April

Jesu wakatondezya luyando lupati kwiinda mukwaaba buumi bwakwe akaambo kandiswe. (Joh. 15:13) Kunyina ncotukonzya kumupa Jehova alimwi a Jesu akaambo kaluyando ndobakatondezya kulindiswe. Pele tulakonzya kutondezya kulumba kwiinda munzila mbotupona buzuba abuzuba. (Kol. 3:15) Bananike balacibikkila maano kapati cinunuzyo nkaambo cipa kuti bulangizi bwabo bukonzyeke. (Mt. 20:28) Akaambo kalusyomo lwabo mucipaizyo ca Kristo, Jehova ubaamba kuti baliluleme alimwi wakabatambula kuba bana bakwe. (Rom. 5:1; 8:15-17, 23) Abalo bambelele zimbi balalumba kapati akaambo kacinunuzyo. Kwiinda mulusyomo lwabo mubulowa bwa Kristo, balasalala kuli Leza, alimwi balijisi bulangizi ‘bwakuzwa mumapenzi mapati.’ (Ciy. 7:13-15) Boonse balatondezya kuti balalumba kucinunuzyo kwiinda mukujanika ku Ciibalusyo mwaka amwaka. w22.01 23 ¶14-15

Jesu icakamupenzya kapati nkaambo nkobakaamba kuti nkobakamujaila. Wakatamikizyigwa kuti ngusikusampaula Leza, nkokuti muntu uutamulemeki Leza naa zina lya Leza. (Mt. 26:64-66) Kaambo aako kakamucisa kapati Jesu cakuti wakalombozya kuti kubota Bausyi nobakamukwabilila kumasampu aali boobu. (Mt. 26:38, 39, 42) Jesu wakeelede kwaanzikwa acisamu kutegwa ba Juda baangululwe kukusinganizyigwa. (Gal. 3:10) Bakasinganizyigwa akaambo kakuti bakasyomezya kutobela Mulawo wa Leza, pele kunyina nobakacita oobo. Aboobo bakeelede kufwa nkaambo bakali bana ba Adamu, pele alimwi bakalisinganizyidwe. (Rom. 5:12) Mulawo wa Leza wakali kwaamba kuti, muntu wacita cibi iceelela lufwu wakeelede kujaigwa. Mpoonya mubili wakwe wakeelede kwaanzikwa acisamu. (Dt. 21:22, 23; 27:26) Aboobo kwiinda mukwaanzikwa acisamu, Jesu wakapa kuti nciconya cisi icakamukaka cigwasyigwe akaambo kacipaizyo cakwe. w21.04 16 ¶5-6

Amuyeeye cakacitika mubuzuba bwamamanino Jesu katanajaigwa. Basikalumamba bana Roma bakamujata akumuuma calunya. (Mt. 26:52-54; Joh. 18:3; 19:1) Bakamukwibbaula amutatula iwakali kuzapula nyama yamubili wakwe. Mpoonya bakamupa kunyamuna cisamu cilema kumwi kazwa bulowa. Jesu wakasola kucinyamuna cisamu eeco kutola kubusena nkobakali kuyanda kumujaila. Pele muciindi buyo cisyoonto, basikalumamba bana Roma bakasinikizya mwaalumi uumbi kuti amugwasye Jesu kucinyamuna. (Mt. 27:32) Ciindi Jesu naakasika abusena mpobakali kuyanda kumujaila, basikalumamba bakagagaila maanza aakwe alimwi amaulu kucisamu. Cikkelo camubili wa Jesu cakali kukwela nyama yakwe mutupulo mwakainda mpikili. Balongwe bakwe alimwi abanyina bakalila kapati, pele balo basololi ba Juda bakali kumufwubaazya. (Lk. 23:32-38; Joh. 19:25) Jesu wakapenga kwamawoola manji. Kweelana ambobakamugagaila, wakafwundilila, mpoonya cakamukatazya kapati kuyoya. Aboobo kalaafwaafwi kufwa, wakapa mupailo wamamanino kuli Jehova. Kumane wakakotama akufwa. (Mk. 15:37; Lk. 23:46; Joh. 10:18; 19:30) Masimpe lwakali lufwu lubyaabi alimwi ilucisa kapati! w21.04 16 ¶4

Jesu wakabandika abaapostolo bakwe basyomeka ibali 11 kujatikizya zizuminano zyobilo, nkokuti cizuminano cipya alimwi acizuminano ca Bwami. (Lk. 22:20, 28-30) Zizuminano zyobilo eezyi zyakajalula nzila kubaapostolo aabo alimwi akuli bamwi basyoonto kuti bakabe bami abapaizi kujulu. (Ciy. 5:10; 14:1) Balikke bananike basyeede, ibali muzizuminano eezyi zyobilo, mbobakonzya kulya cinkwa akunywa waini lya Ciibalusyo. Jehova wakabapa bulangizi bubotu kapati, nkokuti kuyooba abuumi butaboli alimwi butafwi kujulu, kubeleka antoomwe a Jesu Kristo iwakalemekwa alimwi abamwi ibali 144,000, kwiinda zyoonse, kuyooba antoomwe a Jehova Leza! (1Kor. 15:51-53; 1Joh. 3:2) Bananike balizyi kuti beelede kuzumanana kusyomeka kusikila kulufwu.—2Tim. 4:7, 8. w22.01 21 ¶4-5

Kwakali zigwebenga zyobilo izyakali aa Jesu acisamu cakupenzezya. (Lk. 23:40,41) Cigwebenga cimwi cakalanga kuli Jesu akwaamba kuti: “Ukandiyeeye waakunjila mu Bwami bwako.” (Lk. 23:42) Jesu wakapa cigwebenga eeci bulangizi nkaambo wakalizyi kuti Bausyi mbaasiluse. (Int. 103:8; Heb. 1:3) Jehova ulayanda kutulekelela alimwi akutufwida luse. Pele ulacita oobo kuti naa twausa ncobeni kuzibi alimwi akuti naa twatondezya lusyomo mucinunuzyo ca Jesu Kristo. (1Joh. 1:7) Bamwi cilakonzya kubayumina kusyoma kuti Jehova ulakonzya kubalekelela zibi. Kuti kamulimvwa boobo, amulange-lange bukkale oobu: Jesu katanafwa, wakatondezya luse kucigwebenga icakazwa akutalika kutondezya lusyomo. Eelo kaka Jehova ulakonzya kutondezya luse kubabelesi bakwe basyomeka!—Int. 51:1; 1Joh. 2:1, 2. w21.04 9 ¶5-6

Kwiinda mukuzumanana kusyomeka kusikila kulufwu, Jesu wakazuzikizya zintu zinji. Cakusaanguna, wakatondezya kuti Saatani mubeji. Jesu wakatondezya kuti muntu uulondokede ulakonzya kuzumanana kusyomeka, tacikwe makani azintu Saatani nzyakonzya kucita. Cabili, Jesu wakapa buumi bwakwe kacili cinunuzyo. Akaambo kakuti wakaaba buumi bwakwe, wakapa kuti cikonzyeke kubantu batalondokede kuba acilongwe a Leza alimwi akuba abulangizi bwakupona kukabe kutamani. Catatu, Jesu wakatondezya kuti Jehova mweendelezi mululami alimwi wakasalazya zina lya Bausyi. Atupone buzuba bumwi abumwi mbuli kuti ncoolwe camamanino cakuzumanana kusyomeka. Mpoonya, kufwumbwa naa twafwa, tuyoocikonzya kwaamba kuti, “Jehova ndakasolekesya kuzumanana kusyomeka, kutondezya kuti Saatani mubeji, kusalazya zina lyako alimwi akusumpula bweendelezi bwako.” w21.04 12 ¶13-14

Naakamana kubetekwa akupegwa mulandu ngwaatakacita, Jesu wakafwubaazyigwa, kupenzyegwa calunya, alimwi akugagailwa acisamu cakupenzezya. Wakagagailwa mpikili kumaanza akumaulu. Kuyoya alimwi akwaamba jwi lili lyoonse cakali kucisa. Pele wakeelede kwaambaula, nkaambo wakajisi majwi aayandika ngaakeelede kwaamba. Eelo kaka kuli ziiyo zibotu nzyotukonzya kwiiya kumajwi aa Jesu aamamanino! Twayeezyegwa kuti tweelede kulekelela bamwi alimwi akusyoma kuti Jehova awalo inga watulekelela. Tulijisi coolwe cakuba mumukwasyi wakumuuya imuli bakwesu abacizyi ibalibambilide kutugwasya. Pele ciindi notuyandika lugwasyo, tweelede kubaambila. Tulizyi kuti Jehova uyootugwasya kuliyumya musunko lili lyoonse likonzya kutusikila. Alimwi twabona mbociyandika kupona buzuba bumwi abumwi mbuli kuti mbwamamanino kutondezya kuti tulasyomeka, katusinizyide kuti buumi bwesu bulikwabilidwe mumaanza aa Jehova. w21.04 8 ¶1; 13 ¶17

Kutobela mikondo ya Jesu kusololela kubuumi butamani. Ciindi mulombwana muvwubi naakabuzya ncaakeelede kucita kutegwa akajane buumi butamani, Jesu wakamwiingula kuti: ‘Boola ube sikunditobela.’ (Mt. 19:16-21) Kuba Juda bamwi ibatakali kusyoma kuti ngo Kristo, Jesu wakaamba kuti: “Imbelele zyangu . . . zilanditobela. Ndizipa buumi butamani.” (Joh. 10:24-29) Tulatondezya kuti tulamusyoma Jesu kwiinda mukutobela nzyaakayiisya alimwi akwiiya cikozyanyo cakwe. Ikuti twacita oobo, tuyoozumanana kweenda munzila iitola kubuumi butamani. (Mt. 7:14) Katutanatalika kwiitobelesya mikondo ya Jesu, tweelede kumuzyiba. ‘Kuzyiba’ Jesu takugoli. Tweelede kuzumanana kwiiya kujatikizya nguwe, nkokuti bube bwakwe, mbwayeeya alimwi azyeelelo zyakwe. Tacikwe makani abulamfwu bwaciindi ncotwakkala mukasimpe, tweelede kuzumanana kumuzyiba Jehova alimwi a Mwanaakwe. w21.04 4 ¶9-10

Kweelede kuti mwaapostolo Paulo wakali kulimvwa bubi ciindi naakali kuyeeya zintu nzyaakali kucita katanaba Munakristo. Nkakaambo kaako wakalyaamba kuti ngowakali sizibi ‘kwiinda.’ (1Tim. 1:15) Katanaiya kasimpe, Paulo wakali kupenzya Banakristo mumunzi umwi aumwi, bamwi wakali kubabikka muntolongo akuzuminizya kuti bamwi bajaigwe. (Mil. 26:10, 11) Amweezeezye mbwaakali kunoolimvwa Paulo ikuti naakaswaanganya Munakristo uucili mwana-mwana uuli aabazyali bakajaigwa akaambo kanguwe! Paulo wakali kulimvwa bubi kujatikizya kulubizya kwakwe, pele wakalizyi kuti takonzyi kucinca zintu zyakacitika kale. Wakazumina kuti Kristo wakafwida nguwe, aboobo wakalemba kuti: “Kwiinda muluzyalo lwa Leza ndili boobu mbondibede lino.” (1Kor. 15:3, 10) Ino twiiya nzi? Mweelede kuba alusyomo lwakuti Jesu wakafwida ndinywe alimwi akupa kuti mucikonzye kuba acilongwe a Jehova. (Mil. 3:19) Iciyandika kapati kuli Leza nceeco ncotucita lino alimwi akumbele, ikutali kulubizya nkotwakacita musyule.—Is. 1:18. w21.04 23 ¶11

Nokuba kuti ba Juda banji mumazuba aa Jesu tiibakali kulangila kuti Mesiya wakali kuyoofwa, amubone icakasinsimwa mu Magwalo: “Wakatila buumi bwakwe naakafwa alimwi wakabalilwa antoomwe abasikusotoka mulawo; walo wakatola cibi cabantu banji, akwiiminina basikusotoka mulawo.” (Is. 53:12) Aboobo ba Juda tiibakeelede kulebwa ciindi Jesu naakajaigwa mbuli sizibi. Mazuba aano, tulakonzya kweeleba kulebwa kwiinda mukuzyiba twaambo twamasimpe. Mu Mulumbe wakwe waa Cilundu, Jesu wakacenjezya baswiilizi bakwe kuti bamwi ‘bayoomubejelezya zintu zibi ziindene-indene.’ (Mt. 5:11) Kasensa kabubeji oobu, ngu Saatani. Ulabayunga basikukazya kumwaya makani mabyaabi aakubeja kujatikizya baabo bayanda kasimpe. (Ciy. 12:9, 10) Tweelede kubukaka bubeji mbobaamba basikutukazya. Tatweelede kulekela bubeji oobu kutuyoosya naa kunyonganya lusyomo lwesu. w21.05 11 ¶14; 12 ¶16

Amumugwasye sikwiiya Bbaibbele kusyoma Jehova. Jesu wakaambila basikwiiya bakwe kuti Jehova wakali kuyoobagwasya nkaambo wakali kubayanda. (Mt. 10:19, 20, 29, 30) Amumwaambile sikwiiya wanu kuti Jehova uyoomugwasya awalo. Mulakonzya kumugwasya kusyoma Jehova kwiinda mukupaila anguwe kujatikizya mbaakani zyakwe. Mukwesu Franciszek uukkala ku Poland, wakaamba kuti: “Bayi bangu kanji-kanji bakali kuzibikkilizya mbaakani zyangu mumipailo. Nindakabona Jehova mbwaakali kwiingula mipailo yabo, cakufwambaana ndakatalika kupaila. Ndakabona Jehova mbwaakali kundigwasya lyoonse ciindi nondakali kulomba kuti mazuba amwi kanditabeleki kutegwa kandijanika kumiswaangano yambungano alimwi akumuswaangano wacooko.” Jehova ulababikkila maano kapati basikwiiya Bbaibbele. Ulalumba kubeleka canguzu nkobacita bamayi Banakristo ikugwasya bantu kuba acilongwe anguwe, alimwi ulabayanda kapati. (Is. 52:7) Kuti kamutajisi ciiyo ca Bbaibbele lino, mulakonzya kugwasya basikwiiya Bbaibbele kweelela kubbapatizyigwa kwiinda mukuunka abasikumwaya bambi kuziiyo zyabo. w21.06 7 ¶17-18

Tulakonzya kutondezya kuti tulalumba kucoolwe eeci, kwiinda mukulibala Jwi lya Leza lyoonse. Tweelede kuba amulongo wakwiiya alimwi akubala Bbaibbele, ikutali buyo leelyo notujisi ciindi. Kuti twazumanana kuutobela mulongo ooyo, tuyoozumanana kuyumya lusyomo lwesu. Mukwiimpana ‘abasongo alimwi abacenjede’ bamunyika eeyi, tuyooba alusyomo luyumu luyeeme abumboni bwa Jwi lya Leza. (Mt. 11:25, 26) Bbaibbele lilatwaambila kaambo zintu munyika ncoziyaabwiindila buya kubija, alimwi akuti Jehova uyoobweza ntaamu. Aboobo atube amakanze akuyumya lusyomo lwesu alimwi akugwasya bantu banji kuba alusyomo mu Mulengi. (1Tim. 2:3, 4) Alimwi atuzumanane kulanga kumbele ciindi bantu boonse ibapona anyika nobayoomutembaula Jehova alimwi akwaamba majwi aali mulugwalo lwa Ciyubunuzyo 4:11 aakuti: “Uleelela, Jehova, O Leza wesu, ikutambula bulemu . . . nkaambo nduwe wakalenga zintu zyoonse.” w21.08 19 ¶18-20

Mbwaanga mbeembezi, baalu bajisi mukuli wakupa lulayo ciindi nokuyandika kucita boobo. Beelede kupa lulayo lugwasya, lukulwaizya alimwi ilupa ‘moyo kukondwa.’ (Tus. 27:9) Baalu balabayanda bakwesu abacizyi. Zimwi ziindi balalutondezya luyando oolo, kwiinda mukupa muntu umwi lulayo uuyanda kuleya. (Gal. 6:1) Nokuba boobo, katanabandika amuntu ooyo, mwaalu weelede kusaanguna kuyeeya zintu zimwi mwaapostolo Paulo nzyaakaamba kujatikizya luyando. Wakati, “Luyando lulakkazika moyo alimwi lulaaluzyalo. . . . Lulajatila zintu zyoonse, lulasyoma zintu zyoonse, lulalangila zintu zyoonse, lulaliyumya muzintu zyoonse.” (1Kor. 13:4, 7) Kuzinzibala kuyeeya tupango twamu Bbaibbele ootu kuyoomugwasya mwaalu kulanga-langa twaambo itumupa kupa lulayo alimwi ambwakonzya kulupa munzila iiluzi. Ikuti sikupegwa lulayo wabona kuti mwaalu ulamubikkila maano, ulalangilwa kulutambula. w22.02 14 ¶3; 15 ¶5

Jehova wakalenga bangelo alimwi abantu balondokede. Pele mungelo muzangi Saatani (naa “Sikukazya”) wakoongelezya bantu balondokede, ba Adamu a Eva, kuzangila Jehova. Mpoonya bangelo bamwi alimwi abantu bakamusangana mubuzangi bwakwe. (Jud. 6) Jehova wakausa kapati. Nokuba boobo, waliyumya alimwi uyoozumanana kuliyumya kusikila mane akabanyonyoone bazangi aabo boonse. Eeci ciyooleta zilongezyo zikatalusya kubantu bakwe basyomeka, aabo antoomwe anguwe ibazumanana kuliyumya kuzintu zibyaabi mubweende bwazintu oobu! Saatani wakatamikizya Jobu alimwi ababelesi ba Jehova basyomeka, ikuti bakomba buyo Leza akaambo kazintu nzyabacitila. (Job. 1:8-11; 2:3-5) Diabolosi wazumanana kubejekezya bantu kusikila asunu. (Ciy. 12:10) Tulakonzya kutondezya kuti Saatani mubeji kwiinda mukuliyumya mumasunko eesu, alimwi akuzumanana kusyomeka kuli Jehova akaambo kakuti tulamuyanda. w21.07 9 ¶7-8

Mwaapostolo Paulo wakabelesya cikozyanyo cibotu cituyiisya mbociyandika kapati kucinca bukkale bwesu. Wakalemba kuti tweelede kugagaila buntu bwesu bwakaindi “acisamu.” (Rom. 6:6) Jesu wakalilyaabide kugagailwa acisamu kutegwa akkomanisye Jehova. Mbubonya buyo, andiswe tweelede kuleka bukkale bumwi alimwi azilengwa zitamukkomanisyi Jehova. Lilikke buyo kuti twacita oobo, ndendilyo notukonzya kuba amanjezyeezya aasalala alimwi abulangizi bwakuyoopona mane kukabe kutamani. (Joh. 17:3; 1Pet. 3:21) Jehova takonzyi kucinca zyeelelo zyakwe kutegwa akkomanisye ndiswe. Muciindi caboobo, tweelede kucinca akutobela zyeelelo zyakwe. (Is. 1:17, 18; 55:9) Nociba ciindi nomwamana kubbapatizyigwa, mweelede kuzumanana kulwana kulombozya kubyaabi. Amulombe lugwasyo lwa Jehova akusyoma muuya wakwe ikutali nguzu zyanu. (Gal. 5:22; Flp. 4:6) Tweelede kubeleka canguzu kutegwa tusamunune buntu bwesu bwakaindi akubulekela limwi. w22.03 6 ¶15-17

Jehova usyomezya kuti uyootupa zyakulya, zyakusama alimwi akwakoona ikuti twabikka Bwami bwakwe mubusena bwakusaanguna alimwi akupona kweelana azyeelelo zyakwe ziluleme. (Mt. 6:33) Kuti twacisyoma cisyomezyo eeci, tatukayeeyi kuti zintu zyakumubili zyamunyika eeyi ziyootukwabilila alimwi akutupa lukkomano. Tulizyi kuti nzila ilikke motukonzya kujana luumuno lwini-lwini lwamumizeezo, nkwiinda mukucita kuyanda kwa Jehova. (Flp. 4:6, 7) Nokuba kuti tulijisi mali akuula zintu zinji, tweelede kulanga-langa naa tulijisi ciindi anguzu zyakuzibelesya alimwi akuzilanganya. Sena eeci inga catupa kubikkila kapati maano kuzintu zyesu zyakumubili? Kamuyeeya kuti Leza wakatupa mulimo wakucita mumukwasyi wakwe. Eeci caamba kuti tatweelede kunyonganizyigwa. Mubwini tatuyandi kuba mbuli muntu iwakasweekelwa coolwe cakubelekela Jehova, acakuba umwi wabana bakwe, akaambo buyo kakuti wakali kuyandisya zintu zimwi zyakumubili.—Mk. 10:17-22. w21.08 6 ¶17

Ciindi nomwiiya Magwalo, muyoobuzyiba bube bwa Jehova bwalo bulibonya muzilenge. Kwiiya kujatikizya bube bwa Jehova, kutupa kusinizya kuti nkwali ncobeni. (Kul. 34:6, 7; Int. 145:8, 9) Ciindi nomumuzyiba kabotu-kabotu Jehova, lusyomo alimwi aluyando lwanu ziyooyuma. Amwaambile bamwi zyalusyomo lwanu muli Leza. Pele ino kuti muntu ngomukambaukila wadooneka naa Leza nkwali alimwi tamuzyi cakwaamba? Amusole kujana bwiinguzi bwamu Magwalo kuzwa mumabbuku eesu, akubandika amuntu ooyo. Alimwi mulakonzya kulomba lugwasyo kuzwa kuli Kamboni umwi uusimide. Kufwumbwa naa muntu ooyo ulabuzumina bwiinguzi bwamu Bbaibbele naa pe, nywebo mulagwasyigwa akaambo kakuvwuntauzya. Lusyomo lwanu lulayuma. w21.08 18 ¶14-15

Tacaambi kuti tweelede kwaaba zintu zyoonse nzyotukkomanina kutegwa tumukkomanisye Jehova. (Muk. 5:19, 20) Nokuba boobo, kuti twasala kutacita zintu zinji mumulimo wa Jehova akaambo kakuti tatuyandi kuleka zintu zimwi nzyotukkomanina, tulakonzya kulubizya mbweena bwakacita mwaalumi wamucikozyanyo ca Jesu iwakabeleka canguzu kutegwa ajane zintu zinji akuluba Leza. (Lk. 12:16-21) Ciindi notujana mapenzi, tulapaila kulomba lugwasyo alimwi akuyeeya ncotukonzya kucita. (Tus. 3:21) Jehova ulatulongezya munzila zinji. Tulakonzya kutondezya kuti tulalumba kuzilongezyo eezyo kwiinda mukubeleka kusikila mpotugolela kutegwa atembaulwe. (Heb. 13:15) Eeci cibikkilizya kuyungizya mulimo wesu, calo cikonzya kupa kuti tujane zilongezyo zimbi. Buzuba bumwi abumwi, atusole kulanga nzila mbotukonzya ‘kulabila akubona kuti Jehova mubotu.’ (Int. 34:8) Mpoonya tuyooba mbuli Jesu wakaamba kuti: “Cakulya cangu nkucita kuyanda kwayooyo wakandituma alimwi akumanizya mulimo wakwe.”—Joh. 4:34. w21.08 30-31 ¶16-19

Saatani uyanda kuti tube amuuya wakulisumpula. Ulizyi kuti, ikuti naa twatalika kulisumpula, tuyooba mbuli nguwe akusweekelwa coolwe cakupona kukabe kutamani. Aboobo mwaapostolo Paulo wakacenjezya kuti, muntu inga “walitukumuna akubetekwa mbubonya mbuli Diabolosi.” (1Tim. 3:6, 7) Eeci cilakonzya kucitika kuli umwi aumwi wesu, tacikwe makani naa tuli bapya mukasimpe naa twamubelekela Jehova kwamyaka minji. Kulisumpula ninzila imwi yakuliyanda. Saatani ulasoleka kutupa kuliyanda, kulibikkila maano lwesu kwiinda Jehova, ikapati ciindi notujisi mapenzi. Mucikozyanyo, sena kuli nomwakatamikizyigwa kaambo? Naa sena kuli nomwakacitilwa cakutalulama? Saatani ulakonzya kukkomana kumubona kamupa Jehova mulandu naa bakwesu. Alimwi Diabolosi uyanda kumupa kuyeeya kuti nzila ilikke yakumana mapenzi, nkucita zintu munzila njomuyanda ikutali kutobela busolozi mbwamupa Jehova kwiinda mu Jwi lyakwe.—Muk. 7:16, 20. w21.06 15 ¶4-5

Musinsimi Hagai wakapegwa mulimo uuyandika kapati kuzwa kuli Jehova. Kulangilwa kuti Hagai wakali akati kaba Juda ibakajokela ku Jerusalemu kuzwa mubuzike ku Babuloni mu 537 B.C.E. Mbobakasikila buyo ku Jerusalemu, bakombi ba Jehova aabo basyomeka bakatalika kuyaka ntalisyo yaŋanda ya Jehova naa tempele. (Ezr. 3:8, 10) Pele tiilyakalampa, kwakacitika cintu cuusisya. Bakatyompwa alimwi akucileka kuyaka akaambo kakukazyigwa. (Ezr. 4:4; Hag. 1:1, 2) Aboobo mu 520 B.C.E, Jehova wakatuma Hagai kuti akabukulusye busungu bwaba Juda akubakulwaizya kumanizya kuyaka tempele. (Ezr. 6:14, 15) Mulumbe wa Hagai wakali wakukulwaizya ba Juda kuba alusyomo muli Jehova. Kweelede kuti majwi aakuti “Jehova wamakamu” akabakulwaizya kapati. Jehova nguweendelezya makamu-makamu aabangelo, aboobo ba Juda bakeelede kumusyoma kutegwa bazwidilile. w21.09 15 ¶4-5

Mazuba aano, Bakamboni ba Jehova balatondezyanya luyando lwini-lwini alimwi alukamantano munyika yoonse mboizulwa. Tuliindene azikombelo zimbi zyoonse nkaambo tuli mbuli mukwasyi omwe nokuba kuti tuzwa mumasi alimwi amubukkale bwiindene-indene. Tulalubona luyando lwini-lwini kumiswaangano yesu yambungano, yabbazu alimwi ayacooko. Eeci citugwasya kusinizya ncobeni kuti tukomba Jehova munzila njakkomanina. (Joh. 13:34) Magwalo atukulwaizya ‘kuyandana kapati.’ (1Pet. 4:8) Nzila imwi mbotulutondezya luyando oolo nkwiinda mukulekelelana alimwi akweengelelana akaambo kakutalondoka kwaumwi aumwi. Tulajana zyoolwe zyakutondezya bwaabi alimwi akusamausya bantu boonse mumbungano, nobaba baabo ibakatunyemya. (Kol. 3:12-14) Kuti katutondezya luyando luli boobu, tutondezya kuti tuli Banakristo bakasimpe. w21.10 22 ¶13-14

Sena bubambe bwakugusya muntu mumbungano bulakonzya kugwasya sizibi uuteempwi kuti acince bukkale bwakwe? Inzya. Bakwesu abacizyi banji ibakali kucita zibi zipati bakaamba kuti kugusyigwa mumbungano kwakabagwasya kuyeeya mbobakasakene mukucita cibi, alimwi kwakabagwasya kucinca bukkale bwabo akupiluka kuli Jehova. (Heb. 12:5, 6) Atulange-lange cikozyanyo eeci. Mweembezi wabona kuti mbelele yakwe imwi yaciswa. Ulizyi kuti kusilika mbelele eeyi kuyandika kwiizandula kuzwa mubutanga. Nokuba boobo, mbelele nzinyama zilibedelede. Zilayanda kapati kuba mubutanga, alimwi zilalibilika kuti zyazandulwa kuzyeenzinyina. Pele sena eeci caamba kuti mweembezi ngusilunya ciindi naazandula mbelele eeyo kubutanga? Peepe. Ulizyi kuti, naa waizumizya mbelele eeyo kusangana ambelele zimbi mubutanga, ilakonzya kuyambukizya mbelele zimbi. Aboobo kwiinda mukwiizandula eeyo iicisidwe, ukwabilila butanga boonse. w21.10 10 ¶9-10

Ncoolwe cipati kuba mumukwasyi waluyando wanyika yoonse. Tuyanda kuti bantu banji kapati batusangane mukukomba Leza wesu. Aboobo tatweelede kucita cintu cili coonse icikonzya kupa bantu kuyeeya zintu zibyaabi kujatikizya bantu ba Jehova naa Taateesu wakujulu. Alimwi tulasoleka kulilemeka munzila iikonzya kukwelelezya bantu kumakani mabotu. Zimwi ziindi, bamwi balakonzya kutufwubaazya naa kutupenzya buya akaambo kakuti tumvwida Taateesu wakujulu. Mbuti kuti katuyoowa ciindi notubandika abantu kujatikizya nzyotusyoma? Tweelede kuba alusyomo lwakuti Jehova alimwi a Mwanaakwe banootugwasya. Jesu wakaambila basikwiiya bakwe kuti tiibakeelede kulibilika kujatikizya nzyobakeelede kwaamba. Nkaambo nzi? Jesu wakaamba kuti: “Nkaambo nzyomweelede kwaamba muyoopegwa aciindi eeco, nkaambo tamuli ndinywe nomwaambaula, pele muuya wa Uso nguwaambaula kwiinda mulindinywe.”—Mt. 10:19, 20. w21.09 24 ¶17-18

Awalo Musa wakabelesya majwi ngeena aaya kujatikizya mayubilo. (Int. 90:1 bupanduluzi buyungizyidwe) Kalaafwaafwi kufwa, Musa wakapa cikozyanyo cibotu. Wakalemba kuti: “Leza mayubilo kuzwa kaindi, maanza aakwe aatamani ali kunsi lyako.” (Dt. 33:27) Ino majwi aakuti “maanza aakwe aatamani ali kunsi lyako” atwaambila nzi kujatikizya Jehova? Ciindi Jehova nali mayubilo eesu, tulimvwa kukwabililwa. Pele zimwi ziindi tulakonzya kutyompwa alimwi akuzumanana kulimvwa boobo. Aziindi zili boobo, ncinzi Jehova ncayootucitila? (Int. 136:23) Uyootujatilila amaanza aakwe, kutunyamuna kabotu-kabotu alimwi akutugwasya kwiimikila. (Int. 28:9; 94:18) Kuzyiba kuti lyoonse tulakonzya kusyoma lugwasyo lwa Leza kulatugwasya munzila zyobilo. Yakusaanguna, tacikwe makani ankotukkala, tulizyi kuti Jehova mayubilo eesu. Yabili, Taateesu siluyando ulatubikkila maano kapati. w21.11 6 ¶15-16

Jesu wakalizyi kuti kweendelezyegwa cakutalulama kwakali kunoosunka lusyomo lwabasikwiiya bakwe. Kutegwa abagwasye kuliyumya, wakapa cikozyanyo icilembedwe mubbuku lya Luka. Jesu wakabaambila kujatikizya mukamufwu iwakazumanana kukwiilila mubetesi uutaluleme kuti akoswedwe makani cakululama. Wakalijisi lusyomo lwakuti kuzumanana kwakwe kulomba takukonzyi kuba kwabuyo. Mukuya kwaciindi, mubetesi wakakumvwa kulila kwakwe. Ino twiiya nzi? Jehova uliluleme. Mpoonya Jesu wakaamba kuti: “Aboobo sena Leza takaboni kuti basale bakwe ibamukwiilila isyikati amasiku bakoswedwa cabululami makani?” (Lk. 18:1-8) Kumane Jesu wakayungizya kuti: “Mwanaamuntu aakuboola, sena masimpe uyoolujana lusyomo oolu anyika?” Ciindi notweendelezyegwa cakutalulama, tweelede kutondezya kuti tulijisi lusyomo luyumu mbuli lwamukamufwu uulya kwiinda mukukkazika moyo alimwi akuzumanana kupaila. Katujisi lusyomo luli boobo, tulakonzya kusinizya kuti nolilampa buti, Jehova uyootugwasya. Alimwi tweelede kusyoma nguzu nzyoujisi mupailo. w21.11 23 ¶12; 24 ¶14

Nobakubusi, sena zimwi ziindi mulimvwa kuti zyeelelo zya Jehova tazimupi lwaanguluko? Saatani uyanda kuti kamuyeeya boobo. Uyanda kuti mubikkile maano kuli zyeezyo nzyobacita aabo ibeendela munzila mpati, nkaambo cilibonya mbuli kuti bapona buumi bubotu kapati. Ulakonzya kubelesya zintu nzyobacita beenzinyoko kucikolo naa nzyomubona aa Intaneti kumupa kulimvwa kuti mwiindwa zintu zibotu. Saatani uyanda kuti kamuyeeya kuti zyeelelo zya Jehova zimupa kutapona buumi bukkomanisya. Pele amuyeeye kaambo aaka: Saatani tayandi kuti aabo beendela munzila yakwe babone iziyoobacitikila kumamanino aalweendo. (Mt. 7:13, 14) Mukwiimpana, Jehova wamutondezya kabotu-kabotu zintu nzyababambilide aabo ibazumanana kweendela munzila iitola kubuumi.—Int. 37:29; Is. 35:5, 6; 65:21-23. w21.12 23 ¶6-7

Tulizyi kuti tweelede kulekelela bamwi, alimwi ncecintu ciluzi. Pele cilakonzya kutuyumina kucita boobu. Mwaapostolo Petro awalo mbwaakali kulimvwa mbweena oobu zimwi ziindi. (Mt. 18:21, 22) Ncinzi cikonzya kugwasya? Cakusaanguna, amuzinzibale kuyeeya kujatikizya Jehova mbwaakamulekelela nywebo. (Mt. 18:32, 33) Tatweeleli buya kulekelelwa anguwe, pele walo ulacita oobo cakuliyandila. (Int. 103:8-10) Aciindi ncimunya, “andiswe tweelede kuyandana.” Aboobo kulekelela bamwi tacili cintu cakulisalila buya. Tuleelede kubalekelela bakwesu abacizyi. (1Joh. 4:11) Cabili, amuzinzibale kuyeeya cicitika ciindi notulekelela bamwi. Tulakonzya kumugwasya muntu wakatulubizyila, kupa lukamantano mumbungano, kukwabilila cilongwe cesu a Jehova, akupa kuti tulimvwe kwaanguluka. (2Kor. 2:7; Kol. 3:14) Camamanino, amupaile kuli Yooyo uutwaambila kulekelela bamwi. Mutamuzumizyi Saatani kunyonganya cilongwe ncomujisi abakwesu abacizyi. (Ef. 4:26, 27) Tweelede kugwasyigwa a Jehova kutegwa tube aluumuno mumbungano. w21.06 22 ¶11; 23 ¶14

Davida wakali kutija kujaigwa. Saulo, mwami singuzu wa Israyeli, wakakanzide kumujaya. Ciindi Davida naakali kuyanda cakulya, wakaunka ku Nobi, akulomba buyo zinkwa zyosanwe. (1Sam. 21:1, 3) Mpoonya walo abaalumi bakwe bakaakuyuba mumpangala. (1Sam. 22:1) Mbuti Davida mbwaakalijana mubukkale oobu? Saulo wakali kumufwida munyono kapati Davida akaambo kakuti bantu banji bakali kumuyanda Davida alimwi akumutembaula akaambo kakuzunda munkondo zinji. Kuyungizya waawo, Saulo wakalizyi kuti kutamvwida kwakwe nkokwakapa kuti Jehova amukake kuba mwami wa Israyeli akuti Jehova wakasala Davida kuba mwami. (1Sam. 23:16, 17) Pele mbwaanga wakali mwami wa Israyeli, Saulo wakajisi nkamu mpati yabasikalumamba abasikumugwasyilizya banji, aboobo Davida wakeelede kutija kutegwa atajaigwi. Sena Saulo wakali kuyeeya kuti wakali kukonzya kunyonganya makanze aa Leza kujatikizya Davida? (Is. 55:11) Bbaibbele talyaambi pe, pele tulakonzya kuba masimpe kujatikizya kaambo aaka: Saulo wakali kulibikka muntenda. Aabo balwana Leza lyoonse tabazwidilili. w22.01 2 ¶1-2

Jesu wakabeleka canguzu mumulimo. Wakatondezya luyando lwakwe kubantu kwiinda mukuzumanana kubayiisya aciindi cili coonse. (Lk. 19:47, 48) Ncinzi cakamukulwaizya kucita boobo? Jesu wakabafwida lubomba. Zimwi ziindi, bantu banji bakali kuyandisya kapati kumvwa majwi aa Jesu cakuti walo alimwi abasikwiiya bakwe bakali ‘kwaalilwa akulya.’ (Mk. 3:20) Alimwi ciindi muntu umwi naakali kuyanda kubandika a Jesu masiku, wakalilibambilide kuswaangana anguwe aciindi eeco. Bunji bwabantu ibakasaanguna kumuswiilila Jesu kunyina nobakaba basikwiiya bakwe. Pele boonse ibakamuswiilila bakakambaukilwa cakulomya. Mazuba aano tuyanda kupa bantu boonse coolwe cakumvwa makani mabotu. (Mil. 10:42) Kutegwa tucite oobo, inga twayandika kucinca-cinca nzila mbotukambauka. Tatweelede buyo kukambauka ciindi swebo ncotuyanda, pele tweelede kulisungula kucinca mulongo wesu kutegwa katukambauka ciindi notukonzya kubajana bantu. Ikuti twacita boobo, tulakonzya kuba masimpe kuti Jehova uyookkomana. w22.01 17 ¶13-14

Bantu banji cilabayumina kubasyoma aabo bali mubweendelezi. Kayi balalibonena kuti mfwulumende alimwi amilawo zikwabilila buyo baabo bavwubide abalaanguzu, pele bacete tabalanganyizyigwi pe. Kuyungizya waawo, basololi bazikombelo bamwi bacita zintu zibyaabi, calo cipa kuti bamwi bantu bacileke kumusyoma Leza. Aboobo ciindi notwiiya Bbaibbele amuntu umwi, atumugwasye kusyoma Jehova alimwi abaabo mbasalide kusololela aano aanyika. Nokuba boobo, tabali basikwiiya Bbaibbele balikke beelede kwiiya kusyoma Jehova alimwi ambunga yakwe. Nokuba kuti twamubelekela Jehova myaka minji, tatweelede kuleka kusyoma kuti lyoonse ucita ziluzi. Zimwi ziindi, kulaba bukkale bumwi bukonzya kusunka lusyomo lwesu muli Jehova. w22.02 2 ¶1-2