MAKANI AABUUMI
Twakabeleka Myaka Iili 50 Mumulimo Waciindi Coonse mu Finland Nkoili Kunyika
Akaluulwa aba Aili aba Annikki Mattila
“Ncuubauba kulinduwe kucita bupainiya. Bazyali bako boonse Mbaakamboni, alimwi balakonzya kukugwasyilizya,” oobo mbombubo mbotwakamwaambila mweenzuma umwi iwakali mumulimo waciindi coonse. Mpoonya walo wakaingula kuti: “Toonse tujisi buyo Taata omwe.” Bwiinguzi bwakwe bwakajisi ciiyo ciyandika kapati: Taateesu wakujulu ulababikkila maano babelesi bakwe boonse alimwi ulabayumya-yumya. Izyakatucitikila mubuumi zilatondezya kuti majwi aaya ngamasimpe ncobeni.
TWAKAZYALILWA afaamu yamukwasyi mwalo imwakali bana bali kkumi, mu Northern Ostrobothnia, ku Finland. Notwakacili bana, twakajatikizyigwa kapati a Nkondo Yanyika Yabili. Nokuba kuti twakali kukkala makkilomita manji kuzwa mubusena imwakali kulwaninwa nkondo, twakajatikizyigwa kapati ankondo eeyo. Ciindi madolopo aa Oulu a Kalajoki aakali afwaafwi naakanyonyoonwa abbomba ciindi camasiku, twakabona mulilo mupati. Bazyali besu bakatwaambila kuti tweelede kuyuba ikuti twabona ndeke zyankondo. Aboobo, ciindi bapati besu bakusaanguna basankwa ba Tauno, nobakatwaambila zyaparadaiso yaanyika yaluumuno, makani aayo akatunjila kapati mumoyo.
Ba Tauno bakaiya kasimpe kamu Bbaibbele ciindi nobakajisi myaka iili 14 yakuzyalwa kuzwa mumabbuku aa Basikwiiya Bbaibbele. Ciindi Nkondo Yanyika Yabili noyakatalika, ba Tauno bakakaka kunjila mulimo wabusikalumamba akaambo kakuti manjezyeezya aabo aakayiisidwe njiisyo zyamu Bbaibbele tanaakali kubazumizya, aboobo bakatolwa kuntolongo. Ciindi nobakali muntolongo bakali kupenzyegwa kapati. Kupenzyegwa ooko kwakapa kuti bayumye makanze aabo aakubelekela Jehova, ciindi nobakaangululwa, bakali basungu kapati mumulimo wakukambauka. Cikozyanyo cibotu cabapati besu cakatukulwaizya kuti tutalike kuunka kumiswaangano ya Bakamboni iyakali kucitwa mumunzi iwakali afwaafwi. Alimwi twakali kuunka akumiswaangano yacooko, nokuba kuti twakeelede kubeleka canguzu kutegwa tujane mali aamulweendo. Twakali, kusuma zisani zyabasimukoboma, kulima hanyesi, alimwi akucela micelo. Twakali kucita milimo yiindene-indene afaamu yesu, alimwi ziindi zinji tiitwakali kuunkila antoomwe kumiswaangano yacooko, twakali kwiinzyanya.
Kasimpe nkotwakaiya kujatikizya Jehova alimwi amakanze aakwe, kakapa kuti tumuyande kapati, aboobo twakaaba buumi bwesu kulinguwe. Mu 1947, toonse tobilo twakatondezya kulyaaba kwesu kwiinda mukubbapatizyigwa mumaanzi—Annikki kajisi myaka yakuzyalwa iili 15 mpoonya Aili kajisi myaka iili 17. Bapati besu ba Saimi ibakaintu, abalo bakabbapatizyigwa mumwaka ngweenya ooyu. Abamwi bapati besu ba Linnea ibakakwetwe, twakabayiisya Bbaibbele. Balo alimwi amukwasyi wabo abalo bakaba Bakamboni ba Jehova. Notwakabbapatizyigwa, twakaba ambaakani yakucita bupainiya, aboobo twakali kucita bupainiya bwakugwasyilizya ciindi aciindi.
KUTALIKA MULIMO WACIINDI COONSE
Mu 1955, twakalongela ku Kemi, dolopo lili kunyika kwini. Nokuba kuti toonse tobilo twakali kubeleka mulimo wakumubili, twakali kuyanda kuba bapainiya, nokuba boobo twakali kulibilika kuti inga twabula kwakujana mali aakubelesya. Aboobo, twakamvwana kuti katuyobola mali. Eeci nceciindi ncotwakajisi mubandi amucizyi ngotwaamba kumatalikilo aacibalo eeci. Kucita oobo kwakatugwasya kubona kuti kubelekela Jehova ciindi coonse takuyeeme buyo azyintu nzyotujisi naa kugwasyigwa abanamukwasyi. Cintu ciyandika kapati nkusyoma Tateesu wakujulu.
Aciindi eeci, twakajisi buyo mali aakubelesya kwamyezi yobilo. Aboobo, mu May 1957, twakalembela mulimo wakucita bupainiya kwamyezi yobilo mu Pello, dolopo lili mu Lapland, Finland nkoili kunyika, twakacita oobo kumwi katulibilikide kuti naa tuyakucikonzya. Myezi yobilo noyakamana, mali ngotwakayobwede oonse akaciliko, aboobo twakalembela alimwi bupainiya bwamyezi yobilo. Myezi yobilo noyakamana, mali eesu oonse akaciliko. Lino twakali masimpe kuti Jehova uyakutulanganya. Myaka iili 50 yainda katuli mumulimo wabupainiya, pele mali eesu ngotwakayobwede aciliko! Notulanga musyule kusikila lino, tulimvwa mbuli kuti Jehova walitujatide kumaanza akutwaambila kuti: ‘Mutayoowi, ndime sikumugwasya wanu.’—Is. 41:13.
Mu 1958, mulangizi wabbazu lyesu wakatwaambila kuti tweelede kulonga akuunka ku Sodankylä, mu Lapland, kutegwa tukacite bupainiya bwaalubazu. Aciindi eeco, kwakali buyo Kamboni omwe, mucizyi, mubusena oobo. Mucizyi ooyo wakaiya kasimpe munzila iikkomanisya. Mwanaakwe antoomwe abasicikolonyina bakali mulweendo kuya ku Helsinki dolopo lipati mu Finland. Ciindi bana bacikolo aaba nobakali kweendeenda mudolopo eeli, mucizyi uucembeede wakapa mwana musankwa ooyu iwakali musyule magazini ya Ngazi Yamulindizi, akumwaambila kuti akape banyina. Mwana ooyu musankwa wakacita oobo, banyina nobakabala bakabona kuti magazini eeyi yakajisi kasimpe.
Twakali kucita leenti ŋanda iyakali atala aafakitoli yakufwalila mapulanga. Miswaangano twakali kucitila muŋanda njimunya eeyi. Kumatalikilo, twakali kuswaangana buyo tone, swebo tobilo, alimwi amucizyi wakubusena oobu alimwi amwanaakwe musimbi. Twakali kubalila antoomwe zibalo zyakwiiya. Nokwakainda ciindi, mwaalumi umwi iwakayiide Bbaibbele a Bakamboni wakaboola kubelekela mufakitoli eeyi. Walo alimwi amukwasyi wakwe bakatalika kubungana akabunga kesu. Mukuya kwaciindi, walo alimwi abakaintu bakwe bakabbapatizyigwa. Mukwesu ooyu ngowakali kweendelezya miswaangano. Kuyungizya waawo, baalumi bamwi ibakali kubekela mufakitoli eeyi bakatalika kujanika kumiswaangano yesu alimwi bakakatambula kasimpe kamu Bbaibbele. Nokwakainda myaka misyoonto, kabunga kesu kakakomena cakuti yakaba mbungano.
BUKKALE BUKATAZYA MBOTWAKASWAANGANYA
Cakali kutuyumina kapati kweenda misinzo milamfwu mumulimo wakukambauka. Ciindi cacilimo twakali kweenda amaulu, kuccovwa macinga, alimwi akubelesya bwato kutegwa tusikile bantu bamucilawo cesu. Macinga eesu akali kutugwasya kapati. Alimwi twakali kwaabelesya ciindi notwakali kuunka kumuswaangano wacooko aciindi notwakali kuswaya bazyali besu ibakali kukkala kubusena ibwakali kulamfwu, musinzo uulampa makkilomita aabalilwa kumyaanda iili mbwiibede. Ciindi camupeyo, twakali kutanta bbasi mafwumofwumo kuunka kumunzi umwi iwakali mubusena oobo akukambauka kuŋanda aŋanda. Ikuti twamanizya munzi omwe, twakali kuunka kumunzi uumbi. Ziindi zinji kwakali caanda, alimwi nzila kanji-kanji zyakali kuvwumbwa caanda. Ziindi zinji twakali kweendela mutuzila twazilayi izyakali kukwelwa amabbiza mucaanda. Zimwi ziindi tuzila twaapangidwe kaindi twakali kuvwumbwa caanda, pele kumatalikilo aacilimo, caanda cakacili citeteete kacikunka maanzi cakuti twakali kweenda asyoonto-syoonto.
Akaambo kakutontola alimwi acaanda, twakaiya kusama zisani zyampeyo. Twakali kusama majansi alimwi amasookesi obilo naa otatwe alimwi amabbusu malamfwu. Nokuba boobo, ziindi zinji mabbusu eesu akali kuzula caanda. Twanootanta amatantilo aakuŋanda yesu, twakali kukunkumuna caanda mumabbusu eesu. Myoombe yazisani zyesu zyamupeyo yakali kuteta notwakali kweendela mucaanda. Ikuti kwatontola kapati, myoombe yakali kwaangana akuba mbuli kuti ncisenke. Mukaintu umwi wakatwaambila kuti: “Mweelede kuba alusyomo lwini-lwini mbwaanga mwasala kucita mulimo ooyu wakugwasyilizya ciindi camupeyo.” Buzuba oobo twakeendede makkilomita aali 11 kutegwa tusike aŋanda eeyi.
Akaambo kakuti misinzo yakali milamfwu, ziindi zinji twakali koona mumaanda aabantu bakubusena oobo. Ikuti kwatalika kusiya, twakali kulomba busena bwakoona. Maanda akali akupengelela, pele bantu bakali babotu myoyo alimwi basikusamausya beenzu, bakali kutupa aakoona alimwi acakulya. Ziindi zinji bulo bwesu bwakali cipaya cabanyama bamusyokwe, banyama bali mbuli syaambololo. Zimwi ziindi, twakali koona abotu. Mucikozyanyo, mukaintu iwakajisi ŋanda mpati wakatutola muŋanda yamujulu yabeenzu imwakali bulo buyalidwe kabotu angubo zipya izyakuti swebo tubelesye. Ziindi zinji twakali kubandika abamukamwini ŋanda makani aamu Bbaibbele mane kwasiya. Abusena bumwi, banabukwetene ibakali kukkala muŋanda eeyo bakoona kulubazu lumwi muŋanda eeyo mpoonya andiswe twakoona kulubazu lumbi. Mubandi wesu wakayeeme mu Magwalo wakazumanana mane kubucedo. Mulumi alimwi amukaintu wakwe bakali kwiinzyanya kubuzya mibuzyo.
MULIMO UULETELA BULUMBU
Busena bwiitwa kuti Lapland bujisi buyo zisyango zisyoonto butakwe masamu, nokuba boobo bubotu bulalibonya kweelana aciindi camwaka. Nokuba boobo, kulindiswe, bantu ibakali kuzumina Jehova mbabakali babotu kwiinda busena. Akati kabantu mbotwakakambaukila ibakali kukkomanina kasimpe mbabaabo bakaboolede kugonka masamu mu Lapland. Zimwi ziindi, kwakali kujanika bamaalumi banji muŋanda yomwe notwakali kuunka tobilo kuti tubakambaukile. Baalumi aaba bakali kuutambula mulumbe wamu Bbaibbele alimwi amabbuku.
Kuli zyintu zinji zikkomanisya izyakatucitikila. Bumwi buzuba, nkoloko iyakali acitisyini cabbaasi yakali kumpela amaminiti osanwe, aboobo twakajana kuti bbaasi njotwakeelede kutanta yaunka kale. Twakasala kutanta bbaasi lyuunka kumunzi umbi. Kunyina buzuba notwakabelekede mubusena oobu. Aŋanda buyo yakusaanguna, twakajana mukaintu uucili mwana-mwana iwakatwaambila kuti: “Kamwaamba nobasimbi, mwasika, ndali kumulangila.” Twakali kuyiisya Bbaibbele mupati wamukaintu ooyu. Mukaintu ooyu uucili mwana-mwana wakalombede mupati wakwe kuti atwaambile kuti tukamuswaye mubuzuba mbubwenya oobo. Nokuba boobo, mukaintu ooyo kunyina naakatwaambila. Ciiyo ca Bbaibbele cakatalisyigwa anguwe, abalo banamukwasyi bakwe ibakali kukkala aŋanda iyakali afwaafwi bakatalika kwiiya. Kakutanainda ciindi, twakatalika kubayiisyila antoomwe, boonse antoomwe bakali 12. Kuzwa leelyo, banji kuzwa mumukwasyi ooyu baba Bakamboni ba Jehova.
Mu 1965, bakatutuma kumbungano nkotubede lino, mbungano iili mu Kuusamo, munsi aabusena butontola kapati. Aciindi eeco, mbungano zyakajisi buyo basikumwaya basyoonto. Kumatalikilo, cilawo cesu cakali kulibonya kukatazya. Bantu bakajisi bubi azikombelo zyabo alimwi bakali kutusalulula. Nokuba boobo, bantu banji bakali kulilemeka Bbaibbele, calo icakali kugwasya kutalisya mibandi. Aboobo, asyoonto-syoonto twakatalika kubazyiba bantu, noyakainda myaka iibalilwa kuli yobilo, cakali cuuba-uba kutalisya ziiyo zya Bbaibbele.
TUCILI BASUNGU MUMULIMO WAKUKAMBAUKA
Mazuba aano, tatujisi nguzu zyakubeleka mumulimo wakukambauka kwamazuba manji, nokuba boobo tulatola lubazu mumulimo wakukambauka, zimwi ziindi tulacita oobo abuzuba. Mu 1987, ba Aili kabajisi myaka yakuzyalwa iili 56, bakabweza cipepa cizumizya kweenzya mootokala, bakacita oobo kwiinda mukukulwaizyigwa amujwa wabo, akaambo kaceeco, kumwaya makani mabotu kubantu cakauba-uba. Lugwasyo lumwi lwakaboola ciindi Ŋanda ya Bwami noyakayakwa, mpoonya twakalongela muŋanda iyakajatene a Ŋanda ya Bwami.
Kuyaambele nkotwabona kutupa kukkomana kapati. Ciindi notwakatalika mulimo wesu waciindi coonse mubusena ibuli kunyika mu Finland, kwakali buyo basikumwaya basyoonto ibakatanteene mubusena bupati. Mazuba aano, mbungano ziliko zilapanga bbazu. Ziindi zinji notuli kumiswaangano mipati-pati, bantu bamwi balaboola akutwaambila mazyina aabo akutubuzya naa tucibayeeya. Zimwi ziindi kujanika kuti ooyo muntu wakacili mwana ciindi notwakali kuyiisya Bbaibbele aŋanda yabo. Mbuto iyakasyangwa kaindi, yakazyala micelo!—1 Ko. 3:6.
Mu 2008, twakakkwanya myaka iili 50 mumulimo wabupainiya bwaalubazu. Tulamulumba Jehova akaambo kakuti twacikonzya kukulwaizyanya mumulimo ooyu mubotu. Buumi bwesu bwali buuba-uba, nokuba boobo kunyina ncotwakabula kale. (Int. 23:1) Lino twabona kuti kulibilika nkotwakajisi kumatalikilo kwakali kusowa buyo ciindi! Cikkomanisya ncakuti, mumyaka yoonse eeyi, Jehova watuyumya kweelana acisyomezyo cakwe cijanika mulugwalo lwa Isaya 41:10, ilwaamba kuti: “Njookuyumya, njookugwasya, ncobeni njookutabilila ajanza lyalulyo lyabululami bwangu.”
[Cifwanikiso icili apeeji 17]
Ba Annikki aba Aili mumulimo ngobapedwe lino
[Cifwanikiso icili apeeji 17]
[Maapu iili apeeji 17]
(Kutegwa mubone bwini mbwaakkede mabala, amubone bbuku lini)
[Cifwanikiso icili apeeji 17]
FINLAND
HELSINKI
Sodankylä
Pello
Arctic Circle
Kuusamo
Kemi
Oulu
Kalajoki
[Cifwanikiso icili apeeji 18]
Kuzwa kulumwensyi: Ba Matti (bataata), Tauno, ba Maria Emilia (bamaama), Väinö (muvwanda), Saimi, Aili, a Annikki mu 1935
[Cifwanikiso icili apeeji 18]
Kuzwa kulumwensyi: Ba Eeva Kallio, ba Saimi Mattila-Syrjälä, ba Aili, ba Annikki, aba Saara Noponen mu 1949
[Cifwanikiso icili apeeji 19]
Mulweendo katuya kumuswaangano wacooko ku Kuopio mu 1952. Kuzwa kulumwensyi: Ba Annikki, ba Aili, aba Eeva Kallio
[Cifwanikiso icili apeeji 19]
Ba Kaisu Reikko aba Aili mumulimo wakukambauka
[Majwi aakwelelezya sikubala aali apeeji 19]
Kwainda myaka iili 50 katuli mumulimo wabupainiya, pele mali eesu tucaajisi!
[Cifwanikiso icili apeeji 20]
Katuli antoomwe mumulimo wakukambauka ciindi camupeyo buzuba nokwakali kutontola
[Cifwanikiso icili apeeji 20]
Aba mbamwi babaabo mbotwakali kuyiisya Bbaibbele
[Cifwanikiso icili apeeji 21]
Nomuba mubuzuba noiwa mvwula, tulaukkomanina mulimo wakukambauka