MIBUZYO YAMU BBAIBBELE YAINGULWA

Sena Ncobeni Bbaibbele ndi Jwi lya Leza?

Tacigambyi ikuti Bbaibbele lililibedelede, nkaambo kakuti ndi Jwi lya Leza. Mabbiliyoni aama Bbaibbele asimbwa mumyaambo minji. Busongo buli mu Bbaibbele bulijisi nguzu zyakucinca bantu.—Amubale 1 Batesalonika 2:13; 2 Timoteyo 3:16.

Tulizyi kuti Bbaibbele lyakazwa kuli Leza akaambo kakuti lilaamba munzila iiluzi zintu ziyoocitika kumbele. Kunyina muntu uukonzya kucita oobo munguzu zyakwe. Mucikozyanyo, amulange-lange bbuku lya Isaya. Bbuku eeli ilyakapangwa myaka iinda kumwaanda omwe Jesu katanazyalwa lyakajanika mumpangala afwaafwi a Lwizi Lutajisi Buumi. Lyaamba kuti munzi wa Babuloni wakali kuyooba tongo. Makani aaya akazuzikizyigwa kakwiindide myaka minji kuzwa Jesu naakamanizya mulimo wakwe waanyika.—Amubale Isaya 13:19, 20; 2 Petulo 1:20, 21.

Ino Bbaibbele lyakalembwa buti?

Bbaibbele lyakalembwa mumyaka iinda ku 1,600. Kwakali basikulemba Bbaibbele babalilwa ku 40 alimwi bakalemba makani aajisi mutwe omwe aatakazyanyi. Ino eeci cakakonzyeka buti? Leza wakabasololela mukulemba.—Amubale 2 Samuele 23:2.

Zimwi ziindi Leza wakali kubandika abasikulemba Bbaibbele kwiinda mubangelo, zilengaano, alimwi aziloto. Kanji-kanji, Leza wakali kubapa mizeezo yakwe akubazumizya kuti basale majwi ngobakonzya kubelesya kulemba mulumbe wakwe.—Amubale Ciyubunuzyo 1:1; 21:3-5.