MAKANI AAYEEME AMUTWE UULI ACIVWUMBYO | MULAKONZYA KUMVWA NCOLYAAMBA BBAIBBELE
Ikaambo Ncomweelede Kumvwa Ncolyaamba Bbaibbele
“Bbaibbele ndibbuku lizyibidwe kapati muzikombelo. Pele ba Chainizi balibona kuti ndibbuku lyabamakuwa alimwi taliyandiki pe.”—Ba LIN, baku CHINA.
“Tandikonzyi kwaamvwisya naaba mabbuku eesu aasalala aa Chihindu. Aboobo ino inga ndacikonzya buti kumvwisya Bbaibbele?”—Ba AMIT, baku INDIA.
“Ndilalilemeka Bbaibbele akaambo kakuti ndibbuku lyakaindi alimwi ndakamvwa kuti ndeliinda kuulwa munyika. Pele tandinalibwene pe.”—Ba YUMIKO, baku JAPAN.
Bantu banji munyika balalilemeka kapati Bbaibbele. Pele inga kabazyi buyo makani masyoonto aajanika mu Bbaibbele, naa kutazyibila limwi aali woonse. Oobu mbocibede kujatikizya bantu banji baku Asia, alimwi abaabo bali mumasi oomo Bbaibbele molijanika kapati.
Nokuba boobo, mulakonzya kulibuzya kuti, ‘Nkaambo nzi ncondeelede kuba aaluyandisisyo lwakumvwa ncolyaamba Bbaibbele?’ Kumvwa ncolyaamba bbuku eeli lisetekene kuyoomugwasya:
Kujana lukkomano akukkutila
Kulwana mapenzi aamumukwasyi
Kulwana penzi lyakulibilika
Kuba azilongwe zibotu
Kubelesya kabotu mali
Mucikozyanyo, amubone ba Yoshiko, baku Japan. Bakali kulibuzya naa mu Bbaibbele mujanika makani aali buti, mpoonya bakayeeya kuti balibale. Ino ncinzi cakacitika? Bakaamba kuti: “Bbaibbele lyandigwasya kuzyiba mpindu yabuumi alimwi abulangizi bwakumbele,” bakazumanana akwaamba kuti: “Tandicilimvwi kubula mpindu.” Ba Amit, ibaambwa kumatalikilo, bakayeeya kulilingaula Bbaibbele lwabo beni. Bakaamba kuti: “Ndakagambwa kapati kuti Bbaibbele lilijisi makani aagwasya kumuntu uuli oonse.”
Bbaibbele lyabagwasya kapati bantu banji. Sena inga tiimwayanda kulilingaula nobeni akubona mbolikonzya kumugwasya?