Amagedoni Ino Bantu Bamwi Baamba Kuti Ninzi?

“Lino akababunganya antoomwe kubusena butegwa Amagedoni mu Chihebulayo.”—CIYUBUNUZYO 16:16.

Ncinzi ciboola mumizeezo yanu mwamvwa bbala lya “Amagedoni”? Ambweni muyeeya ntenda mpati. Nokuba kuti bbala eeli lijanika buyo ciindi comwe mu Bbaibbele, basimubweza twaambo alimwi abasololi bazikombelo balaliinduluka-induluka kulyaamba.

Sena njiisyo zidumide kujatikizya Amagedoni zileendelana ancoliyiisya Bbaibbele? Cilayandika kuzyiba bwiinguzi. Nkaambo nzi? Nkaambo kasimpe kajatikizya Amagedoni kalakonzya kumupa kuleka kuyoowa, kuyumya bulangizi bwanu bwakumbele, alimwi akumugwasya kucinca mbomuyeeya kujatikizya Leza.

Amubone mibuzyo yotatwe iitobela alimwi amweezyanisye njiisyo zidumide kujatikizya Amagedoni acini ncoliyiisya Bbaibbele.

1. SENA AMAGEDONI NINTENDA IYOOLETWA ABANTU?

Basimubweza twaambo abasikuvwuntauzya kanji-kanji balalibelesya bbala lyakuti “Amagedoni” kupandulula ntenda ziletwa abantu. Mucikozyanyo, Nkondo Yanyika Yoonse Yakusaanguna a Yabili zyakali kwaambwa kuti ninkondo ya Amagedoni. Nizyakainda nkondo eezyi, bantu bakali kuyoowa kuti ba United States alimwi aba Soviet Union balatalika kulwana. Basimubweza twaambo bakayiita kuti “Amagedoni yamulilo wanyukkiliya.” Mazuba aano, basikuvwuntauzya ibayoowa kusofwaala kwanyika kukonzya kupa kucinca kwambobuca, balacenjezya kuboola kwa “climate Armageddon.”

Bupanduluzi bwabo ncobwaamba: Amagedoni ncintu buyo cicitika cijaya bantu banyina mulandu. Kuti mfwulumende zyakakilwa kweendelezya cabusongo, nyika iyoonyonyookela limwi.

Ibbaibbele Ncoliyiisya: Leza takalekeli bantu kunyonyoona nyika. Ibbaibbele litwaambila kuti Jehovaa kunyina naakalenga nyika kuti “ibe yalupilingano pe.” Muciindi caboobo, wakaibumba kuti “ikalwe bantu.” (Isaya 45:18) Muciindi cakulekela nyika kuti inyonyoonwe abantu, Leza ‘uyoonyonyoona baabo banyonyoona nyika.’—Ciyubunuzyo 11:18.

2. SENA AMAGEDONI NINTENDA IILICITIKILA?

Basimubweza twaambo zimwi ziindi babelesya bbala lyakuti “Amagedoni” kwaamba ntenda zipati zilicitikila. Mucikozyanyo, mumwaka wa 2010, lipooti yomwe yakaamba kujatikizya “‘Amagedoni’ yakacitika ku Haiti.” Yakali kupandulula kupenga, kunyonyoonwa, alimwi akufwa kwabantu akaambo kamuzuzumo mupati wakacitika mucisi eeco. Basimubweza twaambo alimwi abasikupanga mafilimu tababelesyi buyo bbala eeli kuzyintu zyakacitika kale, pele akuzyintu eezyo nzyobayoowa kuti ziyoocitika. Mucikozyanyo, balalibelesya bbala lyakuti “Amagedoni” kupandulula kupwayana kwanyika anyenyeezi.

Bupanduluzi bwabo ncobwaamba: Amagedoni ncintu buyo cicitika cijaya bantu banyina mulandu. Kunyina ncomukonzya kucita kutegwa mulikwabilile.

Ibbaibbele Ncoliyiisya: Amagedoni tacili cintu buyo cicitika cijaya kufwumbwa bantu. Muciindi caboobo, basizibi balikke mbabayoonyonyoonwa lya Amagedoni. Ibbaibbele lisyomezya kuti lino-lino “sizibi takooyooba wo; unooyeeya nkwaakabede, pele takooyooba nkuko.”—Intembauzyo 37:10.

3. SENA LEZA UYOOINYONYOONA NYIKA CIINDI CA AMAGEDONI?

Bantu bamuzikombelo zinji basyoma kuti kuyakuba kuzwangana kwamamanino akati kabantu bali kabotu abasizibi calo ciyoopa kuti nyika yesu imane. Ibuvwuntauzyi bwakacitwa ku United States aba Princeton Survey Research Associates bakajana kuti 40 pesenti yabantu bapati basyoma kuti nyika iyoomana “ankondo ya Amagedoni.”

Ncozyaamba njiisyo zyabo: Bantu tiibakalengelwa kuti kabapona anyika kukabe kutamani, alimwi nyika ayalo tiiyakalengelwa kuti kailiko lyoonse. Leza wakalenga bantu amuzeezo wakuti aciindi cimwi bakafwe boonse.

Ibbaibbele Ncoliyiisya: Cakusalazya Bbaibbele lyaamba kuti Leza “wakabika nyika antalisyo zyayo, kuti itabi niizungaana.” (Intembauzyo 104:5) Kujatikizya bantu bayookkala munyika, Bbaibbele lyaamba kuti: “Balulami bayookona nyika, bayookala alinjiyo lyoonse.”—Intembauzyo 37:29.

Masimpe, Bbaibbele lilazikazya njiisyo zidumide kujatikizya Amagedoni. Aboobo, ino kasimpe nkali?

[Bupanduluzi buyungizidwe]