February

Kweelana ambolibelesyedwe mu Bbaibbele, ibbala lyakuti “bululami,” lyaamba kucita cintu Leza ncabona kuti cililuzi alimwi akucita boobo kakunyina lusalululo. Amuyeeye kujatikizya nzyaakali kucita Jesu mbozyakatondezya mbwaakali kububona bululami. Mumazuba aakwe, basololi bacikombelo caba Juda tiibakali kubayanda aabo ibatakali ba Juda. Bakali kuyeeya kuti balo bakali kabotu kwiinda ba Juda ibatakaiya bukombi bwaba Juda alimwi tiibakali kubalemeka bamakaintu. Pele Jesu lyoonse wakali kubeendelezya kabotu bantu boonse alimwi cakutasalulula. Wakabatambula aabo ibatakali ba Juda ibakajisi lusyomo mulinguwe. (Mt. 8:5-10, 13) Cakutasalulula, wakabakambaukila boonse, bavwubi alimwi abacete. (Mt. 11:5; Lk. 19:2, 9) Kunyina naakali kubakalalila naa kubeendelezya calunya bamakaintu. Muciindi caboobo, wakali kubalemeka alimwi akubafwida luse, kubikkilizya abaabo ibamwi mbobakali kubona kuti banyina mulimo. (Lk. 7:37-39, 44-50) Tulakonzya kumwiiya Jesu kwiinda mukutabeendelezya calusalululo bamwi alimwi akwiinda mukubakambaukila bantu boonse ibalibambilide kuswiilila, tacikwe makani mbavwubi naa mbacete, naa bazulilwa kucikombelo nzi. Baalumi Banakristo batobela cikozyanyo cakwe kwiinda mukubeendelezya cabulemu bamakaintu. w19.05 2 ¶1; 5 ¶15-17

Baalu basyomeka balakonzya kubelesya majwi aaluzyalo ciindi nobapa luumbulizyo lwamu Magwalo kuli baabo ibayandika lugwasyo. Sena mbaalu balikke ibakonzya kupa luumbulizyo kuli baabo ibakatundululwa? Peepe. Toonse tulijisi mukuli ‘wakuzumanana kuumbulizyanya.’ (1Tes. 4:18) Ikapati bacizyi Banakristo ibasimide balakonzya kubakulwaizya bacizyi ibayandika luumbulizyo. Cakweelela, Jehova Leza wakalikozyanisya kumutumbu iwuumbulizya mwanaakwe. (Is. 66:13) Bbaibbele lilijisi zikozyanyo zyabamakaintu ibakapa luumbulizyo kuli baabo ibakali mumapenzi. (Job. 42:11) Eelo kaka cilamukkomanisya Jehova kubona bamakaintu Banakristo mazuba aano kabaumbulizya bacizyinyina aabo ibalwana mapenzi aamumizeezo! Mubukkale bumwi, cabupampu baalu balakonzya kulomba mucizyi uusimide kumuuya ikuti naa inga wamugwasya mucizyi uupengede munzila eeyo. Ciindi notusola kugwasya mukwesu naa mucizyi, tatweelede kubuzya kujatikizya zintu nzyatayandi kwaambila bamwi.—1Tes. 4:11. w19.05 16-17 ¶10-12

Kabatanapanga kkomiti yalubeta baalu, nkaambo nzi ncokuyandika bakamboni bobilo? Kucita boobo ncibeela cazyeelelo zyamu Bbaibbele zisumpukide zyabululami. Ikuti umwi waambwa kuti wakacita cibi cipati, pele walo wakaka, kweelede kuba bakamboni bobilo baalu kabatanapanga kkomiti yalubeta. (Dt. 19:15; 1Tim. 5:19) Ikuti naa muntu ooyo waukaka mulandu, baalu balalanga-langa bumboni ibwakapegwa abakamboni bobilo ibaazyi kabotu makani aayo. Ikuti ooyo wakatola makani alimwi akamboni uumwi basinizya, nkokuti baalu inga baba abumboni bukkwene bwakupanga kkomiti yalubeta. Ikuti kamboni wabili tako, tacaambi kuti ooyo iwakatola makani ulabeja. Nokuba kuti taakwe bakamboni bobilo ibasinizya kuti muntu ooyo wakacita cibi, baalu balizyi kuti muntu ooyo ambweni wakacita cintu cimwi icibi kapati. Baalu bayoozumanana kupa luumbulizyo alimwi alugwasyo kuli baabo ibatyompedwe akaambo kacibi eeco alimwi akubikkila maano kukwabilila mbungano kuntenda iili yoonse njakonzya kuleta muntu ooyo iwakaambwa kuti wakacita cibi.—Mil. 20:28. w19.05 11 ¶15-16

Cilayandika kubayiisya bana mbobeelede kubala. Mucikozyanyo, beelede kwiiya mbobakonzya kulibambila miswaangano yambungano naa mbobakonzya kuvwuntauzya kaambo kamwi nkobakajana kucikolo. (Heb. 5:14) Ikuti naa kabalibala Bbaibbele kuŋanda, ciyoobaubila kumvwisya twaambo tuyiigwa kumiswaangano yambungano, yabbazu alimwi ayacooko. Nokuba boobo, bulamfwu bwaciindi ncomubelesya kucita ciiyo bweelede kweendelana aciimo alimwi abube bwabana. Bantu mbotuyiisya Bbaibbele abalo beelede kuyiisyigwa mbokubalwa. Ciindi nobacili bapya, tulakkomana kubona kuti baleenga bwiinguzi ciindi nobalibambila ciiyo ca Bbaibbele naa miswaangano yambungano. Pele tweelede kubayiisya mbokuvwuntauzyigwa alimwi ambobeelede kubala cakusitikila ciindi nobali balikke. Munzila eeyi, nobajana penzi, bayoozyiba mbobakonzya kujana makani aakonzya kubagwasya kwiinda mukuvwuntauzya mumabbuku eesu. w19.05 26 ¶2; 28 ¶10-11

Saatani ulikanzide kapati kucinca mizeezo yesu. Ubelesya njiisyo ziindene-indene kutegwa anyonganye mizeezo mibotu njotujisi akaambo kakasimpe kazwa mu Jwi lya Leza. Saatani ucizumanana kubuzya mubuzyo nguwenya ngwaakabuzya Eva mumuunda wa Edeni wakuti: “Sena ncobeni Leza wakaamba kuti . . . ?” (Matl. 3:1) Munyika eeyi iyeendelezyegwa a Saatani, kanji-kanji tulamvwa mibuzyo iikonzya kutupa kudooneka nzyotusyoma, mbuli yakuti: ‘Sena ncobeni Leza tazumizyi kukwatana kwabantu bakozyenye zizo? Sena ncobeni Leza tayandi kuti kamusekelela Kkilisimasi alimwi amazuba aakuzyalwa? Sena ncobeni Leza wanu uyanda kuti kamukaka kubikkwa bulowa? Sena ncobeni kuti Leza siluyando uyanda kuti kamutayanzani abayandwa banu ibagwisyidwe mumbungano?’ Tweelede kuzisyoma njiisyo zyesu. Ikuti katutajani bwiinguzi kumibuzyo iiyandika kapati kujatikizya nzyotusyoma, tulakonzya kutalika kuzidooneka. Mukuya kwaciindi, kudooneka ooko kulakonzya kunyonganya mizeezo yesu alimwi alusyomo lwesu. w19.06 12-13 ¶15-17

Jehova ulatuyanda kapati. (Joh. 3:16) Tuyanda kumwiiya Taateesu siluyando. Aboobo tulasoleka ‘kweetelelana, kutondezya luyando lwabunyina, kuba amoyo mutete walubomba’ kubantu boonse, pele kapati kuli baabo “ibaciinga cesu calusyomo.” (Gal. 6:10) Ciindi bakwesu abacizyi nobajana mapenzi aabatyompya, tuyandika kubagwasya. Mbuti mbotukonzya kumuumbulizya muntu iwafwidwa ngobakwetene limwi? Nzila yakusaanguna iiyandika kapati nkwaambaula anguwe, nokuba kuti mulakonzya kumvwa nsoni naa kubula cakwaamba. Ba Paula, ibakafwidwa balumi cakutayeeyela bakati: “Ndilizyi kuti lufwu lupa bantu kutaanguluka. Bayeeya kuti nzyobanga baamba zilakonzya kumunyemya umwi. Pele cilacisa kapati ciindi bantu nobataambi cintu cili coonse.” Ambweni muntu uuside inga katalangili kuti twaambe majwi amwi aalibedelede. Ba Paula bakayungizya kwaamba kuti: “Ndakali kulumba kapati ciindi umwi naakali kwaamba buyo kuti, ‘Ndausa kapati kuli ceeci cacitika.’” w19.06 20 ¶1; 23 ¶14

Ikuti naa mulimo wesu walesyegwa, baalu bayoobikka bubambe bwakuti kamuswaangana cakusisikizya. Ambweni bayoomwaambila kuswaangana mutubunga alimwi banoocinca-cinca ciindi abusena bwakuswaanganina. Kujatikizya mulimo wakukambauka, bukkale bunakwiindana kweelana abusena. Pele akaambo kakuti tulamuyanda Jehova alimwi tulakkomana kwaambila bantu kujatikizya Bwami bwakwe, tuyoojana nzila mbotukonzya kukambauka. (Lk. 8:1) Kaamba kujatikizya mulimo wakukambauka wa Bakamboni ba Jehova mu Soviet Union yakaindi, syaazibwene mumakani aakaindi Emily B. Baran wakaamba kuti: “Ciindi mfwulumende noyakaambila Bakamboni ba Jehova kuti baleke kukambauka, Bakamboni bakali kutalisya mibandi kuli basimukobonyina, babelesinyina alimwi abalongwe babo. Mpoonya ciindi nobakaangwa akaambo kakucita boobo, Bakamboni bakatalika kukambaukila baangenyina.” Nokuba kuti mulimo wakukambauka wakalilesyedwe, bakwesu bakazumanana kukambauka. Amwiiye cikozyanyo cabo! w19.07 11 ¶12-13

Ino inga twabagwasya buti bantu batakombi kuti baiye kumuyanda Leza alimwi akuba basikwiiya ba Kristo? Tweelede kuzyiba kuti muntu mbwautambula mulumbe wesu, ciyeeme ambwaakakomezyegwa. Mucikozyanyo, bantu ibakakomenena kuzisi zyaku Europe tabakonzyi kuutambula mulumbe wesu mbuli mbobakonzya kuutambula bantu ibakakomenena kuzisi zyaku Asia. Nkaambo nzi ncocili boobu? Ku Europe, ibanji balijisi luzyibo luli mbolubede kujatikizya Bbaibbele alimwi balizyi kuti Leza ngowakalenga zintu zyoonse. Pele ku Asia, ibunji bwabantu bajisi buyo luzyibo lusyoonto naa ambweni tabajisi buya aluzyibo luli loonse kujatikizya Bbaibbele alimwi bamwi tabasyomi kuti kuli Mulengi. Aboobo amuzibone munzila yeelede zintu. Mwaka amwaka, kuli bantu ibatali bakombi ibaba Bakamboni ba Jehova. Bunji bwabo bakali kupona kweelana azyeelelo zyakulilemeka zisumpukide alimwi bakali kucimwa akaambo kakuupaupa ameso kwabukombi. Bamwi tiibakali kupona kweelana azyeelelo zyakulilemeka zisumpukide alimwi bunji bwabo bakajisi zilengwa zibyaabi nzyobakeelede kuleka. Kwiinda mukugwasyigwa a Jehova, tulaalusyomo lwakuti tuyoobajana aabo ‘ibalibambilide kutambula buumi butamani.’—Mil. 13:48; 1Tim. 2:3, 4. w19.07 20-21 ¶3-4

Tacikwe makani naa bulangizi bwesu mbwakuyoopona kukabe kutamani kujulu naa muparadaiso anyika, tweelede kuzumanana kusolekesya kusika ambaakani eeyo. Kufwumbwa mbobubede bukkale bwesu, tatweelede kuyeeya zintu zyamusyule; naa kulekela cintu cili coonse kutupa kuleka kubelekela Jehova. (Flp. 3:16) Kuzuzikizyigwa kwazintu nzyotulangila kulakonzya kulibonya mbuli kuti kwamuka, naa ambweni nguzu zyesu ziyaabumana akaambo kakucembaala. Ambweni twaliyumya kumapenzi aamwi alimwi akupenzyegwa kwamyaka minji. Kufwumbwa naa muli mubukkale buli buti, “mutalibiliki acintu nociba comwe.” Muciindi caboobo, amumuzyibye Leza nzyomulomba, mpoonya uyoomupa luumuno ndomutakonzyi kuyeeyela. (Flp. 4:6, 7) Mbubwenya mbuli sikubalika mbwabalika canguzu ciindi nayanda kusika akeengo kamamanino, andiswe atubikkile maano kapati kumbaakani yakumanizya muzundano wakubalika kuya kubuumi. Mbubwenya mbuli sikubalika mbwabikkila maano kukumanizya muzundano ciindi nowasika kumamanino, andiswe atubikkile maano kuzisyomezyo zyakumbele zibotu mbwaanga twasika afwaafwi amamanino aamuzundano wesu. Tuyanda kuzumanana kucita boobo lino kusikila mpotugolela. w19.08 7 ¶16-17

Cilakonzya kutuyumina kuzyiba ncotukonzya kwaamba kumuntu umwi uuli mubuumba. Nokuba kuti tatujisi majwi aakwaamba, ikuti batubona katulila, balakonzya kuzyiba kuti tulabikkila maano kujatikizya mbobalimvwa. Ciindi Lazaro mulongwe wa Jesu naakafwa, Mariya, Marta, alimwi abamwi bakamulila munyina alimwi mulongwe wabo. Nokwakainda mazuba one ciindi Jesu naakasika, awalo “yakamweenda misozi,” nokuba kuti wakalizyi kuti ulamubusya Lazaro. (Joh. 11:17, 33-35) Kulila kwa Jesu kwakatondezya mbobakalimvwa Bausyi. Alimwi kwakatondezya luyando ndwaakajisi Jesu kubanamukwasyi, cakutadooneka eeci cakamuumbulizya Mariya alimwi a Marta. Mbubwenya buyo, ikuti bakwesu babona kuti tulabayanda alimwi akubabikkila maano, balazyiba kuti tabali balikke pele balizingulukidwe abalongwe babikkila maano alimwi ibabagwasya. Zimwi ziindi tweelede buyo kuba muswiilizi mubotu. Mweelede kumupa ciindi cakwaamba mbwalimvwa munyoko, alimwi tamweelede kukalala kuti waamba “caambaambe.” (Job. 6:2, 3) Ambweni inga kakopene kapati mumizeezo akaambo kakukatazyigwa abanamukwasyi ibatali Bakamboni. Aboobo tweelede kupaila anguwe. Atumulombe ‘Sikuswiilila mipailo’ kutegwa amupe nguzu alimwi amizeezo iikkalikene.​—Int. 65:2. w19.04 18-19 ¶18-19

Tacikwe makani naa tubelekela a Beteli naa mumbazu zimwi zyamulimo waciindi coonse, tulakonzya kwiiya kubayanda bantu alimwi abusena nkotubelekela. Aboobo tulausa kapati ikuti naa twazwa kubusena bumwi akaambo kakucinca kwabukkale. Tulabayeeya bakwesu alimwi abacizyi mbotwakasiya, tulalibilika kujatikizya mbabo, kwaambisya ikuti twakazwa kubusena oobo akaambo kakupenzyegwa. (Mt. 10:23; 2Kor. 11:28, 29) Kuyungizya waawo, cilakonzya kukatazya kapati kuunka kubusena bumbi nkaambo inga twayandika kwiiya zilengwa zipya. Bamwi, akaambo kakucinca kwabukkale balakonzya kujana buyumuyumu bwamali oobo mbobatakali kulangila. Balakonzya kulibilika alimwi akutyompwa. Ncinzi cikonzya kubagwasya? Amuzumanane kuba acilongwe ciyumu a Jehova. (Jak. 4:8) Ino mbuti mbotukonzya kucita boobo? Kwiinda mukumusyoma mbwaanga ngu ‘Sikuswiilila mipailo.’ (Int. 65:2) Jehova ulakonzya kucita “zintu zinji kapati kwiinda aali zyeezyo nzyotumulomba naa nzyotuyeeyela.” (Ef. 3:20) Jehova tatupi buyo zyeezyo nzyotumulomba mumipailo yesu. Ulakonzya kutugwasya mumapenzi eesu munzila njotutayeeyeli. w19.08 21 ¶5-6

Bantu bamwi baamba “Amagedoni” kuti ninkondo yanyukkiliya naa kuti nkunyonyooka kwanyika. Mukwiimpana, Bbaibbele lyaamba kuti Amagedoni ibikkilizya makani mabotu, icintu cikkomanisya! (Ciy. 1:3) Nkondo ya Amagedoni taikabanyonyooni bantu, pele iyoobafwutula buya! Munzila nzi? Kwiinda mukumanizya bweendelezi bwabantu. Nkondo eeyi iyoobafwutula bantu kwiinda mukunyonyoona bantu babi alimwi akufwutula balulami. Alimwi iyoobafwutula bantu kwiinda mukukwabilila nyika kukunyonyoonwa. (Ciy. 11:18) Ibbala lyakuti “Amagedoni” lijanika buyo ciindi comwe mu Magwalo, alimwi lizwa kubbala lya Chihebrayo ilyaamba “Cilundu ca Megido.” (Ciy. 16:16; bupanduluzi buyungizyidwe) Megido wakali munzi wamu Israyeli yansiku. (Jos. 17:11) Pele bbala lya Amagedoni talyaambi busena bwini ibuli boonse anyika. Kwaamba masimpe, lyaamba bukkale ooko “bami bamunyika yoonse” nkobabunganizyigwa kutegwa balwane Jehova.—Ciy. 16:14. w19.09 8 ¶1-3

Mukaintu wakali kuyandika lugwasyo cakufwambaana. Wakaunka kubasilisi banji, kajisi bulangizi bwakuti ulapona. Wakali kuciswa kwamyaka iili 12, pele kunyina iwakali kukonzya kumuponya. Kweelana a Mulawo, mukaintu ooyu wakalisofweede. (Lev. 15:25) Mpoonya wakamvwa kuti Jesu wakali kubaponya aabo ibakali kuciswa, aboobo wakaunka kuyoomulangaula. Naakamujana, wakajata maaya aacisani cakwe caatala, ndilyonya wakapona! Pele Jesu wakacita zinji kunze buyo lyakumuponya. Kweelana ambwaakamweendelezya, mukaintu ooyu wakalimvwa kuti wakali kuyandwa alimwi akulemekwa. Mucikozyanyo, ciindi Jesu naakali kwaambaula anguwe, wakatondezya kuti wakali kumuyanda alimwi akumulemeka kwiinda mukwaamba kuti “mwanaangu.” Eelo kaka mukaintu ooyu wakakatalusyigwa alimwi akuyumizyigwa! (Lk. 8:44-48) Amubone kuti mukaintu ooyu wakaunka kuli Jesu. Wakabweza ntaamu yakuunka kulinguwe. Mbubwenya buyo amazuba aano, tweelede kubweza ntaamu yakuunka kuli Jesu. Muciindi eeci ncotupona, Jesu kunyina nayakubaponya munzila yamaleele aabo ibaunka kulinguwe. Pele ulatutamba kati: “Amuboole kulindime, . . . eelyo ndilamukatalusya.”—Mt. 11:28. w19.09 20 ¶2-3

Musinsimi Zekariya wakalaambide kale businsimi bukozyenye aboobu. Wakalemba kuti: “Kumazuba aayo bantu bali kkumi bazwa mumyaambo yoonse yamasi bayoojata, inzya, bayoojatisya cikobela camu Juda, akwaamba kuti: ‘Tuyanda kuunka andinywe, nkaambo twamvwa kuti Leza ulaandinywe.’” (Zek. 8:23) Bakamboni ba Jehova balizyi kuti kutegwa bantu bamyaambo yoonse babunganizyigwe, makani mabotu ayelede kukambaukwa mumyaambo minji. Lino tulacita mulimo wakusandulula uutanacitidwe kuzwa kaindi mumyaambo minji kapati. Cakutadooneka, Jehova uli mukucita maleele aamazuba aano, ikubunganya nkamu mpati kuzwa muzisi zyoonse. Tulikkomene akaambo kakuba acakulya cakumuuya cinji alimwi icili mumyaambo minji. Bakamboni bazwa munyika yoonse mboizulwa balikamantene mubukombi alimwi balizyibidwe kabotu akaambo kabusungu bwabo mukukambauka aluyando lwabo lwabunyina. Eelo kaka eeci cilayumya lusyomo!—Mt. 24:14; Joh. 13:35. w19.09 30-31 ¶16-17

Lyamapenzi mapati, bantu bayoogambwa kapati baakubona kuti zintu nzyobakali kuyeeya kuti zinooliko lyoonse zyatalika kumana. Banooli ‘mumacise’ alimwi akuyoowa kuti ambweni bayoojaigwa kuciindi eeco icinookatazyide kapati mubukkale bwabantu. (Zef. 1:14, 15) Kuciindi eeco, kulangilwa kuti buumi buyooyuma kapati nokuba kubantu ba Jehova. Akaambo kakuti tulazumanana kutaba banyika, ambweni kuli buyumuyumu bumwi mbotuyakujana. Kulalangilwa kuti tatunoojisi zintu zimwi nzyotuyandika mubuumi. “Muzike uusyomeka alimwi uucenjede” wali kutugwasya kulibambila kutegwa tukazumanane kusyomeka lyamapenzi mapati. (Mt. 24:45) Eeci cali kucitwa munzila zinji, pele nzila yomwe nkwiinda mumapulogilamu eesu aamuswaangano wacooko wamu 2016-2018. Kwiinda mumapulogilamu aaya, twakakulwaizyigwa kuyumya bube mbotuyandika mbobuyabuswena buzuba bwa Jehova. w19.10 14 ¶2; 16 ¶10; 17 ¶12

Ciindi notulya, tulakonzya kusala cakulya iceelede kunjila mukanwa lyesu. Pele kuti twacimena kale, cilatalika kubeleka mumubili wesu, mpoonya mukuya kwaciindi busani bulaba cibeela camubili wesu. Cakulya cili kabotu cilakonzya kuyaka mubili wesu; pele cakulya citali kabotu cilakonzya kunyonganya mubili wesu. Kubeleka kwacakulya mumubili takukonzyi kulibonya mpoonya-mpoonya, pele kulakonzya kulibonya mukuya kwaciindi. Mbubwenya buyo, ciindi notusala zyakulikondelezya, tulijisi nguzu zyakusala zintu nzyotubikka mumizeezo yesu. Kuzwa waawo, zyakulikondelezya nzyotusala zilakonzya kwiijatikizya mizeezo yesu alimwi amoyo wesu. Zyakulikondelezya izili kabotu zilakonzya kutukatalusya, pele zyakulikondelezya zitali kabotu zilakonzya kutunyonganya. (Jak. 1:14, 15) Kunyonganizyigwa azyakulikondelezya zitali kabotu takukonzyi kulibonya mpoonya-mpoonya, pele kulakonzya kuyoolibonya kumbele. Nkakaambo kaako Bbaibbele litucenjezya kuti: “Kufwumbwa cintu muntu ncasyanga, ncencico eeco ncayootebula; nkaambo ooyo uusyanga kweelana azisusi zyamubili wakwe uyootebula kubola kuzwa kumubili wakwe.” (Gal. 6:7, 8) Eelo kaka cilayandika kapati kulindiswe kukaka zyakulikondelezya zili zyoonse izisumpula zintu Jehova nzyasulide!—Int. 97:10. w19.10 30 ¶12-14

Jehova wakalutondezya luyando ndwajisi kulindiswe kwiinda mukupa Mwanaakwe kuti abe cinunuzyo cesu. (Joh. 3:16) Mbuti mbotukonzya kulwiiya luyando lwa Jehova? Mukwesu amucizyi umwi aumwi tweelede kumubona kuti ulayandika alimwi tweelede kwiitambula camaanza obilo “mbelele iisweekede” iili yoonse iipiluka kuli Jehova. (Int. 119:176; Lk. 15:7, 10) Tulatondezya kuti tulabayanda bakwesu abacizyi kwiinda mukubelesya ciindi anguzu zyesu kutegwa tubagwasye, kwaambisya ciindi nobayandika lugwasyo. (1Joh. 3:17) Jesu wakalailila basikumutobela kutondezya luyando lwakulyaaba. (Joh. 13:34, 35) Mulawo wa Jesu mupya, akaambo kakuti uyanda kuti katutondezya musyobo waluyando iwatakali kuyandika mu Mulawo Leza ngwaakapede bana Israyeli: Tweelede kubayanda bakwesu mbubonya mbuli Jesu mbwaakatuyanda. Kucita boobu kuyandika luyando lwakulyaaba. Tweelede kubayanda kapati bakwesu alimwi abacizyi kwiinda mbotuliyanda tobeni. Tweelede kubayanda kapati cakuti tulakonzya kubafwida, mbubonya mbwaakacita Jesu. w19.05 4 ¶11-13

Kutegwa tutambule lugwasyo lwamuuya uusalala, tweelede kuzumanana kuulomba cakukombelezya. (Lk. 11:13) Cikozyanyo ca Jesu icili kulugwalo lwa Luka 11:5-9 citugwasya kubona kaambo Jehova ncatupeda muuya uusalala. Mwaalumi wamucikozyanyo ca Jesu wakali kuyanda kumutambula kabotu mweenzu wakwe. Wakalimvwa kuti wakeelede kumupa cakulya mweenzu wakwe iwakaboola akati kamasiku, pele wakanyina cakulya cili coonse cakumupa. Jesu wakaamba kuti simukobonyina wakamupa cinkwa mwaalumi ooyo akaambo kakuti wakazumanana kumukombelezya. Ino ncinzi ncaakali kuyiisya Jesu mucikozyanyo eeci? Ikuti muntu uutalondokede kakonzya kulyaaba kugwasya simukobonyina uukombelezya, nkokuti Taateesu uuli kujulu siluse uyakwiinda kubapa muuya uusalala aabo ibazumanana kumulomba. Aboobo tulakonzya kuba masimpe kuti Jehova uyooyiingula mipailo yesu ciindi notulomba muuya uusalala. (Int. 10:17; 66:19) Tulakonzya kuba masimpe kuti, nokuba kuti Saatani ulazumanana kutulwana kutegwa atuzunde, tuyoozwidilila. w19.11 13 ¶17-19

Jesu wakalizyi kuti walo alimwi abasikwiiya bakwe zimwi ziindi bakeelede kulyookezya. Nokuba boobo, bantu banji mumazuba aa Jesu alimwi amazuba aano bali mbuli muntu muvwubi iwaambidwe mucikozyanyo ca Jesu. Muntu ooyo wakalyaambauzya kati: “Koliiba, kolya, konywa, alimwi kosekelela.” (Lk. 12:19; 2Tim. 3:4) Wakali kuyeeya kuti zintu ziyandika kapati mubuumi, nkulyookezya alimwi akulikondelezya. Mukwiimpana, Jesu alimwi abaapostolo bakwe tiibakali kubikkila kapati maano kukulikondelezya lwabo beni. Mazuba aano, tulasolekesya kumwiiya Jesu kwiinda mukubelesya ciindi cesu notutali kumulimo kutegwa tulyookezye, tukambaukile bantu alimwi akujanika kumiswaangano ya Bunakristo. Alimwi buya, kugwasya bantu kuba basikwiiya akujanika kumiswaangano, tuzibona kuti zilayandika kapati cakuti tulasolekesya kusikila mpotugolela kutegwa katutola lubazu lyoonse mumilimo eeyi iisetekene. (Heb. 10:24, 25) Noliba leelyo notuli mulweendo, tulazumanana acilengwa cesu cakujanika lyoonse kumiswaangano kufwumbwa nkotubede, alimwi tulasolekesya kubandika zyamu Bbaibbele abantu mbotuswaanganya.—2Tim. 4:2. w19.12 7 ¶16-17

Jehova ulatuzumizya kulisalila buumi mbotuyanda kupona. Ulatuyiisya mbotweelede kusala alimwi akutugwasya kuzwidilila ikuti twasala zintu izimukkomanisya. (Int. 119:173) Aboobo ciindi notubelesya busongo ibujanika mu Jwi lya Leza, tunoosala kabotu. (Heb. 5:14) Noliba leelyo notwasala cabusongo, cilakonzya kutukatazya kuumanizya mulimo ooyo ngotwakatalika kale. Amubone zikozyanyo zimwi: Mukwesu uucili mwana-mwana wasala kulibala Bbaibbele lyoonse mbolizulwa. Wacita kabotu kwansondo zisyoonto, nokuba boobo wacileka akaambo katwaambo tumwi. Mucizyi umwi wasala kuti abe mupainiya waciindi coonse, pele wazumanana kusumpya deeti nayootalika. Kabunga kabaalu koonse kasala kuubikkila maano kapati mulimo wakweembela butanga mumbungano, pele nokwainda myezi minji kwajanika kuti tabanatalika. Nokuba kuti bukkale oobu buliindene, kuli cintu cimwi cikozyenye mubukkale boonse. Zintu eezyo zyakasalwa kunyina nozyakazuzikizyigwa. w19.11 26 ¶1-2

Jesu wakakozyanyisya ciindi ncotupona ‘kumazuba aa Nowa,’ alimwi tacidoonekwi buya kuti tupona ‘muziindi zikatazya ncobeni.’ (Mt. 24:37; 2Tim. 3:1) Akaambo kaceeci, banabukwetene bamwi basala kutafwambaana kuba abana kutegwa bacite zinji mumulimo wa Jehova. Ciindi nobasala kuba abana alimwi akuti naa beelede kuba bongaye, banabukwetene basongo ‘balakkala ansi akubona mali aayandika.’ (Lk. 14:28, 29) Banabukwetene ibajisi bana balizyi mbocidula kukomezya bana alimwi akuti kuyandika ciindi cinji alimwi anguzu. Aboobo cilayandika kapati kuli banabukwetene kulanga-langa mibuzyo eeyi yakuti: ‘Sena toonse tweelede kulembwa mulimo kutegwa katujana mali aakuula zintu iziyandika kumukwasyi? Sena tulazuminana kujatikizya zintu iziyandika kapati kumukwasyi wesu? Ikuti naa toonse tweelede kubeleka, ino nguni unoolanganya bana besu? Ino bayooiya mizeezo alimwi abukkale bwabani?’ Ciindi banabukwetene nobabandika mibuzyo eeyi babelesya majwi aali kulugwalo lwabuzuba bwasunu. w19.12 23-24 ¶6-7

Bunji bwaziindi, mwaapostolo Paulo wakali kuba muntenda mubuumi bwakwe. (2Kor. 11:23-28) Alimwi wakali kuliyumya kujatikizya “mumvwa mumubili,” ambweni wakali kuciswa bulwazi bumwi. (2Kor. 12:7) Kuyungizya waawo, wakatyompwa ciindi Dema, ooyo aciindi cimwi iwakali mubelesinyina, naakamusiya “akaambo kakuyandisya bweende bwazintu obuno.” (2Tim. 4:10) Paulo wakali Munakristo munanike sicamba ooyo iwakali kubagwasya bamwi cakulyaaba, pele ziindi zimwi awalo wakali kutyompwa. (Rom. 9:1, 2) Paulo wakapegwa luumbulizyo alimwi alugwasyo ndwaakali kuyandika. Munzila nzi? Cakutadooneka Jehova wakabelesya muuya wakwe uusalala kumuyumya-yumya. (2Kor. 4:7; Flp. 4:13) Kuyungizya waawo, Jehova wakamuumbulizya kwiinda mu Banakristonyina. Babelesinyina bamwi aaba Paulo wakabapandulula kuti mbambabo “ibanduumbulizya kapati.” (Kol. 4:11) Akati kabaabo mbaakabandauka mazina, kwakali Arisitarko, Tukiko alimwi a Marko. Aaba bakamuyumya-yumya Paulo alimwi akumugwasya kuti azumanane kuliyumya. w20.01 8 ¶2-3

Jesu awalo wakatondezya kuti tacikonzyeki kuli umwi uutananikidwe kupandulula bwini mbocimvwika “kuzyalwa alimwi” naa ‘kuzyalwa kumuuya.’ (Joh. 3:3-8) Ino nkucinca kuli buti mukuyeeya ikucitika ciindi Banakristo nobananikwa? Kataninga bananika Banakristo aaba Jehova, bakalikkomene abulangizi bwakuyoopona anyika mane kukabe kutamani. Bakali kulangila kumbele iciindi Jehova aakugusya bubi boonse alimwi akucinca nyika kuba paradaiso. Ambweni bakali kweezeezya kutambula banamukwasyi naa balongwe babo ibakafwide. Pele nobakamana kunanikwa, bakatalika kuyeeya bumbi. Nkaambo nzi? Eeci tacaambi kuti tiibakakkutilide abulangizi bwabo bwaanyika. Tiibakacinca mizeezo yabo akaambo kakutyompwa naa kupenga kapati. Tiibakalimvwa kuti kupona anyika mane kukabe kutamani kunoolendelezya. Muciindi caboobo, Jehova wakabelesya muuya wakwe uusalala kucinca mizeezo yabo alimwi abulangizi mbobakali kukkomanina. w20.01 22 ¶9-11

Mu Mulawo Leza ngwaakapede bana Israyeli, baalumi basalidwe tiibakali kulanganya buyo makani aajatikizya kukomba Jehova, pele alimwi bakali kulanganya amakani aatakali kujatikizya kukomba Jehova cacigaminina. Pele mu “Mulawo wa Kristo,” mukuli wabaalu ngwakulanganya buyo milandu iijatikizya kukomba Jehova. (Gal. 6:2) Balizyi kuti beendelezi bamfwulumende balizumizyidwe a Leza kulanganya milandu iitajatikizyi kukomba Jehova. Eeci cibikkilizya nguzu zyakupa cisubulo mbuli kubbadelesya naa kubikka muntu muntolongo. (Rom. 13:2-4) Ino baalu bajisi mukuli nzi ciindi umwi mumbungano naacita cibi cipati? Babelesya Magwalo nobalanganya makani alimwi akukosola twaambo. Balayeeya lyoonse kuti luyando mpaayeeme mulawo wa Kristo. Luyando lukulwaizya baalu kulibuzya kuti: Ncinzi ceelede kucitwa kutegwa agwasyigwe muntu uuli woonse mumbungano iwacita cibi cipati? Kujatikizya muntu ooyo iwacita cibi, luyando lukulwaizya baalu kulibuzya kuti: Sena weempwa? Sena inga twamugwasya kubambulula cilongwe cakwe a Jehova? w19.05 7 ¶23-24

Jesu wakalizyi kuti Bausyi mbobakali Kasensa kabuumi bwakwe alimwi mbobakali kupa kuti kapona kwiinda mukwaamba majwi aali atala aawa. Jesu wakali kubasyoma Bausyi cakumaninina, aboobo bakamupa zintu zyakumubili nzyaakali kuyandika. Kwiinda zyoonse, Jehova wakamugwasya Jesu kutegwa azumanane kusyomeka kulinguwe. (Mt. 4:4) Jehova ulatupa zintu nzyotuyandika kumuuya. Kwiinda mu Jwi lyakwe, wayubununa kasimpe kajatikizya nguwe, makanze aakwe, mpindu yabuumi alimwi aziyoocitika kumbele. Wakatugwasya kwiinda mukubelesya bazyali besu naa bamwi buyo kutuyiisya kujatikizya nguwe. Alimwi wazumanana kutugwasya kuba balongwe bakwe kwiinda mubaalu basiluyando alimwi abakwesu abacizyi bamwi ibasimide kumuuya. Kuyungizya waawo, Jehova ulatuyiisya kwiinda mumiswaangano yesu yambungano, kwalo nkotuyiisyigwa antoomwe amukwasyi wesu wakumuuya. Kwiinda munzila eezyi alimwi azimwi, Jehova ulatondezya luyando kulindiswe toonse.—Int. 32:8. w20.02 3 ¶8; 5 ¶13

Tatukonzyi kuba aluumuno ikuti twalekela munyono kukomena mulindiswe. Tweelede kuugusya munyono mumoyo wesu alimwi tweelede kweeleba kucita zintu izikonzya kupa kuti bamwi batufwide munyono. Ino ncinzi ncotukonzya kucita kutegwa tugwasye bamwi kulwana munyono, alimwi ino mbuti mbotukonzya kukulwaizya luumuno? Mbotucita zintu kulakonzya kubajatikizya kapati bamwi. Nyika iyanda kuti katucita “mambonwa” akaambo kazintu nzyotujisi. (1Joh. 2:16) Pele muuya ooyo ukulwaizya munyono. Tulakonzya kweeleba cilengwa cakupa bamwi kuba amunyono kwiinda mukutaciindizya kwaamba makani aajatikizya zintu nzyotujisi, nzyotukanza kucita naa kuula. Nzila iimbi mbotukonzya kweeleba cilengwa cakupa bamwi kuba amunyono nkwiinda mukulicesya ikuti naa katujisi mikuli mumbungano. Ikuti katuciindizya kwaamba kujatikizya mikuli njotujisi, inga twapa kuti munyono ukomene muli bamwi. Mukwiimpana, ciindi notutondezya kuti tulababikkila maano kapati bamwi akubona bubotu mbobacita, tulabagwasya kulimvwa kukkutila alimwi kwiinda mukucita boobo, inga twakulwaizya lukamantano alimwi aluumuno mumbungano. w20.02 18 ¶15-16

Mulakonzya kwiiya kujatikizya Jehova kuzwa kuzilenge zyakwe. (Ciy. 4:11) Amuzinzibale kuyeeya kujatikizya busongo mbwajisi Jehova kuzwa kuzisamu alimwi akubanyama. Amwiiye kujatikizya mboupangidwe munzila mbotu kapati mubili wanu. (Int. 139:14) Amuyeeye kujatikizya nguzu nzyaakabikka Jehova kuzuba alimwi akuti kuli amabbiliyoni aambi aanyenyeezi. (Is. 40:26) Nomuyeeya kujatikizya zintu nzyaakalenga Jehova, ciyoopa kuti mumulemeke kapati. Nokuba boobo, ikuzyiba kuti Jehova musongo alimwi akuti ulaanguzu kapati matalikilo buyo aakuba acilongwe anguwe. Pele kutegwa cilongwe canu a Jehova ciyume, mweelede kuzyiba zinji kujatikizya nguwe. Mweelede kuba alusyomo lwakuti Jehova ulamubikkila maano nywebo kumugama. Amuzyibe ‘ikuti mwamuyandaula, uyoomulekela kuti mumujane.’ (1Mak. 28:9) Jehova umwaambila kuti, “ndakukwelela kulindime.” (Jer. 31:3) Mbomunooyabuzyiba zintu zyoonse Jehova nzyaakamucitila, alwalo luyando lwanu kulinguwe luyookomena. w20.03 4 ¶6-7

Mwaapostolo Paulo wakapa cikozyanyo cibotu cakubikka mulimo wakukambauka mubusena bwakusaanguna mubuumi bwakwe. Ciindi naakali ku Korinto mulweendo lwakwe lwabili lwabumisyinali, wakajisi buyo mali masyoonto, aboobo ciindi cimwi wakeelede kucibelesya kumulimo wakusuma matente. Wakali kubeleka mulimo ooyu kutegwa kaligwasya mumulimo wakukambauka, kwaambila bana Korinto makani mabotu “kakunyina kubbadelwa.” (2Kor. 11:7) Nokuba kuti Paulo wakali kubeleka mulimo wakumubili, wakazumanana kubikka mulimo wakukambauka mubusena bwakusaanguna, alimwi wakali kukambauka mu Sabata imwi aimwi. Ciindi bukkale nobwakaba kabotu, Paulo wakacikonzya kubikkila kapati maano kukukambauka. “Wakatalika kubelesya ciindi cakwe coonse kukukambauka jwi lya Leza, kapa bumboni kuba Juda kutegwa asinizye kuti Jesu ngo Kristo.” (Mil. 18:3-5; 2Kor. 11:9) Mukuya kwaciindi, naakaangidwe muŋanda yakwe ku Roma kwamyaka yobilo, Paulo wakali kubakambaukila bantu ibakali kumuswaya alimwi wakali kulemba amagwalo. (Mil. 28:16, 30, 31) Paulo wakakanzide kutalekela cintu cili coonse kumunyonganya mulimo wakwe. w19.04 4 ¶9