August

Balikke aabo ibajisi cilongwe ciyumu a Jesu mbobagwasyigwa acipaizyo cacinunuzyo cakwe. Jesu wakaamba kuti, ‘uyootuulila beenzinyina buumi bwakwe.’ (Joh. 15:13) Bantu basyomeka ibakapona Jesu katanaboola anyika bayooyandika kwiiya kujatikizya nguwe akuba balongwe bakwe. Bamaalumi alimwi abamakaintu aaba bayoobusyigwa, pele nokuba kuti bakali babelesi ba Jehova basyomeka bayooyandika kuba acilongwe a Jesu kutegwa bakabe abuumi butamani. (Joh. 17:3; Mil. 24:15; Heb. 11:8-12, 24-26, 31) Tulakkomana kapati kubeleka antoomwe a Jesu mumulimo wakukambauka alimwi akuyiisya bantu makani mabotu aa Bwami. Ciindi Jesu naakali anyika, wakali mwiiyi. Aboobo mbwaanga Jesu wakajokela kujulu kali mutwe wambungano, wazumanana kusololela mulimo wakukambauka alimwi akuyiisya. Ulabona alimwi akulumba akaambo kakusolekesya kwanu kugwasya bantu banji kumuzyiba Jesu alimwi a Bausyi. Aboobo nzila ilikke iikonzya kutugwasya kutegwa tuuzuzikizye mulimo ooyu nkwiinda mukugwasyigwa a Jehova alimwi a Jesu.—Joh. 15:4. w20.04 22 ¶7-8

Kaindi, zina lyakuti “mwami wakunyika” lyakali kwaamba muleli wamasena aa Israyeli nkoili kunyika mpoonya zina lyakuti “mwami wakumusanza” lyakali kwaamba muleli wamasena aa Israyeli nkoili kumusanza. (Dan. 10:14) Kusikila lya Pentekoste 33 C.E., cisi ca Israyeli bakali bantu ba Leza. Pele kuzwa ciindi eeco, Jehova wakacisalazya kuti basikwiiya ba Jesu mbobakali bantu bakwe. Aboobo, businsimi bunji ibuli kubbuku lya Daniele caandaano 11 bwaamba basikutobela ba Kristo, ikutali cisi ca Israyeli. (Mil. 2:1-4; Rom. 9:6-8; Gal. 6:15, 16) Baleli baindene-indene bakali kweendelezya kabali mwami wakunyika alimwi amwami wakumusanza aziindi ziindene. Pele bami boonse aabo bakali kucita zintu zikozyenye. Cakusaanguna, bami aaba ambweni bakali beendelezi mumasena imwakali kukkala bantu ba Leza banji naa ambweni bakali kubalwana buya bantu ba Leza. Cabili, mbobakali kubeendelezya bantu ba Leza cakatondezya kuti tiibakali kumuyanda Leza wakasimpe, Jehova. Catatu, bami aaba bobilo bakali kuzundana. w20.05 3 ¶3-4

Jehova ulapa kuti zintu zicitike kwiinda mukuba kufwumbwa mbwayanda kutegwa azuzikizye makanze aakwe. Jehova alimwi ulakonzya kupa bantu batalondokede kuba kufwumbwa mbwayanda kutegwa bamubelekele akuzuzikizya makanze aakwe. (Is. 64:8) Kwiinda mukucita boobo, Jehova upa kuti kuyanda kwakwe kucitwe. Kunyina cikonzya kumulesya kuzuzikizya makanze aakwe. (Is. 46:10, 11) Tulakonzya kumulumba kapati Taateesu wakujulu kwiinda mukuzinzibala kuyeeya zintu nzyacita alimwi azintu nzyatugwasya kuti katucita. Mucikozyanyo, ciindi notuyeeya kujatikizya zintu zyoonse nzyaakalenga, cilatugambya kapati twalanga zintu nzyaakacita. (Int. 8:3, 4) Alimwi ciindi notuzinzibala kuyeeya Jehova mbwaatupa kuba kufwumbwa mbwayanda kutegwa tucite kuyanda kwakwe, citupa kumulemeka kapati. Masimpe zina lya Jehova lilayoosya! Lyaamba mbwabede Taateesu, zintu zyoonse nzyaakacita alimwi anzyayoocita kumbele.—Int. 89:7, 8. w20.06 9-10 ¶6-7

Oxygen muya ngobayandika bantu alimwi abanyama kutegwa bazumanane kupona. Kuyeeyelwa kuti zilenge zipona zilabelesya oxygen munji kapati amwaka. Zilenge zyoonya eezyi zilagusya carbon dioxide. Nokuba boobo, zilenge eezyi kunyina nozyuumanizya muya wa oxygen, alimwi mulenga-lenga kunyina nounyonganizyigwa a carbon dioxide. Nkaambo nzi ncocili boobo? Nkaambo kakuti Jehova wakalenga zisamu ziindene-indene izibelesya carbon dioxide alimwi akugusya oxygen. Mbubwenya buyo, oxygen cycle itondezya kuti majwi aali mulugwalo lwabuzuba bwasunu ngamasimpe. Mbuti mbotukonzya kutondezya kulumba kapati kujatikizya nyika yesu mbotu alimwi azintu zibotu izili mulinjiyo? (Int. 115:16) Nzila imwi mbotukonzya kucita boobo, nkwiinda mukuzinzibala kuyeeya zintu nzyaakalenga Jehova. Eeci ciyootukulwaizya kumulumba Jehova abuzuba akaambo kazintu zibotu nzyatupa. Kuyungizya waawo, tulatondezya kulumba kwiinda mukusolekesya kusalazya busena mpotukkala. w20.05 22 ¶5, 7

Jehova makani aaya aa Saatani waayendelezya cabusongo, cakukkazika moyo alimwi acabululami. Alimwi watondezya nguzu zyakwe munzila zinji kapati. Kwiinda zyoonse, luyando lwakwe lulalibonya muzintu zyoonse nzyacita. (1Joh. 4:8) Jehova ulimukubeleka canguzu kusalazya zina lyakwe. Saatani ucilisampaula zina lya Leza amazuba aano. Usola kupa bantu kudooneka kuti Leza ngusinguzu, mululami, musongo alimwi ngusiluyando. Mucikozyanyo, Saatani usola kupa bantu kuyeeya kuti Jehova tali Mulengi. Alimwi kuti bantu bazumina kuti Leza nkwali, Saatani ubapa kusyoma kuti zyeelelo zya Leza tazipi lwaanguluko alimwi tazili kabotu. Mane buya uyiisya bantu kuti Jehova ngusilunya alimwi ulabaumpa bantu mumulilo wahelo. Ciindi bantu nobabusyoma bubeji oobu bubyaabi kapati, cilabaubila kubukaka bweendelezi bwa Jehova ibululeme. Kusikila mane akanyonyoonwe cakumaninina, Saatani ulazumanana kupa kuti andinywe mumukake Jehova. Pele sena uyoozwidilila? w20.06 5 ¶13-15

Mumbungano zinji, kuli bakwesu alimwi abacizyi ibasoleka canguzu kwiiya myaambo mipya. Cilakonzya kubakatazya kwaamba mbobalimvwa. Pele kuti twabikkila maano kukusolekesya nkobacita kwiiya mwaambo mupya, tuyoobona kuti balamuyanda kapati Jehova alimwi balayandisisya kumubelekela. Ikuti twabikkila maano kubube bubotu mbobajisi, masimpe tuyoobalemeka alimwi akubayanda kapati bakwesu abacizyi aaba. Tatukabaambili kuti, “Tamukwe mulimo kulindime” akaambo buyo kakuti tabauzyi kabotu mwaambo wesu. (1Kor. 12:21) Jehova watupa coolwe citaliboteli cakuba abusena mumbungano yakwe. Kufwumbwa naa tuli mwaalumi naa mukaintu, tatukwete naa kukwatwa, tuli bapati, bana naa tuwaambaula kabotu mwaambo uumbi naa tusola buyo, tulayandika kapati kuli Jehova alimwi akuli umwi amweenzinyina. (Rom. 12:4, 5; Kol. 3:10) Lyoonse atusolekesye kujana nzila zinji mbotukonzya kutondezya kulumba kubusena mbotujisi mumbungano ya Jehova alimwi abusena bwabamwi. w20.08 31 ¶20-22

Mwaapostolo Paulo tanaakaleka kubakambaukila bana Atene, nokuba kuti munzi wabo wakazwide mituni, kutalilemeka mumakani aakoonana alimwi abasyaabusongo batakombi Leza; alimwi nokuba kuti bakali kumutukila tanaakatyompwa. Paulo kumugama wakaba Munakristo, nokuba kuti wakali “sikusampaula Leza asikupenzya bantu bakwe alimwi asikasampusampu.” (1Tim. 1:13) Mbubwenya Jesu mbwaakabona kuti Paulo wakali kukonzya kuba sikwiiya, awalo Paulo mbwaakababona mbubwenya oobo bana Atene. Lusyomo ndwaakajisi lwakuti bakali kukonzya kuba basikwiiya tiilwakali lwabuyo. (Mil. 9:13-15) Mumwaanda wamyaka wakusaanguna, bantu bazwa mubukkale bwiindene-indene bakaba basikwiiya ba Jesu. Ciindi Paulo naakalembela Banakristo ibakali kukkala mumunzi waba Giriki iwaku Korinto, wakaamba kuti bamwi mumbungano eeyo aciindi cimwi bakali zigwebenga naa bakali kupona buumi bwakutalilemeka ibusesemya. Mpoonya wakuyungizya kuti: “Oobo mbobakabede bamwi akati kanu. Pele nywebo mwakasanzyigwa.” (1Kor. 6:9-11) Sena nomwakabona kuti bantu aabo bakali kukonzya kucinca alimwi akuba basikwiiya? w20.04 12 ¶15-16

Baalu tabeelede kufwambaana kubabeteka aabo ibatalika kudooneka, naa cilagwasya kubelekela Jehova. Muciindi caboobo, beelede kusolekesya kumvwisya twaambo tubapa kwaamba naa kucita zintu munzila eeyo. Mpoonya baalu balakonzya kubelesya Bbaibbele kutegwa babakulwaizye. Musinsimi Elija wakatija Mwami mukaintu Jezebeli. (1Bam. 19:1-3) Wakatyompwa kapati cakuti wakali kuyanda kuti afwe nkaambo wakayeeya kuti mulimo wakwe wakanyina mpindu. (1Bam. 19:10) Muciindi cakumubeteka Elija, Jehova wakamwaambila kuti tanaakali alikke pe, akuti wakeelede kusyoma nguzu zya Leza alimwi akuti kwakacili mulimo mupati ngwaakeelede kucita. Jehova wakaswiilila cakubikkila maano kuzintu izyakali kumupa kulibilika Elija akumupa mulimo uumbi. (1Bam. 19:11-16, 18) Ino ncinzi ncotwiiya? Toonse, kwaambisya baalu, tweelede kuzyeendelezya caluzyalo mbelele zya Jehova. Tacikwe makani naa muntu wanyema naa kulimvwa kuti Jehova takonzyi kumufwida luzyalo, baalu beelede kumuswiilila ciindi nabaambila mbwalimvwa. Mpoonya bayoosoleka kumwaambila kuti Jehova ulamuyanda. w20.06 22 ¶13-14

Jehova wakatulenga munzila yakuti katukkomana kuba antoomwe abalongwe alimwi abanamukwasyi. (Int. 133:1) Jesu wakalijisi balongwe bali kabotu. (Joh. 15:15) Bbaibbele lilaamba bubotu bwakuba abalongwe beni-beni. (Tus. 18:24) Alimwi lilatwaambila kuti tacili kabotu kulizandula. (Tus. 18:1) Bamwi bayeeya kuti mawebbusaiti aakubandikila a Intaneti alakonzya kubagwasya kuba abalongwe banji alimwi akutalimvwa kulendelelwa. Nokuba boobo, tweelede kucenjela ciindi notubelesya mawebbusaiti aaya. Kuvwuntauzya ikwakacitwa kutondezya kuti bantu ibabelesya ciindi cinji kubala mameseji alimwi akulanga nzyobabikka bamwi amawebbusaiti aakubandikila a intaneti, balakonzya kulimvwa kulendelelwa akutyompwa. Nkaambo nzi? Kaambo kamwi nkakuti, bantu kanji-kanji babikka mafwoto aatondezya zintu zibotu zyakabacitikila mubuumi, mafwoto aabo mabotu kapati, mafwoto aabalongwe babo alimwi amasena mabotu ngobakaswaya. Muntu uumbi iwaabona mafwoto aayo ulakonzya kulyeezyanisya akuyeeya kuti buumi bwakwe bunyina mpindu. w20.07 5-6 ¶12-13

Ngazi Yamulindizi yamu October 1, 1988, yakaamba kuti: “Baalu balizyi kuti Kristo, kwiinda mukubelesya muuya uusalala, ulakonzya kusololela mwaalu uuli woonse ikwaamba njiisyo yamu Bbaibbele iikonzya kubagwasya baalu boonse kuzyiba cakucita mubukkale bumwi naa kusala cakucita mumakani aamwi. (Mil. 15:7-15) Muuya uusalala ulabagwasya baalu boonse ikutali omwe buyo pe.” Mwaalu uulemeka baalunyina talili lyoonse nasaanguna nguwe kubandika amuswaangano wabaalu. Talinguwe waambaula ciindi coonse alimwi kunyina nayeeya kuti mizeezo yakwe lyoonse njiiluzi. Muciindi caboobo, ulaamba mbwayeeya cakulicesya. Ulaswiilila cakubikkila maano ciindi baalunyina nobaambaula. Alimwi kwiinda zyoonse, ulilibambilide kwaamba njiisyo zyamu Magwalo alimwi akutobela busolozi buzwa ‘kumuzike uusyomeka alimwi uucenjede.’ (Mt. 24:45-47) Ciindi baalu nobabandika twaambo munzila yaluyando alimwi akulemekana, muuya uusalala wa Leza unooliko alimwi unoobasololela kusala zintu zili kabotu.—Jak. 3:17, 18. w20.08 27 ¶5-6

Basinkondonyina ba mwaapostolo Paulo bakali anguzu kapati kwiinda nguwe. Kanji-kanji, bakali kumuuma alimwi akumubikka muntolongo. Alimwi Paulo wakeendelezyegwa munzila mbyaabi abantu ibakeelede kuba balongwe bakwe. Mane buya bamwi mumbungano ya Bunakristo bakali kumukazya. (2Kor. 12:11; Flp. 3:18) Pele Paulo wakabazunda boonse aabo ibakali kumulwana. Munzila nzi? Wakazumanana kukambauka nokuba kuti wakali kukazyigwa. Nokuba kuti bakali kumutyompya Banakristonyina, Paulo wakazumanana kusyomeka kulimbabo. Alimwi cipati kwiinda zyoonse ncakuti, wakasyomeka kuli Leza kusikila kumamanino aabuumi bwakwe. (2Tim. 4:8) Wakacikonzya kucita zintu zyoonse eezyi, ikutali akaambo kakuti wakali kulisyoma, pele akaambo kakusyoma Jehova. Sena mulatukilwa naa kupenzyegwa? Mulabuzunda bubi kwiinda mukusolekesya kugwasya bantu kwiiya Jehova alimwi a Bbaibbele. Mulakonzya kwaazuzikizya makanze aaya kwiinda mukubelesya Bbaibbele kwiingula mibuzyo njobabuzya bantu, kwiinda mukubalemeka akubatondezya luzyalo aabo bamweendelezya munzila mbyaabi, alimwi akubacitila zintu zibotu bantu boonse, nobaba basinkondonyoko.—Mt. 5:44; 1Pet. 3:15-17. w20.07 17-18 ¶14-15

Sena mubwini inga twaamba kuti Jehova ulalicesya? Inzya, inga twaamba oobo, mbubwenya mbwaakaamba Davida atala aawa. (Int. 18:35) Ciindi Davida naakalemba majwi aaya, ambweni wakali kuyeeya ciindi musinsimi Samuele naakaboola kuŋanda yabausyi kuzoonanika yooyo iwakali kuyooba mwami wa Israyeli kumbele. Davida ngowakali muniini akati kabana basankwa ibali lusele; nokuba boobo, Jehova wakasala nguwe kunjila mubusena bwa Mwami Saulo. (1Sam. 16:1, 10-13) Kweelede kuti Davida wakaazumina majwi ngaakaamba sintembauzyo kujatikizya Jehova kuti: “Ulooka kuti alange julu anyika, nguubusya muntu uupengede kuzwa mulusuko. Nguusumpula mucete . . . kuti amupe kukkala ankumekume.” (Int. 113:6-8) Kweelana ambwabeendelezya bakombi bakwe batalondokede, Jehova ulatondezya kuti ulalicesya. Tatambuli buyo bukombi bwesu, pele alimwi utubona kuti tuli balongwe bakwe. (Int. 25:14) Kutegwa cilongwe cesu anguwe cikonzyeke, Jehova wakabweza ntaamu kwiinda mukupa Mwanaakwe kacili cipaizyo cakumanya zibi zyesu. Eelo kaka Jehova ngusilweetelelo kapati! w20.08 8 ¶1-3

Jehova ulibikkide kale buzuba alimwi aciindi nayoonyonyoona bweende bwazintu oobu. (Mt. 24:36) Aboobo kunyina nayooleka kukkazika moyo akubweza ntaamu kacitanasika ciindi eeco. Uliyandide kapati kubabusya bafwide, pele ucikkazika moyo. (Job. 14:14, 15) Unoolindila kusikila mane ciindi ceelede cakubabusya cikasike. (Joh. 5:28) Tulijisi twaambo tubotu ncotweelede kumulumba Jehova akaambo kakukkazika moyo kwakwe. Amuyeeye kaambo aaka: Akaambo kakuti Jehova ulakkazika moyo, bantu banji, kubikkilizya andiswe, twakaba aciindi ‘cakukonzya kweempwa.’ Jehova uyanda kuti bantu banji babe acoolwe cakuyooba abuumi butamani. Aboobo atutondezye kuti tulalumba akaambo kakukkazika moyo kwakwe. Munzila nzi? Kwiinda mukubeleka canguzu kuyandaula baabo ‘ibalibambilide kutambula buumi butamani’ akubagwasya kuyanda Jehova alimwi akumubelekela. (Mil. 13:48) Kuti twacita oobo, nkokuti bayoogwasyigwa akukkazika moyo kwa Jehova, mbubwenya mbotwakagwasyigwa andiswe. w20.08 18 ¶17

Tuyanda kuti sikwiiya wesu amuzyibe Jehova. Aboobo nzyaiya zyeelede kumusika amoyo kutegwa kazibelesya. Jesu wakali kuyiisya bantu zintu zinji alimwi nzyaakali kubayiisya bakali kuzikkomanina. Pele bantu bakamutobela akaambo kakuti nzyaakabayiisya zyakabasika amoyo. (Lk. 24:15, 27, 32) Sikwiiya weelede kubona Jehova kuti muntu mwini-mwini, ooyo ngwakonzya kuba acilongwe anguwe, alimwi weelede kumubona kuba Usyi, Leza wakwe alimwi mulongwe wakwe. (Int. 25:5) Nomwiiya, amumugwasye sikwiiya kubikkila maano kubube bubotu mbwajisi Leza wesu. (Kul. 34:5, 6; 1Pet. 5:6, 7) Tacikwe makani amubandi ngomubandika, amubikkile maano kubandika kujatikizya mbwabede Jehova. Amumugwasye sikwiiya kulumba bube bubotu mbwajisi Jehova, nkokuti luyando, luzyalo alimwi alweetelelo. Jesu wakaamba kuti ‘mulawo mupati alimwi wakusaanguna’ ngwakuti “weelede kuyanda Jehova Leza wako.” (Mt. 22:37, 38) Amumugwasye sikwiiya wanu kuyanda Jehova. w20.10 10 ¶12

Jesu wakali kubeendelezya cabulemu bamakaintu boonse. (Joh. 4:27) Pele Jesu wakali kubalemeka kapati bamakaintu ibakali kucita kuyanda kwa Bausyi. Wakali kubabona kuti mbacizyi bakwe alimwi wakababikkilizya ciindi naakaamba bamaalumi aabo mbaakali kubona kuti ncibeela camukwasyi wakwe wakumuuya. (Mt. 12:50) Jesu alimwi wakali mulongwe mwini-mwini kulimbabo. Amubone cilongwe ncaakajisi kuli Marta alimwi a Mariya, boonse ibatakakwetwe. (Lk. 10:38-42) Kwiinda mumajwi aakwe alimwi anzyaakali kucita, Jesu wakabapa kwaanguluka bamakaintu aaba. Mucikozyanyo, Mariya wakaanguluka kukkala kumaulu aa Jesu kali sikwiiya. Alimwi ciindi Marta naakanyema akaambo kakuti Mariya tanaakamugwasya kubamba cakulya, Marta wakaanguluka kwaambila Jesu izyakali kumoyo. Kupobwe ndilyonya eelyo, Jesu wakabagwasya bamakaintu aaba kwiiya ziiyo iziyandika kapati. Alimwi wakatondezya kuti wakali kubabikkila maano bamakaintu aaba alimwi amwanookwabo, Lazaro, kwiinda mukubaswaya aziindi zimbi. (Joh. 12:1-3) Nkakaambo kaako ciindi Lazaro naakaciswa kapati, Mariya alimwi a Marta bakalizyi kuti bakali kukonzya kumulomba Jesu kuti abagwasye.—Joh. 11:3. w20.09 20 ¶3; 21 ¶6

Basikwiiya ba Jesu bakali kulangila kuti Bwami bwakali “kuyoolibonya ndilyonya” alimwi akubaangununa kukudyaamininwa abana Roma. Tulangila buzuba ciindi Bwami bwa Leza nobuyoogusya bubi alimwi akuleta nyika mpya yabululami. (2Pet. 3:13) Nokuba boobo, tweelede kukkazika moyo akulindila ciindi ncabikkide Jehova. Jehova wakamupa ciindi cinji Nowa cakuyaka bwato alimwi akubeleka kali “mukambausi wabululami.” (2Pet. 2:5; 1Pet. 3:20) Jehova wakamuswiilila cakukkazika moyo Abrahamu ciindi naakazumanana kubuzya makanze aakunyonyoona bantu babyaabi bamu Sodoma a Gomora. (Matl. 18:20-33) Kwamyaka minji, Jehova wakabakkazikila moyo bana Israyeli ibatakasyomeka. (Neh. 9:30, 31) Tulakubona kukkazika moyo kwa Jehova ciindi nazumizya bantu mbakwela kulinguwe kuti “bakonzye kweempwa.” (2Pet. 3:9; Joh. 6:44; 1Tim. 2:3, 4) Cikozyanyo cibotu ca Jehova cakukkazika moyo ceelede kutukulwaizya kukkazika moyo ciindi notuzumanana kukambauka akuyiisya. w20.09 10 ¶8-9

Ciindi Jehova aakubabusya bantu, banooyeeya mbubonya mbobakali kuyeeya alimwi tabakacinci bube bwabo. Amuciyeeyele buyo ncocaamba eeci. Jehova ulamuyanda kapati cakuti ulimubwene alimwi ulizizyi zyoonse nzyomuyeeya, mbomulimvwa, nzyomwaamba alimwi anzyomucita. Aboobo kuti naa wamubusya, ulamubusya mbubwenya mbomwakabede. Mwami Davida wakalizyi kuti Jehova ulimuzyi kabotu umwi aumwi wesu. (Int. 139:1-4) Ino tulimvwa buti ciindi notumvwisya kuti Jehova ulituzyi kabotu? Ciindi notuzinzibala kuyeeya mbwatuzyi Jehova, tatweelede kulibilika. Nkaambo nzi? Amuyeeye kuti Jehova ulatubikkila maano kapati. Umwi aumwi wesu umubona kuti ulayandika kapati kulinguwe. Ulazibikkila maano zintu zyoonse nzyotucita mubuumi bwesu. Eelo kaka cilakulwaizya eeci! Aboobo tatweelede kulimvwa kuti tuli tolikke. Lyoonse Jehova ulaandiswe, alimwi ulayanda kutugwasya.—2Mak. 16:9. w20.08 17 ¶13-14

Jehova ulayanda kuyiisya bantu bakwe. Uyanda kuti bamuzyibe, bamuyande, alimwi akuti bakapone kukabe kutamani kabali bana bakwe. Zyoonse eezyi inga tazikonzyeki kuti kakunyina lwiiyo lwakwe. (Joh. 17:3) Jehova wakabelesya mbungano ya Bunakristo yamumwaanda wamyaka wakusaanguna kuyiisya bantu bakwe. (Kol. 1:9, 10) Muuya uusalala, nkokuti “mugwasyi” ooyo Jesu ngwaakasyomezyede, awalo wakabagwasya basikwiiya. (Joh. 14:16) Muuya uusalala wakabagwasya basikwiiya kulimvwisya Jwi lya Leza alimwi akuyeeya zintu zyoonse Jesu nzyaakaambide akucita, zyalo kumbele izyakali kuyoolembwa mu Mabbuku aa Makani Mabotu. Luzyibo oolu lwakayumya lusyomo lwa Banakristo bamumwaanda wamyaka wakusaanguna alimwi aluyando ndobakajisi kuli Leza, ku Mwanaakwe, alimwi akuli umwi amweenzinyina. Jehova wakasinsima kuti “kumamanino aamazuba aayo,” bantu bazwa mumasi oonse bayoowuumukila kucilundu cacikozyanyo kutegwa bakayiisyigwe nzila zyakwe. (Is. 2:2, 3) Tulabubona businsimi oobu kabuzuzikizyigwa. w20.10 24 ¶14-15

Ncinzi cikonzya kupa muntu kukaka lulayo lubotu kuzwa kumweenzinyina uubikkila maano? Nkulisumpula. Bantu balisumpula balayanda ‘kubatekunya kumatwi.’ ‘Balaleka kuswiilila kasimpe.’ (2Tim. 4:3, 4) Balimvwa kuti tabayandiki lulayo akaambo kakuti balibona kuti mbasongo naa kuti balayandika kapati kwiinda bamwi. Pele mwaapostolo Paulo wakalemba kuti: “Ikuti naa umwi uyeeya kuti ulayandika kapati kakuli kunyina ambwabede, ulalyeena lwakwe mwini.” (Gal. 6:3) Mwami Solomoni wakakapandulula kabotu kaambo aaka. Wakalemba kuti: “Mwana mucete pele musongo, mubotu kwiinda mwami mudaala pele mufwubafwuba, ooyo uutacikwe maano aakuti amvwe kucenjezyegwa.” (Muk. 4:13) Amubone cikozyanyo ncaakapa mwaapostolo Petro ciindi naakalulamikwa caantangalala amwaapostolo Paulo. (Gal. 2:11-14) Petro naakanyema kujatikizya ncaakaamba Paulo, munzila mbwaakacaamba alimwi akuti wakacaamba kumbele lyabantu banji. Pele Petro wakali musongo. Wakalutambula lulayo alimwi kunyina naakamubikkilila Paulo. Muciindi caboobo, kumbele wakaamba Paulo kuti “mukwesu uuyandwa.”—2Pet. 3:15. w20.11 21 ¶9, 11-12

Ncinzi ciyoobagwasya kapati basikwiiya Bbaibbele kuyaambele kumuuya? Nkujanika kumiswaangano yesu ya Bunakristo. Nkaambo nzi ncotwaambila boobo? Lulayo lwamu Magwalo ilupegwa kumiswaangano luyooyungizya luzyibo ndobajisi, kuyumya lusyomo lwabo alimwi akubagwasya kuyaambele muluyando lwabo kuli Leza. (Mil. 15:30-32) Kuyungizya waawo, sikumwaya ulakonzya kwaambila sikwiiya kuti luyando ndwajisi kuli Jehova ndolwakamukulwaizya kutobela malailile aa Leza. (2Kor. 7:1; Flp. 4:13) Alimwi ciindi basikwiiya Bbaibbele nobazyibana abasikumwaya basyomeka ibaindene-indene, basikwiiya balaiya kuzwa kuzikozyanyo zyabo kujatikizya ncocaamba kutobela malailile aa Kristo aakuyanda Leza alimwi abasimukobonyina. (Joh. 13:35; 1Tim. 4:12) Balababona basikumwaya ibakazunda buyumuyumu ibukozyenye ambobajisi akwiiya kuti abalo inga bacikonzya kucinca akuba sikwiiya wa Kristo. (Dt. 30:11) Umwi aumwi mumbungano ulakonzya kugwasyilizya basikwiiya Bbaibbele munzila ziindene-indene kutegwa bayaambele kumuuya.—Mt. 5:16. w20.11 5 ¶10-12

Ambweni mwaapostolo Paulo wakali kupandulula kuti wakalwana abanyama beni ibakali mubbuwa lyazisobano mu Efeso. (2Kor. 1:8; 4:10; 11:23) Naa ambweni wakali kupandulula kukazyigwa aba Juda alimwi abamwi ibakali mbuli “banyama babutambo.” (Mil. 19:26-34; 1Kor. 16:9) Kufwumbwa naa cakali buti, Paulo wakali muntenda. Pele wakazumanana kusyoma kuti uyooba abuumi bukkomanisya kumbele. (1Kor. 15:30, 31; 2Kor. 4:16-18) Tupona muziindi zikatazya kapati. Bakwesu bamwi balajanika mumapenzi aaletwa azigwebenga. Bamwi bakkala mumasena muli nkondo, aboobo tabajisi lwaanguluko. Mumasi aamwi, bantu ba Jehova tabajisi lwaanguluko lwakukambauka, pele balamubelekela Jehova nokuba kuti balakonzya kubikkwa muntolongo naa kujaigwa akaambo kakucita boobo. Nokuba boobo, bakwesu abacizyi aaba bazumanana kumukomba Jehova alimwi nzikozyanyo zibotu kapati kulindiswe. Tabayoowi nkaambo balizyi kuti nokuba kuti bafwa aciindi ecino, Jehova ubasyomezya kuyoobapa cintu cimwi iciinda kubota, kumbele. w20.12 9 ¶3-4

Sena zimwi ziindi mulatyompwa akaambo kuti mukambaukila mucilawo mobatautambuli mulumbe wesu naa akaambo kakuti bantu banji tabajaniki mumaanda? Mubukkale buli boobu, mbuti mbotukonzya kuzumanana kuba alukkomano naa kuyungizya lukkomano lwesu? Cilayandika kapati kuubona munzila iili kabotu mulimo wakukambauka. Ino eeci caamba nzi? Amubikkile maano kwaambilizya zina lya Leza alimwi a Bwami. Cakusalazya Jesu wakaamba kuti mbasyoonto ibakali kuyakwiijana nzila iitola kubuumi. (Mt. 7:13, 14) Ciindi notuli mumulimo wakukambauka, tulijisi coolwe cakubeleka antoomwe a Jehova, Jesu alimwi abangelo. (Mt. 28:19, 20; Ciy. 14:6, 7) Jehova nguubakwela aabo ibeelela. (Joh. 6:44) Aboobo ikuti muntu katayandi kuutambula mulumbe wesu aciindi eeco, ambweni uyakuutambula twaakumuswaya alimwi. Mucizyi wazina lyakuti Deborah wakaamba kuti: “Kutyompwa ncilwanyo cibyaabi kapati ncabelesya Saatani kulindiswe.” Pele Jehova Leza ulaanguzu kapati kwiinda Saatani alimwi azilwanyo zyakwe zyoonse. w20.12 26 ¶18-19; 27 ¶21

Banakristo banji ibasyomeka beelede kubeleka mulimo wakumubili kutegwa bacikonzye kuligwasya alimwi akulanganya mikwasyi yabo. Nokuba boobo, balaigwasyilizya mbunga ya Leza munzila iili yoonse njobakonzya. Mucikozyanyo, bamwi balacikonzya kugwasyilizya nokwacitika ntenda, ibamwi balabeleka mumilimo yamayake alimwi boonse balijisi coolwe cakusanga mali kumulimo wanyika yoonse. Balacita zintu zyoonse eezyi akaambo kakuti balamuyanda Leza alimwi abantunyina. Nsondo ansondo, tulatondezya kuti tulabayanda bakwesu abacizyi kwiinda mukujanika kumiswaangano yambungano alimwi akutola lubazu. Nokuba kuti zimwi ziindi inga tulikatede, tulaunka kumiswaangano eeyo. Nokuba kuti inga tuliyoowede, tulapa bwiinguzi. Alimwi nokuba kuti toonse tulijisi mapenzi, tulabakulwaizya bamwi kautanatalika muswaangano alimwi anowamana. (Heb. 10:24, 25) Eelo kaka tulalumba kapati kumulimo ngobabeleka babelesima! w21.01 10 ¶11

Mukwiimpana, bantu balisumpula cilabakatazya kulumbaizya bamwi, bayanda kuti balo kabalumbaizyigwa mbabo. Balalyeezyanisya abamwi alimwi akukulwaizya muuya wakuzundana. Muciindi cakuyiisya bamwi alimwi akubapa mikuli, balakonzya kwaamba kuti, “Kuti koyanda kuti cintu cicitwe munzila iiluzi”—nkokuti munzila njobayanda balo, “weelede kulicitila omwini.” Muntu uulisumpula kanji-kanji uyanda kubonwa kuti ulayandika kapati kwiinda bamwi alimwi ulafwa munyono ciindi bamwi nobamwiinda. Ikuti naa twabona kuti tujisi penzi lyakulisumpula, tweelede kuzumanana kupaila kuli Jehova kuti atugwasye ‘kucinca mizeezo yesu’ kutegwa cilengwa eeci cibyaabi citasimpi miyanda mulindiswe. (Rom. 12:2) Eelo kaka tulalumba kapati akaambo kacikozyanyo ca Jehova! (Int. 18:35) Tulakubona kulicesya kwakwe kweelana ambwabeendelezya babelesi bakwe, alimwi tuyanda kumwiiya. Kuyungizya waawo, tuyanda kwiiya baabo ibakabelekela Jehova cakulicesya. Lyoonse atumupe bulemu Jehova alimwi alulemeko oolo ilumweelede.—Ciy. 4:11. w20.08 13 ¶19-20

Cikwati ncipego cilondokede kuzwa kuli Leza, pele basikukwatana tabalondokede. (1Joh. 1:8) Nkakaambo kaako Jwi lya Leza lilabacenjezya banabukwetene kuti bayoojana buyumuyumu ibwaambidwe kuti “mapenzi mumibili yabo.” Jehova uyanda kuti basilutwe bamikwasyi Banakristo kabalanganya mikwasyi yabo kumuuya alimwi akumubili. (1Tim. 5:8) Nokuba boobo, bacizyi bakwetwe beelede kuzandula ciindi kumilimo yabo yabuzuba abuzuba kutegwa babale Jwi lya Leza, kuzinzibala kuyeeya alimwi akupaila kuli Jehova kuzwa amyoyo yabo. Eeci cilakonzya kubayumina. Kayi bamakaintu inga bajisi bubi, pele cilayandika kuti kabajana ciindi. Nkaambo nzi? Nkaambo Jehova uyanda kuti umwi aumwi wesu abambe alimwi akukwabilila cilongwe cakwe anguwe. (Mil. 17:27) Masimpe kuti mukaintu uyandika kubeleka canguzu kutegwa kalibombya kumulumaakwe uutalondokede. Nokuba boobo, cilakonzya kumuubila kuzuzikizya mukuli ngwaakapegwa a Jehova, ikuti wakamvwisya akukazumina kaambo kamu Bbaibbele, ikatondezya ncayelede kumulemeka alimwi akumumvwida mulumaakwe. w21.02 9 ¶3, 6-7

Masunko alakonzya kukozyanisyigwa kumulilo uubelesyegwa kuyumya cibulo cibosya. Ciindi cibulo nocaumpwa kapati alimwi akutontozyegwa, cilayuma kapati. Mbubwenya buyo, ciindi nitwaliyumya mumasunko, lusyomo lwesu lulayuma. Nkakaambo kaako Jakobo wakalemba kuti: “Kuliyumya amukulekele kuti kumanizye mulimo wankuko, ikutegwa mulondoke akuzulila mumbazu zyoonse.” (Jak. 1:4) Ciindi notubona kuti lusyomo lwesu lulayuma akaambo kamasunko, nkokuti tulakonzya kuliyumya kumwi katukkomene. Mulugwalo lwakwe, Jakobo alimwi wakalemba zintu zimwi zikonzya kupa kuti lukkomano lwesu luceye. Buyumuyumu bumwi, nkutazyiba cakucita. Ciindi notusunkwa, tweelede kulanga kuli Jehova kutegwa atugwasye kusala zintu zikonzya kumukkomanisya, kugwasya bakwesu abacizyi, akuti tuzumanane kusyomeka. (Jer. 10:23) Tuyandika busongo kutegwa tuzyibe cakucita alimwi ancotweelede kwaamba kuli baabo batukazya. Kuti katutacizyi cakucita, inga twalimvwa kubula lugwasyo alimwi lukkomano lwesu inga lwamana cakufwambaana. w21.02 28 ¶7-9

Jehova ulatupa cikozyanyo cibotu. Luyando ndwajisi kulindiswe ndupati kapati cakuti, ikuti naa twazumanana kusyomeka kulinguwe, kunyina cikonzya kulumana luyando oolo. (Rom. 8:38, 39) Ibbala lya Chigiriki ilisandululwa kuti “kapati,” lipa muzeezo wamuntu uuli mukusolekesya canguzu kutondezya luyando. Zimwi ziindi tacili cuubauba kutondezya luyando kubakwesu abacizyi. Ciindi bamwi nobatunyemya, tweelede kuzumanana ‘kweengelelana caluyando. Kusoleka camoyo woonse kuzumanana alukamantano lwamuuya mucaanzyo caluumuno.’ (Ef. 4:1-3) Tatukabikkili maano kukulubizya kwabakwesu alimwi tuyoosolekesya kubona bakwesu mbubonya mbwababona Jehova. (1Sam. 16:7; Int. 130:3) Talili lyoonse nocili cuubauba kubayanda bakwesu abacizyi, ikapati kuti katutuzyi tumpenda twabo. Kulangilwa kuti eeli ndelyakali penzi ku Banakristo bamwi bamumwaanda wamyaka wakusaanguna, mbuli Yuwodiya a Sintike. Mwaapostolo Paulo wakabakulwaizya “kuti babe amuzeezo omwe mu Mwami.”—Flp. 4:2, 3. w21.01 22-23 ¶10-11

Nobakubusi, bakwesu abacizyi balalumba kapati nomubelekela Jehova antoomwe ambabo “calukamantano.” (Zef. 3:9) Balakkomana kubusungu mbomutondezya mumilimo njomupegwa. Alimwi balamuyanda kapati. Nobakubusi, mutalubi kuti Jehova ulamuyanda alimwi akumusyoma. Wakasinsima kuti kumazuba aamamanino, unoojisi nkamu yabalombwana ibayoolyaaba cakuliyandila. (Int. 110:1-3) Ulizyi kuti mulamuyanda alimwi akuti mulayanda kumubelekela kusikila mpomugolela. Aboobo amwiiye kulikkazikila moyo lwanu akubakkazikila moyo bamwi. Ciindi nomwalubizya, amulutambule lulayo akulubona kuti luzwa kuli Jehova. (Heb. 12:6) Amubeleke canguzu mumilimo njomupedwe. Kwiinda zyoonse amumukkomanisye Uso wakujulu muzintu nzyomucita.—Tus. 27:11. w21.03 7 ¶17-18

Nzinji zintu zikonzya kututyompya, zimwi zilalibonya, zimwi tazilibonyi. Zintu eezyi zibikkilizya kutalondoka kwesu, kulezya, alimwi akuciswa. Ambweni tulakonzya kutyompwa akaambo kakutapegwa mukuli umwi ngotuyanda mumulimo wa Jehova naa akaambo kakukambaukila mucilawo mobatautambuli mulumbe wesu. Ncuubauba kulindiswe kutakulanga munzila yeelede kutalondoka alimwi akulezya kwesu. Aboobo tulakonzya kuyeeya kuti akaambo kakulezya kwesu, Jehova takatuzumizyi kunjila munyika yakwe mpya. Kuyeeya kuli boobu takuli kabotu pe. Ibbaibbele lyaamba kuti, kunze lya Jesu Kristo, bantu “boonse balibisyide.” (Rom. 3:23) Pele Jehova tabikkili maano kukulubizya kwesu naa kulangila kuti katucita zintu munzila iilondokede. Muciindi caboobo, ngu Taata siluyando uuyanda kutugwasya. Alimwi ulakkazika moyo. Ulabona kusoleka nkotucita kulwana kulezya kwesu alimwi akuzunda penzi lyakutalibona munzila yeelede, aboobo ulilibambilide kutugwasya.—Rom. 7:18, 19. w20.12 22 ¶1-3

Toonse tuli mulweendo. Makanze eesu ngakuyoopona munyika mpya mubweendelezi bwa Jehova bwaluyando. Buzuba abuzuba, tulasoleka kweendela munzila iitola kubuumi. Pele kweelana ambwaakaamba Jesu, nzila eeyo ninsyoonto alimwi zimwi ziindi cilakatazya kweendela mulinjiyo. (Mt. 7:13, 14) Akaambo kakuti tatulondokede, ncuuba-uba kuleya munzila eeyi. (Gal. 6:1) Ikuti katuyanda kuzumanana kweendela munzila nsyoonto iitola kubuumi, tweelede kuti katulibambilide kucinca mbotuyeeya, bube alimwi anzyotucita. Mwaapostolo Paulo wakatukulwaizya kuti tuzumanane “kululamikwa.” Tacili cuuba-uba kuzyiba nzyotuyeeya alimwi ambotulimvwa. Nkaambo nzi? Nkaambo moyo wesu uleena, amana kanji-kanji tausyomeki. (Jer. 17:9) Ncuuba-uba kulyeena “akuyeeya kutaluzi.” (Jak. 1:22) Aboobo tweelede kubelesya Jwi lya Leza kulilingula. Ijwi lya Leza lilakonzya kutugwasya “kuzyiba mizeezo amakanze aamumoyo.”—Heb. 4:12, 13. w20.11 18 ¶1-3

Ikuti katulicesya, tulakonzya kuba alukkomano lunji. Nkaambo nzi? Nkaambo kakuti ciindi notuzumina kuti kuli zintu zimwi nzyotutakonzyi kucita, tuyoolumba kapati kulugwasyo luli loonse ndobayootupa bamwi. Mucikozyanyo, amuyeeye ciindi eeciya Jesu naakaponya basicinsenda ibali kkumi. Omwe buyo akati kabo ngowakapiluka kumulumba Jesu akaambo kakumuponya kubulwazi bwakwe bubyaabi, icintu ncaatakali kukonzya kucita mwaalumi ooyu. Mwaalumi ooyu uulicesya wakalumba kulugwasyo ndwaakapegwa, alimwi wakatembaula Leza akaambo kalugwasyo oolo. (Lk. 17:11-19) Bantu balicesya balamvwana abamwi alimwi balakonzya kuba abalongwe banji. Nkaambo nzi? Balakkomana kuzyiba kuti bantu bamwi balijisi bube bubotu alimwi balabasyoma. Aabo balicesya balakkomana ciindi bamwi nobazwidilila mumulimo uuli woonse ngobapegwa alimwi tabawayi-wayi kubalumbaizya akubalemeka. w20.08 12 ¶17-18