June

Jehova wakabalongezya boonse akaambo kakuti bakacinca kweelana abukkale. Kanji-kanji bakali kupenzyegwa, zimwi ziindi ambweni ciindi nobatakali kuyeeyela. Amubone cakacitika ciindi Barnaba amwaapostolo Paulo nobakali kukambauka ku Lustro. Kumatalikilo, bantu bakabatambula camaanza obilo akuuswiilila mulumbe wabo. Pele basikukazya “bakoongelezya makamu aabantu,” alimwi bamwi akati kabantu mboonya aaba bakamupwaya mabwe Paulo akumusiya kabayeeya kuti wafwa. (Mil. 14:19) Nokuba boobo, Barnaba a Paulo bakazumanana kukambauka kumasena aambi. Ino ncinzi cakazwa mpawo? Bakagwasya “bantu banji kuba basikwiiya,” alimwi majwi aabo acikozyanyo cabo cakabayumya-yumya kapati basyominyina. (Mil. 14:21, 22) Bantu banji bakagwasyigwa kapati akaambo kakuti Barnaba a Paulo, bakazumanana kukambauka nokuba kuti bakapenzyegwa cakutayeeyela. Aboobo, kufwumbwa buyo kuti twazumanana kucita mulimo Jehova ngwaatupa kucita, tuyoolongezyegwa citaambiki. w23.04 16-17 ¶13-14

Mwami Davida mubuumi bwakwe boonse, wakajisi basinkondonyina banji ibakali kuyoosya alimwi kanji-kanji wakali kupaila kuli Jehova kulomba kuti amugwasye. Davida wakalisinizyide kuti Jehova wakaimvwa mipailo yakwe alimwi akuyiingula. Andinywe mulakonzya kuba alusyomo luli boobo. Bbaibbele litusyomezya kuti Jehova ulakonzya kutupa busongo alimwi anguzu nzyotuyandika kutegwa tucikonzye kuliyumya. Zimwi ziindi ulakonzya kubelesya bakwesu abacizyi naa bantu ibatali bakombi bakwe kuti batugwasye. Nokuba kuti talili lyoonse Jehova naingula mipailo yesu munzila njotuyeeyela, pele tulizyi kuti ulayiingula. Ulakonzya kutupa buyo ceeco ncotuyandika alimwi aciindi ceelede. Aboobo, amuzumanane kupaila kamujisi lusyomo lwakuti Jehova uyoomumvwa akumulanganya alimwi akuti ‘uyookkutya cilenge coonse cipona kwiinda mukucipa ncociyanda’ munyika mpya iiboola.—Int. 145:16. w23.05 8 ¶4; 13 ¶17-18

Cilayandika kapati kubikkila maano kububotu buboola akaambo kakuzuzikizya mbaakani yanu. Ino nywebo mbubotu nzi mbomukonzya kubikkila maano? Ikuti naa mbaakani yanu ijatikizya kubala Bbaibbele naa kupaila, amuyeeye buyo kwiizuzikizya mbokukonzya kuyumya cilongwe canu a Jehova. (Int. 145:18, 19) Ikuti naa njakuba abube bumwi bwa Bunakristo, amuyeeye mboikonzya kumupa kuba azilongwe zibotu abamwi. (Kol. 3:14) Aboobo, ambweni inga camugwasya kuti mwatulemba twaambo toonse ncomuyandila kwiizuzikizya mbaakani yanu. Mpoonya lyoonse, kamutulanga twaambo ooto. Kuyungizya waawo, kamuyanzana abantu bakonzya kumukulwaizya. (Tus. 13:20) Kwaamba masimpe, toonse kuli ziindi notulimvwa kubula luyandisisyo. Pele sena eeci caamba kuti tatukonzyi kwiizuzikizya mbaakani yesu? Peepe. Tweelede kusolekesya kuzuzikizya mbaakani yesu, nokuba kuti zimwi ziindi inga katutajisi luyandisisyo lwakwiizuzikizya. Kwaamba bwini, kucita boobo tacili cuuba-uba pe. Pele muyookkomana kapati kuti naa mwaizuzikizya mbaakani yanu. w23.05 27-28 ¶5-8

Kuzyiba kuti ndiswe tujisi mukuli kujatikizya zintu nzyotusala, kweelede kutupa kulyaambilila zibi, kululamika muyandika alimwi akutainduluka kucita zibi. Kucita boobo kulakonzya kutugwasya kuzumanana kubalika mumuzundano wakubuumi. Ikuti tiimwakasala kabotu kaindi, ino ncinzi ncomukonzya kucita? Mutasowi ciindi naa kulijaya mumizeezo kutalika kulitondezya kuti mwakaliluzi naa kutalika kupa bamwi mulandu. Muciindi caboobo, amukuzumine kulubizya kwanu akucita kufwumbwa ncomukonzya lino kubambulula bukkale oobo. Ikuti mwatalika kulipa mulandu kujatikizya zibi nzyomwakacita, cakulicesya amumusikile mumupailo Jehova, amukuzumine kulubizya kwanu alimwi akumulomba kuti amulekelele. (Int. 25:11; 51:3, 4) Amulilekelele kuli baabo mbomwakalubizyila alimwi akulomba lugwasyo kubaalu ikuti kakuyandika. (Jak. 5:14, 15) Amwiiye kukulubizya kwanu alimwi akutakwiinduluka kulubizya ooko. Ikuti mwacita oobo, mulakonzya kuba alusyomo lwakuti Jehova uyoomutondezya luse alimwi akumugwasya aawo mpomuyandika.—Int. 103:8-13. w23.08 28-29 ¶8-9

Jehoyada wakamugwasya Mwami Jehoasi kuba muntu uuli kabotu. Akaambo kaceeci, ciindi mwami naakacili mwana wakali kuyanda kukkomanisya Jehova. Pele naakafwa Jehoyada, Jehoasi wakatalika kuswiilila basilutwe basiluleyo. (2Mak. 24:4, 17, 18) Nokuba kuti eeci cakamunyemya kapati Jehova, “wakazumanana kubatumina basinsimi kutegwa babapilusye . . . , pele bakakaka kuswiilila.” Alimwi kunyina nobakamuswiilila naba Zekariya mwana wa Jehoyada, walo iwatakali buyo musinsimi wa Jehova pele alimwi wakali mweeninyina a Jehoasi. Mane buya, Mwami Jehoasi wakalailila kuti Zekariya ajaigwe. (2Mak. 22:11; 24:19-22) Jehoasi tanaakazumanana kumuyoowa Jehova. Jehova musyule wakaambide kuti: “Aabo bandisampaula ndiyoobasampaula.” (1Sam. 2:30) Mukuya kwaciindi, impi yabasikalumamba nsyoonto yabana Siriya, yakazunda “mpi yabasikalumamba mpati” ya Jehoasi alimwi “bakamucisa kapati.” (2Mak. 24:24, 25) Jehoasi wakajaigwa ababelesi bakwe akaambo kakujaya Zekariya. w23.06 18-19 ¶16-17

Mwaapostolo Paulo wakakkala kwaciindi cili mbocibede mu Efeso, kakambauka akuyiisya makani mabotu. (Mil. 19:1, 8-10; 20:20, 21) Wakali kubayanda kapati basyominyina alimwi wakali kuyanda kubagwasya kuzumanana kusyomeka kuli Jehova. Bana Efeso Paulo mbaakalembela lugwalo bakali mubuzike bwanjiisyo zyabukombi bwakubeja alimwi akusyoma mizimo. Bantu bamu Efeso tiibakali kulilemeka alimwi tiibakali kufwa nsoni akaambo kabukkale bwabo ibwakali kusesemya. Cakalidumide kumvwa majwi aacisapi mumabuwa aabo aakusobanina alimwi alyamapobwe aabo aabukombi. (Ef. 5:3) Bunji bwabana Efeso ‘tiibakacijisi nsoni naaba aniini mubukkale bwabo,’ ikutondezya kuti tiibakacili kumvwa kucisa. (Ef. 4:17-19) Kabatanaiya kujatikizya zyeelelo zya Jehova zijatikizya ciluzi acitaluzi, manjeezyeezya aabo tanaakali kubapenzya nobakali kucita zibi. Paulo wakabaamba kuti bakali ‘mumudima mumizeezo yabo alimwi bakalizandukide kubuumi buzwa kuli Leza.’ Bana Efeso bamwi bakazwa mumudima. w24.03 20 ¶2, 4; 21 ¶5-6

Gideoni wakeelede kubeleka canguzu kali mubetesi. Ciindi bana Midiyani nobakali kutija nkondo masiku, Gideoni wakabatandaanya kuzwa ku Kkuti lya Jezreeli kusika ku Mulonga wa Jordano. (Bab. 7:22) Sena Gideoni wakagolela buyo ku Jordano? Peepe! Nokuba kuti wakalikatede, walo abamaalumi bakwe bali 300 bakazabuka akuzumanana kubatandaanya bana Midiyani. Mpoonya bakabajata akubazunda. (Bab. 8:4-12) Gideoni wakasyoma kuti Jehova wakali kuyoomugwasya alimwi Jehova wakamugwasya ncobeni. (Bab. 6:14, 34) Aciindi cimwi, Gideoni abaalumi bakwe bakali kutandaanya bami bobilo bana Midiyani amaulu, balo ambweni ibakatantide nkamela. (Bab. 8:12, 21) Pele kwiinda mukugwasyigwa a Leza, bana Israyeli bakazunda. Mbubwenya buyo, abalo baalu balakonzya kusyoma Jehova, walo ‘uutakatali nokuba kuwizuka.’ Uyoobapa lugwasyo ndobayandika aciindi ceelede.—Is. 40:28, 29. w23.06 6 ¶14, 16

Tulakonzya kuba amoyo uukkalikene tacikwe makani amapenzi ngotukonzya kujana. Aboobo, amusyome Jehova. Amubone mbwaakazwidilila Baraki akaambo kakusyoma busolozi bwa Jehova. Nokuba kuti kunyina ntobo iyakali kubonwa naa panga mucisi coonse, Jehova wakamulailila kuti aunke kunkondo kuyoolwana silutwe wabasikalumamba Sisera ampi yakwe, walo iwakajisi zilwanyo zinji kapati. (Bab. 5:8) Musinsimi mukaintu Debora wakaambila Baraki kuti azwe mumalundu akuunka kucibanda kuyoolwana Sisera ankalaki zyakwe zili 900. Nokuba kuti Baraki wakalizyi kuti eeci cakali kuyoopa kuti cibakatazye bana Israyeli kulwana nkalaki, wakamvwida. Ciindi basikalumamba nobakali kuzwa a Cilundu ca Tabori, Jehova wakaleta mvwula mpati kapati. Aboobo nkalaki zya Sisera zyakanjomba mumankadya, mpoonya Jehova wakapa kuti Baraki azunde. (Bab. 4:1-7, 10, 13-16) Mbubwenya buyo, Jehova ulakonzya kupa kuti tuzunde ikuti twamusyoma akutobela busolozi mbwatupa kwiinda mumbunga yakwe. w23.07 19 ¶17-18

Tweelede kukkazika moyo kutegwa tukafwutuke. Mbubwenya mbuli babelesi ba Leza basyomeka bakaindi, tweelede kulindila cakukkazika moyo kutegwa Leza akazuzikizye zisyomezyo zyakwe. (Heb. 6:11, 12) Bbaibbele likozyanisya bukkale bwesu kumulimi. (Jak. 5:7, 8.) Mulimi ulabeleka canguzu kusyanga alimwi akutilila, nokuba kuti tazyi ciindi cini nociyookomena cisyango. Aboobo mulimi ulalindila cakukkazika moyo, kasyomede kuti uyootebula. Mbubwenya buyo, tweelede kujata bubi azintu zyakumuuya, nokuba kuti ‘tatuzyi buzuba Mwami wesu nayooboola.’ (Mt. 24:42) Tulalindila cakukkazika moyo, katusinizyide kuti muciindi Jehova ncabikkide, uyoozizuzikizya zyoonse nzyaakasyomezya. Kuti naa twacileka kukkazika moyo, inga twakatala kulindila alimwi akutalika kumusiya Jehova asyoonto-syoonto. Kunze lyaboobo, inga twatalika kucita zintu nzyotubona kuti inga zyatupa lukkomano mpoonya-mpoonya. Pele kuti katukkazika moyo, tulakonzya kuliyumya kusikila kumamanino alimwi akuyoofwutuka.—Mik. 7:7. w23.08 22 ¶7

Kwiinda mukweezyanisya businsimi buli ku Daniele 2:41-43 abusinsimi bumwi buli mubbuku lya Daniele alimwi a Ciyubunuzyo, tulakonzya kwaamba kuti zimpata ziiminina bulelo bwanyika yoonse bwa Anglo-America. Kujatikizya bulelo oobu bwanyika yoonse, Daniele wakaamba kuti “bwami oobo bunooli buyumu aciindi nciconya bunooli buteteete.” Nkaambo nzi ncobunooli buteteete? Akaambo kakuti bantu-bantu buyo ibaimininwa abulongo butete, bapa kuti bubule nguzu zyakuyuma mbuli butale. Kuli makani aayandika kapati ngotukonzya kwiiya kucibumbwa ncaakapandulula Daniele. Kusaanguna, Bulelo Bweendelezya Nyika Yoonse bwa Anglo-America bwalitondezya kuti bulijisi nguzu. Mucikozyanyo, bwakajisi lubazu lupati mukuzunda lya Nkondo Yakusaanguna alimwi a Yabili Yanyika Yoonse. Nokuba boobo, nguzu zyabulelo oobu bwanyika yoonse zyaceya alimwi zilazumanana kuceya akaambo kakuti basicisi balalwana mulicabo alimwi balwana mfwulumende. Cabili, bulelo oobu bwanyika yoonse mbobunooli bwamamanino kweendeelezya, Bwami bwa Leza kabutanaanyonyoona mami oonse aabantu. w23.08 10-11 ¶12-13

Ziindi zimwi Davida wakali kutyompwa kapati akaambo kamapenzi ngaakali kujana. (Int. 18:4, 5) Nokuba boobo, luyando lwa Jehova alimwi ambwaakali kumulanganya zyakali kumukatalusya. Kunze lyaboobo, Jehova wakali kumusololela mulongwe wakwe iwakatyompedwe ‘kumacelelo aamweemvwe alimwi akumasena aakulyookezyela aajisi maanzi.’ Akaambo kaceeci, Davida wakayumizyigwa alimwi wakazumanana kumubelekela Jehova calukkomano. (Int. 18:28-32; 23:2) Mbubwenya buyo amazuba aano, “nduyando lutamani lwa Jehova ilwapa kuti tutalobi” ciindi notwajana mapenzi. (Malo. 3:22; Kol. 1:11) Bunji bwaziindi buumi bwa Davida bwakali muntenda, amana buya wakajisi basinkondonyina banji balaanguzu. Nokuba boobo, luyando lwa Jehova lwakapa Davida kulimvwa kukwabililwa. Davida wakali kulimvwa kuti lyoonse Jehova wakali anguwe, calo cakali kumupa kukkalwa moyo. Akaambo kaceeci wakali kukonzya kwiimba kuti: “[Jehova] wakandivwuna kuzintu zyoonse izyakali kundiyoosya.” (Int. 34:4) Aboobo, nokuba kuti Davida wakali kuyoowa, wakacikonzya kuliyumya akaambo kakuti wakalizyi kuti Jehova wakali kumuyanda. w24.01 30 ¶15-17

Amwiiye kukulubizya kwa Jehoasi. Naakafwa Mupaizi Mupati Jehoyada, Jehoasi wakasala balongwe batali kabotu. (2Mak. 24:17, 18) Wakasala kuswiilila basilutwe ba Juda, balo ibatakali kumuyanda Jehova. Mubwini Jehoasi wakeelede kubatantamuka balongwe bali boobu, kayi bakali kucita zintu zibyaabi. Pele muciindi caboobo, walo wakasala kutobela lulayo lwabo lubyaabi. Aboobo, ciindi Zekariya imweeninyina Jehoasi naakasola kumululamika, Jehoasi wakapa kuti ajaigwe. (2Mak. 24:20, 21; Mt. 23:35) Eelo kaka wakafwubaala! Jehoasi wakali kupona buumi buli kabotu kumatalikilo, pele kumamanino wakaba siluleyo alimwi mujayi, calo cakapa kuti ajaigwe ababelesi bakwe. (2Mak. 24:22-25) Ikuti naakazumanana kuswiilila Jehova alimwi abaabo ibamuyanda, naakapona buumi buli kabotu. w23.09 9 ¶6

Jesu wakalizyi kuti Petro wakali kukonzya kuzumanana kusyomeka. Aboobo Jesu caluzyalo wakaambila Petro kuti “utayoowi.” Akaambo kakuti Jesu wakali kumubikkila maano Petro cakapa kuti buumi bwakwe bucince. Petro alimwi amwanookwabo Andreya bakasiya mulimo wabo wakuzuba nswi akusangana Jesu mumulimo wakukambauka. Ncobakacita cakapa kuti Jehova abalongezye mumbazu zinji. (Mk. 1:16-18) Petro wakabona zintu zibotu zinji kali sikutobela Kristo. Wakabona Jesu kaponya bacisidwe, katanda madaimona, alimwi akubusya bafwide. (Mt. 8:14-17; Mk. 5:37, 41, 42) Petro alimwi wakalibonena cilengaano ca Jesu kali Mwami wa Bwami bwa Leza. Kunyina Petro naakaciluba eeci cakacitika. (Mk. 9:1-8; 2Pet. 1:16-18) Inzya, Petro naatakazyibona zintu eezyi ikuti naatakamutobela Jesu. Cakutadooneka wakalikkomene kuti tanaakazumizya mizeezo iitali kabotu kumulesya kulibonena zilongezyo eezyi. w23.09 21 ¶4-5

Mulugwalo lwakwe lwakusaanguna, Mwaapostolo Petro wakabelesya bbala lyakuti “amuyandane kapati.” Luyando lwamusyobo ooyu taluvwumbi buyo zibi zisyoonto pe, pele “lulavwumba zibi zinji kapati.” (1Pet. 4:8) Kweelede kuti Petro wakacili kuciyeeya ciiyo ncaakamuyiisya Jesu cakulekelela. Aciindi cimwi Petro wakali kuyeeya kuti wakali muntu uuli kabotu naakaamba kuti wakali kukonzya kumulekelela munyina “ziindi zili ciloba.” Pele Jesu wakamuyiisya walo alimwi andiswe toonse kuti tweelede kulekelela “kusikila kuziindi zili 77,” icaamba kuti tatweelede kubala buya. (Mt. 18:21) Ikuti kacimukatazya kulubelesya lulayo oolu, mutatyompwi pe! Toonse tobabelesi ba Jehova zimwi ziindi tulajana buyumuyumu bwakulekelela bamwi. Ciyandika kapati kulindiswe nkucita kufwumbwa ncotukonzya lino kutegwa tumulekelele mukwesu naa mucizyi alimwi akubamba luumuno anguwe. w23.09 29 ¶12

Naakali mwida lya nswi wakalisinizyide kuti mupailo wakwe iwakali kutondezya kweempwa, Jehova wakali kuyoowiingula alimwi akuti Jehova wakali kuyoomugwasya. Jehova wakamuvwuna Jona, aboobo kumbele Jona wakalilibambilide kucita mulimo Jehova ngwaakali kuyanda kuti acite. (Jon. 2:10–3:4) Ciindi nomuli mubukkale bukatazya, sena kuli nomulibilika kapati cakuti cilamwaalila kupaila? Naa mulimvwa kubula nguzu kapati cakuti cilamwaalila kwiiya. Kamuyeeya kuti Jehova ulabumvwisya bukkale bwanu kabotu-kabotu. Aboobo nokuba kuti mwapaila buyo mupailo mufwaafwi, mulakonzya kuba alusyomo lwakuti uyoomupa nzyomuyandika. (Ef. 3:20) Ikuti kacimukatazya kubala alimwi akwiiya akaambo kakuciswa, kukatala naa kulibilika, mulakonzya kuswiilila ku Bbaibbele lyakalekkoodwa, naa mabbuku aamba zyamu Bbaibbele. Alimwi cilakonzya kumugwasya kuswiilila imwi yanyimbo zyesu naa kweebelela vidiyo imwi a jw.org. Aboobo kwiinda mukupaila kuli Jehova alimwi akubona mbwayiingula mipailo yesu kwiinda muzyakumwaya zyakumuuya nzyatupa, cili mbuli kuti tumutamba kuti atuyumye. w23.10 13 ¶6; 14 ¶9

Tente lyakubunganina alimwi amatempele aakazikuyakwa mu Jerusalemu zyakalikozyenye. Mukati mwakali masena obilo, “Busena Busalala” alimwi a “Busena Busalalisya” alo aakaandaanizyidwe acisitilizyo. (Heb. 9:2-5; Kul. 26:31-33) Mubusena Busalala, kwakali cibikkilo camalambe camukuba, cipaililo cakuumpila tununkilizyo alimwi atebulu lyazinkwa zyacitondezyo. Balikke ‘bapaizi bakananikidwe’ mbabakali kuzumizyigwa kunjila mu Busena Busalala kuyoocita milimo yabo. (My. 3:3, 7, 10) Mubusena Busalalisya kwakali bbokesi lyacizuminano, lyalo ilyakali kwiiminina kubako kwa Jehova. (Kul. 25:21, 22) Alikke mupaizi mupati nguwakali kuzumizyigwa kunjila mu Busena Busalalisya ciindi comwe amwaka, mu Buzuba Bwakumanya Milandu. (Lev. 16:2, 17) Mupaizi mupati wakali kunjila mubusena oobu kumwi kajisi bulowa bwamunyama ibwakumanya milandu yakwe alimwi ayacisi coonse. Kumbele, kwiinda mukubelesya muuya wakwe uusalala, Jehova wakapandulula ncozyakali kwiiminina zintu izyakali mutente lyakukombela.—Heb. 9:6, 7. w23.10 27 ¶12

Mu Jwi lya Leza, cakwiinduluka-induluka tulaujana mulawo wakuti ‘katuyandana.’ (Joh. 15:12; Rom. 13:8; 1Tes. 4:9; 1Pet. 1:22; 1Joh. 4:11) Nokuba boobo, luyando mbube bwamoyo naa mbuntu bwamukati alimwi kunyina muntu uukonzya kubona zili mumoyo wesu. Aboobo, mbuti mbotukonzya kutondezya kuti tulabayanda bamwi? Tulakonzya kutondezya kwiinda muzintu nzyotwaamba alimwi akucita. Kuli nzila zinji mbotukonzya kutondezya bakwesu abacizyi kuti tulabayanda. Nzyeezyi nzila zimwi: “Amwaambilane zyamasimpe umwi amweenzinyina.” (Zek. 8:16) ‘Amube aluumuno akati kanu.’ (Mk. 9:50) Amube kumbele “kulemeka bamwi.” (Rom. 12:10) “Amutambulane.” (Rom. 15:7) ‘Amuzumanane kulekelelana.’ (Kol. 3:13) “Amuzumanane kunyamuzyanya mikuli iiminya.” (Gal. 6:2) “Amuzumanane kuumbulizyanya.” (1Tes. 4:18) ‘Amuzumanane kuyakana umwi amweenzinyina.’ (1Tes. 5:11) “Amupaililane.”—Jak. 5:16. w23.11 9 ¶7-8

Buzuba abuzuba, tulapanga zyakusala ziyandika lusyomo luyumu. Mucikozyanyo, tulapanga zyakusala kujatikizya balongwe, kulikondelezya, lwiiyo, cikwati, bana, alimwi amulimo wakumubili. Aboobo tweelede kulibuzya kuti, ‘Sena zintu nzyondisala zilatondezya kuti ndilisinizyide kuti bweende bwazintu oobu bulamana ino-ino akuti nyika mpya ya Leza ilaafwaafwi? Naa zitondezya kuti ndilayungwa abantu basyoma kuti lufwu ngamamanino aazintu zyoonse?’ (Mt. 6:19, 20; Lk. 12:16-21) Tulakonzya kupanga zyakusala zibotu ikuti naa twayumya lusyomo lwesu lwakuti nyika mpya ilaafwaafwi kapati. Zimwi ziindi tulajana masunko aayandika kuba alusyomo luyumu. Mucikozyanyo, tulakonzya kupenzyegwa, kuciswa bulwazi butaponi, naa kucitikilwa zintu zimwi buyo zikonzya kututyompya. Kumatalikilo, tulakonzya kuyeeya kuti inga twacikonzya kuliyumya kupenzi eelyo. Pele kuti naa lyazumanana, inga twayandika kuba alusyomo luyumu kutegwa tucikonzye kuliyumya akuzumanana kumubelekela Jehova calukkomano.—1Pet. 1:6, 7. w23.04 27 ¶4-5

Jehova uyanda kuti katucita zintu kweelana amipailo yesu. Mucikozyanyo, mukwesu uubeleka ulakonzya kulomba Jehova kuti amugwasye kuyoojanika kumuswaangano wacooko. Ino mbuti Jehova mbwakonzya kuwiingula mupailo ooyo? Ulakonzya kumupa busicamba mukwesu bwakuti abalombe basikumulemba mulimo. Nokuba boobo, mukwesu inga wayandika kuunka kuli basikumulemba mulimo kutegwa akabalombe, ambweni kwaziindi zili mbozibede. Andiza buya inga wayandika kucincana mazuba aakubeleka amubelesinyina umwi. Alimwi ulakonzya kusala kuti bamujubile buyo mali akaambo kakutabeleka. Jehova uyanda kuti tuzumanane kupailila zintu nzyotuyanda. Jesu wakaamba kuti zintu zimwi nzyotulomba tatukonzyi kupegwa mpoonya-mpoonya. (Lk. 11:9) Aboobo tutatyompwi pe! Atuzumanane kupaila camoyo woonse alimwi cakwiinduluka-induluka. (Lk. 18:​1-7) Ikuti twacita oobo, tutondezya Jehova kuti tuliciyandide ncobeni cintu eeco. Alimwi tutondezya kuti tulijisi lusyomo lwakuti ulakonzya kutugwasya. w23.11 22 ¶10-11

Jehova wakasyomezya mulongwe wakwe Abrahamu kuti masi oonse aamunyika akali kuyoolongezyegwa akaambo kalunyungu lwakwe. (Matl. 15:5; 22:18) Akaambo kakuti Abrahamu wakali kumusyoma cakumaninina Leza, wakalisinizyide kuti cisyomezyo cakwe cakali kuyoozuzikizyigwa ncobeni. Nokuba boobo, ciindi Abrahamu naakajisi myaka iili 100 amukaintu wakwe naakali aamyaka iili 90, kunyina nobakajisi mwana. (Matl. 21:1-7) Pele Bbaibbele lyaamba kuti: “Akaambo kabulangizi [Abrahamu] wakasyoma kuti ulakonzya kuba usyi wamisyobo minji kweelana amajwi aakaambwa.” (Rom. 4:18) Mulizyi kuti ncaakali kulangila Abrahamu cakazuzikizyigwa ncobeni. Wakaba amwana ngwaakali kulangila kwaaciindi cilamfwu, Izaka. Ino lusyomo lwa Abrahamu lwakayeeme aanzi? Akaambo kakuti Abrahamu wakalijisi cilongwe ciyumu a Jehova, “wakalisinizyide cakumaninina kuti eezyo nzyaakasyomezya Leza,” zyakali kuyoozuzikizyigwa ncobeni. (Rom. 4:21) Jehova wakamukkomanina Abrahamu akumwaamba kuti mululami akaambo kalusyomo lwakwe.—Jak. 2:23. w23.12 8 ¶1-2

Muntu uusyomeka ulailanganya cabunkutwe mikuli yakwe yoonse. Amubone cikozyanyo ca Jesu. Tanaakali muyamba naa muntu uutabikkili maano. Muciindi caboobo, wakazicita zintu zyoonse Jehova nzyaakamwaambila kucita, noliba leelyo nocakali kukatazya kucita boobo. Wakali kubayanda bantu, kwaambisya basikwiiya bakwe—mane wakaaba buumi bwakwe akaambo kambabo. (Joh. 13:1) Aboobo, amumwiiye Jesu kwiinda mukubeleka canguzu kuzuzikizya mulimo uuli woonse ngomwapegwa. Ikuti naa tamuzyi kabotu mbomweelede kuucita, amulicesye akulomba lugwasyo kubakwesu basimide. Mutaubeleki cakwiizya buyo mulawo. (Rom. 12:11) Muciindi caboobo, amuumanizye kuubeleka mulimo wanu nkaambo “mubelekela Jehova ikutali bantu pe.” (Kol. 3:23) Bwini mbwakuti, tamulondokede aboobo mweelede kulicesya akuzumina kulubizya kuli koonse komukonzya kucita.—Tus. 11:2. w23.12 26 ¶8

Eelo kaka cilakkomanisya kubbapatizyigwa akuba cibeela camukwasyi wa Jehova! Ncoolwe cilibedelede kuba acilongwe cili boobu a Jehova. Tulaazuminizya majwi ngaakaamba sintembauzyo Davida aakuti: “Ulikkomene muntu ngosala akuswenya kulinduwe kuti akkale mumabuwa aako.” (Int. 65:4) Jehova tazumizyi buyo kufwumbwa muntu kunjila mumabuwa aakwe. Usala buyo baabo ibatondezya kuti balayanda ncobeni kuba acilongwe anguwe. (Jak. 4:8) Ciindi nomwalyaaba kuli Jehova akubbapatizyigwa, mulakonzya kuba masimpe kuti ‘uyoomupoomweda zileleko zinji kapati cakuti tamukabulizyi cintu cili coonse.’ (Malk. 3:10; Jer. 17:8) Kubbapatizyigwa, matalikilo buyo aakubelekela Jehova. Mweelede kusolekesya kupona kweelana acikonke canu cakulyaaba akuzumanana kusyomeka kulinguwe, noliba leelyo nomwalijana mumapenzi naa nomwasunkwa kucita cibi. (Muk. 5:4, 5) Mbomuli sikwiiya wa Jesu, mweelede kutobela cikozyanyo cakwe amalailile aakwe cakulomya.—Mt. 28:19, 20; 1Pet. 2:21. w24.03 8 ¶1-3

Mbuti kuti nywebo angomukwetene limwi tamukkomani kuba antoomwe? Ikuti kacili boobo, ncinzi ncomukonzya kucita? Amuyeeye cikozyanyo camulilo. Mulilo inga ulatalika kuyaka asyoonto-syoonto akukomena. Ciyandika buyo nkuzumanana kubikka tukuni tusyoonto-syoonto kusikila mwatalika kubikka zipati. Mbubwenya buyo, amutalike kujana kaindi kasyoonto buyo kakuba antoomwe buzuba abuzuba. Mpoonya akusola kucita cintu ncomukkomanina nyoonse nyobilo. (Jak. 3:18) Kwiinda mukutalika asyoonto-syoonto, luyando lwanu lulakonzya kutalika kukomena alimwi. Bulemu ncintu ciyandika kapati mucikwati. Buli mbuli muwo uupa kuti mulilo uyake kapati. Ikuti kakunyina muwo, mulilo ulakonzya kufwambaana kuzima. Ncimwi buyo, kuti kakunyina bulemu, banabukwetene balakonzya kufwambaana kuleka kuyandana. Pele kulubazu lumwi, banabukwetene ibasolekesya kulemekana balakonzya kupa kuti luyando ndobajisi kuli umwi amweenzinyina luzumanane kukomena. Nokuba boobo, kaambo nkomweelede kuyeeya nkakuti tamuli ndinywe nomweelede kulimvwa kuti mulamulemeka ngomukwetene limwi, pele walo nguweelede kulimvwa kuti ulalemekwa. w23.05 22 ¶9; 24 ¶14-15

Mu Bbaibbele, babelesi ba Leza basyomeka balaamba kujatikizya ziindi nobakapengede kapati alimwi akuyoowa akaambo kabasinkondonyina naa mapenzi amwi. (Int. 18:4; 55:1, 5) Mbubwenya buyo, ambweni andiswe tulapenzyegwa kucikolo, kumulimo, kubanamukwasyi naa amfwulumende. Ambweni tulayoowa kuti inga twafwa akaambo kakuciswa. Muziindi zili boobu, tulakonzya kulimvwa kuti kunyina uukonzya kutugwasya. Pele ino Jehova inga watugwasya buti muziindi zili boobu? Ulatuumbulizya akututontonzya. Aboobo amujane ciindi cakuba a Jehova lyoonse munzila yacikozyanyo, nkokuti kwiinda mukupaila akubala Jwi lyakwe. (Int. 77:1, 12-14) Ikuti kamucita oobo, cintu cakusaanguna ncomuyoocita mwaakuyoowa, muyoolanga kuli Uso wakujulu kuti amugwasye. Amumwaambile Jehova zintu zimupa kuyoowa alimwi akulibilika. Mpoonya amumuswiilile kwiinda mukubala Jwi lyakwe, eelyo muyoobona mbwayoomuumbulizya.—Int. 119:28. w24.01 24-25 ¶14-16

Cilayandika kapati kuba aluyandisisyo lwakuzuzikizya mbaakani zyanu zyakumuuya. Muntu uujisi luyandisisyo, ulabeleka canguzu kutegwa ayizuzikizye mbaakani yakwe. Alimwi kuti katujisi luyandisisyo kapati, tulalangilwa kuzizuzikizya mbaakani zyesu. Aboobo, ncinzi ncomweelede kucita kutegwa mube aluyandisisyo kapati? Amupaile kulomba kuba aluyandisisyo kapati. Kwiinda mukubelesya muuya wakwe uusalala, Jehova ulakonzya kumupa kuba aluyandisisyo lwakuzuzikizya mbaakani yanu. Zimwi ziindi tulalibikkila mbaakani akaambo kakuti tulizyi kuti oobo mbotweelede kucita, alimwi eeco cili kabotu. Pele inga katutajisi luyandisisyo lwakuyanda kwiizuzikizya. Amuzinzibale kuyeeya zintu nzyaamucitila Jehova. (Int. 143:5) Mwaapostolo Paulo wakazinzibala kuyeeya luzyalo Jehova ndwaakamutondezya, alimwi eeci cakamukulwaizya kubeleka canguzu mumulimo wa Jehova. (1Kor. 15:9, 10; 1Tim. 1:12-14) Mbubwenya buyo, kuti lyoonse kamuzinzibala kuyeeya zintu nzyaamucitila Jehova, muyooba aluyandisisyo lwakuzuzikizya mbaakani zyanu.—Int. 116:12. w23.05 27 ¶3-5

Tulamukkomanisya Taateesu wakujulu ciindi notutembaula zina lyakwe. (Int. 119:108) Pele sena eeci caamba kuti Leza singuzuzyoonse uli mbuli bantunsi balo ibayanda kutembaulwa kutegwa bakulwaizyigwe? Peepe. Ciindi notumutembaula Taateesu wakujulu, tutondezya kuti nzyaakaamba Saatani kujatikizya ndiswe nzyakubeja. Saatani wakaamba kuti kunyina muntu uukonzya kuzumanana kuliiminina zina lya Leza. Munzila imwi, wakaamba kuti taakwe muntu uukonzya kuzumanana kusyomeka kuli Leza ikuti naa wasunkwa. Wakaamba kuti toonse tulakonzya kuleka kumubelekela Leza ikuti naa twabona kuti kucita boobo inga kwatugwasya. (Job. 1:​9-11; 2:4) Pele Jobu wakazumanana kusyomeka kuli Leza akutondezya kuti Saatani mubeji. Mbuti kujatikizya ndinywe? Umwi aumwi wesu ulakonzya kusala kumwiiminina Taateesu akupa kuti akkomane kwiinda mukuzumanana kumubelekela cakusyomeka. (Tus. 27:11) Eelo kaka eeci ncoolwe citaliboteli! w24.02 8-9 ¶3-5

Mumazuba a Musa alimwi a Joshua, Jehova wakasala babetesi kuti kabasololela bantu bakwe. Kumane, ciindi nokwakali bami, Jehova wakasala basinsimi kusololela bantu bakwe. Aboobo bami basyomeka bakali kulutobela lulayo ilwakali kuzwa kubasinsimi. Mucikozyanyo, cakulicesya Mwami Davida wakazumina kululamikwa amusinsimi Natani. (2Sam. 12:7, 13; 1Mak. 17:3, 4) Mwami Jehosafati wakabutobela busolozi mbwaakamupa musinsimi Jahazieli akukulwaizya ba Juda ‘kusyoma basinsimi ba Leza.’ (2Mak. 20:14, 15) Ciindi naakatyompedwe kapati, Mwami Hezekiya wakalomba lugwasyo kumusinsimi Isaya. (Is. 37:1-6) Kufwumbwa ciindi bami nobakali kubutobela busolozi bwa Jehova, bakali kulongezyegwa kapati alimwi akukwabililwa. (2Mak. 20:29,30; 32:22) Kweelede kuti boonse bakalibwene kuti Jehova wakali kubelesya basinsimi kusololela bantu bakwe. w24.02 21 ¶8

Saatani uyanda kuti katuyanzana abantu ibakonzya kupa kuti cituyumine kutobela zyeelelo zya Jehova. Pele ncotweelede kuyeeya ncakuti, bantu mbotuyanzana limwi tabali buyo baabo mbotubandika limwi cacigaminina. Pele balabikkilizya abaabo mbotubandika limwi a Intaneti. Tweelede kwiikaka mizeezo yabantu bamunyika iikulwaizya kuti bukkale bwakutalilemeka buli buyo kabotu. Kayi swebo tulizyi kuti tabuluzi. (Ef. 4:19, 20) Pele inga cabota kulibuzya mibuzyo mbuli yakuti: ‘Sena ndilasolekesya kukaka kuyanzana ababelesima, basicikoloma naa bantu bamwi buyo batazilemeki zyeelelo zya Jehova? Sena ndilasolekesya kutobela ceeco Jehova ncaamba kuti cililuzi nokuba kuti bamwi balakonzya kundaamba kuti ndilazilaika?’ Kweelana alugwalo lwa 2 Timoteyo 2:20-22, tweelede kucenjela kujatikizya balongwe mbotusala nomuba mumbungano ya Bunakristo. Nkaambo bamwi, inga tiibatugwasya kuzumanana kumubelekela Jehova. w24.03 22-23 ¶11-12

Sena kuli nomwakasolede kale kweezyeezya mbwabede Jehova. Nokuba kuti Jehova talibonyi, Bbaibbele lilamupandulula munzila ziindene-indene. Jehova waambwa kuti “ndizuba alimwi nintobo” akuti “mulilo uumpa cakumaninina.” (Int. 84:11; Heb. 12:29) Ezekieli wakapandulula Jehova mucilengaano kuti uli mbuli bbwe liyandisi lyasafilo, lubulo lumweka alimwi akumweka kwafulicoongo. (Ezk. 1:26-28) Akaambo kakuti tatukonzyi kumubona Jehova, cilakonzya kutukatazya kusyoma kuti ulatuyanda. Bamwi bayeeya kuti Jehova takonzyi kubayanda akaambo kazibi nzyobakacita musyule. Jehova ulamvwisya mbotulimvwa alimwi ulizyi kaambo ncocikonzya kutukatazya kuba acilongwe anguwe. Pele kutegwa atugwasye, ulabuyubununa bube bwakwe bubotu mu Bbaibbele. Ibbala lyomwe limupandulula kabotu Jehova ndyakuti luyando (1Joh. 4:8) Bbaibbele lyaamba kuti Leza nduyando. Zyoonse nzyacita zyeendelezyegwa aluyando. Luyando ndwajisi Leza ndupati cakuti ulabayanda nobaba baabo batamuyandi.—Mt. 5:44, 45. w24.01 26 ¶1-3

Jehova wakasala Musa kusololela bana Israyeli kuzwa mu Egepita alimwi wakabapa bumboni busalede. Ciindi camasyikati wakali kubelesya musumpuululu wakkumbi mpoonya masiku wakali kubelesya musumpuululu wamulilo. (Kul. 13:21) Aboobo Musa wakautobela musumpuululu walo iwakamusololela ku Lwizi Lusalala antoomwe abana Israyeli. Pele ciindi bana Egepita nobakatalika kutandaanya bana Israyeli, bana Israyeli bakayoowa kapati nkaambo bakayeeya kuti balajaigwa. Pele bwini mbwakuti tanaakalubizya pe. Jehova ngowakabelesya Musa kusololela bantu bakwe ooku. (Kul. 14:2) Kumane Jehova wakabafwutula munzila iigambya kapati. (Kul. 14:26-28) Kwamyaka iili 40 kuzwa ciindi eeco, Musa wakazumanana kutobela musumpuululu wakkumbi ikusololela bantu ba Leza munkanda. (Kul. 33:7, 9, 10) Kwiinda mumusumpuululu, Jehova wakali kupa malailile kuli Musa, kumane walo ngowakali kwaambila bantu. Aboobo bana Israyeli bakalijisi bumboni busalede bwakuti Jehova wakali kubelesya Musa kubasololela. w24.02 21 ¶4-5