Basikulwana Leza Tabakazwidilili pe!
“Bayookulwisya, pele tabakooyookuzunda pe.”—JEREMIYA 1:19.
1. Mmulimo nzi Jeremiya ngwaakatumwa, alimwi ino mulimo oyu wakazumanana kwaciindi cilamfwu buti?
JEHOVA wakatuma mukubusi Jeremiya kuti abe musinsimi kuli bamasi. (Jeremiya 1:5) Eci cakacitika kuciindi cabweendelezi bwa Mwami mubotu Josiya wakali kulela cisi ca Juda. Mulimo wa Jeremiya wabusinsimi wakazumanana kuyakusika kuciindi camapenzi munzi wa Jerusalemu kuutanazundwaa bana Babuloni alimwi abantu ba Leza kabatanatolwa buzike.—Jeremiya 1:1-3.
2. Ino Jehova wakamuyumya buti Jeremiya, alimwi ino kulwana musinsimi oyo cakeelene aakutyani?
2 Imilumbe yalubeteko njaakeelede kwaambilizya Jeremiya yakali kulangilwa kuleta kukazigwa. Akaambo kaceeci, Leza wakamuyumya kujatikizya mapenzi aakali kuza kumbele. (Jeremiya 1:8-10) Mucikozyanyo, musinsimi oyo wakayumizigwa amajwi aakuti: “Bayookulwisya, pele tabakooyookuzunda pe, nkaambo ndi ayebo, nzookuvuna, mbwaamba Jehova.” (Jeremiya 1:19) Ikulwana Jeremiya cakeelene buyo akulwana Leza. Sunu Jehova ulijisi nkamu yababelesi ibali mbuli basinsimi ibalaa mulimo uukozyenye angwaakacita Jeremiya. Balaambilizya cabusicamba jwi lya Leza lyabusinsimi mbubonya mbuli nguwe. Mulumbe ngobaambilizya ujatikizya bantu boonse amasi oonse munzila mbotu naa mbyaabi kweelanaa mbobautambula. Mbubonya mbuli muciindi ca Jeremiya, kuli baabo balwana Leza kwiinda mukusulaika akukasya milimo njobatumidwe kucita a Leza babelesi bakwe.
Babelesi ba Jehova Bali Mukulwanwa
3. Nkaambo nzi babelesi ba Jehova ncobali mukulwanwa?
3 Kuzwa kumatalikilo kwini kwamwaanda wamyaka wa 20, ibantu ba Jehova bali mukulwanwa. Mumasi manji ibaalumi balaa makanze mabyaabi basola kukasya—nkokuti ikuumuzya basikukambauka makani mabotu aajatikizya Bwami bwa Leza. Bali kutonkelezegwaa Sinkondoma mupati Diabolosi walo ‘weendeenda mbuli syuumbwa wabutambo akuya buyandaula ngwati lume.’ (1 Petro 5:8) Nocakamana “ciindi cabamasi” mu 1914, Leza wakabikka Mwanaakwe acuuno cabwami kuti abe ngo Mwami mupya wanyika akumulailila kuti: ‘Ba mweendelezi akati kabasinkondonyoko.’ (Luka 21:24; Intembauzyo 110:2) Kristo wakabelesya nguzu zyakwe zya Bwami ikuwisya Saatani aansi kuzwa kujulu akumujalilila anyika. Akaambo kakuti ulizi kuti ciindi camuceela, Diabolosi ulinyemede kapati elyo bukali bwakwe ubutondezyela ku Banakristo bananike abeenzinyina. (Ciyubunuzyo 12:9, 17) Ino ncinzi cacitika akaambo kankondo eyi yazumanana iilwanwaa basikukazya Leza aaba?
4. Mmasunko nzi ngobakayanaangawo bantu ba Jehova kuciindi ca Nkondo Yakusaanguna Yanyika, pele ino ncinzi cakacitika mu 1919 amu 1922?
4 Iciindi ca Nkondo Yakusaanguna Yanyika ibabelesi ba Jehova bananike bakainda mumasunko manji aalusyomo. Bakasampaulwa akubejelezegwa akutandaanizigwa ankamu zyabantu alimwi bakaumwa. ‘Bakasulaikwa abantu bamisyobo yoonse’ mbubwenya mbwaakasinsima Jesu. (Matayo 24:9) Akati kamanyongwe aakaletwaa nkondo, basinkondonyina Bwami bwa Leza bakabelesya bucenjezu ibwakabelesegwa kuli Jesu Kristo. Bakabejelezya bantu ba Jehova kuti mbaasikubukila mfwulumende alimwi bakajata acisiko eni cambunga ya Leza iilibonya. Mu May 1918, mfwulumende yakalailila kuti mweendelezi wa Watch Tower Society J. F. Rutherford abeenzinyina mbocakali kubeleka limwi bali ciloba bajatwe. Aaba baalumi bali lusele bakapegwa zisubulo zipati zyakwaangwa akutumwa kuntolongo yamfwulumende yaku Atlanta ku Georgia mucisi ca U.S.A. Nokwakainda myezi iili fwuka bakaangululwa. Mpoonya mu May 1919, inkuta nsyoonto yakwiindulula lubeta yakakosola kuti aaba bantu basimilandu tiibakabetekwa camumulawo. Kwakategwa kaambo kabetekwe alimwi, pele bamfwulumende kumbele bakaamba kuti mulandu ulekwe kubetekwa, elyo kwakakosolwa kuti Mukwesu Rutherford abeenzinyina teebakajisi mulandu kutwaambo toonse ntobakabejelezegwa. Bakazumanana amilimo yabo alimwi imiswaangano yakacitwa ku Cedar Point ku Ohio mu 1919 amu 1922 yakabakulwaizya kusungwaalila mulimo wakukambauka Bwami alimwi.
5. Ino buumi bwakali buti kuli Bakamboni ba Jehova mucisi ca Nazi Germany?
5 Mumyaka yamuma 1930 masi aabulelo bwalunya akatalika kweendelezya, elyo zisi zya Germany a Italy alimwi a Japan zyakabamba Cizuminano cakujatana antoomwe. Kumatalikilo aakkumi lyamyaka elyo, bantu ba Leza bakapenzegwa calunya, ikapati mucisi ca Nazi Germany. Mulimo wakakasigwa. Mumaanda kwakacitwa cipeekani, abakkala mumo bakali kujatwa akwaangwa. Zyuulu zyabakwesu abacizi bakabikkwa muzilabba zyabuzike akaambo kakuti bakakaka kucita cintu citeendelani alusyomo lwabo. Ikulwana Leza alimwi abantu bakwe kwakali kwakuti babamane Bakamboni ba Jehova mumasi oonse aya aalunya. Bakamboni nobakaunka kunkuta mucisi ca Germany kukulwanina nguzu nzyobakajisi mumulawo, iba Cibeela camfwulumende Cilanganya Zyambeta icitegwa Reich’s Ministry of Justice bakalemba twaambo tunji kapati twakali kunga twapa kuti Bakamboni ba Jehova batazwidilili. Bakati: “Inkuta tazyeelede kuzundwa akaambo kakutobela tulawo-lawo tuliko; pele nokuba kuti kwabuka twaambo tuyumu, inkuta zyeelede kuyandaula akujana nzila izyakuzuzikizya milimo yazyo iiyandika kapati.” Eeci cakaamba kuti makani taakali kunoobetekwa munzila iluzi pe. Iba Nazi bakali kwaamba kuti milimo ya Bakamboni ba Jehova yakali yabulwani alimwi yakali ‘kunyonganya Bukkale Bwacisi.’
6. Nkusoleka nzi ikwakacitwa kwakulesya mulimo wesu lya Nkondo Yabili Yanyika akuzwa kuciindi eco?
6 Lya Nkondo Yabili Yanyika, mulimo wabantu ba Leza wakakasigwa mu Australia a Canada alimwi amasi aambi aakali Mubulelo bwa Britain—mu Afulika amu Asia amunsumbu zya Caribbean azyamu lwaanje lwa Pacific. Mu United States basinkondoma ibakali muzyuuno zyabweendelezi alimwi abantu bakali kucengwa bakatalika ‘kubikka milawo yakupenzya.’ (Intembauzyo 94:20) Pele milandu iijatikizya kutasuluta ndembela alimwi amilawo yabantu yakali kukasya kukambauka ŋanda aŋanda yakatolwa kunkuta, elyo nkuta teezyakabajanina mulandu, aboobo eci cakapa kuti lwaanguluko lwakukomba lusumpulwe mu United States. Akaambo kalugwasyo lwa Jehova, basinkondoma teebakazwidilila pe. Inkondo noyakamana mu Europe, milawo yakali kukasya bukombi yakagwisigwa. Bakamboni basika kuzyuulu-zyuulu ibakaangidwe muzilabba zyabuzike bakaangululwa, pele nkondo yakacili kuzumanana. Mboyakamanina buyo Nkondo Yabili Yanyika, kwakatalika Nkondo Yakukongana buyo amulomo. Masi aaku Eastern Europe akatalika kupenzya bantu ba Jehova. Imfwulumende zyakabweza ntaamu yakusinkilila akulesya milimo yesu yakukambauka, akukasya kumwaigwa kwamabbuku aamba makani aa Bbaibbele alimwi akukasya miswaangano yesu yabuleya. Ibanji bakaangwa naa kutolwa muzilabba zyabuzike.
Ikuzumanana Amulimo Wakukambauka!
7. Ncinzi cacitikila Bakamboni ba Jehova mu Poland amu Russia alimwi amuzisi zimbi mumyaka yalino-lino?
7 Nokwakainda makumi aamyaka aali mbwaabede, mulimo wa Bwami wakukambauka wakazumizigwa. Icisi ca Poland nokuba kuti cakali kweendelezegwaa bulelo bwa Kkomyunizimu cakazumizya kuti miswaangano yabuzuba bomwe icitwe mu 1982. Kuzwawaawo miswaangano yamasi yakacitwa kucisi eco mu 1985. Mu 1989 kwakatobela miswaangano yamasi mipati kapati kwalo ikwakajanika zyuulu-zyuulu zyabantu bakazwa ku Russia a Ukraine. Mwaka ngweenya oyo imfwulumende ya Hungary aya Poland yakabazumizya Bakamboni ba Jehova kwiinda mumulawo. Icilimo mumwaka wa 1989, imunyinza wakali kwaandaanya cisi ca Germany utegwa Berlin Wall wakamwaigwa. Nokwakainda buyo myezi misyoonto, mulimo wesu wakazumizigwa mucisi ca East Germany, mpoonya teelyakalampa kuzwa ciindi eco kwakacitwa muswaangano wamasi mu Berlin. Alimwi kumatalikilo aakkumi lyamyaka lyamamanino mumwaanda wamyaka wa 20, bakwesu bakasoleka kukanana cakaanzambwene abakwesu baku Russia. Beendelezi bamwi bamfwulumende ku Moscow bakasikilwa, elyo mu 1991 Bakamboni ba Jehova bakalembesegwa mumulawo. Kuzwa ciindi eco mulimo wayaambele kapati mu Russia alimwi amuzisi ezyo zyakali cibeela cacisi cakali kwiitwa kuti Soviet Union.
8. Ncinzi cakacitikila Bakamboni ba Jehova mumyaka iili 45 yakatobela kuzwa ciindi noyakamana Nkondo Yabili Yanyika?
8 Mumasena aambi kupenzegwa nokwakamana, imumwi kwakaindila buya. Mumyaka iili 45 yakatobela kuzwa ciindi lyakali nkondo yabili yanyika, masi manji akakaka kulembya Bakamboni ba Jehova mumulawo. Kunze lyaboobo, mulimo wesu wakakasilwa limwi mumasi aali 23 mu Afulika, aali 9 mu Asia, aali 8 mu Europe, aali 3 mu Latin America alimwi amunsumbu zili 4.
9. Mmapenzi nzi aakacitikila babelesi ba Jehova ku Malawi?
9 Bakamboni ba Jehova ku Malawi bakapenzegwa calunya kutalikila mu 1967. Ibakwesu mucisi eco bakakaka kuula makkaadi aankamu yamapolitikisi akaambo kakuti Mbanakristo bakasimpe ibatatoli lubazu mutwaambo twacisi. (Johane 17:16) Ikuzwa ciindi nowakacitwa muswaangano wa Malawi Congress Party mu 1972, kupenzegwa calunya kwakaindila. Ibakwesu bakatandwa mumaandaabo alimwi teebakali kunjizigwa milimo. Izyuulu-zyuulu zyabakwesu bakapola mucisi kutegwa batajaigwi. Pele sena ibalwani ba Leza alimwi ababantu bwakwe bakazwidilila? Peepe! Ibukkale nobwakacinca, basikumwaya ba Bwami basika kumweelwe waatala wa 43,767 bakacita lipooti ku Malawi mu 1999 alimwi ibantu bainda ku 120,000 bakajanika kumiswaangano yacooko mucisi eco. Kwakayakwa ofesi lyamutabi ipya mudolopo lipati.
Bayandaula Aakujanina Mulandu
10. Ncinzi basikukazya bantu ba Leza bamazubaano ncobacita mbubwenya mbuli mbobaacitila Daniele?
10 Basiluleyo, abasololi bazikombelo alimwi abantu bambi balakatazigwa nobamvwa mulumbe wesu wa Jwi lya Leza. Akaambo kakoongelezegwaa mbunga zimwi zya Kristendomu, basikukazya basola kuyandaula kaambo kabapa mulawo wakutulwana. Ino ninzila nzi zimwi zyabucenjezu nzyobabelesya? Ino ncinzi ncobakacita basinkondonyina mukulwana musinsimi Daniele? Kubbuku lya Daniele 6:4, 5 tubala kuti: “Lino basilutwe abeendelezi bakali kuyandaula makani kuti babikile Daniele kaambo kumakani aacisi, pele bakakacilwa kujana makani nikaba kaambo kali buti, nkaambo Daniele wakasyomeka, alimwi katakwe kampenda nekaba kaambo kali buti ikakajanwa mulinguwe. Mpawo aba bantu bakaamba kuti, Tatukonzyi kujana kaambo nekaba kamwi kakubikila oyu Daniele, cita tumupe kaambo mumakani aankombelo ya-Leza wakwe.” Asunu mbubonya basikukazya bayandaula kaambo. Balazumanana kwaambila buleya kuti kuli “nkamu zyazikombelo zibyaabi” eelyo baamba kuti Bakamboni ba Jehova bali akati kankamu ezi. Kwiinda mukutubejelezya, akubelesya masendelezya alimwi amakani aakubeja balwana bukombi bwesu akutobela nkotutobela njiisyo zya Leza.
11. Mmakani nzi aakubeja aambwaa basikukazya Bakamboni ba Jehova?
11 Mumasi amwi, imbunga zyaandeene-andeene zyabukombi alimwi azyamapolitikisi taziyandi kuzumina kuti swebo tuli ‘mubusyomi busalala butakwe kampenda mumeso aa-Leza.’ (Jakobo 1:27) Baamba kuti tuli “cikombelo citazizilwe,” nokuba kuti milimo yesu ya Bunakristo ilacitwa mumasi aasika ku 234. Mu 1998 kakusyeede mazuba masyoonto kuti utalikwe muswaangano wamasi, imuteende waku Athens wakazubulula majwi aamusololi wacikombelo ca Greek Orthodox aakuti “cikombelo [ca Bakamboni ba Jehova] ‘tacizizilwe pe,’” nokuba kuti yalo nkuta iitegwa European Court of Human Rights yakaambide kuti cilizizilwe. Kwiinde buyo mazuba masyoonto kuzwa ciindi eco, imuteende uumbi mudolopo ndyoonya wakaluula majwi ngakaamba umwi mwiiminizi wacikombelo aakuti: “[Bakamboni ba Jehova] tabakonzyi kuba ‘mbungano ya Bunakristo,’ nkaambo tabatobeli lusyomo lwa Bunakristo kujatikizya lubazu ndwajisi Jesu Kristo.” Eeci cilagambya cini-cini nkaambo taakwe cikombelo cimbi pe kuleka Bakamboni ba Jehova ciyiisya kapati kutobela Jesu.
12. Ncinzi ncotweelede kucita notulwana nkondo yesu yakumuuya?
12 Tulasola mbuli mbotukonzya kukwabilila akukkazikizya makani mabotu mumulawo. (Ba-Filipi 1:7) Alimwi tatukonzyi kuleka kutobela zyeelelo zya Leza zyabululami. (Tito 2:10, 12) Mbubwenya mbuli Jeremiya ‘tulalyaanga mucibuno akwaamba majwi oonse ngaatulailila Jehova,’ tatuzumizyi balwani ba Leza kutukonga. (Jeremiya 1:17, 18) Jwi lya Jehova Lisalala, lyatulailila kabotu-kabotu nzila iluzi njotweelede kutobela. Kunyina notuyanda kusyoma ‘mukuboko kwanyama buyo’ naa “kusyoma cenzule ca-Egepita,” nkokuti nyika eyi. (2 Makani 32:8; Isaya 30:3; 31:1-3) Notulwana nkondo yesu yakumuuya atuzumanane kusyoma muli Jehova camoyo woonse, atusololele munzila zyesu zyoonse alimwi tutalifwunkizyi kumaanu eesu tobeni. (Tusimpi 3:5-7) Ccita kuti Jehova watugwasya alimwi walo kali nguutukwabilila, buyo-buyo milimo yesu yoonse inooli ‘yabuyo.’—Intembauzyo 127:1.
Ibapenzyegwa Pele Ibatazumini Kuleka Nzyobasyoma
13. Nkaambo nzi ncokunga kwaambwa kuti kulwana kwalunya kwakacitwa kuli Jesu tiikwakazwidilila?
13 Icikozyanyo ciinda kubota ncotujisi camuntu wakazumanana kusyoma Jehova nciceeco ca Jesu iwakabejelezegwa kuti wakazangila mfwulumende alimwi akuleta manyongwe mucisi. Naakamana kuulanga-langa mulandu wakapedwe Jesu, Pilato wakaliyandide kumwaangulula. Pele nkamu yabantu akaambo kakutonkelezegwaa basololi bazikombelo bakoompolola kuti Jesu akankaminwe nokuba kuti taakajisi mulandu. Mubusena bwa Jesu bakasala kuti kwaangululwe Baraba muntu wakabikkidwe muntolongo akaambo kalupyopyongano lwakubukila cisi akujaya! Pilato wakasola alimwi kukombelezya basikukazya aaba batayeeyi, pele wakaide kutobela cakali kwaamba buleya. (Luka 23:2, 5, 14, 18-25) Nokuba kuti Jesu wakafwa aacisamu, kulwana oko kwalunya kwakacitwa ku Mwanaa Leza uunyina mulandu kwakakakilwa nkaambo Jehova wakamubusya Jesu akumusumpula alimwi akumubikka kujanza lyakwe lyalulyo. Alimwi mubuzuba bwa Pentekoste mu 33 C.E., kwiinda muli Jesu iwakalemenezegwa, muuya uusalala wakatilwa akutalisya mbungano ya Bunakristo—nkokuti ‘bulenge bupya.’—2 Ba-Korinto 5:17; Incito 2:1-4.
14. Ncinzi cakacitika eelyo inkamu zyabukombi zyaba Juda nozyakakazya basikutobela Jesu?
14 Kwiinde buyo ciindi cisyoonto, basololi bazikombelo bakakonga baapostolo, pele aabo basikutobela Kristo teebakaleka kukanana makani aazintu nzyobakabona akumvwa. Basikwiiya ba Jesu bakapaila akulomba kuti: “Lino Jehova, bona inkonkomwezyo zyabo, ugwasye bazike bako, baambe makani aako akaanzambwene kanji.” (Incito 4:29) Jehova wakaingula mupailo wabo kwiinda mukubapa muuya uusalala akubayumya kuti bazumanane kukambauka cabusicamba. Ndilyonya, ibaapostolo bakalaililwa kuleka kukambauka, pele Petro abamwi baapostolo bakaingula kuti: “Tuleelede kumvwa Leza kwiinda bantu.” (Incito 5:29) Kukongwa akwaangwa alimwi akuumwa taakwe nokwakabalesya kuyaambele mukukambauka makani aa Bwami.
15. Ino Gamaliyeli wakali ni, alimwi ino wakabalailila buti basikukazya babukombi ibakakazya basikutobela Jesu?
15 Ino beendelezi bazikombelo bakalimvwa buti? “Yakabacisa myoyo, bakanza kubajaya [baapostolo].” Pele, umwi mwiiyi wamulawo wazina lya Gamaliyeli mu Farisi wakaliko aawo, nkabela wakali kulemekwa abantu boonse. Wakabatumina aanze aa Nkuta Mpati kwakaindi kaniini baapostolo, mpoonya wakalailila aabo basikukazya babukombi ulaamba: “Nobaalumi ba-Israyeli, amucenjele abantu aba mbomuti cite. . . . Aboobo ndati kulindinywe, Amuzwe kubantu aba, mubaleke, nkaambo kwiisya oku amulimo oyu anooli ngwabantu ulamwaika. Kwalo na nguwa-Leza, tamukookonzya kuumwaya, ambweni mulajanwa kuti mulwanya Leza.”—Incito 5:33-39.
Kunyina Cilwanyo Cibambilwa Kutulwana Iciyoozwidilila
16. Ino inga mwacaamba buti mumajwi aanu nobeni cisyomezyo ncapa bantu bakwe Jehova?
16 Malailile aa Gamaliyeli akali kabotu, alimwi tulabalumba bantu ibatwiiminina. Alimwi tulizi kuti lwaanguluko lwakukomba nkoluli akaambo kababetesi bamunkuta ibakosola makani kabatajisi lusalululo. Ncobeni, ikukakatila nkotukakatila ku Jwi lya Leza alimwi takubakkomanisyi basololi bazikombelo zya Kristendomu alimwi abasololi bamwi bazikombelo zya Babuloni Mupati, ibulelo bwanyika yoonse bwabukombi bwakubeja. (Ciyubunuzyo 18:1-3) Nokuba kuti aaba alimwi abaabo mboboongelezya baluujisi kutulwana, tujisi cisyomezyo eci cakuti: “Taakwe cilwisyo niciba comwe cibumbwa kukulwisya nduwe cikonzya kujana coolwe, andimi zyoonse zibuka kukubeteka uyoozipa mulandu. Nciceeco caabilo cabalanda ba-Jehova akululamikwa kwabo kuzwa kulindime, mbwaamba Jehova.”—Isaya 54:17.
17. Nkaambo nzi ncotuli basicamba nokuba kuti basikukazya balatulwana?
17 Basinkondoma bazumanana kutulwana kakunyina kaambo, pele tatutyompwi pe. (Intembauzyo 109:1-3) Taakwe notutilekele baabo basula mulumbe wesu wa Bbaibbele kutuyoosya kutegwa tusiye lusyomo lwesu. Nokuba kuti tulangila kuti inkondo yesu yakumuuya inooyabwiindila kuyuma, tulizi ciyoocitika. Mbubwenya mbuli Jeremiya, imajwi aabusinsimi aaya aayoozuzikizyigwa kulindiswe: “Bayookulwisya, pele tabakooyookuzunda pe, nkaambo ndi ayebo, nzookuvuna, mbwaamba Jehova.” (Jeremiya 1:19) Ee, tulizi kuti aabo balwana Leza tabakazwidilili pe!
Ino Inga Mwaingula Buti?
• Nkaambo nzi babelesi ba Jehova ncobali mukulwanwa?
• Muunzila nzi basikukazya mobalwana bantu ba Jehova?
• Nkaambo nzi ncotukonzya kubaa lusyomo lwakuti aabo ibalwana Leza tabakazwidilili pe?
[Cifwanikiso icili apeeji 24]
Jeremiya wakasyomezyegwa kuti Jehova wakali kuyoobaanguwe
[Cifwanikiso icili apeeji 26]
Basikufwutuka muzilabba zyabuzike
[Cifwanikiso icili apeeji 26]
Kulwana Bakamboni ba Jehova kwabbungankamu
[Cifwanikiso icili apeeji 26]
J. F. Rutherford abeenzinyina
[Cifwanikiso icili apeeji 29]
Basikulwana Leza tiibakazwidilila pe nobakalwana Jesu