Muswaangano wa “Batumwa Baluumuno lwa Bunaleza” wa 1996
ICIINDI cansiku bantu ba Jehova bakali kusekelela mapobwe mapati-pati otatwe amwaka. Mbubwena buyo asunu bantu ba Jehova balaswaangana ziindi zyotatwe amwaka kuti basekelele. Balakkomana kubungana antoomwe kumuswaangano waalubazu wa buzuba bomwe, wabbazu wamazuba obile alimwi awacooko wamazuba otatwe naa one. Uuno mwaka muswaangano wacooko unooli amutwe wakuti “Batumwa Baluumuno lwa BunaLeza.”
Elo nkweelela mutwe oyu! Leza wesu ‘Jehova ngu Leza wa Luumuno’ ee ‘ngu Leza uupa Luumuno.’ Musololi wesu Jesu Kristo “[m]Mwami wa Luumuno” alimwi mulumbe ngobajisi babelesi ba Jehova mmulumbe wa Luumuno lwabuna Leza. (Ba-Filipi 4:9; Ba-Roma 15:33; Isaya 9:6; Nahumu 1:15) Iprogramu ibotelezya yamuswaangano oyu yabambwa iiyootugwasya toonse kuti tubone mbolulaa makani mapati luumuno lwabuna Leza.
Uuno mwaka mu United States mwalikke muya kuba miswaangano iili 198. Akwalo munsi-munsi ankomukkala kulalangilwa kuba muswaangano. Sena inga tamubuzyi-buzyi kuli Bakamboni ba Jehova basicisi kutegwa muzibe buzuba bwini-bwini abusena nkuuyoobeda mwamana mutalike kulibambila kuyoojanika? Aabo boonse bayandisya Luumuno lwini-lwini iluteeli bayootambulwa camaanza obile.