Nobaalu—Amubakatalusye ‘Bantu Bakatede’

Ba Angela,a imucizyi uutakwetwe uujisi myaka yakuzyalwa iili muma 30 uliyoowede. Ulindila baalu. Ino ncinzi ncobayanda kumwaambila? Masimpe kuti taakwe naali kujanika kumiswaangano yoonse nsondo zisyoonto zyainda, pele ulikatede naamana kubeleka buzuba boonse kugwasya bacembeede. Kuyungizya azyintu zimulibilisya abuzuba, ulilibilikide alimwi kujatikizya banyina baciswa.

Ikuti muli umwi wabaalu baunka kuyakuswaya ba Angela, mbuti mbomukonzya kubakulwaizya? (Jer. 31:25) Kamutanaunka, ncinzi ncomukonzya kucita kulibambila kuyakukatalusya ‘muntu uukatede’ mbuli ba Angela?

AMUYEEYE BUKKALE MOBABEDE BAKWESU

Zimwi ziindi toonse tulakatala akaambo kamilimo yakumubili naa mikuli yakumuuya. Mucikozyanyo, musinsimi Daniele ‘wakawizuka’ naakatambula cilengaano ncaatakali kukonzya kumvwisya. (Dan. 8:27) Wakagwasyigwa ciindi mungelo Gabriyeli naakalibonya kulinguwe. Mutumwa wa Leza wakamugwasya Daniele kumvwisya, akumusyomezya kuti mipailo yakwe yakamvwugwa kuli Jehova alimwi wakamwaambila kuti wakacili “muntu uuyandwa loko.” (Dan. 9:21-23) Aciindi cimwi majwi mabotu akaambwa amungelo uumbi akamuyumya musinsimi ooyu iwakakatede.—Dan. 10:19.

Mbubwenya buyo, kamutanaswaya musyominyoko ambweni uukatede naa uutyompedwe, amujane ciindi cakuyeeya bukkale bwakwe. Ino mapenzi nzi ngajisi? Mbuti mapenzi aaya mbwaamupa kubula nguzu? Ino mbube nzi bubotu mbwatondezya? Ba Richard, mwaalu iwabeleka kwamyaka iinda ku 20, wakaamba kuti: “Zyintu nzyondibikkila kapati maano, nzyeezyo nzyobacita kabotu bakwesu.” Bakayungizya akwaamba kuti: “Kulanga-langa bukkale bwabo kanditanabaswaya, cipa kuti cuube-ube kujana nzila yakubakulwaizya kweelana anzyobayandika aciindi eeco.” Ikuti naa muyakuunka amwaalu uumbi kukuswaya ooko, amubulange-lange bukkale bwamukwesu antoomwe.

AMUBAGWASYE KULIMVWA KWAANGULUKA IBAKWESU

Masimpe kuti ikwaambila bamwi mbomulimvwa kulakonzya kumupa kufwa nsoni. Mucikozyanyo: Ambweni mukwesu ooyo cilakonzya kumukatazya kwaamba zili mumoyo baalu nobamuswaya. Mbuti mbomukonzya kumugwasya kuti aanguluke kwaamba zili mumoyo? Inga cagwasya kumweta-mweta cabulongwe akwaamba majwi mabotu kumatalikilo aakuswaya ooko. Ba Michael, balo babeleka kabali baalu kwamyaka iinda ku 40, kanji-kanji kumatalikilo aakuswaya kwabo baamba majwi aakuti: “Sena mulizyi, coolwe ncobajisi baalu nkuswaya bakwesu mumaanda aabo alimwi akubazyiba kabotu. Aboobo, ndali kukulangila kuswaya ooku sunu.”

Mulakonzya kusala kuti mupaile kumatalikilo aakuswaya ooko. Mumupailo wakwe, mwaapostolo Paulo wakaamba lusyomo, luyando alimwi akuliyumya kwabanyina. (1 Te. 1:2, 3) Kwiinda mukwaamba mbomulimvwa kujatikizya bube bubotu bwamukwesu ooyo, cimupa kulibambila mumoyo wanu alimwi akumugwasya awalo kutegwa mube amubandi uugwasya. Majwi aanu alimwi alakonzya kumuumbulizya. Mukwesu Ray, mwaalu wabeleka kwaciindi cilamfwu waamba kuti: “Zimwi ziindi, toonse tulaluba zyintu zibotu nzyotucita. Aboobo, ciindi umwi natuyeezya kujatikizya zyintu eezyo, cilatukatalusya.”

AMUBAPE CIPEGO CIMWI CAKUMUUYA

Mbubwenya mbuli Paulo, andinywe mulakonzya kupa “cipego cakumuuya” kwiinda mukubandika kaambo kamu Magwalo, nokuba kuzwa mukapango komwe buyo. (Lom. 1:11) Mucikozyanyo, mukwesu uutyompedwe ulakonzya kulimvwa kubula mpindu, mbubwenya mbuli sintembauzyo iwakalyeezyanisya ‘kunkomo yayuminina abusi’ iinyanide. (Int. 119:83, 176) Mwamana kupandulula mubufwaafwi ncaamba majwi aayo, mulakonzya kumwaambila mukwesu kuti muli masimpe kuti awalo ‘tailubide’ milawo ya Leza.

Mbubwenya buyo, cikozyanyo camali aansiliva aakasweeka cilakonzya kumunjila mumoyo mucizyi uutacisungweede mumulimo wa Leza. (Lk. 15:8-10) Mali aansiliva aakasweeka kuboneka kuti akali akati kamali manji aansiliva aakali kupa kuti lube luwenje lubotu. Kubandika cikozyanyo eeci, kulakonzya kumugwasya mucizyi kubona kuti awalo ulayandika kapati mumbungano ya Bunakristo. Mwamanizya kubandika cikozyanyo eeci, mulakonzya kutondezya Jehova mbwamubikkila maano kali umwi watubelele twakwe.

Basyomima kanji-kanji balakkomana kwaamba mbobalimvwa kujatikizya nzyobakabala mu Bbaibbele. Aboobo, tamweelede kubandika nyolikke. Mwamana kubala kapango kakonzya kubeleka mubukkale bwabo, mulakonzya kwaamba bbala lipati naa majwi akubalomba kuti baambe mbobayeeya. Mucikozyanyo, nomwamana kubala 2 Bakolinto 4:16, mwaalu ulakonzya kubuzya kuti, “Sena mulakonzya kuyeeya nzila Jehova nzyabelesya kumubukulusya?” Kubelesya nzila eeyi kulakonzya kupa kuti kube “kuyumizyanya” kwini-kwini.—Lom. 1:12.

Alimwi mulakonzya kukatalusya musyominyoko kwiinda mukubandika muntu umwi wamu Bbaibbele iwakajisi bukkale bukozyenye abwakwe. Muntu uutyompedwe ulakonzya kulimvwa mbubwenya mbobakalimvwa ba Hana a Epafrodita, balo bakatyompedwe pele ibakazumanana kuba bantu bayandika mumeso aa Leza. (1 Sam. 1:9-11, 20; Flp. 2:25-30) Ikuti bukkale kabuzumizya mulakonzya kubandika zikozyanyo zibotu zyamu Bbaibbele.

AMUZUMANANE KUBABIKKILA MAANO

Mulakonzya kutondezya kuti mulababikkila maano bakwesu abacizyi kwiinda mukuzumanana kubalanganya kuzwa ciindi nomwakabaswaya. (Mil. 15:36) Kumamanino aakuswaya ooko, mulakonzya kubikka bubambe bwakuti mukabelekele antoomwe mumulimo wamumuunda. Ba Bernard, mwaalu iwabeleka kwaciindi cilamfwu, ciindi nobaswaanganya mukwesu naa mucizyi ngobakaswayide caino-ino, cabupampu balabuzya kujatikizya lulayo ndobakapa, kabati: “Amundaambile, sena lwakabeleka?” Kwiinda mukubikkila maano munzila eeyi, muyakuzyiba naa kuciyandika lugwasyo lumbi.

Kwiinda zyoonse, bakwesu abacizyi bayanda kulimvwa kuti mulababikkila maano, mulabamvwisya alimwi mulabayanda. (1 Te. 5:11) Aboobo, kamutanacita lweendo lwabweembezi, amujane ciindi cakuyeeya bukkale bwamukwesu ooyo. Amwaapailile makani aaya. Amusale magwalo aayelela. Kuti mwacita oobo, muyakujana majwi aayelela aayakukatalusya ‘bantu bakatede.’

[Bupanduluzi buyungizidwe]

[Cifwanikiso icili apeeji 29]

Kamutanamuswaya musyominyoko, amulange-lange bukkale bwakwe

[Zifwanikiso izili apeeji 30]

Basyomima kanji-kanji balakkomana kwaamba mbobalimvwa kujatikizya nzyobakabala mu Bbaibbele

[Cifwanikiso icili apeeji 31]

Amuzumanane kubabikkila maano