June

Eelo kaka kweelede kuti cakabayumya-yumya kapati cisyomezyo eeci baapostolo! Nokuba kuti tiibakamvwisya kuti Musololi wabo wakali afwaafwi kufwa, pele tiibakali kuyoocaala kabanyina sikubagwasyilizya. Jehova wakalilibambilide kuyiingula mipailo yabo yakulomba lugwasyo kufwumbwa ndobakali kuyandika kutegwa batobele mulawo wakukambauka mulumbe wa Bwami. Aboobo kalitanalampa, bakalibonena Jehova mbwaakayiingula mipailo yabo. (Mil. 4:29, 31) Oobo mbocibede amazuba aano. Ciindi notuliyumya mukuzyala micelo, tulakkomana acilongwe ncotujisi a Jesu. Kuyungizya waawo, tulakonzya kuba masimpe kuti Jehova ulilibambilide kwiingula mipailo yesu notumulomba kuti atugwasye kutegwa tuzunde buyumu-yumu mbotukonzya kujana ciindi notukambauka makani mabotu aa Bwami. (Flp. 4:13) Eelo kaka tulalumba kapati akaambo kacipego eeci cakwiingulwa mipailo alimwi acilongwe ncotujisi a Jesu! Zipego eezyi izizwa kuli Jehova zilatuyumya-yumya kuzumanana kuzyala micelo.—Jak. 1:17. w18.05 21 ¶17-18

Mumyaka buyo yosanwe, Banakristo ba Juda ibakali kukkala mu Jerusalemu bakali kuyoobubona “buzuba bwa Jehova” kabusika alimwi akucibona citondezyo Jesu ncaakabapede kutegwa batije mumunzi ooyo akufwutula maumi aabo. (Mil. 2:19, 20; Lk. 21:20-22) Buzuba bwa Jehova oobo bwakasika mu 70 C.E. ciindi bana Roma nobakaleta lubeta lwa Jehova kumunzi wa Jerusalemu. Mazuba aano, tulijisi twaambo tunji itutupa kusyoma kuti ‘buzuba bupati alimwi ibuyoosya kapati’ bwa Jehova bulaafwaafwi. (Joel. 2:11) Musinsimi Zefaniya wakalemba kuti: “Buzuba bupati bwa Jehova buli afwaafwi! Buli afwaafwi alimwi bulaboola cakufwambaana kapati!” (Zef. 1:14) Majwi aakucenjezya aabusinsimi oobu alabeleka amumazuba eesu aano. Kweelana ambobwaswena buzuba bwa Jehova, Paulo utwaambila kuti “katuyeeyana ikutegwa tukulwaizyanye kutondezya luyando akucita milimo mibotu.” (Heb. 10:24, bupanduluzi buyungizyidwe) Aboobo, tweelede kubabikkila maano kapati bakwesu, kutegwa tucikonzye kubakulwaizya ikuti kaciyandika kucita boobo. w18.04 20 ¶1-2

Eelo kaka Jehova wakamulwaizya akumuumbulizya Joshua katananjizya bantu bakwe Munyika Yakasyomezyegwa! Jehova tanaakali kuyumya-yumya buyo muntu omwe kumugama, pele alimwi wakali kwaamba majwi aayumya-yumya kubantu bakwe kabali nkamu. Mumajwi aabusinsimi oobu aakali kukonzya kuumbulizya ba Juda ibakali mubuzike mu Babuloni, Jehova wakaamba kuti: “Utayoowi pe, nkaambo ndilaanduwe. Utalibiliki pe, nkaambo ndime Leza wako. Ndilakuyumya, inzya ndilakugwasya, ncobeni ndinookujatilide ajanza lyangu lyalulyo lyabululami.” (Is. 41:10) Banakristo bakusaanguna bakajisi cisyomezyo ncemunya, alimwi abalo bantu ba Leza mazuba aano ncecisyomezyo ncobajisi. (2Kor. 1:3, 4) Jesu lwakwe mwini wakayumizyigwa kuli Bausyi. Naakali kubbapatizyigwa, Jesu wakamvwa jwi kuzwa kujulu kaliti: “Ooyu Mwanaangu ngweyandisya, ngwekkomanina.” (Mt. 3:17) Eelo kaka kweelede kuti majwi aayo akamuyumya-yumya Jesu mumulimo wakwe woonse waanyika! w18.04 16 ¶3-5

Ciindi nobabala mulawo wa Jehova ngwaakapa Adamu, bantu banji inga baamba kuti Adamu tanaakapegwa lwaanguluko lwakucita ncaakali kuyanda. Kwiinda mukwaamba boobo, banyonganya nguzu zyakubelesya lwaanguluko lwakulisalila anguzu zyakusala ciluzi alimwi acitaluzi. Ba Adamu a Eva bakalijisi lwaanguluko lwakusala kumvwida Leza naa pe. Nokuba boobo, alikke Jehova nguujisi nguzu zyakusala cakumaninina cintu cibotu alimwi acitali kabotu, kweelana acakali kwiimininwa “acisamu cakuzyiba bubotu abubi” mumuunda wa Edeni. (Matl. 2:9) Kwiinda mumulawo wakwe, Jehova caluyando wakayiisya ba Adamu a Eva mbobakonzya kulubelesya kabotu lwaanguluko lwini-lwini. Pele bazyali besu bakusaanguna bakasala kutamvwida. Sena kusala kwaba Adamu a Eva kwakapa kuti lwaanguluko lwabo lwiindilile munzila iili yoonse? Cuusisya ncakuti, tiicakaba boobo pe. Akaambo kakuyanda kulisalila zyakucita, bakasweekelwa lwaanguluko lwini-lwini ndobakapedwe. w18.04 5-6 ¶9-12

Jehova tagoleli buyo aakubafwida luzyalo babelesi bakwe ibali mumapenzi. Ulabweza ntaamu kutegwa abagwasye. Mucikozyanyo, ciindi bana Israyeli nobakali kupenga kabali bazike mu Egepita, Jehova wakakumvwa kupenga kwabo alimwi wakabagwasya. Jehova wakaambila Musa kuti: “Masimpe ndaabona mapenzi aabantu bangu . . . , alimwi ndakumvwa kulila kwabo . . . Ndilaazyi kabotu mapenzi aabo. Ndilaseluka kuyoobavwuna kumaanza aabana Egepita.” (Kul. 3:7, 8) Akaambo kakuti Jehova wakabafwida luzyalo bantu bakwe, wakabaangununa kuzwa mubuzike. Nokwakainda myaanda yamyaka, mu Nyika Yakasyomezyedwe, bana Israyeli bakalwanwa abasinkondonyina. Ino Jehova wakacita buti? “Wakali kubafwida luse akaambo kakutongela kwabo ikwakaletwa abaabo ibakali kubapenzya akubadyaaminina.” Mbubwenya buyo, lweetelelo lwakapa kuti Jehova abagwasye bantu bakwe. Wakatuma babetesi kuvwuna bana Israyeli kuli basinkondonyina.—Bab. 2:16, 18. w19.03 15 ¶4-5

Milawo yobilo yakusaanguna mu Milawo Iili Kkumi yakali kwaamba kuti bana Israyeli bakeelede kukomba buyo Jehova alikke alimwi yakacenjezya kujatikizya kukomba mituni. (Kul. 20:3-6) Milawo eeyo tiiyakali kugwasya Jehova. Muciindi caboobo, yakali kugwasya bantu bakwe. Ciindi nobakali kukomba mituni yazisi zimbi, bakali kupenga. Mukwiimpana, Jehova wakali kubalongezya bantu bakwe ciindi nobakali kusyomeka kulinguwe alimwi akweendelezyanya cabululami. (1Bam. 10:4-9) Jehova teelede kupegwa mulandu ciindi aabo ibalitaminina kukomba nguwe nobapenzya bantu bakwe akaambo kakutatobela zyeelelo zyakwe. Nokuba boobo, Jehova ulatuyanda alimwi ulazyiba ciindi notupenga akaambo kakucitilwa cakutalulama. Cilamucisa kapati kwiinda mbocimucisa mutumbu ciindi mwanaakwe napenga. Nokuba kuti takonzyi kubweza ntaamu mpoonya-mpoonya, mukuya kwaciindi uyoobabeteka basizibi ibateempwi akaambo kazintu nzyobali kucitila bamwi. w19.02 22 ¶13-15

Insondo zisyoonto kacitanacitika Ciibalusyo, miswaangano yesu kanji-kanji ibikkila kapati maano kucikozyanyo ca Jesu alimwi akulicesya nkwaakatondezya mukwaaba buumi bwakwe kacili cinunuzyo. Tulakulwaizyigwa kwiiya bube bwakwe bwakulicesya alimwi akucita kuyanda kwa Jehova, nociba ciindi nocitukatazya kucita boobo. Tuyeeya buyo busicamba mbwaakatondezya kalaafwaafwi kufwa. Wakalizyi kabotu-kabotu kuti kakutanainda ciindi cilamfwu basinkondonyina bakali kuyoomusampaula, kumukwibbaula alimwi akumujaya. (Mt. 20:17-19) Nomuba mubukkale buli boobu, wakalilyaabide kufwa. Nocakasika ciindi, wakaambila baapostolo bakwe basyomeka aabo mbaakali limwi ku Getesemane kuti: “Amunyamuke, atweende. Amubone! Sikundaaba wasika afwaafwi.” (Mt. 26:36, 46) Ciindi nkamu yabantu ibakanyamwide zilwanyo nobakasika kutegwa bamwaange, wakabacinga, akuliyubununa, mpoonya wakaambila basikalumamba kuti babaleke baapostolo bakwe. (Joh. 18:3-8) Eelo kaka Jesu wakatondezya busicamba bulibedelede! Mazuba aano, Banakristo bananike alimwi abambelele zimbi balasolekesya kwiiya Jesu mukutondezya busicamba. w19.01 27-28 ¶7-8

Mbubwenya mbuli sikuzekaula mbwasanganya mibala mibotu iindene-indene kutegwa azekaule cintu cimwi, tweelede kusanganya bube bubotu bwiindene-indene kutegwa tube bantu babombe moyo. Bumwi akati kabube oobo, nkulicesya, kulibombya alimwi abusicamba. Balikke bantu ibalicesya mbambabo ibalibombya kukucita kuyanda kwa Leza. (Mt. 5:5; Gal. 5:23) Ciindi notucita kuyanda kwa Leza, cilamunyemya kapati Saatani. Aboobo nokuba kuti tulalicesya alimwi tuli babombe, bantu banji ibali kucibeela canyika ya Saatani balatusulaika. (Joh. 15:18, 19) Akaambo kaceeci, tuyandika busicamba kutegwa tumukazye Saatani. Muntu uutali mubombe moyo muntu uulisumpula, ulanyema kapati alimwi tamumvwidi Jehova. Oobo mbombubo mbwabede Saatani. Nkakaambo kaako ulabasulaika bantu babombe moyo. Balabuyubununa bube bubyaabi mbwajisi. Alimwi buya kwiinda zyoonse, balatondezya kuti Saatani mubeji. Nkaambo nzi? Akaambo kakuti tacikwe makani ancakonzya kwaamba naa kucita, takonzyi kulesya bantu babombe moyo kubelekela Jehova!—Job. 2:3-5. w19.02 8-9 ¶3-5

Jehova wakalizyi kuti bantu ibakali kukkala mu Babuloni bakali kuyooyoowa. Babuloni wakali kuyoolwanwa abasikalumamba basinguzu bana Mediya a Persia. Jehova wakali kuyoobelesya basikalumamba aaba kwaangununa bantu bakwe kuzwa mubuzike ku Babuloni. (Is. 41:2-4) Ciindi bana Babuloni alimwi abantu bamuzisi zimwi nobakazyiba kuti basinkondonyina bakali aafwaafwi, bakasola kuzumanana kutondezya busicamba kwiinda mukwaambila umwi amweenzinyina kuti: “Koyuma.” Alimwi bakapanga baleza banji, kabayeeya kuti bayoobagwasya. (Is. 41:5-7) Nozyakali kucitika zintu eezyi, Jehova wakakkazika myoyo yaba Juda ibakali mubuzike kwiinda mukubaambila kuti: “Yebo O Israyeli, [mukwiimpana abeenzinyoko] uli mubelesi wangu . . . Utalibiliki pe, nkaambo ndime Leza wako.” (Is. 41:8-10) Amubone kuti Jehova wakaamba kuti: “Ndime Leza wako.” Kwiinda mukwaamba majwi aaya Jehova wakasyomezya bakombi bakwe basyomeka kuti tanaakabalubide pe, alimwi akuti bakacili bantu bakwe. Wakabaambila kuti: “Ndilamuyumuna akumuvwuna.” Majwi aawumbulizya aaya cakutadooneka akabayumya ba Juda ibakali mubuzike.—Is. 46:3, 4. w19.01 4 ¶8

Lugwalo lwa Marko 1:9-11 lwaamba ciindi cakusaanguna akati kaziindi zyotatwe Jehova naakaambaula kuzwa kujulu. Jehova wakaamba kuti: “Yebo uli Mwanaangu ngweyandisya, ngwekkomanina.” Kweelede kuti Jesu wakakulwaizyigwa kapati ciindi naakamvwa jwi lya Bausyi kalitondezya luyando alimwi alusyomo mulinguwe! Majwi aa Jehova akatondezya twaambo tuyandika kapati totatwe kujatikizya Jesu. Kakusaanguna, Jesu Mwanaakwe. Kabili, Jehova ulamuyanda Mwanaakwe. Katatu, Jehova ulamukkomanina Mwanaakwe. Kwiinda mumajwi aakuti: “Yebo uli Mwanaangu,” Jehova wakatondezya kuti Mwanaakwe ngwayandisya, Jesu, wakanjila mucilongwe cipya anguwe. Ciindi Jesu naakali kujulu, wakali kale Mwana wa Leza. Nokuba boobo, naakabbapatizyigwa wakaba Mwana wa Leza munzila mpya. Wakananikwa amuuya uusalala akuba abulangizi bwakujokela kujulu kuyakuba Mwami alimwi a Mupaizi Mupati uusalidwe a Leza. (Lk. 1:31-33; Heb. 1:8, 9; 2:17) Aboobo naakabbapatizyigwa Jesu, Bausyi bakalijisi kaambo kabotu ikakabapa kwaamba kuti: “Yebo uli Mwanaangu.”—Lk. 3:22. w19.03 8 ¶3-4

Lulayo lutali kabotu lwakatalika kaindi. Saatani ngowakasaanguna kupa bantu lulayo lutali kabotu. Wakaambila Eva kuti walo alimwi a Adamu bakali kuyookkomana kapati ikuti kabalisalila nzyobayanda kucita mubuumi. (Matl. 3:1-6) Makanze aa Saatani akali mabi. Wakali kuyanda kuti ba Adamu a Eva alimwi abana mbobakali kuyoozyala, kabamumvwida alimwi akukomba nguwe muciindi cakukomba Jehova. Pele Jehova ngowakabapede zintu zyoonse nzyobakajisi, nkokuti kubaswaanganya antoomwe, kubapa muunda mubotu kauli munzi wabo alimwi amibili yabo iilondokede iyakali kunoopona mane kukabe kutamani. Cuusisya ncakuti, ba Adamu a Eva tiibakamumvwida Leza, bakalizandula kulinguwe. Cakatobela, kweelana ambomuzyi, mapenzi. Mbubwenya mbuli maluba aatyolwa kucisamu, asyoonto-syoonto alatalika kuneta alimwi akuyuma. Bana babo abalo bakatalika kupenga akaambo kacibi. (Rom. 5:12) Nokuba boobo, bantu banji basala kutamumvwida Leza. Bayanda kuti kabapona buumi mbobayanda. (Ef. 2:1-3) Akaambo kaceeci, zicitika zilatondezya mbwaali aamasimpe majwi aali mulugwalo lwabuzuba bwasunu. w18.12 20 ¶3-4

Mwaapostolo Paulo wakali mwaalumi musongo, iwakayiide kapati alimwi iwakazyi mwaambo wa Chihebrayo alimwi a Chigiriki. (Mil. 5:34; 21:37, 39; 22:2, 3) Nokuba boobo, kujatikizya makani aanjiisyo, wakabukaka busongo bwamunyika. Muciindi caboobo, wakali kucita zintu kweelana ancaamba Magwalo. (Mil. 17:2; 1Kor. 2:6, 7) Akaambo kaceeci, Paulo wakazwidilila mumulimo alimwi akulangila bulumbu ibwatakali kukonzya kumana. (2Tim. 4:8) Cakutadooneka, mizeezo ya Leza ilisumpukide kwiinda yeeyo yanyika. Kupona kweelana azyeelelo zyakwe kuyootupa kukkomana kapati alimwi akuzwidilila. Pele Jehova kunyina natusinikizya kuba amizeezo mbuli yakwe. “Muzike uusyomeka alimwi uucenjede” kunyina nayendelezya mizeezo yamuntu umwi aumwi, abalo baalu tabaciti oobo pe. (Mt. 24:45; 2Kor. 1:24) Muciindi caboobo, Munakristo umwi aumwi mukuli wakwe kuba amizeezo iili mbuli ya Leza. w18.11 20-21 ¶12-13

Leza wakasinsima kwiinda muli Isaya kuti, bantu bakwe baakujoka kunyika yabo, tiibakali kuyoolwana azintu zibyaabi; alimwi kunyina nobakali kuyakuyoowa kulwanwa abanyama naa bantu ibali mbuli banyama. Bana abapati bakali kuyookwabililwa. (Is. 11:6-9; 35:5-10; 51:3) Alimwi businsimi oobu kwiinda muli Isaya bwakaamba kuti nyika yoonse, kutali buyo cisi ca Israyeli, yakali ‘kuyoozula luzyibo lwa Jehova mbubonya maanzi mbwaazuzya lwizi.’ Isaya wakayungizya kukankaizya kuti aabo ibakali kuyoopiluka tiibakali kuyookongwa abanyama naa bantu. Nyika yabo yakali kuyoozyala micelo minji, nkaambo kwakali kuyooba maanzi manji, mbubwenya buyo mbuli muunda wa Edeni mbowakajisi maanzi manji. (Matl. 2:10-14; Jer. 31:12) Sena nkokwakali kuyooba kuzuzikizyigwa kulikke ooku? Kwiina bumboni butondezya kuti aabo ibakali kuyoopiluka kuzwa mubuzike bakali kuyooponesyegwa camaleele. Mucikozyanyo, boofwu kunyina nobakatalika kubona alimwi. Aboobo Leza wakali kutondezya kuti kuponesyegwa kwini-kwini kwakali kuyooba kumbele. w18.12 5 ¶11-12

Kweenda mukasimpe takugoli, tunakweenda munzila eeyi mane kukabe kutamani. Ino inga twaayumya buti makanze eesu aakuzumanana kweenda mukasimpe? Amuzumanane kwiiya kasimpe kali mu Jwi lya Leza akuzinzibala kuyeeya. Inzya, amuule kasimpe kwiinda mukubikka ciindi cakubala twaambo twamasimpe tuyandika ituli mu Jwi lya Leza. Kucita oobo kuyoomugwasya kukakkomanina kasimpe akuyumya makanze aanu aakutakasambala. Kunze aakuula kasimpe, lugwalo lwa Tusimpi 23:23 lwaamba kuti tweelede kuula “busongo, lulayo alimwi amaano.” Kuba buyo aluzyibo takuzulide pe. Tweelede kucita zintu kweelana akasimpe. Maano ayootugwasya kubona mbwaayendelana majwi aa Jehova oonse. Busongo bupa kuti tuzibelesye nzyotuzyi. Zimwi ziindi kasimpe kalatulaya kwiinda mukututondezya mpotweelede kubambulula mubuumi bwesu. Lyoonse atubutobele busolozi oobu. Muulo wakucita boobo mupati kapati kwiinda nsiliva.—Tus. 8:10. w18.11 9 ¶3; 11 ¶13-14

Ino ncintu nzi ciyandika kapati ncomujisi? Sena inga mwayanda kucicincanya acintu cimwi citayandiki kapati? Kubakombi ba Jehova balyaabide, bwiinguzi kumibuzyo eeyi tabukatazyi. Cintu ciyandika kapati ncotujisi, ncilongwe cesu a Jehova, alimwi kunyina notunga twayanda kucicincanya acintu cili coonse. Kuyungizya waawo, tulakayandisya kasimpe kamu Bbaibbele, kalo ikapa kuti cilongwe cesu a Taateesu wakujulu cikonzyeke. (Kol. 1:9, 10) Amuyeeyele buyo zintu zyoonse Mwiiyi wesu Mupati nzyatuyiisya mu Jwi lyakwe, Bbaibbele! Ulatuyubunwida kasimpe kajatikizya zina lyakwe liyandika kapati alimwi abube bwakwe bubotu. Ulatwaambila kujatikizya bubambe butaliboteli bwacinunuzyo, calo ncaakatupa caluyando kwiinda mu Mwanaakwe, Jesu. Alimwi Jehova ulatwaambila kujatikizya Bwami Bwabu Mesiya alimwi bulangizi bwakupona anyika mu Paradaiso. Ulatuyiisya mbotweelede kulilemeka. Tulaziyanda zintu eezyi nzyotwiiya nkaambo zitupa kuswena ku Mulengi wesu. Zipa kuti buumi bwesu bube ampindu. w18.11 3 ¶1-2

Bantu ibajisi lweeno tabakonzyi kusisa cintu cili coonse kuli Jehova, nkaambo “zintu zyoonse zili atuba alimwi zilivwumbwidwe kumeso” aakwe. (Heb. 4:13) Mucikozyanyo, Hananiya a Safira bakakanza mumyoyo yabo kutegwa bacenge baapostolo. Bakasambala lubono pele bakasisa mali aamwi akuleta buyo aamwi kubaapostolo. Banabukwetene aaba bakali kuyanda kulitondezya kumumbungano kuti bali kabotu alimwi akuyanda kubonwa kuti mbaabi kapati kwiinda mucakusanga cabo ikutali bwini mbobakabede. Pele Jehova wakabona ncobakacita, alimwi wakabasubula bweelede. (Mil. 5:1-10) Ino Jehova ulimvwa buti kujatikizya kubeja? Saatani alimwi abaabo boonse ibateempwi, babeji babyaabi kapati ibamwiiya balindila kuwaalwa “muzyiba lyamulilo.” (Ciy. 20:10; 21:8; Int. 5:6) Tulizyi kuti Jehova “tali muntu-muntu buyo iwaamba zyakubeja.” Alimwi buya, ‘tacikonzyeki kuli Leza kubeja.’ (My. 23:19; Heb. 6:18) ‘Jehova uluusulide mulaka waamba zyakubeja.’ (Tus. 6:16, 17) Kutegwa tukkomaninwe anguwe, tweelede kupona kweelana azyeelelo zyakwe zyakasimpe. w18.10 8 ¶10-13

Mbuti kuti mupati wamulimo wamwaambila kuti musange mali kujatikizya pobwe limwi iliswaangene abukombi bwakubeja. Ino ncinzi ncomukonzya kucita? Muciindi cakulindila kuti mane mukalijane mubukkale buli boobu, mbuti kuti mwayeeyela limwi lino kujatikizya mbwayeeya Jehova mumakani aali boobu? Kuti mwacita oobo, mwaakulijana mubukkale buli boobu, ciyoomuubaubila kucita alimwi akwaamba cintu ciluzi. Kuyeeyela limwi kujatikizya mbociyandika kuzumanana kusyomeka kulakonzya kutugwasya ciindi notwaciswa kapati. Nokuba kuti tulikanzide kukaka kubikkwa bulowa naa zibeela zyone zipati-pati zyabulowa, kuli nzila zimwi izijatikizya bulowa muntu nzyeelede kulisalila kweelana anjiisyo zyamu Bbaibbele izitondezya mbwayeeya Jehova mumakani aaya. (Mil. 15:28, 29) Ndilili notweelede kusala cakucita? Sena tweelede kucita boobo ciindi notuli mucibbaddela, ambweni notumvwide kucisa alimwi notwaambilwa kusala cakufwambaana? Lino nceciindi cakuvwuntauzya, kulemba pepa lijatikizya kusala kwanu, alimwi akubandika abasilisi. w18.11 24 ¶5; 26 ¶15-16

Jehova mweembezi siluyando uubeendelezya caluzyalo bantu bakwe akubakwabilila kuli basinkondonyina. Eelo kaka alatukulwaizya makani aaya aamasimpe mbwaanga tulangila mamanino aabweende bwazintu oobu! Jehova uyoozumanana kubalanganya bantu bakwe lyamapenzi mapati aaboola. (Ciy. 7:9, 10) Aboobo kufwumbwa naa tulibana naa tulicembeede, tuli balema naa pe, bantu ba Leza tabakalibiliki naa kuyoowa lyamapenzi mapati. Alimwi buya, bayoocita ciindene aceeco! Bayooyeeya majwi aa Jesu Kristo aaya aakuti: “Amukaimikile akulanga mujulu, nkaambo lufwutuko lwanu lunooswenede afwaafwi.” (Lk. 21:28) Bayoozumanana kuba alusyomo oolo nociba ciindi Gogo aakubalwana, nkokuti nkamu yazisi ilaanguzu kapati. (Ezk. 38:2, 14-16) Nkaambo nzi bantu ba Leza ncobayoozumanana kuba alusyomo? Nkaambo balizyi kuti Jehova tacinci. Uyootondezya lyoonse kuti ulalanganya alimwi akuti Mufwutuli uubikkila maano.—Is. 26:20. w18.09 26 ¶15-16

Kweelede kuti bakakulwaizyigwa kapati bana Israyeli basyomeka nobakamvwa majwi aa Jehova aali atala aawa. Mbuli umwi wababelesi ba Jehova, anywebo mulakonzya kuba masimpe kuti Jehova ulamuyanda kapati. Jwi lya Leza lisyomezya baabo ibali mubukombi busalala kuti: “Mbubonya mbuli sikalumamba singuzu, uyookufwutula. Uyoosekelela akaambo kanduwe kakkomene kapati.” (Zef. 3:16, 17) Kufwumbwa mapenzi ngobakonzya kujana bantu bakwe, Jehova usyomezya kubagwasya alimwi akubaumbulizya. “Nywebo muyoonyonka akunyamudwa akasolo, alimwi muyoosumpaudwa amagondo. Mbubonya mutumbu mbwaumbulizya mwanaakwe, andime ndiyoozumanana kumuumbulizya nywebo.” (Is. 66:12, 13) Eelo kaka cikozyanyo eeci cilakkazyika moyo, imutumbu siluyando kunyamuna mwanaakwe akasolo alimwi akumusumpaula amagondo aakwe! Munzila eeyi Jehova utondezya mboluli lupati luyando lwakwe kubakombi bakwe basyomeka. Tacidoonekwi buya kuti nywebo mulayandika kapati kuli Jehova.—Jer. 31:3. w18.09 13 ¶6-7

Kaindi, bana Israyeli bakalijisi zyoolwe zinji zyakulyaaba kugwasyilizya. (Kul. 36:2; Neh. 11:2) Mazuba aano, andinywe mulijisi zyoolwe zinji zyakwaaba ciindi canu, lubono, alimwi mulijisi luzyibo lwakucita milimo imwi ndomukonzya kubelesya kugwasya bakwesu abacizyi. Alimwi muyookkomana kapati akutambula zilongezyo zinji akaambo kakulyaaba kugwasyilizya. Aabo balyaaba kugwasyilizya mumilimo ya Bunakristo kanji-kanji balajana balongwe bapya. Amubone cikozyanyo caba Margie, imucizyi wakabeleka mumilimo minji yakuyaka Maanda aa Bwami kwamyaka iili 18. Mumyaka eeyi, bakali kubayiisya milimo bacizyi banji ibacili bana. Bakajana kuti kucita boobo ninzila mbotu kapati yakukulwaizyanya kumuuya. (Rom. 1:12) Ciindi nobakajana buyumuyumu, ba Margie bakakulwaizyigwa abalongwe babo aabo mbobakajana nobakali mumulimo wakuyaka. Sena kuli nomwakagwasyilizyide kale mumulimo wakuyaka mbuli yooyu? w18.08 25 ¶9, 26 ¶11

Aciindi Paulo naakalemba majwi aaya, Timoteyo kweelede kuti wakajisi myaka yakuzyalwa iili kuma 30. Nokuba boobo, Paulo wakalimupede kale mulimo wakulanganya mikuli mipati. Tacikwe makani akaambo kakapa kuti lulayo oolu lupegwe, kaambo nkotwiiya kalalimvwisya. Tatweelede kubeteka bakwesu bacili bana akaambo buyo kaciimo cabo. Inga cabota kuyeeya kuti naba Mwami Jesu wakacita mulimo wakwe woonse waanyika kajisi myaka yakuzyalwa iili kuma 30. Ambweni tuzulilwa kumusyobo uubaula baalumi bacili bana. Kuti naa mbocibede oobo, baalu mumbungano balakonzya kuwayawaya kulumbaizya bakwesu bacili bana ibeelela kubeleka kabali bakutausi naa baalu. Aboobo baalu boonse beelede kuyeeya kuti Magwalo taambi ciimo cini muntu nayelede kulumbaizyigwa kuba mukutausi naa mwaalu.—1Tim. 3:1-10, 12, 13; Tit. 1:5-9. w18.08 11-12 ¶15-16

Kutegwa tusale kabotu, tweelede kuba amakani aamasimpe. Aboobo, tweelede kubikkila maano alimwi akusala makani ngotuyanda kubala. (Flp. 4:8, 9) Tatweelede kusowa ciindi cesu kweebelela zintu zitali kabotu naa kubala malipooti ngotutazyi kuti naa ngamasimpe aatumwa muma e-mail. Alimwi cilayandika kapati kutantamuka mawebbusaiti aakulwaizyigwa abasiluleyo. Makanze aabo ngakusampaula bantu ba Leza alimwi akunyonganya kasimpe. Makani aataluzi apa kutasala kabotu. Mutasoli kuubya-ubya izikonzya kucitika kumizeezo alimwi amoyo wanu akaambo kamakani aakubeja. Amubone cakacitika muciindi ca Musa ciindi basikutwela bali 10 akati kabali 12 ibakatumidwe kuyootwela Nyika Yakasyomezyedwe nobakaleta lipooti yatakali kabotu. (My. 13:25-33) Makani aakubeja ngobakaleta akabatyompya kapati bantu ba Jehova. (My. 14:1-4, 6-10) Muciindi cakulanga-langa twaambo twamasimpe alimwi akusyoma Jehova, bakasala kusyoma makani aakubeja. w18.08 4 ¶4-5

Bantu bamwi balijisi bube bubotu, alimwi banji, nokuba kuti tabakombi Jehova tabalinjizyi mumicito iitali kabotu. Ikuti naa oobo mbocibede kubantu mbomuyanzana limwi, sena inga mwaamba kuti mbalongwe bali kabotu? Amulibuzye kujatikizya kuyanzana ooko mbokukonzya kucijatikizya cilongwe canu a Jehova. Sena kuyoociyumya? Ino nzintu nzi nzyobayeeya? Mucikozyanyo, sena mibandi yabo iyeeme aakuba azisani zili mufasyoni, zintu zisumpukide zipangwa mazuba aano mbuli matabbuleti, mafooni, makkompyuta, naa kuba azintu zimwi buyo zyakumubili? Sena mibandi yabo kanji-kanji ibikkilizya kwaamba zintu zibyaabi kujatikizya bamwi naa kwaamba masesya aajatikizya zintu zitondwa? Jesu wakacenjezya kuti: “Nkaambo mulomo waamba zizwide mumoyo.” (Mt. 12:34) Ikuti mwabona kuti bantu mbomuyanzana limwi banyonganya cilongwe canu a Jehova, amubweze ntaamu kwiinda mukucesya ciindi cakuba ambabo alimwi kuti kacikonzyeka, amuleke kuyanzana ambabo.—Tus. 13:20. w18.07 19 ¶11

Ciindi Musa naakajisi myaka yakuzyalwa iili 80, Jehova wakamupa mulimo wakwaangununa bana Israyeli kuzwa mubuzike mu Egepita. (Kul. 3:10) Kwaziindi zili mbozibede, Musa wakasola kupa twaambo twakulitamizya. Pele Jehova wakazumanana kukkazika moyo mane buya akumupa nguzu zyakucita maleele. (Kul. 4:2-9, 21) Wakali kukonzya kumukonga Musa kutegwa azumine cakufwambaana. Muciindi caboobo, Jehova wakatondezya luse akukkazika moyo, wakacita oobo kwiinda mukusyomezya mubelesi wakwe uulicesya kuti wakali kuyoomugwasya. Sena nzila eeyi yakabeleka? Inzya! Musa wakaba musololi mubotu iwakasola kweendelezya bamwi calubomba mbubwenya Jehova mbwaakamweendelezya. Ikuti naa kuli nguzu nzyomujisi zyakweendelezya bamwi, eelo kaka cilayandika kapati kulindinywe kumwiiya Jehova kwiinda mukuba bantu babikkila maano, basilubomba, alimwi ibakkazika moyo ciindi nomweendelezya baabo mbomulanganya! (Kol. 3:19-21; 1Pet. 5:1-3) Ciindi nomusola kumwiiya Jehova alimwi a Musa Mupati, Jesu Kristo, muyoopa kuti bantu kabaanguluka kubandika andinywe, alimwi muyoobakulwaizya.—Mt. 11:28, 29. w18.09 24-25 ¶7-10

Mbuti kuti mwaba amakanze aakuba acilengwa cibotu cakusumpula lukamantano akati kabakwesu alimwi abacizyi? Ikuti naa mulacita kale oobo, nkokuti mucita kabotu. Sena inga “mwajalula myoyo yanu,” nkokuti kuzumanana kucita boobo cakutaleka? (2Kor. 6:11-13) Ino mbuti kujatikizya kuyungizya mulimo wanu wakumunika kasimpe kamu Bbaibbele mucilawo momukkala? Majwi alimwi amilimo yanu yaluzyalo zilakonzya kumukwelelezya simukobonyoko kukasimpe. Amulibuzye kuti: ‘Ino basimukoboma bandibona buti? Sena ŋanda azintu zyangu zilasalala, kupa kuti basimukoboma kabandibona munzila iili kabotu? Sena ndilabagwasya bamwi?’ Ciindi nomubandika a Bakamboni bamwi, mbuti kuti mwababuzya kujatikizya luzyalo lwabo akulilemeka kwabo kubotu mbokwakabajatikizya bacibbululu, basimukobonyina, babelesinyina, naa basicikolonyina? Tacidoonekwi buya kuti bayoomwaambila zyakuluula zibotu.—Ef. 5:9. w18.06 24 ¶13-14

Mubwini oobo mbocakaba kuli baabo ibakajaya sikwiiya Sitefano alimwi oobo mbocibede akuli bamwi ibali mbuli mbabo. (Mil. 6:8, 12; 7:54-60) Eelo kaka cilagambya kuti kwiinda mukucita zintu zibyaabi zili boobo mbuli kujaya bantu, basizikombelo ibaciindizya batyola milawo njoonya yayooyo ngobalitaminina kukomba! (Kul. 20:13) Cakutadooneka, manjezyeezya aabo musolozi mubyaabi! Mbuti mbotukonzya kukwabilila manjezyeezya eesu kutegwa azumanane kubeleka kabotu? Milawo alimwi anjiisyo zili mu Jwi lya Leza ‘zilagwasya mukuyiisya, mukusinsa, mukululamika zintu amukulaya cabululami.’ (2Tim. 3:16) Aboobo, kwiinda mukuba basungu kubala Bbaibbele, kuzinzibala kuyeeya nzyolyaamba, alimwi akuzibelesya nzyotwiiya mubuumi bwesu, tuyiisya manjezyeezya eesu kutegwa katuyeeya mbuli mbwayeeya Leza, alimwi alakonzya kuba musolozi wesu mubotu. w18.06 16-17 ¶3-4

Panga ndyobakali kubelesya basikalumamba bana Roma ciindi Paulo naakalemba lugwalo lwakwe lyakali kulampa masentimita aali 50 alimwi lyakapangilwa kuti kalibelesyegwa munkondo. Kaambo kamwi ikakali kupa kuti basikalumamba bana Roma kabazwidilila munkondo nkakuti bakali kwiiya kujatikizya mbobakeelede kuzibelesya zibelesyo zyabo buzuba abuzuba. Paulo wakakozyanisya Jwi lya Leza kupanga ndyaakatupa Jehova. Pele tweelede kwiiya mbotweelede kulibelesya kabotu ciindi notwiiminina nzyotusyoma, naa notuyandika kucinca mbotuyeeya. (2Kor. 10:4, 5; 2Tim. 2:15) Tatweelede kumuyoowa Saatani alimwi amadaimona aakwe. Nokuba kuti balaanguzu kapati, inguzu zyabo tazisiki aali zya Jehova pe. Alimwi tabakazumanani kupona. Lino-lino, mu Myaka Iili Cuulu ya Bulelo bwa Kristo, Saatani amadaimona aakwe bayakwaangwa akuba muciimo cakutakonzya kucita cintu cili coonse, mpoonya bayakunyonyoonwa. (Ciy. 20:1-3, 7-10) Tulimuzyi sinkondoma, nzila zyakwe zyabucenjezu, alimwi amakanze aakwe. Kwiinda mukugwasyigwa a Jehova, tulakonzya kuzwidilila mukumukazya! w18.05 30 ¶15; 31 ¶19-21

Adamu wakalizyi kuti nzoka tazyaambauli. Aboobo weelede kuti wakayeeyela kuti cilenge camuuya cimwi cakaambaula a Eva kwiinda munzoka. (Matl. 3:1-6) Adamu a Eva kunyina ncobakazyi kujatikizya cilenge camuuya eeci. Nokuba boobo, Adamu wakalisalila kuzangila Usyi wakujulu siluyando alimwi akusangana cilenge camuuya eeci ncaatakazyi mukukazya makanze aa Leza. (1Tim. 2:14) Mpoonya-mpoonya, Jehova wakatalika kuyubununa makani aajatikizya sinkondo ooyu iwakeena Adamu a Eva, alimwi wakasyomezya kuti cilenge cibyaabi eeci cakali kuyoonyonyoonwa. Pele Jehova alimwi wakacenjezya kuti kwaciindi cili mbocibede, cilenge camuuya eeco icakaambaula kwiinda munzoka cakali kuyooba anguzu zyakukazya baabo ibamuyanda Leza. (Matl. 3:15) Jehova kunyina naakatwaambila zina lyamungelo iwakamuzangila. Alimwi Leza wakasala kuti atayubununi nobuba bupanduluzi bwazina lyasinkondo ooyu kusikila nokwakainda myaka iili 2,500 kuzwa ciindi buzangi bwakusaanguna nobwakacitika.—Job. 1:6. w18.05 22 ¶1-2

Ikuti naa kuli nomwakatyompwa akaambo kakukambaukila mucilawo bantu mobatabikkili maano, bukkale bwanu bulikozyenye abwamwaapostolo Paulo. Mumulimo wakwe wakukambauka ngwaakabeleka kwamyaka iitandila ku 30, wakagwasya bantu banji kuba basikwiiya ba Kristo. (Mil. 14:21; 2Kor. 3:2, 3) Nokuba boobo, kunyina naakazwidilila kugwasya ba Juda banji kuti babe bakombi bakasimpe. Muciindi caboobo, ibanji bakamukazya Paulo, alimwi bamwi mane bakamupenzya buya. (Mil. 14:19; 17:1, 4, 5, 13) Ino mbuti mbwaakalimvwa Paulo akaambo kakukazyigwa ooko aba Juda? Cakwaanguluka wakati: “Ndaamba masimpe muli Kristo . . . ndiluuside kapati akuti moyo wangu ulacisa lyoonse.” (Rom. 9:1-3) Nkaambo nzi Paulo ncaakalimvwa boobo? Moyo wakwe wakalimaninide kumulimo wakukambauka. Wakabakambaukila ba Juda akaambo kakuti wakali kubabikkila maano kapati. Aboobo cakamucisa kapati Paulo kubona mbobakalukaka luse lwa Leza. Mbubwenya mbuli Paulo, tulabakambaukila bantu akaambo kakuti tulababikkila maano.—Mt. 22:39; 1Kor. 11:1. w18.05 13 ¶4-5

Paulo wakatondezya kuti naba yooyo uujisi mukuli wakukulwaizya bamwi awalo ulayandika kuyumizyigwa. Ku Banakristo ibakali kukkala mu Roma, wakalemba kuti: “Ndilayandisisya kumubona, kuti ndimupe cipego cakumuuya cimwi ikutegwa muyumizyigwe; naa kutegwa kube kuyumizyanya kwiinda mulusyomo lwaumwi amweenzinyina, nkokuti lwanu alwangu.” (Rom. 1:11, 12) Masimpe, Paulo iwakali kubakulwaizya kapati bamwi, zimwi ziindi awalo wakali kuyandika kuyumizyigwa. (Rom. 15:30-32) Aabo ibapona buumi bwakulyaaba beelede kulumbaizyigwa. Bakwesu abacizyi ibazumanana kabatakwete naa kabatakwetwe akaambo kakutobela mulawo wakukwata naa kukwatwa “buyo mu Mwami” bapanga nkamu iimbi yabantu ibayandika kukulwaizya. (1Kor. 7:39) Kunze lyaboobo, Banakristo ibazumanana kusyomeka nobapenzyegwa naa kuciswa bayandika kukulwaizya.—2Tes. 1:3-5. w18.04 21 ¶3-5