June

Bamayi beelede kubabikkila maano basikwiiya babo. Atubabone kuti bayooba bakwesu naa bacizyi kumbele. Tacili cuuba-uba kucileka kumvwana abalongwe bamunyika alimwi akucinca bukkale bwabo kutegwa babelekele Jehova. Bamayi bacibwene balabazyibya basikwiiya babo kuli bamwi mumbungano kutegwa babagwasye kuyumya cilongwe cabo a Jehova. Basikwiiya Bbaibbele aaba balakonzya kukkomana kuyanzana abantu ba Leza, balo ibakonzya kubagwasya ciindi nobajana mapenzi. Tuyanda kuti sikwiiya umwi aumwi kalimvwa kuti uzulilwa mumbungano alimwi akuti ncibeela camukwasyi wesu wakumuuya. Tuyanda kuti sikwiiya aumwi akwelelezyegwe aluyando lwabunyina lwa Bunakristo. Eeci inga camugwasya sikwiiya kuleka kuyanzana abantu batakonzyi kumugwasya kuyanda Jehova. (Tus. 13:20) Ikuti bantu mbaakali kuyanzana limwi kaindi bacileka kumvwana anguwe, uyoozyiba kuti ulakonzya kujana balongwe beni-beni mumbunga ya Jehova.—Mk. 10:29, 30; 1Pet. 4:4. w20.10 17 ¶10-11

Tweelede kuba balongwe ba Jesu ikuti katuyanda kuba acilongwe a Jehova. Nkaambo nzi ncocili boobo? Atulange-lange twaambo tobilo buyo. Kakusaanguna, Jesu wakaambila basikwiiya bakwe kuti: “Nkaambo Taata mwini ulamuyanda akaambo kakuti mwali kundiyanda mebo.” (Joh. 16:27) Wakayungizya kwaamba kuti: “Kunyina uuboola kuli Taata ccita kuti wainda mulindime.” (Joh. 14:6) Kusola kuba acilongwe a Jehova kakunyina kuba acilongwe ciyumu a Jesu cili mbuli kusola kunjila muŋanda kakunyina kwiinda amulyango. Jesu wakabelesya cikozyanyo cikozyenye aceeci ciindi naakalyaamba kuti “mulyango wambelele.” (Joh. 10:7) Kaambo kabili nkakuti Jesu wakabwiiya bube bwa Bausyi munzila iilondokede. Wakaambila basikwiiya bakwe kuti: “Kufwumbwa ooyo wandibona wamubona awalo Taata.” (Joh. 14:9) Aboobo nzila iiyandika kapati mbotukonzya kumuzyiba Jehova nkwiinda mukwiiya buumi bwa Jesu. Mbotunooyaabwiiya kujatikizya Jesu, luyando lwesu kulinguwe luyookomena. Alimwi ciindi luyando lwesu kuli Jesu nolukomena, alwalo luyando lwesu kuli Bausyi lulakomena. w20.04 21-22 ¶5-6

Sena muli basibukilwi bulo naa mweendela akacinga kabalema? Sena muciswa maulu naa meso? Kuti naa mbocibede oobo, sena inga mwabalika antoomwe abaabo ibacili bana-bana alimwi ibajisi buumi buli kabotu? Inzya inga mwabalika! Bacembeede alimwi abaciswa bali mukubalika munzila iitola kubuumi. Mulimo ooyu tabakonzyi kuucita munguzu zyabo beni. Muciindi caboobo, balatambula nguzu zya Jehova kwiinda mukuswiilila miswaangano ya Bunakristo kubelesya fooni naa kweebelela miswaangano kwiinda mukubelesya mavidiyo aakacitwa daunilodi a jw.org. Alimwi balatola lubazu mumulimo wakugwasya bantu kuba basikwiiya kwiinda mukukambaukila bamadokota, bamanesi alimwi abacibbululu. Kuti kamutakonzyi kucita zyoonse nzyomuyanda mumulimo wa Jehova, mutatyompwi akuyeeya kuti tamukonzyi kuliyumya mubweende bwazintu oobu. Jehova ulamuyanda kapati akaambo kalusyomo ndomujisi mulinguwe alimwi azintu nzyomwamucitila kwamyaka yoonse eeyi. Lino muyandika lugwasyo lwakwe kwiinda kaindi, alimwi kunyina nayoomulekelezya pe. (Int. 9:10) Muciindi caboobo, uyooswena afwaafwi kapati andinywe. w20.04 29 ¶16-17

Makani nzi ngomukonzya kubandika amuntu waamba kuti ulijisi kale nkwakomba? Amusole kuzyiba twaambo ntomuzuminana. Ambweni ukomba buyo Leza omwe, ulakonzya kazyi kuti Jesu Mufwutuli wabantu, naa kuti tupona muciindi cizwide bubi alimwi akuti buyoomana ino-ino. Kweelana atwaambo ooto ntomuzuminana, amwaambe mulumbe wamu Bbaibbele munzila iikonzya kumukwelelezya muntu ooyo. Amuzyibe kuti bantu tabakonzyi kuzisyoma zintu zyoonse nzyobayiisyigwa kucikombelo cabo. Aboobo nociba ciindi nomwamana kuzyiba cikombelo nkwazulilwa muntu, amusolekesye kuzyiba zintu nzyasyoma lwakwe kumugama. Misyinali umwi mukwesu wakabona kuti bantu bamwi basyoma munjiisyo ya Butatu, pele tabasyomi kuti Taata, Mwana alimwi amuuya uusalala ngu Leza omwe. Misyinali nguwenya ooyu wakaamba kuti: “Kuzyiba makani aaya kupa kuti kacuuba-uba kutalisya mubandi amuntu.” Aboobo amusolekesye kuzyiba zintu nzyobasyoma bantu. Mpoonya, mbubwenya mbuli mwaapostolo Paulo, ‘muyooba zintu zyoonse kubantu bamisyobo yoonse.’—1Kor. 9:19-22. w20.04 10 ¶9-10

Businsimi bwa Daniele alimwi abwa Johane bwaamba kuti Jehova alimwi a Jesu bayoobafwutula babelesi babo lyamapenzi mapati. Aboobo tulakonzya kuba basicamba tacikwe makani azintu iziyootucitikila. Lugwalo lwa Daniele lwaamba kuti mazina aabaabo bayoofwutuka ‘anoolembedwe mubbuku.’ Ino ncinzi ncotweelede kucita kutegwa mazina eesu alembwe mubbuku eelyo? Tweelede kutondezya kuti tulijisi lusyomo muli Jesu, mwanaambelele wa Leza. (Joh. 1:29) Tweelede kubbapatizyigwa kutondezya kulyaaba kwesu kuli Leza. (1Pet. 3:21) Alimwi tweelede kugwasyilizya Bwami bwa Leza kwiinda mukugwasya bantu kwiiya kujatikizya Jehova. Lino nceciindi cakuyumya lusyomo lwesu muli Jehova alimwi ambunga yakwe. Lino nceciindi cakugwasyilizya Bwami bwa Leza. Ikuti twacita oobo, tuyoofwutulwa ciindi Bwami bwa Leza bwakunyonyoona mwami wakunyika alimwi amwami wakumusanza. w20.05 16 ¶18-19

Ba Adamu a Eva bakalilizyi kabotu zina lya Jehova alimwi akasimpe kayandika kapati kujatikizya nguwe. Mucikozyanyo, bakalizyi kuti wakali Mulengi wabo, iwakabapede buumi, munzi wa Paradaiso mubotu alimwi amweenzinyina wamulukwatano uulondokede. (Matl. 1:26-28; 2:18) Pele sena nobakacikonzya kuzumanana kubelesya mizeezo yabo iilondokede kuzinzibala kuyeeya zintu zyoonse nzyaakabacitila Jehova? Sena nobakacikonzya kuzumanana kuyumya luyando lwabo kuli Jehova alimwi akumulumba? Bwiinguzi bwakalibonya caantangalala ciindi sinkondonyina a Leza naakabasunka. Kabelesya nzoka kuba caambawido cakwe, Saatani wakabuzya Eva kuti: “Sena ncobeni Leza wakaamba kuti tamweelede kulya kuzisamu zyoonse zyamumuunda?” (Matl. 2:16, 17; 3:1) Saatani wakabuzya mubuzyo iwakali kwaamba zyakubeja kujatikizya Leza, calo icakapa kuti Eva atalike kuyeeya zintu izitali kabotu kujatikizya Leza. Leza wakabaambilide kuti bakali kukonzya kulya kuzisamu zyoonse zyamumuunda, kunze buyo lyacisamu comwe. (Matl. 2:9) Saatani wakapa kuti babone mbuli kuti Leza muunyu. Eva wakeelede kulibuzya kuti, ‘Sena Leza undikasya cintu cimwi cibotu?’ w20.06 3-4 ¶8-9

Babelesi ba Jehova bamwi bakatyompezyegwa abasyominyina. Mwaapostolo Paulo wakabona kuti zimwi ziindi tulakonzya kuba ‘akaambo kalimvwisya kakutongooka’ mukwesu naa mucizyi. Ambweni kuli ciindi notwakeendelezyegwa cakutalulama. Kuti tiitwacenjela, tulakonzya kunyema kapati. Mukuya kwaciindi, kunyema kulakonzya kupa muntu kuleka kuyanzana abantu ba Jehova. Ba Pablo, ibakkala ku South America, bakatamikizyigwa kucita cintu cibyaabi, akaambo kaceeco, bakanyangwa mikuli mumbungano. Ino mukwesu ooyu wakacita buti? Wakaamba kuti, “Ndakanyema kapati alimwi asyoonto-syoonto ndakacileka kuyanzana ambungano.” Ikuti naa muntu wakacita cibi cipati musyule, manjezeezya aakwe alakonzya kumukatazya kwaciindi cilamfwu. Ambweni ulakonzya kulimvwa kuti taciyandwi a Leza naaceya. Nokuba kuti wakeempwa alimwi akufwidwa luse, ulakonzya kulimvwa kuti taceeleli kuba muntu wa Leza. Ino mulimvwa buti kujatikizya bakwesu abacizyi bali mubukkale mbuli boobu bwabandikwa? w20.06 19 ¶6-7

Tweelede kuzyiba bukkale ibukonzya kutunjizya muntenda alimwi akubona mbotweelede kubweeleba. (Heb. 5:14) Mucikozyanyo, tweelede kusala kabotu zyakulikondelezya. Mapulogilamu aa TV alimwi amafilimu kanji-kanji atondezya micito yakutalilemeka. Micito iili boobu ilamunyemya Leza alimwi mukuya kwaciindi inga yatunjizya mumapenzi. Aboobo tweelede kuzitantamuka zyakulikondelezya zili boobu nkaambo aasyoonto-syoonto zilakonzya kupa kuti luyando ndotujisi kuli Leza luceye. (Ef. 5:5, 6) Alimwi tweelede kweeleba ntenda yakumvwa makani aakubeja aamwaigwa abasiluleyo, ciindi nobasola kumwaya makani aakubeja kujatikizya bakwesu naa kutupa kudooneka mbunga ya Jehova. (1Tim. 4:1, 7; 2Tim. 2:16) Makani aakubeja aali boobu alakonzya kupa kuti lusyomo lwesu luceye. Aboobo tatweelede kwaasyoma. Nkaambo nzi? Nkaambo kakuti makani aaya amwaigwa ‘aabantu bali amizeezo iisofweede alimwi ibatacikwe kasimpe.’ Makanze aabo ngakutalisya “nkazi akukazyanya.” (1Tim. 6:4, 5) Bayanda kuti tusyome bubeji bwabo alimwi akuleka kusyoma bakwesu. w20.09 29 ¶13, 15

Mulumi amukaintu beelede kweendelezyanya munzila yaluyando alimwi yabulemu. (Ef. 5:33) Bbaibbele lituyiisya kubikkila maano kukupa ikutali kupegwa. (Mil. 20:35) Ino mbube nzi ibukonzya kubagwasya banabukwetene kutondezya luyando alimwi abulemu? Bwiinguzi mbwakuti, nkulicesya. Kulicesya kwabagwasya banabukwetene Banakristo banji ikujana lukkomano lunji mulukwatano lwabo. Mucikozyanyo, mulumi wazina lya Steven wakaamba kuti: “Ikuti kamukamantene, mulakonzya kubelekela antoomwe, kwaambisya ciindi nokuli mapenzi. Muciindi cakulibuzya kuti ‘ncinzi cikonzya kundigwasya?’ inga mwalibuzya kuti ‘ncinzi cikonzya kutugwasya?’” Abalo bakaintu bakwe ba Stephanie mbobalimvwa mbubwenya oobo. Bakaamba kuti, “Kunyina uukonzya kuyanda kukkala aamuntu ngobakazyanya limwi. Ciindi nokwaba mazwanga, tulabikkila maano kuzyiba caleta mazwanga. Mpoonya tulapaila, tulavwuntauzya alimwi akulibandika penzi lyaleta mazwanga. Tulwana penzi, ikutali kutalika kulwana mulicesu.” Masimpe banabukwetene balagwasyigwa kapati ciindi nobataliboni kuti balayandika kapati kwiinda bwini mbobabede. w20.07 3-4 ¶5-6

Mutasyomi nguzu zyanu naa luzyibo ciindi nomubelekela Jehova. Mwaapostolo Paulo wakaliyiide kapati, wakayiisyigwa amweendelezi mu Juda iwakali kulemekwa kapati aciindi eeco, wazina lya Gamaliyeli. (Mil. 5:34; 22:3) Alimwi aciindi cimwi, Paulo wakali muntu uulemekwa kapati akati kaba Judanyina. (Mil. 26:4) Pele Paulo tanaakali kulisyoma. Paulo wakalikkomene kusiya zintu izyakali kumupa kuba ampuwo. (Flp. 3:8; bupanduluzi buyungizyidwe.) Paulo wakajana mapenzi manji akaambo kakuba sikutobela Kristo. Wakasulaikwa abantu bamucisi cokwabo. (Mil. 23:12-14) Wakaumwa alimwi akwaangwa abantu mbaakali kukkala limwi, nkokuti bana Roma. (Mil. 16:19-24, 37) Kuyungizya waawo, Paulo wakakubona kutalondoka kwakwe. (Rom. 7:21-25) Pele muciindi cakulekela basikumukazya alimwi akutalondoka kwakwe kumutyompya, ‘wakabotelwa eelyo naatakajisi nguzu.’ Nkaambo nzi? Nkaambo kakuti aciindi eeci naatakajisi nguzu, ndendilyo naakabona nguzu zya Leza kazibeleka mulinguwe.—2Kor. 4:7; 12:10. w20.07 16 ¶7-8

Mazuba aano, tweelede kuubikkila maano kapati mulimo wakukambauka makani mabotu aa Bwami. Jesu wakasinsima kuti mulimo ooyu uyookomena kapati alimwi uyoozumanana aakufwa. Naakabusyigwa, wakacita maleele akugwasya basikwiiya bakwe bamwi kuti bajaye nswi zinji. Naakamana kucita maleele aaya, wakakankaizya kuti mulimo wakukambauka alimwi akugwasya bantu kuba basikwiiya ulayandika kapati kwiinda mulimo uuli woonse. (Joh. 21:15-17) Kali afwaafwi kuunka kujulu, wakaambila basikwiiya bakwe kuti mulimo wakukambauka ngwaakatalisya uyookomena kapati cakuti uyakwiindilila aminyinza ya Israyeli. (Mil. 1:6-8) Nokwakainda myaka, Jesu wakapa mwaapostolo Johane cilengaano kutegwa amutondezye icakali kuyoocitika “mubuzuba bwa Mwami.” Mucilengaano eeci, Johane wakabona cintu cigambya imungelo “wakajisi makani mabotu aatamani aakwaambilizya . . . kumasi oonse, kumisyobo yoonse, kumilaka yoonse alimwi akubantu bamisyobo yoonse.” (Ciy. 1:10; 14:6) Cilisalede kuti, makanze aa Jehova kulindiswe mazuba aano ngakuti, tutole lubazu mumulimo mupati wakukambauka kusikila mane ukamane. w20.09 9 ¶5

Buumi mumukwasyi wa Abrahamu bwakali buyumu. Mukaintu wakwe Sara, tanaakali kuzyala. Aboobo, kwamyaka minji bakalityompedwe kapati. Mpoonya Sara wakapa Abrahamu mubelesi wakwe mukaintu wazina lya Hagare kutegwa abazyalile bana. Pele ciindi Hagare naakazyiba kuti wamita Isimayeli, wakatalika kumusampaula Sara. Ciindi bukkale nobwakakatazya kapati, Sara wakamutanda aŋanda Hagare. (Matl. 16:1-6) Mukuya kwaciindi, Sara wakamita akuzyalila Abrahamu mwana musankwa, walo ngwaakaulika zina lyakuti Izaka. Abrahamu wakali kubayanda bana bakwe boonse bobilo, nkokuti Isimayeli a Izaka. Pele akaambo kakuti Isimayeli wakali kumweendelezya munzila mbyaabi Izaka, Jehova wakaambila Abrahamu kuti amutande Isimayeli a Hagare. (Matl. 21:9-14) Nokwakainda myaka minji, Jehova wakaambila Abrahamu kuti atuule Izaka kali cipaizyo. (Matl. 22:1, 2; Heb. 11:17-19) Mubukkale boonse oobu, Abrahamu wakeelede kusyoma kuti Jehova wakali kuyakwaazuzikizya makanze aakwe aajatikizya bana aaba. w20.08 4 ¶9-10

Amweezeezye mbobayookkomana aabo ibayoobusyigwa ciindi baakusamununa buntu bwabo bwakaindi akutalika kupona kweelana azyeelelo zya Leza ziluleme. Aabo bayoocinca bukkale bwabo bayoozumizyigwa kupona kukabe kutamani mu Paradaiso. Mpoonya aabo ibatakacinci tabakazumizyigwi kunyonganya luumuno lunooli mu Paradaiso. (Is. 65:20; Joh. 5:28, 29) Mubulelo bwa Bwami, bantu ba Leza boonse bayoolibonena mbwali aamasimpe majwi aali kulugwalo lwa Tusimpi 10:22 aakuti: “Cileleko icizwa kuli Jehova ncecivwubya, alimwi tayungizyi macise kulincico pe.” Kwiinda mukugwasyigwa amuuya uusalala, bantu ba Leza bayoovwuba kumuuya, nkokuti bayooba mbuli Kristo alimwi banooyaabulondoka. (Joh. 13:15-17; Ef. 4:23) Buzuba abuzuba mibili yabo inooyaabubukuluka. Eelo kaka buumi bunookkomanisya!—Job. 33:25. w20.08 17 ¶11-12

Inga cabota kuyeeya kuti Banakristo bamwi bakalibikkila mbaakani yakuzumanana kabatakwete naa kukwatwa. Bamwi balayanda kukwata naa kukwatwa, nkuti buyo tabanajana muntu weelela. Mpoonya bamwi bakafwidwa. Kufwumbwa mbocibede, sena bamwi mumbungano beelede kubuzya Banakristo aaba ikaambo ncobatakwete naa kukwatwa naa ambweni kulyaaba kubagwasya kujana muntu wakukwatana limwi? Pele kuti naa tiibalomba, mbuti mukwesu uutakwete naa mucizyi uutakwetwe mbwakonzya kulimvwa kuti umwi mumbungano walyaaba kumugwasya kujana muntu wakukwatana limwi? (1Tim. 5:13) Bakwesu alimwi abacizyi batakwete naa kukwatwa balakkomana ikuti katubikkila maano kube bubotu mbobajisi, ikutali kubafwida luse akaambo kakuti tabakwete naa kukwatwa. Muciindi cakubafwida luse, tweelede kubalumbaizya akaambo kakusyomeka kwabo. Kuti twacita oobo, bakwesu alimwi abacizyi aaba kunyina nobayoolimvwa kuti tubaambila kuti: “Tamukwe mulimo kulindime.” (1Kor. 12:21) Muciindi caboobo, bayoobona kuti tulabalemeka alimwi abusena mbobajisi mumbungano. w20.08 29 ¶10, 14

Kumbele, Jesu wakalibonya kumwaapostolo Paulo lwakwe mwini. (1Kor. 15:8) Paulo naa Saulo, wakali mulweendo kuya Damasiko ciindi naakamvwa jwi lya Jesu iwakabusyigwa alimwi anaakabona cilengaano cakwe mubulemu bwakujulu. (Mil. 9:3-5) Icakamucitikila Paulo cakasinizya kuti Jesu wakabusyigwa ncobeni. (Mil. 26:12-15) Bantu bamwi balakonzya kubukkomanina bumboni bwa Paulo akaambo kakuti Jesu katanalibonya kulinguwe, wakali sikupenzya Banakristo. Naakamana kusinizya kuti Jesu wakabusyigwa, Paulo wakabeleka canguzu kugwasya bamwi kuti bakazyibe kasimpe aaka. Wakaliyumya naakali kuumwa, naakali muntolongo, alimwi anaakali muntenda zyabwato ciindi naakali kukambauka kuti Jesu wakalifwide pele lino ulapona. (1Kor. 15:9-11; 2Kor. 11:23-27) Paulo wakalisinizyide kuti Jesu wakabusyigwa cakuti wakalilisungwide nokuba kufwa akaambo kakwiiminina lusyomo lwakwe. Sena bumboni oobu bwa Banakristo bamumwaanda wamyaka wakusaanguna tabumupi kusyoma kuti Jesu wakabusyigwa? Alimwi sena tabuyumyi lusyomo lwanu mububuke? w20.12 3 ¶8-10

Tweelede kulibuzya kuti, ‘Sena ndilajanika lyoonse kumiswaangano yambungano?’ Kumiswaangano, tulayumizyigwa kuzumanana kumubelekela Jehova alimwi akukulwaizyanya abakwesu abacizyi. (Mt. 11:28) Alimwi tulakonzya kulibuzya kuti, ‘Sena ndilijisi cilengwa cakubala Bbaibbele lyoonse? Kuti kamukkala amukwasyi, sena mwakabikka ciindi cakukomba mumukwasyi nsondo ansondo? Ikuti mukkala nyolikke, sena mwakabikka ciindi cakukomba? Sena mulatola lubazu kusikila mpomugolela mumulimo wakukambauka akugwasya bantu kuba basikwiiya?’ Nkaambo nzi ncotweelede kulibuzya mibuzyo eeyi? Bbaibbele litwaambila kuti Jehova ulalingula mizeezo yesu alimwi akubona zili mumyoyo yesu, nkokuti andiswe tweelede kucita mbubwenya oobo. (1Mak. 28:9) Ikuti naa twabona kuti tuyandika kucinca mbaakani zyesu, bube naa mbotuyeeya, tweelede kumulomba Jehova kuti atugwasye kucinca. Lino nceciindi cakulibambila kujatikizya zintu ziboola kumbele. w20.09 19 ¶19-20

Jesu wakabelesya cikozyanyo kupandulula zijatikizyidwe mukuba sikwiiya. Wakaamba kujatikizya muntu uuyanda kuyaka ngazi alimwi amwami uuyanda kuunka kunkondo. Jesu wakaamba kuti muntu uuyanda kuyaka weelede ‘kusaanguna kukkala ansi akubona mali aayandika’ kumanizya ngazi eeyo, mpoonya mwami weelede ‘kusaanguna kukkala ansi kuyeeya akulomba lulayo kuli bamwi’ kutegwa abone naa basikalumamba bakwe inga bacikonzya kuzwidilila munkondo eeyo. (Lk. 14:27-32) Mbubwenya buyo, Jesu wakalizyi kuti muntu uuyanda kuba sikwiiya weelede kuyeeyesya kapati kujatikizya ncocaamba kuba sikumutobela. Akaambo kaceeci, tweelede kubakulwaizya basikwiiya Bbaibbele kuti katwiiya nsondo ansondo. Mbomuli mwiiyi, mweelede kulibambila cakulomya ciiyo cimwi acimwi kamutanaunka kuyoosololela ciiyo ca Bbaibbele. Kamumubikkide mumizeezo sikwiiya, amuyeeye mbomuyoomupandulwida makani munzila ngubauba kutegwa aamvwisye akwaabelesya.—Neh. 8:8; Tus. 15:28a. w20.10 7 ¶5; 8 ¶7

Malailile aa Jesu alisalede. Tweelede kuyiisya bantu kutobela zintu nzyaakalailila. Nokuba boobo, tatweelede kuluba kaambo kayandika kapati. Jesu kunyina naakaamba kuti: ‘Amubayiisye zintu zyoonse nzyondakamulailila.’ Pele wakaamba kuti: Amubayiisye “kutobela zintu zyoonse nzyondakamulailila.” Kutegwa tutobele malailile aa Jesu aagaminide, tweelede kumuyiisya sikwiiya Bbaibbele ncayelede kucita alimwi akumutondezya mbocicitwa. (Mil. 8:31) Kutobela” malailile caamba kucita caambwa. Ciindi notuyiisya bantu Bbaibbele, tubagwasya kuzyiba ncayanda Leza kulindiswe. Pele nzinji nzyotweelede kucita. Tweelede kubayiisya kuzibelesya mubuumi bwabo bwabuzuba abuzuba zintu nzyobaiya. (Joh. 14:15; 1Joh. 2:3) Kwiinda mucikozyanyo cesu, tweelede kubatondezya mbobakonzya kubelesya njiisyo zyamu Magwalo nobali kucikolo, kumulimo alimwi aciindi nobalyookezya. Ciindi notuli antoomwe ambabo, tulakonzya kupaila kuli Jehova kulomba muuya uusalala kuti ubagwasye.—Joh. 16:13. w20.11 2-3 ¶3-5

Basikwiiya ba Jesu bakajana buyumuyumu. Mucikozyanyo, aciindi eeco Magwalo akali masyoonto. Tiibakajisi mabbuku aapandulula Bbaibbele mbuli ngotujisi mazuba aano. Alimwi bakeelede kukambaukila bantu baambaula myaambo minji yiindene-indene. Nokuba kuti kwakali buyumuyumu oobu, basikwiiya aaba basungu bakacita cintu cakali kuboneka kuti tacikonzyeki, bakakambauka makani mabotu “kuzilenge zyoonse zili ansi aajulu.” (Kol. 1:6, 23) Mazuba aano, Jehova wazumanana kubasololela bantu bakwe alimwi akubapa nguzu zyakucita kuyanda kwakwe. Ulabasololela kwiinda mukubelesya Bbaibbele, ilyakasololelwa amuuya uusalala. Mu Bbaibbele tulabala kujatikizya mulimo wa Jesu alimwi amalailile aakuti basikumutobela bazumanane kubeleka mulimo ngwaakatalisya. (Mt. 28:19, 20) Jehova tasalululi; wakasinsima kuti makani mabotu ayakwaambilizyigwa “kumasi oonse, kumisyobo yoonse, kumilaka yoonse alimwi akubantu bamisyobo yoonse.” (Ciy. 14:6, 7) Uyanda kuti bantu boonse baumvwe mulumbe wa Bwami. w20.10 21 ¶6-8

Mwami Davida wakali mwaalumi iwakali kukkomanina “mulawo wa Jehova.” (Int. 1:1-3) Davida wakalizyi kuti Jehova ulabavwuna babombe pele ulabakazya ibalisumpula. Aboobo Davida wakazumizya mulawo wa Leza kucinca mbwaakali kuyeeya. Wakalemba kuti: “Ndilatembaula Jehova, iwandilaya. Nociba ciindi camasiku, imizeezo yangu iili ansi aamoyo ilandilulamika.” (Int. 16:7) Ikuti katulicesya, tuyoozumizya Jwi lya Leza kucinca mizeezo yesu iitaluzi kaitanatupa kulubizya. Bbaibbele liyooba mbuli jwi litwaambila kuti: “Njeeyi nzila. Amweende mulinjiyo.” Linootucenjezya ciindi notuyanda kuleya kuzwa munzila, nkokuti kuunka kululyo naa kulumwensyi. (Is. 30:21) Kuswiilila Jehova, kuyootugwasya munzila ziindene-indene. (Is. 48:17) Mucikozyanyo, tatukafwi nsoni akaambo kakululamikwa amuntu umwi. Alimwi cilongwe cesu a Jehova ciyooyuma nkaambo tulizyi kuti ulatulanganya mbuli taata siluyando.—Heb. 12:7. w20.11 20 ¶6-7

Ambweni kuyeeya kuli boobu kwakabajatikizya bamwi mu Korinto. (1Kor. 15:12) Ambweni bamwi bakali kuyeeya bubuke munzila yamaambilambali, kabayeeya kuti muntu wakali kwaambwa kuti “ulifwide” akaambo kazibi, pele wakali kuba “muumi” ciindi naaba Munakristo. Kufwumbwa mbocakabede, kukazya bubuke cakali kwaamba kuti lusyomo lwabo ndwabuyo. Ikuti Leza naatakamubusya Jesu, nkokuti nokunyina cinunuzyo cakapegwa alimwi nobatakalekelelwa zibi zyabo. Aboobo aabo ibakali kukazya bubuke bakanyina bulangizi bwini-bwini. (1Kor. 15:13-19; Heb. 9:12, 14) Mwaapostolo Paulo lwakwe wakalizyi kuti “Kristo wakabusyigwa kubafwu.” Bubuke bwa Jesu bwakalilibedelede kwiinda bubuke bwabantu bamwi, nkaambo balo kumbele bakazoofwa alimwi. Paulo wakaamba kuti Jesu “micelo mitaanzi yabaabo bakoona mulufwu.” Ngowakali muntu wakusaanguna kubusyigwa mumubili wamuuya alimwi ngowakali muntu wakusaanguna kuunka kujulu.—1Kor. 15:20; Mil. 26:23; 1Pet. 3:18, 22. w20.12 5 ¶11-12

Mumwaanda wamyaka wakusaanguna, kabunga keendelezya ku Jerusalemu kakabeleka calukamantano kulesya manyongwe akukulwaizya luumuno akati kabantu ba Leza. (Mil. 2:42) Mucikozyanyo, ciindi makani aajatikizya kupalulwa naakatalisyigwa mumwaka wa 49 C.E., kabunga keendelezya kwiinda mukusololelwa amuuya uusalala kakaalanga-langa makani aaya. Ikuti mbungano noyakazumanana kuzwangana kujatikizya makani aaya, mulimo wakukambauka niwakanyonganizyigwa. Nokuba kuti bakali ba Juda, baapostolo alimwi abaalu tiibakayungwa acilengwa caba Juda naa abaabo bakali kukulwaizya cilengwa eeci. Muciindi caboobo, bakalingula Jwi lya Leza alimwi akulomba busolozi bwamuuya uusalala. (Mil. 15:1, 2, 5-20, 28) Ncinzi cakazwa mpawo? Jehova wakakulongezya kusala kwabo, mbungano yakazumanana kuba aluumuno alimwi alukamantano, mpoonya mulimo wakukambauka wakazwidilila. (Mil. 15:30, 31; 16:5) Mazuba aano, mbunga Jehova yabeleka canguzu kulesya manyongwe akukulwaizya luumuno akati kabantu ba Jehova. w20.10 22-23 ¶11-12

Akaambo katwaambo tumwi mbuli kucembaala, kuciswa-ciswa, naa twaambo buyo tumbi ambweni inga tiitweelela kupegwa mikuli imwi. Kuti naa katuli mubukkale oobu, tulakonzya kwiiya kucikozyanyo ca Mwami Davida. Davida wakali kuyandisya kapati kuyaka Tempele lya Leza, pele Jehova wakasala muntu uumbi kucita mulimo ooyu. Aboobo Davida wakamugwasyilizya camoyo woonse muntu wakeelede kucita mulimo ooyu, mane buya wakasanga ngolida alimwi ansiliva zinji kapati zyakubelesya mumulimo ooyu. Eelo kaka Davida ncikozyanyo cibotu kulindiswe! (2Sam. 7:12, 13; 1Mak. 29:1, 3-5) Akaambo kakuciswa-ciswa, mukwesu Hugues, waku France, wakacileka kubeleka mbuli mwaalu, alimwi tanaakacili kucikonzya kubeleka notuba tulimo twaaŋanda. Wakalemba kuti: “Kumatalikilo ndakalityompedwe kapati akulimvwa kubula mpindu. Pele nokwakainda ciindi, ndakabona mbociyandika kuleka kuusa akaambo kakuti tiindakali kucikonzya kucita zintu zimwi. Kumane ndakacikonzya kujana lukkomano kujatikizya zintu nzyondakali kukonzya kucita mumulimo wa Jehova. Mbubwenya mbuli Gideoni abaalumi bali 300 ibakakatede, andime ndiyoozumanana kulwana!”—Bab. 8:4. w20.12 25 ¶14-15

Mubbuku lyamu Bbaibbele ndyaakalemba mwaapostolo Johane ilitwaambila buumi bwa Jesu, mabala aakuti “luyando” alimwi “akuyandwa” alibelesyedwe kapati kwiinda mubbuku lya Matayo, Marko, alimwi a Luka. Eeli bbuku lituyiisya kuti zintu zyoonse nzyotucita zyeelede kweendelezyegwa aluyando. (1Joh. 4:10, 11) Nokuba boobo, cakatola ciindi kuti Johane aayiiye makani aaya. Ciindi Johane naakacili mwana-mwana, talili lyoonse naakali kutondezya luyando. Mucikozyanyo, aciindi cimwi, Jesu alimwi abasikwiiya bakwe bakali kuya ku Jerusalemu kwiinda mu Samariya. Bantu bamumunzi umwi wa Samariya bakakaka kubatambula. Johane wakalomba Jesu kuti aambile mulilo kuzwa kujulu kutegwa ubanyonyoone bantu boonse bamumunzi ooyu. (Lk. 9:52-56) Aciindi cimwi, walo amwanookwabo Jakobo bakoongelezya banyina kuti balombe Jesu kutegwa abape zyuuno zisumpukide mu Bwami. Ciindi baapostolo bamwi nobakazyiba ncobakacita ba Jakobo a Johane, bakanyema kapati! (Mt. 20:20, 21, 24) Pele nokuba kuti Johane wakalubizya mumbazu zyoonse eezyi, Jesu wakali kumuyanda.—Joh. 21:7. w21.01 8-9 ¶3-4

Jehova usala zintu zigwasya bamwi. Mucikozyanyo, wakasala kulenga zintu zipona, kutali akaambo kakuyanda kuligwasya mwini, pele akaambo kakuti uyanda kuti katukkomana abuumi. Kunyina wakamusinikizya kutuma Mwanaakwe kuzootufwida. Wakacita oobo akaambo kakuyanda kugwasya ndiswe. Awalo Jesu wakali kusala zintu zigwasya bamwi. Mucikozyanyo, ciindi naakakatede kapati, wakayiisya nkamu yabantu muciindi cakuti alyookezye. (Mk. 6:31-34) Silutwe wamukwasyi mubotu ulizyi kuti cintu cimwi cikatazya kapati ncayelede kucita nkusalila mukwasyi wakwe cabusongo, alimwi mukuli ooyu ulaubikkila maano kapati. Ulasoleka kutantamuka kusala zintu zimwi kakunyina akaambo kalimvwisya naa kusala kweelana ambwalimvwa aciindi eeco. Muciindi caboobo, ulekela Jehova kumuyiisya mbwayelede kusala. (Tus. 2:6, 7) Muunzila eeyi, uyoobona mbwakonzya kugwasya bamwi, kutali nguwe. (Flp. 2:4) Ikuti silutwe wamukwasyi wasolekesya kwiiya cikozyanyo ca Jehova alimwi a Jesu, uyooba silutwe wamukwasyi uuli kabotu. w21.02 7 ¶19-21

Kacili mukubusi, Mwami Asa wakali kulicesya alimwi wakali sicamba. Mucikozyanyo, nobakafwa bausyi ba Abija, Asa wakaba mwami mpoonya wakatalika kugwisya mituni mucisi. Kuyungizya waawo, “wakaambila ba Juda kuti bayandaule Jehova Leza wabamausyi kuti batobele Mulawo akuubamba.” (2Mak. 14:1-7) Ciindi Zera muna Etiopiya naakaunka kuyoolwana Juda kajisi basikalumamba bali 1,000,000, cabusongo Asa wakalomba lugwasyo kuli Jehova naakati: “O Jehova, tacikwe makani kulinduwe naa aabo mbogwasya mbanji naa tabajisi nguzu. Kotugwasya, O Jehova Leza wesu, nkaambo tusyoma nduwe.” Majwi aaya mabotu atondezya kuti Asa wakajisi lusyomo luyumu lwakuti Jehova ulakonzya kumufwutula alimwi abantu bakwe. Asa wakasyoma Usyi wakujulu, aboobo “Jehova wakazunda bana Etiopiya.” (2Mak. 14:8-12) Cakali kuyoosya kapati ciindi basikalumamba bali 1,000,000 nobakaboola kulwana Asa, pele wakasyoma Jehova aboobo wakazwidilila. w21.03 5 ¶12-13

Bbaibbele lilijisi makani aabantu batalondokede ibakali kuyandana kapati. Amubone cikozyanyo ca Jonatani a Davida. Bbaibbele lyaamba kuti: “Jonatani a Davida bakamvwana kapati, eelyo Jonatani wakatalika kumuyanda Davida mbubonya mbwaliyanda mwini.” (1Sam. 18:1) Davida wakananikwa kuba mwami mubusena bwa Saulo. Kuzwa waawo, Saulo wakaba amunyono kapati kuli Davida alimwi wakali kuyanda kumujaya. Pele Jonatani, mwana wa Saulo kunyina naakabasangana bausyi ciindi nobakali kusola kuti bamujaye Davida. Jonatani a Davida bakasyomezyanya kuti bakali kuyoozumanana kuba balongwe alimwi akugwasyanya lyoonse. (1Sam. 20:42) Cilagambya kubona mbobakali kumvwana kapati Jonatani a Davida nkaambo kuli zintu zinji izyakali kukonzya kupa kuti batabi balongwe. Mucikozyanyo, Jonatani wakali mupati kuli Davida amyaka iisika ku 30. Aboobo Jonatani ambweni naakayeeya kuti takonzyi kuba acilongwe amwana muniini alimwi uutajisi luzyibo lunji mubuumi. Pele Jonatani tanaakayeeya boobo. Wakali kumulemeka kapati Davida. w21.01 21-22 ¶6-7

Jesu wakasyomezya basikumutobela kuti bayoojana lukkomano lwini-lwini. Pele alimwi wakabaambila kuti aabo bamuyanda bayoojana masunko aayindene-indene. (Mt. 10:22, 23; Lk. 6:20-23) Tulikkomene kuba basikwiiya ba Kristo. Pele ino tulimvwa buti ciindi banamukwasyi nobasola kutukasya kubelekela Jehova, notupenzyegwa amfwulumende, naa ciindi babelesima naa basicikoloma nobatusungilizya kucita cintu citali kabotu? Cakutadooneka, zintu zili boobu zilatupa kulibilika. Bantu banji kunyina nobayeeya kuti kupenzyegwa kulakonzya kutupa lukkomano. Nokuba boobo, eeci ncencico Jwi lya Leza ncolitwaambila kucita. Mucikozyanyo, sikwiiya Jakobo wakalemba kuti muciindi cakulimvwa kubula lugwasyo ciindi notujana mapenzi, tweelede kukkomana. (Jak. 1:2, 12) Awalo Jesu wakaamba kuti tweelede kukkomana nociba ciindi notupenzyegwa. (Mt. 5:11) Jehova wakasololela Jakobo kulembela Banakristo aabo, ikubapa lulayo lugwasya kutegwa bazumanane kujana lukkomano nokuba kuti bakali kusunkwa. w21.02 26 ¶1-2; 27 ¶5

Mumazuba aa Timoteyo, Banakristo bamwi bakaalilwa kutondezya kulumba kucoolwe cakuba babelesinyina a Leza. Aaba babikkilizya Dema, Fugelo, Hermogene, Humenayo, Alekizanda alimwi Fileto. (1Tim. 1:19, 20; 2Tim. 1:15; 2:16-18; 4:10) Bantu boonse aaba aciindi cimwi bakali kumuyanda Jehova, pele bakaleka kuyeeya kuti zintu nzyaakabapede zyakali ziyandisi. Mbuti Saatani mbwasola kutupa kuleka zintu ziyandisi nzyaakatupa Jehova? Amubone tukole twa Saatani tumwi. Ubelesya zyakulikondelezya alimwi a Intaneti kutupa kuyeeya alimwi akucita zintu munzila iikonzya kupa kuti aasyoonto-syoonto tucileke kubelekela Jehova naa kutobela milawo yakwe. Ulasola kutukonga kwiinda mukubelesya balongwe kuti batuyunge naa kutupenzya kutegwa tucileke kukambauka. Alimwi ulasola kutoongelezya kuti tuswiilile njiisyo zyabasiluleyo kutegwa tusiye kasimpe. Kuti naa tiitwacenjela, aasyoonto-syoonto tulakonzya kukasiya kasimpe.—1Tim. 6:21. w20.09 27 ¶6-8

Sena kuli mulongwe naa munamukwasyi iwakamunyemya? Ikuti kacili boobo, mulakonzya kugwasyigwa kwiinda mukubala ncaakacita Mwami Davida iciindi mwanaakwe Abisalomu naakamunyemya. (2Sam. 15:5-14, 31; 18:6-14) Kamutanatalika kubala cibalo, amumwaambile Jehova mbomulimvwide kujatikizya mbomwakeendelezyegwa munzila iitali kabotu. (Int. 6:6-8) Amweezeezye buyo mbwaakalimvwide Davida ciindi zintu zyoonse eezyi nozyakali kumucitikila. Wakali kumuyanda Abisalomu alimwi wakali kumusyoma Ahitofeli. Pele boonse bakamuzangila, bakamunyemya kapati alimwi buya akusola kumujaya. Davida naakaleka kubasyoma balongwe bakwe bamwi, kayeeya kuti abalo bakamusangana Abisalomu mukumuzangila. Davida naakayeeya buyo kulibikkila maano lwakwe mwini alimwi akuyanda kutija kuzwa mucisi alikke, naa naakatyompwa cakuzwa munzila. Muciindi caboobo, wakapaila kuli Jehova kutegwa amugwasye. Kuyungizya waawo, wakalomba lugwasyo kubalongwe bakwe. Alimwi kunyina naakawayawaya kucita ncaakasala. Pele wakazumanana kusyoma Jehova alimwi abalongwe bakwe. w21.03 15 ¶7-8; 17 ¶10-11