MAKANI AAYEEME AMUTWE UULI ACIVWUMBYO: CILAKONZYEKA KUPONA BUUMI BUKKOMANISYA
Sena Ncobeni Cilakonzyeka Kupona Buumi Bukkomanisya?
“Myaka yabuumi bwesu ili makumi aali musanu aabili,na tuli basinguzu ambweni ilasika kumakumi aali musanu aatatu; pele bunji bwayo makatazyo buyo amapenzi.”—Intembauzyo 90:10.
EELO kaka makani aaya ngamasimpe! Buumi munyika iino buzwide “makatazyo alimwi amapenzi.” Ambweni kuli nomwakalibuzyide kuti, ‘Mwati inga cakonzyeka kupona buumi bukkomanisya mazuba aano?’
Mucikozyanyo, amubone cakabacitikila ba Maria. Lyoonse bakali buyo kabotu, pele lino, nobasisya myaka yakuzyalwa iili 84, tabacikonzyi kuzwa aŋanda balikke. Mizeezo yabo icibeleka buyo kabotu, pele kulibonya kuti walo mubili taucijisi nguzu. Ino inga balimvwa buti kuti buumi buli boobu bulakkomanisya?
Ino mbuti kujatikizya ndinywe? Ambweni cimwi ciindi kuli nomwakalibuzyide naa buumi bwanu bulaampindu. Mulimo wanu ulakonzya kuti kauli wakucita zyintu cakwiinduluka-induluka, kaukatazya, alimwi akutanoneezya. Bantu banji balakonzya kuti kabataubikkili maano mulimo ngomucita. Nokuba kuti buumi bwanu buli kabotu lino, mulakonzya kuti kamulibilika kujatikizya ciyakucitika kumbele. Zimwi ziindi, mulakonzya kulimvwa kulendelelwa naa kutyompwa. Mumukwasyi wanu inga kamujisi mapenzi. Ambweni mwakafwidwa muyandwa wanu. Mwaalumi uutegwa André wakali kumvwana kapati abausyi, balo ibakaciswa cakutayeeyelwa akufwa. André cakamucisa kapati cakuti wakalimvwa kuti takacilubi eeci cakamucitikila.
Kunyina makani naa ndipenzi nzi ndyotukonzya kujana, kuli cintu cimwi ciyandika kapati ncotweelede kuzyiba: Sena ncobeni cilakonzyeka kupona buumi bukkomanisya? Tulakonzya kubujana bwiinguzi kwiinda mukulanga-langa buumi bwamwaalumi iwakapona anyika kwamyaka iili 2,000 yainda—Jesu Kristo. Nokuba kuti wakaswaanya mapenzi, Jesu wakapona buumi bukkomanisya ncobeni. Aboobo, andiswe tulakonzya kupona buumi bukkomanisya kuti twatobela cikozyanyo cakwe.