May

Kuzwa ciindi naakali mwana, Jesu wakasala kunoomvwida bazyali bakwe. Kunyina naakali kukaka malailile aabazyali, kayeeya kuti wakazyi zintu zinji kwiinda mbabo. Mbwaanga Jesu ngowakali mwana mupati, eeci cakali kwaamba kuti kuli mikuli njaakali kulanganya mumukwasyi. Alimwi wakeelede kubikkila maano kutegwa aizuzikizye. Wakabeleka canguzu kwiiya mulimo kuli bausyi bantunsi kutegwa kagwasyilizya mukwasyi wakwe. Kweelede kuti bazyali bakwe bakamwaambila Jesu kujatikizya kuzyalwa kakwe kwamaleele alimwi anzyobakaamba batumwa ba Leza kujatikizya nguwe. (Lk. 2:8-19, 25-38) Jesu kunyina naakakkutila buyo azintu nzyaakaambilwa; pele awalo wakaabala Magwalo. Ino tuzyi buti kuti Jesu wakali sikwiiya wa Jwi lya Leza mubotu? Tulizyi oobo akaambo kakuti kacili mulombe, bamayi ku Jerusalemu “bakali kwiile kulijata kumulomo akaambo kabusongo mbwaakajisi alimwi ambwaakali kwiingula.” (Lk. 2:46, 47) Alimwi ciindi naakajisi buyo myaka iili 12, Jesu wakalisinizyide kale kuti Jehova wakali Usyi.—Lk. 2:42, 43, 49. w20.10 29-30 ¶13-14

Lusyomo mububuke bwa Jesu nkakaambo katupa kusyoma kuti abamwi bayoobusyigwa. Ciindi Paulo naakatalika kulemba makani aabubuke, wakaamba twaambo totatwe twamasimpe: (1) “Kristo wakafwa kutegwa atwaangulule kuzibi zyesu.” (2) “Wakazikkwa.” (3) “Wakabusyigwa mubuzuba bwatatu kweelana ancaamba Magwalo.” (1Kor. 15:3, 4) Ino lufwu lwa Jesu, kuzikkwa alimwi akubusyigwa zyaamba nzi kulindiswe? Musinsimi Isaya wakasinsima kuti Mesiya wakali ‘kuyookosolwa munyika yabaumi’ alimwi ‘akupegwa busena bwakuzikkwa antoomwe abantu babi.’ Pele nzinji zyakajatikizyidwe. Isaya wakayungizya kuti Mesiya wakali kuyootola “cibi cabantu banji.” Jesu wakacita oobo ciindi naakapa buumi bwakwe kuba cinunuzyo. (Is. 53:8, 9, 12; Mt. 20:28; Rom. 5:8) Aboobo lufwu, kuzikkwa akubusyigwa kwa Jesu zitupa twaambo tubotu twakuba abulangizi bwakuti tulakonzya kwaangununwa kucibi alufwu, alimwi akuti tuyoobonana abayandwa besu ibayoobusyigwa. w20.12 2-3 ¶4-6; 5 ¶11

Kanji-kanji mwaapostolo Paulo wakali kukambaukila muzikombelo. Mucikozyanyo, mucikombelo caku Tesalonika, “kwamasabata otatwe wakali kubasalazyila Magwalo [ba Juda.]” (Mil. 17:1, 2) Kweelede kuti Paulo wakali kulikwaya kukambaukila mucikombelo akaambo kakuti wakali mu Juda. (Mil. 26:4, 5) Paulo wakali kubamvwisya ba Juda, aboobo wakali kubakambaukila cakutayoowa. (Flp. 3:5) Ciindi basikumupenzya Paulo nobakapa kuti azwe ku Tesalonika alimwi aku Bereya, wakatijila ku Atene. Paulo alimwi “wakatalika kubapandulwida cakusalazya ba Juda alimwi abantu bamwi ibakali kukomba Leza.” (Mil. 17:17) Nokuba boobo, ciindi naakali kukambaukila kumusyika, Paulo wakajana baswiilizi baindene. Akati kabaswiilizi bakwe, kwakali basyaabusongo alimwi a Bamasi bamwi ibakali kubona mulumbe wa Paulo kuba ‘njiisyo mpya.’ Bakati kulinguwe: “Utwaambila zintu zimwi zyeenzu mumatwi eesu.”—Mil. 17:18-20. w20.04 9 ¶5-6

Tamweelede kuyeeya kuti tamukwe mpindu ikuti naa mulwana kampenda kamwi. Amuyeeye kuti kunyina uululeme mumeso aa Leza. Aboobo toonse tuyandika luzyalo lwa Leza lunji kapati kwiinda mucinunuzyo. (Ef. 1:7; 1Joh. 4:10) Bakwesu abacizyi mumbungano balakonzya kutukulwaizya. Balakonzya kucita oobo kwiinda mukuswiilila ciindi notwaambaula alimwi akutwaambila majwi aakulwaizya. (Tus. 12:25; 1Tes. 5:14) Mucizyi Joy waku Nigeria, iwakajisi penzi lyakutyompwa wakaamba kuti: “Ino nindali kupona buti ikuti nokwanyina bakwesu abacizyi? Kukulwaizyigwa nkonditambula kuzwa kubakwesu abacizyi mbumboni bwakuti Jehova ulayiingula mipailo yangu. Mane buya ndaiya kuzwa kulimbabo kujatikizya mbondikonzya kukulwaizya bamwi ibatyompedwe.” Nokuba boobo, tweelede kuyeeya kuti talili lyoonse bakwesu abacizyi nobakonzya kuzyiba kuti tuyandika kukulwaizyigwa. Aboobo ambweni inga twayandika kwaanguluka kwaambila musyomima uusimide kumuuya kuti tuyandika lugwasyo. w20.12 23-24 ¶7-8

Kutegwa mube acilongwe cibotu amuntu umwi, mweelede kuba aciindi cakubandika anguwe. Ciindi nomubandika kujatikizya nzyomuyeeya alimwi ambomulimvwa, cilongwe cilayuma. Nokuba boobo, caboola kukuba acilongwe a Jesu, tulajana buyumuyumu. Buyumuyumu bwakusaanguna mbwakuti kunyina notwakamubona kale Jesu cantongola meso. Abalo Banakristo bamumwaanda wamyaka wakusaanguna bakajana buyumuyumu bukozyenye. Nokuba boobo, mwaapostolo Petro wakaamba kuti: “Nokuba kuti kunyina nomwakamubona, mulamuyanda. Nokuba kuti kwaciindi cino tamumubwene, pele mulamusyoma.” (1Pet. 1:8) Aboobo cilakonzyeka kuba acilongwe ciyumu a Jesu nokuba kuti kunyina notwakabonana anguwe cacigaminina. Buyumuyumu bumwi mbwakuti tatukonzyi kubandika a Jesu. Ciindi notupaila tubandika aa Jehova. Masimpe kuti tulapaila kwiinda muzina lya Jesu, pele tatubandiki anguwe cacigaminina. Alimwi buya, Jesu tayandi kuti katupaila kulinguwe. Ino nkaambo nzi? Nkaambo mupailo ncibeela cabukombi bwesu, alimwi Jehova alikke ngoweelede kukombwa. (Mt. 4:10) Nokuba boobo, tulakonzya kutondezya kuti tulamuyanda Jesu. w20.04 20 ¶1-3

Basikubalika muzisobano zyabana Giriki bakeelede kuliyumya kubuyumuyumu mbobakali kujana ciindi nobakali kubalika, mbuli kukatala alimwi akumvwa kucisa. Pele cilikke buyo ncobakeelede kusyoma, nkuliyiisya beni alimwi anguzu zyabo. Andiswe tuli mbuli basikubalika aaba mukuti tulayiisyigwa mbotukonzya kubalika mumuzundano motubede. Pele tulijisi coolwe kwiinda basikubalika bancobeni. Tulajana nguzu kuli Jehova, alimwi lyoonse ulakonzya kutupa nguzu. Ikuti twamusyoma Jehova, utusyomezya kutuyiisya alimwi akutuyumya! Mwaapostolo Paulo wakalwana buyumuyumu bunji. Kunze buyo lyakutukilwa akupenzegwa abamwi, zimwi ziindi wakali kubula nguzu alimwi wakeelede kuliyumya kucintu ncaakaamba kuti “mumvwa mumubili.” (2Kor. 12:7) Pele muciindi cakubona buyumuyumu oobo kuba kaambo ikakeelede kumupa kutyompwa, wakabubona kuba coolwe cakusyoma Jehova. (2Kor. 12:9, 10) Akaambo kakuti Paulo wakali kuzibona munzila iili boobu zintu, Jehova wakamugwasya kuliyumya mumasunko aakwe oonse. w20.04 29 ¶13-14

Tujisi cipego citalibonyi ‘cakubelekela antoomwe’ a Jehova alimwi acibeela cambunga yakwe yakujulu. (2Kor. 6:1) Tulacita oobo ciindi notutola lubazu mumulimo wakugwasya bantu kuba basikwiiya. Paulo wakaamba kujatikizya nguwe alimwi abaabo batola lubazu mumulimo ooyu kuti: “Tuli basimilimonyina a Leza.” (1Kor. 3:9) Alimwi ciindi notutola lubazu mumulimo wa Bunakristo, tuba basimilimonyina a Jesu. Amuyeeye kuti naakamana kwaambila basikumutobela “kuyiisya bantu bazisi zyoonse kuti babe basikwiiya,” Jesu wakaamba kuti: “Ndilaandinywe.” (Mt. 28:19, 20) Mbuti kujatikizya bangelo? Eelo kaka ncilongezyo kusololelwa abangelo ciindi notwaambilizya “makani mabotu aatamani . . . kuli baabo bakkala anyika”! (Ciy. 14:6) Akaambo kalugwasyo oolu luzwa kujulu, ino ncinzi ncotwazuzikizya? Ciindi notusyanga mulumbe wa Bwami, mbuto zimwi ziwida amyoyo iili kabotu alimwi zilakomena. (Mt. 13:18, 23) Ino nguni uupa kuti mbuto eezyo zikomene alimwi akuzyala micelo? Jesu wakamwaamba mulugwalo lwabuzuba bwasunu. w20.05 30 ¶14-15

Mazuba aano, bazyali banji balalekana. Nobaba banamukwasyi bakkala muŋanda yomwe inga kabatamvwani. Mucikozyanyo, sikupa lulayo kumikwasyi umwi wakaamba kuti: “Bazyali abana tabajisi ciindi cakubandika, nkaambo ciindi cinji bacimanina amakkompyuta, matabbuleti, mafooni naa kuuma mavidiyo geemu. Nokuba kuti aaba banamukwasyi bakkala muŋanda yomwe, inga tabazyibene kabotu pe.” Tatuyandi kuba mbuli bantu banji munyika eeyi ibatayandani. Muciindi caboobo, tweelede kwiiya kubayanda kapati banamukwasyi alimwi abakwesu abacizyi mumbungano. (Rom. 12:10) Ino kuyandana kapati caamba nzi? Caamba bube ibupandulula cilongwe cipati cili akati kabanamukwasyi. Oobu mbobube mbotweelede kutondezya kubakwesu abacizyi mumbungano. Ciindi notuyandana kapati, tupa kuti boonse calukkomano bamubelekele Jehova caantoomwe.—Mik. 2:12. w21.01 20 ¶1-2

Tiimu iibelekela antoomwe ilakonzya kuzwidilila ikwiinda yeeyo iitabelekeli antoomwe. Moyo wanu ulakonzya kuba mbuli tiimu eeyo iikonzya kuzwidilila ikuti nzyomuyeeya, nzyomuyanda alimwi ambomulimvwa zileendelana ciindi nomumubelekela Jehova. Mutalubi kuti Saatani uyanda kuti mube amyoyo yobilo. Uyanda kuti mizeezo yanu, nzyomuyanda alimwi ambomulimvwa kaziteendelani azyeelelo zya Jehova. Pele nywebo muyanda kuti mumubelekele Jehova amoyo omwe. (Mt. 22:36-38) Mutamuzumizyi Saatani kumupa kuba amyoyo yobilo! Kamupaila kuli Jehova mbubwenya mbwaakacita Davida naakati: “Kondipa kuba amoyo omwe kutegwa kandiyoowa zina lyako.” Mpoonya amucite kufwumbwa ncomukonzya kutegwa kamupona kweelana amupailo wanu. Buzuba abuzuba, amube amakanze aakuti zintu nzyomusala, zisyoonto naa zipati, mulatondezya kuti mulalilemeka kapati zina lya Jehova lisalala. Kwiinda mukucita boobo, mbomuli Bakamboni ba Jehova, muyoopa kuti zina eeli lilemekwe. (Tus. 27:11) Alimwi toonse tuyoocikonzya kwaamba mbubwenya mbwaakaamba musinsimi Mika naakati: “Swebo tunakweenda muzina lya Jehova Leza wesu lyoonse alyoonse mane kukabe kutamani.”—Mik. 4:5. w20.06 13 ¶17-18

Ciindi mwami wakunyika alimwi amfwulumende zimbi zyaakubalwana bantu ba Leza, eeci ciyoopa kuti Leza Singuzuzyoonse anyeme kapati, mpoonya nkondo ya Amagedoni iyootalika. (Ciy. 16:14, 16) Aciindi eeco, mwami wakunyika alimwi azisi zimbi izipanga nkamu yazisi ya Gogo waku Magogo ziyoonyonyoonwa, alimwi kunyina ‘uuyoozigwasyilizya.’ (Dan. 11:45) Kapango katobela kulugwalo lwa Daniele kalatwaambila makani manji kujatikizya mwami wakunyika alimwi abeenzinyina mbobayoonyonyoonwa, alimwi ambotuyoofwutulwa. (Dan. 12:1) Ino kapango aaka kaamba nzi? Mikayeli ndizina limbi lya Mwami wesu uulela, Kristo Jesu. ‘Uliimvwi kuti agwasye’ bantu ba Leza kuzwa mu 1914 ciindi naakaba Mwami wa Bwami bwa Leza kujulu. Lino-lino, uyoobanyonyoona basinkondonyina lyankondo ya Amagedoni. Nkondo eeyo iyooba cintu camamanino calo Daniele ncaakaamba kuti “ciindi camapenzi” aatanacitikide.—Ciy. 6:2; 7:14. w20.05 15-16 ¶15-17

Ciindi Josefa naakali muzike alimwi anaakali muntolongo, kunyina ncaakali kukonzya kucita kutegwa acince bukkale bwakwe. Ino ncinzi cakamugwasya kuzilanga munzila yeelede zintu? Muciindi cakubikkila maano kuzintu nzyaatakali kukonzya kucita, wakabeleka cabunkutwe mumilimo njaakapedwe. Josefa wakabikkila maano kukkomanisya Jehova mubuumi bwakwe. Akaambo kaceeci, Jehova wakazilongezya zyoonse nzyaakali kucita. (Matl. 39:21-23) Makani aa Josefa atuyeezya kuti nyika eeyi nimbyaabi alimwi akuti bantu bayootucitila cakutalulama. Naba mukwesu naa mucizyi ulakonzya kutucitila cakutalulama. Pele kuti Jehova tumubona kuba Ndomba yesu naa Mayubilo eesu, tatukatyompwi pe naa kuleka kumubelekela. (Int. 62:6, 7; 1Pet. 5:10) Alimwi amuyeeye kuti Josefa weelede kuti wakajisi myaka iitandila ku 17 ciindi Jehova naakamupa ziloto eezyi. Aboobo Jehova ulabasyoma babelesi bakwe bakubusi. Mazuba aano, bakubusi banji bali mbuli Josefa. Abalo balijisi lusyomo muli Jehova. Ibamwi mane buya babikkwa muntolongo akaambo kakuyanda kuzumanana kusyomeka kuli Leza.—Int. 110:3. w20.12 16 ¶3; 17 ¶5, 7

Mwaapostolo Petro alimwi a Johane, bakacibona kuba coolwe cipati kupenzegwa akaambo kakutobela Jesu alimwi akuyiisya bamwi kujatikizya nguwe. (Mil. 4:18-21; 5:27-29, 41, 42) Basikwiiya aaba bakanyina kaambo ikakeelede kubapa kufwa nsoni. Nokuba kuti bantu bamucilawo tiibakali kubalemeka, Banakristo aaba bakacita zintu zinji kapati kutegwa bagwasye bantu ikwiinda nzyobakacita basikubakazya. Mucikozyanyo, mabbuku aamu Bbaibbele ngobakalemba Banakristo aaba azumanana kugwasya bantu banji kapati alimwi akubapa bulangizi. Alimwi Bwami mbobakali kwaambilizya lino bulalela kujulu, alimwi lino-lino, buyoolela bantu boonse anyika. (Mt. 24:14) Bulelo bwabana Roma ibwakali aanguzu bwalo ibwakali kupenzya Banakristo bwakamana, pele Banakristo aaba basyomeka lino balalela kujulu. Pele aabo ibakali kubakazya, bakafwa: alimwi kuti naa bakabusyigwe, bayooba balelwa ba Bwami oobo mbobakagwasyilizya Banakristo aabo mbobatakali kuyanda.—Ciy. 5:10. w20.07 15 ¶4

Abrahamu wakalaalusyomo luyumu kapati muzisyomezyo zya Leza cakuti cakali mbuli kuti ulimubwene ooyo Uunanikidwe naa Mesiya, ooyo iwakali kuyooba Mwami wa Bwami bwa Leza. Akaambo kaceeci, Jesu wakaambila ba Juda bamumazuba aakwe kuti: “Abrahamu uso wakakondwa kapati abulangizi bwakubona buzuba bwangu, alimwi wakabubona eelyo wakakondwa.” (Joh. 8:56) Aboobo Abrahamu wakalizyi kuti balunyungu lwakwe bamwi bakali kuyooba cibeela ca Bwami ibwakatalisyigwa a Jehova, alimwi wakalilisungwide kulindila kuti Jehova acizuzikizye cisyomezyo eeci. Mbuti Abrahamu mbwaakatondezya kuti wakali kulindila munzi, naa Bwami ibwakatalisyigwa a Leza? Cakusaanguna, Abrahamu kunyina naakajatikizyigwa abwami bwamunyika ibuli boonse. Wakali simutuntuli alimwi kunyina mwami wamunyika ngwaakagwasyilizya. Kuyungizya waawo, Abrahamu kunyina naakasola kulipangila bwami. Muciindi caboobo, wakazumanana kumvwida Jehova alimwi akulindila kuti acizuzikizye cisyomezyo cakwe. Kwiinda mukucita boobo, Abrahamu wakatondezya lusyomo luyumu kapati muli Jehova. w20.08 3 ¶4-5

Jehova usyomezya kuti kunyina naba omwe akati kabantu ibanikweendelezyegwa a Kristo uyakwaamba kuti: “Ndaciswa.” (Is. 33:24) Aboobo aabo ibayoobusyigwa banoojisi mibili iili kabotu. Nokuba boobo, tabakalondoki mpoonya-mpoonya. Ikuti babusyigwa kabalondokede, inga tiibaakuzyibwa abayandwa babo. Kulangilwa kuti bantu boonse banooyaabulondoka aasyoonto-syoonto mu Bulelo bwa Kristo bwa Myaka Iili 1,000. Mpoonya kumamanino aa Myaka iili 1,000, Jesu uyoopilusya Bwami kuli Bausyi. Aciindi eeco, Bwami bunooli bwacizuzikizya kale ncayanda Jehova, kubikkilizya akugwasya bantu kuti balondoke. (1Kor. 15:24-28; Ciy. 20:1-3) Amweezeezye buyo mbocinookkomanisya kwaanzyanya abayandwa banu. Sena lukkomano ndomunoojisi luyoomupa kuseka naa kulila? Sena muyookkomana kapati akumwiimbila nyimbo zyantembauzyo Jehova? Tacidoonekwi buya kuti tuyooindila kumuyanda Taateesu uubikkila maano alimwi a Mwanaakwe siluyando, balo ibakapa kuti bubuke bukakonzyeke. w20.08 16-17 ¶9-10

Mwaapostolo Paulo wakakulwaizya Banakristo kubona naa balakonzya kusala kumubelekela Jehova kabatakwete naa kukwatwa. (1Kor. 7:8, 9) Paulo kunyina naakali kubona Banakristo batakwete naa batakwetwe kuti mbaansi kwiinda baabo ibakakwete naa kukwatwa. Mane buya, wakasala Timoteyo iwatakakwete kulanganya zintu ziyandika kapati mumulimo wa Jehova. (Flp. 2:19-22) Aboobo inga kwaba kulubizya kuyeeya kuti mukwesu uleelela naa teeleli kupegwa mikuli kwiinda mukulanga buyo kuti ulikwete naa takwete. (1Kor. 7:32-35, 38) Jesu alimwi a Paulo kunyina nobakayiisya kuti Banakristo beelede kukwata naa kukwatwa alimwi akuti tabeelede kukwata naa kukwatwa. Pele ino ncinzi ncotukonzya kwaamba kujatikizya kukwata naa kukwatwa alimwi akutakwata naa kutakwatwa? Ngazi Yamulindizi yamu October 1, 2012, yakacisalazya kwiinda mukwaamba kuti: “Kukwata naa kukwatwa alimwi akutakwata naa kutakwatwa kulakonzya kwaambwa kuti ncipego kuzwa kuli Leza. . . . Jehova kunyina nabona kuti bantu batakwete naa batakwetwe beelede kufwa nsoni naa kuusa akaambo kakuti tabakwete naa kukwatwa.” Katukayeeyede kaambo aaka, tweelede kubulemeka busena mbobajisi mumbungano bakwesu batakwete alimwi abacizyi batakwetwe. w20.08 28 ¶8-9

Mumasi aamwi, bantu balaba aluyandisisyo lwakwiiya ciindi nobamvwa makani mabotu. Amana buya inga ncecintu ncobalangila! Pele mumasi aambi, bantu tabayandi kumvwa makani aa Leza alimwi a Bbaibbele. Ino bantu kubusena nkomukkala baabona buti makani mabotu? Kufwumbwa mbocibede, Jehova uyanda kuti tukambauke kusikila mane akaambe kuti kwamana. Aciindi ncabikkide Jehova, mulimo wakukambauka uyoomana, “mpoonya mamanino ayoosika.” (Mt. 24:14) Jesu wakaambila basikwiiya bakwe kujatikizya mbobanoobede bantu alimwi azintu ziyoocitika kumazuba aamamanino. Wakalizyi kuti zintu eezyi ziyoopa kuti basikumutobela bacileke kubikkila maano kumulimo wakukambauka. Nkakaambo kaako Jesu wakaambila basikwiiya bakwe kuti “amulangile.” (Mt. 24:42) Mbubwenya buyo amazuba aano, tulalijana mubukkale bukozyene aboobo bwakapa kuti bantu bakuciindi ca Nowa batabikkili maano kukucenjezya kwa Nowa. (Mt. 24:37-39; 2Pet. 2:5) Aboobo tuyanda kubikkila maano kumulimo ngwaakatupa kucita Jehova. w20.09 8 ¶1-2, 4

Saatani ujisi “bukali bupati,” aboobo inga twalyeena kuti katuyeeya kuti tatukonzyi kujatikizyigwa abukali bwakwe. (Ciy. 12:12) Lino-lino, toonse lusyomo lwesu luyoosunkwa. Alimwi kuyooba “mapenzi mapati aatanacitikide kuzwa kumatalikilo aanyika kusikila sunu.” (Mt. 24:21) Kuciindi eeco, banamukwasyi balakonzya kuyootubukila alimwi ambweni mulimo wesu uyookasyigwa. (Mt. 10:35, 36) Sena umwi aumwi wesu uyooba mbuli Mwami Asa akusyoma muli Jehova kuti uyoomugwasya akumukwabilila? (2Mak. 14:11) Jehova uli mukutugwasya lino kumuuya akaambo kazintu ziboola kumbele. Ubelesya “muzike uusyomeka alimwi uucenjede” kutupa ‘cakulya aciindi ceelede’ kutegwa tuzumanane kupakamana mubukombi bwesu. (Mt. 24:45) Pele andiswe tweelede kucita lubazu lwesu akuyumya lusyomo lwesu muli Jehova.—Heb. 10:38, 39. w20.09 18 ¶16-18

Kuti kaceendelana amakanze aakwe, Jehova ulakonzya kubelesya muuya wakwe uusalala kupa bantu bali mubweendelezi kucita ncayanda. Bantu balakonzya kusya mugelo akunyona maanzi aali mukalonga kutegwa atozye kooko nkobayanda. Mbubwenya buyo, awalo Jehova ulakonzya kubelesya muuya wakwe kunyona mizeezo yabeendelezi kutegwa bacite zintu kweelana amakanze aakwe. Kuti eeco cacitika, bantu bali mubweendelezi balakulwaizyigwa kusala zintu zigwasya bantu ba Leza. (Amweezyanisye Ezara 7:21, 25, 26.) Ncinzi ncotukonzya kucita? Tulakonzya kupaila “kujatikizya bami abaabo boonse ibali muzyuuno zyabweendelezi” kapati ciindi bantu aaba, nobayanda kusala makani aajatikizya buumi bwesu bwa Bunakristo amulimo wakukambauka. (1Tim. 2:1, 2; Neh. 1:11) Mbubwenya mbobakali kucita Banakristo bamumwaanda wamyaka wakusaanguna, andiswe tulakonzya kubapailila camoyo woonse bakwesu abacizyi ibali muntolongo.—Mil. 12:5; Heb. 13:3. w20.11 15 ¶13-14

Ikuti naa ndinywe mwakali kumuyiisya sikwiiya ooyo mupya, mulakkomana kapati ciindi naabbapatizyigwa! (1Tes. 2:19, 20) Basikwiiya bapya ‘magwalo mabotu aalumbaizya’ mbungano yoonse, kutali buyo baabo ibakali kwiiya ambabo. (2Kor. 3:1-3) Cilakkomanisya kubona kuti mumyaka yone, mwezi amwezi nyika yoonse, kwali kulipootwa basikwiiya Bbaibbele ibatandila ku 10,000,000. Mumyaka njoonya eeyo, basikwiiya Bbaibbele ibainda 280,000 bakali kubbapatizyigwa mwaka amwaka kuba Bakamboni ba Jehova alimwi akuba basikwiiya ba Jesu Kristo bapya. Mbuti mbotukonzya kugwasya mamiliyoni aa Basikwiiya Bbaibbele aaba kutegwa babbapatizyigwe? Kufwumbwa buyo kuti Jehova kacibakkazikila moyo alimwi akubapa coolwe cakuba basikwiiya ba Kristo, tuyanda kucita kufwumbwa ncotukonzya kutegwa tubagwasye kuyaambele akubbapatizyigwa cakufwambaana. Ciindi cilimanide!—1Kor. 7:29a; 1Pet. 4:7. w20.10 6 ¶1-2

Mwami Saulo kunyina naakamumvwida Jehova. Alimwi ciindi musinsimi Samuele naakamwaambila kujatikizya kulubizya nkwaakacita, Saulo wakakaka. Muciindi caboobo, wakasola kupa twaambo twakulitamizya kwiinda mukutondezya kuti kunyina cibi cipati ncaakacita alimwi akupa bamwi mulandu. (1Sam. 15:13-24) Musyule, Saulo wakalicitide kale cintu cikozyenye aceeci. (1Sam. 13:10-14) Cuusisya ncakuti, Saulo wakalekela moyo wakwe kulisumpula. Kunyina naakacinca mbwaakali kuyeeya, aboobo Jehova wakamusinsa akumukaka. Kutegwa tutabi mbuli Saulo, tweelede kulibuzya mibuzyo eeyi: ‘Ciindi nondibala lulayo luzwa mu Jwi lya Leza, sena ndilajana twaambo twakulitamizya kutegwa nditalubelesyi? Sena inga ndiyeeya kuti ncondicita tacili cibi cipati boobo? Sena inga ndipa bamwi mulandu akaambo kazintu nzyondicita? Kuti naa bwiinguzi kumubuzyo nouba omwe akati kayeeyi mbwakuti inzya, nkokuti tweelede kucinca mbotuyeeya alimwi abube. Buyo-buyo, moyo wesu ulakonzya kulisumpula kapati cakuti Jehova inga watukaka kuba balongwe bakwe. w20.11 20 ¶4-5

Nobana amusale ngomuyoobelekela. Mweelede kumuzyiba Jehova, makanze aakwe alimwi akuyanda kwakwe mbokubujatikizya buumi bwanu. (Rom. 12:2) Mpoonya muyoocikonzya kusala cintu ciyandika kapati mubuumi bwanu, nkokuti kusala kubelekela Jehova. (Jos. 24:15) Ikuti kamujisi bubambe bwakwiiya alimwi akubala Bbaibbele buzuba abuzuba, muyoozumanana kumuyanda Jehova alimwi lusyomo lwanu luyooyuma. Amusale kubikka kuyanda kwa Jehova mubusena bwakusaanguna mubuumi bwanu. Nyika ya Saatani ikulwaizya kuti ikuti wabelesya luzyibo lwako kutegwa uligwasye omwini, uyookkomana. Mubwini, tulizyi kuti aabo babikkila maano kuzintu zyakumubili balaliyasaula “koonse-koonse amacise manji.” (1Tim. 6:9, 10) Pele kuti mwamuswiilila Jehova alimwi akusala kubikka kuyanda kwakwe mubusena bwakusaanguna mubuumi bwanu, muyoozwidilila alimwi ‘munoocita zintu cabusongo.’—Jos. 1:8. w20.10 30-31 ¶17-18

Mumwaanda wamyaka wakusaanguna, mulumbe ngwaakakambauka Jesu wakapa bulangizi kubantu boonse. Wakalailila basikumutobela kuti bazumanane kucita mulimo ngwaakatalisya, wakupa bumboni “mane kusikila kumasena aakulamfwu kapati aanyika.” (Mil. 1:8) Nokuba boobo, mulimo ooyu nobatakaukonzya kuubeleka munguzu zyabo. Bakali kuyandika muuya uusalala, nkokuti “mugwasyi” ooyo Jesu ngwaakabasyomezyede. (Joh. 14:26; Zek. 4:6) Basikutobela Jesu bakatambula muuya uusalala lya Pentekoste 33 C.E. Kwiinda mukugwasyigwa amuuya ooyo, mpoonya-mpoonya bakatalika kukambauka, alimwi muciindi buyo cisyoonto, bantu banji bakaatambula makani mabotu. (Mil. 2:41; 4:4) Ciindi nobakatalika kupenzyegwa, basikwiiya kunyina nobakayoowa akucileka kukambauka. Muciindi caboobo, bakalomba Jehova kuti abagwasye. Bakapaila kuti: “Kopa bazike bako kuzumanana kukanana ijwi lyako cabusicamba.” Mpoonya bakazula muuya uusalala akuzumanana “kwaamba ijwi lya Leza cabusicamba.”—Mil. 4:18-20, 29, 31. w20.10 21 ¶4-5

Nkaambo nzi ncotukonzya kusyoma kuti Jehova wakamubusya Jesu? Kuli bantu banji bakapa bumboni bwakuti Jesu wakabusyigwa. (1Kor. 15:5-7) Kamboni wakusaanguna mwaapostolo Paulo ngwaakalemba mumulongo wakwe, mwaapostolo Petro naa Kefasi. Abalo basikwiiya bamwi bakasinizya kuti Petro wakamubona Jesu iwakabusyigwa. (Lk. 24:33, 34) Kuyungizya waawo, Paulo wakaamba kuti “bali Kkumi Ababili,” nkokuti baapostolo, bakamubona Jesu naakamana kubusyigwa. Kumane Kristo “wakalibonya kubakwesu bainda ku 500 aciindi comwe,” ambweni amuswaangano uukkomanisya kapati iwakali mu Galilaya iwaambidwe mulugwalo lwa Matayo 28:16-20. Alimwi Jesu “wakalibonya kuli Jakobo,” uulangilwa kuti mwanookwabo, walo musyule iwatakali kusyoma kuti Jesu ngo Mesiya. (Joh. 7:5) Naakamana kumubona Jesu iwakabusyigwa, Jakobo wakasyoma. Cikkomanisya ncakuti, cakuma 55 C.E. ciindi Paulo naakalemba lugwalo oolu, bakamboni banji ibakamubona Jesu naakamana kubusyigwa bakacili kupona, aboobo kufwumbwa iwakali kudooneka wakali kukonzya kubabuzya bantu aaba kujatikizya bubuke oobu. w20.12 3 ¶5, 7-8

Ikuti naa twali kuciswa kwaciindi cilamfwu, cilakonzya kutukatazya kuzibona munzila yeelede zintu. Aboobo, amupaile kuli Jehova kuti amugwasye. Nokuba kuti takonzyi kutuponya munzila yamaleele lino, ulakonzya kutuumbulizya alimwi akutupa nguzu nzyotuyandika kutegwa tuliyumye. (Int. 94:19) Mucikozyanyo, ulakonzya kukulwaizya bakwesu abacizyi kuti batugwasye milimo imwi yaaŋanda naa kutugwasya kuula zintu zimwi. Ulakonzya kukulwaizya bakwesu kutupailila. Ambweni ulakonzya kutugwasya kuyeeya twaambo tukulwaizya kuzwa mu Jwi lyakwe, mbuli bulangizi bwabuumi bulondokede kakunyina kuciswa alimwi akucisa munyika mpya iiboola. (Rom. 15:4) Nokuba boobo, tulakonzya kulimvwa kuti tatucikonzyi kubeleka mbuli mbotuyanda mumulimo wakukambauka. Ku United States, mucizyi Laurel wakakkala mumuncini wakali kumupa kuti kacikonzya kuyoya kwamyaka iili 37! Alimwi wakaliyumya kubulwazi bwakkansa, kwaandulwa kwaziindi zili mbozibede alimwi abulwazi bwalukanda. Pele taakacileka kukambauka. Wakali kubakambaukila bamanesi abaabo ibakali kumuswaya kuŋanda yakwe alimwi wakagwasya bantu bali 17 kwiiya kasimpe kamu Bbaibbele! w20.12 24 ¶9; 25 ¶12

Mwaapostolo Paulo wakali kuyandika lugwasyo. Kuma 56 C.E., nkamu yabantu yakamujata akumukwelela anze aatempele mu Jerusalemu alimwi akusola kumujaya. Buzuba bwakatobela, ciindi Paulo naakatolwa ku Nkuta Mpati Yaba Juda, kwakasyeede buyo aasyoonto kuti ajaigwe abasinkondonyina. (Mil. 21:30-32; 22:30; 23:6-10) Aciindi eeco, Paulo weelede kuti wakali kulibuzya kuti, ‘Ino ndilaliyumya kwaciindi cilamfwu buti kukupenzyegwa ooku?’ Ndugwasyo nzi ndwaakatambula Paulo? Busiku Paulo mbwaakajatwa, “Mwami” Jesu wakaima munsi lyakwe akwaamba kuti: “Koba acamba! Nkaambo mbubonya mbooli kupa bumboni cakulomya mu Jerusalemu, weelede kuyoopa bumboni mbubonya akwalo ku Roma.” (Mil. 23:11) Eelo kaka cisyomezyo eeco cakamukulwaizya kapati Paulo! Jesu wakamulumbaizya Paulo kubumboni mbwaakapa mu Jerusalemu. Kuyungizya waawo, wakasyomezya kuti Paulo uyoosika kabotu-kabotu ku Roma, ooko nkwaakali kuyoopa bumboni buyungizyidwe. Naakapegwa cisyomezyo eeco, Paulo wakakkalwa moyo mbubonya mbuli mwana uujatilidwe abausyi. w20.11 12 ¶1, 3; 13 ¶4

Bulangizi bwesu buli mbuli “ngobyo yiimika bwato yabuumi bwesu,” butupa kuba anguzu nomuba mubukkale bukatazya naa notujisi mizeezo iilibilisya. Amuzinzibale kuyeeya cisyomezyo ca Jehova cakumbele mwalo munoonyina mizeezo iitali kabotu. (Is. 65:17) Amweezeezye kuti muli munyika mpya yaluumuno, mwalo munoonyina zintu zibyaabi. (Mik. 4:4) Alimwi muyoobuyumya bulangizi bwanu ciindi nomwaambila bamwi kujatikizya mbubo. Amucite kufwumbwa nzyomukonzya mumulimo wakukambauka alimwi akugwasya bantu kuba basikwiiya. Ikuti mwacita oobo, inga mwaba “alusyomo luyumu mubulangizi kusikila kumamanino.” (Heb. 6:11) Akaambo kakuti tuli kumamanino aabwende bwazintu oobu, tuyoojana mapenzi manji aakonzya kutupa kulibilika. Tuyoocikonzya kulwana mapenzi aayo akuzumanana kubatama, ikutali kwiinda munguzu zyesu, pele kwiinda mukusyoma Jehova. Atutondezye kwiinda mumicito yesu kuti tulijisi lusyomo mucisyomezyo ca Jehova cakuti: “Mulaba anguzu kufwumbwa buyo kuti mubatame akuba alusyomo.”—Is. 30:15. w21.01 7 ¶17-18

Lugwalo lwa Jakobo 5:11 lwaamba lubomba lwa Jehova alimwi abube bumbi ibutupa kuba acilongwe anguwe, nkokuti luse lwakwe. (Kul. 34:6) Nzila imwi Jehova mbwatutondezya luse nkwiinda mukutulekelela zibi zyesu. (Int. 51:1) Mu Bbaibbele, luse lujatikizya zintu zinji kunze buyo lyakulekelela muntu iwakatulubizyila. Lubikkilizya mbwalimvwa muntu ciindi nabona muntu umwi uuli mumapenzi alimwi akubweza ntaamu yakumugwasya. Jehova waamba kuti luyandisisyo ndwajisi lwakutugwasya lulainda aamutumbu mbwaalimvwa kujatikizya mwanaakwe. (Is. 49:15) Ciindi notuli mumapenzi, luse lwa Jehova lumupa kutugwasya. (Int. 37:39; 1Kor. 10:13) Tulakonzya kutondezya luse kubakwesu abacizyi kwiinda mukubalekelela alimwi akutaba amfwundilili kulimbabo ciindi nobatutyompya. (Ef. 4:32) Pele nzila iiyandika kapati mbotukonzya kutondezya luse nkwiinda mukubagwasya bakwesu abacizyi mumapenzi ngobajisi. Kwiinda mukucita boobo, twiiya Jehova, walo uutondezya cikozyanyo cibotu kapati cakuba alubomba.—Ef. 5:1. w21.01 21 ¶5

Silutwe wamukwasyi weelede kuzilanga munzila yeelede zintu. Tayelede kutola ciindi cilamfwu kapati kumulimo wakumubili, cakuti mane waalilwa kuulanganya kabotu mukwasyi wakwe kumuuya alimwi akuupa kulimvwa kukwabililwa, alimwi weelede kubapa lulayo caluyando bamukwasyi wakwe. Jehova ulatuyiisya akutupa lulayo nkaambo ulatuyanda. (Heb. 12:7-9) Mbubwenya mbuli Bausyi, Jesu ulabayiisya munzila yaluyando aabo mbeendelezya. (Joh. 15:14, 15) Ulapa lulayo, pele calubomba. (Mt. 20:24-28) Ulizyi kuti tatulondokede alimwi kanji-kanji tulalubizya. (Mt. 26:41) Silutwe wamukwasyi uuyiya Jehova a Jesu ulayeeya kuti mukaintu wakwe alimwi abana tabalondokede. ‘Tamunyemeni cakuzwa munzila’ mukaintu wakwe naa bana. (Kol. 3:19) Muciindi caboobo, ubelesya lulayo iluli ku Bagalatiya 6:1 akusola kubalulamika ‘amoyo uubombede,’ kayeeyede kuti awalo talondokede. Mbubwenya mbuli Jesu, ulizyi kuti nzila yiinda kubota yakuyiisya nkwiinda mucikozyanyo. w21.02 6-7 ¶16-18

Kwiinda mucinunuzyo, Jehova wakamuula muntu uuli woonse mumbungano alimwi amuntu uuli woonse uumusyoma Jesu. (Mk. 10:45; Mil. 20:28; 1Kor. 15:21, 22) Aboobo cileelela kuti wakasala Jesu, iwakaaba buumi bwakwe kacili cinunuzyo, kuba mutwe wambungano. Nkakaambo kaako Jesu ulijisi nguzu zyakubikkila bantu, mikwasyi alimwi ambungano yoonse milawo njotweelede kutobela. Alimwi ulijisi nguzu zyakubona masimpe kuti tulaitobela milawo eeyo. (Gal. 6:2) Pele nzinji Jesu nzyatucitila kunze buyo lyakutubikkila milawo. Ulatuyanda alimwi akutulanganya. (Ef. 5:29) Bacizyi balatondezya kuti balamulemeka Kristo kwiinda mukutobela busolozi bupegwa aabaalumi mbaakasala kuti kababalanganya. Bakwesu balatondezya kuti balabulemeka bubambe bwabusilutwe kwiinda mukubalemeka bacizyi. Kuti boonse mumbungano, bamvwisya alimwi akulemeka njiisyo zyabusilutwe, mumbungano munooli luumuno. Alimwi kwiinda zyoonse, tupa bulemu kuli Taateesu siluyando, Jehova. w21.02 18-19 ¶14-17

Ciindi naakali kutija Saulo mucilawo caba Filisiti, Davida abaalumi bakwe bakasiya mikwasyi yabo akuunka kunkondo. Ciindi nobakali kunkondo, basikondonyina bamwi bakaboola kusaala maanda aabo akutola mikwasyi yabo mubuzike. Davida naakayeeya kuti, mbwaanga wakali sikalumamba uucibwene, nocakamuubila kukwabilila mikwasyi iyakatolwa mubuzike. Muciindi caboobo, Davida wakalomba Jehova kuti amusololele. Davida wakabuzya Jehova kuti: “Sena ndizitandile zigwebenga eezyi zisaala?” Jehova wakaambila Davida kuti acite oobo alimwi akumusyomezya kuti wakali kuyoozwidilila. (1Sam. 30:7-10) Ncinzi ncomukonzya kwiiya kuliceeci cakacitika? Amubuzye bamwi kamutanasala cakucita. Nobakubusi, amubuzye bazyali banu. Mulakonzya kujana lulayo lugwasya kwiinda mukubandika abaalu basimide. Jehova ulabasyoma baalumi aaba, andinywe mulakonzya kubasyoma. Jehova ubabona kuti ‘nzipego’ kumbungano. (Ef. 4:8) Mulakonzya kusala camaano kuti mwaiya lusyomo lwabo alimwi akuswiilila kumizeezo yabusongo njobapa. w21.03 4-5 ¶10-11

Jesu wakaamba kuti, ikuti katutazibelesyi nzyotwiiya, tuli mbuli mwaalumi uuyaka ŋanda amusenga. Ulabeleka canguzu, pele usowa buyo ciindi. Nkaambo nzi? Nkaambo mvwula mpati yaakuwa amaanzi aakupaya, ŋanda yakwe iyoowa. (Mt. 7:24-27) Mbubwenya buyo, kuti katutazibelesyi zintu nzyotwiiya, tusowa buyo ciindi. Aboobo ciindi twaakusunkwa naa kupenzyegwa, lusyomo lwesu talunooli luyumu. Pele ciindi notubala akuzibelesya nzyotwiiya, tulacikonzya kusala camaano, kuba aluumuno alimwi lusyomo lwesu lulayuma. (Is. 48:17, 18) Kutegwa tuzumanane kusyomeka ciindi notusunkwa, tweelede kusyoma Jehova kwiinda mukupaila alimwi akuzumanana kubala Jwi lyakwe abuzuba. Alimwi lyoonse tweelede kuyeeya kuti, cintu ciyandika kapati ncotweelede kucita, nkuleta bulemu kuzina lya Jehova. Tulakonzya kuba alusyomo lwakuti Jehova kunyina nayootulekelezya, alimwi kunyina cili coonse ncakonzya kucita muntu cikonzya kumulesya kutuyanda.—Heb. 13:5, 6. w21.03 15 ¶6; 18 ¶20