April

Arisitarko, wakali Munakristo waku Tesalonika yalo iyakali mu Makedoniya, wakatondezya kuti wakali mulongwe uusyomeka kumwaapostolo Paulo. Makani aakusaanguna ngotubala mu Bbaibbele kujatikizya Arisitarko, ngaayo aakacitika ciindi Paulo naakaswaya ku Efeso mulweendo lwakwe lwatatu lwabumisyinali. Ciindi naakali kusindikila Paulo, Arisitarko wakajatwa ankamu yabantu. (Mil. 19:29) Mpoonya nobakamulekezya, kunyina naakajana nzila yakulikwabilila alikke, pele cakusyomeka wakakkala antoomwe a Paulo. Nokwakainda myezi iili mbwiibede ku Girisi, Arisitarko wakacili antoomwe a Paulo nokuba kuti basikukazya bakazumanana kuyanda kumujaya Paulo. (Mil. 20:2-4) Kuma 58 C.E. ciindi Paulo naakatumwa ku Roma kali mwaange, Arisitarko wakamusangana mulweendo oolo lulamfwu alimwi bwato mbobakatantide bwakanyonyooka munzila. (Mil. 27:1, 2, 41) Nobakasika ku Roma, kulibonya kuti wakakkala kwaciindi cili mbocibede muntolongo antoomwe a Paulo. (Kol. 4:10) Aboobo tacidoonekwi kuti Paulo wakakulwaizyigwa alimwi akuumbulizyigwa amulongwe ooyo uusyomeka! Mbubwenya mbuli Arisitarko, tulakonzya kuba mulongwe uusyomeka kwiinda mukukakatila kubakwesu abacizyi ikutali buyo muziindi zibotu pele alimwi ‘amuziindi zyamapenzi.’ w20.01 9 ¶4-5

Muntu iwananikwa ulakonzya kulimvwa kuteelela kupegwa coolwe eeci citaliboteli. Pele kunyina nadooneka naaceya kuti Jehova wakamusala. Muciindi caboobo, ulakkomana kapati alimwi akulumba ciindi nayeeya kujatikizya bulangizi bwakwe bwakuyoopona kujulu. (1Pet. 1:3, 4) Aboobo sena eeci caamba kuti bananike balalombozya kufwa? Mwaapostolo Paulo ulawiingula mubuzyo ooyu. Wakakozyanisya mibili yabo yanyama kutente akwaamba kuti: “Mubwini, swebo notuli mutente eeli tulatongela, tulalibilika kapati, nkaambo tatuyandi kuti tulisamunune eeli pe, pele tuyanda kusama leelyo limbi ikutegwa eeli ilifwa limenwe abuumi.” (2Kor. 5:4) Banakristo aaba tabalendeledwe abuumi bwaanyika akuti bayanda kufwa cakufwambaana. Muciindi caboobo, balakkomana alimwi balayanda kubelesya buzuba bumwi abumwi kubelekela Jehova amikwasyi yabo alimwi abalongwe. Aboobo kufwumbwa ncobacita, lyoonse balayeeya kujatikizya bulangizi butaliboteli mbobajisi kumbele.—1Kor. 15:53; 2Pet. 1:4; 1Joh. 3:2, 3. w20.01 23 ¶12-13

Kutegwa atuyiisye, Taateesu siluyando ulatulaya ciindi nokuyandika kucita boobo. Ulacita oobo munzila zinji. Mucikozyanyo, nzyotubala mu Jwi lyakwe naa nzyotwiiya kumiswaangano yesu zilakonzya kutululamika. Naa ambweni lugwasyo ndotuyandika lulakonzya kuzwa kubaalu. Kufwumbwa nzila Jehova njakonzya kubelesya kutululamika, ulacita oobo akaambo kakuti ulatuyanda. (Jer. 30:11) Jehova ulatugwasya kuliyumya mumasunko. Mbubwenya mbuli usyi muntunsi siluyando mbwagwasya bana bakwe muziindi zikatazya, Taateesu wakujulu ulatugwasya kuliyumya mumasunko. Ubelesya muuya wakwe uusalala kutukwabilila kucintu cili coonse icikonzya kutunyonganya kumuuya. (Lk. 11:13) Alimwi Jehova ulatugwasya ciindi notutyompedwe. Mucikozyanyo, ulatupa bulangizi bukkomanisya. Bulangizi bwakumbele oobo bulatugwasya kuliyumya mumapenzi. Amubone kaambo aaka: Kufwumbwa cintu cibyaabi citucitikila, Taateesu siluyando uyoocigwisya. Kufwumbwa masunko ngotujisi, ngakaindi buyo kasyoonto, pele zilongezyo nzyapa Jehova ziyoozumanana mane kukabe kutamani.—2Kor. 4:16-18. w20.02 5 ¶14-15

Tulakonzya kuuzunda munyono! Atucilange-lange cikozyanyo cabanabokwabo Josefa. Nokwakainda myaka minji kuzwa ciindi nobakamusambala Josefa, bakamujana ku Egepita. Josefa katanaliyubununa kubanabokwabo, wakabasunka kutegwa abone naa bakalicincide. Wakapanga bubambe bwacakulya mpoonya mwanookwabo Benjamini wakamupa cinji kwiinda bamwi. (Matl. 43:33, 34) Nokuba boobo, kunyina bumboni ibutondezya kuti banabokwabo bakamufwida munyono Benjamini. Muciindi caboobo, bakamubikkila maano kapati mwanookwabo alimwi abausyi, ba Jakobo. (Matl. 44:30-34) Akaambo kakuti banabokwabo Josefa bakalilekede kuba amunyono, bakacikonzya kupilusya luumuno mumukwasyi wabo. (Matl. 45:4, 15) Mbubwenya buyo, kuti twaugwisya munyono uuli woonse mumoyo wesu, tuyoopa kuti luumuno luzumanane mumukwasyi wesu alimwi amumbungano yesu. Jehova uyanda kuti tuulwane munyono alimwi akuyandaula luumuno. Kuti katuli bantu balicesya, bakkutila alimwi ibalumba, tatukabi amunyono pe. w20.02 19 ¶17-18

Nzila imwi mbotukonzya kutondezya kuti tulamuyanda Jehova, nkwiinda mukubandika anguwe mumupailo. Luyando lwanu kuli Jehova luyookomena ciindi nomumwaambila zintu nzyomulibilika alimwi akumulumba akaambo kazintu zyoonse nzyamucitila. Kuyungizya waawo, cilongwe canu anguwe ciyooyuma ciindi nomubona mbwaingula mipailo yanu. Kwiinda mukucita boobo, muyooba alusyomo lwakuti ulamubikkila maano. Pele kutegwa mube acilongwe ciyumu a Jehova, mweelede kuzyiba zintu nzyayanda, nzyatayandi alimwi ancacitila zintu zimwi. Kunze lyaboobo, mweelede kuzyiba ncayanda kulindinywe. Nzila ilikke iikonzya kumugwasya kutegwa mube aluzyibo oolo, nkwiinda mukwiiya Jwi lyakwe, Bbaibbele. Amutondezye kuti mulalumba. Ibbaibbele lilikke ndelijisi kasimpe kajatikizya Jehova alimwi amakanze ngajisi kulindinywe. Mulakonzya kutondezya kuti mulalumba kujatikizya Bbaibbele kwiinda mukulibala abuzuba, kwiinda mukulibambila ciiyo ca Bbaibbele ncomwiiya abaabo ibamuyiisya, alimwi akwiinda mukuzibelesya nzyomwiiya. (Int. 119:97, 99; Joh. 17:17) Sena mulijisi mulongo wakubala Bbaibbele? Sena mulautobela mulongo ooyo? w20.03 5 ¶8-9

Ikuti kamutacikonzyi kweenda misinzo milamfwu, mulakonzya kukkala abusena aayinda bantu banji akubakambaukila. Ambweni mulakonzya kucita bukambausi bwamukwiizya, kulemba magwalo naa bukambausi bwaafooni. Basikumwaya banji ibatacikonzyi kukambauka kuŋanda aŋanda mbuli mbobayanda akaambo kakuciswa-ciswa naa mapenzi aamwi buyo, balakonzya kukkomana kapati kubelesya nzila eezyi zimbi zyakukambauka. Nokuba kuti mulaciswa-ciswa, mulakonzya kuuzuzikizya cakumaninina mulimo wanu. Paulo wakaamba kuti: “Muzintu zyoonse ndilijisi nguzu kwiinda muli yooyo uundipa nguzu.” (Flp. 4:13) Paulo wakali kuyandika nguzu eezyo ciindi naakaciswa mulweendo lwakwe lwabumisyinali lumwi. Wakaambila bana Galatiya kuti: “Kuciswa nkondakaciswa nkokwakandipa coolwe cakuti ndaambilizye makani mabotu kulindinywe ciindi cakusaanguna.” (Gal. 4:13) Mbubwenya buyo, kuciswa-ciswa kulakonzya kumupa coolwe cakubakambaukila makani mabotu bamwi, mbuli bamadokota, bamanesi, alimwi abamwi ibagwasyilizya kumulanganya. Bunji bwabantu aaba inga bali kumulimo ciindi basikumwaya nobaswaya kumaanda aabo. w19.04 4-5 ¶10-11

Mu 2018, basikumwaya bamakani mabotu ibainda ku 223,000 bakali kukkala mumasena milimo yesu yakumuuya moyakalesyedwe. Eeci tacigambyi pe. Banakristo bakasimpe balangila kupenzyegwa. Kufwumbwa naa tukkala kuli, cakutayeeyela mfwulumende ilakonzya kutulesya kukomba Leza wesu siluyando, Jehova. Ikuti mfwulumende yabulesya bukombi bwesu, tulakonzya kuyeeya kuti Leza tacitukkomanini. Pele amuyeeye kuti, kupenzyegwa tacaambi kuti Jehova tatukkomanini. Amubone cikozyanyo camwaapostolo Paulo. Leza wakali kumukkomanina. Wakaba acoolwe cakulemba Magwalo aa Banakristo aa Chigiriki aali 14 alimwi wakali mwaapostolo kuli bamasi. Nokuba boobo, Paulo wakapenzyegwa citaambiki. (2Kor. 11:23-27) Aboobo icakacitikila mwaapostolo Paulo cituyiisya kuti zimwi ziindi Jehova ulazumizya babelesi bakwe basyomeka kupenzyegwa. w19.07 8 ¶1, 3

Nzila imwi iikkomanisya kapati Jehova mwatondezya kuti ulatubikkila maano tobabelesi bakwe nkwiinda mukutugwasya kukazya basinkondoma. Basinkondoma ibatulwana kapati ngu Saatani alimwi amadaimona. Jehova ulatucenjezya kujatikizya basinkondoma aaba, alimwi ulatupa nzyotuyandika kutegwa tubakazye. (Ef. 6:10-13) Ikuti twalutambula lugwasyo lwa Jehova alimwi akumusyoma cakumaninina, tulakonzya kuzwidilila mukukazya Diabolosi. Tulakonzya kuba alusyomo mbuli ndwaakajisi mwaapostolo Paulo. Wakalemba kuti: “Ikuti Leza kalaandiswe, ino nguni uukonzya kutulwana?” (Rom. 8:31) Mbotuli Banakristo bakasimpe, tatumubikkili kapati maano Saatani alimwi amadaimona. Tubikkila kapati maano kwiiya kujatikizya Jehova alimwi akumubelekela. (Int. 25:5) Nokuba boobo, tweelede kuzyiba kujatikizya zintu nzyacita Saatani. Nkaambo nzi? Kutegwa tuteenwi anguwe.—2Kor. 2:11; bupanduluzi buyungizyidwe. w19.04 20 ¶1-2

Ciindi notubandika amuntu uutyompedwe, sena tuli baswiilizi babotu? Kuba muswiilizi mubotu kubikkilizya zinji kutali kumulanga buyo muntu ooyo waambaula kakunyina kwaamba cili coonse. Tulakonzya kutondezya lweetelelo alimwi alubomba ciindi notuswiilila. Zimwi ziindi, majwi masyoonto aambwa cabupampu alimwi munzila iikulwaizya alakonzya kutondezya mbotulimvwide. Mulakonzya kwaamba kuti: “Ndausa kapati kuti eeci ncicakamucitikila!” Ambweni mulakonzya kubuzya mubuzyo omwe naa yobilo ikutegwa musinizye kuti mwacimvwisya ncasola kwaamba mulongwe wanu uutyompedwe. Mulakonzya kubuzya kuti, “Ino mupandulula nzi?” naa “Ciindi nomwaamba kaambo aako, mebo ndali kuyeeya kuti mwaamba kuti . . . Sena mbombubo?” Majwi aali boobu aambwa munzila yaluyando alakonzya kupa muntu ooyo kubona kuti mulamuswiilila ncobeni alimwi akubona kuti mwacimvwisya ncali mukwaamba. (1Kor. 13:4, 7) Nokuba boobo, mweelede kucenjela “kumuka kwaambaula.” Tamweelede kufwambaana kupa lulayo naa kululamika mbwayeeya muntu ooyo. Alimwi mweelede kukkazika moyo! Muciindi cakusola kubaambila ncobeelede kucita, tweelede kutondezya lweetelelo alimwi alubomba.—1Pet. 3:8. w19.05 17-18 ¶15-17

Mumukwasyi, mulumi weelede kumuyanda mukaintu wakwe “mbubonya awalo Kristo mbwaakayanda mbungano.” (Ef. 5:28, 29) Mulumi weelede kwiiya luyando lwa Kristo lwakulyaaba kwiinda mukubikka ziyandika zyamukaintu wakwe mubusena bwakusaanguna. Bamaalumi bamwi cilakonzya kubakatazya kutondezya luyando luli boobu, ambweni akaambo kakuti bakakomenena mumukwasyi mobatakali kukubikkila maano kweendelezya bamwi cabululami alimwi acaluyando. Cilakonzya kubayumina kuleka ziyanza zibyaabi, pele beelede kucinca kutegwa batobele mulawo wa Kristo. Mulumi uutondezya luyando lwakulyaaba ulalemekwa kumukaintu wakwe. Usyi uubayanda ncobeni bana bakwe takonzyi kubeendelezya calunya kwiinda muzintu nzyaamba naa kucita. (Ef. 4:31) Muciindi caboobo, ulatondezya kuti ulabayanda bana bakwe alimwi ulabakkomanina kutegwa kabalimvwa kukwabililwa. Usyi uuli boobu ulayandwa alimwi ulasyomwa abana bakwe. w19.05 6 ¶21

Ino majwi aayo akali kupandulula nzi kuli Mariya. Sena Mariya wakayeeya kuti majwi aa Gabriyeli akali kupandulula kuti Jesu wakali kuyoonjila mubusena bwa Mwami Heroda naa mubusena bwaumwi wabaabo ibakali kuyoolida Heroda busena kali muleli mu Israyeli? Ikuti naa Jesu waba mwami, nkokuti Mariya wakali kuyooba banyina mwami alimwi mukwasyi wakwe wakali kuyookkala muŋanda yamwami. Pele kunyina mpotubala kuti Mariya wakalomba cuuno caatala mu Bwami. Mariya wakali mukaintu uulicesya kapati! Atuyeeye kuti kaambo kapati ikatupa kubala Jwi lya Leza alimwi amabbuku eesu aa Bunakristo nkakuyumya cilongwe cesu a Jehova. Alimwi tuyanda kuzyiba bwini ‘mbotulibonya’ ampotweelede kubambulula kutegwa tumukkomanisye Leza. (Jak. 1:22-25; 4:8) Aboobo, kumatalikilo aacibalo cimwi acimwi, tweelede kulomba lugwasyo lwamuuya uusalala kuli Jehova. Tweelede kumulomba kuti atugwasye kujana ziiyo zigwasya mucibalo alimwi akulibona mbuli mbwatubona walo. w19.05 31 ¶18-19

Zimwi ziindi, tulakonzya kujana mapenzi manji aaciindi comwe. Amubone zikozyanyo eezyi zitobela. Kamboni wazina lyakuti John, uuciswa bulwazi bwansinga amilambi (multiple sclerosis), wakausa kapati ciindi mukaintu wakwe ngobakakwetene limwi kwamyaka iili 19 naakamusiya. Mpoonya bana bakwe basimbi bobilo bakacileka kubelekela Jehova. Banabukwetene, ba Bob alimwi aba Linda, bakajana mapenzi aayindene aaba John. Boonse bobilo bakalesyegwa milimo, mpoonya bakalonga muŋanda mobakali kukkala. Kuyungizya amapenzi aayo, badokota bakaambila ba Linda kuti bakajisi bulwazi bwamoyo ibwakali kukonzya kubajaya, alimwi bakajanwa abulwazi bumbi ibwakali kunyonyoona nguzu zyamumubili zyalo izipa kuti mubili kaucikonzya kulwana malwazi. Tulakonzya kuba masimpe kuti Mulengi wesu alimwi Taateesu siluyando, Jehova, ulamvwisya mbotulimvwa ciindi notucitikilwa zintu izityompya. Uliyandide kutugwasya kutegwa twaalwane mapenzi ngotujana. (Flp. 4:6, 7) Ijwi lya Leza lilijisi zikozyanyo zinji izitondezya buyumuyumu babelesi bakwe mbobakaliyumya. Kuyungizya waawo, lilapandulula mbwaakabagwasya Jehova kuzunda bukkale oobo ibutyompya. w19.06 14 ¶2-3

Ciindi notucita tuntu tusyoonto-syoonto tutondezya luzyalo kuli baabo ibatacikwete naa kukwatwa, tutondezya kuti tulabayanda kapati. Akaambo kakuti lino bali balikke, bayandika balongwe ibali kabotu. Mbuti mbomukonzya kutondezya kuti muli balongwe babo? Mulakonzya kubatamba kucakulya. Kuyungizya waawo, mulakonzya kulyaaba kuba ambabo ciindi nomulikondelezya naa kubeleka ambabo mumulimo wamumuunda. Zimwi ziindi mulakonzya kubatamba kuti bamusangane ciindi cakukomba mumukwasyi. Kuti mwacita oobo, muyoopa kuti Jehova akkomane, nkaambo “ulaafwaafwi abaabo batyompedwe mumoyo” alimwi “mukwabilizi wabamukabafwu.” (Int. 34:18; 68:5) Lino-lino, ciindi Bwami bwa Leza bwaakulela nyika, ‘mapenzi woonse ayoolubwa.’ Eelo kaka tulangila kumbele ciindi ‘zintu zyakaindi nozitakaibalukwi limbi pe, nokuba kuyeeyegwa mumoyo.’ (Is. 65:16, 17) Kusikila kubuzuba oobo, atugwasyanye alimwi akutondezya kwiinda mumajwi alimwi amumicito kuti tulabayanda boonse ibali mumukwasyi wesu wakumuuya.—1Pet. 3:8. w19.06 25 ¶18-19

Kaindi, Ngazi Yamulindizi imwi yakati: “Imuntu uumuzyi kabotu Leza, ngonguwe uuyoomusyoma kapati ciindi camasunko.” Eelo kaka nkamasimpe kaambo aaka! Kutegwa tuliyumye ciindi notupenzyegwa, tweelede kumuyanda Jehova akumusyoma cakumaninina. (Mt. 22:36-38; Jak. 5:11) Amubale Bbaibbele abuzuba kamujisi makanze aakuyumya cilongwe canu a Jehova. (Jak. 4:8) Ciindi nomubala, amubikkile maano kubube bubotu mbwajisi Jehova. Amusoleke kuzyiba mbwamuyanda ciindi nomubala kujatikizya zintu nzyaamba alimwi akucita. (Kul. 34:6) Bamwi cilakonzya kubakatazya kusyoma kuti Leza ulabayanda akaambo kakuti kunyina nobakatondezyedwe kale luyando. Kuti naa mbomulimvwa oobo, abuzuba amusole kulemba nzila mwalo Jehova mwatondezya luse alimwi aluzyalo kulindinywe. (Int. 78:38, 39; Rom. 8:32) Ciindi nomulanga-langa izyakamucitikila alimwi akuzinzibala kuyeeya nzyomubala mu Jwi lya Leza, muyoocikonzya kulemba zintu zinji nzyaakamucitila Jehova. Ikuti kamutondezya kulumba kuzintu nzyamucitila Jehova, cilongwe canu anguwe cilayuma kapati.—Int. 116:1, 2. w19.07 2-3 ¶4-5

Jehova kunyina naakatupa nguzu zyakusalila bamwi zintu nzyobeelede kucita. Muntu uubikkila basyominyina milawo iitayandiki mubwini tabakwabilili pe, pele usola kuba simalelo walusyomo lwabo. Saatani Diabolosi, takaleki kusola kubapenzya babelesi ba Jehova basyomeka. (1Pet. 5:8; Ciy. 2:10) Saatani alimwi abaabo ibali kulubazu lwakwe bayoosola kulesya bukombi bwesu. Nokuba boobo, tatweelede kutyompwa akaambo kakuyoowa! (Dt. 7:21) Jehova uli kulubazu lwesu alimwi unootugwasya lyoonse nociba ciindi mulimo wesu nowalesyegwa. (2Mak. 32:7, 8) Atube amakanze akozyenye angobakajisi bakwesu bamumwaanda wamyaka wakusaanguna. Bakaambila beendelezi bamumazuba aabo kuti: “Naa cililuleme mumeso aa Leza kumvwida ndinywe muciindi cakumvwida Leza, amulisalile nobeni. Pele swebo, tatukonzyi kuleka kwaamba zintu nzyotwakabona akumvwa.”—Mil. 4:19, 20. w19.07 13 ¶18-20

Ciindi notukambauka, tweelede kusolekesya kuzyiba twaambo itupa kuti bantu mbotuswaanganya kabayeeya munzila mbobayeeya. Mwaapostolo Paulo wakakomenena akati kaba Juda. Cakutadooneka wakeelede kucinca ciindi naakali kukambaukila Bamasi, ibantu bakajisi buyo luzyibo lusyoonto naa ambweni ibatakajisi luzyibo luli loonse kujatikizya Jehova alimwi a Magwalo. Ambweni inga twayandika kuvwuntauzya kutegwa tucikonzye kubeetelela alimwi akubamvwisya mbobayeeya ambobalimvwa bantu mucilawo cesu. (1Kor. 9:20-23) Makanze eesu ngakujana bantu ‘beelela.’ (Mt. 10:11) Kutegwa tucite oobo, tweelede kubapa ciindi cakwaamba mbobayeeya alimwi akuswiililisya ciindi nobaambaula. Mukwesu umwi ku England ulababuzya bantu kwaamba mbobayeeya kujatikizya mbobakonzya kuba alukkomano mulukwatano, mbobakonzya kukomezya bana naa mbobakonzya kuliyumya ciindi nobeendelezyegwa cakutalulama. Amana kumvwa mbobayeeya, ulababuzya kuti, “Ino muyeeya buti kujatikizya lulayo oolu ilwakalembwa myaka iitandila ku 2,000 yainda?” Mpoonya kakunyina kwaamba bbala lyakuti “Bbaibbele,” ulabatondezya magwalo ngaakasalila limwi kwiinda mukubelesya fooni. w19.07 21-22 ¶7-8

Ino mbuti mbotweelede kumuyanda Leza? Jesu wakaambila mu Farisi kuti: “Weelede kuyanda Jehova Leza wako amoyo wako woonse, abuumi bwako boonse alimwi amizeezo yako yoonse.” (Mt. 22:36, 37) Tweelede kumuyanda Leza amoyo wesu woonse. Kuyungizya waawo, tuyanda kuti luyando ndotujisi kulinguwe kaluyaabukomena buzuba abuzuba. Kutegwa tumuyande Leza, tweelede kumuzyiba kabotu. Bbaibbele lyaamba kuti: “Kufwumbwa muntu uutatondezyi luyando tanamuzyiba Leza pe, nkaambo Leza nduyando.” (1Joh. 4:8) Mwaapostolo Paulo wakatondezya kuti luyando ndotujisi kuli Leza lulakonzya kuzumanana kukomena ciindi notuba “aluzyibo lwini-lwini alimwi akumvwisya koonse” kujatikizya nguwe. (Flp. 1:9) Ciindi notwakatalika kwiiya Bbaibbele, twakatalika kumuyanda Leza nokuba kuti tiitwakazyi zintu zyoonse kujatikizya nguwe. Mpoonya mbotwakali kuyaabwiiya zinji kujatikizya Jehova, alwalo luyando lwesu kulinguwe lwakali kuyaabukomena. Nkakaambo kaako, kubala Bbaibbele alimwi akuzinzibala kuyeeya nzyotubala tukubona kuba cintu icili akati kazintu ziyandika kapati mubuumi bwesu!—Flp. 2:16. w19.08 9 ¶4-5

Ikuti kamuli kubusena bumbi, mweelede kujana balongwe bapya. Amuyeeye kuti kutegwa mujane balongwe, mweelede kuba aluzyalo. Amwaambile bamwi zyakuluula izikulwaizya nzyomwakajana mumulimo wa Jehova kutegwa balubone lukkomano lwanu. Ikuti naa mwakaleka mulimo ngomwakali kubeleka akaambo kakuti ngomukwetene limwi wakatalika kuciswa-ciswa, mutamupi mulandu. Kulubazu lumwi, ikuti naa ndinywe mwakali kuciswa-ciswa, tamweelede kulipa mulandu akuyeeya kuti mwakamutyompya ngomukwetene limwi. Amuyeeye kuti muli “mubili omwe” alimwi mwakakonka kuli Jehova kuti munoobikkilana maano ziyume zitete. (Mt. 19:5, 6) Ikuti naa mwakaleka mulimo wanu akaambo kakuti mukaintu wanu wakamita cakutayeeyela, amumwaambile mwanaanu kuti mulamuyanda kapati kwiinda mulimo ngomwakali kubeleka. Amumwaambile kuti mumubona kuti “mbulumbu” kuzwa kuli Leza. (Int. 127:3-5) Kuyungizya waawo, amumwaambile zyakuluula zikkomanisya nzyomwakajana mumulimo wanu. Kucita boobo kulakonzya kumukulwaizya mwanaanu kuyoobelekela Jehova mumulimo waciindi coonse mbuli mbomwakacita. w19.08 22 ¶10-11

Babuloni Mupati, ibulelo bwanyika yoonse bwabukombi bwakubeja walisampaula kapati zina lya Leza. Wayiisya zyakubeja kujatikizya Leza. Mbubwenya mbuli mukaintu muvwuule, tanaali kusyomeka kuli Jehova kwiinda mukugwasyilizya mfwulumende. Wali kubadyaaminina alimwi akubabbida mali bantu bakwe. Alimwi wajaya bantu banji, kubikkilizya ababelesi ba Leza bamwi. (Ciy. 18:24; 19:2) Jehova uyoomunyonyoona “muvwuule imupati” kwiinda mukubelesya “meja aali kkumi” “aamunyama uusalala pyu.” Munyama ooyo wacikozyanyo wiiminina United Nations (Lukamantano Lwazisi). Meja aali kkumi ayiminina mfwulumende izigwasyilizya mbunga eeyo. Aciindi ncabikkide Leza, mbunga zyatwaambo twacisi eezyo ziyoomulwana Babuloni Mupati. “Ziyoomusaala akumusiya mantanda” kwiinda mukumunyanga lubono lwakwe alimwi akuyubununa zibi zyakwe kubantu boonse. (Ciy. 17:3, 16) Lunyonyooko oolo luyoocitika muciindi cisyoonto, luyooba mbuli kuti lwacitwa mubuzuba bomwe buyo. Aboobo aabo ibagwasyilizya bukombi bwakubeja bayoogambwa akaambo kakuti muvwuule imupati wakali kulisumpula akwaamba kuti: “Ndilikkede aano ndemwami mukaintu, tandili mukamufwu alimwi kunyina pe nondiyakoomoka kulila.”—Ciy. 18:7, 8. w19.09 10 ¶10-11

Kutamba ooku kulapegwa kubantu boonse alimwi Jesu kunyina nayakukaka kutambula muntu uuli woonse uuyanda ncobeni kubelekela Leza. (Joh. 6:37, 38) Basikutobela Kristo boonse balipedwe coolwe cakutola lubazu mumulimo Jehova ngwaakapa Jesu kuti aubeleke. Tulakonzya kuba masimpe kuti Jesu unooli andiswe lyoonse kutegwa atugwasye kuubeleka mulimo ooyu. (Mt. 28:18-20) Bantu balicesya bakali kukwelelezyegwa kuli Jesu. (Mt. 19:13, 14; Lk. 7:37, 38) Nkaambo nzi? Atubone kwiindana ikwakaliko akati ka Jesu alimwi aba Farisi. Basololi bazikombelo aaba tiibakajisi luyando alimwi bakali kulisumpula. (Mt. 12:9-14) Jesu wakali siluyando alimwi uulicesya. Ba Farisi bakali kulisumpula akaambo kazyuuno zyaatala nzyobakajisi. Jesu wakaukasya muuya wakulisumpula ooyu, wakayiisya basikwiiya bakwe kulicesya alimwi akubelekela bamwi. (Mt. 23:2, 6-11) Ba Farisi bakali kudyaaminina bamwi kwiinda mukubakonga. (Joh. 9:13, 22) Jesu wakali kubakatalusya bamwi kwiinda mumilimo yaluyando alimwi amajwi aaluzyalo. Sena mulamwiiya Jesu? w19.09 20 ¶1; 21 ¶7-8; 23 ¶9

Miswaangano ilatugwasya kuba acilongwe ciyumu a Jehova. Kujanika kumiswaangano kutondezya mbotuyoocikonzya kuliyumya kumapenzi aaboola kumbele. (Heb. 10:24, 25) Nkaambo nzi ncotwaambila boobo? Mazuba aano, tulakonzya kulekela tuntu tusyoonto-syoonto kutupa kwaalilwa kujanika kumiswaangano. Ino ncinzi ciyoocitika kumbele ciindi notuyooyandika kubikka buumi bwesu muntenda kutegwa katuswaangana antoomwe abasyomima? Kulubazu lumwi, ikuti naa katujisi makanze aakujanika kumiswaangano lino, tatukaleki ciindi basikukazya baakusola kutulesya kubungana antoomwe. Ecino nceciindi ncotweelede kwiiyandisisya kapati miswaangano yesu. Ikuti naa katuyandisya kujanika kumiswaangano, kunyina basikukazya bali boonse, nouba mulawo wamfwulumende uukasya miswaangano yesu, uyootupa kumvwida bantu muciindi cakumvwida Leza. (Mil. 5:29) Amwaapete magwalo ngomuyandisya. (Mt. 13:52) Ambweni mulafwambaana kuluba, pele Jehova ulakonzya kubelesya muuya wakwe uusalala alimwi uulaanguzu kumuyeezya magwalo aayo ngomwakabala. (Joh. 14:26) Magwalo aayo ayoomugwasya kuzumanana kuba acilongwe ciyumu a Jehova alimwi akuliyumya cakusyomeka. w19.07 3 ¶5; 4 ¶8-9

Sena mwakazyalwa nowakainda mwaka wa 1914? Ikuti naa mboobo, nkokuti buumi bwanu boonse mwali kupona “kumazuba aamamanino” aabweende bwazintu obuno. Toonse twakamvwa kujatikizya zintu Jesu nzyaakasinsima kuti ziyoocitika kuciindi ecino. Eezyi zibikkilizya nkondo, nzala, mizuzumo yanyika, malwazi, kuvwula kwabubi alimwi akupenzyegwa kwabantu ba Jehova. (Mt. 24:3, 7-9, 12; Lk. 21:10-12) Alimwi twalibonena bantu kabapona kweelana ambwaakasinsima mwaapostolo Paulo. Mbotuli bakombi ba Jehova, tulisinizyide kuti tupona “kumamanino aamazuba aayo.” (Mik. 4:1) Akaambo kakuti kwainda ciindi cilamfwu kuzwa mu 1914, kweelede kuti lino tupona kumamanino ‘aamazuba aamamanino.’ Mbwaanga mamanino aabweende bwazintu alaafwaafwi kapati, tweelede kuzyiba bwiinguzi kumibuzyo eeyi iiyandika kapati: Nzintu nzi iziyoocitika kumamanino ‘aamazuba aamamanino’? Alimwi ino ncinzi Jehova ncayanda kuti tucite ciindi notulindila zintu eezyo kuti zicitike? w19.10 8 ¶1-2

Kuliyumya kwesu takuyeeme akubota kwabukkale. Tulakonzya kubuyumya bube oobu kwiinda mukusyoma Jehova. (Rom. 12:12) Cisyomezyo ca Jesu icili mulugwalo lwabuzuba bwasunu citondezya kuti tweelede kuzumanana kusyomeka tacikwe makani abuyumuyumu buli boonse mbotujisi. Kwiinda mukuliyumya musunko lili lyoonse lino, lusyomo lwesu luyooyuma kaatanatalika mapenzi mapati. Mbubwenya mbuli bube bwakuliyumya, tweelede kusyoma Jehova kutegwa tube abusicamba bwini-bwini. Mbuti mbotukonzya kumusyoma Jehova cakumaninina? Kwiinda mukubala Jwi lyakwe abuzuba alimwi akuzinzibala kuyeeya kujatikizya Jehova mbwaakabafwutula bantu bakwe kaindi. (Int. 68:20; 2Pet. 2:9) Ciindi beendelezi bamunyika baakutulwana lyamapenzi mapati, tuyooyandika kuba abusicamba kapati alimwi akumusyoma Jehova kwiinda lyoonse. (Int. 112:7, 8; Heb. 13:6) Ikuti twamusyoma Jehova lino, tuyooba abusicamba mbotuyandika ciindi aakutulwana Gogo. Tulisinizizye kuti Jehova uyoozumanana kutukwabilila.—1Kor. 13:8. w19.10 18 ¶15-16

Diabolosi ngomweendelezi wabweende bwazintu oobu. Ulabubelesya kutegwa atupe kubona zintu nzyobayandisya bantu kuti nzeziyandika kapati mubuumi bwesu alimwi upa kuti kacitukatazya kuzunda kulombozya zintu eezyi. (Ef. 2:1-3) Makanze aakwe ngakunyonganya luyando ndotujisi kuli Jehova kutegwa tutalyaabi cakumaninina kulinguwe. Naakamana kulemba kujatikizya mamanino aanyika ya Saatani alimwi anyika mpya iiboola, mwaapostolo Petro wakati: “Nobayandwa, mbwaanga nywebo mulindila zintu eezyi, amusoleke kusikila mpomugolela kuti kumamanino akamujane kamutajisi kabala nokaba kampenda alimwi kamuli muluumuno.” (2Pet. 3: 14) Ikuti twalutobela lulayo oolu alimwi akusolekesya kusikila mpotugolela kuzumanana kusalala mukulilemeka alimwi akumuuya, nkokuti tutondezya kuti tulilyaabide cakumaninina kuli Jehova. Saatani alimwi anyika yakwe bayoosola kutupa kubikka zintu zimbi mubusena bwakusaanguna muciindi cakubikka Jehova mubusena bwakusaanguna. (Lk. 4:13) Pele tacikwe makani abuyumu-yumu mbotukonzya kujana, tatukazumizyi muntu uuli woonse naa cintu cili coonse kutulesya kukomba buyo Jehova alikke. Tulikanzide kupa Jehova cintu iceelela buyo nguwe alikke, nkokuti kukomba buyo nguwe alikke! w19.10 27 ¶4; 31 ¶18-19

Kulibilika kumwi kuli kabotu. Mucikozyanyo, cili kabotu kulibilika kujatikizya mbotukonzya kukkomanisya Jehova alimwi a Jesu. (1Kor. 7:32) Ikuti twacita cibi cipati, tweelede kulibilika akubikkila maano kapati kujatikizya mbotukonzya kubambulula cilongwe cesu a Leza. Kuyungizya waawo, tweelede kulibilika kujatikizya mbotukonzya kukkomanisya muntu ngotukwetene limwi alimwi ambotukonzya kubikkila maano kuzintu nzyobayandika banamukwasyi alimwi abasyomima. (1Kor. 7:33; 2Kor. 11:28) Kulubazu lumwi, kulibilika kutayandiki kulakonzya kupa kuti katulibilika lyoonse kujatikizya mbotukonzya kujana cakulya alimwi azyakusama. (Mt. 6:31, 32) Aboobo kutegwa tukucesye kulibilika ooku, tulakonzya kutalika kubikkila maano kapati kukujana zintu zyakumubili. Ikuti naa twabulekela bukkale oobu, lusyomo lwesu muli Jehova lulakonzya kuceya alimwi cilongwe cesu anguwe cilakonzya kunyongana. (Mk. 4:19; 1Tim. 6:10) Ambweni tulakonzya kutalika kulibilika kujatikizya mbobatubona bantu bamwi. Mpoonya tulakonzya kutalika kuyoowa kusampaulwa naa kupenzyegwa abantu muciindi cakuyoowa kunyemya Jehova. Kutegwa tulikwabilile kuntenda eeyo, tweelede kumulomba Jehova kuti atupe lusyomo alimwi abusicamba mbotuyandika kutegwa tubuzunde buyumuyumu oobo.—Tus. 29:25; Lk. 17:5. w19.11 15 ¶6-7

Zyakusala zimwi iziyandika kapati tazikonzyi kucincwa. Mucikozyanyo, tulakakatila kukusala kwesu kwakubelekela Jehova, alimwi tulikanzide kuzumanana kusyomeka kumuntu ngotukwetene limwi. (Mt. 16:24; 19:6) Nokuba boobo, zyakusala zimwi, inga zyayandika kucinca. Nkaambo nzi? Nkaambo bukkale bulakonzya kucinca. Ino nintaamu nzi zikonzya kutugwasya kusala zintu zili kabotu? Amupaile kulomba busongo. Munzila imwi, inga twaamba kuti toonse ‘tulibulizyide busongo.’ Aboobo amumulombe Jehova kuti amugwasye ciindi nomuyanda kusala cakucita alimwi aciindi nomuyanda kucinca ncomwakasala. Ikuti mwacita oobo, Jehova uyoomugwasya kusala zintu zili kabotu. Amuvwuntauzye cakulomya. Amuvwuntauzye mu Jwi lya Leza, mumabbuku aazwa kumbunga ya Jehova alimwi akubandika abantu ibakonzya kumupa lulayo lwabusongo. (Tus. 20:18) Kucita boobo kulayandika kapati kamutanasala kucinca mulimo ngomubeleka, kulonga naa kusala lwiiyo luli kabotu kutegwa kamujana mali aakuligwasya ciindi nomubelekela Jehova. w19.11 27 ¶6-8

Cikkomanisya ncakuti Leza wakabikka bubambe bwakuti swebo tuvwunwe, naa kwaangununwa kucibi. Jesu nguupa kuti lwaanguluko oolu lukonzyeke. Kakucili myaka iinda ku 700 Jesu katanasika anyika, Isaya wakasinsima kujatikizya lwaanguluko lupati lwakumbele. Lwaanguluko lupati oolo lwakali kuyoozuzikizya zintu zinji kwiinda loolo ndobakali kuba andulo bana Israyeli ciindi ca Mwaka Walwaanguluko. Isaya wakalemba kuti: “Muuya wa Mwami Singuzuzyoonse Jehova ulaalindime, akaambo kakuti Jehova wakandinanika kuti ndaambile babombe myoyo makani mabotu. Wakandituma kuti ndaange zilonda zyabaabo batyompedwe mumoyo, kuti ndaambilizye lwaanguluko kubazike.” (Is. 61:1) Ino mbaani ibajatikizyidwe abusinsimi oobu? Businsimi oobu ibuyandika kapati ibujatikizya lwaanguluko bwakatalika kuzuzikizyigwa ciindi Jesu naakatalika mulimo wakwe. Ciindi naakaunka kucikombelo mumunzi okwabo ku Nazareta, Jesu wakabala businsimi bwa Isaya oobu kuba Juda ibakabungene mucikombelo oomo akulyaamba lwakwe mwini.—Lk. 4:16-19. w19.12 9-10 ¶6-8

Muyandika busicamba kutegwa muliyumye ciindi nomupenzyegwa. Aboobo ikuti naa mulimvwa kuti tamubujisi bube oobu, ino ncinzi ncomukonzya kucita? Amuyeeye kuti busicamba bwini-bwini tabuyeeme aciimo ncomujisi, nguzu naa luzyibo. Amubone cikozyanyo camulombe Davida ciindi naakali kuyanda kulwana Goliati. Goliati wakali mubbabbani, pele Davida wakali muniini kapati, tanaakajisi nguzu zinji alimwi tanaakajisi zilwanyo ziyandika. Davida tanaakajisi noliba panga. Nokuba boobo, wakali sicamba kapati. Cabusicamba, wakabalika kuyoolwana mubbabbani ooyo iwakali kulisumpula. Nkaambo nzi Davida ncaakali sicamba boobu? Akaambo kakuti wakali alusyomo luyumu lwakuti Jehova wakali anguwe. (1Sam. 17:37, 45-47) Davida tanaakabikkila maano kujatikizya mbwaakali mupati Goliati kulinguwe. Muciindi caboobo, wakabikkila maano kujatikizya mbwaakali muniini kapati Goliati kuli Jehova. Ncinzi ncotwiiya kucibalo eeci? Tuyooba basicamba ikuti katujisi lusyomo luyumu lwakuti Jehova ulaandiswe alimwi akuti katusinizyide kuti basikutukazya mbaniini kapati kuli Leza Singuzuzyoonse.—2Mak. 20:15; Int. 16:8. w19.07 5 ¶11-13

Tukiko wakali mulongwe Munakristo uusyomeka kapati kumwaapostolo Paulo. (Mil. 20:4) Kuma 55 C.E., Paulo wakabikka bubambe bwakuyobolola mali aakugwasyilizya Banakristo baku Judaya, alimwi weelede kuti wakalomba Tukiko kuti amugwasye mumulimo ooyu uuyandika kapati. (2Kor. 8:18-20) Kumbele, ciindi Paulo naakaangwa kwaciindi cakusaanguna ku Roma, Tukiko wakabeleka kali mutumwa wakwe. Wakali kutola magwalo aa Paulo alimwi amulumbe wakwe wakukulwaizya mbungano izyakali mu Asiya. (Kol. 4:7-9) Tukiko wakazumanana kuba mulongwe wa Paulo uusyomeka. (Tit. 3:12) Tabali Banakristo boonse kuciindi eeco ibakali kusyomeka mbuli Tukiko. Kuma 65 C.E., ciindi naakaangwa kwaciindi cabili, Paulo wakalemba kuti bamaalumi banji Banakristo mucooko ca Asiya tiibakali kuyanda kuyanzana anguwe, ambweni akaambo kakuyoowa basikukazya. (2Tim. 1:15) Mukwiimpana, Paulo wakali kumusyoma Tukiko alimwi wakamupa mulimo uumbi. (2Tim. 4:12) Paulo weelede kuti wakakkomana kuba amulongwe mubotu mbuli Tukiko. w20.01 10 ¶7-8

Ambweni tamuzyi kabotu naa mwakananikwa amuuya uusalala. Ikuti kacili boobo, amuyeeye kujatikizya mibuzyo eeyi iiyandika kapati: Sena mulayandisya kapati kucita kuyanda kwa Jehova? Sena mulimvwa kuti mulaubikkila maano kapati mulimo wakukambauka? Sena mulayandisisya kwiiya Jwi lya Leza kujatikizya “zintu zisisidwe zya Leza”? Sena mulimvwa kuti Jehova wamulongezya kapati mumulimo wakukambauka? Sena mulimvwa kuti mukuli wanu kugwasya bamwi kuti baiye kujatikizya Jehova? Sena mwalibonena bumboni bugaminide bwakuti Jehova wamugwasya munzila zinji mubuumi bwanu? Ikuti mwaingula kuti inzya kumibuzyo eeyi, sena eeci citondezya kuti mujisi bwiite bwakujulu? Peepe, tacaambi boobo pe. Nkaambo nzi? Nkaambo kakuti babelesi ba Leza boonse balakonzya kulimvwa munzila eeyi. Alimwi buya, ikuti naa muladooneka kuti mwakananikwa amuuya uusalala, kudooneka ooko kutondezya kuti tamunanikidwe. Aabo bakaitwa a Jehova tabadooneki kuti bakananikwa naa pe! Balizyi kuti bakananikwa! w20.01 23 ¶14