Tamukayandi Kwiindwa Pe!
IKWIINDWA nzi ino? Imuswaangano Wacooko wa Bakamboni ba Jehova wa “Batumwa Baluumuno lwa Buna Leza,” walo uuzaabuza afwaafwi cakubindaana! Bunji bwamasena, muswaangano oyu uyootalika aciindi ca 9:30 muli Bwasanu anyimbo zyakuswiilila. Mwaakumana kuswiilila kubuzya-buzya mumakani aakuti “Ikulwiidwa a Basikwaambilizya Basungweede Baluumuno,” muyookondwa kukulwaizigwa amakani aakuti “Ncinzi Leza Ncayanda Kulindiswe?”
Makani aantalisyo alo aabusya-busya ayooba ngamapati kumazuba muli Bwasanu aakuti “Mulimo Wesu Wabutumwa Bwaluumuno lwa Buna Leza.” Mpoona makani aakuti “Ikugwasya Bamwi Kwiiya Nzyayanda Leza” ayoopa mizeezo mbuli mbotunga twayiisya bantu bapya. Aya ayootobelwa amakani aakusiilana aakuti “Amucenjele Atooye Tutalibonyi Ituli Mukulikondelezya.” Muswaangano mubuzuba Bwasanu uyoomana amakani aakuti “Amumukazye Daibolosi—Amufwe Ibbivwe” alimwi aakuti “Kuvwuninina Kululama kwa Jwi lya Leza Cakusyomeka.”
Cibeela camuswaangano camafwumofwumo mu Mujibelo ciyoosolozya bupati bwamulimo wakupa kuti bantu babe basiciiya mumakani aakusiilana aazibeela zyotatwe aakuti “Batumwa Baleta Makani Mabotu aa Luumuno.” Cibeela eci ciyoomana amilumbe yakuti “Ikupa Calumwemwe Mukati Kambunga ya Jehova” alimwi awakuti “Ibuumi a Luumuno Kwiinda Mukulyaaba a Kubbapatizigwa,” mpoona kuyooba ciindi cakubbapatizigwa kwabasiciiya bapya.
Mu Mujibelo kumazuba imulumbe wakuti “Amumvwe Mbwayeeya Jehova Mutwaambo” uyooingula mibuzyo mbuli yakuti ‘Sena Banakristo balaa lubazu mumulimo wakuzandula sunu?’ alimwi awakuti ‘Ino Bbaibbele liimvwi ali kumakani aacisubulo calufwu cipegwa ankuta?’ Alimwi muyookondwa amakani aakusiilana aali muzibeela zyobile aakuti “Leza Waluumuno Ulamulanganya Nywebo” alimwi kapati makani aamamanino aakuti “Amuyandaule Luumuno Lwabunaleza Mubukkale Bwamukwasyi Wanu.”
Cibeela camafwumofwumo mu Nsondo ciyoobikkilizya amakani aakusiilana aali muzibeela zyotatwe aakuti “Ikuzyiba Musyobo Uuluzi wa Batumwa,” amakani aakuti “Amuswiilile Akumvwida Jwi lya Leza.” Cibeela camafwumofwumo ciyoomana acisobano cizwide iciyoozubaula ziiyo zigwasya kuzwa mumakani aamu Bbaibbele aaluula Mubetesi Gideoni.
Cibeela camuswaangano icamamanino kumazuba mu Nsondo cinooli aamakani aakubuleya, aalaa mutwe wakuti “Luumuno Lwini-Lwini!—Luyoozwa Kuli?” Mpoona ikujala mulyango, makani aakukulwaizya aakuti “Kuyaambele Katuli Batumwa Baluumuno lwa Buna Leza” ngaayoosisya muswaangano kumamanino.
Amulibambile lino ikuyoojanika oko. Kutegwa muzyibe busena buli afwiifwi loko, amubuzye ku Ŋanda ya Bwami ya Bakamboni ba Jehova nyinzi kubusena oko, antela mulembele basikumwaya magazini eeyi.