Ikuswaya Kunga Kulagwasya
1 Wakali kkomene Zakayu naakatambula Jesu mweenzu wakwe muŋanda yakwe. Elyo kuswaya oko kwakamugwasya cini-cini!—Lk. 19:2-9.
2 Sunu, mbwaanga Jesu Kristo ngo Mutwe wambungano, ulimukweendelezya baalu kuti ‘beembele butanga bwa-Leza.’ (1 Pet. 5:2, 3; Joh. 21:15-17) Kunze lyakuyiisya ciindi camiswaangano alimwi akusolola mumulimo wamumuunda, ibalangizi mumbungano bapa lugwasyo lwaluyando alimwi lugaminina omwe-omwe wabasimbungano. Aboobo, ciindi aciindi mulakonzya kulangila kupegwa lulayo lumugeme kuzwa kubaalu, kumunzi wanu nokuba ku Ŋanda ya Bwami, nomubeleka antoomwe ambabo mumulimo wamumuunda nomuba muziindi zimbi. Sena mweelede kuyoowa nobamuswaya baalu? Peepe. Ikumuswaya nkobamuswaya takwaambi kuti kuli mpomulubizya muzintu zimwi. Elyo, ino kulaamulimo nzi kuswaya kwabweembezi?
3 Paulo wakati wakali kuyandisisya kubaswaya banyina kutegwa ‘abone mbobeenda.’ (Inc. 15:36) Inzya, mbwaanga mbeembezi basiluyando, ibaalu balayandisisya kubona mbuli mbomupona. Bayanda kumugwasya munzila yakumuuya iinga yamugwasya akumuyumya. Ikulanganisigwa kutugeme kuli boobo Imweembezi wesu siluyando Jehova, nkwayandisiya kuti kucitwe kuli omwe-omwe wandiswe.—Ezk. 34:11.
4 Amubatambule Camaanza Obile Nobamuswaya Baalu: Imbaakani ya Paulo yakuswaya babunyina yakali ‘yakubaabila cimwi cipego camuuya cakubayumya-yumya alimwi akuti bakayumizyanye mulusyomo.’ (Baloma 1:11, 12, BT) Toonse tuyandika kukulwaizigwa munzila yakumuuya mumazubaano aamamanino aakatazya, alimwi tuyandika lugwasyo kutegwa tuzumanane kuyuma mulusyomo. Ikuti naa kuswaya kwabweembezi mwakutambula kabotu, cakutadooneka kuyooba kwakuyumizyanya kubotu.
5 Amulumbe lugwasyo lunji lujanwa mumulimo wabaalu wabweembezi. Ikuti naa kuli makani amwi naa mubuzyo ngomulibilika, amuyeeye kuti ibaalu ncobali mumbungano nkuti bagwasye. Muteenkeenki kubandika ambabo makani aali oonse aakonzya kuti ali mukunyonganya bukkale bwanu munzila yakumuuya. Amutondezye kulumba kububambe obu mbwabikkide Jehova alimwi amusekelele muzilongezyo kuswaya oku ncokunga kwaleta.