October

Ikuti twamuzyiba Jesu, tuyooiya kuyeeya alimwi akucita zintu mbuli Jesu. Alimwi kuti twaizyiba mizeezo ya Jesu alimwi akuyeeya mbuli nguwe, cilongwe cesu anguwe ciyooyuma. Mbuti mbotukonzya kumwiiya Jesu? Atubone cikozyanyo comwe buyo. Jesu wakali kubikkila maano kapati kuyeeya mbwaakali kukonzya kugwasya bamwi, muciindi cakulikkomanisya lwakwe mwini. (Mt. 20:28; Rom. 15:1-3) Akaambo kakuti wakali kuyeeya munzila iili boobu, wakali kulisungula kugwasya bamwi alimwi akubalekelela. Kunyina naakali kufwambaana kunyema akaambo kazintu nzyobakali kwaamba bantu kujatikizya nguwe. (Joh. 1:46, 47) Alimwi kunyina naakali kubijilwa kujatikizya muntu umwi akaambo kakulubizya nkwaakacitide muntu ooyo kaindi. (1Tim. 1:12-14) Jesu wakaamba kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Joh. 13:35) Aboobo atulibuzye kuti, “Sena ndilacitobela cikozyanyo ca Jesu kwiinda mukucita zyoonse nzyondikonzya kutegwa ndizumanane kubamba luumuno abakwesu alimwi abacizyi?” w20.04 24 ¶11

Nokuba kuti muli munyika iizwide bantu babejekezya Jehova alimwi akusampaula zina lyakwe, mulijisi coolwe cakwiiminina kasimpe kwiinda mukwaambila bantu kuti Jehova ulasalala, mululami, mubotu alimwi ngusiluyando. Mulakonzya kugwasyilizya bweendelezi bwakwe. Mulakonzya kubagwasya bantu kumvwisya kuti bulikke bweendelezi bwa Jehova mbobululeme alimwi akuti bulikke mbobuyooleta luumumo alukkomano kuzilenge zyoonse. (Int. 37:9, 37; 146:5, 6, 10) Ciindi notuyiisya bantu kasimpe kamu Bbaibbele, kanji-kanji tukankaizya bweendelezi bwa Leza, kuti Jehova ngoweelela kweendelezya bubumbo, alimwi aaya masimpe. Nokuba kuti cilayandika kapati kuyiisya bantu milawo ya Leza, makanze eesu ngakubagwasya kuyanda Jehova, Taateesu alimwi akusyomeka kulinguwe. Aboobo tweelede kwaamba kujatikizya bube bwa Jehova bubotu, ikukankaizya bwini mbwabede Jehova. (Is. 63:7) Ciindi notuyiisya munzila iili boobu, tuyoobagwasya bantu kumuyanda Jehova alimwi akumumvwida akaambo kakuti bayanda kusyomeka kulinguwe. w20.06 6 ¶16; 7 ¶19

Bongo bwesu bupangidwe munzila iigambya kapati. Nomwakali mwida, bongo bwanu bwakali kuyaabupangwa kabotu-kabotu, alimwi maseelo aabongo manji akali kupangwa muminiti imwi aimwi! Basikuvwuntauzya bayeeyela kuti bongo bwamuntu mupati bujisi maseelo aalibedelede aaitwa kuti neurons aatandila ku 100 bbiliyoni. Maseelo aaya apanga bongo bwesu ibulema makkilogilamu aatandila ku 1.5. Cintu cigambya icitondezya mbobubeleka bongo, ncipego cakwaambaula. Amuyeeye buyo kujatikizya icicitika ciindi notwaambaula. Kufwumbwa bbala ndyotwaamba, bongo bwesu bweelede kweendelezya milambi yesu iili 100 yamulaka, yagoyooyo, yamulomo, yamweebo alimwi ayacamba. Kutegwa twaambe kabotu mabala, milambi eeyi yeelede kweendelana. Cibalo icakamwaigwa mu 2019 cakatondezya kuti bavwanda balakonzya kumvwa majwi akucita kweelana ancaamba. Nzyocaamba cibalo eeci zileendelana anzyobasyoma basikuvwuntauzya banji, kuti tulazyalwa katucikonzya kuzyiba alimwi akwiiya mwaambo. Masimpe kucikonzya kwaambaula ncipego kuzwa kuli Leza. w20.05 22-23 ¶8-9

Cakulisungula Abrahamu wakasiya buumi busumpukide kapati mumunzi wa Uri. Nkaambo nzi? Nkaambo kakuti wakali kulindila “munzi uujisi ntalisyo zini-zini.” (Heb. 11:8-10, 16) Munzi ngwaakali kulindila Abrahamu, Mbwami bwa Leza. Jesu Kristo ngo Mwami wa Bwami oobu alimwi uyoolela a Banakristo bananike ibali 144,000. Paulo wakaamba Bwami oobu kuti ‘munzi wa Leza uupona, Jerusalemu wakujulu.’ (Heb. 12:22; Ciy. 5:8-10; 14:1) Jesu wakayiisya basikwiiya bakwe kubupailila Bwami oobu, kulomba kuti buboole kutegwa kuyanda kwakwe kucitwe ansi aano mbubonya mbuli kujulu. (Mt. 6:10) Sena kuli makani manji ngaakazyi Abrahamu kujatikizya Bwami bwa Leza? Peepe. Kwamyaka minji kapati, makani aaya akali “maseseke.” (Ef. 1:8-10; Kol. 1:26, 27) Pele Abrahamu wakalizyi kuti balunyungu lwakwe bamwi bakali kuyooba bami akaambo kakuti Jehova wakamwaambila makani aaya cacigaminina.—Matl. 17:1, 2, 6. w20.08 2-3 ¶2-4

Tweelede kuzikaka njiisyo zyabasiluleyo. Kuzwa kumatalikilo aambungano ya Bunakristo, Diabolosi wali kubelesya basiluleyo banji kusola kunyonganya lusyomo lwabantu ba Leza ibasyomeka. Aboobo tweelede kuzyiba kwaandaanya kasimpe alimwi abubeji. Basinkondoma balakonzya kubelesya Intaneti naa mawebbusaiti aakubandikila a Intaneti kusola kunyonganya lusyomo lwesu muli Jehova alimwi aluyando ndotujisi kubakwesu. Tatweelede kwaasyoma makani aaya aakubeja, nkaambo azwa kuli Saatani. (1Joh. 4:1, 6; Ciy. 12:9) Kutegwa tutazundwi kukulwanwa a Saatani, tweelede kuyumya lusyomo lwesu muli Jesu alimwi alubazu ndwajisi mumakanze aa Leza. Kuyungizya waawo, tweelede kwiisyoma nzila ilikke njabelesya Jehova kusololela mbunga yakwe mazuba aano. (Mt. 24:45-47) Tulaluyumya lusyomo lwesu kwiinda mukwiiya Jwi lya Leza abuzuba. Kwiinda mukucita oobo, lusyomo lwesu luyooba mbuli cisamu cisimpide miyanda. Mwaapostolo Paulo wakaamba kaambo kakozyenye akaaka ciindi naakalemba majwi aali mulugwalo lwabuzuba basunu. w20.07 23-24 ¶11-12

Mbwaanga tatulondokede, toonse tujisi cilengwa cakubeteka bamwi kweelana ambobalibonya. (Joh. 7:24) Pele nzisyoonto buyo nzyotukonzya kuzyiba kujatikizya muntu ikuti twaile kumulanga buyo caatala-tala. Mucikozyanyo, naba dokota musongo alimwi uujisi luzyibo lunji takonzyi kuzyiba zinji kujatikizya mulwazi ikuti waile kumulanga buyo caatala-tala. Weelede kumuswiilila cakubikkila maano mulwazi ciindi napandulula bulwazi bwakwe alimwi ambwalimvwa kujatikizya bulwazi oobo. Mane buya dokota ulakonzya kwaamba kuti mulwazi ooyo aunke kuyoopimwa ku X-ray. Buyo-buyo, dokota ulakonzya kumupa musamu uuteendelani abulwazi mbwaciswa. Mbubwenya buyo, tatukonzyi kubazyiba kabotu bakwesu abacizyi kwiinda mukwiile kulanga buyo mbobalibonya atala. Tweelede kusolekesya kubazyiba kabotu nkokuti, ikuzyiba bwini mbobabede mukati kamoyo. Mubwini, tatukonzyi kulingula myoyo. Pele tulakonzya kucita zyoonse nzyotukonzya kutegwa tumwiiye Jehova. Ulabaswiilila bakombi bakwe. Ulabubikkila maano bukkale bwabo alimwi akubatondezya luzyalo. w20.04 14-15 ¶1-3

Tweelede kulicesya akaambo kakuti aabo ibalisumpula ‘tabayeeyi kabotu.’ Bantu balisumpula bajisi muuya wakuzwangana. Zintu nzyobayeeya anzyobacita kanji-kanji zilabapenzya alimwi akupenzya bamwi. Ccita kuti bacinca mbobayeeya, buyo-buyo Saatani uyakupa kuti mizeezo yabo yoofwaale alimwi akusofwaazyigwa. (2Kor. 4:4; 11:3) Pele muntu uulicesya uyeeya kabotu. Ulibona munzila yeelede alimwi ulizyi kuti kuli nzila zinji bamwi mobamwiinda. (Flp. 2:3) Kuyungizya waawo, ulizyi kuti “Leza ulabakazya ibalisumpula, pele ulabafwida luzyalo aabo ibalicesya.” (1Pet. 5:5) Aabo ibayeeya kabotu tabayandi kuba basinkondonyina a Jehova. Kutegwa tuzumanane kulicesya, tweelede kulutobela lulayo lwamu Bbaibbele ‘lwakubusamununa buntu bwesu bwakaindi amicito yambubo, akulisamika buntu bupya.’ Tweelede kwiiya cikozyanyo ca Jesu alimwi akusolekesya kusikila mpotugolela kumwiiya.—Kol. 3:9, 10; 1Pet. 2:21. w20.07 7 ¶16-17

Eelo kaka ncoolwe cilibedelede kuba mumbungano ya Jehova! Tuli muparadaiso yakumuuya imuli bantu basiluumuno alimwi ibakkomene. Ino mujisi busena nzi mumbungano? Mwaapostolo Paulo wakakozyanisya mbungano kumubili wamuntu. Alimwi wakakozyanisya bantu ibali mumbungano kuzizo zyamubili. (Rom. 12:4-8; 1Kor. 12:12-27; Ef. 4:16) Ciiyo cimwi ncotwiiya kuzwa kucikozyanyo ca Paulo ncakuti, aumwi ulijisi lubazu luyandika kapati mumukwasyi wa Jehova. Paulo utalika cikozyanyo cakwe kwiinda mukwaamba kuti: “Mbubonya mumubili omwe mbotujisi zizo zinji, pele zizo zyoonse eezyi tazibeleki mulimo omwe, mbubonya buyo aswebo, nokuba kuti tuli banji, tuli mubili omwe muli Kristo, pele toonse tuli zizonyina kuli umwi aumwi.” (Rom. 12:4, 5) Ino ncinzi ncaakali kupandulula Paulo? Wakali kupandulula kuti aumwi ulijisi mulimo mumbungano, pele toonse tulayandika kapati. w20.08 20 ¶1-2; 21 ¶4

Nobazyali, mbuti mbomukonzya kwiiya cikozyanyo ca Jehova cakulicesya? Kuti kaceelela, amubabuzye bana banu kutegwa baambe mbobayeeya kujatikizya mboweelede kucitwa mulimo umwi. Alimwi kuti kaceelela, amwiitobele mizeezo yabo. Nzila aimbi Jehova mbwatondezya kuti ulalicesya nkwiinda mukukkazika moyo nociba ciindi aabo ibamubelekela, nobakudooneka kusala kwakwe. Wakaswiilila ciindi Abrahamu naakaamba mbwaakali kulimvwa kujatikizya muzeezo wakunyonyoona Sodoma alimwi Gomora. (Matl. 18:22-33) Alimwi amuyeeye Jehova mbwaakamweendelezya mukaintu wa Abrahamu, Sara. Kunyina naakanyema ciindi Sara naakaseka kujatikizya cisyomezyo cakwe cakuti wakali kuyoomita mubucembele bwakwe. (Matl. 18:10-14) Muciindi caboobo, wakamweendelezya cabulemu Sara. Nobazyali alimwi andinywe nobaalu, ncinzi ncomukonzya kwiiya kucikozyanyo ca Jehova? Ino mucita buti ciindi bana banu naa bamwi mumbungano nobatakuzumini kusala kwanu? Sena mulabalulamika mpoonya-mpoonya? Naa sena mulasoleka kumvwisya mizeezo yabo? Banamukwasyi alimwi abasimbungano balagwasyigwa kapati ciindi aabo ibabeendelezya nobamwiiya Jehova. w20.08 10 ¶7-9

Ciindi notwakatalika kuyanzana abantu ba Jehova, ambweni twakali kuyandika lugwasyo kuzwa kuli bamwi akaambo kakuti twakalizyi kuti twakeelede kwiiya zinji. (1Kor. 3:1, 2) Pele ino mbuti lino? Ikuti twali kumubelekela Jehova kwamyaka minji alimwi twaba aluzyibo lunji, inga katutalibambilide kulutambula lugwasyo, kwaambisya kuti ooyo watupa lugwasyo wakatalika caino-ino kubelekela Jehova. Nokuba boobo, bunji bwaziindi Jehova ubelesya bakwesu abacizyi kutuyumyayumya. (Rom. 1:11, 12) Aboobo ikuti katuyanda kuti Jehova atugwasye, tweelede kulutambula lugwasyo kuzwa kubakwesu abacizyi. Kuzwidilila kwamuntu, takuyeeme munguzu zyakwe, lwiiyo, lubono naa mbwaakakomena, pele kuyeeme akulicesya kwamuntu alimwi akusyoma Jehova. Aboobo toonse atuzumanane kuyaambele (1) kwiinda mukusyoma Jehova, (2) kwiinda mukwiiya kuzikozyanyo zyamu Bbaibbele, alimwi (3) kwiinda mukutambula lugwasyo kuzwa kubasyomima. Aboobo, nokuba kuti twalimvwa kubula nguzu, Jehova uyootupa nguzu! w20.07 14 ¶2; 19 ¶18-19

Cilakonzya kutukatazya kukkazika moyo ciindi notukambaukila banamukwasyi ibatali Bakamboni. Njiisyo iijanika kulugwalo lwa Mukambausi 3:1, 7 ilakonzya kutugwasya. Yaamba kuti, kuli ‘ciindi cakuumuna aciindi cakwaambaula.’ Bukkale bwesu bubotu bulakonzya kupa kuti banamukwasyi bauswiilile mulumbe wesu, lyoonse tweelede kuti katulibambilide kubaambila kujatikizya Jehova. (1Pet. 3:1, 2) Tulabakkazikila moyo bantu boonse, kubikkilizya abanamukwasyi, ciindi notukambauka akuyiisya cabusungu. Tulakonzya kwiiya kukkazika moyo kuzwa kuzikozyanyo zyabantu basyomeka ibalembedwe mu Bbaibbele alimwi abamazuba aano. Habakuku wakali kulangila mamanino aabubi, pele calusyomo wakaamba kuti: “Ndinakwiimvwi akatungu kangu kabulindizi.” (Hab. 2:1) Mwaapostolo Paulo wakaamba makanze aakwe ‘aakumanizya’ mulimo wakwe. Nokuba boobo, cakukkazika moyo wakazumanana “kupa bumboni cakulomya kujatikizya makani mabotu.”—Mil. 20:24. w20.09 11-12 ¶12-14

Nokuba kuti alikke Jehova nguumwiinda nguzu, Jesu kunyina nayeeya kuti ulayandika kapati kwiinda bwini mbwabede. Ikuti katulicesya, tunootondezya luyando kubantu. Jesu wakaamba kuti babelesi ba Leza bakasimpe bayootondezya luyando kuli umwi amweenzinyina. (Lk. 9:48; Joh. 13:35) Ino ncinzi ncomweelede kucita ikuti naa kulibonya kuti kuli mapenzi mumbungano alimwi mulimvwa kuti taalanganizyigwi kabotu? Muciindi cakutongooka, mweelede kutondezya kulicesya kwiinda mukubagwasyilizya aabo ibasololela. (Heb. 13:17) Kutegwa mucite oobo, amulibuzye kuti: ‘Sena mapenzi ngondibona mapati kapati cakuti ayandika kubambwa? Sena eeci nceciindi ceelede kutegwa abambwe? Sena mukuli wangu kwaabamba? Sena mubwini ndisola kupa kuti kube lukamantano mumbungano naa ndisola kulibona kuti ndilayandika kapati kwiinda bwini mbondibede?’ Kulicesya kulayandika kapati kuli Jehova kwiinda luzyibo ndotujisi alimwi lukamantano lulayandika kapati kwiinda kubeleka canguzu nkotukonzya kucita. Aboobo, amucite zyoonse nzyomukonzya kutegwa mubelekele Jehova cakulicesya. Kuti mwacita oobo, muyookulwaizya lukamantano mumbungano.—Ef. 4:2, 3. w20.07 4-5 ¶9-11

Jesu wakalumba kapati kulugwasyo ndwaakatambula kuzwa kuli bamakaintu bayoowa Leza ibakali kumukutaukila “kwiinda mukubelesya lubono lwabo.” (Lk. 8:1-3) Wakabayiisya kasimpe ikayandika kapati kujatikizya kuyanda kwa Leza. Mucikozyanyo, wakabaambila kuti wakali kuyoofwa alimwi akubusyigwa. (Lk. 24:5-8) Wakabaambila bamakaintu aaba kujatikizya masunko ngobakali kuyoojana kumbele, mbubwenya mbwaakacita kubaapostolo. (Mk. 9:30-32; 10:32-34) Nokuba kuti baapostolo bakatija ciindi Jesu naakajatwa, bamakaintu bamwi ibakali kumukutaukila bakali kulangilila alaale ciindi naakafwa acisamu cakupenzyenzya. (Mt. 26:56; Mk. 15:40, 41) Bamakaintu ibayoowa Leza mbobakasaanguna kumubona naakabusyigwa. Mpoonya Jesu wakabalomba bamakaintu aabo kuti bakaambile baapostolo kuti wabusyigwa. (Mt. 28:5, 9, 10) Kweelede kuti kwakali abamakaintu mubuzuba bwa Pentekoste 33 C.E., ciindi baapostolo nobakali kunanikwa amuuya uusalala mpoonya boonse ibakaliko, bakatambula cipego cakwaambaula mumyaambo alimwi akwaambila bamwi “milimo mipati ya Leza.”—Mil. 1:14; 2:2-4, 11. w20.09 23 ¶11-12

Mulimo wakugwasya bantu kuba basikwiiya ufwutula bantu. Ino tuzyi buti oobo? Ciindi Jesu naakapa malailile ngotubala kulugwalo lwa Matayo 28:19, 20, wakaamba kuti: “Kamuya mukayiisye bantu . . . kuti babe basikwiiya . . . , akubabbapatizya.” Nkaambo nzi kubbapatizyigwa ncokuyandika? Nkaambo nceelelo cabaabo ibayanda kuyoofwutuka. Muntu uuyanda kubbapatizyigwa weelede kusyoma kuti lufwutuko lulakonzyeka akaambo kakuti Jesu wakatufwida alimwi wakabusyigwa. Nkakaambo kaako mwaapostolo Petro ncaakaambila Banakristonyina kuti: ‘Lubbapatizyo lulamufwutula lino kwiinda mububuke bwa Jesu Kristo.’ (1Pet. 3:21) Aboobo ciindi sikwiiya mupya nabbapatizyigwa, ulaba abulangizi bwakuyoofwutuka. Kutegwa tugwasye bantu kuba basikwiiya, tweelede kuba “aluzyibo mukuyiisya.” (2Tim. 4:1, 2) Nkaambo nzi? Nkaambo Jesu wakatulailila kuti: “Kamuya mukayiisye bantu . . . kuti babe basikwiiya.” Mwaapostolo Paulo wakaambila Timoteyo kuti: ‘Kobikkila maano kapati kukuyiisya kwako. Kakatila kuzintu eezyi, nkaambo kwiinda mukucita boobo uyoolifwutula omwini alimwi abaabo bakuswiilila.’ w20.10 14 ¶1-2

Sikwiiya Petro wakakkomana kuba muzubi wabantu. Kwiinda mugwasyigwa a Jehova, Petro wakauzyiba kapati mulimo ooyu. (Mil. 2:14, 41) Tulakambauka akaambo kakuti tulamuyanda Jehova; aaka nkakaambo kapati katukulwaizya kucita mulimo ooyu. Luyando ndotujisi kuli Jehova lulakonzya kutugwasya kuzunda kulitenga kuli koonse nkotujisi. Ciindi Jesu naakatamba Petro kuti abe muzubi wabantu, wakamwaambila kuti: “Utayoowi.” (Lk. 5:8-11) Petro kunyina naakali kuyoowa zintu izyakali kuyoomucitikila akaambo kakuba sikwiiya. Muciindi caboobo, wakagambwa akaambo kamaleele ngaakacita Jesu ikubagwasya kujaya nswi zinji, calo cakapa kuti alitenge kubeleka a Jesu. Mbubwenya mbuli Petro, ambweni andinywe mulayoowa ciindi nomuyeeya zijatikizyidwe mukuba sikwiiya wa Kristo. Kuti naa kacili boobo, amuyumye luyando ndomujisi kuli Jehova, Jesu, alimwi abasimukobonyoko, eeci ciyoomukulwaizya kuzumina kutamba kwa Jesu kwakuti mube bazubi babantu.—Mt. 22:37, 39; Joh. 14:15. w20.09 3 ¶4-5

Tulilyaabide kubelesya ciindi cesu, nguzu alimwi amali kutegwa tujane baabo ‘balibambilide kutambula buumi butamani.’ (Mil. 13:48) Ciindi notucita boobo, tutobela cikozyanyo ca Jesu. Wakaamba kuti: “Cakulya cangu nkucita kuyanda kwayooyo wakandituma alimwi akumanizya mulimo wakwe.” (Joh. 4:34; 17:4) Andiswe eeci ncotuyanda. Tuyanda kuumanizya mulimo ngotwakapegwa. (Joh. 20:21) Alimwi tuyanda kuti abamwi, kubikkilizya abaabo ibatacisungweede, tuzumanane kubelekela antoomwe mumulimo ooyu. (Mt. 24:13) Masimpe kuti, tacili cuuba-uba kuuzuzikizya mulimo mupati ngwaakatupa kucita Jesu. Nokuba boobo, ooyu mulimo tatuubeleki tolikke. Jesu wakasyomezya kuti unooli aandiswe. Tulaubeleka mulimo ooyu wakugwasya bantu kuba basikwiiya katuli “basimilimonyina a Leza” “alimwi ibakamantene a Kristo.” (1Kor. 3:9; 2Kor. 2:17) Aboobo, tulakonzya kuuzuzikizya mulimo ooyu. Eelo kaka ncoolwe alimwi cilakkomanisya kucita mulimo ooyu akugwasya bamwi kuti baucite abalo!—Bafilipi 4:13. w20.11 7 ¶19-20

Kanji-kanji, kusala nkobacita bazyali kulabajatikizya bana babo kwaciindi cilamfwu. Kuti bazyali tiibasala kabotu, balakonzya kubaletela mapenzi bana babo. Pele kuti basala kabotu, bagwasya bana babo kuba abuumi bukkomanisya. Nokuba boobo, abalo bana beelede kusala kabotu. Kusala kwiinda kubota umwi aumwi nkwakonzya kucita nkubelekela Taateesu wakujulu, Jehova. (Int. 73:28) Josefa a Mariya bakaliyandide kugwasya bana babo kubelekela Jehova, alimwi kusala nkobakacita bazyali aaba kwakatondezya kuti kubelekela Jehova cakali cintu ciyandika kapati mubuumi bwabo. (Lk. 2:40, 41, 52) Awalo Jesu wakasala kabotu calo cakamugwasya kuzuzikizya mulimo wakwe mumakanze aa Jehova. (Mt. 4:1-10) Jesu naakakomena wakaba mwaalumi uuli aaluzyalo, uusyomeka alimwi sicamba. Bazyali boonse bamuyanda Jehova balakonzya kukkomana kuba amwana uuli mbuli Jesu. w20.10 26 ¶1-2

Amweezeezye bukkale oobu. Mucizyi Munakristo uucembeede uyeeya ziindi zibotu zyakaindi. Nokuba kuti bukkale bwakwe mbuyumu kapati lino, wazumanana kumubelekela Jehova kusikila mpagolela. (1Kor. 15:58) Buzuba abuzuba uleezeezya kuti uli antoomwe abayandwa bakwe munyika mpya yakasyomezyegwa. Mucizyi uumbi wayeeya kuti musyominyina umwi wakamutyompya, pele wasala kutamubikkilila. (Kol. 3:13) Mukwesu umwi ulaziyeeya zibi nzyaakacita kaindi pele wasala kuzumanana kusyomeka. (Int. 51:10) Ino zikozyanyo zya Banakristo botatwe aaba zitondezya nzi? Boonse balaziyeeya zintu zyakabacitikila kaindi, pele tabaciti oobo ciindi coonse. Muciindi caboobo, ‘balanga buyo kumbele.’ Nkaambo nzi eeci ncociyandika kapati? Mbubwenya muntu mbwatakonzyi kweenda kabotu kuti ciindi aciindi kacebukila musyule, andiswe tatukonzyi kumubelekela kabotu Jehova kuti ciindi aciindi katuyeeya zintu izyakatucitikila kaindi.—Lk. 9:62. w20.11 24 ¶1-3

Goliati sikalumamba iwakali aanguzu kapati, wakali kubona Davida kuti tanaakajisi nguzu. Wakaamba boobu akaambo kakuti wakali sintanze, wakalijisi zilwanyo zikkwene, kumane buya wakalicibwene kulwana. Pele walo Davida wakali mulombe buyo watakajisi luzyibo mukulwana alimwi tanaakajisi zilwanyo zikkwene. Nokuba boobo, Davida wakasyoma nguzu zya Jehova, aboobo wakamuzunda sinkondonyina. (1Sam. 17:41-45, 50) Davida wakalwana abuyumuyumu bumbi bwalo ibwakali kukonzya kumupa kulimvwa kubula nguzu. Cakusyomeka Davida wakamubelekela ooyo Jehova ngwaakasalide kuba mwami wa Israyeli, nkokuti Saulo. Kumatalikilo, Mwami Saulo wakali kumulemeka Davida. Pele mukuya kwaciindi, kulisumpula kwakapa kuti Saulo atalike kumufwida munyono Davida. Saulo wakamweendelezya calunya Davida, mane buya akusola kuti amujaye. (1Sam. 18:6-9, 29; 19:9-11) Nokuba kuti Mwami Saulo wakamweendelezya munzila eeyi mbyaabi, Davida wakazumanana kutondezya bulemu kumwami ngwaakasalide Jehova. (1Sam. 24:6) Davida wakasyoma Jehova kuti amupe nguzu nzyaakali kuyandika kutegwa aliyumye kubuyumuyumu oobu.—Int. 18:1, katwe kamakani. w20.07 17 ¶11-13

Cibeela cipati cabusinsimi bujatikizya mwami wakunyika alimwi amwami wakumusanza cakazuzikizyigwa kale, aboobo tuli masimpe kuti abwalo businsimi busyeede buyoozuzikizyigwa. Kutegwa tubumvwisye businsimi bulembedwe kubbuku lya Daniele caandaano 11, tweelede kuzyiba kuti lyaamba buyo baleli alimwi amfwulumende izilwana bantu ba Leza. Mweelwe wabantu ba Leza musyoonto kapati ikuti naa twaweezyanisya amweelwe wabantu bambi ibali munyika. Aboobo ino nkaambo nzi mfwulumende eezyi ncozilwana buyo bantu ba Leza? Nkaambo kakuti makanze ngajisi Saatani alimwi abweende bwakwe bwazintu ngakuyanda kunyonyoona baabo ibabelekela Jehova alimwi a Jesu. (Matl. 3:15; Ciy. 11:7; 12:17) Kuyungizya waawo, businsimi ibuli kubbuku lya Daniele bweelede kweendelana abusinsimi bumbi ibuli mu Jwi lya Leza. Kutegwa tubumvwisye kabotu businsimi bwa Daniele, tweelede kulanga-langa azibeela zimbi zya Magwalo aabusinsimi. w20.05 2 ¶1-2

Bantu banji mazuba aano bajisi mizeezo iindene kujatikizya icicitika ciindi muntu naafwa. Pele ino ncinzi Bbaibbele ncoliyiisya? Ciindi muntu naafwa, mubili wakwe ulabola. Pele Ooyo iwakalenga bubumbo ibwatakaliko aciindi cimwi ulakonzya kumubusya muntu ooyo, akumupa mubili uumweelede. (Matl. 1:1; 2:7) Mwaapostolo Paulo wakabelesya cikozyanyo kutondezya kuti Leza takayandiki kubusya muntu amubili nguwenya ngwaakajisi. Amuyeeye kujatikizya nseke yacisyango. Ciindi nseke eeyo noyasyangwa ilamena akukomena kuba cisyango. Cisyango eeco inga ciliindene anseke iyakasyangwa. Paulo wakabelesya cikozyanyo eeci kutondezya kuti Mulengi wesu ulakonzya kupa “mubili mbuli mbwayanda.” Alimwi Paulo wakaamba kuti “kuli mibili yakujulu amibili yaanyika.” Ino ncinzi ncaakali kupandulula? Wakali kupandulula kuti anyika, tujisi mibili yanyama, pele kujulu kuli mibili yamuuya, mbuli njobajisi bangelo.—1Kor. 15:36-41. w20.12 9-10 ¶7-9

Toonse tulayanda kupona muluumuno. Kunyina uyanda kulibilika. Nokuba boobo, zimwi ziindi tulakonzya kulibilika kapati mane akubuzya mubuzyo nguwenya ngwaakabuzya Mwami Davida mulugwalo lwabuzuba bwasunu. Kunyina ncotukonzya kucita kujatikizya zintu zimwi izitupa kulibilika. Mucikozyanyo, tatukonzyi kulesya kudula kwacakulya, zisani, leenti yaŋanda mwaka amwaka, alimwi tatukonzyi kulesya babelesima naa basicikoloma kusola kutusunka kucita zintu cakutasyomeka naa kucita bwaamu. Alimwi tatukonzyi kulesya milandu iicitwa mucilawo cesu. Tulajana mapenzi aali boobu akaambo kakuti tupona munyika mwalo bantu banji mobacita zintu ziteendelani anjiisyo zyamu Bbaibbele. Saatani, leza wanyika eeyi, ulizyi kuti bantu bamwi balakonzya kulekela “kulibilika kwamubweende bwazintu obuno” kubalesya kubelekela Jehova. (Mt. 13:22; 1Joh. 5:19) Aboobo tacitugambyi kuti nyika izwide mapenzi aapa bantu kulibilika kapati! w21.01 2 ¶1, 3

Mwaapostolo Johane alimwi wakatulailila kutabasulaika bakwesu naa bacizyi. Kuti twaalilwa kulutobela lulayo oolu, Saatani ulakonzya kutunyonganya. (1Joh. 2:11) Eeci cakabacitikila bamwi kumamanino aamwaanda wamyaka wakusaanguna C.E. Aciindi eeco, Saatani wakasolekesya kupa kuti bantu ba Leza batalike kusulaikana alimwi akwaandaana. Kusikila ciindi Johane naakalemba magwalo aayitwa zina lyakwe, baalumi ibakatondezya muuya mbuli wa Saatani bakalinjide kale mumbungano. Mucikozyanyo, Diotrefe wakali kupa kuti kube kwaandaana kupati akati kabakwesu abacizyi mumbungano imwi. (3Joh. 9, 10) Tanaakali kubalemeka balangizi beendeenda ibakali kutumwa akabunga keendelezya. Mane buya wakali kubatandila kunze aambungano aabo ibakali kubatambula bantu mbaatakali kuyanda. Eelo kaka ooyu wakali muuya mubyaabi kapati! Amazuba aano Saatani ulasolekesya canguzu kubaandaanya bantu ba Leza. Tatweelede kusulaika bakwesu alimwi akucileka kubagwasya. w21.01 11 ¶14

Lyankondo yakusaanguna yanyika yoonse, mfwulumende yabana Germany alimwi ayabana Britain yakabapenzya kapati bantu ba Leza ibakakaka kutola lubazu munkondo. Alimwi mfwulumende ya U.S. yakabaanga bakwesu ibakali kusololela mulimo wakukambauka. Kupenzyegwa ooku kwakazuzikizya businsimi ibulembedwe kulugwalo lwa Ciyubunuzyo 11:7-10. Cakuma 1930, kwaambisya lyankondo yabili yanyika yoonse, mwami wakunyika wakabapenzya citaambiki bantu ba Leza. Hitler alimwi abantu bakwe bakaulesya mulimo wabantu ba Leza. Mwami wakunyika wakajaya bantu ba Jehova ibasika ku 1,500 alimwi banji bakatolwa muzilabba zyakupenzyezya. Mwami wakunyika wakalesya mulimo wakukambauka, aboobo kwiinda mukucita boobo, ‘wakasofwaazya busena busalala’ alimwi “akugusya cipaizyo calyoonse.” (Dan. 11:30b, 31a) Mweendelezi wabo Hitler, mane buya wakakonka kuti ulabajaya bantu ba Leza boonse mucisi ca Germany. w20.05 6 ¶12-13

Ikuti katutondezya luyando kuli umwi amweenzinyina, tuyoopa kuti kutabi muuya wakuzundana mumbungano. Amuyeeye kuti Jonatani kunyina naakasola kuzundana a Davida, kumubona kuba sinkondonyina akaambo kacuuno cabwami. (1Sam. 20:42) Toonse tulakonzya kwiiya cikozyanyo ca Jonatani. Mutanooboni babelesinyoko kuba basinkondo akaambo kazintu nzyobakonzya kucita, “pele amucite zintu zyoonse cakulicesya akubona bamwi kuti balamwiinda.” (Flp. 2:3) Kamuyeeya kuti muntu uuli woonse mumbungano ulakonzya kucita cintu cimwi icikonzya kugwasya mbungano. Ikuti twazumanana kulicesya, tuyoocikonzya kubona bube bubotu mbobajisi bakwesu abacizyi alimwi akugwasyigwa kuzikozyanyo zyabo zibotu. (1Kor. 12:21-25) Ciindi notutondezyanya luyando, tulabagwasya bakwesu abacizyi kubelekela Jehova calukamantano. Tulatondezya kuti tuli basikwiiya ba Jesu alimwi eeci cilabakwelelezya babombemyoyo kubukombi bwakasimpe. Kwiinda zyoonse, tulamulemeka “Taata siluse a Leza siluumbulizyo loonse,” Jehova.—2Kor. 1:3. w21.01 24 ¶14; 25 ¶16

Mazuba aano, mbotuli bantu ba Jehova, zimwi ziindi tulanyansyigwa, tulasampaulwa akubonwa kuti tuli bafwubafwuba alimwi tatujisi nguzu. Nkaambo nzi? Akaambo kakuti tatuciti zintu nzyobacita bantu batuzingulukide. Tulasoleka kuba bantu balicesya alimwi ibamvwida. Pele bantu bamunyika, balabakkomanina bantu balisumpula, basicinguni alimwi bazangi. Kuyungizya waawo, tatutoli lubazu mutwaambo twacisi alimwi tatunjili mulimo wabusikalumamba mucisi cili coonse. Tuliindene abantu bamunyika eeyi yamazuba aano, aboobo tubonwa kuba bantu baansi. (Rom. 12:2) Nokuba kuti bantu munyika batubona kuti tatujisi nguzu, Jehova ulatubelesya kucita milimo mipati. Uli mukuzuzikizya mulimo mupati wakukambauka uutanacitidwe mubuponi bwabantu. Babelesi bakwe mazuba aano balasandulula alimwi akumwaya mamagazini manji kwiinda mabbuku aambi aali woonse munyika, alimwi babelesya Bbaibbele kugwasya mamiliyoni aabantu kutegwa bacince bukkale bwabo. Bulemu boonse buboola akaambo kakuzwidilila mumulimo ooyu buunka kuli Jehova. w20.07 15 ¶5-6

Jesu ulalibombya kuli Jehova, pele eeci tacaambi kuti tajisi busongo naa luzyibo. Kuyiisya munzila nguba-uba alimwi iitakatazyi kumvwa, ncitondezyo cakuti Jesu musongo kapati. (Joh. 7:45, 46) Jehova wakazilemeka nguzu nzyaakajisi Jesu, nkakaambo kaako wakamuzumizya kuti kali kumbali lyakwe ciindi nobakali kulenga julu anyika. (Tus. 8:30; Heb. 1:2-4) Alimwi kuzwa ciindi Jesu naakabusyigwa, Jehova wakamupa “nguzu zyoonse kujulu alimwi aanyika.” (Mt. 28:18) Nokuba kuti Jesu ulijisi luzyibo, usyoma Jehova kuti kamusololela. Nkaambo nzi? Nkambo ulabayanda Bausyi. Bamalumi beelede kuzyiba kuti Jehova kunyina naakaamba kuti mukaintu kalibombya kumulumaakwe akaambo kakuti bamakaintu ubabona kuti mbaansi kapati kwiinda baalumi. Jehova wakacisalazya kwiinda mukusala bamakaintu abaalumi kabali basikulelanyina a Jesu. (Gal. 3:26-29) Jehova wakatondezya kuti ulamusyoma Mwanaakwe kwiinda mukumupa nguzu zyakweendelezya. Mbubwenya buyo, mulumi musongo uyoomupa nguzu zimwi mukaintu wakwe. w21.02 11 ¶13-14

Ijwi lya Leza lili mbuli cimbonimboni. Lilatugwasya kubona mumbazu motweelede kubambulula alimwi ancotweelede kucita. (Jak. 1:23-25) Mucikozyanyo, twamana kubala Jwi lya Leza, tulakonzya kubona kuti tweelede kunoolilesya kunyema-nyema. Kwiinda mukugwasyigwa a Jehova, tulakonzya kwiiya mbotukonzya kubomba moyo ciindi notubeleka abamwi naa ciindi notwanyema akaambo kamapenzi. Lino tulakonzya kuyeeya kabotu akusala camaano. (Jak. 3:13) Eelo kaka cilayandika kuti tulizyibe kabotu Bbaibbele! Zimwi ziindi tulazyiba ncotweelede kucita kakuli twalubizya kale. Nzila mbotu yakuba abusongo nkwiinda mukwiiya kuzintu bamwi nzyobakacita kabotu alimwi akulubizya kwabo. Nkakaambo kaako Jakobo utukulwaizya kwiiya kuzikozyanyo zyabantu bamu Bbaibbele mbuli Abrahamu, Rahabu, Jobu, alimwi a Elija. (Jak. 2:21-26; 5:10, 11, 17, 18) Babelesi ba Jehova ibasyomeka aaba, bakacikonzya kuliyumya mumasunko aakali kukonzya kubamanina lukkomano. Cikozyanyo cabo cakuliyumya citondezya kuti kwiinda mukugwasyigwa a Jehova, andiswe inga twacikonzya. w21.02 29-30 ¶12-13

Lyaciiyo ca Bbaibbele, mwiiyi nguujisi mukuli wakugwasya sikwiiya kulimvwisya Jwi lya Leza. Aboobo ikuti mwiiyi wamutamba kuti mumusangane ciindi nasololela ciiyo, mweelede kumugwasyilizya. (Muk. 4:9, 10) Pele ino ncinzi ncomweelede kucita kutegwa mube mugwasyi mubotu? Amulibambile ciiyo. Cakusaanguna, amumulombe mwiiyi kuti amwaambile asyoonto buyo kujatikizya sikwiiya. Ino ncinzi ncomuzyi kujatikizya sikwiiya Bbaibbele? Mweendela muciiyo nzi? Ncinzi ncomuyanda kuti sikwiiya aiye muciiyo eeci? Sena kuli cintu ncondeelede kwaamba, kutaamba naa kucita lyaciiyo? Mbuti mbondikonzya kumukulwaizya sikwiiya kuyaambele? Masimpe kuti mwiiyi takonzyi kumwaambila makani aamaseseke kujatikizya sikwiiya, pele nzyakonzya kumwaambila zilakonzya kumugwasya. Mucizyi Joy, misyinali wakaamba kuti: “Makani aaya alamugwasya ooyo ngotubeleka limwi kuba aluyandisisyo lwakugwasya sikwiiya alimwi akuzyiba ncayakwaamba lyaciiyo.” w21.03 9 ¶5-6

Zimwi ziindi tulasulaikwa nkaambo tupona kweelana azyeelelo zya Leza ziluleme. Zyeelelo eezyi ziliindene kapati amicito iisofweede yabantu bamunyika. Mucikozyanyo, bantu banji mazuba aano nomuba mubuleya balazumizya kucita micito iisofweede iikozyenye anjobakali kucita bantu Leza mbaakanyonyoona mumunzi wa Sodoma a Gomora. (Jud. 7) Mbwaanga tulazitobela zyeelelo zyamu Bbaibbele, bantu banji balatufwubaazya akutubona kuti tulaciindizya! (1Pet. 4:3, 4) Ncinzi cikonzya kutugwasya ciindi bantu nobatusulaika alimwi akututukila? Tweelede kuba alusyomo luyumu lwakuti Jehova uyootugwasya. Mbubwenya mbuli ntobo lusyomo lwesu lulakonzya “kuzimi mivwi yoonse iiyaka mulilo iifwuswa amubi.” (Ef. 6:16) Pele tatuyandiki buyo lusyomo lulikke. Tuyandika luyando. Nkaambo nzi? Nkaambo luyando “talunyemi-nyemi.” Pele lulajatila akuliyumya muzintu zyoonse zibyaabi. (1Kor. 13:4-7, 13) Kuyanda Jehova, basyomima, alimwi nobaba basinkondoma kuyootugwasya kuliyumya ciindi notusulaikwa. w21.03 20-21 ¶3-4

Zimwi ziindi, tulatondezya kuti tulabayanda bakwesu abacizyi kwiinda mukutacita zintu zimwi. Mucikozyanyo, tatufwambaani kunyema akaambo kazintu nzyobaamba. Amuyeeye buyo cakacitika mubuumi bwa Jesu anyika. Wakaambila basikwiiya bakwe kuti, kutegwa bakajane buumi, bakeelede kulya mubili wakwe akunywa bulowa bwakwe. (Joh. 6:53-57) Basikwiiya ba Jesu banji, tiibakacikkomanina ncaakabaambila, aboobo bakacileka kumutobela. Pele aabo ibakali kumuyanda ncobeni, tiibakamusiya pe. Nokuba kuti tiibakacimvwisya ncaakabaambila Jesu alimwi akuti cakabagambya, tiibakayeeya kuti ncaakaamba cakalilubide alimwi kunyina nibakanyema. Muciindi caboobo, bakamusyoma nkaambo bakalizyi kuti wakali kwaamba kasimpe. (Joh. 6:60, 66-69) Eelo kaka cilayandika kutafwambaana kunyema akaambo kazintu nzyobaamba balongwe besu! Muciindi caboobo, tweelede kubapa coolwe cakupandulula ncobaamba.—Tus. 18:13. w21.01 11 ¶13