May

Mumyaka misyoonto yainda, bazangalisi bavwula kapati muzisi zinji. Mbuti kuti mwaiya mbobaanzya mumwaambo ngobavwula kubelesya bapya ibaboola kubusena nkomukkala? Kuyungizya waawo, sena inga tiimwaiya mabala masyoonto aakonzya kubapa kuba aaluyandisisyo? Alimwi mulakonzya kubasololela a jw.org akubatondezya mavidiyo aaindene-indene alimwi amabbuku aaliko mumwaambo wabo. Caluyando, Jehova ulatupa Muswaangano wa Buumi Amulimo kutegwa tube bantu bacibwene kapati mumulimo wamumuunda. Malailile aagwasya ngotutambula kumuswaangano ooyu alatugwasya tobanji kuba basungu kucita nyendo zyakupilukila alimwi akusololela ziiyo zya Bbaibbele. Nobazyali, amubagwasye bana banu kuti kabamunika mumuni wabo kwiinda mukubayiisya kwiingula mumajwi aabo. Bwiinguzi bwabo buuba-uba alimwi ibuzwa ansi amoyo zimwi ziindi bukulwaizya bapya kuti bakabone kasimpe.—1Kor. 14:25. w18.06 22-23 ¶7-9

Cilayandika kapati kuyeeya kuti aciindi cimwi toonse twakali “beenzu,” naa bamuzwakule, ibatakajisi cilongwe a Leza. (Ef. 2:12) Pele Jehova wakatukwela kulinguwe “azyaanzyo zyaluyando.” (Hos. 11:4; Joh. 6:44) Kunze lyaboobo, Kristo wakatutambula. Wakatujalwida mulyango kutegwa tube cibeela camukwasyi wa Leza. Mbwaanga Jesu wakatutambula, nokuba kuti tatulondokede, inga tiicaba camaano kukaka muntu uuli woonse! Kwaandaana, kusalululana alimwi akusulaikana cakutadooneka zinooyaabwiindila munyika eeyi mbotuzumanana kuswena afwaafwi amamanino aabweende bubyaabi oobu. (Gal. 5:19-21; 2Tim. 3:13) Nokuba boobo, mbotuli babelesi ba Jehova, tulomba busongo kuzwa kujulu, ibutasalululi alimwi ibusumpula luumuno. (Jak. 3:17, 18) Tulakkomana kupanga zilongwe abantu bazwa kumasi aambi, kwiiya bukkale bwiindene-indene alimwi nokuba kwiiya myaambo yabamwi. Ciindi notucita boobo, luumuno lulakunka mbuli mulonga alimwi abululami mbuli mayuwe aamulwizi.—Is. 48:17, 18. w18.06 12 ¶18-19

Sikalumamba muna Roma iwatakali kusama mabbusu aakwe wakali kutondezya kuti talibambilide kuunka kunkondo. Mabbusu aaya akapangidwe azikutu izyakali muzibeela zyotatwe izyaangidwe antoomwe. Alimwi akali mayumu akupa kuti sikalumamba keenda kabotu. Mbwaanga mabbusu ngobakali kusama basikalumamba bana Roma akali kubagwasya kuzunda munkondo, mabbusu aacikozyanyo aasamwa a Banakristo alabagwasya kutola mulumbe waluumuno kubantu. (Is. 52:7; Rom. 10:15) Nokuba boobo, kuyandika busicamba kutegwa tucite oobo ciindi nokwajanika coolwe. Roberto, uujisi myaka yakuzyalwa iili 20, wakaamba kuti, “Ndakali kuyoowa kubakambaukila basicikoloma, ndiyeeya kuti ndakali kufwa nsoni. Ndalanga musyule, tandizyi naa ncinzi icakali kundipa kulimvwa boobo. Lino ndilakkomana kupa bumboni kuli basicikoloma.” Bakubusi banji babona kuti, ikuti naa balibambila kabotu kwaambilizya makani mabotu, balalikwaya kukambauka. w18.05 29 ¶9-11

Jesu wakaambila baapostolo bakwe kuti: “Ndamupa luumuno lwangu.” (Joh. 14:27) Mbuti cipego eeco, nkokuti luumuno lwakwe, mbolutugwasya kuzyala micelo? Notuliyumya, tulaba aluumuno lwamumoyo lutamani iluuboola akaambo kakuzyiba kuti tulazuminwa a Jehova alimwi a Jesu. (Int. 149:4; Rom. 5:3, 4; Kol. 3:15) Naakamana kwaamba mbwaakayandide kuti kukondwa nkobakajisi baapostolo “kuzulile,” Jesu wakabapandulwida mbociyandika kutondezya luyando lwakulyaaba. (Joh. 15:11-13) Mpoonya wakati: “Ndimwaamba kuti muli beenzuma.” Eelo kaka taciliboteli kapati cipego eeci, nkokuti cilongwe a Jesu! Ino ncinzi baapostolo ncobakeelede kucita kutegwa bazumanane kuba balongwe bakwe? Bakeelede ‘kuunka akuyoozumanana kuzyala micelo.’ (Joh. 15:14-16) Myaka yobilo musyule, Jesu wakalailide baapostolo bakwe kuti: “Nomuunka, kamuyaabukambauka kuti: ‘Bwami bwakujulu bwaswena afwaafwi.’” (Mt. 10:7) Aboobo busiku oobo bwamamanino Jesu katanafwa, wakabakulwaizya kuliyumya mumulimo ngobakatalika.—Mt. 24:13; Mk. 3:14. w18.05 20-21 ¶15-16

Nobakubusi, amuliyeeye kutegwa mubikkile maano kukubelekela Jehova mubuumi bwanu. Eeci caamba kubikkila maano kumbaakani zyakumuuya mubuumi bwanu. Bakubusi bamwi ibamusela wanu ambweni babikkila maano kukulikondelezya, alimwi kulangilwa kuti bayoomutamba kutegwa mubasangane. Kalitanalampa naa mukuya kwaciindi muyooyandika kubatondezya mbomukanzide kukakatila kukusala nkomwakacita. Tamweelede kunyonganizyigwa kwiinda mukuyungwa abeenzinyoko. Kuli nzila zinji zyakuzunda kuyungwa abeenzinyoko. Mucikozyanyo, amubutantamuke bukkale ibuzyibidwe kuti bulakonzya kumubikka musunko. (Tus. 22:3) Alimwi amuyeeye mbocicisa kucitikilwa zintu zibyaabi iziboola akaambo kakusangana bamwi mumicito mibi. Acimbi cikonzya kumugwasya nkuzumina kuti muyandika lulayo. Kulicesya kuyoomugwasya kutambula mizeezo kuzwa kubazyali banu alimwi abantu basimide kumuuya ibali mumbungano. (1Pet. 5:5, 6) Sena mulalicesya kutegwa mulutambule lulayo? w18.04 28-29 ¶14-16

Mumilumbe yakwe njaakatuma kumbungano zimwi ku Asia Minor, Jesu wakatondezya kulumba kumulimo basikumutobela bakwe ngobakali kucita. Mucikozyanyo, wakatalika mulumbe wakwe kumbungano yaku Tiyatira kwiinda mukwaamba kuti: “Ndiliizyi milimo yako, luyando lwako, lusyomo lwako, mulimo wako alimwi akuliyumya kwako, akuti milimo njocita lino ilainda aali yeeyo njookacita kusaanguna.” (Ciy. 2:19) Jesu tanaakaamba buyo milimo yabo iiyungizyidwe, pele alimwi wakabalumbaizya akaambo kabube oobo ibwakabakulwaizya kucita milimo yabo mibotu. Nokuba kuti Jesu wakali kuyandika kubapa lulayo bamwi mu Tiyatira, mulumbe wakwe wakautalika alimwi akuumanizya amajwi aakulumba. (Ciy. 2:27, 28) Amuyeeye buyo nguzu nzyajisi Jesu mbwali mutwe wambungano zyoonse. Tayandiki buya kutulumba akaambo kamulimo ngotumubelekela. Nokuba boobo, lyoonse ulatondezya kulumba. Eelo kaka eeci ncikozyanyo cibotu kubaalu! w19.02 16 ¶10

Kabunga keendelezya kamumwaanda wamyaka wakusaanguna kakali kuyumya-yumya kapati kuli baabo ibakali kusololela alimwi aku Banakristo boonse. Kakatuma bobilo kuzwa mukabunga, Petro alimwi a Johane, kutegwa bakapailile basyomi bapya kuti batambule muuya uusalala. (Mil. 8:5, 14-17) Eelo kaka kweelede kuti Filipo kumugama alimwi abaabo mbaakasandula bakayumizyigwa kapati kwiinda mukugwasyigwa akabunga keendelezya! Mazuba aano, Kabunga Keendelezya ka Bakamboni ba Jehova kalabayumya-yumya bamukwasyi wa Beteli, babelesi ibali mumulimo waalubazu waciindi coonse ibabelekela mumuunda alimwi akubunyina bwanyika yoonse bwa Banakristo bakasimpe. Alimwi mbubwenya mbuli mumwaanda wamyaka wakusaanguna, icacitika ncakuti, kuli kukondwa kujatikizya makani aayo aakukulwaizya ooko. Kuyungizya waawo, mu 2015 Kabunga Keendelezya kakamwaya broshuwa yakuti Amupilukile Kuli Jehova, yalo iyabakulwaizya kapati banji munyika yoonse. w18.04 19 ¶18-20

Bantu banji balakonzya kuyeeya kuti naa kabajisi lwaanguluko lunji, balakonzya kukkala kabotu, pele masimpe ngakuti kuba alwaanguluko lunji kapati cilikozyenye apanga libosya koonse-koonse. Pele, cilayoosya kweezyeezya nyika mboyali kunooba ikuti nokwanyina milawo. Akaambo kaceeci, bbuku litegwa The World Book Encyclopedia lyaamba kuti: “Milawo yacisi cili coonse ipa kuti ciyume kweelanya kabotu akati kalwaanguluko alimwi azikasyigwa.” Masimpe ibbala lyakuti “ciyume” ndebbala lyeelela. Amuciyeeyele buyo milawo minji iyakalembwa abantu, kutabikkilizya azyuulu-zyuulu zyabasimilawo ababetesi ibayandika kwaamba ncoyaamba alimwi akupa kuti kaitobelwa. Busolozi bwa Jesu bwakujana lwaanguluko lwini-lwini buyanda kutobela zintu zyobilo: Cakusaanguna, nkuzumina kasimpe nkaakayiisya alimwi cabili, nkuba sikwiiya wakwe. Kucita boobo kuyoosololela kukujana lwaanguluko lwini-lwini. Pele lwaanguluko kunzi? Jesu wakazumanana kupandulula kuti: “Kufwumbwa uucita cibi muzike wacibi. . . . Ikuti Mwana wamwaangununa, mulaangunuka ncobeni.”—Joh. 8: 34, 36. w18.04 6-7 ¶13-14

Tulakkomana kuba akati kabantu ibabikkila maano kujatikizya mbotulimvwa alimwi abukkale bwesu. Balasoleka kulibikka mubukkale bwesu, nkokuti kuzyiba nzyotuyeeya alimwi ambotulimvwa. Balazyiba nzyotuyandika alimwi akutugwasya katutanalomba lugwasyo. Tulabalumba kapati bantu ibatondezya ‘lweetelelo’ kulindiswe. Mbuli Banakristo, toonse tuyanda kutondezya lweetelelo, naa kubikkila maano. Pele mubwini, talili lyoonse nocili cuuba-uba kucita boobo. Nkaambo nzi? Kaambo kakusaanguna nkakuti tatulondokede. (Rom. 3:23) Ncizyalwa buya kubikkila maano kuzintu nzyotuyanda tobeni. Aboobo tweelede kubeleka canguzu kutegwa katubabikkila maano bamwi. Kabili nkakuti tobamwi cilakonzya kutukatazya kutondezya lweetelelo ambweni akaambo kambotwakakomezyegwa naa akaambo kazintu zyakatucitikila aciindi cimwi mubuumi. Kamamanino nkakuti, ambweni tulanyonganizyigwa abube bwabantu batuzingulukide. Mumazuba aano aamamanino, bantu banji tababikkili maano kujatikizya mbobalimvwa bamwi. Muciindi caboobo, ‘balaliyanda.’ (2Tim. 3:1, 2) Tulakonzya kuyaambele mukutondezya lweetelelo kwiinda mukwiiya Jehova Leza alimwi a Mwanaakwe, Jesu Kristo. w19.03 14 ¶1-3

Mulawo wamamanino mu Milawo Iili Kkumi ulakasya kunyonokela, naa kuba amizeezo mibyaabi kujatikizya zintu zyaumwi. (Dt. 5:21; Rom. 7:7) Jehova wakapa mulawo ooyu kutegwa ayiisye ciiyo iciyandika kapati, bantu bakwe beelede kuukwabilila moyo wabo, nkokuti mizeezo alimwi ambobalimvwa. Ulizyi kuti micito mibyaabi ilatalika kaili mizeezo mibyaabi alimwi ambwalimvwa muntu. Mucikozyanyo, Mwami Davida wakalubizya kapati. Mubwini, wakali mwaalumi uuli kabotu. Pele aciindi cimwi, wakanyomenena mukaintu wamuntu. Kucita boobu kwakasololela kucibi. (Jak. 1:14, 15) Davida wakacita bumambe, wakasola kumoongelezya mulumi, mpoonya wakapa kuti ajaigwe. (2Sam. 11:2-4; 12:7-11) Jehova taboni buyo bube bwamuntu bwaatala, pele ulabona bwini mbotubede mukati, nkokuti mumoyo wesu. (1Sam. 16:7) Ulabona nzyotuyeeya, mbotulimvwa alimwi azintu nzyotucita. Ulangaula bubotu mulindiswe alimwi akutukulwaizya kucita zibotu. Pele uyanda kuti katwiizyiba mizeezo mibyaabi alimwi akuyeendelezya kutegwa itatupi kucita cintu cibyaabi.—2Mak. 16:9; Mt. 5:27-30. w19.02 21 ¶9; 22 ¶11

Ibbaibbele lyaamba Musa kuti “wakali mubombe kapati kwiinda bantu boonse ibakali anyika.” (My. 12:3) Sena eeci caamba kuti wakali mukandu, simyoyo yobilo alimwi uuyoowa kukazyigwa? Oobo mbobakonzya kumupandulula muntu mubombe moyo bamwi. Pele kuyeeya kuli boobo takuluzi. Musa wakali muyumu, tanaakali simyoyo yobilo alimwi wakali mubelesi wa Leza sicamba. Kwiinda mukugwasyigwa a Leza, wakabandika amweendelezi singuzu wacisi ca Egepita, wakasololela bantu ambweni bali 3,000,000 munkanda alimwi wakagwasya cisi ca Israyeli kuzunda basinkondonyina. Tatujani buyumu-yumu mbuli mbwaakazunda Musa, pele buzuba abuzuba tujanika abantu naa bukkale ibupa kuti cikatazye kuba babombe moyo. Nokuba boobo, tulijisi cintu citukulwaizya kapati kuba abube oobu. Jehova usyomezya kuti “babombe myoyo bayookona nyika.” (Int. 37:11) Sena mulakonzya kwaamba kuti muli babombe moyo? Sena mbobakonzya kumwaamba oobo bamwi? w19.02 8 ¶1-2

Bantu bakapegwa manjezyeezya kuzwa ciindi nobakalengwa anyika. Nobakatyola mulawo wa Leza ba Adamu a Eva, bakayuba. Eeci citondezya kuti manjezyeezya aabo akabakatazya. Aabo batajisi manjezyeezya aayiisyidwe kabotu balakonzya kukozyanisyigwa kubwato ibujisi kkampasi iifwide. Kutalika lweendo kakunyina kubelesya kkampasi iili kabotu kulakonzya kuleta ntenda. Muwo alimwi amayuwe aamulwaanje zilakonzya kupa kuti bwato bugame kubusena bumbi. Kkampasi iili kabotu inga yamugwasya sikweenzya bwato kubona kuti bwato bweenda kabotu. Manjezyeezya eesu alakonzya kukozyanisyigwa kukkampasi iisololela mumakani aakulilemeka. Manjezyeezya mbuntu bwesu bwamukati ibutupa kuzyiba bubi naa bubotu calo icikonzya kutugwasya kusala ciluzi. Pele kutegwa manjezyeezya eesu kaabeleka kabotu, ayelede kuyiisyigwa kabotu. Ikuti manjezyeezya aamuntu kaatayiisyidwe kabotu, taakonzyi kumulesya kucita cintu cibyaabi. (1Tim. 4:1, 2) Mane buya manjezyeezya aali boobo alakonzya kutupa kubona “bubi kuti mbubotu.” w18.06 16 ¶1-3

Tweelede kwiizyiba alimwi akwiikaka mizeezo yanyika ciindi noiboola munzila yabucenjezu. Mucikozyanyo, makani aamwi alakonzya kwaambilizyigwa munzila iitondezya kuti basikulemba bali kulubazu lwambunga yabasitwaambo twacisi imwi. Makani aamwi asumpula makanze alimwi akuzuzikizya zintu nzyoiyanda nyika. Mafilimu aamwi alimwi amabbuku asumpula makani aakubeja aakuti “ndime ndeelede kusaanguna” alimwi akuti “mukwasyi wangu nguweelede kusaanguna,” akwaapa kulibonya mbuli kuti alayandika, ali kabotu, alimwi akuti aliluzi. Kuyeeya kuli boobu takweendelani ancaamba Magwalo kuti mikwasyi yesu naa swebo lwesu kutugama tuyookkomana lilikke buyo kuti katumuyanda Jehova kwiinda cintu cili coonse. (Mt. 22:36-39) Eeci tacaambi kuti cililubide kulikondelezya munzila iili kabotu. Nokuba boobo, inga twacita kabotu kulibuzya mibuzyo eeyi: ‘Sena tulazizyiba njiisyo zyamunyika eeyi nociba ciindi noziboola munzila yabucenjezu? Sena tulabakwabilila bana besu alimwi andiswe lwesu, kumapulogilamu aamwi naa kuzintu nzyotubala? Sena tulaindanya mizeezo yanyika njobamvwa naa kubona bana kweelana ambwazibona zintu Jehova?’ w18.11 22 ¶18-19

Jehova ulatondezya kuti ulaandiswe kwiinda mukutubikkila maano alimwi akutuyanda kapati. Amubone mbwatondezya luzyalo kapati kulindiswe. Jehova waamba kuti: “Wakali kuyandika kapati mumeso aangu, wakalemekwa, alimwi mebo ndakuyanda.” (Is. 43:4) Kunyina cintu cili coonse mububumbo icikonzya kupa Jehova kuti aleke kubayanda aabo ibamubelekela; lusyomo ndwajisi mulindiswe taluzungaani pe. (Is. 54:10) Jehova tasyomezyi kuti uyoogusya buyumuyumu ibupa kuti buumi bukatazye, pele kunyina nayoolekela kuti tubbile “mumilonga” yamapenzi naa kunyonyoodwa limwi amasunko ‘aamabangabanga aamulilo.’ Usyomezya kuti unooli andiswe, uyootugwasya “kwiinda” mubuyumuyumu boonse oobu. Ino ncinzi ncayoocita Jehova? Uyootugwasya kumana kulibilika kwesu kutegwa tukacikonzye kuzumanana kusyomeka kulinguwe, nokuba kuti caamba kufwa buya. (Is. 41:13; 43:2) Ciindi notucisyoma cisyomezyo ca Leza cakuti “Ndinooli anduwe,” tunootondezya busicamba alimwi akuyuma ciindi notulwana masunko. w19.01 3 ¶4-6

Ikuti naa muli mukubusi, kweelede kuti bamayi, basikupa lulayo, naa bamwi buyo bakamukulwaizya kuba alwiiyo lwaatala alimwi akujana mulimo uuvwolwa mali manji. Nokuba boobo, Jehova umupa lulayo lwiindene aloolo lwamunyika. Alimwi ulayanda kuti kamubikkila maano kucikolo kutegwa mwaakumanizya mukacikonzye kujana zintu nzyomuyandika kumubili. (Kol. 3:23) Pele ciindi nomusala nzyomuyanda kuyoocita mubuumi, ulamupa njiisyo zikonzya kumugwasya kupona munzila iiyoomukkomanisya mumazuba aano aamamanino. (Mt. 24:14) Kamuyeeya kuti Jehova ulizyi zintu zyoonse. Ulizyi iziyoocitika kumbele alimwi ulizyi kabotu-kabotu mbwaali afwaafwi mamanino aabweende bwazintu oobu. (Is. 46:10; Mt. 24:3, 36) Ulituzyi, alimwi ulizyi azintu zikonzya kutupa kukkomana akukkutila alimwi ulizyi azintu zikonzya kutupa kutyompwa akutakkomana. Aboobo nokuba kuti lulayo lwabantu inga kalulibonya mbuli kuti luli kabotu, pele kuti kalutazwi mu Jwi lya Leza, nkokuti taluli kabotu. w18.12 19 ¶1-2

“Babombe myoyo bayookona nyika, eelyo bayoobotelwa kapati muluumuno lunji.” Davida alimwi wakasololelwa amuuya kulemba kuti: “Balulami bayookona nyika, alimwi bayookkala alinjiyo lyoonse mane kukabe kutamani.” (Int. 37:11, 29; 2Sam. 23:2) Ino muyeeya kuti zisyomezyo eezyo zyakabajatikizya buti bantu ibakali kuyanda kucita kuyanda kwa Leza? Bakali kukonzya kuba abulangizi bwakuti, ikuti naa bantu balulami bakali kuyookkala anyika, nkokuti mukuya kwaciindi paradaiso iili mbuli muunda wa Edeni yakali kuyoobukulusyigwa. Mukuya kwaciindi, bunji bwabana Israyeli ibakali kulitaminina kuti babelekela Jehova bakamukaka walo alimwi abukombi busalala. Aboobo Leza wakazumizya bana Babuloni kulwana bantu bakwe, kunyonyoona nyika yabo alimwi bunji bwabo bakatolwa mubuzike. (2Mak. 36:15-21; Jer. 4:22-27) Nokuba boobo, basinsimi ba Leza bakasinsima kuti yaakwiinda myaka iili 70, bantu bakwe bakali kuyoopiluka kumunzi wabo. Businsimi oobo bwakazuzikizyigwa. Pele alimwi kuli ncobwaamba kulindiswe, nkokuti paradaiso yakumbele anyika. w18.12 4 ¶9-10

Bunji bwalulayo lwamunyika lulakazyanya ancaamba Magwalo. Pele sena lulayo lumwi lwamunyika lulagwasya? Jesu wakaamba kuti: “Busongo bulabonwa kuti buliluleme kwiinda mumilimo yambubo.” (Mt. 11:19) Nyika yayaambele muzyakupanga-panga; nokuba boobo, tiiyacikonzya kwaamana mapenzi mapati aapa kuti kakunyina lukkomano, mbuli nkondo, kusalana mubala, alimwi abugwebenga. Alimwi ino mbuti kujatikizya mboikubona kutalilemeka mumakani aakoonana? Bantu banji balazumina kuti kutalilemeka kuli boobu kwaleta kwaandaana mumikwasyi, malwazi, alimwi amapenzi aamwi. Mukwiimpana, Banakristo ibabona zintu mbuli mbwazibona Leza balijisi lukkomano mumikwasyi, buumi bubotu akaambo kakusalala mukulilemeka, alimwi aluumuno abasyominyina nyika yoonse mboizulwa. (Is. 2:4; Mil. 10:34, 35; 1Kor. 6:9-11) Sena eeci tacitondezyi kuti mizeezo ya Jehova ilisumpukide kwiinda yeeyo yamunyika? w18.11 20 ¶8-10

Nokuba kuti tulasolekesya kumvwana abanamukwasyi alimwi akubayanda, tweelede kubikkila maano kutegwa tutasotoki zyeelelo zya Leza mukuyanda kubakkomanisya. Mbotuyaabuzumanana kubayanda banamukwasyi, tuyooba acilongwe abaabo balikke ibamuyanda Jehova. Boonse ibeenda mukasimpe beelede kusalala. (Is. 35:8; 1Pet. 1:14-16) Notwakaiya kasimpe, toonse twakabambulula buumi bwesu kutegwa bweendelane azyeelelo ziluleme zyamu Bbaibbele. Bamwi kucinca nkobakacita kwakali kupati. Kufwumbwa mbocakabede, tatweelede kusambala bukkale bwesu busalala akaambo kabusofwaazi buli munyika eeyi. Ino inga twabutantamuka buti bukkale bwakutalilemeka? Amuyeeye muulo mupati Jehova ngwaakabbadela kutegwa tusalale, nkokuti bulowa bwa Mwanaakwe, Jesu Kristo. (1Pet. 1:18, 19) Kutegwa tuzumanane kusalala kumbele lya Jehova, lyoonse tweelede kubikkila maano kumuulo wacituuzyo cacinunuzyo ca Jesu mumizeezo amumoyo wesu. w18.11 11 ¶10-11

Babelesi baciindi coonse banji balakonzya kuzuminizya kuti kubikkila maano kumulimo wakukambauka kwakabagwasya kuzumanana kuzilanga munzila yeelede zintu noliba leelyo bukkale nobwakacinca. Kweelana ambozitondezya zikozyanyo zyabo, ikuti naa twacita kweelana abukkale bwesu alimwi akulindila Jehova cakukkazika moyo, tuyoozumanana kuba aluumuno lwamumizeezo. Ambweni buya tulakonzya kujana kuti twagwasyigwa kapati kumuuya kwiinda mukucinca kweelana abukkale bupya. Ikuti naa bukkale bwacinca, kufwumbwa naa eeci cijatikizya mikuli yesu yakumuuya, kuciswa-ciswa, mikuli mipya yamukwasyi, amusyome kuti Jehova ulamubikkila maano alimwi uyoomugwasya aciindi ceelede. (Heb. 4:16; 1Pet. 5:6, 7) Pele kwacecino ciindi, amucite kufwumbwa ncomukonzya kweelana abukkale bwanu. Amuyumye cilongwe canu a Uso wakujulu kwiinda mukupaila, alimwi amwiiye kulibikka mumaanza aakwe. Kwiinda mukucita boobu, andinywe muyoozumanana kuba aluumuno lwamumizeezo nociba ciindi bukkale nobwacinca. w18.10 30 ¶17; 31 ¶19, 22

Mu Bbaibbele muli zikozyanyo zinji zitondezya mbwababikkila maano Jehova babelesi bakwe. Mucikozyanyo, amubone Leza mbwaakamugwasya mulombe Samuele kutola mulumbe walubeta ku Mupaizi Mupati Eli kweelana ambokulembedwe kuli 1 Samuele 3:1-18. Mu Mulawo wa Jehova, bana bakali kulaililwa kuti kabalemeka bacembeede, ikapati silutwe. (Kul. 22:28; Lev. 19:32) Aboobo cilakatazya kweezyeezya kuti mulombe uucili muniini mbuli Samuele inga wabuka mafwumofwumo, kuunka kuli Eli akumwaambila cabusicamba mulumbe walubeta lwa Jehova uuyoosya. Ibbaibbele litwaambila kuti Samuele “wakaliyoowede kwaambila Eli kujatikizya cilengaano eeci.” Nokuba boobo, Leza wakacisalazya kuli Eli kuti wakali kwiita Samuele. Aboobo Eli wakaambila Samuele kuti aambe alimwi atasisi “noliba jwi lyomwe.” Cakulibombya Samuele “wakaamba zyoonse nzyaakaambilwa,” alimwi majwi aakwe akalikozyenye amulumbe wakaambidwe kale. (1Sam. 2:27-36) Cibalo eeci icijatikizya Samuele a Eli citutondezya mbwabikkila maano alimwi ambwali musongo Jehova. w18.09 23 ¶2; 24 ¶4-5

Kumwaya makani aakubeja kwavwula kapati mazuba aano. Kweelana acibalo cakuti “Why We Lie” (Icipa Kuti Katubeja) icakalembwa a Y. Bhattacharjee, “kubeja kwakasimpa miyanda mumyoyo yabantu.” Kanji-kanji bantu balabeja kutegwa balikwabilile, naa kuti basumpulwe. Balabeja kutegwa basinkilile kulubizya kwabo naa kuti bajane mali alimwi azintu zimwi buyo. Kweelana ambocaamba cibalo, kuli bantu babeja “kubantu mbobatazyi, babelesinyina, balongwe, alimwi akubayandwa babo.” Ino ncinzi cicitika akaambo kakubeja kuli boobu? Lusyomo lulamana alimwi zilongwe zilanyongana. Sintembauzyo wakapaila kuli Jehova kuti: Yebo ulakakkomanina kasimpe kali mumoyo wamuntu.” (Int. 51:6) Davida wakalizyi kuti kwaamba zyamasimpe kuzwa mukati, mumoyo wesu. Mubukkale buli boonse, Banakristo bakasimpe ‘baambilana zyamasimpe kuli umwi amweenzinyina.’—Zek. 8:16. w18.10 7 ¶4; 8 ¶9-10; 10 ¶19

Ciindi bana Israyeli nobakazwa mu Egepita mu 1513 B.C.E., beelede kuti bakali kwiinda ku 3 miliyoni. Akati kabo kwakali bana, bapati, alimwi ambweni bamwi bakali kuciswa naa bakali balema. Kusololela bantu banji boobo kuti bazwe mu Egepita kwakali kuyandika Musololi uumvwisya alimwi uubikkila maano. Jehova, kwiinda muli Musa, wakacita oobo. Aboobo bana Israyeli bakalimvwa kuti balikwabilidwe ciindi nobakasiya munzi ulikke ngobakazyi. (Int. 78:52) Mbuti Jehova mbwaakapa kuti bantu bakwe balimvwe kukwabililwa? Cakusaanguna, wakabagwasya kweenda “kabotu-kabotu kuzwa mucisi ca Egepita mbuli nkamu zyabasikalumamba.” (Kul. 13:18) Eeci cakapa bana Israyeli kusyoma kuti Leza ngowakali kubeendelezya. Cabili, kutegwa atondezye kuti wakali ambabo, wakabelesya “kkumbi isyikati” mpoonya “amumuni wamulilo” masiku. (Int. 78:14) Munzila imwi, Jehova wakali kwaamba kuti: “Mutayoowi pe. Ndiyoomusololela akumukwabilila.” w18.09 26 ¶11-12

Kaindi, babelesi ba Leza basyomeka bamwi bakalityompedwe kapati akaambo kabukkale bwabo cakuti tiibakacili kuyanda kuzumanana kupona. Mucikozyanyo, akaambo kakumvwa kucisa Jobu wakaamba kuti: “Buumi bwandicima; tandiyandi kuzumanana kupona.” (Job. 7:16) Jona wakatyompwa kapati kweelana azintu mbozyakacitika kujatikizya mulimo wakwe cakuti wakaamba kuti: “Aboobo lino, O Jehova, kondinyanga buyo buumi, nkaambo cilainda kubota kuti ndafwa buyo kwiinda kuti kandipona.” (Jon. 4:3) Kuyungizya waawo, aciindi cimwi musinsimi uusyomeka Elija wakatyompwa kapati akaambo kabukkale bwakwe cakuti wakalomba kuti afwe buyo. Wakaamba kuti: “Mbubo lino cabonwa! O Jehova, kondijaya buyo.” (1Bam. 19:4) Nokuba boobo, Jehova wakabakkomanina babelesi bakwe bakalyaabide aaba alimwi wakali kuyanda kuti bazumanane kupona. Muciindi cakubapa mulandu kujatikizya mbobakali kulimvwa, Jehova wakabagwasya kuzunda mizeezo njobakajisi yakuyanda kuti bafwe alimwi caluyando wakabayumya kutegwa bazumanane kumubelekela cakusyomeka. w18.09 13 ¶4

Basimilimonyina a Leza balizyibidwe kuti balasamausya. Mu Chigiriki, ibbala lyakuti “kusamausya” lyaamba “kuyandisisya, naa kutondezya luzyalo kubantu mbotutazyi.” (Heb. 13:2) Ijwi lya Leza lilijisi zikozyanyo izituyiisya mbotukonzya kuba bantu basamausya. (Matl. 18:1-5) Tulakonzya alimwi tweelede kujana ciindi cakugwasya bamwi lyoonse, tacikwe makani naa ‘mbaciinga cesu calusyomo’ naa pe. (Gal. 6:10) Sena mulakonzya kubeleka a Leza kwiinda mukusamausya babelesi baciindi coonse ibaswaya? (3Joh. 5, 8) Ziindi zili boobu zipa coolwe ‘cakuyumizyanya.’ (Rom. 1:11, 12) Ijwi lya Leza likulwaizya baalumi mumbungano kubeleka antoomwe a Jehova kwiinda mukusika azyeelelo zyamulimo akuba balangizi. (1Tim. 3:1, 8, 9; 1Pet. 5:2, 3) Aabo ibacita boobo bayanda kugwasya bamwi kumubili alimwi akumuuya. (Mil. 6:1-4) Alimwi aabo ibalanganya milimo iiyandika mumbungano bayoomwaambila kuti cilakkomanisya kapati kugwasya bamwi. w18.08 24 ¶6-7; 25 ¶10

Nokuba kuti Timoteyo wakalijisi nguzu zyakweendelezya bamanene bali boobu, wakeelede kubalanganya munzila yalubomba alimwi ayabulemu. Nokuba boobo, ino tweelede kugolela aali kutobela njiisyo eeyi? Mucikozyanyo, sena tweelede kumuleka buyo muntu ucembeede kuti kabisya acaali naa kucita zintu zitamukkomanisyi Jehova? Jehova takabeteki kweelana ambwalibonya muntu alimwi takalekeli muntu uubisya acaali akaambo buyo kakuti ulicembeede. Amubone njiisyo iijanika mulugwalo lwa Isaya 65:20: “Sizibi uyoosinganizyigwa, nokuba kuti ujisi myaka iili 100.” Njiisyo iikozyenye ilaambwa mucilengaano ca Ezekieli. (Ezk. 9:5-7) Aboobo, kaambo kapati nkotweelede kuyeeya lyoonse nkakutondezya bulemu kuli Sinsiku, Jehova Leza. (Dan. 7:9, 10, 13, 14) Ikuti twacita oobo, tatukayoowi kumululamika muntu uuyandika lulayo, tacikwe makani aciimo ncajisi.—Gal. 6:1. w18.08 11 ¶13-14

Mbotuli Banakristo bakasimpe, tweelede kuba abube bwakucikonzya kulanga-langa makani akuzyiba naa ngamasimpe. (Tus. 3:21-23; 8:4, 5) Ikuti katutacikonzyi kucita boobo, nkokuti tuyoonyonganizyigwa akusoleka kwa Saatani alimwi anyika yakwe nkwacita kutegwa anyonganye mizeezo yesu. (Ef. 5:6; Kol. 2:8) Bwini mbwakuti, kutegwa tuzyibe naa makani ngamasimpe, tweelede kujana twaambo twamasimpe. Mazuba aano, bantu balamvwa makani manji. Aa Intaneti, muma TV, alimwi amuli sikapepele mulaambwa makani manji. Alimwi bantu banji balatambula ma e-mail, mameseji, amalipooti kuzwa kubalongwe mbobasyoma alimwi akuli baabo mbobayanzana limwi. Mbwaanga kumwaya makani aakubeja alimwi akunyonganya makani aamasimpe kulidumide, tulijisi twaambo tubotu ncotweelede kucenjela alimwi akubikkila maano kulanga-langa zintu nzyotumvwa. w18.08 3 ¶1, 3

Nicakasika ciindi cakuti Mwana wa Leza azyalwe kali muntu, Jehova wakasala nakalindu uulicesya, Mariya, kuti abe banyina mwana ooyu uulibedelede. Mariya wakali kukkala mumunzi musyoonto wa Nazareta, uuli kulamfwu a Jerusalemu alimwi atempele lyanguwo lyeebeka. (Lk. 1:26-33) Mariya wakatondezya mbwaakasimide kumuuya ciindi naakaambaula abbululu wakwe Elizabeta. (Lk. 1:46-55) Inzya, Jehova wakalimubwene Mariya, alimwi wakamupa coolwe eeci ncaatakali kuyeeyela akaambo kakusyomeka kwakwe. Mpoonya ciindi Jesu naakazyalwa, Jehova kunyina naba omwe ngwaakalemeka akati kabeendelezi bakajisi mpuwo alimwi abeendelezi bamu Jerusalemu a Betelehemu kwiinda mukubazyibya cakacitika. Bangelo bakalibonya kubeembezi balicesya aabo ibakali musyokwe kabeembela mbelele. (Lk. 2:8-14) Kumane beembezi aaba bakaunka kuyoomubona mwana iwakazwide aakuzyalwa. (Lk. 2:15-17) Eelo kaka ceelede kuti cakabagambya ba Mariya alimwi a Josefa kubona Jesu mbwaakalemekwa munzila iili boobo! w18.07 9-10 ¶11-12

Nkaambo nzi bukali bwa Jehova ncobwakamusikila Solomoni? Bbaibbele lyaamba kuti: “Nkaambo moyo wakwe wakaleya kuzwa kuli Jehova . . . , ooyo iwakalibonya kulinguwe ziindi zyobilo, alimwi wakalimucenjezyede kujatikizya makani aaya, kuti teelede kutobela baleza bambi. Pele walo tanaakatobela ncaakamulailila Jehova.” Akaambo kaceeci, Leza tanaakacili kumukkomanina alimwi wakaleka kumugwasya. Basimulyazina ba Solomoni bakasweekelwa coolwe cakuba abwami bwa Israyeli bukamantene alimwi eeci cakaleta mapenzi manji kumazyalani aakali kutobela. (1Bam. 11:9-13) Mbubwenya mbocakacitika kuli Solomoni, intenda mpati iikonzya kunyonganya muntu kumuuya, nkupanga cilongwe abaabo ibatazizyi naa kuzilemeka zyeelelo zya Jehova. Ibamwi balakonzya kuti kabayanzana ambungano pele kabataciti kabotu kumuuya. Bamwi inga kabali babbululu besu, basimukoboma, babelesima, naa basicikoloma ibatali bakombi ba Jehova. Mubukkale buli boobu, ikuti balongwe besu kabatazilemeki zyeelelo zya Jehova, nkokuti balakonzya kunyonganya cilongwe cibotu ncotujisi a Leza. w18.07 19 ¶9-10

Saatani ubelesya mafilimu alimwi amapulogilamu aa TV kutegwa amwaye mizeezo yakwe. Ulizyi kuti twaano tuzuzikizya zintu zinji kunze buyo lyakutukondelezya; tutuyiisya mbotweelede kuyeeya, kulimvwa alimwi akucita zintu. Jesu wakaibelesya kabotu nzila eeyi yakuyiisya. Amulange cikozyanyo cakwe camu Samariya mubotu alimwi acamwana musankwa iwakazwa aŋanda akuyoolusowaila lubono. (Mt. 13:34; Lk. 10:29-37; 15:11-32) Nokuba boobo, aabo Saatani mbaakanyonganya amizeezo yakwe balakonzya kubelesya nzila yakwaana twaano kutegwa batunyonganye. Tweelede kuzilanga munzila yeelede zintu. Mafilimu amapulogilamu aa TV alakonzya kutukondelezya alimwi akutuyiisya kakunyina kunyonganya mizeezo yesu. Pele tweelede kucenjela. Ciindi notusala zyakulikondelezya, tweelede kulibuzya kuti, ‘Sena filimu eeyi naa pulogilamu yaa TV indiyiisya kuti cili buyo kabotu kutobela zisusi zyanyama?’ (Gal. 5:19-21; Ef. 2:1-3) Ino ncinzi ncomweelede kucita ikuti naa mwabona kuti pulogilamu imwi isumpula mizeezo ya Saatani? Amwiitantamuke mbubonya mbomukonzya kucita kujatikizya bulwazi buyambukila! w19.01 15-16 ¶6-7

Mbubwenya mbuli cimpoompo mbocikwabilila bongo bwabasikalumamba, ‘bulangizi bwesu bwalufwutuko’ bulaikwabilila mizeezo yesu. (1Tes. 5:8; Tus. 3:21) Mbuti Saatani mbwakonzya kutoongelezya kusamununa cimpoompo cesu? Amubone ncaakacita kuli Jesu. Cakutadooneka Saatani wakalizyi kuti Jesu wakajisi bulangizi bwakuyoolela bantu kumbele. Pele Jesu wakeelede kulindila kusikila ciindi ncaakabikkide Jehova. Alimwi kacitanasika ciindi eeco, Jesu wakeelede kupenga akufwa. Aboobo Saatani wakapa Jesu coolwe cakuti azuzikizye bulangizi bwakwe kacitanasika ciindi eeco. Saatani wakaamba kuti, ikuti naa Jesu wamukomba ciindi comwe buyo, wakali kuyoomupa bweendelezi mpoonya-mpoonya. (Lk. 4:5-7) Mbubwenya buyo, Saatani ulizyi kuti Jehova uyootupa zintu zyakumubili munyika mpya. Pele tweelede kulindila, alimwi notulindila tulakonzya kwiinda mumapenzi. Aboobo Saatani ulatupa zyoolwe kutegwa atusunke kuba azintu eezyo lino. Uyanda kuti tusaangune kuyandaula zintu zyakumubili, kuti tube azintu zyoonse nzyotuyanda lino. Saatani utukulwaizya kubikka Bwami mubusena bwabili.—Mt. 6:31-33. w18.05 30-31 ¶15-17

Masimpe, Jehova uyanda kuti nywebo mbomuli bakubusi mube amoyo uukkomene. Amuzumanane kubikkila maano kumbaakani zyakumuuya, akumubikkilizya Jehova mumakanze aanu oonse. Ikuti mwafwambaana kucita boobo kamucili baniini, muyoofwambaana kubona busolozi bwa Jehova, lukwabililo alimwi azilongezyo zyakwe. Amuyeeye buyo lulayo lugwasya loonse ndomujana mu Jwi lya Leza, alimwi amuluyobole mumoyo lulayo lwakuti: “Koyeeya Mulengi wako Mupati mumazuba aabukubusi bwako.” (Muk. 12:1) Bakubusi mumbungano beelede kulumbaizyigwa kapati akaambo kambobakanzide kubikkila maano mubuumi bwabo kukubelekela Jehova. Bakubusi balacita oobu kwiinda mukuzuzikizya mbaakani zyakumuuya alimwi akubikka mulimo wakukambauka mubusena bwakusaanguna. Kuyungizya waawo, balikanzide mumoyo kutanyonganizyigwa anyika eeyi. Bakubusi balakonzya kuba masimpe kuti mulimo wabo ngobabeleka canguzu tauli wabuyo pe. Bakwesu abacizyi balakonzya kubagwasya alimwi ikuti balyaaba kuli Jehova, makanze aabo mubuumi ayoozwidilila. w18.04 29 ¶17, 19