July

Zintu zyoonse Jesu nzyaakali kwaamba akucita, kubikkilizya amaleele ngaakacita, wakali kwiiya Bausyi. (Joh. 14:9) Ncinzi ncotukonzya kwiiya kumaleele ngaakacita Jesu? Jesu a Bausyi balatuyanda kapati. Ciindi naakali anyika, Jesu wakatondezya kuti ulabayanda kapati bantu kwiinda mukubelesya nguzu zyakwe zyamaleele kugwasya baabo bakapengede. Aciindi cimwi, baalumi boofwu bobilo bakamulomba kuti abaponye. (Mt. 20:30-34) Amubone kuti ‘kweetezyegwa’ nkokwakapa kuti Jesu abaponye. ‘Kweetezyegwa’ kuli boobu, ikutondezya luyando, alimwi nkokwakapa Jesu kusanina bantu bakafwide nzala akuponya sicinsenda. (Mt. 15:32; Mk. 1:41) Tulakonzya kuba masimpe kuti Jehova, Leza ‘siluzyalo,’ a Mwanaakwe balatuyanda kapati alimwi cilabacisa kutubona katupenga. (Lk. 1:78; 1Pet. 5:7) Eelo kaka baliyandide kwaagwisya mapenzi woonse aabakatazya bantu! w23.04 3 ¶4-5

Tweelede kusolekesya kutantamuka kubala naa kuswiilila zintu zitali kabotu zidumide munyika eeyi ya Saatani. Tweelede kubikka zintu zili kabotu mumizeezo yesu kwiinda mukubala alimwi akwiiya Bbaibbele. Kujanika kumiswaangano akutola lubazu mumulimo wakukambauka akwalo kulakonzya kwiikwabilila mizeezo yesu. Mpoonya Jehova usyomezya kuti takatulekeli kuti tusunkwe kwiinda nguzu zyesu. (1Kor. 10:12, 13) Toonse tweelede kupaila kwiinda lyoonse kutegwa tucikonzye kuzumanana kusyomeka kuli Jehova mumazuba aano aamamanino aakatazya kapati. Jehova uyanda kuti ‘katumwaambila zyoonse zili mumoyo wesu’ kwiinda mumupailo. (Int. 62:8) Amumutembaule Jehova akumulumba akaambo kazintu zyoonse nzyaamucitila. Amumulombe kuti amugwasye kuba basicamba mumulimo wakukambauka. Amumulombe kuti amupe nguzu zyakuliyumya kumapenzi aali woonse alimwi akulwana sunko lili lyoonse ndyomujisi. Mutalekeli cintu cili coonse naa muntu uuli woonse kumulesya kupaila lyoonse kuli Jehova. w23.05 7 ¶17-18

Nkaambo nzi ncotujanika kumiswaangano yambungano? Kaambo kapati, nkutembaula Jehova. (Int. 26:12; 111:1) Alimwi tulajanika kumiswaangano kutegwa tukulwaizyanye umwi amweenzinyina muziindi eezyi zikatazya. (1Tes. 5:11) Aboobo ciindi notupa bwiinguzi lyamiswaangano, nkokuti tucita zintu eezyi zyobilo. Pele kuli zintu zikonzya kupa kuti cikatazye kucita boobo. Tulakonzya kuyoowa kutambika kutegwa tupe bwiinguzi, naa ambweni tulakonzya kuti katuyandide kutola lubazu ziindi zinji mpoonya tiitwapegwa coolwe. Ncinzi ncotukonzya kucita mubukkale oobu? Mwaapostolo Paulo wakaamba kuti tweelede kubikkila maano ‘kukulwaizyanya umwi amweenzinyina. Kuyeeya kuti tulakonzya kubakulwaizya bamwi kwiinda mukupa bwiinguzi nobuba bufwaafwi buyo ibutondezya lusyomo lwesu, kulakonzya kupa kuti tutanooyoowi kutambika. Mpoonya kuti naa tiitwapegwa coolwe cakupa bwiinguzi ziindi zinji kweelana ambotwali kuyanda, tulakonzya kukkomana kuzyiba kuti bamwi baba acoolwe cakupa bwiinguzi.—1Pet. 3:8. w23.04 20 ¶1-3

Mwami wakaambilizya kuti, ba Juda ibakali mubuzike ku Babuloni kwamyaka iibalilwa ku 70, bakalaangulukide kujokela kumunzi ookwabo ku Israyeli. (Ezr. 1:2-4) Jehova nguwakapa kuti cintu cili boobu cicitike. Nkaambo bana Babuloni tiibakali kuvwula kwaangulula bazike babo. (Is. 14:4, 17) Pele aciindi eeci kwakali mweendelezi mupya mu Babuloni, aboobo wakaambila ba Juda kuti bakali kukonzya kuzwa. Ba Juda boonse, kwaambisya basilutwe bamikwasyi bakeelede kupanga cakusala: kuzwa mu Babuloni naa kuzumanana kukkala mumo. Pele tiicakali cuuba-uba kusala. Kulangilwa kuti banji bakalicembeede kapati cakuti tiibakali kukonzya kweenda musinzo mulamfwu. Alimwi mbwaanga bunji bwaba Juda bakazyalilwa mu Babuloni, kunyina munzi uumbi ngobakazyi kunze lyamunzi ooyu. Aboobo bakali kulimvwa kuti Israyeli wakali munzi buyo wabamasyaanyinakulu ikutali mbabo. Kuyungizya waawo, kuboneka kuti ba Juda bamwi bakalivwubide kapati mu Babuloni. Aboobo ambweni cakali kukonzya kubayumina kusiya maanda aabo mabotu naa makwebo aabo akuyookkala kubusena mbobatakazyibide. w23.05 14 ¶1-2

Jwi lya Leza litukulwaizya kuzumanana kutondezya bube bwakuliyumya, lubomba alimwi aluyando. Lugwalo lwa Luka 21:19 lwaamba kuti: “Kwiinda mukuliyumya kwanu, muyoofwutula buumi bwanu.” Mpoonya lugwalo lwa Bakolose 3:12 lwaamba kuti: “Amulisamike luyando lwamoyo walubomba.” Kumane lwa 1 Batesalonika 4:9, 10 lulati: “Nywebo lwanu muyiisyigwa a Leza kuti kamuyandana. . . . Pele lino bakwesu tumukulwaizya kuti muzumanane kucita boobo kwiinda waawo.” Magwalo woonse aaya akalembeledwe basikwiiya ibakajisi kale bube bwakuliyumya, lubomba alimwi aluyando. Pele bakeelede kuzumanana kwiiya kutondezya bube oobu. Andiswe tweelede kucita mbubonya oobo. Kutegwa mubone mbomukonzya kucita oobo, amubone Banakristo bakusaanguna mbobakabutondezya bube oobu. Mpoonya mulabona mbomukonzya kubaiya basikwiiya aaba calo cikonzya kumugwasya kulibambila mapenzi mapati. Aboobo ciindi aakutalika mapenzi mapati, munoozyi mbomukonzya kuliyumya alimwi muyoocikonzya kuzumanana kuliyumya. w23.07 3 ¶4, 8

Kufwumbwa naa tuli bananike naa ‘bambelele zimbi,’ tweelede kuzumanana kweenda ‘Munzila ya Busalali’ nkaambo itusololela kuparadaiso yakumuuya alimwi akupa kuti tukajane zilongezyo zya Bwami kumbele. (Joh. 10:16) Kuzwa mu 1919 C.E., mamiliyoni aabamaalumi, bamakaintu alimwi abana bazwa muli Babuloni Mupati, ibulelo bwanyika yoonse bwabukombi bwakubeja, akutalika kweenda munzila eeyi yacikozyanyo. Ciindi ba Juda nobakazwa mu Babuloni, Jehova wakazigwisya zisinkilizyo zyoonse izyakali munzila. (Is. 57:14) Mbuti kujatikizya “Nzila ya Busalali” yamazuba aano? Kwamyaka minji kautanasika mwaka wa 1919, Jehova wakatalika kubelesya bamaalumi ibakali kumuyoowa kubamba nzila yakuzwa muli Babuloni Mupati. (Amweezyanisye Isaya 40:3.) Bamaalumi aaba bakacita mulimo iwakali kuyandika kutegwa mukuya kwaciindi bantu babombemyoyo, bakacikonzye kuzwa mubukombi bwakubeja akutalika kukomba Jehova antoomwe abantu bakwe. w23.05 15-16 ¶8-9

Jehova uyanda kuti katumubelekela cakuliyandila alimwi acalukkomano. (2Kor. 9:7) Aboobo, sena tweelede kuzumanana kusola kuzuzikizya mbaakani yesu yakumuuya kuti naa tulimvwa kuti tatujisi luyandisisyo lwakwiizuzikizya? Amubone cikozyanyo camwaapostolo Paulo. Wakaamba kuti: “Ndilaukasya mubili wangu akuweendelezya mbuli muzike.” (1Kor. 9:25-27, bupanduluzi buyungizyidwe) Paulo wakali kulisinikizya kucita ciluzi noliba leelyo naatakajisi luyandisisyo lwakucita boobo. Sena Jehova wakaukkomanina mulimo wakwe? Inzya. Alimwi buya Jehova wakamulongezya akaambo kakusolekesya kwakwe. (2Tim. 4:7, 8) Jehova ulakkomana kapati ciindi natubona katusolekesya kuzuzikizya mbaakani yesu nokuba kuti tatujisi luyandisisyo lwakucita boobo. Ulakkomana nkaambo ulizyi kuti nokuba kuti inga katutayandi kucita cintu eeco, tulacicita akaambo kakuti tulamuyanda. Aboobo mbubwenya mbwaakamulongezya Paulo, andiswe uyootulongezya akaambo kakusolekesya kwesu. (Int. 126:5) Mpoonya ciindi notubona mbwatulongezya Jehova, ambweni inga twatalika kuba aluyandisisyo. w23.05 29 ¶9-10

Mwaapostolo Paulo wakakozyanisya bantu batakafwutuki buzuba bwa Jehova kubantu boona. Tabazyi zintu zicitika naa kubona ciindi mpoceendela. Akaambo kaceeci, tabakonzyi kuzyiba ciindi nokwacitika cintu ciyandika kapati alimwi kunyina nobakonzya kubweza ntaamu. Mazuba aano, bantu banji baloona kumuuya. (Rom. 11:8) Tabazisyomi zitondezyo zyakuti tupona “kumazuba aamamanino” alimwi akuti mapenzi mapati alaafwaafwi. (2Pet. 3:3, 4) Pele buzuba abuzuba, swebo tulayeeya mboluyandika kapati lulayo lwakasololelwa amuuya lujatikizya kuzumanana kupakamana. (1Tes. 5:6) Aboobo, tweelede kuzumanana kukkazika moyo alimwi akupakamana. Nkaambo nzi? Tweelede kucita oobo kutegwa tutajatikizyigwi mutwaambo twacisi naa mumakani aabukkale. Kuyungwa kutola lubazu muzintu eezyi kunooyabwiindila buya buzuba bwa Jehova mbobuyaabuswena afwaafwi. Nokuba boobo, tatweelede kulibilika kujatikizya ncotweelede kuyoocita. Muuya wa Leza uyootugwasya kukkazika moyo akutalibilika kutegwa tukacikonzye kusala cabusongo.—Lk. 12:11, 12. w23.06 10 ¶6-7

Ncinzi ciboola mumizeezo yanu mwamvwa zina lyakuti Samusoni? Ambweni muyeeya muntu wakajisi nguzu zinji kapati. Aayo masimpe. Nokuba boobo, Samusoni tanaakasala kabotu calo cakapa kuti anjile mumapenzi mapati. Pele Jehova wakabikkila maano kuzintu zibotu nzyaakacita Samusoni ciindi naakali kumubelekela cakusyomeka akuzibikkilizya mu Bbaibbele kutegwa tugwasyigwe. Jehova wakamubelesya Samusoni kwiinda mukumupa kucita zintu zigambya kutegwa agwasye bantu bakwe, bana Israyeli. Naakafwa Samusoni, Jehova wakasololela mwaapostolo Paulo kubikkilizya Samusoni mumulongo wamazina aabantu bakajisi lusyomo luyumu kapati. (Heb. 11:32-34) Cikozyanyo ca Samusoni cilakonzya kutukulwaizya. Wakamusyoma Jehova nociba ciindi naakali mubukkale bukatazya. Tulakonzya kugwasyigwa acikozyanyo cakwe. w23.09 2 ¶1-2

Tulakonzya kuzumanana kuliyumya kwiinda mukupaila kuli Jehova lyoonse, kumwaambila zintu zitupa kulibilika. (1Tes. 5:17) Ambweni calino tamujisi penzi limukatazya kapati. Pele sena mulapaila kuli Jehova kulomba kuti amugwasye ciindi nomwanyema, nomwakopana mumizeezo naa nomutazyi cakucita? Ikuti lyoonse kamupaila kuli Leza kulomba kuti amugwasye kulwana mapenzi masyoonto ngomujana buzuba abuzuba, nkokuti tamukawayiwayi kulomba kuti akamugwasye kulwana mapenzi mapati ngomuyoojana kumbele. Aboobo munoosinizyide kuti ulizyi ciindi cini nayelede kumugwasya alimwi ambwayelede kucita oobo. (Int. 27:1, 3) Ikuti naa twazumanana kusyomeka kuli Jehova ciindi notujisi mapenzi lino, tuyoocikonzya kuliyumya kumapenzi mapati aaboola kumbele. (Rom. 5:3) Nkaambo nzi ncotwaambila boobo? Bunji bwabakwesu abacizyi bakaamba kuti kufwumbwa ciindi nobakali kuliyumya kubukkale bukatazya bumwi abumwi, cakali kubagwasya kuliyumya kubukkale butobela. Kuliyumya kwakali kubagwasya kapati, kwakali kupa kuti babe alusyomo luyumu lwakuti Jehova ulilibambilide kubagwasya ciindi coonse. Mpoonya lusyomo oolo lwakali kubagwasya kuliyumya kumapenzi aambi ngobakali kujana.—Jak. 1:2-4. w23.07 3 ¶7-8

Kulicesya kwa Jehova alweetelelo kupa kuti kanyoneka. Mucikozyanyo, Jehova wakatondezya kuti ulalicesya ciindi naakali kuyanda kunyonyoona munzi mubyaabi wa Sodoma. Kwiinda mumungelo, wakaambila Loti kuti atijile kumalundu. Pele Loti wakayoowa kuunka nkuko. Aboobo wakalomba kuti walo amukwasyi wakwe baunke ku Zoari, idolopo syoonto, alyalo ndyaakali kuyanda kunyonyoona Jehova. Naakali kuyanda, Jehova naakaambila Loti kuti atobele buyo ncaakaambilwa. Pele muciindi cakucita boobo, wakamuzumizya Loti kuunka ku Zoari, alimwi tanaakalinyonyoona dolopo eeli. (Matl. 19:18-22) Nokwakainda myaanda yamyaka, Jehova wakatondezya lweetelelo kubantu bakali kukkala ku Nineve. Wakatuma musinsimi Jona kuti akaambilizye lunyonyooko lwakali kuyoosikila munzi ooyu antoomwe abantu babi ibakali mumo. Pele ciindi bana Nineve nobakeempwa, Jehova wakabafwida lubomba alimwi tanaakaunyonyoona munzi ooyu.—Jon. 3:1, 10; 4:10, 11. w23.07 21 ¶5

Ncinzi ncotwiiya kucikozyanyo ca Jehoasi? Wakali mbuli cisamu cijisi miyanda ilaatala-tala buyo, iciyandika kutabililwa lyoonse. Ciindi Jehoyada naakafwa, walo iwakali kumutabilila, Jehoasi wakatalika kuswiilila basiluleyo, wakaleka kusyomeka kuli Jehova. Cikozyanyo eeci citondezya kuti tatweelede kumvwida Leza akaambo buyo kakuti banamukwasyi alimwi abamwi mumbungano mbobacita oobo. Kutegwa tuzumanane kuyuma kumuuya, tweelede kuba acilongwe ciyumu a Jehova, kuzumanana kumuyanda kapati akumulemeka kwiinda mukwiiya lyoonse, kuzinzibala kuyeeya alimwi akupaila. (Jer. 17:7, 8; Kol. 2:6, 7) Jehova kunyina natulomba kuti tucite zintu zinji. Pele ncayanda kuti tucite, cilaambidwe kulugwalo lwa Mukambausi 12:13, ilwaamba kuti: “Koyoowa Leza mwini-mwini akutobela milawo yakwe, nkaambo ooyu ngomukuli woonse ngwapedwe muntu.” Kuti katumuyoowa Leza, tuyoocikonzya kuzumanana kusyomeka kulinguwe tacikwe makani azintu zikonzya kutucitikila. Kunyina cintu cili coonse ciyoonyonganya cilongwe cesu a Jehova. w23.06 19 ¶17-19

Kapango 5 katalika amajwi aakuti: “Ooyo uukkede acuuno cabwami wakati.” (Ciy. 21:5a) Aaya majwi alilibedelede nkaambo ali akati kaziindi zyotatwe zyaambidwe mubbuku lya Ciyubunuzyo, ciindi Jehova lwakwe naakaambaula muzilengaano. Kunyina naakabelesya mungelo naa Jesu iwakabusyigwa, pele lwakwe kumugama nguwakaamba. Aboobo eeci citondezya kuti tulakonzya kwaasyoma cakumaninina majwi aatobela ngaakaamba. Nkaambo nzi? Nkaambo Jehova ‘takonzyi kubeja.’ (Tit. 1:2) Aboobo majwi ngotubala ku Ciyubunuzyo 21:5, 6 ayoozuzikizyigwa ncobeni. Kumane Jehova waamba kuti “Amubone!” Ibbala lya Chigiriki lyakasandululwa kuti “amubone!” lilabelesyegwa cakwiinduluka-induluka mubbuku lya Ciyubunuzyo. Ino majwi nzi aatobela Leza ngaakaamba? Wakaamba kuti: “Ndilengulula zintu zyoonse kuti zibe zipya.” Masimpe kuti, Jehova uyoozicita kumbele zintu eezyi. Pele akaambo kakuti ulisinizyide kuti uyoocizuzikizya cisyomezyo cakwe, wakaamba mbuli kuti wakazicita kale.—Is. 46:10. w23.11 3-4 ¶7-8

Nokuba kuti wakalibonena zintu eezyi, Mwaapostolo Petro wakapenga akaambo kakulezya kwakwe. Amulange-lange zikozyanyo eezyi zisyoonto buyo. Ciindi Jesu naakali kupandulula kujatikizya mbwaakali kuyoopenga alimwi akufwa kutegwa businsimi bwamu Bbaibbele buzuzikizyigwe, Petro wakaambila Jesu kuti eeci tiicakali kuyoomucitikila. (Mk. 8:31-33) Cakwiinduluka-induluka, Petro alimwi abaapostolo bamwi bakali kukazyanya kujatikizya wakali mupati akati kabo. (Mk. 9:33, 34) Busiku katanafwa Jesu, Petro cabukali wakakosola kutwi kwamwaalumi umwi. (Joh. 18:10) Busiku mbubonya oobo, Petro wakayoowa kapati kujatikizya zintu bantu nzyobakali kumuyeeyela cakuti wakamukaka Jesu ziindi zyotatwe. (Mk. 14:66-72) Eeci cakapa kuti Petro alile kapati. Jesu kunyina naakamutantamuka mwaapostolo ooyu iwakatyompedwe kapati. Naakabusyigwa, Jesu wakapa Petro coolwe cakutondezya mbwaakali kumuyanda. Kuyungizya waawo, wakapa Petro mukuli wakweembela tubelele twakwe. (Joh. 21:15-17) Petro wakalilibambilide kucita zyoonse Jesu nzyaakamwaambila. Aboobo wakali akati kabaabo bakasaanguna kunanikwa amuuya uusalala mu Jerusalemu mubuzuba bwa Pentekoste. w23.09 22 ¶6-7

Mwaapostolo Petro wakakulwaizya baalunyina kuti: “Amweembele butanga bwa Leza.” (1Pet. 5:1-4.) Ikuti kamuli mwaalu, tulizyi kuti mulabayanda kapati Banakristonyoko akuti muyanda kubagwasya. Nokuba boobo, zimwi ziindi mulakonzya kulimvwa kuti mujisi bubi kapati naa mulikatede cakuti tamukonzyi kuuzuzikizya mukuli wanu. Ino ncinzi ncomukonzya kucita mubukkale buli oobu? Amwaapailile makani aaya aamulibilisya kuli Jehova. Petro wakalemba kuti: “Ikuti naa kuli uukanana, aakanane mbuli yooyo waamba majwi aazwa kuli Leza; ikuti naa kuli uubeleka, abeleke kasyomede nguzu nzyapa Leza.” (1Pet. 4:11) Banakristonyoko inga kabajisi mapenzi aatalangilwi kumana mubweende bwazintu obuno. Pele kamuyeeya kuti Jesu Kristo ‘imweembezi silutwe’ ulakonzya kubagwasya kapati kwiinda mbomukonzya kucita. Ulakonzya kubagwasya lino alimwi amunyika mpya. Jehova uyanda buyo kuti baalu kababayanda Banakristonyina, kababalanganya kabotu alimwi akuba “zikozyanyo kubutanga.” w23.09 29-30 ¶13-14

Tweelede kutantamuka kutobela Mizeezo yabantu. Ikuti twatalika kuyeeya mbuli mbobayeeya bantu batailemeki milawo ya Jehova, andiswe tulakonzya kuleka kumubikkila maano Jehova amilawo yakwe. (1Kor. 3:19) Kanji-kanji “busongo bwanyika” bukulwaizya bantu kutamvwida Leza. Banakristo bamwi baku Pergamo aku Tiyatira bakayungwa abantu mbobakali kukkala limwi ibakali kucita bwaamu akukomba mituni. Akaambo kaceeci, Jesu wakazipa lulayo lwanguzu mbungano eezyi izyakali kulekela bwaamu. (Ciy. 2:14, 20) Mazuba aano, bantu batuzingulukide balakonzya kusola kutuyunga kutobela mizeezo iitaluzi. Banamukwasyi abalongwe balakonzya kutupa kuyeeya kuti tulaciindizya kutobela milawo alimwi akuti kunyina mbocibede kusotoka milawo ya Jehova. Mucikozyanyo, balakonzya kwaamba kuti kucita zintu nzyotulombozya cili buyo kabotu alimwi akuti zyeelelo zyakulilemeka zyamu Bbaibbele tazicibeleki mazuba aano. Zimwi ziindi, tulakonzya kuyeeya kuti Jehova tatupi malailile aasalede. Mane buya tulakonzya kusunkwa ‘kwiindilila zintu zilembedwe.’—1Kor. 4:6. w23.07 16 ¶10-11

Mariya, banyina Jesu wakali kuyandika kuyumizyigwa. Tanaakajisi luzyibo lwakukomezya bana, pele lino wakeelede kukomezya mwana iwakali kuyooba Mesiya. Alimwi mbwaanga kunyina naakalede kale amusankwa, ino wakali kuyoomupandulwida buti Josefa iwakali kuyanda kumukwata? (Lk. 1:26-33) Ino Mariya wakayumizyigwa buti? Wakasyoma bamwi kutegwa bamugwasye. Mucikozyanyo, wakalomba Gabriyeli kuti amupandulwide zinji kujatikizya mukuli ooyu ngwaakapegwa. (Lk. 1:34) Kuzwa waawo, Mariya wakaunka kuyooswaya bbululu wakwe Elizabeta iwakali kukkala “kucisi camalundu” ku Juda. Elizabeta wakamulumbaizya Mariya alimwi wakasololelwa a Jehova kwaamba businsimi bukkomanisya, ibwakali kujatikizya mwanaakwe iwatakalinazyalwa. (Lk. 1:39-45) Mariya wakaamba kuti Jehova wakacita “milimo mipati ajanza lyakwe.” (Lk. 1:46-51) Aboobo, kwiinda mukubelesya Gabriyeli alimwi a Elizabeta, Jehova wakamuyumya Mariya. w23.10 14-15 ¶10-12

Basikwiiya ba Kristo ibasyoonto buyo, bakananikwa amuuya uusalala alimwi balikkomene kuba acilongwe cilibedelede a Jehova. Aaba ibali 144,000 bayooba bami abapaizi antoomwe a Jesu. (Ciy. 14:1) Busena Busalala bwamutente lyakubunganina bwiiminina coolwe ncobajisi aaba icakuba bana ba Leza bakumuuya kabacili waano anyika. (Rom. 8:15-17) Busena Busalalisya bwamutente lyakubunganina bwiiminina kujulu, ooko Jehova nkwakkala. “Cisitilizyo” icakali kwaandaanya Busena Busalala alimwi a Busalalisya, ciiminina mubili wa Jesu wanyama ooyo iwatakali kumuzumizya kuunka kujulu kali Mupaizi Mupati watempele lyakumuuya. Kwiinda mukwaaba buumi bwakwe kacili cipaizyo, Jesu wakajalwida Banakristo bananike boonse nzila yabuumi bwakujulu. Aboobo, abalo beelede kusiya mibili yabo yanyama kutegwa bakatambule bulumbu bwabo bwakujulu.—Heb. 10:19, 20; 1 Kor. 15:50. w23.10 28 ¶13

Gideoni wakazumanana kukkazika moyo ciindi bana Efraimu nobakamutongooka. (Bab. 8:1-3) Kunyina naakabaingula cabukali. Pele wakatondezya kuti wakali muntu uulicesya kwiinda mukubaswiilila alimwi akubaingula caluzyalo. Eeci cakapa kuti baleke kunyema. Aboobo, baalu basongo balamwiiya Gideoni kwiinda mukuswiilila cakubikkila maano alimwi akwiingula cabubombe ciindi bamwi nobabatongooka. (Jak. 3:13.) Kwiinda mukucita boobo, bapa kuti kube luumuno mumbungano. Ciindi bantu nobakatalika kumulumbaizya Gideoni akaambo kakuzunda bana Midiyani, wakapa bulemu kuli Jehova. (Bab. 8:22, 23) Mbuti baalu mbobakonzya kwiiya cikozyanyo ca Gideoni? Balakonzya kucita oobo kwiinda mukupa Jehova bulemu akaambo kakuzwidilila kuli koonse nkobaba ankuko. (1Kor. 4:6, 7) Mucikozyanyo, ikuti naa mwaalu walumbaizyigwa kapati akaambo kakuyiisya kabotu, ulakonzya kwaamba kuti malailile aayo azwa mu Jwi lya Leza alimwi akuti toonse tuyiisyigwa buyo ambunga ya Jehova. Zimwi ziindi, baalu beelede kulilingula kutegwa babone naa kuyiisya kwabo kupa kuti Jehova alemekwe naa kupa kuti bantu babikkile mbabo maano. w23.06 4 ¶7-8

Ikuti tiitwapegwa nzyotwalomba mumupailo, ambweni inga twalibuzya kuti, ‘Mwati ncondipailila cili kabotu?’ Kanji-kanji inga tuyeeya kuti tulizizyi kabotu zintu nzyotuyandika. Nokuba boobo, zintu eezyo nzyotulomba ambweni tazikonzyi akutugwasya. Ikuti katupailila kulwana penzi limwi, inga kakuli nzila imwi iikonzya kugwasya kwiinda yeeyo njotulomba. Zimwi ziindi, zintu nzyotulomba inga kaziteendelani amakanze aa Jehova. (1Joh. 5:14) Mucikozyanyo, amubone bazyali bakalomba Jehova kuti mwanaabo azumanane kuba mukasimpe. Kulomba ooku kwakali kulibonya mbuli kuti kuli buyo kabotu. Nokuba boobo, Jehova takonzyi kusinikizya muntu uuli woonse kumubelekela. Uyanda kuti toonse, kubikkilizya abana besu katulisalila buya kumubelekela. (Dt. 10:12, 13; 30:19, 20) Aboobo bazyali balakonzya kulomba Jehova kuti abagwasye kumusika amoyo mwanaabo, kutegwa mwana ooyo kamuyanda Jehova alimwi abe acilongwe anguwe.—Tus. 22:6; Ef. 6:4. w23.11 21 ¶5; 23 ¶12

Nkaambo nzi kuumbulizya bamwi ncoili nzila iiyandika kapati yakutondezya luyando? Kweelana ambolyakaamba bbuku limwi ilyaamba zyamu Bbaibbele, ibbala ndyaakabelesya Paulo ilyakasandululwa kuti ‘kuumbulizya,’ lyaamba “kwiimina munsi-munsi amuntu umwi kutegwa mumukulwaizye ciindi nali mubukkale bukatazya.” Aboobo, kwiinda mukuumbulizya musyomima uuli mumapenzi, nkokuti tumugwasya kuti anyamuke akuzumanana kweenda munzila iitola kubuumi. Kufwumbwa ciindi notuumbulizya mukwesu naa mucizyi, tutondezya kuti tulamuyanda. (2Kor. 7:6, 7, 13) Lweetelelo alimwi akupa luumbulizyo ziliswaangene kapati. Ino ziswaangene buti? Muntu silweetelelo ulayanda kuumbulizya bamwi alimwi akusola kucita cintu cimwi cikonzya kubagwasya. Aboobo ciindi notufwida bamwi lweetelelo, citupa kuti tubaumbulizye. Paulo wakatondezya kuti lweetelelo ndwajisi Jehova kubantu ndolumupa kubaumbulizya. Wakaamba Jehova kuti ngu “Taata siluse a Leza siluumbulizyo loonse.”—2Kor. 1:3. w23.11 9-10 ¶8-10

Basikutobela Kristo boonse balalangilwa kujana mapenzi. Amubone cikozyanyo ca Paulo. Wakaambila baabo ibakali ku Tesalonika kuti: “Notwakali andinywe, twakali kumwaambilila limwi kuti tuyoocitikilwa mapenzi, alimwi eeco ncicacitika.” (1Tes. 3:4) Mpoonya bana Korinto wakabalembela kuti: “Bakwesu tatuyandi kuti kamutaazyi mapenzi aakatucitikila . . . twakali kuzumbauzya buya kuti naa tulapona.” (2Kor. 1:8; 11:23-27) Ncimwi buyo amazuba aano, Banakristo balakonzya kujana mapenzi. (2Tim. 3:12) Akaambo kakuba alusyomo muli Jesu alimwi akuba sikumutobela, balongwe banu abacibbululu balakonzya kumweendelezya calunya. Sena kusyomeka muzintu zyoonse kwamuletela mapenzi kumulimo? (Heb. 13:18) Sena mulapenzyegwa amfwulumende akaambo kakuti mwakaambila bamwi nzyomusyoma? Paulo wakaamba kuti tweelede kukkomana tacikwe makani amapenzi ngotukonzya kujana. w23.12 10-11 ¶9-10

Jakobo wakaliyumya kumapenzi manji. Bana ba Jakobo basankwa bobilo, Simeoni a Levi, bakaleta masampu kumukwasyi akuzina lya Jehova. Kuyungizya waawo, wakafwidwa mukaintu wakwe Rakele ngwaakali kuyandisya kapati ciindi naakali kutumbuka mwanaakwe wabili. Mpoonya akaambo kanzala mpati yakaba, Jakobo wakalongela ku Egepita kacembeede. (Matl. 35:16-19; 37:28; 45:9-11, 28) Nokuba kuti wakajana mapenzi woonse aaya, Jakobo kunyina naakaleka kusyoma Jehova azisyomezyo zyakwe. Aboobo, awalo Jehova wakatondezya kuti wakali kumukkomanina. Mucikozyanyo, Jehova wakamulongezya Jakobo kwiinda mukumupa kuba alubono lunji. Alimwi amuciyeeyele buyo Jakobo mbwaakamulumba kapati Jehova ciindi naakabonana alimwi amwanaakwe Josefa, walo ngwaakali kuyeeyela kuti wakafwa kaindi! Cilongwe ciyumu ncaakajisi a Jehova cakamugwasya kuliyumya mumapenzi ngaakajisi. (Matl. 30:43; 32:9, 10; 46:28-30) Mbubwenya buyo, kuti twazumanana kuba acilongwe ciyumu a Jehova, andiswe tulakonzya kuliyumya kumapenzi aaboola cakutayeeyela. w23.04 15 ¶6-7

Intembauzyo 23 ndwiimbo lutondezya lusyomo muluyando lwa Jehova alimwi ambwatulanganya. Mulembi wantembauzyo eeyi Davida, ulapandulula mbocakali ciyumu cilongwe ncaakajisi amweembezi wakwe, Jehova. Davida wakali kulimvwa kukwabililwa ciindi naakali kuzumizya Jehova kuti amusololele alimwi wakali kumusyoma cakumaninina. Amana buya Davida wakalizyi kuti Jehova wakali kuyoozumanana kumuyanda mazuba oonse abuumi bwakwe. Ino ncinzi cakali kumupa kuba alusyomo luli boobu? Davida wakali kulimvwa kubikkilwa maano akaambo kakuti Jehova lyoonse wakali kumupa nzyaakali kuyandika. Kunze lyaboobo, Davida wakalizyi kuti Jehova mulongwe wakwe alimwi akuti wakali kumukkomanina. Nkakaambo kaako ncaakasinizyide kuti kufwumbwa cakali kuyoomucitikila mubuumi, Jehova wakali kuyoozumanana kumupa nzyaakali kuyandika. Akaambo kakuti Davida wakali kusyoma kuti Jehova wakali kumuyanda kapati akumulanganya, cakamupa kutalibilika, kuba alukkomano alimwi akukkutila.—Int. 16:11. w24.01 29 ¶12-13

Kuzwa lya Nkondo Yabili Yanyika Yoonse, bantu ba Jehova balijisi lwaanguluko lwakukambauka muzisi zinji. Mane buya, bantu banji baba acoolwe cakumuzyiba Jehova alimwi babelesi bakwe baluujisi kukambauka munyika yoonse. Mazuba aano, bamu Kabunga Keendelezya bazumanana kulanga kuli Kristo kuti abape busolozi. Bayanda kuti malailile oonse ngobapa bakwesu abacizyi kaatondezya kuti azwa kuli Leza a Kristo. Mpoonya babelesya balangizi bamabazu abaalu kupa malailile aayo kumbungano. Baalu bananike kubikkilizya abaalu boonse mumbungano bali “mujanza lya [Kristo] lyalulyo.” (Ciy. 2:1) Nokuba boobo, baalu aaba tabalondokede alimwi balalubizya. Awalo Musa a Joshua bakali kulubizya zimwi ziindi mbubonya mbuli baapostolo. (My. 20:12; Jos. 9:14, 15; Rom. 3:23) Pele cilalibonya caantangalala kuti Jesu nguusololela muzike uusyomeka abaalu, alimwi uyoozumanana kucita boobo. Aboobo, tulijisi twaambo tubotu itweelede kutupa kubusyoma busolozi mbwatupa kwiinda muli baabo mbasalide kuti kabasololela. w24.02 23-24 ¶13-14

Mazuba aano, tulakonzya kumukkomanisya Jehova kwiinda mukwaambila bamwi kujatikizya nguwe munzila iitondezya kuti tulalumba alimwi akumuyanda kapati. Ciindi notuli mumulimo wakukambauka, makanze eesu mapati ngakugwasya bamwi kuti babe acilongwe a Jehova alimwi akulimvwa mbuli mbotulimvwa kujatikizya Taateesu. (Jak. 4:8) Tulakkomana kwaambila bamwi kujatikizya Bbaibbele mbolimupandulula Jehova, mboliyubununa luyando lwakwe, bululami, busongo, nguzu alimwi abube bumwi bubotu mbwajisi. Kunze lyaboobo, tulamutembaula Jehova akumukkomanisya kwiinda mukusolekesya kumwiiya. Ciindi notucita oobo, bamwi balakonzya kubona kuti tuliindene kapati abantu bamunyika iino mbyaabi. (Mt. 5:14-16) Mpoonya ciindi notucita zintu zyabuzuba abuzuba ambabo, tulakonzya kubaambila kaambo ncotwiindene abamwi. Akaambo kaceeci, babombe myoyo balakonzya kuyanda kuba acilongwe a Leza wesu. Aboobo ciindi notumutembaula Jehova munzila eeyi, tupa kuti moyo wakwe ukkomane.—1Tim. 2:3, 4. w24.02 10 ¶7

Kutegwa mube Munakristo uusimide, mweelede kwiiya zintu zimwi zikonzya kumugwasya. Kwiiya zintu eezyi kuyoomugwasya kulanganya mikuli yamumbungano, kubeleka mulimo wakumubili kutegwa kamujana mali aakuligwasya naa kugwasya mukwasyi alimwi akumvwana abamwi. Mucikozyanyo, amwiiye kubala akulemba kabotu. Bbaibbele lyaamba kuti muntu uukkomene alimwi uukonzya kuzwidilila ulajana ciindi cakubala Jwi lya Leza buzuba abuzuba alimwi akuzinzibala kuyeeya ncabala. (Int. 1:1-3) Kwiinda mukubala Bbaibbele buzuba abuzuba, ulakonzya kuzyiba mbwayeeya Jehova, calo icikonzya kumugwasya kuyeeya kabotu alimwi akuzyiba mbwakonzya kwaabelesya Magwalo. (Tus. 1:3, 4) Bakwesu abacizyi bayandika lugwasyo lwabamaalumi ibakonzya kuyiisya kabotu akupa lulayo lwamu Bbaibbele. Ikuti kamucikonzya kubala akulemba kabotu, muyoocikonzya kulibambila makani alimwi abwiinguzi bukonzya kugwasya bamwi akuyumya lusyomo lwabo. Kunze lyaboobo, muyoocikonzya kulemba twaambo tugwasya ituyooyumya lusyomo lwanu alimwi akukulwaizya bamwi. w23.12 26-27 ¶9-11

Ciindi nomwayoowa, amuzinzibale kuyeeya zintu Jehova nzyayoocita kumbele ciindi Saatani aakunyonyoonwa. Citondezyo cimwi icakali amuswaangano wacooko wamu 2014 cakatondezya mbotukonzya kuzinzibala kuyeeya bausyi babandika amukwasyi wabo kujatikizya lugwalo lwa 2 Timoteyo 3:1-5 mbolukonzya kubalwa kuti naa kalwaamba zintu mboziyooba mu Paradaiso. Bakaamba kuti: “Pele kozyiba kuti, munyika mpya kuyooba mazuba aakkomanisya ncobeni. Nkaambo bantu banooyandana, bayanda zintu zyakumuuya, batalidundi, batalisumpuli, bayandisya Leza, bamvwida bazyali, balumba, basyomeka, bajisi luyando kubanamukwasyi, banyoneka, lyoonse baamba zibotu kujatikizya bamwi, balilesya, babombe, bayanda bubotu, basyomeka kuli bamwi, balaika, batalitukumuni, bayandisya Leza kwiinda zyakulikondelezya, balyaabide ncobeni mubukombi; eelyo kokakatila kubantu bali boobu.” Sena mulabandika abanamukwasyi naa basyominyoko kujatikizya buumi mbobuyooba munyika mpya? w24.01 6 ¶13-14

Eelo kaka cilakkomanisya kuzyiba kuti Jehova ulabakkomanina bantu bakwe! Kayi Bbaibbele lyaamba kuti: “Jehova ulabakkomanina bantu bakwe.” (Int. 149:4) Nokuba boobo, zimwi ziindi bamwi balatyompwa kapati cakuti balakonzya kutalika kulibuzya kuti, ‘Mwati Jehova ulandikkomanina buya mebo?’ Bunji bwabantu baambidwe mu Bbaibbele ibakali kumubelekela Jehova cakusyomeka, zimwi ziindi abalo bakali kulimvwa boobo. (1Sam. 1:6-10; Job. 29:2, 4; Int. 51:11) Cakutainda mumbali, Bbaibbele litondezya kuti bantu batalondokede balakonzya kukkomaninwa a Jehova. Mubuti? Tulakonzya kucita oobo kwiinda mukuba alusyomo muli Jesu Kristo akubbapatizyigwa. (Joh. 3:16) Kwiinda mukucita boobo, tutondezya bamwi kuti twakeempwa kuzibi zyesu akusyomezya Leza kuti tuyanda kucita kuyanda kwakwe. (Mil. 2:38; 3:19) Alimwi Jehova ulakkomana kapati ciindi notubweza ntaamu eezyi kutegwa tube aacilongwe anguwe. Aboobo kufwumbwa buyo kuti twazumanana kupona kweelana acikonke cesu cakulyaaba, Jehova unootukkomanina akutubona kuti tuli balongwe bakwe.—Int. 25:14. w24.03 26 ¶1-2

Ikuti naa mfwulumende yatwaambila kuti tuleke kukambauka, andiswe tulakonzya kubayiya basikwiiya aaba kwiinda mukuzumanana kukambauka. Tulakonzya kuba alusyomo lwakuti Jehova uyootugwasya kuzuzikizya mulimo wesu. Aboobo, tweelede kupaila kulomba busicamba alimwi abusongo akulomba Jehova kuti amugwasye kuliyumya kumapenzi. Bunji bwesu tulapenga akaambo kakuciswa, kukopana mumizeezo, kufwidwa muyandwa, bukkale bukatazya bwamumukwasyi, kupenzyegwa naa mapenzi aambi buyo. Alimwi zintu mbuli malwazi aayambukila ankondo zyapa kuti ciindile buya kukatazya kuliyumya kumapenzi aaya. Aboobo amumwaambile Jehova bwini mbomulimvwa. Amumwaambile bukkale bwanu mbubonya mbomukonzya kwaambila mulongwe ngomusyoma. Amusyome kuti Jehova ‘ulamugwasya.’ (Int. 37:3, 5) Kuzumanana kupaila kulakonzya kutugwasya ‘kuliyumya mumapenzi.’ (Rom. 12:12) Jehova ulizyi mapenzi ngobajisi bakombi bakwe, aboobo “ulamvwa nobakwiilila lugwasyo.”—Int. 145:18, 19. w23.05 5-6 ¶12-15

Ciindi notuyanda kupanga zyakusala ziyandika kapati, tweelede kusaanguna kuzyiba “ncayanda Jehova” mpoonya akucicita. (Ef. 5:17) Kwiinda mukuzyiba njiisyo zyamu Bbaibbele nzyotukonzya kubelesya mubukkale bwesu, nkokuti tuyanda kuzyiba mbwayeeya Leza kujatikizya bukkale oobo. Kumane twazibelesya njiisyo eezyo, tuyoocikonzya kusala kabotu. Sinkondoma Saatani, iwaambwa kuti ‘mubi,’ uyanda kuti tujate bubi kapati kuyandaula zintu zyamunyika eeyi kutegwa twaalilwe kujana ciindi cakubelekela Leza. (1Joh. 5:19) Mucikozyanyo, Munakristo ulakonzya kutalika kubikkila kapati maano kumali, lwiiyo naa mulimo muciindi cakubikkila maano kuzyoolwe ziindene-indene zyakubelekela Jehova. Aboobo eeci cilakonzya kutondezya kuti Munakristo ooyo watalika kuyeeya mbuli bantu bamunyika. Nokuba kuti zintu eezyi kuzigama tazilubide, pele tazyeelede kuba mubusena bwakusaanguna mubuumi bwesu. w24.03 24 ¶16-17