizi.” (2Kor. 4:8; bupanduluzi buyungizyidwe) Majwi aa Paulo aaya ayooba aamasimpe kulindiswe, ikapati ikuti twabikkila maano kumulimo wesu wakukambauka. w18.10 29 ¶11, 13

Ino mulimvwa buti ciindi muntu umwi ngomuzyi alimwi ngomulemeka naaliluba zina lyanu, naa ambweni buya tanaamubikkila maano? Bukkale buli boobu bulakonzya kutyompya kapati. Nkaambo nzi? Cili boobu akaambo kakuti ncizyalwa buya kuyanda kuzyibwa. Bulemu mbotuyanda kupegwa kubantu bulaindilila akuzyibwa buyo; tulayanda kuzyibwa mpotweendela azintu nzyotwakacita mubuumi. (My. 11:16; Job. 31:6) Nokuba boobo, mbubwenya buyo mbuli kulombozya kumbi kunji, kulombozya kwesu kwakuyanda kulumbaizyigwa kulakonzya kwiindilila, kunyonganizyigwa akutalondoka kwesu. Kulakonzya kutupa kuyanda kulemekwa munzila iiteelede. Nyika ya Saatani ikulwaizya kuba ampuwo alimwi akulemekwa kwalo ikupa kuti twaalilwe kulemeka yooyo iweelede kulemekwa alimwi akukombwa, nkokuti Taateesu wakujulu, Jehova Leza.—Ciy. 4:11. w18.07 7 ¶1-2

Tatugambwi kuti Saatani amadaimona aakwe balakonzya kuyunga baalumi bali muzyuuno zipati zyabweendelezi ‘kwaamba zyakubeja.’ (1Tim. 4:1, 2) Basololi bazikombelo ibabeja balijisi mulandu mupati akaambo kakuti aabo ibazisyoma nzyobaamba buumi bwabo bwakumbele buba muntenda. Kuti naa muntu wazumina njiisyo zyakubeja akutalika kucita zintu nzyatakkomanini Leza, nkokuti ulakonzya kuyoosweekelwa buumi bwakwe butamani. (Hos. 4:9) Jesu wakalizyi kuti basololi bazikombelo ibakali kupona mumazuba aakwe bakali kubeena bantu. Wakabaambila mulomo mpande kuti: “Maawe kulindinywe nobalembi aba Farisi, nobasikuupaupa ameso! Nkaambo muleenda mulwizi aanyika kutegwa mucince muntu omwe, kumane aba umwi wanu, mumupa kweelela kunyonyoonwa mu Gehena [lunyonyooko lutamani] ziindi zyobilo kwiinda ndinywe.” (Mt. 23:15; bupanduluzi buyungizyidwe) Jesu wakabakalalila kapati basololi bazikombelo zyakubeja aaba. Masimpe bakali ‘kuzwa kuli usyi wabo Diabolosi, mujayi.’—Joh. 8:44. w18.10 7 ¶5-6

Ncinzi Jesu ncaakali kupandulula? Wakazumanana ulaamba: “Amukondwe akusekelela, mbwaanga bulumbu bwanu mbupati kujulu, nkaambo mbubonya oobo mbubakabapenzya basinsimi ibakamusaangunina.” (Mt. 5:12) Ciindi baapostolo nobakaumwa akulaililwa kuti bacileke kukambauka, “bakazwa kumbele lya Nkuta Mpati Yaba Juda, kabakkomene.” Takuli kuti cakabakkomanisya kukwibbaulwa pe. Pele bakakkomana “nkaambo bakajanwa kuti baleelela kusampaulwa akaambo kazina [lya Jesu].” (Mil. 5:41) Mazuba aano, abalo bantu ba Jehova balaliyumya calukkomano ciindi nobapenga akaambo kazina lya Jesu naa ciindi nobasikilwa masunko mapati. (Jak. 1:2-4) Mbubwenya mbuli baapostolo, kunyina naatukkomanisya mapenzi aali woonse. Pele ikuti naa twazumanana kusyomeka kuli Leza mumasunko aatucitikila, Jehova ulakonzya kutugwasya kuliyumya cakutazungaana. Ciindi notumweta-mweta akaambo kakukkomaninwa a “Leza uukkomene,” tulakonzya kukkomana nokuba kuti kuli kupenzyegwa akaambo kabukombi alimwi akukazyigwa aŋanda.—1Tim. 1:11. w18.09 21 ¶18-20

Akaambo kakuti bantu banji ‘muziindi eezyi zikatazya ncobeni’ balaciswa malwazi aamumizeezo aayindene-indene, banji balimvwa kuti buumi bunyina mpindu. (2Tim. 3:1-5) Kuyeeyelwa kuti bantu bainda ku 800,000 balafwa mwaka amwaka kwiinda mukulijaya, icaamba kuti mutuvwalu-vwalu tuli 40 kulafwa muntu omwe. Cuusisya ncakuti, nobaba Banakristo bamwi, baalilwa kuliyumya aboobo basala kulijaya. Nokuba kuti bakwesu abacizyi tabajisi mizeezo yakuyanda kuti bafwe, banji mazuba aano bali mubukkale bukatazya kapati alimwi bayandika kukulwaizyigwa caluyando. Bamwi balapenzyegwa alimwi akufwubaazyigwa. Bamwi balatongookwa naa kuvwiigwa kumulimo. Bamwi balakatala kapati akaambo kakubeleka mawoola manji naa milimo iiminya. Alimwi bamwi balwana mapenzi amuŋanda aamana nguzu, ambweni kutongookwa angobakwetene limwi uutasyomi. Akaambo kabukkale buli boobu alimwi azintu zimbi, bantu banji mumbungano balimvwa kutyompwa alimwi akupenga mumizeezo. w18.09 13 ¶3, 5

Bazyali Banakristo balabeleka antoomwe a Jehova ciindi nobabikkila bana babo mbaakani zyakumuuya. Banji ibakacita oobo kumamanino bakabona bana babo basankwa alimwi abasimbi kababeleka milimo yaciindi coonse kule akumaanda aabo. Bamwi mbaamisyinali; bamwi bacita bupainiya kubusena bubulide basikumwaya; mpoonya bamwi babelekela ku Beteli. Ambweni bakwesu abacizyi aaba tabavwuli kubonana abanamukwasyi akaambo kakuti babelekela mumasena aali kulamfwu. Nokuba boobo, bazyali ibalyaabide balabakulwaizya bana babo kuzumanana mumilimo yabo. Ino nkaambo nzi ncobacitila boobo? Balajana lukkomano lunji alimwi akukkutila akaambo kakuzyiba kuti bana babo babikka ziyandika zya Bwami mubusena bwakusaanguna. Ambweni bazyali banji aaba balimvwa mbuli mbwaakalimvwa Hana, walo iwakaamba kuti ‘wakapa’ mwanaakwe Samuele kuli Jehova. Kukamantana kuli boobo bazyali aaba bakubona kuti ncoolwe cipati. Inga tiibayanda kuti zintu zicince pe.—1Sam. 1:28. w18.08 24 ¶4

Jesu tanaakaamba kuti tacikonzyeki. Alimwi wakaamba kuti: “Mulikkomene nywebo nobacete, nkaambo Bwami bwa Leza mbubwanu.” (Lk. 6:20) Eeci tacaambi kuti boonse bacete bakamuswiilila Jesu alimwi akutambula zilongezyo. Bantu banji bacete tiibakamuswiilila pe. Kaambo kapati nkakuti, tatukonzyi kubeteka cilongwe camuntu a Jehova kweelana azintu zyakumubili nzyajisi. Tulijisi coolwe cipati akaambo kakuba abakwesu alimwi abacizyi banji, bavwubi alimwi abacete, balo ibamuyanda Jehova alimwi akumubelekela camoyo woonse. Magwalo alailila baabo bavwubide kuti, “bulangizi bwabo butabi mulubono lutasyomeki pe, pele muli Leza.” (1Tim. 6:17-19) Aciindi nciconya, Ijwi lya Leza lyaambila bantu ba Leza boonse, bavwubi alimwi abacete, kuti bacenjele akutaba bantu bayandisya mali. (1Tim. 6:9, 10) Inzya, ciindi notujalula meso eesu akubona bakwesu mbubwenya Jehova mbwababona, tatukasunkwi kubabeteka kweelana azintu zyakumubili nzyobajisi naa nzyobatajisi. w18.08 10-11 ¶11-12

Mubwini, tuliyandide kutondezya kulumba kwesu kuli Jehova akaambo kabulemu mbwatupede bwakuba bantu bakwe. Tulizyi kuti twakasala cabusongo kulyaaba kulinguwe. Tulabukaka bubi. Alimwi tulabayanda akubalemeka bakombima, nkaambo abalo mbantu ba Jehova. (Rom. 12:10) Bbaibbele lisyomezya kuti: “Jehova takabalekelezyi bantu bakwe.” (Int. 94:14) Cisyomezyo eeci cisinizyide cilabeleka nokuba kuti tulakonzya kucitikilwa penzi lili lyoonse. Noluba lufwu talukonzyi kusinkilila luyando ndwajisi Jehova kulindiswe. (Rom. 8:38, 39) “Kufwumbwa naa tulapona naa twafwa, tuli bantu ba Jehova.” (Rom. 14:8) Caluyandisisyo, tulangila kumbele kubuzuba Jehova nayoobusya balongwe bakwe boonse basyomeka ibakafwa. (Mt. 22:32) Noliba lino, tulijisi zilongezyo zinji. Kweelana ambolyaamba Bbaibbele, “cilikkomene cisi cijisi Jehova kuba Leza wancico, ibantu mbaasala kuba lukono lwakwe.”—Int. 33:12. w18.07 26 ¶18-19

Bantu bamwi balakonzya kulimvwa kuti mbwaanga kusala kumwi mubuumi mbuli makani aajatikizya lwiiyo naa mulimo, makani aakulisalila, beelede kuba alwaanguluko lwakusala cikonzya kubakkomanisya kufwumbwa buyo kuti manjezyeezya aabo kaabazumizya kucita oobo. Ambweni bajisi muzeezo uujanika mumajwi aa Paulo ngaakaambila Banakristo baku Korinto kujatikizya zyakulya aakuti: “Ino nkaambo nzi lwaanguluko lwangu ncolweelede kweendelezyegwa amanjezyeezya aamuntu umbi?” (1Kor. 10:29) Nokuba kuti masimpe kuti tulijisi lwaanguluko lwakulisalila mumakani aaya, tweelede kuyeeya kuti lwaanguluko lwesu kuli mpolugolela alimwi akuti kusala koonse nkotucita kulijisi zintu zibyaabi zikonzya kutobela. Akaambo kaceeci, Paulo mumajwi aakwe wakasaanguna kwaamba majwi aaya aali mulugwalo lwabuzuba bwasunu. Cakutadooneka eeci citugwasya kubona kuti kuli zintu ziyandika kapati nzyotweelede kubikkila maano kwiinda kulombozya kwesu caboola kukubelesya lwaanguluko lwesu mumbazu zyoonse zyabuumi bwesu. w18.04 10 ¶10

Munakristo mazuba aano ulakonzya kuti kacita zintu zibyaabi pele kumwi kalitaminina kukomba Jehova. (Jud. 11) Mucikozyanyo, umwi ulakonzya kutalika kuba amizeezo yakutalilemeka, mizeezo yabusyaacivwulemwangu, naa kubikkilila Banakristonyina. (1Joh. 2:15-17; 3:15) Mizeezo iili boobu ilakonzya kusololela kukucita zintu zibyaabi. Pele muntu ulakonzya kuti kwaciindi coonse eeci kali musungu mumulimo wamumuunda alimwi akujanika lyoonse kumiswaangano yambungano. Bantu bamwi balakonzya kuti kabatazyi nzyotuyeeya alimwi abukkale bwesu, pele walo Jehova ulabona zintu zyoonse alimwi ulazyiba ikuti naa katutali kulubazu lwakwe camoyo woonse. (Jer. 17:9, 10) Nokuba boobo, Jehova ulatukkazikila moyo. Ciindi muntu nacita zintu zimupa kutantamuka kuli Leza, Jehova ulamwaambila kuti: ‘Jokela kulindime.’ Kwaambisya ciindi notulwana akutalondoka kwesu, Jehova uyanda kuti katubutantamuka bubi. (Is. 55:7) Kuti twacita oobo, awalo uyooba kulubazu lwesu kwiinda mukutupa nguzu nzyotuyandika kumuuya, mumizeezo alimwi akumubili kutegwa ‘tukuzunde’ kutalondoka kwesu.—Matl. 4:7. w18.07 18 ¶5-6