September

Petro wakabelesya majwi aayindene aasyoonto ciindi naakazubulula businsimi bwa Joeli. (Mil. 2:16, 17) Petro kunyina naakabelesya majwi aakuti, “Kuzwa waawo,” kweelana ambwaabelesyedwe mubusinsimi bwa Joeli, pele wakaamba kuti: “Kumazuba aakumamanino,” ikwaamba mazuba aamamanino aabweende bwazintu bwaci Juda. Aciindi eeco, muuya wa Leza wakali kuyootilwa “amuntu uuli woonse.” Eeci citondezya kuti kwakainda ciindi icili mbocibede businsimi bwa Joeli kabutanazuzikizyigwa. Leza naakamana kutila muuya wakwe ku Banakristo bamumwaanda wamyaka wakusaanguna, bakatalika mulimo wakukambauka walo mukuya kwaciindi iwakali kuyoocitwa munyika yoonse. Kuzikusika ciindi mwaapostolo Paulo naakalemba lugwalo lwakwe kubana Kolose, cakuma 61 C.E., wakali kukonzya kwaamba kuti makani mabotu akambaukwa “kuzilenge zyoonse zili ansi aajulu.” (Kol. 1:23) Ciindi Paulo naakaamba kuti “zilenge zyoonse,” wakali kwaamba masena walo abamwi nkobakali kuunka kuyookambauka. Kwiinda mulugwasyo lwamuuya uusalala wa Jehova, mulimo wakukambauka wayaambele kapati mumazuba eesu, nkokuti “kusikila kumagolelo aanyika”!—Mil. 13:47. w20.04 6-7 ¶15-16

Jehova ulatuyanda toonse, kubikkilizya ambelele iili yoonse iyakaleya kuzwa kubutanga bwakwe. (Mt. 18:12-14) Leza wakasyomezya kuti uyooziyandaula mbelele zyakwe zisweekede akuzigwasya kubukulusya cilongwe cibotu anguwe. Alimwi wakaamba ntaamu zigaminide nzyaakali kuyoobweza—intaamu zikozyenye anzyaakali kubelesya mweembezi muna Israyeli kuti mbelele yakwe yasweeka. (Ezk. 34:12-16) Kusaanguna, mweembezi wakali kwiiyandaula mbelele, eeci cakali kuyandika ciindi alimwi akubeleka canguzu. Mpoonya ciindi naakali kwiijana mbelele yakasweekede, mweembezi wakali kwiileta kubutanga. Kuyungizya waawo, ikuti mbelele yakalicisa naa kubula cakulya, mweembezi wakali kwiilanganya munzila yaluyando, kuyaanga zilonda, kwiinyamuna alimwi akwiisanina. Baalu, ibeembezi ‘babutanga bwa Leza,’ beelede kubweza ntaamu eezyi kutegwa bagwasye baabo ibakaleka kuyanzana ambungano. (1Pet. 5:2, 3) Baalu balabayandaula bantu aabo, balabagwasya kupiluka kubutanga alimwi akubatondezya luyando kwiinda mukubapa lugwasyo lwakumuuya iluyandika. w20.06 20 ¶10

Sena Jesu wakabona kuti myuunda yakali kweelela kutebulwa akaambo kakuti wakali kuyanda kuti bantu banji bamutobele? Peepe. Magwalo akasinsima kuti bantu basyoonto buyo mbobakali kuyoomusyoma. (Joh. 12:37, 38) Alimwi Jesu wakajisi nguzu zigambya zyakulingula myoyo. (Mt. 9:4) Nokuba boobo, wakababikkila maano basyoonto aabo ibakamusyoma, alimwi cabusungu wakali kubakambaukila bantu boonse. Ino mbuti kujatikizya ndiswe notutakonzyi kulingula myoyo, tweelede kweeleba cilengwa cakubeteka bantu bali mucilawo cesu naa muntu! Muciindi caboobo, amubone kuti bantu balakonzya kuba basikwiiya. Amuyeeye Jesu ncaakabaambila basikwiiya bakwe. Myuunda yayuma kale, nkokuti iyandika kutebulwa. Bantu balakonzya kucinca akuba basikwiiya ba Kristo. Jehova ubona bantu aaba ibakonzya kuba basikwiiya kuti ‘nzintu ziyandisi.’ (Hag. 2:7) Ikuti naa bantu katubabona mbubonya mbwababona Jehova alimwi a Jesu, tuyoosoleka kumvwisya mbobakakomena alimwi azintu nzyobayandisya. Tatukababoni mbuli bantu mbotutazyi, pele tuyoobabona kuti mbantu ibayooba bakwesu abacizyi kumbele. w20.04 13 ¶18-19

Cakusalazya, Ijwi lya Leza liyiisya kuti tweelede kuzumanana kumuyanda Jesu kutegwa tumukkomanisye Jehova. Cintu cimwi ncotweelede kucita kutegwa tube balongwe ba Jesu nkumuzyiba. Tulakonzya kumuzyiba Jesu kwiinda mukubala mabbuku aamu Bbaibbele aa Matayo, Marko, Luka alimwi a Johane. Ciindi notuzinzibala kuyeeya zibalo zyamu Bbaibbele eezyi izyaamba buumi bwa Jesu, tuyoomuyanda alimwi akumulemeka Jesu akaambo kakuti wakabeendelezya caluzyalo bantu. Mucikozyanyo, nokuba kuti wakali Simalelo wabo, kunyina naakabeendelezya mbuli bazike basikwiiya bakwe. Muciindi caboobo, wakabaambila kujatikizya mbwaakali kuyeeya alimwi ambwaakali kulimvwa. Wakali kuusa alimwi akulila ambabo. (Joh. 11:32-36) Nobaba basikondonyina a Jesu bakali kukonzya kubona kuti aabo ibakali kuutambula mulumbe wakwe bakaba balongwe bakwe. (Mt. 11:19) Kuti twamwiiya Jesu kweelana ambwaakali kubeendelezya basikwiiya bakwe, zilongwe zyesu abamwi ziyooyuma, tunoolimvwa kukkutila akukkomana alimwi tuyoomuyanda akumulemeka kapati Kristo. w20.04 22 ¶9-10

Kuzikusika mu 1870, cisi ca Britain cakaba bulelo bwiinda kukomena anyika, alimwi cakajisi nkamu yabasikalumamba iilaanguzu kwiinda nkamu zyoonse. Bulelo oobu bwakali kwiiminina keja kaniini ikakazunda meja aambi otatwe, nkokuti France, Spain alimwi a Netherlands. (Dan. 7:7, 8) Alimwi Britain wakali mwami wakumusanza kusikila kuciindi ca Nkondo Yakusaanguna Yanyika Yoonse. Muciindi nciconya eeco, cisi ca United States of America cakaba cisi ciinda kuvwuba munyika yoonse alimwi cakaba mucilongwe acisi ca Britain. Ciindi ca Nkondo Yakusaanguna Yanyika Yoonse, cisi ca United States alimwi a Britain zyakabelekela antoomwe akuba ankamu yabasikalumamba iilaanguzu kwiinda nkamu zyoonse. Kuciindi eeco, cisi ca Britain alimwi a United States zyakaba Bulelo Bweendelezya Nyika Yoonse bwa Anglo-America. Kweelana ambwaakasinsima Daniele, mwami ooyu wakabungika “mpi yabasikalumamba mpati kapati alimwi iilaanguzu.” Mumazuba aamamanino, Anglo-America ngomwami wakumusanza. w20.05 4 ¶7-8

Maanzi taakonzyi kuba caanda akaambo kakuti zuba talili kulamfwu kapati anyika. Ikuti zuba nolyali aafwaafwi kapati anyika, maanzi oonse naali kuyuminina alimwi nyika nobwali busena bupya kapati ibutajisi cintu cipona. Ikuti zuba nolyali kulamfwu aasyoonto anyika, maanzi oonse naali caanda. Pele akaambo kakuti Jehova wakaibikka abusena bweelede nyika, water cycle ipa kuti buumi buzumanane kubako. Zuba nolyuumpa maanzi mulwaanje alimwi aanyika, maanzi alaunka mujulu akupanga makumbi. Amwaka, izuba lilabweza maanzi aakkwana mazyiba aali 500,000, izyiba limwi alimwi kalilampa 1km mubulamfwu, mubwamba alimwi akuyaansi. Maanzi aaya alakkala mumulenga-lenga mazuba aali 10 kaatanapanga mvwula naa caanda. Mpoonya maanzi alajoka mulwaanje naa mumasena aambi mukkalila maanzi, mpoonya eeci cilacitika alimwi. Jehova wakapanga bubambe oobu kutegwa nyika lyoonse kaijisi maanzi. Eeci citondezya kuti Jehova musongo alimwi ulaanguzu.—Job. 36:27, 28. w20.05 22 ¶6

Jesu wakatukulwaizya kuzumanana kupailila muuya uusalala. (Lk. 11:9, 13) Kwiinda mumuuya wakwe, Jehova ulatupa nguzu, noziba “nguzu zigambya iziinda zyabantu.” (2Kor. 4:7) Kwiinda mulugwasyo lwamuuya wa Leza, tulakonzya kuliyumya kumasunko oonse ngotukonzya kujana. Kuyungizya waawo, muuya uusalala ulakonzya kutugwasya kwiizuzikizya milimo njotubelekela Leza alimwi ulakonzya kutugwasya kutegwa zipego nzyotujisi zibeleke kabotu. Tulizyi kuti tulacikonzya kuuzuzikizya mulimo wesu kuli Leza akaambo kalugwasyo lwamuuya uusalala. Tulakonzya kutondezya kuti muuya uusalala ulayandika kapati kulindiswe kwiinda mukupaila kutegwa utugwasye kuzyiba naa kuli mizeezo iitali kabotu naa kulombozya kutali kabotu ikuli mumyoyo yesu. (Int. 139:23, 24) Kuti twacita oobo, kwiinda mumuuya wakwe uusalala, Jehova ulakonzya kutugwasya kuzyiba mizeezo iitali kabotu alimwi akulombozya kutali kabotu. Mpoonya tweelede kupaila kulomba muuya wa Leza kutegwa utupe nguzu zyakucikonzya kuzunda. Kuti twacita oobo, Jehova uyoobona kuti tatuyandi kucita cintu cili coonse icikonzya kupa kuti aleke kutugwasya kwiinda mumuuya wakwe uusalala.—Ef. 4:30. w20.05 28-29 ¶10-12

Ciindi notukwabilila zina lya Jehova, tutobela cikozyanyo ca Jesu Kristo. Jesu wakalizyibya zina lya Bausyi kwiinda mukulibelesya alimwi akukwabilila mpuwo yabo. Mucikozyanyo, Jesu wakabakazya ba Farisi, balo munzila zinji ibakali kupa kuti Jehova alibonye mbuli kuti ngusilunya, ulangila zinji kubantu, ulikule abantu alimwi takwe luse. Jesu wakabagwasya bantu kubona Bausyi kuti balanyoneka, balakkazika moyo, balaaluyando alimwi balalekelela. Kuyungizya waawo, Jesu wakabagwasya bantu kumuzyiba Jehova kwiinda mukwiiya bube bwa Bausyi mubukkale bwakwe bwabuzuba abuzuba. (Joh. 14:9) Mbubwenya mbuli Jesu, tulakonzya kubaambila bantu zintu nzyotuzyi kujatikizya Jehova, kubayiisya kuti Leza ngusiluyando alimwi ulaaluzyalo. Ciindi notucita boobo, tukwabilila Jehova kukubejekezyegwa alimwi akusampaulwa. Tulalisalazya zina lya Jehova kubantu. Kwiinda muzintu nzyotwaamba alimwi akucita, tutondezya bantu bwini mbwabede Jehova. Tulalisumpula zina eeli kwiinda mukugwasya bantu kuzyiba kasimpe kajatikizya Jehova. w20.06 6 ¶17-18

Masimpe kuti tulakonzya kwaabelesya munzila iigwasya mawebbusaiti aakubandikila a Intaneti, mucikozyanyo, tulakonzya kwaabelesya kubandika abanamukwasyi alimwi abalongwe. Pele sena mwakabona kale kuti bamwi balalemba mameseji, kubikka mafwoto alimwi amavidiyo amawebbusaiti aakubandikila a Intaneti kutegwa bakkomaninwe abamwi? Kulibonya kuti lyoonse inga bayanda kuti kababikkilwa maano kwiinda mbobeelede. Bamwi babelesya majwi mabyaabi ciindi nobaamba kujatikizya mafwoto ngobakabikka naa aakabikkwa abamwi. Eeci ciliimpene kapati akulicesya alimwi akweetelelana nkobakulwaizyigwa kuba ankuko Banakristo. (1Pet. 3:8) Ikuti naa mulaabelesya mawebbusaiti aakubandikila a Intaneti, amulibuzye kuti: ‘Sena mameseji, mafwoto naa mavidiyo ngondibikka apa bamwi kubona kuti ndilalisumpula? Sena inga ndapa bamwi kuba amunyono?’ Banakristo tabeelede kulimvwa kuti balayandika kapati kwiinda bwini mbobabede. Batobela lulayo iluli mulugwalo lwabuzuba bwasunu. Kulicesya kuyootugwasya kutaba amuuya wamunyika wakuyeeya kuti tulayandika kapati kwiinda bwini mbotubede.—1Joh. 2:16. w20.07 6 ¶14-15

Katanaba sikwiiya wa Kristo, mwaapostolo Paulo wakali sikasampusampu iwakali kupenzya basikutobela Jesu. (Mil. 7:58) Jesu lwakwe kumugama wakamukasya Paulo, ooyo iwakali kwiitwa kuti Saulo, kupenzya mbungano ya Bunakristo. Jesu wakabandika a Paulo kuzwa kujulu akupa kuti awoofwaale. Kutegwa atalike alimwi kubona, Paulo wakeelede kulomba lugwasyo kubantu mboonya mbaakali kupenzya. Cakulicesya wakalutambula lugwasyo kuzwa kuli sikwiiya wazina lya Hananiya, ooyo iwakapa kuti atalike alimwi kubona. (Mil. 9:3-9, 17, 18) Kumbele, Paulo wakazyibwa kuti ngusimbungano ya Bunakristo, pele kunyina naakaciluba ciiyo ncaakamuyiisya Jesu munzila yuunka ku Damasiko. Paulo wakalicesya alimwi wakalilibambilide kulutambula lugwasyo lwabakwesu abacizyi. Wakazyiba kuti mbobakali ‘kumuyumya-yumya.’—Kol. 4:10, 11, bupanduluzi buyungizyidwe. w20.07 18-19 ¶16-17

Nokuba kuti Jehova ngu Singuzuzyoonse, ulabapa mikuli bamwi. Mucikozyanyo, wakasala Jesu kuba Mwami wa Bwami bwakwe, alimwi ulabapa nguzu zyabweendelezi zimwi bantu ibali 144,000 ibayooyendelezya antoomwe a Jesu. Jehova wakamuyiisya Jesu kuba Mwami alimwi a Mupaizi Mupati. (Heb. 5:8, 9) Alimwi abaabo mbayoolela limwi Jesu ulabayiisya kutegwa bauzuzikizye mulimo wabo, pele talili lyoonse nabeendelezya kujatikizya mbobaubeleka mulimo. Muciindi caboobo, ulijisi lusyomo lwakuti balacita kuyanda kwakwe. (Ciy. 5:10) Ikuti Taateesu wakujulu, walo uutayandiki lugwasyo kumuntu uuli woonse, ulabapa mikuli bamwi, nkokuti swebo tweelede kwiindila buya kucita mbubwenya oobo! Mucikozyanyo, sena muli silutwe wamukwasyi naa mwaalu mumbungano? Amutobele cikozyanyo ca Jehova kwiinda mukupa bamwi mikuli imwi alimwi akutasola kubeendelezya ciindi coonse kujatikizya mbobazuzikizya mikuli eeyo. Ikuti mwamwiiya Jehova, mulimo uyoocitwa, muyoopa kuti bamwi baiye alimwi akubagwasya kuyaambele.—Is. 41:10. w20.08 9 ¶5-6

Ino Jehova uyanda kuti katulimvwa buti kujatikizya mbelele zyakwe zisweekede? Tulakonzya kwiiya kucikozyanyo ca Jesu. Wakalizyi kuti mbelele zya Jehova zyoonse zilayandika kuli Jehova, aboobo Jesu wakacita zyoonse nzyaakali kukonzya kutegwa agwasye ‘mbelele zyakasweekede zyamuŋanda ya Israyeli’ kupilukila kuli Jehova. (Mt. 15:24) Mbwali mweembezi mubotu, Jesu alimwi wakasolekesya kutegwa atasweekelwi noiba yomwe mbelele ya Jehova. (Joh. 6:39) Mwaapostolo Paulo wakakulwaizya baalu bakumbungano yaku Efeso kwiiya cikozyanyo ca Jesu. Wakaamba kuti: “Mweelede kubagwasya aabo batajisi nguzu, alimwi lyoonse mweelede kuyeeya majwi aa Mwami Jesu, eelyo lwakwe mwini naakaamba kuti: ‘Kupa kulakkomanisya kapati kwiinda kupegwa.’” (Mil. 20:17, 35) Lugwalo oolu lutondezya kuti baalu bajisi mukuli mupati wakulanganya bantu ba Jehova. Ba Salvador, mwaalu waku Spain bakaamba kuti, “Ciindi nondiyeeya kujatikizya Jehova mbwazilanganya mbelele zyakwe zisweekede, cilandikulwaizya kucita kufwumbwa ncondikonzya kutegwa ndizigwasye. Ndilisinizyide kuti Jehova uyanda kuti ndizilanganye.” w20.06 23 ¶15-16

Kaitanamana myaka iili 1,000 kutegwa tulondoke, Jehova unootukkazikila moyo. Kusikila kuciindi eeco, Jehova ulilibambilide kutulekelela zibi. Aboobo tweelede kutobela cikozyanyo cakwe kwiinda mukubikkila buyo maano kubube bubotu mbobajisi bamwi alimwi akubakkazikila moyo. Jesu alimwi abangelo bakakondwa ciindi nyika noyakalengwa. Pele amweezeezye buyo mbobayookkomana kubona nyika iizwide bantu balondokede, ibamuyanda alimwi akumubelekela Jehova. Amweezeezye buyo mbobayookkomana aabo ibayakuunka kujulu kuyoolela antoomwe a Kristo ciindi bakubona bantu kabagwasyigwa amulimo wabo. (Ciy. 4:4, 9-11; 5:9, 10) Alimwi amweezeezye buyo buumi mbobunoobede ciindi nokunooli misozi yalukkomano muciindi camisozi yabuumba, ciindi kuciswa, kuusa alimwi alufwu noziyoomanina limwi mane kukabe kutamani. Kusikila kuciindi eeco, amube amakanze akwiiya Uso wanu siluyando, musongo alimwi uukkazika moyo. Ikuti mwacita oobo, muyoozumanana kuba alukkomano tacikwe makani amasunko ngomujisi. (Jak. 1:2-4) Eelo kaka tulalumba kapati akaambo kacisyomezyo ca Jehova cakuti, “kuyooba bubuke”!—Mil. 24:15. w20.08 19 ¶18-19

Bbaibbele ncipego citaliboteli kapati cizwa kuli Leza. Taateesu wakujulu wakasololela bamaalumi kutegwa balilembe akaambo kakuti ulatuyanda kapati. Kwiinda mu Bbaibbele, Jehova ulayiingula mibuzyo iiyandika kapati njotukonzya kubuzya, mbuli yakuti: Ino twakazwa kuli? Ino buumi bujisi mpindu nzi? Alimwi awakuti, ino zintu ziyooba buti kumbele aamazuba? Jehova uyanda kuti bana bakwe boonse babuzyibe bwiinguzi bwamibuzyo eeyi, aboobo wakasololela bamaalumi kusandulula Bbaibbele mumyaambo minji. Mazuba aano, Bbaibbele lyoonse mbolizulwa naa zibeela zyandilyo nkolili mumyaambo iinda ku 3,000! Bbaibbele ndebbuku ilisandulwidwe alimwi akumwaigwa mumyaambo minji kwiinda bbuku limbi ilili lyoonse. Tulakonzya kutondezya kuti tulalumba kucipego ca Bbaibbele kwiinda mukulibala buzuba abuzuba, kuzinzibala kuyeeya nzyotubala alimwi akusolekesya kutobela nzyotwiiya. Kuyungizya waawo, tulatondezya kulumba kuli Leza kwiinda mukucita zyoonse nzyotukonzya kutegwa twaambile bantu banji mulumbe uuli mumo.—Int. 1:1-3; Mt. 28:19, 20. w20.05 24-25 ¶15-16

Musinsimi Jeremiya wakapedwe cilawo cikatazya kapati. Aciindi cimwi, wakatyompwa kapati cakuti wakali kuyanda kucileka kukambauka. Pele taakacileka pe. Nkaambo nzi? ‘Ijwi lya Jehova’ lyakali mbuli mulilo uuvwilima mumoyo wa Jeremiya, alimwi wakakatala kufwida mumoyo. (Jer. 20:9) Andiswe tulakonzya kulimvwa mbuli nguwe kuti katubala Bbaibbele abuzuba alimwi akuzinzibala kuyeeya nzyotubala. Kwiinda mukucita boobo, tuyooba alukkomano lunji alimwi akuzwidilila mumulimo wesu. (Jer. 15:16) Aboobo kufwumbwa buyo nomwatyompwa, amumulombe Jehova kutegwa amugwasye. Uyoomugwasya kulwana kutalondoka, kulezya kwanu, naa kuciswa. Uyoomugwasya kwiilanga munzila yeelede mikuli. Alimwi uyoomugwasya kuubona munzila yeelede mulimo wakukambauka. Kuyungizya waawo, amupaile kuli Taata wakujulu akumwaambila bwini mbomulimvwide. Kwiinda mulugwasyo lwakwe, mulakonzya kuzwidilila kulwana penzi lyakutyompwa. w20.12 27 ¶20-21

Kubacizyi bamwi, miswaangano ncecoolwe cipati ncobajana cakuba abakombinyina. Aboobo tweelede kubona kuti twabatambula, kubandika ambabo alimwi akubaambila kuti tulakkomana kapati kuba ambabo kumiswaangano. Mbubwenya mbuli Jesu, tweelede kujana ciindi cakuyanzana abacizyi. (Lk. 10:38-42) Ambweni tulakonzya kubatamba kucakulya naa kukulikondelezya. Kuti naa twacita oobo, tweelede kuba masimpe kuti nzyotwaamba zilakulwaizya. (Rom. 1:11, 12) Baalu beelede kuba abube mbwaakajisi Jesu. Wakalizyi kuti kuli bamwi, kutakwata naa kutakwatwa inga cabayumina, pele wakacisalazya kuti kukwata naa kukwatwa naa kuba abana tatuli ntotwaambo ituletela lukkomano lutamani. (Lk. 11:27, 28) Muciindi caboobo, lukkomano lutamani lulaboola kwiinda mukubikka mulimo wa Jehova mubusena bwakusaanguna. (Mt. 19:12) Ikapati baalu beelede kubona bamakaintu mumbungano mbuli bacizyi babo naa banyina. Baalu beelede kujana ciindi cakubandika abacizyi kaitanatalika miswaangano alimwi anoyamana. w20.09 21-22 ¶7-9

Mu Israyeli, mulimi wakali kusyanga mbuto zyakwe ciindi mvwula yakusaanguna noyakali kuwa lyacilimo mpoonya akutebula ciindi mvwula yamamanino noyakali kuwa kumatalikilo aamupeyo. (Mk. 4:28) Inga twacita cabusongo ikuti twaiya cikozyanyo camulimi cakukkazika moyo. Nokuba boobo, kucita boobu tacili cuuba-uba. Kanji-kanji bantu batalondokede inga bayanda kutebula mpoonya-mpoonya. Nokuba boobo, kuti katuyanda kuti zisyango zyesu zikomene kabotu akuyootebula, tweelede kuzibikkila maano ciindi coonse, nkokuti kulimina nsaku alimwi akutilila. Mbubwenya buyo, awalo mulimo wakugwasya bantu kuba basikwiiya, uyanda kubeleka canguzu. Citola ciindi kugwasya basikwiiya Bbaibbele kuba aluyando alimwi akuleka kusalulula. Kukkazika moyo kuyootugwasya kutatyompwa ciindi bantu nobatatuswiilili. Nociba ciindi bantu nobatuswiilila, tweelede kukkazika moyo. Tatukonzyi kumusinikizya sikwiiya Bbaibbele kuba alusyomo. Zimwi ziindi, nobaba basikwiiya ba Jesu bakali kumuka kumvwisya nzyaakali kubayiisya. (Joh. 14:9) Aboobo katuyeeya kuti tulakonzya kusyanga akutilila, pele Leza nguukomezya.—1Kor. 3:6. w20.09 11 ¶10-11

Toonse tulayanda kuti basikwiiya besu bayaambele kutegwa beelele kubbapatizyigwa. Nzila iiyandika kapati motukonzya kubagwasya, nkwiinda mukubakulwaizya kujanika kumiswaangano yambungano. Kanji-kanji basikwiiya ibafwambaana kutalika kujanika kumiswaangano, balafwambaana kuyaambele. Bamayi bamwi balabaambila basikwiiya babo kuti kutegwa mwiiye zinji kujatikizya Bbaibbele, mweelede kunoojanika kumiswaangano. Amubale Bahebrayo 10:24, 25 antoomwe asikwiiya wanu, alimwi akumupandulwida bubotu mbwayoojana ikuti kajanika kumiswaangano. Calukkomano, amumwaambile ncomwakaiya lyamuswaangano wainda. Eeci inga camukulwaizya muciindi cakwiile kumutamba buyo kumuswaangano. Ncayoobona alimwi akumvwa kumuswaangano ciindi cakusaanguna ciyoomubotela kapati kwiinda cintu cili coonse ncaakabona akumvwa kumuswaangano wacikombelo cimbi. (1Kor. 14:24, 25) Uyoozyibana abamwi ibajisi cikozyanyo cibotu ncakonzya kwiiya alimwi ibakonzya kumugwasya kuyaambele akweelela kubbapatizyigwa. w20.10 10-11 ¶14-15

Muuya wa Leza uyoomugwasya kubelesya makani ngomubala alimwi akwiiya mu Bbaibbele. Amupaile mbubwenya mbwaakacita sintembauzyo naakati: “Kondiyiisya nzila yako, O Jehova. Mebo ndinakweenda mukasimpe kako. Kondipa kuba amoyo omwe kutegwa kandiyoowa zina lyako.” (Int. 86:11) Aboobo amuzumanane kubala alimwi akwiiya Bbaibbele kubikkilizya amabbuku aamwi aamwaigwa ambunga ya Jehova. Nokuba boobo, mbaakani yanu taili yakuba buyo aluzyibo. Pele muyandika kukasyoma kasimpe nkomwiiya alimwi akukabelesya mubuumi bwanu. Muuya wa Jehova ulakonzya kumugwasya kucita boobo. Alimwi muyandika kubakulwaizya bakwesu abacizyi. (Heb. 10:24, 25) Nkaambo nzi? Nkaambo kakuti mbamukwasyi wanu wakumuuya. Amulombe muuya wa Leza kuti kaumugwasya kupa bwiinguzi buzwa ansi aamoyo alimwi akupa kabotu makani kumiswaangano. Kwiinda mukucita boobu, mutondezya Jehova alimwi a Mwanaakwe kuti mulaziyanda “mbelele” zyabo ziyandisi. (Joh. 21:15-17) Aboobo, amumumvwide Mwiiyi wanu Mupati kwiinda mukubikkila maano kucakulya cakumuuya ncapa. w20.10 24-25 ¶15-17

Ncinzi ncaakacita Jesu aciindi eeco baapostolo bakwe nobakatyompedwe? Nokwakainda buyo ciindi cisyoonto kuzwa naakabusyigwa, Jesu wakaambila basikumutobela bamwi kuti: “Mutayoowi! Kamuya, mukabaambile bakwesu kuti [ndakabusyigwa].” (Mt. 28:10a) Jesu kunyina naakabalekelezya baapostolo bakwe. Nokuba kuti bakamusiya, wakacili kubaita kuti “bakwesu.” Mbubwenya mbuli Jehova, Jesu wakabatondezya luzyalo alimwi akubalekelela. (2Bam. 13:23) Mbubwenya buyo, tulababikkila maano kapati aabo ibakacileka kukambauka. Mbakwesu abacizyi, alimwi tulabayanda! Tulaiyeeya milimo yabo yaluyando njobakabeleka kaindi, alimwi bamwi bakacita oobo kwamyaka minji. (Heb. 6:10) Masimpe tulabayeeya! (Lk. 15:4-7) Aboobo atubakulwaizye ibatacisungweede kuti kabajanika kumiswaangano yambungano. Ciindi muntu uutacisungweede naasika ku Ŋanda ya Bwami, tweelede kubweza ntaamu kwiinda mukumutambula camaanza obilo. w20.11 6 ¶14-17

Amuyeeye kujatikizya ncaakacita Jesu ciindi Jakobo, Johane alimwi abanyina nobakamulomba cintu icakali kwiindilila anguzu nzyaakapedwe. Cakutasowa ciindi Jesu wakaamba kuti alikke Usyi wakujulu ngowakali kukonzya kusala baabo ibakali kuyookkala kujanza lya Jesu lyalulyo alimwi akujanza lyakwe lyalumwensyi mu Bwami. (Mt. 20:20-23) Kwiinda mukucita boobo, Jesu wakatondezya kuti wakalizyi mpozyakali kugolela nguzu zyakwe. Wakali kulicesya. Kunyina naakacita cintu cili coonse Jehova ncaatakamupa nguzu zyakuti acicite. (Joh. 12:49) Mbuti mbotukonzya kwiiya cikozyanyo ca Jesu cibotu? Tulaiya cikozyanyo ca Jesu cakulicesya kwiinda mukutobela lulayo lwamu Bbaibbele iluli mulugwalo lwabuzuba bwasunu. Aboobo ciindi notwalombwa lulayo, tatweelede kusinikizya bamwi kuzumina mizeezo yesu naa kwiile kwaamba buyo kakunyina kusaanguna kuzinzibala kuyeeya kujatikizya makani aayo. Muciindi caboobo, tweelede kubikkila maano kululayo lwamu Bbaibbele alimwi amumabbuku eesu aamba zyamu Bbaibbele. Kwiinda mucita boobu, tutondezya kuti tulizyi nguzu zyesu mpozigolela. Cakulicesya, tupa bulemu kuli Singuzuzyoonse, nkaambo ‘milawo yakwe ililuleme.’—Ciy. 15:3, 4. w20.08 11-12 ¶14-15

Ikuti naa mwabona kuti muyandika kupa mweenzinyoko lulayo, ntwaambo nzi ntomweelede kuyeeya? Kamutanabandika anguwe, amulibuzye kuti, “Sena ‘ndaciindizya kululama’?” Muntu uuciindizya kululama ulababeteka bamwi kweelana azyeelelo zyakwe ikutali kweelana azyeelelo zya Jehova, alimwi tajisi luse. Ikuti nomwamana kulilingula mwabona kuti muleelede kumupa lulayo mweenzinyoko, amumwaambile penzi cakutamwiinda mumbali alimwi amubelesye mibuzyo kutegwa mumugwasye kukubona kulubizya kwakwe. Amube masimpe kuti nzyomwaamba zizwa mu Magwalo, kumwi kamuyeeyede kuti mweenzinyoko ooyo uyoolyaambilila kuli Jehova, ikutali kulindinywe. (Rom. 14:10) Amusyome busongo ibujanika mu Jwi lya Leza, alimwi ciindi nomupa muntu lulayo, amwiiye luzyalo lwa Jesu. (Tus. 3:5; Mt. 12:20) Nkaambo nzi? Nkaambo Jehova uyootweendelezya mbubwenya mbotubeendelezya bamwi.—Jak. 2:13. w20.11 21 ¶13

Sena inga mwakkomana ikuti bantu bamubeteka kweelana amubala wanu, mbomulibonya kumeso, naa nsaizi yamubili wanu? Mubwini, tamukonzyi kukkomana pe. Eelo kaka cilakulwaizya kuzyiba kuti Jehova tatubeteki kweelana azintu izilibonya ameso aamuntu! Mucikozyanyo, ciindi Samuele naakalanga bana ba Jese, tanaakacibona eeco ncaakabona Jehova. Jehova wakaambila Samuele kuti umwi akati kabana ba Jese wakali kuyooba mwami wa Israyeli. Pele ino nguni ooyo? Ciindi Samuele naakabona mwana wa Jese mutaanzi, Eliabu, wakati: “Masimpe ooyu ngomunanike wa Jehova.” Eliabu wakali kulibonya kweelela kuba mwami. “Pele Jehova wakati kuli Samuele: ‘Utalangi mbwaboneka pe alimwi abulamfwu bwakwe, nkaambo ndamukaka.’” Ncinzi ncotwiiya? Jehova wakazumanana kwaamba kuti: ‘Muntu ubona buyo zilibonya ameso, pele mebo nde Jehova, ndibona zili mumoyo.’ (1Sam. 16:1, 6, 7) Tweelede kumwiiya Jehova ciindi notweendelezya bakwesu alimwi abacizyi. w20.04 14 ¶1; 15 ¶3

Jesu wakali kwiinda mumyuunda, ambweni imwakali bbaale yakali kuzwa akumena. (Joh. 4:3-6) Cisyango eeci cakeelede kutebulwa kwainda myezi iitandila kuli yone. Aboobo kweelede kuti cakali kugambya ciindi Jesu naakaamba kuti: “Amuwaale meso aanu mubone myuunda, nkaambo yayuma kale kuti itebulwe.” (Joh. 4:35, 36) Ino ncinzi ncaakali kupandulula? Kweelede kuti Jesu wakali kwaamba kutebula bantu munzila yamaambilambali. Amubone cakazwa akucitika. Nokuba kuti ba Juda alimwi aba Samariya tiibakali kulyatana, Jesu wakamukambaukila mukaintu muna Samariya alimwi wakaswiilila! Alimwi buya, ciindi Jesu naakali kwaamba myuunda kuti “yayuma kale kuti itebulwe,” bana Samariya banji ibakamvwa kujatikizya nguwe kuzwa kumukaintu ooyo bakali kuboola kulinguwe kutegwa baiye zinji. (Joh. 4:9, 39-42) Kujatikizya majwi aamu Bbaibbele aaya, syaazibwene umwi wakaamba kuti: “Luyandisisyo ndobakajisi bantu lwakuunka kuli Jesu alimwi akumuswiilila . . . lwakatondezya kuti bakali mbuli maila aakeelede kutebulwa.” w20.04 8 ¶1-2

Miswaangano ilatugwasya kuba bakambausi alimwi abamayi bacibwene. Mucikozyanyo, tulakonzya kwiiya mbozibelesyegwa zibelesyo zijanika mucibeela ca Zibelesyo Nzyotubelesya Kapati Mukuyiisya. Aboobo amulibambile kabotu miswaangano yambungano. Lyamuswaangano kamuswiililisya. Wamana muswaangano amulubelesye lwiiyo ndomwatambula. Kwiinda mukucita zintu eezyi, muyooba “sikalumamba mubotu wa Kristo Jesu.” (2Tim. 2:3) Alimwi tulijisi lugwasyo lwazyuulu-zyuulu zyabangelo basinguzu. Amuyeeye buyo mungelo omwe ncakonzya kucita. (Is. 37:36) Lino amuyeeye buyo kujatikizya mpi yabangelo ncoikonzya kucita. Kunyina muntu naa daimona likonzya kuzunda mpi ya Jehova yanguzu. Jehova ngusinguzu zyoonse, aboobo kuti kali andiswe lyoonse tunooli anguzu kwiinda basikutukazya kufwumbwa naa mbanji buti. (Bab. 6:16) Aaya masimpe! Amuyeeye kujatikizya boonse bakonzya kumugwasya ciindi nomwatyompwa akaambo kamajwi naa nzyakonzya kucita mubelesinyoko, sicikolonyoko, naa munamukwasyi uutali Kamboni. Kamuyeeya kuti, tamuli nyolikke munkondo eeyi. Mutobela busolozi bwa Jehova. w21.03 29 ¶13-14

Ambweni mwaapostolo Paulo wakali kuzubulula majwi aali kulugwalo lwa Isaya 22:13, aalo aapandulula mbobakali kuyeeya bana Israyeli. Muciindi cakuba acilongwe a Leza, balo bakali kuyandisya kulikkomanisya. Mubwini, bana Israyeli aaba bakali kuyeeya kuti “atukkomane lino, nkaambo tulakonzya kufwa kufwumbwa ciindi,” ikuyeeya kudumide amazuba aano. Mbwaanga tulizyi kuti Jehova uyoobabusya bafwide, eeci ceelede kutupa kusala kabotu balongwe. Bakwesu baku Korinto bakeelede kubatantamuka aabo ibakali kukazya kuti kunyina bubuke. Kuli ncotwiiya mazuba aano kuzwa kuli ceeci: Ikuti katuyanzana kapati bantu ibatabikkili maano kujatikizya ciyoocitika kumbele alimwi ibayandisya buyo kulikkomanisya, balakonzya kutunyonganya. Ikuti Munakristo wakasimpe kayanzana kapati abantu bali boobu, inga waba amizeezo iitaluzi. Alimwi inga camupa ikuba abukkale ibukonzya kumupa kucita cintu Leza ncatayandi, icibi. Aboobo Paulo wakakulwaizya kuti: “Amusinsimuke munzila yabululami alimwi mutabi nimucita cibi.”—1Kor. 15:33, 34. w20.12 9 ¶3, 5-6

Aaka kapango kapandulula bubambe Jehova mbwaakabikka mumukwasyi wakwe wakujulu aanyika. Bubambe bwabusilutwe bubikkilizya zintu zyobilo, nguzu zyakweendelezya alimwi akuyoolyaambilila. Mbwaanga Jehova ngomutwe, nkokuti bana bakwe boonse, bangelo alimwi abantu bayoolyaambilila kulinguwe kweelana ambobazibelesya nguzu nzyobapedwe. (Rom. 14:10; Ef. 3:14, 15) Jehova wakapa Jesu nguzu zyakweendelezya mbungano, aboobo uyoolyaambilila kuli Jehova kweelana ambwatweendelezya. (1Kor. 15:27) Kuyungizya waawo, Jehova wakapa mwaalumi nguzu zyakweendelezya mukaintu wakwe alimwi abana. Ino mbuti mbwakonzya kuba silutwe uuli kabotu? Cakusaanguna mulumi weelede kuzyiba Jehova ncayanda kulinguwe. Alimwi weelede kuzyiba kaambo Jehova ncaakabikkila bubambe bwabusilutwe kwaambisya mbwakonzya kwiiya cikozyanyo ca Jehova alimwi a Jesu. Ino nkaambo nzi eeci ncociyandika kapati? Nkaambo Jehova wakapa basilutwe bamikwasyi nguzu zyakweendelezya, alimwi uyanda kuti kabazibelesya kabotu.—Lk. 12:48b. w21.02 2 ¶1-3

Cilatugwasya kumwiiya Jehova alimwi akusala kuziluba zintu zimwi. Mucikozyanyo, Jehova talubi zintu pele ikuti naa tweempwa, usala kutulekelela alimwi akukuluba kulubizya nkotucita. (Int. 25:7; 130:3, 4) Alimwi uyanda kuti andiswe katucita mbubonya kuli bamwi ciindi nobatulubizyila. (Mt. 6:14; Lk. 17:3, 4) Tulakonzya kutondezya kuti tulalumba kucipego citaliboteli cabongo kwiinda mukububelesya kulemeka yooyo wakatupa mbubo. Bamwi basala kubelesya bongo bwabo kwiinda mukulibikkila zyeelelo zijatikizya ciluzi alimwi acitaluzi. Pele akaambo kakuti Jehova ngowakatulenga, cilayandika kapati kuzyiba kuti zyeelelo nzyatubikkila zilagwasya kapati kwiinda zyeelelo zili zyoonse nzyotukonzya kulibikkila. (Rom. 12:1, 2) Ciindi notupona kweelana azyeelelo zyakwe, tulaba aluumuno. (Is. 48:18) Alimwi tulazyiba kaambo ncotuponena, nkokuti kulemeka Taateesu, Mulengi, alimwi akumukkomanisya.—Tus. 27:11. w20.05 23-24 ¶13-14

Mbuti mbotukonzya kutondezya luyando kubakwesu abacizyi mazuba aano? Kuti twabazyiba kabotu basyomima, cilakonzya kutuubila kubamvwisya alimwi akubayanda. Tulakonzya kuba acilongwe ambabo nokuba kuti mbapati, mbana naa bakakkomenena mubukkale bwiindene. Amuyeeye kuti, Jonatani wakali mupati amyaka iisika ku 30 kwiinda Davida; pele wakaba acilongwe anguwe. Sena kuli umwi mumbungano yanu, mupati naa musyoonto kwiinda ndinywe ngomukonzya kuba acilongwe anguwe? Kwiinda mukucita boobo, mulakonzya kutondezya kuti ‘mulijisi luyando kuciinga coonse cabakwesu.’ (1Pet. 2:17) Sena kuyanda basyomima caamba kuti tunoojisi cilongwe ciyumu kuli boonse mumbungano? Eeco tacikonzyeki pe. Tacilubide kumvwana kapati abamwi kwiinda bambi akaambo kakuba azintu zikozyenye nzyotukkomanina. Jesu wakaamba baapostolo bakwe boonse kuti bakali ‘beenzinyina,’ pele Johane wakali kumuyandisisya kapati kwiinda bamwi. (Joh. 13:23; 15:15; 20:2) Nokuba boobo, Jesu kunyina naakatondezya kuti Johane wakali kuyandika kapati kwiinda bamwi.—Mk. 10:35-40. w21.01 23 ¶12-13

Mwaapostolo Paulo tanaakaamba mulumbe wakwe kuli Bamasi baku Atene munzila iikonzyenye ambwaakawaamba kuba Juda mucikombelo. Wakali kubikkila maano kapati kulanga zintu izyakamuzungulukide alimwi wakabikkila maano kuzilengwa zyabantu zyabukombi. (Mil. 17:23) Mpoonya Paulo wakavwuntauzya kujatikizya bukombi bwabo alimwi akasimpe kali mu Magwalo. Aboobo Paulo wakalilibambilide kucinca mibandi yakwe. Bana Atene bakapanga cipaililo “Kuli Leza Uutazyibidwe,” nkakaambo kaako Paulo wakabaambila kuti mulumbe ngwaakali kukambauka wakali kuzwa kuli Leza ooyo ngobakali kukomba. Nokuba kuti Bamasi tiibakaazyi Magwalo, Paulo kunyina naakayeeya kuti tabakonzyi kuba Banakristo. Muciindi caboobo, wakababona mbuli maila aakeelede kutebulwa alimwi wakacinca kujatikizya mbwaakali kutalisya mibandi yamakani mabotu. Mbubwenya mbuli Paulo, amubikkile maano. Amubikkile maano kuzintu nzyobasyoma bantu bali mucilawo canu. Ino tuntu nzi twakubotya-botya ntwabikkide muŋanda naa mumootokala muntu ooyo ngomuyanda kukambaukila? Ino zina lyakwe, mbwasamide, mbwalibambide naa mbwaambaula zitondezya kuti uzulilwa kucikombelo nzi? w20.04 9-10 ¶7-8