May

Kutegwa atugwasye kumuzyiba kabotu Mwanaakwe, caluyando Jehova wakabikkilizya Mabbuku aa Makani Mabotu one, mu Jwi lyakwe aamba buumi amulimo wa Jesu. Mabbuku aaya alatwaambila nzyaakaamba Jesu, nzyaakacita alimwi ambwaakali kulimvwa. Mabbuku aaya one alatugwasya ‘kuyeeyesya’ cikozyanyo ca Jesu. Munzila imwi, ajisi mikondo njaakatusiila Jesu. Aboobo kwiinda mukulanga-langa Mabbuku aa Makani Mabotu aaya, tulakonzya kumuzyiba kabotu Jesu. Ikuti twacita oobo, tulakonzya kwiitobelesya mikondo yakwe. Kutegwa tugwasyigwe kapati a Mabbuku aa Makani Mabotu aaya, tweelede kucita zinji muciindi cakwaabala buyo. Tweelede kujana ciindi cakwaabala cakulomya alimwi akuzinzibala kuyeeya. (Amweezyanisye Joshua 1:8, bupanduluzi buyungizyidwe) Nzyomubala mu Mabbuku aa Makani Mabotu amuzibone kuti zyakacitika ncobeni. Amweezeezye kuti mulizibwene alimwi akuzimvwa izyakali kucitika. Amuvwuntauzye mumabbuku aamwaigwa ambunga ya Jehova. w21.04 4-5 ¶11-13

Kakucili myaanda yamyaka katanasika anyika Jesu, Jehova wakayubununa mu Jwi lyakwe kuti Mesiya wakali kuyakwaabwa amali aansiliva aali 30. (Zek. 11:12, 13) Sikumwaaba wakali kuyooba umwi wabalongwe bakwe. (Int. 41:9) Musinsimi Zekariya awalo wakasinsima kuti: “Komuuma mweembezi, kutegwa mbelele zimwaike.” (Zek. 13:7) Muciindi cakumukaka Jesu akaambo kazintu eezyi, babombe myoyo bakeelede kuyumizyigwa kwiinda mukubona businsimi oobu bwaamba Jesu kabuzuzikizyigwa. Sena tulalibona penzi eeli amazuba aano? Inzya. Mumazuba eesu, Bakamboni basyoonto ibakali amikuli bakazwa mukasimpe akuba basiluleyo alimwi akusola kupa kuti Bakamboni bamwi babasangane. Balamwaya malipooti aataluzi, aatajisi bumboni bukkwene alimwi akwaamba makani aakubeja kujatikizya Bakamboni ba Jehova kwiinda mukubelesya sikapepele alimwi a Intaneti. Pele babombe myoyo kunyina nobalebwa. Muciindi caboobo, balizyi kuti Bbaibbele lyakasinsima kuti zintu zili boobu ziyoocitika.—Mt. 24:24; 2Pet. 2:18-22. w21.05 11 ¶12; 12-13 ¶18-19

Magwalo alacisalazya kuti luzyibo lwini-lwini lulavwula mukuya kwaciindi. (Kol. 1:9, 10) Jehova ulayubununa kasimpe aasyoonto-syoonto, alimwi tweelede kulisungula kulindila cakukkazika moyo kutegwa mumuni wakasimpe umwekesye. Ciindi aabo basololela nobabona kuti kumvwisya kwesu mumakani amwi aajatikizya kasimpe kuyandika kusalazyigwa, tabawayi-wayi kucinca. Nokuba kuti basizikombelo banji mu Bunakristo Bwanyika balacinca zintu kutegwa bakkomanisye bantu babo naa kuti bapange cilongwe anyika, kucinca kupangwa ambunga ya Jehova kugwasya bantu kuba acilongwe ciyumu a Leza alimwi akutobela nzila yabukombi iyakatalisyigwa a Jesu. (Jak. 4:4) Kucinca ooku takucitwi akaambo kakuti mizeezo yabantu munyika yacinca, pele kulacitwa akaambo kakulimvwisya kabotu Bbaibbele. Eelo kaka tulakayanda kasimpe!—1Tes. 2:3, 4. w21.10 22 ¶12

Ncinzi ncomukonzya kucita kuti kamulimvwa kulendelelwa? Amuyeeye mbwamugwasya Jehova. (Int. 55:22) Kucita boobu kuyoomugwasya kububona munzila yeelede bukkale bwanu. Alimwi amuyeeye Jehova mbwabagwasya basyomima ibalendelelwa. (1Pet. 5:9, 10) Mukwesu Hiroshi, walo kwamyaka minji iwali Kamboni alikke mumukwasyi wakaamba kuti: “Kuzyiba kuti toonse tulasoleka kusikila mpotugolela kubelekela Jehova kulakonzya kutukulwaizya swebo notuli tolikke mukasimpe.” Alimwi amuzumanane kuba acilengwa cakucita zintu zyakumuuya. Eeci caamba kumwaambila Jehova bwini mbomulimvwa. Amubale Jwi lya Leza abuzuba, akuzinzibala kuyeeya zibalo zigaminide izitondezya kuti Jehova ulamuyanda. Banakristo bamwi balaswata magwalo aawumbulizya, mbuli lugwalo lwa Intembauzyo 27:10 alimwi a Isaya 41:10. Bamwi bajana kuti kuswiilila zibeela zyakalekkoodwa ciindi nobalibambila miswaangano naa nobabala Bbaibbele kulabagwasya kucesya-cesya kulendelelwa. w21.06 9-10 ¶5-8

Sena mulalila akaambo kamuyandwa wanu iwakafwa? Amujane ciindi cakuyumya lusyomo lwanu mubulangizi bwabubuke kwiinda mukubala zibalo zyamu Bbaibbele zyabaabo bakabusyigwa. Sena muluuside akaambo kuti munamukwasyi wakagusyigwa mumbungano? Kamubala kutegwa mulibonene kuti nzila ya Leza yakupa lulayo lyoonse njeyiinda kubota. Kufwumbwa penzi ndyomujisi, amulibone kuba coolwe cakuyumya lusyomo lwanu. Amumwaambile Jehova bwini mbomulimvwa. Mutanikulizanduli, muciindi caboobo, amukakatile kubakwesu abacizyi. (Tus. 18:1) Amutole lubazu muzintu zikonzya kumugwasya kuliyumya, nokuba kuti mulacita oobo kumwi kamulila. (Int. 126:5, 6) Kamuzumanana kujanika kumiswaangano, kukambauka alimwi akubala Bbaibbele. Alimwi amubikkile maano kuzilongezyo zibotu Jehova nzyamubambilide kumbele. Ciindi nomubona Jehova mbwamugwasya, lusyomo lwanu mulinguwe luyooyuma kapati. w21.11 23 ¶11; 24 ¶17

Muunzila nzi basikwiiya ba Jesu mobali mbuli “basyoonto aaba”? Mubwini, ino mbaani nyika mboibona kuti balayandika? Mbantu bavwubide, ibali aampuwo, alimwi abaabo balaanguzu. Mukwiimpana, basikwiiya ba Jesu babonwa kuti mbantu batayandiki, ibatakwe mulimo alimwi “basyoonto.” (1Kor. 1:26-29) Pele Jehova tabusyi mbwababona oobo. Ncinzi cakapa Jesu kubandika kujatikizya “basyoonto aaba”? Basikwiiya bakwe bakamubuzya kuti: “Ino nguni mupati kwiinda boonse mu Bwami bwakujulu?” (Mt. 18:1) Ba Juda banji kuciindi eeco bakali kubona zyuuno alimwi ampuwo kuti zyakali kuyandika kapati. Syaazibwene umwi wakaamba kuti: “Kuyandisya kupegwa bulemu alimwi ampuwo nzyezintu izyakali kuyandika kapati mubuumi bwabo.” Jesu wakalizyi kuti basikwiiya bakwe bakeelede kubeleka canguzu kutegwa bagusye muuya wakuzundana mumoyo wabo iwakadumide mucilengwa caba Juda. w21.06 20 ¶2; 21 ¶6, 8; 22 ¶9

Mwaapostolo Paulo wakapa cikozyanyo cibotu kali mwaalu. Mucikozyanyo, ciindi bakwesu baku Tesalonika nobakali kuyandika lulayo, Paulo kunyina naakawayawaya kubapa. Nokuba boobo, mulugwalo ndwaakabalembela, wakasaanguna kubalumba akaambo kamulimo wabo walusyomo, kubeleka kwabo kwaluyando alimwi akuliyumya kwabo. Kuyungizya waawo, wakalibuzyi bukkale bwabo, wakabaambila kuti wakalizyi kuti buumi bwabo tabuli buuba-uba alimwi akuti bakali kuliyumya kukupenzyegwa. (1Tes. 1:3; 2Tes. 1:4) Mane buya wakabaambila bakwesu aaba kuti bakali cikozyanyo cibotu ku Banakristo bamwi. (1Tes. 1:8, 9) Eelo kaka bakakulwaizyigwa kapati amajwi aa Paulo aakubalumbaizya! Tacidoonekwi buya kuti Paulo wakali kubayanda kapati bakwesu aaba. Nkakaambo kaako wakacikonzya kupa lulayo lugwasya mumagwalo ngaakabalembela.—1Tes. 4:1, 3-5, 11; 2Tes. 3:11, 12. w22.02 15 ¶6

Saatani ubelesya basololi bazikombelo zyakubeja kwaamba kuti Jehova ngusilunya akuti nguupa kuti bantu kabapenga. Mane buya bamwi baamba kuti ciindi bana nobafwa, Leza ulababweza nkaambo uyanda kuyungizya bangelo kujulu. Eelo kaka ooku nkumusampaula Leza! Pele swebo tulizyi kuti Jehova ngu Taata siluyando. Ciindi notuciswa bulwazi bupati naa kufwidwa muyandwa, kunyina notumupa mulandu Leza wesu. Muciindi caboobo, tulijisi lusyomo lwakuti bumwi buzuba, uyoozibambulula zintu. Aboobo tulakonzya kubaambila boonse aabo ibayanda kuswiilila kuti Jehova ngu Leza siluyando. Mpoonya Jehova ulakonzya kumuvwiila ooyo uumusampaula. (Tus. 27:11) Jehova ngu Leza silweetelelo. Ulausa kapati ciindi nabona katupenga ambweni akaambo kakuciswa, kutalondoka kwesu naa kupenzyegwa. (Int. 22:23, 24) Jehova ulaazyi kabotu mapenzi eesu; ulayanda kwaamana, alimwi uyakwaamana.—Amweezyanisye a Kulonga 3:7, 8; Isaya 63:9. w21.07 9-10 ¶9-10

Lino-lino, bantu bamvwida bayookkomana acoolwe ciinda zyoonse, coolwe cakumuyanda alimwi akumukomba Jehova mane kukabe kutamani! Jesu uyakwaamana mapenzi oonse aakaletwa akaambo kakusala nkobakacita ba Adamu a Eva, ikuzwa mumukwasyi wa Leza. Jehova uyoobusya bantu banji akubapa coolwe cakupona buumi butamani ibulondokede anyika iyoobambululwa kuba paradaiso. (Lk 23:42, 43) Ciindi bantu babelekela Jehova baakulondoka, bayooba ‘abulemu alimwi abweebesi’ mbwaakalemba Davida. Ikuti kamuli cibeela ‘cankamu mpati,’ mujisi bulangizi bubotu kapati. (Ciy. 7:9) Leza ulamuyanda; alimwi uyanda kuti mube cibeela camukwasyi wakwe. Aboobo amubeleke canguzu kutegwa mumukkomanisye. Buzuba abuzuba, kamuziyeeya zisyomezyo zya Leza. Amutondezye kulumba kucoolwe cakukomba Taateesu wakujulu alimwi abulangizi bwakumutembaula mane kukabe kutamani. w21.08 7 ¶18-19

Musinsimi Jeremiya wakakambauka kwamyaka minji nokuba kuti bantu bakali kumukazya alimwi tiibakali kubikkila maano. Wakatyompwa kapati akaambo ‘kakutukilwa akuweelwa’ kuzwa kuli basikumukazya cakuti wakayeeya kuti acileke mulimo wakwe. (Jer. 20:8, 9) Pele Jeremiya tanaakacileka pe! Ino ncinzi cakamugwasya kuzunda mizeezo yakwe iilubide alimwi akujana lukkomano mumulimo wakwe? Wakabikkila maano kutwaambo tobilo tuyandika kapati. Kakusaanguna, mulumbe wa Leza Jeremiya ngwaakali kukambaukila bantu wakali kujatikizya “buumi bwakumbele bubotu alimwi abulangizi.” (Jer. 29:11) Kabili, Jehova wakabikkide zina lyakwe aali Jeremiya. (Jer. 15:16) Mbubwenya buyo andiswe, tukambauka mulumbe uupa bulangizi munyika iityompya, alimwi twiitwa zina lya Jehova mbotuli Bakamboni bakwe. Ciindi notubikkila maano kutwaambo tuyandika kapati, tulakonzya kukkomana tacikwe makani ambobautambula mulumbe bantu. Aboobo mutatyompwi naa kucileka ikuti kuyaambele kwabasikwiiya Bbaibbele banu kwatola ciindi cilamfwu kwiinda mbomwali kulangila. Kugwasya bantu kuba basikwiiya kuyandika kukkazika moyo.—Jak. 5:7, 8. w21.10 27 ¶12-13

Tacikwe makani abulamfwu bwaciindi ncotwamubelekela Jehova, tweelede kuzumanana kuyumya lusyomo lwesu mulinguwe. Nkaambo nzi? Nkaambo kuti naa tiitwacenjela lusyomo lwesu lulakonzya kumana. Kamuyeeya kuti, lusyomo mbumboni bwazintu zini-zini zitalibonyi. Ncuuba-uba kuziluba zintu nzyotutaboni. Nkakaambo kaako, Paulo wakaamba kuti kubula lusyomo “ncibi cifwambaana kutuzambaila.” Aboobo, ino mbuti mbotukonzya kuluyumya lusyomo lwesu? (2Tes. 1:3) Cakusaanguna, amulombe muuya uusalala wa Jehova, alimwi kamucita oobo lyoonse. Nkaambo nzi? Nkaambo lusyomo ncibeela camucelo wamuuya uusalala. (Gal. 5:22, 23) Tatukonzyi kuyumya lusyomo lwesu mu Mulengi kakunyina kugwasyigwa amuuya wakwe uusalala. Kuti twazumanana kulomba muuya uusalala wa Jehova, uyootupa. (Lk. 11:13) Mubwini, tweelede kupaila kuti: “Kotuyungizyila lusyomo.” (Lk. 17:5) Kuyungizya waawo, lyoonse kamucita ciiyo canu nobeni ca Jwi lya Leza.—Int. 1:2, 3. w21.08 18-19 ¶16-18

Bacembeede balakonzya kubelesyegwa mumbunga ya Jehova munzila zinji. Nokuba kuti ambweni tabacijisi nguzu, balijisi luzyibo lunji ndobakajana kwamyaka minji. Jehova ulakonzya kuzumanana kubabelesya mumbazu ziindene-indene. Mucikozyanyo, Bbaibbele lilatwaambila zikozyanyo zibotu zyabantu basyomeka ibakamubelekela Jehova cakusyomeka mubucembele bwabo. Mucikozyanyo, Musa wakajisi myaka iili 80 ciindi naakatalika kubeleka kali musinsimi wa Jehova alimwi mwiiminizi wacisi ca Israyeli. Ciindi Daniele naakajisi myaka yakuma 90, Jehova wakacili kumubelesya kali musinsimi wakwe. Awalo mwaapostolo Johane kweelede kuti wakajisi myaka yakuma 90 ciindi naakasololelwa amuuya kulemba bbuku lya Ciyubunuzyo. Mwaalumi “mululami alimwi mukombi” Simeoni waambidwe buyo asyoonto mu Bbaibbele, pele Jehova wakalimuzyi kabotu-kabotu alimwi wakamupa coolwe cakubona muvwanda Jesu akusinsima kujatikizya mwana ooyo abanyina.—Lk. 2:22, 25-35. w21.09 3-4 ¶5-7

Bazyali tabeelede kweezyanisya mwana umwi kuluumwi, naa kumwaambila kucita cintu ncatakonzyi. Kuti bazyali bacita boobo, balakonzya kumutyompya mwanaabo. (Ef. 6:4) Mucizyi Sachiko wakaamba kuti: “Bamaama bakali kayanda kuti twalemba musunko kandijana 100 pesenti, calo icatakali kukonzyeka. Nokuba kuti ndakamanizya cikolo myaka minji yainda, zimwi ziindi inga ndilimvwa kuti Jehova ambweni taukkomanini mulimo wangu ngondimubelekela.” Mwami Davida wakaamba kuti, ‘kunyina naakali kulombozya zintu zipati kapati’ naa zintu nzyaatakali kukonzya kujana. Kulicesya alimwi akulibombya kwakwe, ‘zyakamuumbulizya akumuumuzya.’ (Int. 131:2) Ncinzi bazyali ncobakonzya kwiiya kumajwi aa Davida? Bazyali balakonzya kulicesya alimwi akulibombya kutali buyo kuzintu nzyobalombozya lwabo, pele alimwi anzyobalombozya kubana babo. Bazyali balakonzya kumwaambila mwanaabo zintu nzyakonzya kucita alimwi anzyatakonzyi ciindi nobamugwasya kulibikkila mbaakani nzyakonzya kuzuzikizya. w21.07 21-22 ¶5-6

Tweelede kuyeeya kuti aumwi Jehova wakamupa coolwe cakulisalila. Eeci caamba kuti tulakonzya kusala kumumvwida naa pe. Bana bamwi tiibakajisi bazyali ibakali cikozyanyo cibotu, pele basala kubelekela Jehova alimwi akuzumanana kusyomeka kulinguwe. Bamwi ibajisi bazyali ibakabeleka canguzu kubayiisya kuyanda Jehova, kumbele bakacileka kumubelekela. Aboobo umwi aumwi wesu weelede kulisalila kumubelekela Jehova. (Jos. 24:15) Aboobo, nobazyali nomuuside akaambo kakuti mwanaanu wakacileka kubelekela Jehova, mutanikulipi mulandu pe. Zimwi ziindi, muzyali ulakonzya kukasiya kasimpe nouba mukwasyi wakwe buya. (Int. 27:10) Eeci cilakonzya kubatyompya bana kuti naa bali kubona bazyali babo kuba cikozyanyo cibotu. Nobana, ikuti bazyali banu bagusyigwa mumbungano, amusyome kuti awalo Jehova ulizyi nywebo mbocimucisa eeci. Ulamuyanda akumulumba akaambo kakusyomeka kwanu. Alimwi amuyeeye kuti tamujisi mulandu akaambo kakusala kwabo. w21.09 27 ¶5-7

Ciindi Munakristo naagusyigwa mumbungano, tulakonzya kumukozyanisya kumbelele iiciswa bulwazi buyambukila iikonzya kuyambukizya zimwi. Ulaciswa kumuuya. (Jak. 5:14) Kuciswa kumuuya, mbubwenya mbuli malwazi aambi buyo, kulayambukila kapati. Aboobo cileelela zimwi ziindi kumuzandula muntu ooyo uuciswa kumuuya kuzwa mumbungano. Ooku kulaigwa kutondezya luyando ndwajisi Jehova kubantu basyomeka bali mumbungano alimwi cilakonzya kugwasya sikubisya kuliyeeya akweempwa. Ciindi nagusyidwe, muntu ooyo ulakonzya kujanika kumiswaangano, kwalo nkwanootambula malailile aamu Bbaibbele aakonzya kuyumya lusyomo lwakwe alimwi. Kuyungizya waawo, inga ulaangulukide kutambula mabbuku alimwi akweebelela JW Broadcasting^®. Ciindi baalu nobabona kuti uyaabucinca mubukkale bwakwe, ciindi aciindi balakonzya kumupa lulayo lukonzya kumugwasya kubambululula cilongwe cakwe a Jehova, kutegwa akapilusyigwe mumbungano mbuli umwi wa Bakamboni ba Jehova. w21.10 10 ¶9, 11

Mazuba aano, tutobela nzila yabukombi yambungano ya Banakristo bamumwaanda wamyaka wakusaanguna. Mucikozyanyo, mboibambidwe mbunga yesu, yalo iibikkilizya balangizi beendeenda, baalu alimwi abakutausi, itondezya bubambe ibwakatalisyigwa abaapostolo mumwaanda wamyaka wakusaanguna. (Flp. 1:1; Tit. 1:5) Mbotwaabona makani aakoonana alimwi alukwatano, mbotubulemeka bulowa akaambo kakuti bulisetekene alimwi aluyandisisyo ndotujisi lwakukwabilila mbungano kuli basizibi ibateempwi, zyoonse ziyeeme anzila yabukombi yamumwaanda wamyaka wakusaanguna. (Mil. 15:28, 29; 1Kor. 5:11-13; 6:9, 10; Heb. 13:4) Bbaibbele lilatwaambila cakutainda mumbali kuti kuli buyo “lusyomo lomwe” ndwakkomanina Leza. (Ef. 4:4-6) Eelo kaka ncoolwe cipati njotujisi cakuba bantu ba Jehova alimwi akuzyiba kasimpe kujatikizya makanze aakwe! Aboobo atuzumanane kusinizya kuti tujisi kasimpe. w21.10 22-23 ¶15-17

Mwami Jehosafati wakasikilwa penzi lipati. Impi mpati yabana Amoni, bana Moabu alimwi abaalumi bamumalundu aa Seiri bakamukonga walo, mukwasyi wakwe abantu bakwe. (2Mak. 20:1, 2) Ino ncinzi ncaakacita Jehosafati? Wakalomba Jehova kuti amugwasye alimwi akumuyumya. Mupailo Jehosafati ngwaakapaila cakulicesya, uulembedwe kulugwalo lwa 2 Makani 20:5-12, ulatondezya mbwaakali kumusyoma kapati Usyi wakujulu siluyando. Jehova wakabandika a Jehosafati kwiinda muli Jahazieli, imu Levi akwaamba majwi aali mulugwalo lwabuzuba bwasunu. Kasyomede kapati muli Leza wakwe, Jehosafati wakacita kweelana ambwaakaambilwa. Ciindi walo abantu bakwe nobakaunka kuyooswaangana abasinkondonyina, kumbele lyabasikalumamba bakwe tanaakabikka basikalumamba bacibwene, pele wakabikka baimbi ibatakajisi zilwanyo. Jehova kunyina naakamulekelezya Jehosafati; wakaizunda mpi yabasinkondonyina.—2Mak. 20:18-23. w21.11 15-16 ¶6-7

Ciindi notujisi mapenzi, tulakonzya kuba alusyomo lwakuti Jehova uyootupa lugwasyo ndotuyandika kutegwa tuzumanane kusyomeka kulinguwe. (2Kor. 4:7-9) Tulakonzya kuba alusyomo lwakuti Jehova uyoozumanana kutondezya luyando lutamani kulindiswe nkaambo sintembauzyo utwaambila kuti, “Liso lya Jehova lilangide baabo bamuyoowa, aabo ibalangila luyando lwakwe lutamani.” (Int. 33:18-22) Nitwatakaningatalika kumubelekela Jehova, twakali kugwasyigwa aluyando oolo Leza ndwatondezya kubantu boonse. Nokuba boobo, mbwaanga tuli bakombi bakwe, tulagwasyigwa aluyando lwakwe lutamani. Kakulwaizyigwa aluyando oolu, Jehova ulatukumbata amaanza aakwe aalukwabililo. Uyoozumanana kutukwelela kulinguwe alimwi akuzuzikizya makanze aakwe kujatikizya ndiswe. Uyanda kuti tuzumanane kuba balongwe bakwe mane kukabe kutamani. (Int. 46:1, 2, 7) Aboobo, kufwumbwa mapenzi ngotukonzya kujana, Jehova uyootupa nguzu nzyotuyandika kutegwa tuzumanane kusyomeka kulinguwe. w21.11 7 ¶17-18

Tobanabunji tulizyi kujatikizya muntu umwi iwakaba amfwundiilili kumubelesinyina, sicikolonyina naa munamukwasyi, ambweni kwamyaka minji buya. Amuyeeye kuti banabokwabo Josefa bali kkumi bakaba amfwundiilili kuli Josefa, calo kumamanino icakabapa kucita cintu cibyaabi kapati. (Matl. 37:2-8, 25-28) Pele walo Josefa kunyina naakabajolela cibi. Ciindi naakeelede kucita boobo kubanabokwabo, wakabafwida luse. Josefa kunyina naakaba amfwundiilili. Muciindi caboobo, wakacita kweelana alulayo iluli ku Levitiko 19:18. (Matl. 50:19-21) Banakristo ibayanda kukkomanisya Leza beelede kumwiiya Josefa, iwakabalekelela banabokwabo muciindi cakubapilusizya cibi. Jesu utwaambila kubalekelela aabo batubisyila. (Mt. 6:9, 12) Mbubwenya buyo, mwaapostolo Paulo wakakulwaizya Banakristonyina kuti: “Nobayandwa, mutapilusizyi muntu cibi.”—Rom. 12:19. w21.12 11 ¶13-14

Kumangolezya mu Nisani 14, 33 C.E., Jesu wakaunka kumuunda wa Getesemane. Okuya wakapaila kuli Jehova camoyo woonse. (Lk. 22:39-44) Aciindi eeco icakali kukatazya kapati, Jesu “wakapaila mipailo yakukombelezya . . . kacita boobo cakulila kapati akuzwa misozi.” (Heb. 5:7) Ncinzi Jesu ncaakapailila mubusiku oobo bwamamanino katanafwa? Wakapaila kulomba nguzu kutegwa azumanane kusyomeka kuli Jehova akucita kuyanda kwakwe. Jehova wakauswiilila mupailo wa Mwanaakwe uuzwa ansi amoyo, aboobo wakatuma mungelo kuzoomuyumya-yumya. Jesu wakaluuzyi mukuli mupati ngwaakajisi, nkokuti wakusumpula zina lya Bausyi. Jehova wakakuswiilila kulomba kwa Jesu kuzwa ansi amoyo. Nkaambo nzi? Akaambo kakuti makanze mapati aa Jesu akali aakuzumanana kusyomeka kuli Bausyi alimwi akusumpula zina lyabo. Ikuti naa makanze eesu mapati kaakozyenye ayaaya, Jehova uyakwiingula mipailo yesu yakulomba lugwasyo.—Int. 145:18. w22.01 18 ¶15-17

Bantu banji mazuba aano tabatuyandi nkaambo tatutoli lubazu mumapolitikisi. Bayanda kuti katuvwoota. Nokuba boobo, kuti twasala mweendelezi muntunsi kuba mweendelezi wesu, nkokuti twamukaka Jehova. (1Sam. 8:4-7) Kuyungizya waawo, bantu banji balimvwa kuti tweelede kuyaka zikolo alimwi azibbadela kutegwa tugwasye banamaleya. Balaukaka mulumbe wesu nkaambo tubikkila kapati maano kumulimo wakukambauka, muciindi cakujana nzila yakumana mapenzi ngobajisi bantu. Ncinzi ncotweelede kucita kutegwa tutalebwi? (Mt. 7:21-23) Cintu cipati ncotweelede kubikkila maano nkucita mulimo ngwaakatulailila kucita Jesu. Tatweelede kunyonganyizigwa atwaambo twamapolitikisi twamunyika. Tulabayanda bantu akulibilika kujatikizya mapenzi aabo, pele tulizyi kuti nzila mbotu yakubagwasya nkwiinda mukubayiisya kujatikizya Bwami bwa Leza alimwi akubagwasya kuba acilongwe a Jehova. w21.05 7 ¶19-20

Nokuba kuti bunji bwabeendelezi bamfwulumende mazuba aano balitaminina kukomba Leza, tabayandi kuleka kweendelezya. Aboobo mbubwenya mbuli beendelezi bamumazuba aa Jesu, beendelezi bamazuba aano balamukazya Munanike wa Jehova kwiinda mukulwana basikumutobela basyomeka. (Mil. 4:25-28) Ncinzi Jehova ncacita? Intembauzyo 2:10-12 iingula kuti: “Aboobo nywebo nobami, amusongwaale; amuzumine kululamikwa, nywebo nobabetesi baanyika. Amumubelekele Jehova cakuyoowa, alimwi amukondwe akukankama. Amumulemeke mwana, buyo-buyo Leza ulakalala aboobo mulaloba munzila, nkaambo bukali bwakwe bubuka buyo. Balikkomene aabo boonse ibayuba mulinguwe.” Jehova ngusiluzyalo alimwi wabapa ciindi cakuti basale ciluzi. Balakonzya kucinca mizeezo yabo alimwi akuzumina Bwami bwa Jehova. Nokuba boobo, ciindi ciyaabumana. (Is. 61:2) Eelo kaka cakufwambaana bantu beelede kwiiya kasimpe akusala kubelekela Jehova! w21.09 15-16 ¶8-9

Paulo waamba kuti tweelede kukkutila azintu zyakumubili zili zyoonse nzyotujisi. (Flp. 4:12) Cintu ciyandika kapati ncotujisi ncilongwe cesu a Leza, ikutali cintu cili coonse cakumubili ncotujisi. (Hab. 3:17, 18) Amubone Musa ncaakaambila bana Israyeli nobakakkala myaka iili 40 munkanda: “Jehova Leza wanu wamulongezya mumilimo yanu yoonse. . . . Jehova Leza wanu walaandinywe mumyaka yoonse eeyi iili 40 alimwi tiimwabula cintu cili coonse pe.” (Dt. 2:7) Mumyaka eeyo iili 40, Jehova wakapa bana Israyeli cakulya, nkokuti mana. Zisani zyabo nzyoonya nzyobakajisi nobakazwa mu Egepita, tiizyakazakala. (Dt. 8:3, 4) Jehova ulakkomana notwiiya kukkutila akulumba kuzintu nzyatupa noziceya buti alimwi anotuzibona kuti nzilongezyo kuzwa kulinguwe. w22.01 5 ¶10-11

Nobalumi, mukuli wanu kulanganya mukwasyi wanu, aboobo mulabeleka canguzu kuukwabilila alimwi akuugwasyilizya. Ciindi nomujana buyumuyumu, mulakonzya kulimvwa kuti inga mwaalanganya mapenzi aayo nyolikke. Pele, amucitantamuke cilengwa cakusyoma nguzu zyanu. Muciindi caboobo, ciindi nomuli nyolikke amulombe lugwasyo kuli Jehova mumupailo. Kuyungizya waawo, amupaile kuzwa ansi amoyo antoomwe amukaintu wanu. Amulombe busolozi kuzwa kuli Jehova kwiinda mukwiiya Bbaibbele amabbuku aazwa kumbunga ya Leza, alimwi akulutobela lulayo ndomujana. Ibamwi tabakonzyi kuzizumina zintu nzyomusala iziyeeme a Bbaibbele. Balakonzya kwaamba kuti mali alimwi azintu nzyaakonzya kuula ziyakuukwabilila kapati mukwasyi wanu. Pele amuyeeye cikozyanyo ca Mwami Jehosafati. (2Mak. 20:1-30) Wakasyoma Jehova alimwi wakatondezya oobo kwiinda muzintu nzyaakacita. Jehova tanaakamulekelezya muntu ooyo iwakali kusyomeka alimwi andinywe kunyina nayakumulekelezya pe.—Int. 37:28; Heb. 13:5. w21.11 15 ¶6; 16 ¶8

Leza wakatulenga mucinkonzya cakwe, aboobo tulayanda kuti bantu kabeendelezyegwa kabotu. (Matl. 1:26) Pele akaambo kakuti tatulondokede, tulakonzya kwiimpya mbotuzyibona zintu, nokuba kuti tulituzyi twaambo toonse tujatikizyidwe. Mucikozyanyo, amuyeeye buyo mbwaatakakkomana Jona ciindi Jehova naakasala kubafwida luse bana Nineve. (Jon. 3:10–4:1) Pele amuyeeye buyo cakazwa mpawo. Bana Nineve ibainda ku 120,000, ibakeempwa bakafwutulwa. Kumamanino, cakalibonya kuti Jona nguwatakababona munzila iiluzi bantu, ikutali Jehova. Jehova tayandiki kutupandulwida buya zintu nzyasala kucita. Masimpe kuti, Jehova kaindi wakali kubazumizya babelesi bakwe kwaamba mbobakali kulimvwa kujatikizya kusala nkwaakacita naa nkwaakali kuyanda kucita. (Matl. 18:25; Jon. 4:2, 3) Alimwi zimwi ziindi, wakali kubapandulwida kusala kwakwe. (Jon. 4:10, 11) Nokuba boobo, Jehova kunyina nayandika kuzumizyigwa andiswe eelyo nayanda kucita cintu cimwi naa amanizya kucicita.—Is. 40:13, 14; 55:9. w22.02 3-4 ¶5-6

Tucita zintu mbuli “musyoonto kwiinda” ciindi ‘notubona bamwi kuti balatwiinda.’ (Flp. 2:3) Ciindi notuba abube oobu, ciyootupa kutalebya bamwi. Bakwesu abacizyi boonse balatwiinda munzila imwi. Tacikatazyi kubona oobo kuti katubikkila maano kubube bubotu mbobajisi. Tweelede kulubikkila maano lulayo mwaapostolo Paulo ndwaakapa Banakorinto lwakuti: “Ino nguni uukupa kwiindana amuntu umbi? Mubwini, ino ncinzi ncojisi ncowatakapegwa buya? Ikuti naa mubwini wakapegwa buya, ino nkaambo nzi ncolidunda mbuli kuti tiiwakapegwa buya?” (1Kor. 4:7) Tweelede kuucenjelela muuya wakuyanda kubikkilwa maano akuyeeya mbuli kuti tulabainda bamwi. Mucikozyanyo, kuti mukwesu kajisi cipego cakupa makani naa mucizyi kajisi cipego cakutalisya ziiyo zya Bbaibbele zinji, mukwesu naa mucizyi ooyo weelede kupa Jehova bulemu. w21.06 22 ¶9-10

Bakamboni banji bajana kuti ciyaabwiindila kukatazya kubandika abantu mumaanda aabo. Basikumwaya bamwi bakakkala mumasena aakwabilidwe kapati naa imuli maanda aagatelwa. Maanda aaya alakonzya kaajisi basikugatela ibatazumizyi muntu uuli woonse kunjila ikuti naa tanaatambwa amukamwiniŋanda kumugama. Basikumwaya bambi balakonzya kuunka kuŋanda aŋanda pele mbasyoonto bantu mbobajana mumaanda naa bakambaukila muminzi naa mumasena aakulamfwu ikukkala buyo bantu basyoonto. Basikumwaya aabo balakonzya kweenda misinzo milamfwu kapati kutegwa bajane buyo muntu omwe, ooyo ambweni uutajaniki aŋanda. Ikuti naa tukambaukila muzilawo imuli buyumuyumu oobu, tutatyompwi pe. Amusoleke kubasikila bantu aciindi cimbi. Tuyookambaukila bantu banji ikuti naa katukambauka ciindi nobalangilwa kujanika mumaanda. Kayi muntu amuntu kuli ciindi najokela kuŋanda. Bakwesu abacizyi banji bajana kuti cilagwasya kukambauka kumazuba naa kumangolezya nkaambo nceciindi bantu banji nobajanika. Kuyungizya waawo, bamukamwiniŋanda aciindi eeci inga baliliibide alimwi balayanda kubandika. w21.05 15 ¶5, 7

Sena tulalibona penzi eeli amazuba aano? Inzya. Bantu banji mazuba aano balanyema ciindi Bakamboni ba Jehova nobatabasangani mukusekelela mapobwe aatali amumagwalo, mbuli kusekelela buzuba bwakuzyalwa alimwi a Kkilisimasi. Bamwi balanyema ciindi Bakamboni ba Jehova nobatabasangani mukusekelela zilengwa zyamucisi naa kutatola lubazu muzilengwa zyaadilwe iziteendelani a Jwi lya Leza. Aabo ibabakaka Bakamboni munzila eeyi, balasyoma cakumaninina kuti bakomba Leza munzila iitambulika. Pele tabakonzyi kumukkomanisya kuti kabayanda tunsiyansiya twamunyika kwiinda njiisyo zyamu Bbaibbele. (Mk. 7:8, 9) Ncinzi ncotweelede kucita kutegwa tutalebwi? Tweelede kwiiyanda kapati milawo ya Jehova alimwi anjiisyo zyakwe. (Int 119:97, 113, 163-165) Kuti katumuyanda Jehova, tuyootukaka tunsiyansiya toonse itutamukkomanisyi Leza. Alimwi tatukalekeli cintu cili coonse kunyonganya luyando ndotujisi kulinguwe. w21.05 6 ¶15-16

Ino inga twalubelesya buti lulayo lwamwaapostolo Paulo? Tweelede kuzumanana kuyumya lusyomo lwesu kwiinda mukubala abuzuba, kupaila cakutaleka alimwi akwiinda mukujata bubi mumulimo Jehova ngwaakatupa kuti tuucite. (2Tim. 4:4) Kuti katujisi lusyomo, tatukalibiliki twaakumvwa malipooti aatali kabotu kujatikizya Bakamboni ba Jehova. (Is. 28:16) Luyando ndotujisi kuli Jehova, ku Jwi lyakwe alimwi akubakwesu luyootugwasya kutegwa tutalebwi abaabo ibakazwa mukasimpe. Mumwaanda wamyaka wakusaanguna, banji bakalebwa, mpoonya bakamukaka Jesu. Nokuba boobo, bamwi banji bakamutambula. Akati kabantu aabo kuli bakazwa mu Nkuta Mpati Yaba Juda, alimwi buya ‘ankamu mpati yabapaizi.’ (Mil. 6:7; Mt. 27:57-60; Mk. 15:43) Mbubwenya buyo amazuba aano, mamiliyoni aabantu basala kutobela Jesu. Nkaambo nzi? Nkaambo balikazyi alimwi balakayanda kasimpe kamu Magwalo. Ijwi lya Leza lyaamba kuti: “Aabo bayanda mulawo wako balijisi luumuno lunji; kunyina cintu cikonzya kubaleba pe.”—Int. 119:165. w21.05 13 ¶20-21

Mwaapostolo Paulo wakalizyi kuti zintu zyoonse nzyaakacita mumulimo wa Jehova, wakazicita kwiinda munguzu zya Leza, ikutali zyakwe. Kwiinda mumuuya wakwe uusalala, Jehova wakapa Paulo nguzu kutegwa auzuzikizye cakumaninina mulimo wakwe, nokuba kuti wakali kupenzyegwa, kubikkwa muntolongo alimwi abuyumuyumu bumbi mbwaakajisi. Timoteyo, mulongwe wa Paulo mukubusi, awalo wakasyoma nguzu zya Leza kucita mulimo wakwe. Timoteyo wakali kumusangana Paulo munyendo zyakwe zyabumisyinali. Alimwi Paulo wakamutuma munyendo zimbi kuswaya alimwi akuyumya-yumya mbungano. (1Kor. 4:17) Kweelede kuti Timoteyo wakalitenga. Ambweni nkakaambo kaako Paulo wakamwambila kuti: “Kutabi muntu naba omwe uubaula bukubusi bwako.” (1Tim. 4:12) Kuyungizya waawo, aciindi eeci, Timoteyo wakajisi bumvwa mumubili, nkokuti wakali “kuciswa-ciswa.” (1Tim. 5:23) Pele Timoteyo wakalizyi kuti muuya uusalala wa Jehova uulaanguzu, wakali kukonzya kumupa nguzu nzyaakali kuyandika kutegwa akambauke makani mabotu alimwi akubelekela bakwesu.—2Tim. 1:7. w21.05 21 ¶6-7

Njiisyo iili kulugwalo lwa Jakobo 1:19 ilagwasya kapati kuli baabo ibapa lulayo. Jakobo wakalemba kuti: “Muntu woonse weelede kufwambaana kuswiilila, kumuka kwaambaula, kumuka kukalala.” Mwaalu ulakonzya kuyeeya kuti ulituzyi twaambo toonse tujatikizyidwe, pele sena masimpe aayo? Tusimpi 18:13 ituyeezya kuti: “Ikuti muntu wavwiila katanaamvwisya kabotu makani, mbufwubafwuba alimwi nkulijazya nsoni.” Inga cabota kumubuzya muntu cacigaminina kutegwa apandulule bukkale bwakwe. Aboobo mwaalu weelede kuswiilila katanaambaula. Mwaalu inga wabuzya kuti: “Ino zyali kumweendela buti zintu mubuumi?” “Ino inga ndamugwasya buti?” Ikuti baalu kababikkila maano kubukkale bwabakwesu abacizyi balakonzya kubagwasya alimwi akubakulwaizya. Kupa lulayo lugwasya kubikkilizya zinji kunze buyo lyakubala magwalo naa kupa muzeezo. Bakwesu abacizyi beelede kuzyiba kuti tulababikkila maano, tulabamvwisya alimwi akuti tulayanda kubagwasya. w22.02 17 ¶14-15